བོད་ཀྱི་གསོ་བ་རིག་པའི་ཐོན་ལས་ཀྱི་ཁེ་བེད་བདག་ཐོབ་གྲངས་གཞིའི་མཛོད་ཐོག་མ་བསྐྲུན་ནས་གཉེར་སྐྱོང་བྱེད་འགོ་ཚུགས་པ།
བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཉེ་ཆར། གསར་འགོད་པར་བོད་རང་སྐྱོང་ལྗོངས་ཁྲོམ་ར་ལྟ་འདོམས་ཅུས་ནས་ཤེས་རྟོགས་བྱུང་བར། བོད་ཀྱི་གསོ་བ་རིག་པའི་ཐོན་ལས་ཀྱི་ཁེ་བེད་བདག་ཐོབ་གྲངས་གཞིའི་མཛོད་ཐོག་མ་དངོས་སུ་བསྐྲུན་ནས་དྲ་ཐོག་གཉེར་སྐྱོང་བྱས་ཏེ། བོད་ཀྱི་གསོ་བ་རིག་པའི་ཐོན་ལས་གསར་གཏོད་འཕེལ་རྒྱས་ལ་གྲངས་གཞིའི་རྒྱབ་སྐྱོར་དང་ལག་རྩལ་གྱི་ཞབས་འདེགས་ཐུབ་ཡོད་པ་རེད།
ཤེས་རྟོགས་བྱུང་བར་གཞིགས་ན། ཁེ་བེད་བདག་ཐོབ་གྲངས་གཞིའི་མཛོད་ནང་བོད་སྨན་གྱི་རྒྱུ་ཆ་དང་། སྦྱོར་སྡེ། ལས་སྣོན། གསོག་འདྲེན་སོགས་དང་དེ་བཞིན་ཀྲུང་ལུགས་གསོ་རིག་ཁེ་ལས་སོགས་ཆེད་དོན་མཛོད་5ཚུད་ཡོད་པས། ཕུན་སུམ་ཚོགས་པའི་ཁེ་བེད་བདག་ཐོབ་ཀྱི་ཆ་འཕྲིན་མཁོ་འདོན་ཐུབ་པ་མ་ཟད། ད་དུང་ཁེ་བེད་བདག་ཐོབ་འཚོལ་བཤེར་དང་། ཁེ་བེད་བདག་ཐོབ་ལ་དབྱེ་ཞིབ། ཁེ་བེད་བདག་ཐོབ་ཀྱི་སྔོན་ཚུད་ཉེན་བརྡ། ཁེ་བེད་བདག་ཐོབ་ལ་ལྟ་བ་དང་ཕབ་ལེན་སོགས་ཀྱི་ཉེར་སྤྱོད་ཕན་ནུས་མང་པོ་ཡང་ལྡན་ཡོད།
གྲངས་གཞིའི་མཛོད་ནང་མིག་སྔར་རྒྱལ་ཁབ་ཕྱི་ནང་གི་བོད་སྨན་ཐོན་ལས་ཀྱི་ཁེ་བེད་བདག་ཐོབ་གྲངས་གཞི་ཁྲི་7.98ལྷག་ཙམ་ཚུད་ཡོད་པས་དེའི་ནང་བོད་རང་སྐྱོང་ལྗོངས་ཀྱི་རེ་འདུན་ཞུ་མཁན་དང་འབྲེལ་བའི་ཁེ་བེད་བདག་ཐོབ་ཀྱི་ཟིན་ཐོ་1083ཡོད་པས། རྒྱལ་ཁབ་ཕྱི་ནང་གི་བོད་ཀྱི་གསོ་བ་རིག་པའི་ཁྱབ་ཁོངས་ཀྱི་རིགས་གཅིག་མཁས་ཅན་དང་མཁས་དབང་དང་། ཁེ་ལས་ཀྱི་ཞིབ་འཇུག་གསར་སྤེལ་མི་སྣ། གསར་གཏོད་བྱེད་པོ་བཅས་ལ་ཆ་འཕྲིན་ལྟ་བདེ་པོ་ཡོང་བར་བྱས་ནས། བོད་ཀྱི་གསོ་བ་རིག་པའི་ཐོན་ལས་ཀྱི་རྒྱལ་སྤྱིའི་སྤེལ་རེས་དང་མཉམ་ལས་ལ་སྐུལ་འདེད་ཐེབས་རྒྱུ་ཡིན་པ་རེད།
བོད་རང་སྐྱོང་ལྗོངས་ཁྲོམ་ར་ལྟ་འདོམས་ཅུས་ཤེས་རིག་བདག་དབང་ཁྲུའི་ཁྲུའུ་ཀྲང་གཞོན་པ་ཕུན་ཚོགས་ཀྱིས། ཁེ་བེད་བདག་ཐོབ་གྲངས་གཞིའི་མཛོད་འཛུགས་དོན་ནི་བོད་ཀྱི་གསོ་བ་རིག་པ་དང་འབྲེལ་བའི་རྒྱལ་ཁབ་ཕྱི་ནང་གི་ཁེ་བེད་བདག་ཐོབ་དག་ལ་ཕྱོགས་ཡོངས་ནས་གྲངས་གཞི་འཚོལ་བསྡུ་ལས་སྣོན་དང་ལག་རྩལ་གྱི་གཙོ་དོན་དབྱེ་བ་འབྱེད་པ་བརྒྱུད་གོ་རིམ་ལྡན་པའི་ཆ་འཕྲིན་མཉམ་འདུས་ཆགས་པར་བྱ་ཆེད་ཡིན་པ་རེད། རྒྱལ་ཁབ་ཕྱི་ནང་གི་བོད་ཀྱི་གསོ་བ་རིག་པའི་ཁྱབ་ཁོངས་ཀྱི་རིགས་གཅིག་མཁས་ཅན་དང་མཁས་དབང་དང་། ཁེ་ལས་ཀྱི་ཞིབ་འཇུག་གསར་སྤེལ་མི་སྣ། གསར་གཏོད་བྱེད་པོ་བཅས་ཀྱིས་ཁེ་བེད་བདག་ཐོབ་གྲངས་གཞིའི་མཛོད་བརྒྱུད། འབྲེལ་ཡོད་ཀྱི་འཕེལ་རྒྱས་གནས་ཚུལ་དང་ལག་རྩལ་གསར་སྒྱུར་སྐོར་གྱི་ཆ་འཕྲིན་གསར་ཤོས་ཕྱོགས་ཡོངས་ནས་དུས་ཐོག་ཏུ་ཡང་དག་ཤེས་རྟོགས་དང་། ཁེ་བེད་བདག་ཐོབ་ཆ་འཕྲིན་ལ་དབྱེ་ཞིབ་གཏིང་ཟབ། ལག་རྩལ་འཕེལ་རྒྱས་ཀྱི་ལམ་ཐིག་ལ་ཞིབ་འཇུག་བརྡར་གཅོད་བཅས་བྱས་ནས། བོད་ཀྱི་གསོ་བ་རིག་པའི་ཐོན་ལས་ཀྱི་ཁེ་བེད་བདག་ཐོབ་གྲངས་གཞི་འཚོལ་བཤེར་གྱི་ལས་ཕྱོད་ཆེ་རུ་ཧུར་ཐག་བཏང་སྟེ། ཐབས་ཇུས་གསར་གཏོད་ཐད་འདེགས་སྐྱོར་ནུས་ལྡན་བྱས་ཡོད་ཅེས་བརྗོད་པ་རེད།