བོད་ཀྱི་གསོ་བ་རིག་པ་ནི་ཀྲུང་གོའི་སྲོལ་རྒྱུན་གསོ་རིག་གི་གྲུབ་ཆ་གལ་ཆེན་ཞིག་དང་བོད་ཀྱི་རིག་གནས་ཀྱི་མཆོག་ནོར་ཞིག་ཡིན་ཞིང་། དེར་ལོ་རྒྱུས་ཡུན་རིང་ལྡན་པ་དང་། ཚད་ལྡན་ཡིག་ཆ་ཕུན་སུམ་ཚོགས་པ་སོགས་ཀྱི་དམིགས་བསལ་ཁྱད་ཆོས་ལྡན་པས། ལོ་ངོ་སྟོང་ཕྲག་ཁ་ཤས་རིང་། བོད་ཀྱི་མི་རིགས་ཁག་གི་མི་དམངས་ཀྱི་བདེ་ཐང་བྱ་གཞག་ལ་ལེགས་སྐྱེས་གལ་ཆེན་ཕུལ་ཡོད།

ཉེ་ཆར། བོད་རང་སྐྱོང་ལྗོངས་སྨན་རྩིས་ཁང་གི་འགྲེམས་ཁང་དུ་བཀོད་པ་ངོ་མཚར་ཆེ་བ་དང་། ནང་དོན་ཕུན་སུམ་ཚོགས་པ། བཞེངས་རྩལ་བྱང་ཆུབ་པ་བཅས་བོད་ཀྱི་ཐུན་མོང་མ་ཡིན་པའི་སྨན་ཐང་གི་རྣམ་པར་བརྟེན་ནས། བོད་ཀྱི་གསོ་བ་རིག་པའི་ཤེས་བྱ་ཐད་ཀར་མཚོན་པའི་འགྲེམས་སྟོན་ཞིག་བཤམས་པར། ཀུན་གྱི་མིག་གི་དགའ་སྟོན་དང་ཡིད་ཀྱི་གསོས་སུ་གྱུར་ཡོད།

ཤེས་རྟོགས་བྱུང་བར་གཞིགས་ན། སྨན་ཐང་ནི་དུས་རབས་བཅུ་བདུན་པར་བོད་ཀྱི་གསོ་བ་རིག་པའི་མཁས་པའི་ཡང་རྩེར་སོན་པའི་སྡེ་སྲིད་སངས་རྒྱས་རྒྱ་མཚོས་ཐོག་མར་སྲོལ་གཏོད་གནང་བ་ཞིག་ཡིན་པ་དང་། ད་བར་ལོ་400ལྷག་ཙམ་གྱི་ལོ་རྒྱུས་ལྡན་ཡོད། བོད་རང་སྐྱོང་ལྗོངས་སྨན་རྩིས་ཁང་གི་སྨན་དོན་ཁྲུའུ་ཡི་ཁྲུའུ་ཀྲང་གཞོན་པ་ཚེ་རིང་བདེ་སྐྱིད་ཀྱིས། ཚོན་ཁྲ་ཅན་གྱི་《རྒྱུད་བཞིའི》སྨན་ཐང་ཁག་80ནི་བོད་ཀྱི་གསོ་བ་རིག་པའི་གྲུབ་འབྲས་ཆེན་པོ་གཅིག་ཏུ་བསྡུས་པ་ཞིག་ཡིན་ཞིང་། དེས་ཚོན་ཁྲ་ཅན་གྱི་རྣམ་པའི་ཐོག་ནས་བོད་ཀྱི་གསོ་བ་རིག་པའི་རྒྱ་ཆེ་ལ་གཏིང་ཟབ་པའི་ནང་དོན་ཚང་མ་སྔར་བས་ཞིབ་ཚགས་ཤིང་གསོན་ཉམས་དོད་པོས་མངོན་པར་བྱས་ཡོད་ཅེས་ངོ་སྤྲོད་བྱས།

