ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་སྐོར་གྱི་ཀྲུང་གུང་ཀྲུང་དབྱང་གི་གཏན་འབེབས།
（2024ལོའི་ཟླ་7ཚེས་18ཉིན་ཀྲུང་གོ་གུང་ཁྲན་ཏང་སྐབས་ཉི་ཤུ་པའི་ཀྲུང་དབྱང་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ཐེངས་གསུམ་པའི་ཐོག་གྲོས་འཆམ་བྱུང་བ）
གཉིས། ཆུ་ཚད་མཐོ་བའི་སྤྱི་ཚོགས་རིང་ལུགས་ཀྱི་ཁྲོམ་རའི་དཔལ་འབྱོར་སྒྲིག་སྲོལ་འཛུགས་དགོས།
ཆུ་ཚད་མཐོ་བའི་སྤྱི་ཚོགས་རིང་ལུགས་ཀྱི་ཁྲོམ་རའི་དཔལ་འབྱོར་སྒྲིག་སྲོལ་ནི་ཀྲུང་གོའི་ལུགས་ཀྱི་དེང་རབས་ཅན་གྱི་འགན་སྲུང་གལ་ཆེན་ཡིན། ཁྲོམ་རའི་ལམ་སྲོལ་གྱི་ནུས་པ་ངེས་པར་དུ་འདོན་སྤེལ་སྔར་ལས་ལེགས་པ་བྱས་ཏེ། སྔར་བས་དྲང་སྙོམས་དང་སྔར་བས་གསོན་ཤུགས་ལྡན་པའི་ཁྲོམ་རའི་ཁོར་ཡུག་བསྐྲུན་ནས། ཐོན་ཁུངས་བགོ་སྒྲིག་གི་ལས་ཆོད་ཆེས་ལེགས་སྒྱུར་དང་ཕན་འབྲས་ཆེ་ཤོས་སུ་འགྱུར་བར་བྱེད་དགོས། “གློད་ནས་འཁྲུག་པོར་གཏོང་ཐུབ”ལ“དོ་དམ་ཡང་བྱེད་ཐུབ་པ”དང་། སྔར་ལས་ལེགས་པར་ཁྲོམ་རའི་སྒྲིག་ལམ་སྲུང་སྐྱོང་བྱེད་པ་དང་། ཁྲོམ་རའི་འཐུས་ཤོར་བྱུང་ས་ཁ་གསབ་བྱེད་དགོས། རྒྱལ་དམངས་དཔལ་འབྱོར་རེས་འཁོར་ཐོགས་མེད་ཡོང་བ་བྱས་ནས་སྤྱི་ཚོགས་ཡོངས་ཀྱི་ནང་སྐྱེས་སྒུལ་ཤུགས་དང་གསར་གཏོད་ཀྱི་གསོན་ཤུགས་སྐུལ་སློང་བྱེད་དགོས།
(5) “གཡོ་འགུལ་སྤུ་ཙམ་མེད་པ་གཉིས”རྒྱུན་འཁྱོངས་དང་དོན་འཁྱོལ་བྱེད་དགོས། སྤྱི་ལ་དབང་བའི་ལམ་ལུགས་ཀྱི་དཔལ་འབྱོར་གཡོ་འགུལ་སྤུ་ཙམ་མེད་པའི་སྒོ་ནས་སྲ་བརྟན་དང་འཕེལ་རྒྱས་གཏོང་བ་དང་། སྤྱི་ལ་དབང་བ་མ་ཡིན་པའི་ལམ་ལུགས་ཀྱི་དཔལ་འབྱོར་འཕེལ་རྒྱས་ཡོང་བར་གཡོ་འགུལ་སྤུ་ཙམ་མེད་པའི་སྒོ་ནས་བསྔགས་སྐུལ་དང་། རྒྱབ་སྐྱོར། ཁྲིད་སྟོན་བཅས་བྱས་ཏེ། དབང་བའི་ལམ་ལུགས་སྣ་ཚོགས་ཀྱི་དཔལ་འབྱོར་གྱིས་ཁྲིམས་ལྟར་འདྲ་མཉམ་ཐོག་ཐོན་སྐྱེད་བདག་རྐྱེན་བེད་སྤྱོད་བྱེད་པ་དང་། དྲང་སྙོམས་ཀྱིས་ཁྲོམ་རའི་འགྲན་རྩོད་ནང་ཞུགས་པ། འདྲ་མཚུངས་ཐོག་བཅའ་ཁྲིམས་ཀྱི་སྲུང་སྐྱོང་འཐོབ་པ་བཅས་ལ་ཁག་ཐེག་བྱས་ནས། དབང་བའི་ལམ་ལུགས་སྣ་ཚོགས་ཀྱི་དཔལ་འབྱོར་དགེ་མཚན་གསབ་རེས་དང་མཉམ་དུ་འཕེལ་རྒྱས་ཡོང་བར་སྐུལ་སྤེལ་གཏོང་དགོས།
གཞུང་ཁོངས་མ་རྩ་དང་གཞུང་ཁོངས་ཁེ་ལས་སྒྱུར་བཅོས་ཟབ་སྤེལ་བྱས་ཏེ། དོ་དམ་དང་ལྟ་སྐུལ་གྱི་སྒྲིག་སྲོལ་དང་ལམ་སྲོལ་འཐུས་ཚང་དུ་གཏོང་བ་དང་། འབྲེལ་ཡོད་དོ་དམ་སྡེ་ཁག་ཁག་གི་འཐབ་ཇུས་མཐུན་སྦྱོར་བྱེད་ཤུགས་ཆེ་རུ་གཏོང་བ། གཞུང་ཁོངས་དཔལ་འབྱོར་གྱི་བཀོད་པ་ལེགས་སྒྱུར་དང་གྲུབ་ཚུལ་ལེགས་སྒྲིག་ལ་སྐུལ་འདེད་གཏོང་བ། གཞུང་ཁོངས་མ་རྩ་དང་གཞུང་ཁོངས་ཁེ་ལས་དྲག་བཟང་ཆེ་གསུམ་དུ་གཏོང་བར་སྐུལ་འདེད་གཏོང་བ། ལྟེ་བའི་བྱེད་ནུས་ཆེ་རུ་སྐྱེད་པ་དང་ལྟེ་བའི་འགྲན་རྩོད་ནུས་པ་ཆེ་རུ་སྐྱེད་དགོས། རིགས་མི་འདྲ་བའི་གཞུང་ཁོངས་ཁེ་ལས་ཀྱི་བྱེད་ནུས་གནས་ངེས་སྔར་བས་ཁ་གསལ་བཟོས་ཏེ། འགན་འཁྲི་གཙོ་བོ་དང་ལས་འགན་གཙོ་བོའི་དོ་དམ་འཐུས་ཚང་དུ་གཏོང་བ་དང་། གཞུང་ཁོངས་མ་རྩའི་མ་དངུལ་གཙོ་བོར་འཇོག