ཟླ་11ཚེས་2ཉིན་རྒྱལ་ཁབ་འཕྲོད་བསྟེན་འཆར་ལྡན་བུ་བཙའ་ཨུ་ལྷན་གྱི་ཀྲུའུ་རེན་གཞོན་པ་རྒྱལ་ཁབ་ཀྲུང་ལུགས་སྨན་རྫས་དོ་དམ་ཅུས་ཀྱི་ཅུས་ཀྲང་ཝང་གོ་ཆང་གིས་རུ་སྣེ་ཁྲིད་དེ་རང་སྐྱོང་ལྗོངས་སྨན་རྩིས་ཁང་དུ་བོད་རང་སྐྱོང་ལྗོངས་ཀྱི་བོད་ལུགས་གསོ་རིག་དང་བོད་སྨན་འཕེལ་རྒྱས་འགྲོ་ཚུལ་ལ་རྟོག་ཞིབ་བྱས་པ་རེད།
རྟོག་ཞིབ་ཚོགས་པ་དང་བཅས་པས་དང་ཐོག་ཁྲེང་ཀོན་ཆུས་ཀརྨ་དགོན་གསར་སྡེ་ཁུལ་འཕྲོད་བསྟེན་ཞབས་ཞུའི་ལྟེ་གནས་སུ་བསྐྱོད་དེ་སྡེ་ཁུལ་འཕྲོད་བསྟེན་ཞབས་ཞུའི་ལྟེ་གནས་སུ་བོད་ལུགས་གསོ་རིག་དང་བོད་སྨན་བེད་སྤྱོད་དང་འཕེལ་རྒྱས་འགྲོ་ཚུལ་རྟོག་ཞིབ་དང་ཤེས་རྟོགས་བྱས་པ་དང་། བོད་རང་སྐྱོང་ལྗོངས་སྨན་རྩིས་ཁང་དུ་གསར་དུ་བསྐྲུན་ནས་སྤྱོད་བཞིན་པའི་སྨན་བཅོས་ལག་རྩལ་ཕྱོགས་བསྡུས་ཐོག་བརྩེགས་ཁང་གི་བོད་ལུགས་གསོ་རིག་གི་ཁྱད་ལྡན་ཕྱི་བཅོས་ཁང་དུ་རྟོག་ཞིབ་བྱས་ནས་རིགས་གཅིག་མཁས་ཅན་བློ་བཟང་ཡི་ཉི་དང་མིག་དམར་སོགས་དང་སྤེལ་རེས་བྱས་ཏེ་བོད་ལུགས་གསོ་རིག་དང་བོད་སྨན་རང་ལྗོངས་སུ་འཕེལ་རྒྱས་འགྲོ་ཚུལ་སྐད་ཆ་ཞིབ་ཕྲ་དྲིས་པ་དང་། རང་སྐྱོང་ལྗོངས་གནམ་རིག་སྐར་རྩིས་ཞིབ་འཇུག་ཁང་དུ་སྐར་རྩིས་ཆེ་མོ་བ་དང་གླེང་མོལ་བྱས་ནས་བོད་རིགས་ཀྱི་གནམ་རིག་སྐར་རྩིས་ཀྱི་འབྲེལ་ཡོད་གནས་ཚུལ་ཤེས་རྟོགས་ཞིབ་ཕྲ་བྱས་པ་རེད། རྟོག་ཞིབ་ཚོགས་པ་དང་བཅས་པས་ད་དུང་བོད་ལུགས་གསོ་རིག་གི་སྲོལ་རྒྱུན་བཅོས་ཐབས་ལྟེ་གནས་དང་རང་སྐྱོང་ལྗོངས་སྨན་རྩིས་ཁང་ནད་ཐོག་ཞིབ་འཇུག་ལྟེ་གནས་བོད་སྨན་ཞིབ་འཇུག་འདྲ་དཔེ་ཁང་དུ་རྟོག་ཞིབ་བྱས་ནས་ཀྲུང་ལུཌ་སྨན་རྫས་དང་བོད་སྨན་ཐོན་ཁུངས་ཡོངས་ཁྱབ་ཞིབ་བཤེར་བྱས་ཚུལ་ཤེས་རྟོཌ་བྱས་པ་རེད།
