འདི་ནི་སྨན་དོན་མི་སྣས་མང་ཚོགས་ལ་རིན་མེད་ཀྱིས་གཟུགས་པོར་བརྟག་དཔྱད་བྱེད་བཞིན་པ།

སྨན་བཅོས་དང་འཕྲོད་བསྟེན་སྒྲིག་སྲོལ་སྒྱུར་བཅོས་ཟམ་མི་ཆད་པར་གཏིང་ཟབ་ཏུ་དང་འཕྲོད་བསྟེན་བྱ་གཞག་བྱ་འཕུར་བ་ལྟར་འཕེལ་རྒྱས་འགྲོ་བ་དང་བསྟུན་ནས་ལྷོ་ཁ་ས་ཁུལ་འཕྲོད་བསྟེན་སྡེ་ཚན་གྱིས་སྨན་བཅོས་འཕྲོད་བསྟེན་སྒྲིག་སྲོལ་སྒྱུར་བཅོས་ཀྱི་གོ་སྐབས་ལ་བརྟེན་ནས་སྨན་བཅོས་འཕྲོད་བསྟེན་ཞབས་ཞུའི་ནུས་པ་ཟམ་མི་ཆད་པར་གོང་མཐོར་བཏང་ནས་སླད་ཕྱིན་ཞིང་འབྲོག་པར་ནད་ལྟ་དཀའ་བ་དང་སྨན་རིན་མཐོ་བའི་གནད་དོན་མི་ཐོན་པ་བྱས་པ་རེད།

མི་སེར་གྱིས་ནད་ལྟ་སྐབས་སྟབས་བདེ་རུ་སོང་བ།

“ནད་གཞི་ཆུང་ཆུང་གྲོང་ཚོར་སྨན་བཅོས་ཐུབ་པ་དང་ནད་གཞི་ཆེ་གྲས་ལྷོ་ཁ་ས་ཁུལ་དུ་སྨན་བཅོས་ཐུབ་པ”དང་གྲོང་གསེབ་ཀྱི་མཉམ་ལས་སྨན་བཅོས་འགན་བཅོལ་ལམ་ལུགས་གསར་པ་ཇེ་ཡག་ཏུ་ཕྱིན་ནས་མཉམ་ལས་སྨན་བཅོས་ནང་ཞུགས་མཁན་མི་སེར་ལ་དངོས་ཕན་དེ་བས་མང་བ་ཐོབ་ཡོད། ཟངས་རི་རྫོང་ཟངས་རི་གྲོང་རྡལ་ཞོལ་པ་གྲོང་ཚོའི་རྒད་པོ་བུ་ཆུང་ད་ལོ་ལོ་60ལ་སླེབས་པ་དང་སྔོན་ཆད་སྨན་ཁང་དུ་སྡོད་སྐབས་སྔོན་ལ་སྨན་རིན་སྤྲོད་དགོས་པ་དང་། དེ་ནས་སྨན་ཁང་ནས་ཐོན་རྗེས་རང་ཉིད་གནས་ཡུལ་འཕྲོད་བསྟེན་ཁང་གི་གྲོང་གསེབ་ཀྱི་མཉམ་ལས་སྨན་བཅོས་འགན་བཅོལ་ལམ་ལུགས་གཞུང་དོན་ཁང་དུ་འགྲོ་གྲོན་རྩིས་ཞུ་བྱེད་པར་འགྲོ་དགོས་པས་ཕར་འགྲོ་ཚུར་འོང་ཐེངས་མང་བྱེད་དགོས་སྟབས་དཀའ་ངལ་ཆེན་པོ་ཡོད། ད་ཆ་ཁོང་གིས་ཞིང་འབྲོག་ཁུལ་གྱི་མཉམ་ལས་སྨན་བཅོས་ཀྱི་ཁྱིམ་ཚང་རྩིས་ཐོའི་དེབ་དང་། གྲོང་མིའི་ཐོབ་ཐང་ལག་ཁྱེར། རྫོང(ཤང)སྨན་ཁང་ནས་བཏོན་པའི་སྨན་ཁང་གཞན་དུ་སྒྱུར་ཆོག་པའི་དཔང་ཡིག་བཅས་ཁྱེར་ནས་སྔོན་ལ་སྨན་ཁང་དུ་བསྡད་དེ་སྨན་བཅོས་དང་སྨན་ཁང་ནས་དོན་སྐབས་རང་ཉིད་ཀྱིས་འདོན་དགོས་པའི་ཆ་ཤས་དེ་འཇལ་ནས་ཕེབས་ཀྱི་ཡོད།