་ཁོངས་དང་ཁ་ཕྱོགས་ཁ་གསལ་བཟོ་དགོས། གཞུང་ཁོངས་མ་རྩ་རྒྱལ་ཁབ་ཀྱི་བདེ་འཇགས་དང་རྒྱལ་དམངས་དཔལ་འབྱོར་གྱི་སྲོག་རྩ་དང་འབྲེལ་བ་ཡོད་པའི་ལས་རིགས་གལ་ཆེན་དང་འགག་རྩའི་ཁྱབ་ཁོངས་སུ་གཅིག་བསྡུས་དང་། རྒྱལ་ཇུས་དམངས་འཚོ་དང་འབྲེལ་བ་ཡོད་པའི་སྤྱི་པའི་ཞབས་ཞུ་དང་། འཕྲལ་བསྟུན་ནུས་པ། སྤྱི་ཕན་རང་བཞིན་གྱི་ཁྱབ་ཁོངས་སོགས་སུ་གཅིག་བསྡུས། སྔོན་ཚོད་རང་བཞིན་དང་འཐབ་ཇུས་རང་བཞིན་གྱི་གསར་དར་ཐོན་ལས་སུ་གཅིག་བསྡུས་བཅས་བྱེད་པར་སྐུལ་འདེད་གཏོང་དགོས། གཞུང་ཁོངས་ཁེ་ལས་ཀྱིས་ཐོག་མའི་གསར་གཏོད་ལ་སྐུལ་འདེད་གཏོང་བའི་ལམ་ལུགས་ཀྱི་བཀོད་སྒྲིག་ཆ་ཚང་དུ་གཏོང་དགོས། གཞུང་ཁོངས་མ་རྩའི་དངུལ་འཇོག་དང་ལས་གཉེར་ཀུང་སིའི་སྒྱུར་བཅོས་ཟབ་སྤེལ་བྱེད་དགོས། གཞུང་ཁོངས་ཁེ་ལས་ཀྱིས་འཐབ་ཇུས་ཀྱི་འགན་འཁྲི་སྒྲུབ་ཚུལ་ལ་གདེང་འཇོག་བྱེད་པའི་ལམ་ལུགས་འཛུགས་པ་དང་། གཞུང་ཁོངས་ཁེ་ལས་རིགས་ཕྱེ་ནས་དཔྱད་ཞིབ་གདེང་འཇོག་བྱེད་པའི་མ་ལག་འཐུས་ཚང་དུ་གཏོང་བ། གཞུང་ཁོངས་དཔལ་འབྱོར་གྱི་འཕར་ཐང་ཞིབ་རྩིས་རྒྱག་པ་བཅས་བྱེད་དགོས། ནུས་རྒྱུ་དང་། ལྕགས་ལམ། གློག་འཕྲིན། ཆུ་བེད། སྤྱི་སྤྱོད་བྱ་གཞག་སོགས་ལས་རིགས་ཀྱི་རང་བྱུང་སྒེར་སྡེམ་ལྷུ་ཚིགས་རང་ཚུགས་ཀྱིས་ལས་གཉེར་དང་འགྲན་རྩོད་རང་བཞིན་གྱི་ལྷུ་ཚིགས་ཁྲོམ་ར་ཅན་དུ་འགྱུར་བའི་སྒྱུར་བཅོས་ལ་སྐུལ་འདེད་བཏང་ནས། ལྟ་སྐུལ་དོ་དམ་གྱི་སྒྲིག་སྲོལ་དང་ལམ་སྲོལ་ཆ་ཚང་དུ་གཏོང་དགོས།
སྤྱི་ལ་དབང་བ་མ་ཡིན་པའི་ལམ་ལུགས་ཀྱི་དཔལ་འབྱོར་འཕེལ་རྒྱས་གཏོང་བར་ཁོར་ཡུག་བཟང་པོ་སྐྲུན་པ་དང་གོ་སྐབས་སྔར་ལས་མང་བ་མཁོ་འདོན་བྱེད་པའི་བྱེད་ཕྱོགས་དང་སྲིད་ཇུས་ལ་གཞོལ་རྒྱུ་རྒྱུན་འཁྱོངས་བྱེད་དགོས། དམངས་གཉེར་དཔལ་འབྱོར་ལ་སྐུལ་འདེད་གཏོང་ཕྱོགས་སྐོར་གྱི་བཅའ་ཁྲིམས་བཟོ་དགོས། ཁྲོམ་རར་ཞུགས་འཐུས་བཀག་རྒྱ་གཙང་སེལ་ཟབ་མོ་བྱེད་པ་དང་། རྨང་གཞིའི་སྒྲིག་བཀོད་ཀྱི་འགྲན་རྩོད་རང་བཞིན་གྱི་ཁྱབ་ཁོངས་གཉེར་སྐྱོང་བྱེད་པོར་དྲང་སྙོམས་ངང་སྒོ་འབྱེད་པར་སྐུལ་འདེད་གཏོང་བ་དང་། དམངས་གཉེར་ཁེ་ལས་རྒྱལ་ཁབ་ཀྱི་ལས་གཞི་གནད་ཆེན་འཛུགས་སྐྲུན་ནང་ཞུགས་པའི་ཡུན་ཕན་ལམ་སྲོལ་འཐུས་ཚང་དུ་གཏོང་དགོས། ནུས་པ་ལྡན་པའི་དམངས་གཉེར་ཁེ་ལས་ཀྱིས་རྒྱལ་ཁབ་ཀྱི་ལག་རྩལ་གནད་ཆེན་འགག་སྒྲོལ་གྱི་ལས་འགན་སྣེ་ཁྲིད་ནས་འཁུར་དུ་ལེན་པར་རྒྱབ་སྐྱོར་བྱེད་པ་དང་། རྒྱལ་ཁབ་ཀྱི་ཚན་ཞིབ་རྨང་གཞིའི་སྒྲིག་བཀོད་གནད་ཆེན་དམངས་གཉེར་ཁེ་ལས་ལ་སྔར་བས་སྒོ་མོ་འབྱེད་དགོས། དམངས་གཉེར་ཁེ་ལས་ཀྱི་དངུལ་བསྡུ་རྒྱབ་སྐྱོར་སྲིད་ཇུས་ལམ་ལུགས་འཐུས་ཚང་དུ་བཏང་ནས་མ་དངུལ་བསྡུ་དཀའ་བ་དང་མ་དངུལ་བསྡུ་བའི་མ་གནས་མཐོ་བའི་གནད་དོན་ཐག་གཅོད་བྱེད་དགོས། ཁེ་ལས་དང་འབྲེལ་བའི་གྲོན་དངུལ་བསྡུ་བའི་ཡུན་ཕན་ལྟ་སྐུལ་དོ་དམ་དང་ཁེ་ལས་ཀྱི་རྩིས་ཐོ་འགྱངས་ཆད་ཡོད་རིགས་གཙང་འཇལ་བྱེད་པའི་བཅའ་ཁྲིམས་དང་ཁྲིམས་སྲོལ་མ་ལག་ཆ་ཚང་དུ་གཏོང་དགོས། དམངས་གཉེར་ཁེ་ལས་ཀྱི་ཡིད་རྟོན་གནས་ཚུལ་གྱི་ཕྱོགས་བསྡུས་གདེང་འཇོག་མ་ལག་གང་མགྱོགས་འཛུགས་པ་དང་། དམངས་གཉེར་ཁེ་ལས་འབྲིང་ཆུང་གི་ཡིད་རྟོན་ཆེར་སྐྱེད་ལམ་ལུགས་ཆ་ཚང་དུ་གཏོང་དགོས། དམངས་གཉེར་ཁེ་ལས་ཀྱིས་བཅོས་སྐྱོང་གྲུབ་ཚུལ་དང་དོ་དམ་ལམ་ལུགས་འཐུས་ཚང་དུ་བཏང་ནས་ཁེ་ལས་ཀྱིས་ལུགས་མཐུན་ངང་འཛུགས་སྐྲུན་དང་སྤྱོད་གཙང་གི་ཉེན་ཁ་སྔོན་འགོག་ཚོད་འཛིན་ལ་ཤུགས་རྒྱག་པར་རྒྱབ་སྐྱོར་དང་ཁྲིད་སྟོན་བྱེད་དགོས། ལས་དོན་སྒྲུབ་རིང་དང་བསྒྲུབས་རྗེས་ཀྱི་ལྟ་སྐུལ་དོ་དམ་ལ་ཤུགས་བརྒྱབ་སྟེ། དམངས་གཉེར་ཁེ་ལས་དང་འབྲེལ་བའི་སྲིད་འཛིན་ཞིབ་བཤེར་ཚད་ལྡན་དུ་གཏོང་དགོས།
ཀྲུང་གོའི་ཁྱད་ཆོས་ལྡན་པའི་དེང་རབས་ཁེ་ལས་ལམ་ལུགས་འཐུས་ཚང་དུ་གཏོང་བ་དང་། ཁེ་ལས་མཁས་ཅན་གྱི་སྙིང་སྟོབས་དར་སྤེལ་གཏོང་བ། ཁེ་ལས་རིགས་ཁག་གིས་ཐོན་ཁུངས་བདག་རྐྱེན་བེད་སྤྱོད་ལས་ཆོད་དང་གཉེར་སྐྱོང་དོ་དམ་ཆུ་ཚད་མཐོ་རུ་གཏོང་བ་དང་སྤྱི་ཚོགས་ཀྱི་འགན་འཁྲི་སྒྲུབ་པར་རྒྱབ་སྐྱོར་དང་ཁྲིད་སྟོན་བྱས་ཏེ། འཛམ་གླིང་གི་ཁེ་ལས་རྩེ་གྲ་སྔར་ལས་མང་པོ་འཛུགས་སྐྲུན་གང་མགྱོགས་བྱེད་དགོས།
(6) རྒྱལ་ཡོངས་གཅིག་གྱུར་གྱི་ཁྲོམ་ར་ཆེན་པོ་འཛུགས་དགོས། ཁྲོམ་རའི་རྨང་གཞིའི་ལམ་ལུགས་དང་སྒྲིག་སྲོལ་གཅིག་གྱུར་དང་། ཁྲོམ་རའི་ལྟ་སྐུལ་དོ་དམ་དྲང་སྙོམས་གཅིག་གྱུར། ཁྲོམ་རའི་སྒྲིག་བཀོད་ཚད་གཞི་མཐོ་བའི་འབྲེལ་མཐུད་ཡོང་བ་བཅས་ལ་སྐུལ་འདེད་གཏོང་དགོས། འགྲན་རྩོད་དྲང་སྙོམས་ལ་ཞིབ་བཤེར་བྱེད་པའི་དགོས་ངེས་ཀྱི་གཅུན་སྡོམ་ལ་ཤུགས་རྒྱག་པ་དང་། སྒེར་སྡེམ་ལ་ངོ་རྒོལ་དང་ཚུལ་མིན་འགྲན་རྩོད་ལ་ངོ་རྒོལ་བྱེད་ཤུགས་ཆེ་རུ་གཏོང་བ། རྒྱལ་ཡོངས་ཀྱི་ཁྲོམ་ར་གཅིག་གྱུར་དང་འགྲན་རྩོད་དྲང་སྙོམས་ལ་འགོག་རྐྱེན་བཟོ་བའི་གཏན་འབེབས་དང་བྱེད་སྟངས་སྣ་ཚོགས་གཙང་བཤེར་དང་མེད་པར་བཟོ་དགོས། ས་གནས་ཀྱི་ཚོང་འགུག་མ་འདྲེན་གྱི་ཁྲིམས་སྲོལ་ལམ་ལུགས་ཚད་ལྡན་དུ་བཏང་ནས། ཁྲིམས་འགལ་སྒྲིག་འགལ་ངང་སྲིད་ཇུས་ཐད་ཀྱི་གཟིགས་སྐྱོང་སྤྲོད་པའི་བྱ་སྤྱོད་གཏན་འགོག་བྱེད་དགོས། གཅིག་གྱུར་ཚད་ལྡན་དང་ཆ་འཕྲིན་མཉམ་སྤྱོད་ཀྱི་དམིགས་འགུག་དམིགས་འཇོག་དང་། སྲིད་གཞུང་དང་བྱ་གཞག་སྡེ་ཚན། གཞུང་ཁོངས་ཁེ་ལས་བཅས་ཀྱི་ཉོ་སྒྲུབ་སོགས་སྤྱི་པའི་ཐོན་ཁུངས་ཉོ་ཚོང་ལས་སྟེགས་མ་ལག་འཛུགས་པ་དང་ཆ་ཚང་དུ་གཏོང་བ་དང་། རྣམ་གྲངས་ཀྱི་ལས་རིམ་ཧྲིལ་པོ་ཡོངས་བསྒྲགས་ཀྱིས་དོ་དམ་བྱེད་པ་མངོན་འགྱུར་བྱེད་དགོས། ཁྲོམ་རའི་ཕྱོགས་བསྡུས་ལྟ་སྐུལ་དོ་དམ་བྱེད་ནུས་དང་ཆུ་ཚད་མཐོ་རུ་གཏོང་དགོས། རྒྱལ་ཁབ་ཀྱི་ཚད་གཞིའི་མ་ལག་ཆ་ཚང་དུ་བཏང་ནས་ས་གནས་ཀྱི་ཚད་གཞིའི་དོ་དམ་ལམ་ལུགས་སྒྱུར་བཅོས་ཟབ་སྤེལ་བྱེད་དགོས།
