ཨེ་ཙི་འགོས་ནད་ནི་དེང་སྐབས་འཛམ་གླིང་ཐོག་མིའི་རིགས་ཀྱི་ཚེ་སྲོག་ལ་གནོད་པ་ཆེ་ཞིང་བཅོས་ཐབས་མེད་པའི་འགོས་ནད་ཚབས་ཆེན་ཞིག་ཡིན་ལ། དེ་ནི་མི་ཀུན་ལ་འབྱུང་སྲིད་པ་ཞིག་ཀྱང་ཡིན། ཨེ་ཙི་འགོས་ནད་ཅེས་པ་ནི་ནད་འབུའི་མིང་ལ་བལྟོས་ནས་བཏགས་པའི་ནད་ཅིག་ཡིན་ཞིང་། ནད་དེ་འགོས་རྗེས་ནད་འབུ་དེས་མིའི་ལུས་པོའི་ནང་གི་ནད་རིགས་བཀག་འགོག་བྱེད་པའི་ནུས་པ་ཡོངས་རྫོགས་ཉམས་སུ་བཅུག་སྟེ་ནད་རིགས་ཆེ་ཆུང་གང་ཞིག་ཡིན་རུང་འགོས་སླ་བ་མ་ཟད། མཇུག་མཐར་ནད་རིགས་དེས་ཚེ་སྲོག་ཀྱང་འཕྲོག་གི་ཡོད། དཔེར་ན་ཨེ་ཙི་ནད་ཡོད་པའི་ནད་པར་སྤྱིར་བཏང་གི་ཆམ་ནད་ཕོག་རྗེས་སྨན་བཅོས་བྱས་ཀྱང་ནུས་པ་ཐོན་མི་ཐུབ་པར་གློ་ཚད་དུ་གྱུར་བ་མ་ཟད། ནད་གཞི་རིམ་བཞིན་ཇེ་སྡུག་ཏུ་སོང་སྟེ་མཐར་ཚེ་སྲོག་འཕྲོག་གི་ཡོད་པ་རེད།
ཨེ་ཙི་ནད་དེ་འཛམ་གླིང་ཡོངས་དང་ཁྱད་པར་དུ་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་དུ་མཆེད་ཚད་མགྱོགས་པ་དང་། རང་རྒྱལ་དུ་ཨེ་ཙི་ནད་མཆེད་ཚད་དེ་མགྱོགས་མྱུར་སྒོས་མཆེད་པའི་དུས་སྐབས་སུ་བསླེབས་ཡོད་ལ། གལ་ཏེ་དུས་ཐོག་དང་ཕན་ནུས་ལྡན་པའི་སྒོ་ནས་ཨེ་ཙི་ནད་མཆེད་པ་ཚོད་འཛིན་བྱེད་མ་ཐུབ་ཚེ། སྤྱི་ཚོགསདང་དཔལ་འབྱོར་འཕེལ་རྒྱས་ལ་ཤུགས་རྐྱེན་ཚབས་ཆེན་བཟོ་སྲིད།