འདི་ནི་བོད་ལུགས་གསོ་རིག་དང་བོད་སྨན་རིག་གནས་རྒྱུན་འཛིན་དང་འཕེལ་རྒྱས་ཀྱི་གནས་མཆོག་ཅིག་ཡིན།

    འདི་ནི་བོད་ལུགས་གསོ་རིག་དང་བོད་སྨན་རིག་པའི་ཤེས་ལྡན་མི་སྣ་གསོ་སྐྱོང་གི་མཐོ་རིམ་སློབ་གྲྭ་ཞིག་ཡིན།

    རྒྱལ་ནང་གི་རང་ཚུགས་ངང་བཙུགས་པའི་བོད་ལུགས་གསོ་རིག་དང་བོད་སྨན་གྱི་ཆེད་ལས་ཤེས་ལྡན་མི་སྣ་གསོ་སྐྱོང་གི་མཐོ་རིམ་སློབ་གྲྭ་ཨང་དང་པོ་དེ་ཡིན་པ་དང་སློབ་གྲྭ་བཙུགས་ནས་ལོ་25ཡི་རིང་བོད་ལྗོངས་བོད་ལུགས་གསོ་རིག་སློབ་གླིང་གིས་རྒྱལ་ཁབ་ལ་བོད་ལུགས་གསོ་རིག་དང་བོད་སྨན་གྱི་ཆེད་ལས་ཤེས་ལྡན་མི་སྣ་4000ལྷག་ཙམ་གསོ་སྐྱོང་བྱས་ཡོད།

    2011ལོའི་ཟླ་11ཚེས་15ཉིན་བོད་ལྗོངས་བོད་ལུགས་གསོ་རིག་སློབ་གླིང་གི་འཕེལ་རྒྱས་ཐད་དུས་རབས་འབྱེད་པའི་དུས་སྐབས་བཟང་པོ་བསུས་ཡོད།

    “བོད་ཀྱི་དོན་དངོས་ལ་གཞི་ཚུགས་པ་དང་སློབ་གླིང་གི་ཕུགས་ལ་དམིགས་ནས་བོད་ལྗོངས་བོད་ལུགས་གསོ་རིག་སློབ་གླིང་འདི་ཉིད་ཏང་གི་སློབ་གསོའི་བྱ་གཞག་ལ་ལྷག་བསམ་རྣམ་དག་དང་མི་རིགས་ཀྱི་ཕུལ་བྱུང་རིག་གནས་རྒྱུན་འཛིན་དང་དར་སྤེལ་བཏང་སྟེ་ཏང་དང་སྲིད་གཞུང་ཐུགས་བློ་བདེ་བ་དང་མི་དམངས་བློ་ཡིད་ཚིམ་པའི་སློབ་ཆེན་ཞིག་གཉེར་དགོས ”ཞེས་བོད་ལྗོངས་བོད་ལུགས་གསོ་རིག་སློབ་གླིང་ཏང་ཨུད་ཀྱི་ཚན་ཁག་གསར་པས་སློབ་གླིང་གི་འཕེལ་རྒྱས་ལ་སྐུལ་འདེད་གཏོང་བའི་ཇུས་ཐག་གསར་པ་བཅད་ཡོད།