བདག་རྐྱེན་ཁྲོམ་རའི་ལམ་ལུགས་དང་སྒྲིག་སྲོལ་འཐུས་ཚང་དུ་བཏང་སྟེ། ཐོན་སྐྱེད་བདག་རྐྱེན་ཐོགས་མེད་འཁོར་རྒྱུག་ཡོང་བ་དང་། ཐོན་ཁུངས་སྣ་ཚོགས་ནུས་ཆེའི་སྒོ་ནས་བགོ་སྒྲིག་བྱེད་པ། ཁྲོམ་རའི་གཏིང་ཤུགས་གང་ལེགས་གློད་པ་བཅས་ལ་སྐུལ་འདེད་གཏོང་དགོས། གྲོང་ཁྱེར་དང་གྲོང་གསེབ་གཅིག་གྱུར་གྱི་འཛུགས་སྐྲུན་ལ་མཁོ་བའི་ས་ཆའི་ཁྲོམ་ར་སྐྲུན་དགོས། མ་རྩའི་ཁྲོམ་ར་ཚད་ལྡན་དུ་འཕེལ་རྒྱས་ཡོང་བར་སྐུལ་འདེད་གཏོང་བའི་རྨང་གཞིའི་ལམ་ལུགས་འཐུས་ཚང་དུ་གཏོང་དགོས། རྒྱལ་ཡོངས་གཞི་གཅིག་ཅན་གྱི་ལག་རྩལ་དང་གཞི་གྲངས་ཁྲོམ་ར་སྐྱེད་སྲིང་བྱེད་དགོས། ཁྲོམ་རའི་དགོས་མཁོའི་འབྲེལ་བས་གཙོར་བྱས་ནས་བདག་རྐྱེན་གྱི་རིན་གོང་ཐག་གཅོད་བྱེད་པའི་ལམ་སྲོལ་འཐུས་ཚང་དུ་བཏང་སྟེ། སྲིད་གཞུང་གིས་རིན་གོང་ཐད་ཚུལ་མིན་ཐེ་ཇུས་བྱེད་པ་བཀག་འགོག་བྱེད་དགོས། ངལ་རྩོལ་དང་། མ་རྩ། ས་ཞིང་། ཤེས་བྱ། ལག་རྩལ། དོ་དམ། གཞི་གྲངས་སོགས་ཐོན་སྐྱེད་བདག་རྐྱེན་ལ་ཁྲོམ་རས་བྱས་རྗེས་གདེང་འཇོག་བྱེད་པ་དང་། བྱས་རྗེས་ལ་གཞིགས་ནས་ཐོབ་ཆ་ཐག་གཅོད་པའི་ལམ་སྲོལ་ཆ་ཚང་དུ་གཏོང་དགོས། ཆུ་དང་། ནུས་རྒྱུ། འགྲིམ་འགྲུལ་སོགས་ཁྱབ་ཁོངས་ཀྱི་རིན་གོང་སྒྱུར་བཅོས་ལ་སྐུལ་འདེད་བཏང་སྟེ། གྲོང་མིའི་སྐས་རིམ་རྣམ་པའི་ཆུ་རིན་དང་། གློག་རིན། རླངས་རིན་བཅས་ཀྱི་ལམ་ལུགས་ལེགས་སྒྱུར་བྱེད་པ་དང་། སྣུམ་གྲུབ་མའི་རིན་གོང་གཏན་འཁེལ་ལམ་སྲོལ་འཐུས་ཚང་དུ་གཏོང་དགོས།
འཁོར་རྒྱུག་སྒྲིག་སྲོལ་འཐུས་ཚང་དུ་གཏོང་བ་དང་། ཟོག་འབྲེལ་དྲ་རྒྱ་འཕེལ་རྒྱས་མགྱོགས་སུ་གཏོང་བ། གཞི་གཅིག་འབྲེལ་མཐུད་ཀྱི་འཁོར་རྒྱུག་སྒྲིག་ལམ་དང་ཚད་གཞི་ཆ་ཚང་དུ་བཏང་ནས་སྤྱི་ཚོགས་ཡོངས་ཀྱི་ཟོག་འགྲེམས་མ་གནས་དམའ་རུ་གཏོང་དགོས། ནུས་རྒྱུ་དོ་དམ་སྒྲིག་སྲོལ་སྒྱུར་བཅོས་ཟབ་སྤེལ་དང་། རྒྱལ་ཡོངས་གཅིག་གྱུར་གྱི་གློག་ཤུགས་ཁྲོམ་ར་འཛུགས་སྐྲུན། སྣུམ་རླངས་སྦུག་དྲའི་འཁོར་སྐྱོད་བཀོད་གཏོང་ལམ་སྲོལ་ལེགས་སྒྱུར་བཅས་བྱེད་དགོས།
ནང་མཁོའི་མ་ལག་ཆ་ཚང་སྐྱེད་སྲིང་ཇེ་མགྱོགས་སུ་གཏོང་བ་དང་། སྲིད་གཞུང་དངུལ་འཇོག་གིས་རྨང་གཞིའི་རང་བཞིན་དང་། སྤྱི་ཕན་རང་བཞིན། ཡུན་རིང་རང་བཞིན་བཅས་ཀྱི་ལས་གཞི་གནད་ཆེན་འཛུགས་སྐྲུན་བྱེད་པར་རྒྱབ་སྐྱོར་བྱེད་པའི་ཡུན་ཕན་ལམ་སྲོལ་འཛུགས་པ་དང་། སྲིད་གཞུང་དངུལ་འཇོག་གིས་སྤྱི་ཚོགས་དངུལ་འཇོག་ལ་སྐུལ་ཁྲིད་ནུས་ལྡན་བྱེད་པའི་སྒྲིག་སྲོལ་དང་ལམ་སྲོལ་ཆ་ཚང་དུ་གཏོང་དགོས། མ་དངུལ་འཇོག་པར་ཞིབ་མཆན་འགོད་པའི་ལམ་ལུགས་སྒྱུར་བཅོས་ཟབ་སྤེལ་དང་། སྤྱི་ཚོགས་མ་རྩའི་དངུལ་འཇོག་གསོན་ཤུགས་སྐུལ་སློང་དང་དངུལ་འཇོག་དོན་ཐོག་འཁྱོལ་བར་སྐུལ་འདེད་གཏོང་བའི་ལམ་སྲོལ་འཐུས་ཚང་དུ་བཏང་ནས་ཁྲོམ་རས་གཙོ་ཁྲིད་བྱེད་པའི་ནུས་ལྡན་དངུལ་འཇོག་གི་ནང་སྐྱེས་འཕར་སྣོན་ལམ་སྲོལ་ཆགས་པར་བྱེད་དགོས། འཛད་སྤྱོད་རྒྱ་སྐྱེད་པའི་ཡུན་ཕན་ལམ་སྲོལ་འཐུས་ཚང་དུ་གཏོང་བ་དང་། ཚོད་འཛིན་རང་བཞིན་གྱི་བྱེད་ཐབས་ཉུང་དུ་གཏོང་བ། སྤྱི་པའི་འཛད་སྤྱོད་ལུགས་མཐུན་ངང་མང་དུ་གཏོང་བ་དང་། ཐོག་སྤེལ་དཔལ་འབྱོར་ལ་སྐུལ་འདེད་ཧུར་ཐག་གཏོང་དགོས།
