༄༅།།ས་གཉིས་ནང་འཕྲད་དངོས་གྲུབ་སྦྱོར།།
དངོས་གྲུབ་སྦྱོར་བས་ཅི་བསམ་འགྲུབ།།
རྟེན་བཞེངས་མཁར་རྩིག་ཞིང་ཉོ་བ།།
རྒྱས་པའི་ལས་རྣམས་བྱ་བ་དང་།།
མུན་མ་བྱེད་སོགས་བརྟན་ལས་བཟང་།།
ཆུ་གཉིས་ནང་འཕྲད་བདུད་རྩི་སྦྱོར།།
བདུད་རྩི་སྦྱོར་བས་ཚེ་སྟོབས་འཕེལ།།
སྨན་སྦྱོར་ཁྲུས་བྱེད་བག་མ་ལེན།།
ཚེ་དབང་ཚེ་སྒྲུབ་ཆོ་ག་དང་།།
གཉེན་དང་ཚོང་བསྐྱེད་འཕེལ་ལས་བཟང་།།
ས་ཆུ་འཕྲད་པ་ལང་ཚོ་སྦྱོར།།
ལང་ཚོ་སྦྱོར་བས་ཤིན་ཏུ་སྐྱིད།།
དགའ་སྟོན་བྱ་ཞིང་ཆེ་སར་འདོན།།
གོས་གྱོན་རྒྱན་འདོགས་རོལ་རྩེད་བཟང་།།
མེ་གཉིས་ནང་འཕྲད་འཕེལ་འགྱུར་སྦྱོར།།
འཕེལ་འགྱུར་སྦྱོར་བས་ཟས་གོས་རྙེད།།
ཚོང་བྱ་སྦྱིན་གཏོང་ས་བོན་འདེབས།།
ནོར་རྒྱུན་མ་སྒྲུབ་ཆུ་སྦྱིན་སྟེར།།
ནོར་ལྷ་མཆོད་ཅིང་དངོས་གྲུབ་ཞུ།།
རླུང་གཉིས་ནང་འཕྲད་ཕུན་ཚོགས་སྦྱོར།།
ཕུན་ཚོགས་སྦྱོར་བས་བསམ་མྱུར་འགྲུབ།།
བསྒྲུབ་བྱ་དོན་གཉེར་ཁ་མཆུ་བསྡུམས།།
གཡོ་དྲག་མྱུར་བའི་ལས་རྣམས་བཟང་།།
མེ་རླུང་འཕྲད་པ་སྟོབས་ལྡན་སྦྱོར།།
སྟོབས་ལྡན་སྦྱོར་བས་བཀྲིས་བྱེད།།
རིམ་གྲོ་ལྷ་གསོལ་ཆོས་སྤྱོད་བྱ།།
ཞི་རྒྱས་དབང་གི་ལས་རྣམས་འགྲུབ།།
ས་རླུང་འཕྲད་པ་མི་འཕྲོད་སྦྱོར།།
མི་འཕྲོད་སྦྱོར་བས་ཟས་ནོར་འཛད།།
རྐུན་ཇག་འཇོམས་འཕྲོག་བྱེད་པ་སོགས།།
མྱ་ངན་འོང་བས་དོན་མི་འགྲུབ།།
ཆུ་རླུང་འཕྲད་པ་མི་མཐུན་སྦྱོར།།
མི་མཐུན་སྦྱོར་བས་གཉེན་བཤེས་འབྱེད།།
དབྱེན་དང་ཕྲ་མ་ཞུགས་པ་དང་།།
དགྲ་བོ་འབྱུང་བའི་ལས་རྣམས་བྱ།།
ས་མེ་འཕྲད་པ་སྲེག་པའི་སྦྱོར།།
སྲེག་པའི་སྦྱོར་བས་སྡུག་བསྔལ་བསྐྱེད།།
དམག་འདྲེན་དགྲ་གཞོམ་དྲག་ལས་རྩོད།།
ཕ་རོལ་སྡུག་བསྔལ་བསྐྱེད་ཀུན་བྱ།།
མེ་ཆུ་འཕྲད་པ་འཆི་བའི་སྦྱོར།།
འཆི་བའི་སྦྱོར་བས་སྲོག་འཕྲོག་བྱེད།།
ཕ་རོལ་གསོད་དང་དུག་སྦྱོར་དང་།།
མཐུ་གཏད་ལ་སོགས་རིག་པས་བསྒྲུབ།།