ཁོང་གིས“སྨན་པ་ཡག་པ་དང་ཆ་རྐྱེན་ཡག་པོ་འདུག་པས་ང་ཚོ་མི་སེར་དངོས་གནས་སྟབས་བདེ་པོ་འདུག སྲིད་ཇུས་དེ་ཧ་ཅང་ཡག་པོ་འདུག”ཅེས་རྒད་པོ་བུ་ཆུང་གིས་བབ་ཆགས་པའི་སྐད་ཆའི་ཐོག་ནས་སྨན་བཅོས་བྱེད་སྟངས་དེར་བསྔགས་བརྗོད་ཡང་ཡང་བྱས།

མང་ཚོགས་ནད་ལྟ་དཀའ་བ་དང་སྨན་རིན་མཐོ་བའི་གནད་དོན་ཐག་གཅོད་དཔྱིས་ཕྱིན་པ་བྱས་ནས་ཏང་གི་མང་ཚོགས་ལམ་ཕྱོཌ་དེ་བས་ལེགས་པའི་ངང་ལག་ལེན་བྱ་ཆེད། 2014ལོའི་ཟླ་5པ་ནས་བཟུང་ལྷོ་ཁ་ས་ཁུལ་གྱིས“སྔོན་ལ་སྨན་ཁང་དུ་སྡོད་པ་དང་དེ་རྗེས་སྨན་རིན་རྩིས་རྒྱག་པའི”སྨན་བཅོས་ཞབས་ཞུ་བྱེད་སྟངས་གསར་པ་ཁྱོན་ཡོངས་ནས་ལག་བསྟར་བྱས་ཏེ་ཐེམ་ཐོ་ལྷོ་ཁ་ས་ཁུལ་དུ་ཡོད་པ་དང་གྲོང་གསེབ་ཀྱི་མཉམ་ལས་སྨན་བཅོས་ལམ་ལུཌ་གསར་པའི་ནང་ཞུགས་ཤིང་། སྨན་ཁང་དུ་སྡོད་མཁན་ཡིན་ཕྱིན་གྲོང་མིའི་ཐོབ་ཐང་ལག་འཁྱེར་རམ་ཡང་ན་ཐེམ་ཐོ་དང་ཁྱིམ་ཚང་གི་རྩིས་ཐོའི་དེབ་དང་དེ་བཞིན་རྫོང(ཤང)སྨན་ཁང་གི་སྨན་ཁང་གཞན་དུ་སྒྱུར་ཆོག་པའི་་དཔང་ཡིག་མཁོ་འདོན་བྱས་ཚེ“སྔོན་ལ་སྨན་ཁང་དུ་སྡོད་པ་དང་དེ་རྗེས་སྨན་རིན་རྩིས་རྒྱག་པའི”ཞབས་ཞུ་ལོངས་སུ་སྤྱོད་ཆོག་གི་ཡོད་པ་རེད།

ལྷོ་ཁ་ས་ཁུལ་འཕྲོད་བསྟེན་ཅུས་ཀྱི་ཅུས་ཀྲང་སངས་རྒྱས་ཆོས་འཕེལ་གྱིས་གསར་འགོད་པར“སྔོན་ལ་སྨན་ཁང་དུ་སྡོད་པ་དང་དེ་རྗེས་སྨན་རིན་རྩིས་རྒྱག་པའི”ཞབས་ཞུ་ལག་བསྟར་བྱས་པ་ནས་བཟུང་ལྷོ་ཁ་ས་ཁུལ་གྱིས་སྨན་ཁང་ཁག་གི“སྔོན་ལ་དངུལ་འདོན་པ་དང་རྗེས་སུ་སྨན་བཅོས་བྱེད་པའི”ཞབས་ཞུ་བྱེད་སྟངས་རྙིང་པ་དེར་རྦད་དེ་འགྱུར་ལྡོག་བཏང་ནས་ནད་པ་དེ་བས་མང་བར་ལུས་སྲོག་བདེ་ཐང་གི“ཐོགས་མེད་བགྲོད་ལམ”ཤར་གཏོང་བྱས་པ་དང་འཕྲལ་མ་ཉིད་དུ་ནད་པར་བདེ་འཇགས་ནུས་ལྡན་གྱི་སྨན་བཅོས་བྱས་ཐོག་ནད་པའི་དཔལ་འབྱོར་ཁུར་པོ་ཡང་དུ་བཏང་བས་སྨན་བཅོས་སྒྱུར་བཅོས་བྱས་འབྲས་ཀྱིས་མི་སེར་ཚང་མར་ཕན་པ་དངོས་སུ་ཐོབ་ཡོད་ཅེས་བཤད་པ་རེད།