(7) ཁྲོམ་རའི་དཔལ་འབྱོར་གྱི་རྨང་གཞིའི་ལམ་ལུགས་འཐུས་ཚང་དུ་གཏོང་དགོས། ཐོན་དབང་ལམ་ལུགས་འཐུས་ཚང་དུ་གཏོང་བ་དང་། དབང་བའི་ལམ་ལུགས་སྣ་ཚོགས་ཀྱི་དཔལ་འབྱོར་ཐོན་དབང་ཁྲིམས་ལྟར་འདྲ་མཉམ་ངང་ཡུན་རིང་སྲུང་སྐྱོབ་བྱས་ཏེ། ཕན་ནུས་ཆེ་བའི་ཤེས་བྱའི་ཐོན་དབང་ཕྱོགས་བསྡུས་དོ་དམ་བྱེད་པའི་སྒྲིག་སྲོལ་འཛུགས་དགོས། ཁྲོམ་རའི་ཆ་འཕྲིན་ཁྱབ་བསྒྲགས་ལམ་ལུགས་འཐུས་ཚང་དུ་གཏོང་བ་དང་། ཚོང་ལས་གསང་བ་སྲུང་སྐྱོབ་ལམ་ལུགས་འཛུགས་དགོས། དབང་བའི་ལམ་ལུགས་སྣ་ཚོགས་ཀྱི་དཔལ་འབྱོར་ཐོན་དབང་དང་ཁྲིམས་མཐུན་ཁེ་ཕན་ལ་བཙན་གནོད་བྱེད་པའི་བྱ་སྤྱོད་ལ་འགན་གཅིག་ཉེས་གཅིག་ཆད་གཅིག་ལག་ལེན་བསྟར་བ་དང་། ཆད་གཅོད་རང་བཞིན་གྱི་གུན་གསབ་ལམ་ལུགས་འཐུས་ཚང་དུ་གཏོང་དགོས། ཐོན་དབང་ལ་ཁྲིམས་བསྟར་ཁྲིམས་འཛིན་སྲུང་སྐྱོབ་བྱེད་ཤུགས་ཆེ་རུ་གཏོང་བ་དང་། སྲིད་འཛིན་དང་ཉེས་དོན་གྱི་བྱེད་ཐབས་སྤྱད་དེ་དཔལ་འབྱོར་རྩོད་གཞིར་ཐེ་ཇུས་བྱེད་རིགས་བཀག་འགོག་དང་ཡོ་བསྲང་བྱེད་པ་དང་། ཁེ་ལས་དང་འབྲེལ་བ་ཡོད་པའི་ལོག་འཁྲུལ་གྱོད་དོན་ཁྲིམས་ལྟར་ཞིབ་འབྱེད་དང་ཡོ་བསྲང་བྱེད་པའི་ལམ་སྲོལ་ཆ་ཚང་དུ་གཏོང་དགོས།
ཁྲོམ་རར་ཞུགས་འཐུས་ལམ་ལུགས་འཐུས་ཚང་དུ་བཏང་ནས་ལས་རྣམ་གསར་པ་དང་ཁྱབ་ཁོངས་གསར་པའི་ཁྲོམ་རར་ཞུགས་འཐུས་ཁོར་ཡུག་ལེགས་སྒྱུར་བྱེད་དགོས། ཐོ་བཀོད་མ་རྩ་འཇལ་སྤྲོད་ཁས་ལེན་ཐོ་འགོད་ལམ་ལུགས་སྒྱུར་བཅོས་ཟབ་སྤེལ་བྱས་ནས་ཁྲིམས་ལྟར་དུས་ཐོག་ཏུ་འཇལ་སྤྲོད་ཁས་ལེན་ལག་ལེན་བྱེད་དགོས། ཁེ་ལས་ཀྱི་མ་རྩ་སྟོངས་པའི་ལམ་སྲོལ་ཆ་ཚང་དུ་གཏོང་བ་དང་། མི་སྒེར་གྱི་མ་རྩ་སྟོངས་པའི་ལམ་ལུགས་འཚོལ་ཞིབ་བྱས་ནས་འཛུགས་པ། ཁེ་ལས་ཐོ་ཁོངས་ནས་བསུབ་པའི་ཆ་འགྲིག་སྒྱུར་བཅོས་ལ་སྐུལ་འདེད་གཏོང་བ། ཁེ་ལས་ཕྱིར་འཐེན་ལམ་ལུགས་འཐུས་ཚང་དུ་གཏོང་དགོས། སྤྱི་ཚོགས་ཀྱི་ཡིད་རྟོན་མ་ལག་དང་ལྟ་སྐུལ་དོ་དམ་ལམ་ལུགས་ཆ་ཚང་དུ་གཏོང་དགོས།
གསུམ། དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་སྒྲིག་སྲོལ་དང་ལམ་སྲོལ་ཆ་ཚང་དུ་གཏོང་དགོས།
སྤུས་ཚད་མཐོ་བའི་འཕེལ་རྒྱས་ནི་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་ལས་འགན་ཨང་དང་པོ་ཡིན། ངེས་པར་དུ་འཕེལ་རྒྱས་ཀྱི་འདུ་ཤེས་གསར་པས་སྒྱུར་བཅོས་ཀྱི་སྣེ་ཁྲིད་དེ་འཕེལ་རྒྱས་ཀྱི་དུས་རིམ་གསར་པར་གཞི་ཚུགས་པ་དང་། མཁོ་སྤྲོད་ཕྱོགས་ཀྱི་གྲུབ་ཆའི་རང་བཞིན་གྱི་སྒྱུར་བཅོས་ཟབ་སྤེལ་བྱེད་པ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་སྐུལ་ལྕག་གཅུན་འདོམས་ལམ་སྲོལ་འཐུས་ཚང་དུ་གཏོང་བ། འཕེལ་རྒྱས་ཀྱི་སྒུལ་ནུས་གསར་པ་དང་དགེ་མཚན་གསར་པ་གཏོད་པ་བཅས་བྱེད་དགོས།
(8) ཡུལ་བབ་དང་བསྟུན་ནས་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བའི་སྒྲིག་སྲོལ་དང་ལམ་སྲོལ་ཆ་ཚང་དུ་གཏོང་དགོས། གསར་བརྗེའི་རང་བཞིན་གྱིས་ལག་རྩལ་འགག་གནད་སྒྲོལ་བ་དང་། གསར་གཏོད་རང་བཞིན་གྱིས་ཐོན་སྐྱེད་བདག་རྐྱེན་བགོ་སྒྲིག་བྱེད་པ། ཐོན་ལས་རིགས་སྒྱུར་རིམ་སྤར་གཏིང་ཟབ་བྱེད་པ་བཅས་ལ་སྐུལ་འདེད་གཏོང་བ་དང་། ངལ་རྩོལ་པ་དང་། ངལ་རྩོལ་རྒྱུ་ཆས། ངལ་རྩོལ་བྱ་ཡུལ་བཅས་ལེགས་སྒྱུར་ཚན་སྡེབ་དང་གསར་སྒྱུར་མཆོང་སྐྱོད་ཡོང་བར་སྐུལ་འདེད་གཏོང་དགོས། ཐོན་ལས་གསར་པ་དང་། དཔེ་དབྱིབས་གསར་པ། སྒུལ་ནུས་གསར་པ་བཅས་འབྱུང་དུ་འཇུག་པ་དང་། ལག་རྩལ་མཐོ་གྲས་དང་། ལས་ཆོད་ཆེ་བ། སྤུས་ཚད་མཐོ་བ་བཅས་ཁྱད་ཆོས་སུ་གྱུར་པའི་ཐོན་སྐྱེད་ནུས་ཤུགས་འཕེལ་རྒྱས་གཏོང་དགོས། འགག་རྩའི་ཐུན་མོང་རང་བཞིན་གྱི་ལག་རྩལ་དང་། མདུན་གྲལ་གྱི་སྣེ་ཁྲིད་ལག་རྩལ། དེང་རབས་ལས་གྲྭའི་ལག་རྩལ། རྩ་སློག་རང་བཞིན་གྱི་ལག་རྩལ་བཅས་གསར་གཏོད་བྱེད་པར་ཤུགས་རྒྱག་པ་དང་། ཁྱབ་ཁོངས་གསར་པ་དང་འགྲན་ལམ་གསར་པའི་ལམ་ལུགས་འདོན་སྤྲོད་བྱེད་ཤུགས་ཆེ་རུ་གཏོང་དགོས། འབྱུང་འགྱུར་ཐོན་ལས་ལ་མ་དངུལ་འཇོག་གྲངས་མང་དུ་གཏོང་བའི་ལམ་སྲོལ་འཛུགས་པ་དང་། རབས་གསར་པའི་ཆ་འཕྲིན་ལག་རྩལ་དང་། མིས་བཟོས་རིག་ནུས། མཁའ་འགྲུལ་མཁའ་སྐྱོད། ནུས་རྒྱུ་གསར་པ། རྒྱུ་ཆ་གསར་པ། རྩེར་སོན་སྒྲིག་ཆས། སྐྱེ་དངོས་སྨན་རྫས། ཚད་རྡུལ་ཚན་རྩལ་སོགས་འཐབ་ཇུས་རང་བཞིན་གྱི་ཐོན་ལས་འཕེལ་རྒྱས་གཏོང་བའི་སྲིད་ཇུས་དང་བཅོས་སྐྱོང་མ་ལག་འཐུས་ཚང་དང་སྐུལ་འདེད་བཏང་སྟེ། གསར་དར་ཐོན་ལས་སྐྱོན་བྲལ་རིམ་ལྡན་ངང་འཕེལ་རྒྱས་ཡོང་བར་ཁྲིད་སྟོན་བྱེད་དགོས། རྒྱལ་ཁབ་ཀྱི་ཚད་གཞིར་བརྟེན་ནས་སྲོལ་རྒྱུན་ཐོན་ལས་ལེགས་སྒྱུར་རིམ་སྤར་མཐོར་འདེགས་དང་སྣེ་ཁྲིད་བྱེད་པ་དང་། ཁེ་ལས་ཀྱིས་རིག་གྲངས་ལག་རྩལ་དང་ལྗང་མདོག་ལག་རྩལ་སྤྱད་དེ་སྲོལ་རྒྱུན་ཐོན་ལས་སྒྱུར་བཀོད་དང་རིམ་སྤར་བྱེད་པར་རྒྱབ་སྐྱོར་བྱེད་དགོས། ཁོར་ཡུག་སྲུང་སྐྱོབ་དང་བདེ་འཇགས་སོགས་ལམ་ལུགས་ཀྱི་གཅུན་སྡོམ་བྱེད་ཤུགས་ཆེ་རུ་གཏོང་དགོས།
འབྲེལ་ཡོད་སྒྲིག་སྲོལ་དང་སྲིད་ཇུས་ཆ་ཚང་དུ་གཏོང་བ་དང་། སྤུས་གསར་ཐོན་སྐྱེད་ནུས་ཤུགས་དང་སྔར་ལས་འཚམ་པའི་ཐོན་སྐྱེད་འབྲེལ་བ་གང་མགྱོགས་ཀྱིས་ཆགས་པར་བྱེད་པ། སྔོན་ཐོན་གྱི་ཐོན་སྐྱེད་བདག་རྐྱེན་སྣ་ཚོགས་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བའི་ཕྱོགས་སུ་གཅིག་བསྡུས་བྱེད་པར་སྐུལ་འདེད་བཏང་སྟེ། བདག་རྐྱེན་ཆ་ཚང་གི་ཐོན་སྐྱེད་ལས་ཆོད་མཐོ་རུ་ཆེས་ཆེར་གཏོང་དགོས། ཕོ་ཉའི་དངུལ་འཇོག་དང་། ཉེན་ཁའི་དངུལ་འཇོག སྒེར་བསྡུས་རྐང་དབང་དངུལ་འཇོག་བཅས་སྤེལ་བར་བསྔགས་སྐུལ་དང་ཚད་ལྡན་དུ་གཏོང་བ་དང་། སྲིད་གཞུང་དངུལ་འཇོག་ཐེབས་རྩའི་ནུས་པ་སྔར་བས་ལེགས་པའི་སྒོ་ནས་འདོན་སྤེལ་བྱས་ཏེ་ངང་རིང་མ་རྩ་འཕེལ་རྒྱས་གཏོང་དགོས།
(9) དངོས་གཞིའི་དཔལ་འབྱོར་དང་གྲངས་འཛིན་དཔལ་འབྱོར་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་བའི་ལམ་ལུགས་ཆ་ཚང་དུ་གཏོང་དགོས། བཟོ་ལས་ཅན་དཔེ་གསར་སྐུལ་འདེད་མགྱོགས་སུ་གཏོང་བ་དང་། སྔོན་ཐོན་གྱི་བཟོ་སྐྲུན་ལས་རིགས་ཁྱུ་ཚོགས་སྐྱེད་སྲིང་དང་རྒྱ་ཆེར་གཏོང་བ། བཟོ་སྐྲུན་ལས་རིགས་རྩེར་སོན་ཅན་དང་། རིག་ནུས་ཅན། ལྗང་མདོག་ཅན་བཅས་ཀྱི་འཕེལ་རྒྱས་ལ་སྐུལ་འདེད་གཏོང་དགོས། ལས་རིགས་ཐུན་མོང་རང་བཞིན་གྱི་ལག་རྩལ་ལས་སྟེགས་ཁག་ཅིག་འཛུགས་སྐྲུན་བྱེད་པ་དང་། ཐོན་ལས་དཔེ་དབྱིབས་དང་ཁེ་ལས་རྩ་འཛུགས་ཀྱི་དཔེ་རྣམ་འཕོ་འགྱུར་མགྱོགས་སུ་གཏོང་བ། དགེ་མཚན་ལྡན་པའི་ཐོན