    སློབ་གླིང་ཏང་ཨུད་ཚན་ཁག་གི་ཁོངས་མིས་སློབ་གླིང་གི་ཚན་པ་17ལ་བསྐྱོད་དེ་ས་གནས་ས་ཐོག་ཏུ་ཞིབ་བཤེར་དང་། འགན་འཁྲི་རྩད་གཅོད། བྱེད་ཐབས་དོན་འཁྱོལ་བཅས་བྱས་པ་དང་། སློབ་གླིང་གི་ལས་ཁུངས་ཚན་པར་ས་གནས་ས་ཐོག་ཏུ་དཀའ་གནད་ཐག་གཅོད་དང་། ཕྱོགས་བསྡུས་གཞུང་དོན་སྒྲུབ་པ། སློབ་ཁྲིད་ལ་ཞབས་འདེགས་ཞུ་བ་བཅས་བྱས་པ། སློབ་གླིང་གི་སློབ་ཁྲིད་ཚན་པའི་སློབ་ཁྲིད་ཀྱི་དོ་དམ་ལ་ཤུགས་སྣོན་དང་། ལས་ཀའི་འགན་འཁྲི་ནན་དུ་གཏོང་བ། རང་འགུལ་ངང་སློབ་མའི་སློབ་སྦྱོང་དང་འཚོ་བ་སོགས་ཀྱི་བརྒྱུད་རིམ་ཧྲིལ་པོར་རྗེས་འདེད་གཏོང་བ་བཅས་བྱས་ཏེ་ཁྱོན་ཡོངས་ནས་ཞབས་འདེགས་ཞུས་པ་དང་ལྷག་པར་དུ་འཇོན་ཐང་མེད་ན་ལས་གནས་གཞན་ལ་སྤྲོད་དགོས་པའི་ལས་བྱེད་པའི་དོ་དམ་གྱི་གཏན་འབེབས་གསར་པ་བཏོན་པས་བོད་ལྗོངས་བོད་ལུགས་གསོ་རིག་སློབ་གླིང་གི་ལས་བྱེད་པར་སྔར་འཕྲད་མྱོང་མེད་པའི་གནོན་ཤུགས་འཕྲད་པ་དང་། ཆབ་སྲིད་ཀྱི་རིགས་པའི་གཞུང་ལུགས་དང་ལས་ཀའི་ཤེས་བྱ་གསར་པ་སློབ་སྦྱོང་དང་འདུ་ཤེས་གསར་པ་དར་སྤེལ་གཏོང་རྒྱུ་དེ་ལས་བྱེད་པ་མུ་མཐུད་ལས་གནས་ཐོག་སྡོད་པའི་ཆེས་དགོས་གཏུགས་ཀྱི་བྱ་བ་ཞིག་ཏུ་གྱུར་ཡོད་པ་རེད།

    “དེ་ནི་དངོས་འབྲེལ་ལས་སྒྲུབ་དང་ལས་གཏོད་ཀྱི་རྣམ་པ་བཟང་པོ་ཞིག་རེད ”ཅེས་བོད་ལྗོངས་བོད་ལུགས་གསོ་རིག་སློབ་གླིང་གི་དགའ་འོས་པའི་འཕོ་འགྱུར་ལ་དགེ་རྒན་དང་ལས་བཟོའི་བསྔགས་བརྗོད་ཆེན་པོ་ཐོབ་ཡོད།

    འཕེལ་རྒྱས་དང་། བརྟན་ལྷིང་། དམངས་འཚོ་སོགས་ཐད་ཀྱི་རང་སྐྱོང་ལྗོངས་ཏང་ཨུད་ཀྱི་བླང་བྱ་རབ་དང་རིམ་པར་གཞིགས་ནས་བོད་ལྗོངས་བོད་ལུགས་གསོ་རིག་སློབ་གླིང་ཏང་ཨུད་ཚན་ཁག་གི་ཁོངས་མིས་བསྐྱར་དུ་སློབ་གླིང་གི་ངེས་གནས་ཚན་རིག་དང་མཐུན་པའི་ངང་གཏན་འཁེལ་བྱས་ཏེ་བོད་ལྗོངས་བོད་ལུགས་གསོ་རིག་སློབ་གླིང་དེ་ཉིད་བོད་ལུགས་གསོ་རིག་དང་བོད་སྨན་ཆེད་ལས་ཀྱི་མཐོ་རིམ་ཤེས་ལྡན་མི་སྣ་གསོ་སྐྱོང་གི་སློབ་ཆེན་ཞིག་ཏུ་འགྱུར་བ་བྱེད་དགོས་པ་མ་ཟད། བོད་ཀྱི་རིག་གནས་ཕྱི་ཕྱོགས་སུ་སྤེལ་རེས་བྱེད་པའི་སྐར་ཁུང་གལ་ཆེན་ཞིག་ལ་འགྱུར་བ་བྱེད་དགོས་པ་དང་བོད་ཀྱི་མཐུན་སྒྲིལ་ཡར་ཐོན་དྲིལ་བསྒྲགས་དང་ཁ་ཕྲལ་ལ་ངོ་རྒོལ་བྱེད་པའི་འཐབ་ས་གལ་ཆེན་ཞིག་ལ་དེ་བས་འགྱུར་བ་བྱེད་དགོས་པའི་སློབ་གཉེར་ཁ་ཕྱོགས་གཏན་འཁེལ་བྱས་ཡོད་པ་རེད།

    སློབ་གཉེར་གྱི་ཁ་ཕྱོགས་དེར་དམིགས་ནས་བོད་ལྗོངས་བོད་ལུགས་གསོ་རིག་སློབ་གླིང་གིས་སྔ་རྗེས་སུ 《བོད་ལྗོངས་བོད་ལུགས་གསོ་རིག་སློབ་གླིང་གི་ཏང་སྲིད་མཉམ་འབྲེལ་གྲོས་ཚོགས་ལམ་ལུགས་དང་གྲོས་དོན་སྒྲིག་སྲོལ་ལག་བསྟར་བྱ་ཐབས 》དང 《བོད་ལྗོངས་བོད་ལུགས་གསོ་རིག་སློབ་གླིང་གི་ཐབས་ཇུས་གལ་ཆེན་མཉམ་དུ་ཞིབ་འཇུག་བྱེད་པའི་ལམ་ལུགས་ལག་བསྟར་བྱ་ཐབས 》སོགས་ཚན་ཁག་འཛུགས་སྐྱོང་དང་། རྩ་འཛུགས་སྟོབས་ཆེར་གཏོང་བ། སྤྱོད་ཚུལ་ལེགས་སུ་གཏོང་བ། དོ་དམ་ལ་ཤུགས་སྣོན་རྒྱག་པ། བརྟན་ལྷིང་སྲུང་སྐྱོང་སོགས་དང་འབྲེལ་བ་ཡོད་པའི་ལམ་ལུགས་ཁག་20བཟོས་པ་དང་འབྲེལ་འཐུས་སྒོ་ཚང་དུ་བཏང་བ་དང་། རྒྱལ་ཁབ་བོད་ལུགས་གསོ་རིག་དང་བོད་སྨན་ཤེས་ལྡན་མི་སྣ་གསོ་སྐྱོང་བྱེད་སྟངས་སྒྱུར་བཅོས་ཀྱི་ཚོད་ལྟའི་རྣམ་གྲངས་གོ་སྐབས་སུ་བྱས་ཏེ་བོད་ལུགས་གསོ་རིག་དང་བོད་སྨན་ཆེད་ལས་ཀྱི་དངོས་གཞིའི་ཚན་ཁག་དང་ཆེད་ཚན་གྱི 《གསོ་སྐྱོང་ཇུས་གཞི 》བཟོ་བཅོས་དང་དེ་བཞིན་འབྲེལ་ཡོད་སློབ་ཚན་གྱི་སློབ་གཞི་དང་རྩ་གནད་རྩོམ་འབྲིའི་ལས་དོན་ལེགས་གྲུབ་བྱས་ཡོད་པ་རེད།

    “འཛིན་གྲྭ་དང་ཉལ་ཁང་ནང་བསྐྱོད་ནས་གྲོགས་པོ་སྒྲིག་པ ”དང་། “མི་རིགས་མཐུན་སྒྲིལ་གྱི་ཏང་ཡོན་གདོང་ལེན་བྱ་སྤྱོད ”མི་རིགས་མི་འདྲ་བའི་སློབ་མའི་དབར “གཅིག་ཕན་གཅིག་རོགས་དང་ཆ་སྒྲིག ”“འགོ་ཁྲིད་ལས་བྱེད་པ་གྲོང་ཚོ་དང་དུད་ཚང་དུ་བསྐྱོད་ནས་གཉེན་འཚོལ་གྲོགས་སྒྲིག ”སོགས་ཀྱི་བྱེད་སྒོ་ཚ་ཚ་འུར་འུར་ངང་སྤེལ་ཁར་སློབ་གླིང་གི་འགོ་ཁྲིད་དང་ཚན་ཁག་གི་འགོ་ཁྲིད་ཀྱི་ཁ་པར་ཨང་གྲངས་དང་ཡིག་སྒམ་ཆ་ཚང་ཡོངས་བསྒྲགས་བྱས་ནས་བདེ་སྡུག་ཞུ་སའི་ཐབས་ལམ་ཁྱོན་ཡོངས་ནས་ཤར་གཏོང་བྱས་ཏེ་དགེ་སློབ་ཀྱི་དཀའ་ངལ་དང་གནད་དོན་དུས་ཐོག་ཏུ་ཐག་གཅོད་བྱས་ཡོད།