སྨན་བཅོས་ཁོར་ཡུག་སྐྱིད་སྣང་དོད་དུ་སོང་བ།

སྨན་ཁང་གི་ཁོར་ཡུག་ཁྱོན་ཡོངས་དང་སྨན་དོན་མི་སྣའི་ཞབས་ཞུའི་ཆུ་ཚད་ནི་གྲོང་ཁྱེར་ཞིག་གི་ཤེས་དཔལ་ཆུ་ཚད་འཇལ་བའི་ཚད་གཞི་ཞིག་རེད། གྲང་ཤུར་ཤུར་གྱི་ལྕགས་ཀྱི་རྐུབ་སྟེགས། འཚང་ཁ་ཆེ་ལ་འུར་སྒྲ་ཆེ་བའི་སྨན་བཅོས་ཁོར་ཡུག་བཅས་ནི་སྲོལ་རྒྱུན་སྨན་ཁང་གིས་ནད་པར་བཞག་པའི་བག་ཆགས་ཤིག་རེད། ད་ཆ་ལྷོ་ཁ་ས་ཁུལ་མི་དམངས་སྨན་ཁང་དུ་བསྐྱོད་ཚེ་གྲལ་སྟར་འགྲིག་པའི་སྒོ་བསྟེན་སྨན་ཁང་དང་། སྔོན་ཐོན་གྱི་སྨན་བཅོས་དཔྱད་ཆས། སྐར་ཁུང་ཞབས་ཞུ་བའི་སེམས་རྩ་འཁོལ་བའི་རྣམ་འགྱུར། གྲལ་སྟར་འགྲིག་པའི་ངང་ནད་ལྟ་བའི་ནད་པ་བཅས་མཐོང་རྒྱུ་ཡོད།

གསར་འགོད་པ་ཆུ་གསུམ་རྫོང་ཤག་ལྷོ་གྲོང་ཚོའི་འཕྲོད་བསྟེན་ཁང་དུ་སླེབས་སྐབས་སྨན་བཅོས་ཁང་དུ་ཁོར་ཡུག་གཙང་ལ་གྲལ་སྟར་འགྲིག་པ་དང་ནང་ངོས་ཀྱི་སྒྲིག་ཆས་ཆ་ཚང་ལ་གཞི་རྩའི་སྨན་བཅོས་དཔྱད་ཆས་ཚང་མ་འཐུས་སྒོ་ཚང་བ་ཞིག་ཡོད་པ་མཐོང་བྱུང་།

སྨན་ཆུ་བླུགས་བཞིན་པའི་ཆོས་འཛོམས་ཀྱིས་གསར་འགོད་པར“ད་ལྟ་གྲོང་ཚོའི་ནང་གི་འཕྲོད་བསྟེན་ཁང་ཧ་ཅང་སྐྱིད་སྣང་དོད་པ་དང་ནད་གཞི་ཆུང་ཆུང་དེ་གར་སྨན་བཅོས་ཐུབ་ཀྱི་ཡོད་པས་ཧ་ཅང་སྟབས་བདེ་པོ་འདུག”ཅེས་བཤད།