་ལས་ཀྱི་སྔོན་ཁྲིད་གོ་གནས་མཐོར་འདེགས་གཏོང་བའི་སྒྲིག་སྲོལ་དང་ལམ་སྲོལ་ཆ་ཚང་དུ་གཏོང་དགོས། ཐོན་ལས་ཐེབས་རྩ་གནད་ཆེན་འཁོར་སྒྲུབ་དང་ལྟ་སྐུལ་དོ་དམ་ལམ་སྲོལ་ལེགས་སྒྱུར་བྱས་ནས། མ་དངུལ་དག་རྒྱལ་ཁབ་ཀྱི་འཐབ་ཇུས་བླང་བྱ་དང་མཐུན་པའི་ཕྱོགས་སུ་གཏོང་བར་འགན་ལེན་ཏན་ཏིག་བྱེད་དགོས། བཟོ་སྐྲུན་ལས་རིགས་ལ་བསྡུར་ཚད་ལུགས་མཐུན་གཏོང་འཇོག་མཐའ་འཁྱོངས་བྱེད་པའི་ལམ་སྲོལ་འཛུགས་པ་དང་། བཟོ་སྐྲུན་ལས་རིགས་ཀྱི་ཕྱོགས་བསྡུས་མ་གནས་ཇེ་དམའ་དང་ཁྲལ་གྲོན་ཁུར་པོ་ཇེ་ཡང་དུ་འོས་འཚམ་གཏོང་དགོས།
གྲངས་འཛིན་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བའི་སྒྲིག་སྲོལ་དང་ལམ་སྲོལ་གང་མགྱོགས་འཛུགས་པ་དང་། གྲངས་འཛིན་ཐོན་ལས་ཅན་དང་ཐོན་ལས་གྲངས་འཛིན་ཅན་ལ་སྐུལ་འདེད་གཏོང་བའི་སྲིད་ཇུས་མ་ལག་འཐུས་ཚང་དུ་གཏོང་དགོས། རབས་གསར་པའི་ཆ་འཕྲིན་ལག་རྩལ་ཕྱོགས་མཐའ་ཡོངས་དང་མུ་འབྲེལ་ཡོངས་སུ་ཁྱབ་གདལ་བེད་སྤྱོད་མགྱོགས་སུ་གཏོང་བ་དང་། བཟོ་ལས་དྲ་སྦྲེལ་འཕེལ་རྒྱས་གཏོང་བ། རྒྱལ་སྤྱིའི་འགྲན་རྩོད་ནུས་པ་ལྡན་པའི་གྲངས་འཛིན་ཐོན་ལས་ཁྱུ་ཚོགས་འཛུགས་པ་བཅས་བྱེད་དགོས། ལས་སྟེགས་དཔལ་འབྱོར་གསར་གཏོད་འཕེལ་རྒྱས་ལ་སྐུལ་འདེད་གཏོང་བ་དང་། ལས་སྟེགས་དཔལ་འབྱོར་རྒྱུན་རྣམ་ཅན་གྱི་ལྟ་སྐུལ་དོ་དམ་ལམ་ལུགས་ཆ་ཚང་དུ་གཏོང་དགོས། རྒྱལ་ཁབ་ཀྱི་གཞི་གྲངས་རྨང་གཞིའི་སྒྲིག་བཀོད་འཛུགས་སྐྲུན་དང་ལས་གཉེར་བྱེད་པ་དང་། གཞི་གྲངས་མཉམ་སྤྱོད་ཡོང་བར་སྐུལ་འདེད་གཏོང་དགོས། གཞི་གྲངས་ཐོན་དབང་གི་གཏོགས་ཁོངས་ངོས་འཛིན་དང་། ཁྲོམ་རའི་ཉོ་ཚོང་། ཁེ་དབང་བགོ་བཤའ། ཁེ་ཕན་སྲུང་སྐྱོབ་བཅས་ཀྱི་ལམ་ལུགས་གང་མགྱོགས་འཛུགས་དགོས་པ་དང་། གཞི་གྲངས་བདེ་འཇགས་བཅོས་སྐྱོང་དང་ལྟ་སྐུལ་དོ་དམ་བྱེད་ནུས་ཆེ་རུ་གཏོང་བ་དང་། ནུས་ཆེ་སྟབས་བདེ་བདེ་འཇགས་བཅས་ཡིན་པའི་གཞི་གྲངས་རྒྱལ་མཚམས་བརྒལ་བའི་འཁོར་རྒྱུག་ལམ་སྲོལ་འཛུགས་དགོས།
(10) ཞབས་ཞུའི་ལས་རིགས་འཕེལ་རྒྱས་གཏོང་བའི་སྒྲིག་སྲོལ་དང་ལམ་སྲོལ་འཐུས་ཚང་དུ་གཏོང་དགོས། ཞབས་ཞུའི་ལས་རིགས་འཕེལ་རྒྱས་གཏོང་བར་རྒྱབ་སྐྱོར་བྱེད་པའི་སྲིད་ཇུས་མ་ལག་འཐུས་ཚང་དུ་གཏོང་བ་དང་། ཞབས་ཞུའི་ལས་རིགས་ཀྱི་ཞིབ་རྩིས་ལེགས་སྒྱུར་བྱས་ནས། ཞབས་ཞུའི་ལས་རིགས་ཚད་གཞི་ཅན་གྱི་འཛུགས་སྐྲུན་ལ་སྐུལ་འདེད་གཏོང་དགོས། ལྷུ་ཚིགས་གཙོ་གནད་ལ་དམིགས་ཏེ་ཁྱབ་ཁོངས་ཕྱེ་ནས་ཐོན་སྐྱེད་རང་བཞིན་གྱི་ཞབས་ཞུའི་ལས་རིགས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས། ཐོན་ལས་དྲ་སྦྲེལ་ལས་སྟེགས་འཕེལ་རྒྱས་གཏོང་བ་དང་། ས་ཁུལ་ལས་བརྒལ་བའི་གཉེར་སྐྱོང་སྲིད་འཛིན་བཀག་རྒྱ་མེད་པར་བཟོས་ཏེ། ཐོན་སྐྱེད་རང་བཞིན་གྱི་ཞབས་ཞུའི་ལས་རིགས་མཉམ་འདྲེས་འཕེལ་རྒྱས་ཡོང་བར་སྐུལ་འདེད་གཏོང་དགོས། འཚོ་བའི་རང་བཞིན་གྱི་ཞབས་ཞུའི་ལས་རིགས་སྣ་མང་ཅན་དུ་འཕེལ་རྒྱས་གཏོང་བའི་ལམ་སྲོལ་ཆ་ཚང་དུ་གཏོང་དགོས། མཚམས་སྦྱོར་ཞབས་ཞུའི་སྒྲིག་གཞིའི་ཁྲིམས་སྲོལ་ལམ་ལུགས་མ་ལག་འཐུས་ཚང་དུ་གཏོང་བ་དང་། མཚམས་སྦྱོར་ཞབས་ཞུའི་སྒྲིག་གཞིས་ཁ་དན་ཚིག་ལ་གནས་པ་དང་ཁྲིམས་ལྟར་འགན་འཁྲི་སྒྲུབ་པར་སྐུལ་འདེད་གཏོང་དགོས།