    ལས་བཟོ་ཚོ་ལས་ཤག་གསར་པར་སྤོས་པ་དང་། དགེ་རྒན་དང་ལས་བཟོར་ལུས་སྦྱོང་རོལ་རྩེད་དང་། རིག་གནས་འཚོ་བ། རིག་གཞུང་སྤེལ་རེས་བཅས་གཞི་གཅིག་ཏུ་འདུས་པའི་དགེ་རྒན་ལས་བཟོའི་ཁྱིམ་གཞིས་ཡོད་པ། སློབ་མར་འཚོལ་སྟབས་བདེ་བའི་དཔྱད་གཞིའི་ཡིག་ཆ་དང་རྒྱང་ཁྲིད་སློབ་སྦྱོང་གི་གློག་སྤྱད་སློབ་ཁང་ཡོད་པ། ལས་བྲལ་དང་ལས་འཁྱུར་ངལ་གསོ་རྒྱག་མཁན་ལས་བྱེད་ལས་བཟོ་དུས་བཀག་བཞིན་ནང་སར་ལྟ་སྐོར་དང་ལུས་གསོ་བྱེད་པར་འགྲོ་བ། སློབ་གླིང་གི་གྲོང་ཚོར་བཅའ་སྡོད་ས་ཚིགས་བཞིས་མ་དངུལ་སྒོར་ཁྲི་400ལྷག་ཙམ་མཐུན་སྦྱོར་བྱས་ཏེ་མང་ཚོགས་ལ་འཕྲལ་མཁོ་ཆེ་བའི་ཞིང་འབྲེལ་རྣམ་གྲངས་དང་། འཕྲོད་བསྟེན་ཁང་། རིག་གནས་བྱེད་སྒོ་སྤེལ་ཡུལ་སོགས་བསྐྲུན་པ་མ་ཟད། ད་དུང་ཞིང་འབྲོག་མང་ཚོགས་མི་ཐེངས་ཁྲི་4ལྷག་ཙམ་ལ་སྨན་རིན་མི་དགོས་པར་སྨན་བཅོས་དང་སྨན་སྤྲད་པ་སོགས་རེད།

    བོད་ལྗོངས་བོད་ལུགས་གསོ་རིག་སློབ་གླིང་གིས་གོམ་སྟབས་བརྟན་པོ་སྤོ་བཞིན་ཚན་རིག་དང་མཐུན་པའི་འཕེལ་རྒྱས་གཏོང་བའི་ཁྲོད་མཆོང་སྐྱོད་ཀྱི་འབད་འཐབ་བྱེད་བཞིན་མཆིས།

    “ལོ་དེ་དག་ནང་ལས་ཀ་དངོས་འབྲེལ་དཀའ་ལས་ཁག་པོ་བྱུང ”ཞེས་ཉེ་བའི་ལོ་ཤས་གོང་གི་གནས་ཚུལ་སྐོར་གླེང་སྐབས་བོད་སྨན་ཚན་ཁག་གི་ཏང་སྤྱི་ཁྱབ་ཀྲི་པུའི་ཧྲུའུ་ཅི་གཞོན་པ་ཀྲང་ཧུང་ཝུའེ་ཡིས་མྱོང་ཚོར་ཟབ་མོའི་སྒོ་ནས་བརྗོད། བོད་ལྗོངས་བོད་ལུགས་གསོ་རིག་སློབ་གླིང་ལ་འགན་འཁྲི་འཁུར་སེམས་ཆེན་པོ་ཡོད་པས་ཏང་གི་གཞི་རིམ་རྩ་འཛུགས་རྒྱུན་ཆད་མེད་པར་འཐུས་ཚང་དང་སྟོབས་ཆེར་བཏང་ནས་ཏང་སྤྱི་ཁྱབ་ཀྲི་པུའུ་8དང་། ཏང་ཀྲི་པུའུ་19 སློབ་མའི་ཏང་ཚོགས་ཆུང་19བཙུགས་པ་དང་སློབ་གླིང་གི་འགོ་ཁྲིད་དང་། ལས་བྱེད་པ། དགེ་རྒན། བདེ་སྲུང་། སློབ་མ་བཅས་མཉམ་དུ་ཞུགས་པའི་བརྟན་ལྷིང་སྲུང་སྐྱོང་གི་དཔུང་ཁག་བཙུགས་ཏེ་བདེ་འཇགས་དང་བརྟན་ལྷིང་སློབ་གསོའི་ལས་དོན་སྤེལ་སྟངས་ལ་ཁྱོན་ཡོངས་ནས་ཤུགས་སྣོན་བརྒྱབ་པས་ལྷ་ས་གྲོང་ཁྱེར་གྱི་2013ལོའི་ལོ་འཁོར་གྱི་སྤྱི་ཚོགས་དོ་དམ་ཕྱོགས་བསྡུས་བཅོས་སྐྱོང་ལས་དོན་གྱི་སྔོན་ཐོན་མཉམ་སྡེབ་དང་2013ལོའི་ལོ་འཁོར་གྱི་སློབ་གསོའི་ཁོངས་གཏོགས་ཀྱི་བདེ་འཇགས་བརྟན་ལྷིང་ལས་དོན་གྱི་སྔོན་ཐོན་ཚན་པའི་གཟི་བརྗིད་མཚན་སྙན་ཐོབ་ཡོད།

