བོད་དུ་སྨན་དཔྱད་ཀྱི་ལག་ལེན་འགོ་ཚུགས་པ་ནས་བཟུང་། དེང་དུས་བོད་ལུགས་གསོ་རིག་སློབ་གྲྭ་ཆེན་མོ་དབུ་བརྙེས་པའི་བར། བོད་ཀྱི་གསོ་རིག་གོང་འཕེལ་ཕྱིན་པའི་ལོ་རྒྱུས་འཕེལ་རིམ་གྱི་སྐོར། དུས་རབས་རིམ་པ་བཅུ་གཉིས་སུ་ཕྱེས་ནས་རགས་རིམ་ཞིག་ཞུ་བ་ལ།
དུས་སྐབས་དང་པོ། སྔ་རབས་བོད་ཀྱི་སྨན་དཔྱད་འགོ་ཚུགས་པ་དང་གོང་འཕེལ་བྱུང་བའི་སྐོར།
བོད་ཀྱི་གསོ་བ་རིག་པ་ཆེས་རྩ་བའི་རྩ་བར་གྱུར་པ་ནི། བོད་མི་རིགས་རང་ཉིད་ཀྱིས་སྲོལ་གཏོད་དར་སྤེལ་བྱས་པ་ཞིག་ཡིན། དེ་ཡང་། ཐོག་མར་བོད་དང་། མཐའ་འཁོར་གྱི་མི་རིགས་ཁག་དང་། རྒྱལ་ཁབ་ཁག་དབར་ཕན་ཚུན་འགྲོ་འོང་ཆེས་ཉུང་བའི་སྐབས་ཏེ། བོད་ཡོངས་གཅིག་གྱུར་གྱི་ཐོག་མའི་རྒྱལ་པོ་མི་རྗེ་གཉའ་ཁྲི་བཙན་པོའི་དུས་ནས་བོད་དུ་སྨན་དཔྱད་ཀྱི་ལག་ལེན་ཡོད་པ་རྗེས་དཔག་བྱེད་ཐུབ། གང་ལགས་ཤེ་ན། གཉའ་ཁྲི་བཙན་པོ་སྲིད་ཁྲིར་འཁོར་འཁོད་སྐབས། ཆབ་འབངས་དང་། རྒྱལ་སྲིད་ལ་གནོད་པ་ཡོད་པའི་དོགས་པ་དྲུག་བཏོན་ཏེ། དེ་དག་གི་གནོད་པ་སེལ་བའི་ཐབས་ཇི་ལྟར་ཡོད་ཅེས་དྲི་བ་མཛད་པ་ན་བོན་ཤེས་པ་ཅན་རྩིབས་ལྷ་སྐར་མ་ཡོལ་ལྡེས་གནོད་པ་རེ་རེ་བཞིན་སེལ་བའི་ཐབས་ཡོད་པའི་ལན་ཞུས་པའི་ནང་། དུག་གི་གནོད་པ་བྱུང་ན་ཇི་ལྟར་བྱ། ཞེས་དྲིས་པ་ནི། དེ་ལ་ཕན་པའི་ཐབས་སྨན་བསྟེན་རྒྱུ་ཡོད། ཅེས་ལན་བཏབ་ཡོད་པ་དང་། གཞན་ཡང་ཕན་ཤེས་སྨན་དཔྱད་པ་དང་། སྐོར་ཤེས་རྩིས་པ་སོགས་ཡོད་པ་ལོ་རྒྱུས་ཀྱི་ཡིག་རིགས་དུ་མ་ལས་གསལ་བའི་ཕྱིར་ནའོ། དེ་ནས་བཟུང་སྟེ་བོད་ཀྱི་མེས་པོ་མཁས་མཛངས་ལྡན་པ་རྣམས་ནས། ནད་བཅོས་ནད་འགོག་གི་བྱ་བར་འབད་བརྩོན་ཆེས་ཆེར་གནང་སྟེ་ཉམས་མྱོང་མང་པོ་བསགས་པར་བརྟེན། བོད་ཀྱི་རྒྱལ་རབས་༢༧པ་ལྷ་ཐོ་ཐོ་རི་གཉན་བཙན་བར་དུ་རིམ་གྱིས་གོང་འཕེལ་བྱུང་བ་ཞིག་རེད། དེ་ལྟར་བོད་དུ་སྨན་དཔྱད་ཀྱི་ལག་ལེན་ཡོད་པ་ཡིག་རིགས་ལས་གསལ་བ་ནས་བཟུང་ད་བར་མི་ལོ། ༢༡༢༡སོང་།
དུས་སྐབས་གཉིས་པ། བོད་ཀྱི་རྒྱལ་རབས་༢༧པ་ལྷ་ཐོ་ཐོ་རི་གཉན་བཙན་གྱི་སྐུ་དུས་སུ་དེ་སྔའི་སྨན་དཔྱད་ལག་ལེན་མ་ཉམས་དར་བཞིན་པའི་སྟེང་དུ་རྒྱ་གར་ནས་བི་ཇི་དགའ་བྱེད་དང་བི་ལྷ་དགའ་མཛེས་ཟེར་བའི་སྨན་པ་གཉིས་བོད་དུ་ཕེབས། གསོ་དཔྱད་ཀྱི་ལག་ལེན་གནང་བས་ནམ་ཞིག་ན་རྒྱལ་པོས་ཀྱང་གསན་ནས་དགའ་བསུ་དང་གཟེངས་བསྟོད་གནང་། ཕྱི་ཕྱོགས་ཀྱི་གསོ་དཔྱད་ལག་ལེན་དང་བོད་