བོད་ལྗོངས་ཉིན་རེའི་ཚགས་པར་ཁང་དུ་ནག་ཆུ་ནས་གློག་འཕྲིན་འབྱོར་གསལ། ད་ཕན་ལོ་ཤས་རིང་ལྷ་རི་རྫོང་གིས་བོད་ལུགས་གསོ་རིག་དང་བོད་སྨན་ཐོན་ཁུངས་ཀྱི་ལེགས་ཆར་བརྟེན་ནས་རྒྱབ་སྐྱོར་བྱེད་ཤུགས་ཆེ་རུ་བཏང་སྟེ་བོད་ལུགས་གསོ་རིག་དང་བོད་སྨན་ལས་རིགས་འཕེལ་རྒྱས་དང་སྟོབས་ཆེར་ཧུར་ཐག་བཏང་བར་དགའ་བ་སྐྱེ་འོས་པའི་གྲུབ་འབྲས་ཐོབ་ཡོད་པ་རེད།

    མིག་སྔའི་བར་ལྷ་རི་རྫོང་གི་བོད་ལུགས་གསོ་རིག་དང་བོད་སྨན་ཁེ་ལས་ཀྱིས་རིམ་རྩིས་བྱས་ན་བོད་སྨན་སྣ་ཁ་180ཞིབ་བཟོ་བྱས་པར་ལོའི་ཐོན་ཚད་སྤྱི་རྒྱ་3000ཟིན་པ་དང་ལོའི་ཐོན་རྫས་རིན་ཐང་སྒོར་ཁྲི་230ལྷག་ཙམ་བྱུང་ཡོད། རྨང་གཞིའི་སྒྲིག་བཀོད་སྐྲུན་རྒྱུར་ཤུགས་སྣོན་བརྒྱབ་སྟེ་བོད་ལུགས་གསོ་རིག་དང་བོད་སྨན་ལས་རིགས་འཕེལ་རྒྱས་གཏོང་བའི་རྨང་གཞི་བརྟན་དུ་བཏང་ཞིང་། 2008ལོར་ལྷ་རི་རྫོང་གིས་ཁྱོན་མ་དངུལ་སྒོར་ཁྲི་900བཏང་ནས་རྫོང་སྨན་རྩིས་ཁང་གི་སྒོ་བསྟེན་སྨན་ཁང་གི་ཐོག་བརྩེགས་ཁང་ཆེན་དང་སྨན་རྫས་ལས་སྣོན་ཁང་སྐྲུན་རྒྱུ་དང་བོད་ལུགས་གསོ་རིག་གི་ཁྱད་ཆོས་ལྡན་པའི་ཆེད་ལས་ཚན་ཁག་གི་སྒོ་བསྟེན་སྨན་ཁང་བཀོད་སྒྲིག་བྱས་ཏེ་བོད་ལུགས་གསོ་རིག་དང་བོད་སྨན་ལས་རིགས་འཕེལ་རྒྱས་གཏོང་བའི་རྨང་གཞི་སྔར་བས་བརྟན་དུ་གཏོང་རྒྱུ་ཡིན་པ་རེད།

    མིག་སྔར་བོད་ལུགས་གསོ་རིག་དང་བོད་སྨན་ལས་རིགས་འདི་ཉིད་ལྷ་རི་རྫོང་གི་རྫོང་ཁོངས་དཔལ་འབྱོར་འཕེལ་རྒྱས་གཏོང་བའི་འཕར་གནས་གསར་པ་ཞིག་ཏུ་རིམ་གྱིས་འགྱུར་བཞིན་ཡོད་པ་རེད།