    བོད་ལྗོངས་བོད་ལུགས་གསོ་རིག་སློབ་གླིང་གི་ཚན་ཞིབ་མཚན་སྙན་དང་གྲུབ་འབྲས་ཀྱང་རིག་གཞུང་ལས་རིགས་སུ་སྐད་གྲགས་ཆེན་པོ་ཡོད་པ་སྟེ། སློབ་གླིང་གིས “ཀྲུང་གོ་བོད་རིག་པའི་ཞིབ་འཇུག་གི་ཇོ་མོ་གླང་མའི་བོད་རིག་པའི་བྱ་དགའ ”སྐབས་གསུམ་པར་བདམས་སྐྱེལ་བྱས་ནས་དཔྱད་བསྡུར་ནང་ཞུགས་པའི་བོད་རིག་པའི་ཞིབ་འཇུག་གྲུབ་འབྲས་ཚང་མར་རྒྱལ་ཁབ་རིམ་པའི་རིམ་པ་མཐོ་ཤོས་ཀྱི་བྱ་དགའ་ཐོབ་པ་དང་། བོད་ལྗོངས་བོད་ལུགས་གསོ་རིག་སློབ་གླིང་གི་ཞོར་གཏོགས་སྨན་ཁང་གིས་པེ་ཅིང་ཀྲུང་ལུགས་གསོ་རིག་སློབ་ཆེན་ཤར་ཕྱོགས་སྨན་ཁང་གི་རྒྱབ་སྐྱོར་ཤུགས་ཆེན་འོག་རྒྱང་ཁྲིད་སྨན་བཅོས་དང་སློབ་ཁྲིད་ཞབས་ཞུའི་ལྟེ་གནས་བཙུགས་པ། ལྷག་དོན་དུ་བོད་ལྗོངས་བོད་ལུགས་གསོ་རིག་སློབ་གླིང་གིས་རྩོམ་སྒྲིག་པར་སྐྲུན་བྱས་པའི 《ཀྲུང་གོའི་བོད་ལུགས་གསོ་རིག་རྩ་ཆེའི་དཔེ་རྙིང་ཀུན་བཏུས 》ཞེས་པའི་དཔེ་ཚོགས་ནི་རྒྱལ་ཁབ་དབུ་བརྙེས་ཚུན་བོད་ལུགས་གསོ་རིག་དང་བོད་སྨན་རིག་པའི་དཔེ་རྙིང་སྲུང་སྐྱོང་ལས་དོན་ནང་སྤེལ་བའི་གཞི་ཁྱོན་ཆེ་ཤོས་ཀྱི་སྔོག་འདོན་ལེགས་སྒྲིག་བྱས་པ་ཞིག་ཡིན་པས་ཀྲུང་གོའི་སྲོལ་རྒྱུན་གསོ་བ་རིག་པའི་འཕེལ་རྒྱས་ལོ་རྒྱུས་ཐོག་ནས་བརྗོད་ནའང་འདྲ་ཡང་ན་བོད་ལུགས་གསོ་རིག་དང་བོད་སྨན་རིག་པའི་འཕེལ་རྒྱས་ཀྱི་ལོ་རྒྱུས་ཐོག་ནས་བརྗོད་ནའང་ཚང་མར་ལམ་ཚད་རྡོ་རིང་གི་དོན་སྙིང་ལྡན་ཡོད།

    ལོ་རྒྱུས་ཀྱི་འགོ་འཛུགས་ས་གསར་པའི་ཐོག་བོད་ལྗོངས་བོད་ལུགས་གསོ་རིག་སློབ་གླིང་གིས་གོམ་ཞེང་ཆེན་པོས་དེ་བས་མཛེས་སྡུག་ལྡན་པའི་འབྱུང་འགྱུར་ཕྱོགས་སུ་སྐྱོད་བཞིན་ཡོད།