སྨན་ཁང་གི་སྤྱི་ཡོངས་སྨན་བཅོས་ཆུ་ཚད་གོང་མཐོར་གཏོང་བ་དང་མང་ཚོགས་ཀྱི་སྨན་བཅོས་ཁོར་ཡུག་ལེགས་སུ་གཏོང་ཆེད། ད་ཕན་ལོ་ཤས་རིང་ལྷོ་ཁ་ས་ཁུལ་འཕྲོད་བསྟེན་སྡེ་ཚན་གྱིས་སྨན་ཁང་གི་མཁྲེགས་ཆས་དང་མཉེན་ཆས་འཛུགས་སྐྲུན་བྱེད་ཤུགས་ཟམ་མི་ཆད་པར་ཆེ་རུ་བཏང་ནས་བྱེད་ཐབས་རབ་དང་རིམ་པ་སྤྱད་དེ་སྨན་ཁང་གི་སྨན་བཅོས་ཞབས་ཞུའི་ཆུ་ཚད་མཐོ་རུ་བཏང་ཐོག་མང་ཚོགས་བློ་ཡིད་ཚིམ་པོ་ཡོང་ཐབས་ཧུར་ཐག་བྱས་ཡོད། ཁ་གཏད་རོགས་སྐྱོར་སྨན་ཁང་དང་མཉམ་དུ་ཕྱོགས་ཁག་གི་མ་དངུལ་བསྡུ་རུབ་བྱས་ཏེ་ནད་ལྕིའི་ལྟ་སྐྱོང་ཁང་སོགས་བསྐྲུན་ནས་ཚབས་ཆེའི་ནད་པ་དང་། གཅིན་དུག་ཕོག་པའི་ནད་པ། དོད་དྲག་རང་བཞིན་གྱི་དུག་ཕོག་པའི་ནད་པ་བཅས་ཐག་ཉེ་སར་སྨན་བཅོས་ཐུབ་པ་བྱས་ཐོག་ལྷོ་ཁ་ས་ཁུལ་གྱི་སྨན་བཅོས་དང་འཕྲོད་བསྟེན་བྱ་གཞག་འཕེལ་རྒྱས་ཆེད་གོ་སྐབས་གསར་པ་བཏོད་པས་ས་ཁུལ་དེ་ཡོངས་ཀྱི་མི་དམངས་མང་ཚོགས་ཀྱི་སྨན་བཅོས་ཆ་རྐྱེན་ལེགས་སུ་གཏོང་བ་དང་། སྨན་བཅོས་འཕྲོད་བསྟེན་ཞབས་ཞུའི་མ་ལག་འཐུས་ཚང་དུ་གཏོང་བ། སྨན་བཅོས་འཕྲོད་བསྟེན་ཞབས་ཞུའི་ཁྱབ་ཁོངས་རྒྱ་ཆེར་གཏོང་བ། གཞི་རིམ་སྨན་བཅོས་སྒྲིག་གཞིའི་ཞབས་ཞུའི་ནུས་པ་ཆེ་རུ་གཏོང་བ་བཅས་ཀྱི་ཐད་དགེ་མཚན་ལྡན་པའི་སྐུལ་འདེད་ཀྱི་ནུས་པ་ཐོན་པ་རེད།

“ཉུང་གཏོང་གཉིས་དང་མཐོར་གཏོང་གཅིག”གི་གྲུབ་འབྲས་མངོན་གསལ་དོད་པ།

ཞིང་འབྲོག་ཁུལ་དུ་ལེགས་བཙའ་ལེགས་གསོ་དང་། ཚན་རིག་དང་མཐུན་པའི་ཕྲུ་གུ་བཙའ་བ། སྦྲུམ་མ་དང་ཕྲུ་གུ་དམར་འབྱར་ཤི་ཚད་ཉུང་དུ་གཏོང་བ། སྨན་ཁང་དུ་བསྡད་དེ་ཕྲུ་གུ་བཙའ་ཚད་གོང་མཐོར་གཏོང་བ་བཅས་མངོན་འགྱུར་བྱ་ཆེད་ད་ཕན་ལོ་ཤས་རིང་ལྷོ་ཁ་ས་ཁུལ་གྱིས་སྲིད་འཛིན་གྱིས་རོགས་སྐྱོར་དང་ཐེ་ཇུས་བྱེད་ཐབས་སྔར་བས་ཤུགས་ཆེར་བཏང་ནས་མ་བུ་འཕྲོད་སྦྱོར་ལས་དོན་སྤེལ་ཤུགས་ཆེ་རུ་བཏང་ཐོག་མ་བུ་མྱུར་སྐྱོབ་ཀྱི་ཐོགས་མེད་བགྲོད་ལམ་ཤར་གཏོང་ཐུབ་པའི་འགན་ལེན་བྱས་པ་རེད།

