བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཉིན་ཤས་གོང་གསར་འགོད་པར་རང་སྐྱོང་ལྗོངས་འཕེལ་སྒྱུར་ཨུ་ལྷན་ནས་ཤེས་རྟོགས་བྱུང་བར། རང་ལྗོངས་ཀྱིས་ལག་བསྟར་བྱས་པའི་ཞིང་འབྲོག་ཁུལ་གྱི་འཕྲོད་བསྟེན་རྨང་གཞིའི་སྒྲིག་བཀོད་འཛུགས་སྐྲུན་གྱི་དུས་ཐེངས་གཉིས་པའི་ལས་གྲྭ་སྤེལ་འགོ་ཚུགས་ཡོད་པ་རེད།

    ཤེས་རྟོགས་བྱུང་བར་གཞིགས་ན། 2009ལོ་ནས་2011ལོ་བར་ཞིང་འབྲོག་ཁུལ་གྱི་འཕྲོད་བསྟེན་རྨང་གཞིའི་སྒྲིག་བཀོད་འཛུགས་སྐྲུན་གྱི་དུས་ཐེངས་གཉིས་པའི་ལས་གྲྭ་འཛུགས་སྐྲུན་བྱེད་རིང་འཕྲོད་བསྟེན་ཞབས་ཞུའི་ལྟེ་གནས་72དང་ལྟེ་བའི་ཤང （གྲོང་རྡལ ）འཕྲོད་བསྟེན་ཁང་164འཛུགས་སྐྲུན་བྱ་རྒྱུ་སྔར་བས་འཐུས་སྒོ་ཚང་དུ་བཏང་ནས་རྫོང་ཚང་མར་ཚད་ལྡན་ཅན་གྱི་རྫོང་སྨན་ཁང （འཕྲོད་བསྟེན་ཞབས་ཞུའི་ལྟེ་གནས ）གཅིག་ཡོད་པ་དང་ཚད་ལྡན་ཅན་གྱི་ཤང （གྲོང་རྡལ ）གི་འཕྲོད་བསྟེན་ཁང་གཉིས་ནས་གསུམ་བར་ཡོད་པའི་དམིགས་ཚད་ལ་སླེབས་ཐུབ་པ་དང་། གྲོང་ཚོའི་འཕྲོད་བསྟེན་ཁང་འཛུགས་སྐྲུན་བྱ་རྒྱུ་དེ་གྲོང་ཚོ་རིམ་པའི་རྩ་འཛུགས་ཀྱི་བྱེད་སྒོ་སྤེལ་ཡུལ་འཛུགས་སྐྲུན་བྱེད་པའི་སྤྱིའི་འཆར་འགོད་ནང་མུ་མཐུད་བཅུག་ནས་སྲིད་འཛིན་གྲོང་ཚོ་ཚང་མར་འཕྲོད་བསྟེན་ཁང་ཡོད་པའི་དམིགས་ཡུལ་མངོན་འགྱུར་བྱ་རྒྱུ། གྲོང་ཁྱེར་སྡེ་ཁུལ་འཕྲོད་བསྟེན་ཞབས་ཞུའི་ལྟེ་གནས་9གསར་སྐྲུན་དང་སྒྱུར་བཀོད་རྒྱས་སྐྲུན་བྱས་ཏེ་ཁྲོམ་གཞུང་དོན་གཅོད་ཁྲུའུ་ཚང་མར་སྡེ་ཁུལ་འཕྲོད་བསྟེན་ཞབས་ཞུའི་ལྟེ་གནས་རེ་ཡོད་པ་བྱ་རྒྱུ། སློབ་ཁྲིད་ས་ཚིགས་དང་དམའ་རིམ་སློབ་ཆུང་ཕུད་སློབ་གྲྭའི་སྨན་དོན་ཁང་དེ་སློབ་གྲྭ་སྤྱི་ཡོངས་འཛུགས་སྐྲུན་གྱི་འཆར་འགོད་ནང་བཅུག་ནས་རིམ་བཞིན་སློབ་གྲྭ་ཚང་མར་སྨན་དོན་ཁང་ཡོད་པ་བྱེད་པའི་དམིགས་ཚད་མངོན་འགྱུར་བྱ་རྒྱུ་བཅས་ཡིན་ཞིང་། 2009ལོར་རང་ལྗོངས་ཀྱིས་རྫོང་སྨན་ཁང （འཕྲོད་བསྟེན་ཞབས་ཞུའི་ལྟེ་གནས ）27དང་ལྟེ་བའི་ཤང （གྲོང་རྡལ ）འཕྲོད་བསྟེན་ཁང་53ཚད་ལྡན་ཅན་གྱི་འཛུགས་སྐྲུན་དང་། སྡེ་ཁུལ་འཕྲོད་བསྟེན་ཞབས་ཞུའི་ལྟེ་གནས་4གསར་སྐྲུན་དང་སྒྱུར་བཀོད་རྒྱས་སྐྲུན། སློབ་གྲྭ་ཁག་གཅིག་གི་སྨན་དོན་ཁང་འཛུགས་སྐྲུན་བཅས་བྱ་རྩིས་ཡོད་པ་རེད།

    དེ་དང་ཆབས་ཅིག་རང་སྐྱོང་ལྗོངས་མི་དམངས་སྨན་ཁང་མུ་མཐུད་འཐུས་སྒོ་ཚང་དུ་གཏོང་བ་དང་། རང་སྐྱོང་ལྗོངས་མི་དམངས་སྨན་ཁང་གཉིས་པའི་རྨང་གཞིའི་ཐོག་རང་སྐྱོང་ལྗོངས་མ་བུ་འཕྲོད་སྦྱོར་དང་རང་སྐྱོང་ལྗོངས་བྱིས་པའི་སྨན་ཁང་སྒྱུར་བཀོད་འཛུགས་སྐྲུན་བྱ་རྒྱུ། རང་སྐྱོང་ལྗོངས་མི་དམངས་སྨན་ཁང་གསུམ་པ་གསར་སྐྲུན་དང་སྨན་བཅོས་མྱུར་སྐྱོབ་དང་རིམས་ནད་འགོག་བཅོས་མ་ལག་འཐུས་སྒོ་ཚང་དུ་གཏོང་རྒྱུ། རང་སྐྱོང་ལྗོངས་སྨན་རྩིས་ཁང་སྒྱུར་བཀོད་བྱས་ནས་ཁྱབ་འགྱེད་སྣེ་ཁྲིད་ཀྱི་ནུས་པ་ཆེ་ཙམ་ལྡན་པའི་རྒྱལ་ཁབ་ཀྱི་བོད་ལུགས་གསོ་རིག་དང་བོད་སྨན་གྱི་ནད་ཐོག་སྨན་བཅོས་དང་ཞིབ་འཇུག་རྟེན་གཞི་ཆགས་པ་བྱ་རྒྱུ་བཅས་ཡིན་པ་རེད།