(11) དེང་རབས་ཅན་གྱི་རྨང་གཞིའི་སྒྲིག་བཀོད་འཛུགས་སྐྲུན་གྱི་སྒྲིག་སྲོལ་དང་ལམ་སྲོལ་ཆ་ཚང་དུ་གཏོང་དགོས། རྨང་གཞིའི་སྒྲིག་བཀོད་དཔེ་གསར་གྱི་འཆར་འགོད་དང་ཚད་གཞིའི་མ་ལག་འཛུགས་པ་དང་། རྨང་གཞིའི་སྒྲིག་བཀོད་དཔེ་གསར་གྱི་མཉམ་འདྲེས་བེད་སྤྱོད་ལམ་སྲོལ་ཆ་ཚང་དུ་གཏོང་བ། སྲོལ་རྒྱུན་གྱི་རྨང་གཞིའི་སྒྲིག་བཀོད་གྲངས་འཛིན་ཅན་དུ་སྒྱུར་བཀོད་བྱེད་པར་སྐུལ་འདེད་གཏོང་བ། སྣ་མང་ཅན་གྱི་དངུལ་འཇོག་དངུལ་བསྡུའི་ཐབས་ལམ་རྒྱ་སྐྱེད་གཏོང་བ། རྨང་གཞིའི་སྒྲིག་བཀོད་གནད་ཆེན་འཛུགས་སྐྲུན་གྱི་མཐུན་སྦྱོར་ལམ་སྲོལ་ཆ་ཚང་དུ་གཏོང་བ་བཅས་བྱེད་དགོས། ཕྱོགས་བསྡུས་འགྲིམ་འགྲུལ་སྐྱེལ་འདྲེན་མ་ལག་སྒྱུར་བཅོས་ཟབ་སྤེལ་དང་། ལྕགས་ལམ་སྒྲིག་སྲོལ་སྒྱུར་བཅོས་ལ་སྐུལ་འདེད་བཏང་སྟེ། ཀུན་སྤྱོད་མཁའ་འགྲུལ་དང་དམའ་དབྱིངས་དཔལ་འབྱོར་འཕེལ་རྒྱས་གཏོང་བ་དང་། གྲོན་བསྡུའི་གཞུང་ལམ་སྲིད་ཇུས་ལེགས་སྒྱུར་བྱེད་པར་སྐུལ་འདེད་གཏོང་དགོས། མཚོ་ཐོག་སྐྱེལ་འདྲེན་འགན་བཅོལ་གྱི་འགན་ལེན་ནུས་པ་དང་གོ་ལ་ཧྲིལ་པོའི་ཞབས་ཞུའི་ཆུ་ཚད་མཐོ་རུ་གཏོང་བ་དང་། མཚོ་དོན་འདུམ་གཅོད་ལམ་ལུགས་དང་སྒྲིག་སྲོལ་གསར་གཏོད་བྱེད་པར་སྐུལ་འདེད་གཏོང་དགོས། ཆུ་བེད་ལས་གྲྭ་གནད་ཆེན་འཛུགས་སྐྲུན་དང་། འཁོར་སྐྱོད། དོ་དམ་བཅས་ཀྱི་ལམ་སྲོལ་ཆ་ཚང་དུ་གཏོང་དགོས།
(12) ཐོན་ལས་མུ་འབྲེལ་དང་འདོན་སྤྲོད་མུ་འབྲེལ་གྱི་ལྡེམ་ཤུགས་དང་བདེ་འཇགས་ཆུ་ཚད་མཐོ་རུ་གཏོང་བའི་ལམ་ལུགས་ཆ་ཚང་དུ་གཏོང་དགོས། རང་བདག་དང་ཚོད་འཛིན་ཐུབ་པའི་ཐོན་ལས་མུ་འབྲེལ་དང་འདོན་སྤྲོད་མུ་འབྲེལ་གང་མགྱོགས་འཛུགས་པ་དང་། འདུས་གྲུབ་གློག་ལམ་དང་། བཟོ་ལས་འཕྲུལ་འཁོར་ཨ་མ། སྨན་བཅོས་སྒྲིག་ཆས། བརྟག་དཔྱད་ཡོ་བྱད། རྨང་གཞིའི་མཉེན་ཆས། བཟོ་ལས་མཉེན་ཆས། སྔོན་ཐོན་རྒྱུ་ཆ་སོགས་ཐོན་ལས་མུ་འབྲེལ་གཙོ་གནད་འཕེལ་རྒྱས་ཤུགས་ཆེར་གཏོང་བའི་སྒྲིག་སྲོལ་དང་ལམ་སྲོལ་ཆ་ཚང་དུ་གཏོང་བ་དང་། མུ་འབྲེལ་ཡོངས་སུ་ལག་རྩལ་འགག་སྒྲོལ་དང་གྲུབ་འབྲས་བཀོལ་སྤྱོད་བྱེད་པར་སྐུལ་འདེད་གཏོང་དགོས། ཐོན་ལས་མུ་འབྲེལ་དང་འདོན་སྤྲོད་མུ་འབྲེལ་གྱི་བདེ་འཇགས་ཉེན་ཁ་དཔྱད་དཔོག་དང་ཁ་གཏད་འཇལ་བའི་ལམ་སྲོལ་འཛུགས་དགོས། ཐོན་ལས་རྒྱལ་ནང་དུ་སྐས་རིམ་རིམ་ལྡན་སྤོ་སྒྱུར་བྱེད་པའི་མཐུན་སྦྱོར་ལམ་སྲོལ་འཐུས་ཚང་དུ་གཏོང་བ་དང་། ཕར་གཏོང་ས་དང་ཚུར་ལེན་སས་ཁེ་ཕན་མཉམ་སྤྱོད་བྱེད་པར་སྐུལ་འདེད་གཏོང་དགོས། རྒྱལ་ཁབ་འཐབ་ཇུས་ཀྱི་དབུས་ཁུལ་དང་འགག་རྩའི་ཐོན་ལས་ཀྱི་གྲབས་ཆ་འཛུགས་སྐྲུན་བྱེད་དགོས། རྒྱལ་ཁབ་གསོག་འཇོག་མ་ལག་གང་མགྱོགས་འཐུས་ཚང་དུ་གཏོང་དགོས། འཐབ་ཇུས་རང་བཞིན་གྱི་གཏེར་རྫས་ཐོན་ཁུངས་འཚོལ་ཞིབ་དང་། ཐོན་སྐྱེད། འདོན་སྤྲོད། གསོག་ཉར། ཕྱིར་འཚོང་བཅས་ཀྱི་གཅིག་གྱུར་འཆར་འགོད་དང་འབྲེལ་མཐུད་མ་ལག་འཐུས་ཚང་དུ་གཏོང་དགོས།