བོད་ལྗོངས་ཉིན་རེའི་ཚགས་པར་ཁང་དུ་ལྷ་རི་ནས་གློག་འཕྲིན་འབྱོར་གསལ། ཉེ་བའི་ལོ་ཤས་རིང་ལྷ་རི་རྫོང་གིས་བོད་སྨན་གྱི་ཐོན་ཁུངས་ཀྱི་ལེགས་ཆར་བརྟེན་པ་དང་རོགས་སྐྱོར་བྱེད་ཤུགས་ཆེ་རུ་བཏང་ནས་བོད་ལུགས་གསོ་རིག་དང་བོད་སྨན་བྱ་གཞག་འཕེལ་རྒྱས་དང་སྟོབས་ཆེར་ཧུར་ཐག་བཏང་ཡོད་པ་རེད།

    “ཀུང་སི་དང་། རྟེན་གཞི། ཞིང་དུད ”བཅས་ཟུང་འབྲེལ་གྱི་འཕེལ་རྒྱས་གཏོང་ཐབས་མཐའ་འཁྱོངས་ཀྱིས་བོད་ཀྱི་སྨན་རྩྭ་འདེབས་པའི་ལག་རྩལ་ཞིབ་འཇུག་གསར་སྤེལ་དང་ཁྱབ་གདལ་གཏོང་ཤུགས་ཆེ་རུ་གཏོང་བ་དང་། བོད་ཀྱི་སྨན་རྩྭ་ཐོན་སྐྱེད་རྟེན་གཞི་འཛུགས་སྐྲུན་ལ་ཤུགས་སྣོན་རྒྱག་པ། བོད་ཀྱི་སྨན་རྩྭ་འདེབས་འཛུགས་ཀྱི་གཞི་ཁྱོན་ཆེ་རུ་གཏོང་བ་བཅས་བརྒྱུད་བོད་ཀྱི་སྨན་རྩྭའི་ཁྲོམ་རའི་མཁོ་སྤྲོད་འགན་ལེན་བྱས་པ་དང་བོད་ཀྱི་སྨན་རྩྭའི་ཐོན་ཁུངས་ཀྱི་ལེགས་ཆ་དེ་ཐོན་ཟོག་གི་ལེགས་ཆ་དང་དཔལ་འབྱོར་གྱི་ལེགས་ཆར་བསྒྱུར་རྒྱུར་སྐུལ་འདེད་བཏང་བར་བརྟེན་བོད་སྨན་བྱ་གཞག་འཕེལ་རྒྱས་མྱུར་པོ་བྱུང་བ་རེད།

    བོད་སྨན་བྱ་གཞག་ལ་རོགས་སྐྱོར་བྱེད་ཤུགས་ཆེ་རུ་དང་བོད་སྨན་བྱ་གཞག་གསོ་སྐྱོང་དང་སྟོབས་ཆེར་གཏོང་ཤུགས་ཆེ་རུ་བཏང་ནས་བོད་སྨན་ཞིབ་བཟོ་དང་། གསར་སྤེལ། ཐོན་སྐྱེད་བཅས་ཀྱི་ཆུ་ཚད་ཧྲིལ་པོ་མཐོ་རུ་བཏང་ཞིང་། མིག་སྔའི་བར་ལྷ་རི་རྫོང་བོད་སྨན་ཁེ་ལས་ཀྱིས་རིམ་རྩིས་བྱས་ན་བོད་སྨན་ཐོན་ཟོག་སྣ་ཁ་180 ཞིབ་བཟོ་བྱས་ཡོད་པ་དང་ལོ་རེར་སྤྱི་རྒྱ་3000 ཐོན་སྐྱེད་བྱས་པར་ལོ་རེའི་ཐོན་ཟོག་རིན་ཐང་སྒོར་ཁྲི་ 230 ལྷག་ཙམ་ཟིན་གྱི་ཡོད་པ་རེད།

    རྨང་གཞིའི་སྒྲིག་བཀོད་འཛུགས་སྐྲུན་ལ་ཤུགས་སྣོན་བརྒྱབ་ནས་བོད་ལུགས་གསོ་རིག་དང་བོད་སྨན་བྱ་གཞག་འཕེལ་རྒྱས་གཏོང་བའི་གཞི་རྩ་བརྟན་དུ་བཏང་ཞིང་། འདི་ལོ་ཁྱོན་མ་དངུལ་སྒོར་ཁྲི་ 900 བཏང་ནས་རྫོང་སྨན་རྩིས་ཁང་གི་སྒོ་བསྟེན་ཐོག་བརྩེགས་ཁང་དང་སྨན་སྦྱོར་ཁང་བསྐྲུན་པ་དང་བོད་ལུགས་གསོ་རིག་གི་ཁྱད་ཆོས་ལྡན་པའི་ཆེད་ལས་ཚན་ཁག་གི་སྒོ་བསྟེན་སྨན་ཁང་བཙུགས་ནས་བོད་ལུགས་གསོ་རིག་དང་བོད་སྨན་བྱ་གཞག་འཕེལ་རྒྱས་གཏོང་བའི་རྨང་གཞི་སྔར་བས་བརྟན་དུ་བཏང་ཡོད་པ་རེད།