ཉེ་ཆར། བོད་རང་སྐྱོང་ལྗོངས་སྨན་རྩིས་ཁང་གིས“སྨན་རྩིས་ཁང་གི་སྨན་པ་དཀའ་བཅུ་པའི་གླེང་སྟེགས”སྐབས་གཉིས་པ་འཚོགས་ཤིང་། བོད་རང་སྐྱོང་ལྗོངས་སྨན་རྩིས་ཁང་གི་བོད་ལུགས་གསོ་རིག་གི་རིགས་གཅིག་མཁས་ཅན་དང་། སྨན་དོན་པ་ཡོངས། ཟབ་སྦྱོང་སློབ་མ། བོད་ལྗོངས་བོད་ལུགས་གསོ་རིག་སློབ་གྲྭ་ཆེ་མོའི་ཞོར་གཏོགས་སྨན་ཁང་གི་སྨན་དོན་པ་སོགས་བསྡོམས་མི་150ལྷག་ཙམ་ཞུགས་ཡོད་པ་རེད།

ད་ཐེངས་ཀྱི་གླེང་སྟེགས་ཀྱི་བརྗོད་དོན་གཙོ་བོ་ནི“སློབ་སྦྱོང་དང་སྨན་པ་དཀའ་བཅུ་པའི་འཚར་ལོངས”ཞེས་པ་ཡིན་ཞིང་། ས་གནས་ས་ཐོག་ཏུ་སྨན་པ་དཀའ་བཅུ་པའི་འཐུས་མི་8ཀྱིས་མྱོང་ཚོར་བརྗེ་རེས་དང་འཚར་ལོངས་ཀྱི་ཉམས་མྱོང་ལྷུག་པོར་གླེང་བ་མ་ཟད། ནད་ཐོག་སྨན་བཅོས་ཀྱི་སྨན་བཅོས་ཉམས་མྱོང་དང་གྲུབ་འབྲས་མཉམ་སྤྱོད་ཀྱང་བྱས་པ་རེད། རང་སྐྱོང་ལྗོངས་རིམ་པའི་བོད་ལུགས་གསོ་རིག་སྨན་པ་གྲགས་ཅན་དབྱངས་ཅན་སྒྲོལ་དཀར་གྱིས་རང་ཉིད་ཀྱི་ལོ་40ལྷག་ཙམ་གྱི་ནད་ཐོག་སྨན་བཅོས་ཀྱི་ཉམས་མྱོང་དང་ཟུང་འབྲེལ་བྱས་ཏེ། བོད་ལུགས་གསོ་རིག་གི་རྩ་བརྟག་ཆབ་བརྟག་གི་ཁྱད་ལྡན་ནད་དཔྱད་རྩལ་ནུས་ཀྱི་གཙོ་གནད་དང་དེ་བཞིན་ནད་ཐོག་སྨན་བཅོས་ཀྱི་མྱོང་ཚོར་དང་བོད་ལུགས་གསོ་རིག་གི་རིམས་ནད་བརྟག་དཔྱད་གཅིག་གྱུར་ཚད་ལྡན་ཡོང་བའི་གྲོས་འགོ་སོགས་ལ་མཛུབ་ཁྲིད་རང་བཞིན་གྱི་གཏམ་བཤད་བྱས་པ་རེད།