ལུགས་གསོ་དཔྱད་མཉམ་འབྲེལ་ཐོག་ནད་བཅོས་སྨན་དཔྱད་ཀྱི་ལག་ལེན་གནང་། སྨན་པ་དུང་གི་ཐོར་ཅོག་ཅན་སོགས་སྨན་པ་ཁག་གཅིག་སྐྱོང་གནང་བ་སོགས་ཕྱི་ཕྱོགས་དང་ཐོག་མའི་འབྲེལ་ཟབ་བཙུགས་ཏེ་གསོ་དཔྱད་ཀྱི་བྱ་བ་གོང་མཐོར་བཏང་ཡོད། དུས་སྐབས་འདིར་བོད་དུ་དམ་པ་ཆོས་ཀྱི་དབུ་བརྙེས་ཞེས་གྲགས། དེ་ནས་ད་བར་མི་ལོ་༡༧༩༡སོང་།
དུས་སྐབས་གསུམ་པ། བོད་ཀྱི་རྒྱལ་རབས་༣༣་པ། ཆོས་རྒྱལ་སྲོང་བཙན་སྒམ་པོའི་སྐུ་དུས་སུ་ཆོས་བློན་ཐོན་མི་སམ་བྷོ་ཊ་རྒྱ་གར་དུ་ཕེབས། བློན་ཆེན་མགར་རྒྱ་ནག་དང་བལ་ཡུལ་དུ་ཕེབས་ནས་མཐའ་སྐོར་གྱི་རྒྱལ་ཁབ་ཁག་དང་། མི་རིགས་ཁག་དབར་ཕན་ཚུན་འགྲོ་འོང་དང་མཛའ་མཐུན་གྱི་འབྲེལ་བ་གཏིང་ཟབ་བཙུགས། རྒྱ་གར་དང་རྒྱ་ནག བལ་ཡུལ་སོགས་ནས་པཎྜི་ཏ་དང་མཁས་པ་མང་པོ་གདན་འདྲེན་ཞུས། ཡི་གེ་གཙོར་གྱུར་གྱི་བོད་ཀྱི་རིག་གནས་མཐའ་དག་སྔར་ལས་ལྷག་པའི་གོང་འཕེལ་བཏང་། བོད་ཀྱི་སྨན་པ་རྣམས་ནས་བོད་དར་རིག་གནས་ཁོ་ནར་བློ་ཡིད་ཚིམ་ནས་མ་བསྡད་པར་མི་རིགས་དང་རྒྱལ་ཁབ་གཞན་དག་གི་གསོ་རིག་རིག་གཞུང་དང་ལག་ལེན་ཁག་གཅིག་སློབ་སྦྱོང་བྱས་ཏེ་དེ་དག་བོད་སྐད་དུ་བསྒྱུར། བོད་རང་གི་གནམ་གཤིས་དང་ས་བབ། མིའི་ལུས་ཁམས་ཀྱི་ཁྱད་ཆོས་དང་མཐུན་པའི་ལེགས་ཆ་མང་དུ་བླངས་ཏེ། སྔར་གྱི་ལག་ལེན་ཉམས་མྱོང་རྣམས་དང་ཕྱོགས་གཅིག་ཏུ་བསྡེབས་པ་《མི་འཇིགས་པའི་མཚོན་ཆ 》ཞེས་པའི་གཞུང་ལུགས་ཤིག་བརྩམས་ནས། བོད་མི་རིགས་རང་ཉིད་ཀྱི་གསོ་རིག་ཏུ་གྱུར་བར་བྱས། རྒྱ་དཀར་ནག་གི་པཎྜི་ཏ་རྣམས་ཡོན་ཀྱིས་མཉེས་པར་བྱས་ནས་ཕྱིར་ཕེབས། སྟོད་ཕྱོགས་ནས་གདན་འདྲེན་ཞུས་པའི་བོད་ཀྱི་སྨན་པ་ག་ལེ་ནོས་ཀྱི་དྲུང་ནས་བོད་ཀྱི་འབངས་མི་བློ་རྣོ་བ་འགའ་ཞིག་ལ་སློབ་སྦྱོང་བྱེད་དུ་བཅུག་ནས་བརྒྱུད་འཛིན་པ་གསོ་སྐྱོང་བྱས། རྒྱལ་པོས་ཀྱང་། ལུགས་ཆེན་གསུམ་གི་ཚུལ་དག་མ་རྟོགས་ན། །སྨན་པ་ཆེན་པོ་ཆེན་པོའི་གྲངས་སུ་མི་འགྲོ་སྟེ། །ཞེས་གསུངས་ནས་ཕྱོགས་མཐའ་དག་ལ་སློབ་སྦྱོང་བྱེད་རྒྱུའི་སྐུལ་མ་གནང་བ་དང་ལུགས་ཆེན་གསུམ་ཤེས་པ་ལ་སྨན་པ་ཆེན་མོ་ཞེས་དང་། ཕྱོགས་གཅིག་ཤེས་པ་ལ་སྨན་པ་ཞེས་པའི་ལག་རྩལ་མཚན་གནས་གནང་རྒྱུའི་སྲོལ་གཏོད་པ་སོགས་སྔར་ལས་ལྷག་པའི་གོང་འཕེལ་བཏང་། ཇོ་བོ་ཤཱཀྱ་རྣམ་གཉིས་སྤྱན་དྲངས། བོད་དུ་སངས་རྒྱས་བསྟན་པ་དར་བའི་རྨང་ཡང་གཏིང་། དེ་ནས་ད་བར་མི་ལོ༡༣༦༩སོང་།