མཚོ་སྔོན་ཞིང་ཆེན་བོད་སྨན་ཁང་གི་མཆིན་མཁྲིས་ཚན་ཁག་ནི་རྒྱལ་ཁབ་རིམ་པའི་གཙོ་གནད་ཚན་ཁག་དང་མཚོ་སྔོན་ཞིང་ཆེན་གྱི་སྒེར་ཆོས་མངོན་པར་གསལ་བའི་ཚན་ཁག ཞིང་ཆེན་རིམ་པའི་གཙོ་གནད་ཚན་ཁག གཞན་ད་དུང་རྒྱལ་ཁབ་སྨན་རྫས་ནད་ཐོག་ཚོད་ལྟ་བགྱིས་པའི་ཆེད་ནད་ཚན་ཁག་གི་ཁོང་གཏོགས་གཅིག་ཡིན།
ཚན་ཁག་འདིས་བོད་ཀྱི་གསོ་རིག་གི་གཞུང་བཞིན་མི་ན་བར་ཡུན་རིང་དུ་གནས་པ་དང་ན་བ་གསོ་བའི་རྩ་དོན་གཞིར་བཟུང་ནས་དེ་མཐུན་གྱི་གཉེན་པོ་ཟས་སྤྱོད་སྨན་དཔྱད་བཞི་རྩལ་དུ་སྤྲུགས་ཤིང་ཟུར་དུ་ནུབ་ལུགས་ཀྱི་དཔྱད་ཆས་གཞོགས་སྐྱོར་ནས་འགྲོ་བ་ནད་པའི་ན་ཚའི་སྡུག་བསྔལ་སེལ་མུས་ཡིན།
ཚན་ཁག་འདིས་གཙོ་བོ་མཆིན་ནད་ལེབ་བརྒན། མཆིན་ཚད། མཆིན་ནད་དུག་ཐབས། མཆིན་ཚིལ་འཕེལ་བ། མཆིན་ནད་ལྡེམ་བ། མཆིན་འབྲས་སོགས་མཆིན་ནད་དབྱེ་བ་དང་། གཉན་མཁྲིས་པ་རྩ་རྒྱུག མཁྲིས་པའི་རྡེའུ་སྐྲན། གཅོང་ནད་དང་གཉན་རིམས་སོགས་ལ་རང་གི་ཁྱད་ཆོས་མངོན་པར་གསལ་བའི་བཤལ་དུ་མཆིན་པའི་རྒྱ་བཤལ་དང་རྩ་ལྟོ་སྦྲགས་མའི་སྦྱོང་བཅོས་སོགས་མན་ངག་ཟབ་མོས་བརྒྱན་པའི་གསོ་བཅོས་ཀྱི་ཐབས་མང་དུ་སྤྱད་པས་གསོ་བཅོས་ཀྱི་ཕན་འབྲས་ལེགས་པོ་ཐོན་ཡོད།
ཁྱད་ཆོས་ལྡན་པའི་ནད་ཐོག་གསོ་བཅོས་མཐོར་འདེགས་གཏོང་ཆེད་ཚན་ཁག་ཏུ་བོད་ལུགས་གསོ་རིག་གི་དྲི་ཆུའི་བརྟག་ཁང་དང་བོད་ལུགས་གསོ་རིག་གི་ཁྱད་པར་གྱི་གསོ་བཅོས་ཁང་།བཤལ་ཁང་དང་གཏར་ཁང་སོགས་བཙུགས་ཡོད་ལ།ཚན་ཁག་ཏུ་སྤྱི་བསྡོམས་པས་ནད་ཁྲི༧༥ཡོད་ལ་ཕྱི་ལུགས་ཀྱི་དཔྱད་ཆས་དམུ་ཆུའི་འཕྲུལ་འཁོར་དང་འཇམ་རྩི་གཏོང་བྱེད་སོགས་མཆིན་ནད་ཀུན་ལ་ཕན་པའི་གཉེན་པོ་ནད་ཐོག་ཏུ་བཀོལ་བས། མཆིན་ནད་གདུག་པོ་དང་གཅོང་ཆེན་ཟད་བྱེད་ཀྱི་ནད་རིགས་རྣམས་ཐལ་བར་བརླག་ནས༢༠༡༥ལོར་མཆིན་ནད་དུག་ཐབས་ཀྱི་དམུ་ཆུས་ཐེབས་པའི་ནད་པ༡༠༦སངས་དྲག་ཏུ་གྱུར།
ད་ལྟ་ཚན་ཁག་འདིར་སྨན་བཅོས་མི་སྣ་བསྡོམས་པས་ཉི་ཤུ་ཡས་མས་ཡོད་པའི་ནང་སྨན་པ་འབུམ་རམས་གཞོན་པ་གསུམ་དང་། རབ་འབྱམས་བསླབ་གནས་གསུམ།དཀའ་བཅུ་བ་ལྔ་བཅས་ཡོད་ཅིང་བགྲང་བྱ་འདི་དག་གི་རིང་དུ་ལས་མི་ཡོངས་ཀྱིས་དུས་གསུམ་འཕོ་འགྱུར་མེད་པར་འགྲོ་བ་ནད་པའི་ཕྱོགས་སུ་གཏད་པའི་བྱང་སེམས་དྲོན་མོ་དང་སོ་སོ་བས་བློ་གྲོས་སྟོབས་ཀྱིས་གསལ་བར་བྱས་ཤིང་ཟབ་མོའི་མན་ངག་གིས་བརྒྱན་ལ་ནད་སྟེང་དཔྱད་ལ་དཔའ་བ་སོགས་གཞུང་དོན་ལག་ལེན་དང་བཅས་པ་ཚེགས་མེད་དུ་སྦྱངས་བརྩོན་བྱས་པས་ཕྱོགས་བཞིའི་ལས་མཐུན་པ་དག་གིས་ཁ་གཡང་སྒྲོགས་ཤིང་མིག་གིས་བལྟ་ས་རུ་གྱུར་ཡོད། དེ་ཡང་ནད་ཀྱི་འདམ་དུ་བྱིང་བ་ལ།།ལག་ནས་འདྲེན་པ་སྨན་པ་ཡིན།།ཞེས་པ་བཞིན་སྐལ་ཅིག་ཙམ་ཙམ་ཡང་གཡེལ་བ་མེད་པར་ནད་པ་སོགས་གཞན་གྱི་དོན་ལ་རང་དོན་ལས་ཀྱང་གཅེས་པར་སེམས་ནས་འགྲོ་བ་ནད་པའི་སྡུག་བསྔལ་སེལ་བའི་འཐུས་རྒྱལ་ཁབ་རིམ་པའི་གཙོ་གནད་ཚན་ཁག་འདིར་ཀུན་གྱིས་བྱམས་ཤིང་མིང་དང་བཀུར་བསྟི་མང་དུ་བསྩལ།