གཞན་ཡང་། བོད་ཀྱི་གསོ་བ་རིག་པ་ནི་བོད་སྨན་སྤྱད་དེ་སྨན་བཅོས་བྱེད་བཞིན་ཡོད་པ་དང་། བོད་སྨན་མང་ཆེ་བ་ནི་ས་མཐོའི་རང་བྱུང་གི་སྨན་རྒྱུ་ཤ་སྟག་ལས་གྲུབ་པ་ཞིག་ཡིན་སྟབས་དམིགས་བསལ་གྱི་སྨན་ནུས་ལྡན་པས། ཚང་མས་བློ་བདེ་པོས་སྤྱོད་ཆོག ཁྱད་ཆོས་དང་ལེགས་ཆ་དེ་དག་ལྡན་པས་བོད་ཀྱི་གསོ་བ་རིག་པས་གསོ་རིག་ཁྱབ་ཁོངས་སུ་གནས་བབ་ངེས་ཅན་བཟུང་ཡོད།

ཉེ་བའི་ལོ་ཤས་རིང་། བོད་རང་སྐྱོང་ལྗོངས་སྨན་རྩིས་ཁང་གིས་ཀྲུང་ལུགས་གསོ་རིག་གི་བཅའ་ཁྲིམས་ལག་ལེན་ཧུར་ཐག་བསྟར་བར། རིག་གནས་རྒྱུན་འཛིན་དང་སྲུང་སྐྱོང་ལས་དོན་ཡག་པོ་སྒྲུབ་པ་དང་། ཤེས་ལྡན་པའི་དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་པ། བོད་ཀྱི་གསོ་བ་རིག་པ་དང་བོད་སྨན་གྱི་ཚན་ཞིབ་ལས་དོན་ཧུར་ཐག་སྤེལ་བ། བོད་སྨན་དང་སྨན་རྒྱུའི་ཐོན་ཁུངས་སྲུང་སྐྱོང་ལ་ཤུགས་སྣོན་རྒྱག་པ། ཚད་གཞི་ཅན་དང་ཚད་ལྡན་ཅན་གྱི་འཛུགས་སྐྱོང་སོགས་ལ་གྲུབ་འབྲས་མངོན་གསལ་དོད་པོ་ཐོབ་ཡོད།

བོད་ཀྱི་གསོ་བ་རིག་པ་རྒྱུན་འཛིན་དང་འཕེལ་རྒྱས་ལ་སྐུལ་འདེད་གཏོང་ཆེད། བོད་ཀྱིས་བོད་ལུགས་གསོ་བ་རིག་པའི་སློབ་གསོར་མ་དངུལ་འབོར་ཆེན་བཏང་སྟེ། གཞོན་ནུ་ཚོར་གསོ་རིག་གི་རྩ་ཆེའི་ཤུལ་བཞག་ལ་སློབ་སྦྱོང་དང་རྒྱུན་འཛིན་བྱེད་པར་སྐུལ་ལྕག་གཏོང་བཞིན་ཡོད།

བོད་ལྗོངས་བོད་ལུགས་གསོ་རིག་སློབ་ཆེན་ནི་རྒྱལ་ཡོངས་ཀྱི་བོད་ལུགས་གསོ་བ་རིག་པའི་མཐོ་རིམ་སློབ་གསོའི་དམིགས་བཙུགས་སློབ་གྲྭ་གཅིག་པུ་དེ་ཡིན་པ་དང་། སློབ་གྲྭ་བཙུགས་ནས་ལོ་35ཡི་རིང་། རིམ་རྩིས་བརྒྱབ་ན། བོད་ཀྱི་གསོ་བ་རིག་པའི་ཆེད་ལས་ཤེས་ལྡན་པ་8000ལྷག་ཙམ་གསོ་སྐྱོང་བྱས་ཤིང་། མིག་སྔར་སློབ་གྲྭ་འགྲིམ་མུས་ཀྱི་སློབ་མ་2600ལྷག་ཙམ་ཡོད་པ་དང་། སྔོན་དཔག་བྱས་ན། འབྱུང་འགྱུར་ལོ་5ཡི་ནང་སློབ་མ་3000ཟིན་རེ་ཡོད་པར། རབ་འབྱམས་པ་དང་འབུམ་རམས་ཞིབ་འཇུག་སློབ་མ་500ཟིན་རེ་ཡོད་པ་རེད།