【སྲིད་ཇུས 】 བོད་སྨན་གྱི་སྨན་རྒྱུ་འདེབས་འཛུགས (གསོ་སྤེལ )ཐོན་ལས་གསོ་སྐྱོང་བྱས་ནས་མིས་འདེབས་གསོ་དང་། འདེབས་འཛུགས (གསོ་སྤེལ )ལག་རྩལ་ལ་ཞིབ་འཇུག གསར་སྤེལ་དང་ཁྱབ་གདལ་གཏོང་བ་བཅས་ལ་ཤུགས་སྣོན་བརྒྱབ་ནས་ཐོན་ཁུངས་ཉམས་གསོ་དང་བསྐྱར་སྐྱེ་བཅས་ཡོང་རྒྱུར་སྐུལ་འདེད་བཏང་སྟེ་བོད་ལུགས་གསོ་རིག་དང་བོད་སྨན་གནའ་གཞུང་གི་ཚད་ལྡན་ཡིག་ཆ་ལེགས་སྒྲིག་དང་ཞིབ་འཇུག་མུ་མཐུད་བྱས་ཏེ་བོད་སྨན་གྱི་དམིགས་བསལ་བཟོ་རྩལ་དང་ཚབ་བྱེད་དངོས་པོར་ཞིབ་འཇུག་དང་དེ་བཞིན་བོད་ལུགས་གསོ་རིག་གི་ནད་ཐོག་སྨན་བཅོས་ཚད་ལྡན་ཅན་ཡོང་བར་ཞིབ་འཇུག་བྱ་རྒྱུར་ཤུགས་སྣོན་རྒྱག་དགོས།

    བོད་སྨན་གྱི་སྨན་རྒྱུ་སྐྱེ་འཚར་འགོར་བ་དང་དུས་འཁོར་རིང་ཙམ་ཡིན་ལ་གཞི་ཁྱོན་ཆེ་བའི་ཐོན་སྐྱེད་བྱེད་པ་དེར་མ་བཅོས་རྒྱུ་ཆའི་དགོས་མཁོ་ཧ་ཅང་ཆེན་པོ་ཡོད་པ་རེད། རྒྱུན་མཐུད་འཕེལ་རྒྱས་ཀྱི་ལམ་བུའི་ཐོག་བསྐྱོད་ཁར “ཁེ་ཕན་གྱི་གནོད་འཚེ ”ལས་གཡོལ་བར་མི་མང་པོ་ཞིག་གིས་བོད་སྨན་གྱི་སྨན་རྒྱུ་མིས་འདེབས་གསོ་བྱེད་པའི་ཐོག་རེ་བ་བཅོལ་ནས་ཚན་རིག་ལག་རྩལ་ལ་བརྟེན་ཏེ་མིས་འདེབས་གསོ་བྱས་པའི་བོད་སྨན་གྱི་སྨན་རྒྱུ་གསོ་སྤེལ་བྱ་རྒྱུར་འདེགས་སྐྱོར་བྱས་ན་བོད་ལུགས་གསོ་རིག་དང་བོད་སྨན་རྒྱུན་མཐུད་འཕེལ་རྒྱས་ཁྲོད་ཀྱི་ཐོན་ཁུངས་མི་འདང་བའི་འགལ་ཟླ་སེལ་ཐུབ་པའི་ངོས་འཛིན་བྱེད་ཀྱི་ཡོད་པ་རེད།

    དེར་བརྟེན་བོད་ལྗོངས་བོད་ལུགས་གསོ་རིག་སློབ་གླིང་གིས་བོད་སྨན་གྱི་སྨན་རྒྱུ་མིས་འདེབས་གསོ་བྱེད་པར་ཞིབ་འཇུག་བྱེད་ཤུགས་ཆེ་རུ་བཏང་ནས་མིག་སྔར་དོག་སྡེའི་ཕུ་དང་ལྷོ་ཁའི་གོང་དཀར་རྫོང་དུ་དྲོད་ཁང་གི་སྐྱེད་སྲིང་རྟེན་གཞི་གཉིས་གསར་འཛུགས་བྱས་ཡོད་པ་དང་རིགས་གཅིག་མཁས་ཅན་མང་པོ་ཞིག་གིས་ཀྱང་འདེབས་གསོའི་ལག་རྩལ་གྱི་ཞིབ་འཇུག་ལས་ཀ་བྱེད་བཞིན་ཡོད་པ་རེད།

