སྤྱིར་བསྐུ་མཉེ་ཟེར་བའི་ཐ་སྙད་དེ་ཏོན་ཧུང་ནས་ཐོན་པའི་མེ་བཙའི་ཡིག་ཆ་ལས་ཀྱང་མཐོང་ཐུབ། གཡུ་ཐོག་རྙིང་མའི་རྣམ་ཐར་ན།་སོག་པོའི་ལུགས་ལ་ནད་ཕྱིར་འདྲེན་པ་གཏར་ཁའི་རྒྱུད། ཞང་ཞུང་གི་ལུགས་ལ་ནད་ཐུར་དུ་སྦྱོང་བ་བཤལ་གྱི་རྒྱུད། ཨོ་རྒྱན་གྱི་ལུགས་ལ་ནད་གྱེན་དུ་འདྲེན་པ་སྐྱུགས་ཀྱི་རྒྱུད། བོད་ཀྱི་ལུགས་ལ་ནད་གསོ་བར་བྱེད་པ་གཉེན་པོ་བཞི་ལྡན་གྱི་རྒྱུད། གཡང་དྲུང་བོན་གྱི་ལུགས་ལ་ནད་ཞི་བར་བྱེད་པ་དུགས་ལུམས་བྱུག་གསུམ་གྱི་རྒྱུད་། ཅེས་གསུངས་པའི་བྱུག་ཟེར་བ་ནི་བྱུག་པ་ཡིན་ལ་དེ་ནི་བོད་སྨན་གྱི་ལུགས་ན་དཔྱད་བཅོས་ཆེན་པོ་དྲུག་ཡོད་པའི་ཡ་གྱལ་ཡིན་ལ། གསོ་རིག་རྒྱུད་བཞི་ལས་ཕྱི་མ་རྒྱུད་ན་བྱུག་པའི་ལེའུ་ཡོད་པ་དེ་ནི་བསྐུ་མཉེའི་ཁུང་གཙོ་བོ་ཡིན། དེང་དུས་མཐོང་རྒྱུ་ཡོད་པའི་སྨན་པ་ཉི་ཟླས་བྲིས་པའི་བསྐུ་མཉེའི་ལག་དེབ་གྱི་ཁུང་ནི་བོད་ལྗོངས་ལྷོ་ཁ་སྨན་རམས་པ་འཇམ་དབྱངས་ལྷུན་གྲུབ་གྱི་ཕྱག་ལེན་ཡིན་ནོ། །