རྟོག་ཞིབ་ཚོགས་པས་ད་དུང་རང་སྐྱོང་ལྗོངས་སྨན་རྩིས་ཁང་གི་དེ་སྔའི་ཡོའན་ཀྲང་གསོ་རིག་དགེ་རྒན་ཆེ་མོ་བ་དགྲ་འདུལ་སོགས་རང་ལྗོངས་ཀྱི་བོད་ལུགས་གསོ་རིག་རིགས་གཅིག་མཁས་ཅན་དང་བཞུགས་མོལ་བྱས་ནས་བོད་ལུགས་གསོ་རིག་དང་བོད་སྨན་འཕེལ་རྒྱས་འགྲོ་ཚུལ་སྐོར་གྱི་རང་སྐྱོང་ལྗོངས་སྨན་རྩིས་ཁང་གི་སྙན་ཞུ་ཉན་པ་རེད། རྟོག་ཞིབ་ཚོགས་པས་བོད་ལུགས་གསོ་རིག་དང་བོད་སྨན་འཕེལ་རྒྱས་ལ་ལོ་རྒྱུས་ཡུན་རིང་ལྡན་པ་དེ་ནི་རང་རྒྱལ་གྱི་ཆ་ཚང་ཤོས་དང་ཤུགས་རྐྱེན་ཆེ་ཤོས་ལྡན་པའི་མི་རིགས་ཀྱི་གསོ་རིག་དང་སྨན་རྫས་རིག་པའི་གྲས་ཤིག་ཡིན། ཏང་དང་རྒྱལ་ཁབ་ཀྱིས་སྔར་ནས་ད་བར་བོད་ལུགས་གསོ་རིག་དང་བོད་སྨན་འཕེལ་རྒྱས་ལ་ཚད་མཐོའི་མཐོང་ཆེན་གནང་བས་ལོ་ཁ་ཤས་ནང་རང་སྐྱོང་ལྗོངས་སྨན་རྩིས་ཁང་གི་མཁྲེགས་ཆས་ཀྱི་གཞི་ཁྱོན་དང་། ཤེས་ལྡན་མི་སྣའི་གྲུབ་ཆ། རིག་གནས་འཛུགས་སྐྱོང་། ཁྱད་ལྡན་སྨན་བཅོས་སོགས་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ནས་མི་དམངས་མང་ཚོགས་ལ་ཞབས་འདེགས་ཡག་པོ་ཞུ་བར་གྲུབ་འབྲས་བཟང་པོ་ཐོབ་ཡོད་ཅེས་བསྟན་པ་རེད།
བདེ་སྐྱིད་ཀྱིས་རང་སྐྱོང་ལྗོངས་འཕྲོད་བསྟེན་འཆར་ལྡན་བུ་བཙའ་ཨུ་ལྷན་སོགས་འབྲེལ་ཡོད་སྡེ་ཚན་ལ་ལྗོངས་ཡོངས་ཀྱི་བོད་ལུགས་གསོ་རིག་དང་བོད་སྨན་བྱ་གཞག་འཕེལ་རྒྱས་ཧུར་ཐག་གཏོང་དགོས། འབྲེལ་ཡོད་སྡེ་ཚན་ལ་མུ་མཐུད་གཞི་ཁྱོན་ཆེར་གཏོང་དང་ཁྱད་ལྡན་འབུར་ཐོན་གྱིས་ནད་པ་ལྟེ་བར་བྱེད་པའི་ནད་བཅོས་འདུ་ཤེས་དུས་རྒྱུན་དུ་སེམས་ནང་བརྟན་པོར་ངེས་ནས་བོད་ལུགས་གསོ་རིག་དང་བོད་སྨན་མུ་མཐུད་དར་རྒྱས་གོང་འཕེལ་གཏོང་དགོས་པའི་བླང་བྱ་བཏོན་གནང་བ་རེད།