    འོན་ཀྱང་སྨན་སྦྱོར་པ་ཞིག་ཡིན་པའི་དབང་ཕྱུག་གི་ངོས་ནས་བརྗོད་ན་སེམས་ཁྲལ་ཆེན་པོ་ཡོད་པ་སྟེ། མིས་འདེབས་གསོ་དང་བོད་སྨན་གྱི་སྨན་རྒྱུ་འདེབས་གསོ་བྱ་རྒྱུ་དེ་མིག་སྔར་རང་ལྗོངས་སུ་ད་དུང་ཚོད་ལྟའི་དུས་མཚམས་སུ་གནས་ཡོད་པ་མ་ཟད། སྨན་རྒྱུ་ས་བབ་དང་། དྲོད་ཚད། སྨུག་ཕྱིའི་འོད་ཟེར་སོགས་ཐད་ཀྱི་དམིགས་བསལ་དགོས་མཁོ་དང་བསྟུན་དགོས་པས་སྨན་རྒྱུ་མང་དག་ཅིག་མིས་འདེབས་གསོ་གཏན་ནས་བྱེད་ཐུབ་ཀྱི་མེད་ཅིང་། འདེབས་གསོ་བྱེད་ཐུབ་ཀྱང་མིས་འདེབས་གསོ་བྱས་པའི་སྨན་རྒྱུའི་ཕན་ནུས་དེ་རི་སྐྱེས་ཁོར་ཡུག་འོག་སྐྱེས་འཚར་བྱུང་བའི་སྨན་རྒྱུའི་ནུས་པ་དང་གཅིག་མཚུངས་ཡིན་མིན་ཤེས་ཀྱི་མེད་པས་དེ་དག་ཚང་མ་གནད་འགག་ཡིན་པ་རེད།

    ཚན་རྩལ་གྱི་སྟོབས་ཤུགས་ལ་བོད་ལུགས་གསོ་རིག་དང་བོད་སྨན་རྒྱུན་མཐུད་འཕེལ་རྒྱས་གཏོང་བའི་གནད་དོན་ཐག་གཅོད་བྱེད་པའི་ཐད་སྔར་བཞིན་སུབ་ཐབས་མེད་པའི་བྱས་རྗེས་ལྡན་པ་སྨོས་མེད་ཡིན་པ་དང “བོད་སྨན་སྦྱོར་རྟ་བྱེད་སྟངས་སྣ་ཁ 900ལྷག་ཙམ་ཡོད་པ་དང་མིག་སྔར་ཐོན་སྐྱེད་དང་སྤྱོད་བཞིན་པ་སྣ་ཁ་400ལས་མེད་པ་དང་གལ་སྲིད་དེ་བྱིངས་ཀྱི་སྣ་ཁ་500ཡི་སྦྱོར་རྟ་ལེགས་གྲུབ་བྱུང་ན་ཐོན་རྫས་གསར་པས་བོད་སྨན་སྨན་རྒྱུ་གསར་པ་ཁག་གཅིག་ཐོན་སྐྱེད་བྱ་རྒྱུར་སྐུལ་འདེད་གཏོང་ཐུབ་པ་དང་མིག་སྔར་དགོས་གལ་ཆེ་ལ་སྟོངས་ཉེར་ཡོད་པའི་སྨན་རྒྱུར་བརྟེན་མི་དགོས་པར་སོར་ཆུད་སྐྱེ་འཕེལ་དང་རེས་འཁོར་བེད་སྤྱོད་བྱེད་ཐུབ ”ཡིན་ནའང་བོད་ལྗོངས་བོད་ལུགས་གསོ་རིག་སློབ་གླིང་གི་ཡོའན་ཀྲང་ཉི་མ་ཚེ་རིང་གིས “བོད་ལུགས་གསོ་རིག་དང་བོད་སྨན་གྱི་སྦྱོར་རྟའི་འབྱུང་ཁུངས་ནི་གནའ་གཞུང་ནང་འཁོད་པ་དང་བོད་ལུགས་སྨན་པ་རྒན་གྲས་ཀྱི་ཉམས་མྱོང་གསོག་འཇོག་བྱས་པ་ལས་བྱུང་བ་ཞིག་ཡིན་པས་ཐོན་རྫས་གསར་པ་ཞིབ་འཇུག་གསར་སྤེལ་བྱེད་དགོས་ཚེ་བོད་ལུགས་གསོ་རིག་གི་གནའ་གཞུང་དཔེ་ཆ་དང་། དམངས་ཁྲོད་གསང་བའི་སྦྱོར་རྟ་བྱེད་ཐབས། རིགས་གཅིག་མཁས་ཅན་གྱི་གསང་བའི་སྦྱོར་རྟ་བྱེད་ཐབས་བཅས་བསྡུ་རུབ་བྱེད་པ་དང་བོད་ལུགས་སྨན་པ་རྒན་རབས་ཀྱི་ཉམས་མྱོང་རྒྱུན་འཛིན་བྱ་རྒྱུ་ཧ་ཅང་དགོས་གལ་ཆེན་པོ་ཡོད ”ཅེས་གསར་འགོད་པར་ཤོད་ཀྱི་འདུག

    གནའ་གཞུང་ཚད་ལྡན་ཡིག་ཆ་དང་གསང་བའི་སྦྱོར་རྟ་བྱེད་སྟངས་ཐད་བོད་ལྗོངས་བོད་ལུགས་གསོ་རིག་སློབ་གླིང་མདུན་གྲལ་དུ་སླེབས་ཡོད་ཅིང་། བསྡོམས་རྩིས་ལྟར་ན། བོད་ལུགས་གསོ་རིག་གི་གནའ་གཞུང་ཚད་ལྡན་ཡིག་ཆ་4000ལྷག་ཙམ་ཡོད་པ་དེ་དག་མི་སྒེར་དང་། ཚན་པ། དམངས་ཁྲོད་བཅས་སུ་ཁྱབ་ཡོད། འདི་ལོའི་ཟླ་6པ་ནས་བཟུང་བོད་ལྗོངས་བོད་ལུགས་གསོ་རིག་སློབ་གླིང་གིས་ཚོགས་ཆུང་གཉིས་སྒྲིག་འཛུགས་བྱས་ནས་ས་ཁུལ (གྲོང་ཁྱེར )ཁག་ཏུ་བཏང་སྟེ་ཉོ་བ་དང་། དཔར་བཤུས་རྒྱག་པ། གློག་རྡུལ་གྱིས་འདྲ་བཤུ་བྱེད་པ་སོགས་ཀྱི་བྱ་ཐབས་སྤྱད་ནས་མིག་སྔར་ལག་བྲིས་དཔེ་རྒྱུན་དཀོན་རིགས་224བསྡུ་རུབ་བྱས་པ་དང་འབྲེལ་ལོ་2ནས་3ནང་ཚུན་དུ་རྒྱལ་ཡོངས་དང་འཛམ་གླིང་ཐོག་ཡིག་ཆ་ཆ་ཚང་ཤོས་ཀྱི་བོད་ལུགས་གསོ་རིག་དང་བོད་སྨན་གྱི་ཚད་ལྡན་ཡིག་ཆའི་ལྟེ་གནས་འབའ་ཤིག་ཏུ་འགྱུར་བ་བྱ་རྒྱུ་རེད།