སངས་རྒྱས་ཆོས་འཕེལ་གྱིས་ད་ཕན་ལོ་ཤས་རིང་ལྷོ་ཁ་ས་ཨུད་དང་སྲིད་འཛིན་ཀུང་ཧྲུའུ་ཡིས“དམངས་སེམས་འདུ་འགོད་ཆེ་མོ་བཅུ”ལག་བསྟར་བྱས་ཏེ་སྦྲུམ་མ་སྨན་ཁང་དུ་བསྡད་དེ་ཕྲུ་གུ་བཙའ་བར་ཁ་གསབ་སྤྲོད་པ་དེ་དམངས་ཕན་བྱེད་ཐབས་གལ་ཆེའི་གྲས་སུ་བཅུག་པ་དང་ལྷོ་ཁ་ས་ཁུལ་འཕྲོད་བསྟེན་ཅུས་ཀྱིས་བྱེད་ཐབས་རབ་དང་རིམ་པ་སྤྱད་དེ་སྨན་ཁང་དུ་བསྡད་དེ་ཕྲུ་གུ་བཙའ་ཚད་སྔར་བས་གོང་མཐོར་བཏང་བ་དང་། སྦྲུམ་མ་དང་ཕྲུ་གུ་དམར་འབྱར་ཤི་ཚད་ཉུང་དུ་བཏང་བ། སྦྲུམ་མ་དང་ཕྲུ་གུ་དམར་འབྱར་དང་བྱིས་པའི་བདེ་ཐང་ལས་དོན་ལ་སྐུལ་འདེད་བཏང་བ། སྦྲུམ་མར་ཕྲུ་གུ་མ་བཙས་གོང་གི་གཟུགས་པོ་བརྟག་དཔྱད་དང་བཙས་རྗེས་འཚམས་འདྲི་བྱས་པ། ལོ་སྟར་འབྲེལ་ཡོད་མི་སྣ་སྒྲིག་འཛུགས་བྱས་ནས་ཞིང་འབྲོག་ཁུལ་དུ“སྲིད་ཇུས་དང་། ལག་རྩལ། སྨན་བཅོས་ཡོ་ཆས”བཅས“གཤམ་སྤེལ་གསུམ”དང“བུ་བཙའི་སྲོལ་གསར་ཁྱིམ་ཚང་ཁྲི་སྟོང་མང་པོར་ཁྱབ་གདལ་གཏོང་བ”སོགས་ཀྱི་བྱེད་སྒོ་སྤེལ་བ་བཅས་བྱས་པས་རྒྱ་ཆེའི་ཞིང་འབྲོག་ཁུལ་གྱི་བུད་མེད་ཀྱིས་བུ་བཙའི་ལྟ་བ་དང་ལེགས་བཙའ་ལེགས་གསོའི་ཤེས་བྱ་གསར་པ་ཁོང་དུ་ཆུད་ཐུབ་པ་བྱུང་ཡོད་ཅེས་ངོ་སྤྲོད་བྱས་པ་རེད།

བདེ་ཐང་ནི་ཁྱོན་ཡོངས་འཕེལ་རྒྱས་གཏོང་བའི་རྨང་གཞི་ཡིན་པ་དང་ཁྱིམ་ཚང་ཁྲི་སྟོང་མང་པོའི་བདེ་སྐྱིད་དང་འབྲེལ་བ་ཡོད། དམངས་ཆེད་འཕྲོད་བསྟེན་དང་འཕྲོད་བསྟེན་གྱིས་དམངས་ལ་ཕན་པ་འདོགས་རྒྱུ་མཐའ་འཁྱོངས་བྱས་ཏེ་སྨན་བཅོས་འཕྲོད་བསྟེན་སྒྲིག་སྲོལ་སྒྱུར་བཅོས་ཀྱི་འབྲས་བུ་དེ་མང་ཚོགས་ཀྱི་མིག་མཐོང་ལག་ཟིན་ཐུབ་པའི་ཉམས་ལེན་དུ་འགྱུར་བ་བྱས་ཐོག་མི་ཚང་མས་གཞི་རྩའི་སྨན་བཅོས་འཕྲོད་བསྟེན་ཞབས་ཞུ་ལོངས་སྤྱོད་ཐུབ་ནས་དམངས་འཚོ་ལེགས་སུ་གཏོང་རྒྱུ་དེ་ལྷོ་ཁ་ས་ཁུལ་འཕྲོད་བསྟེན་སྡེ་ཚན་ལས་དོན་པས་དོན་གཉེར་ལྷོད་མེད་བྱེད་ས་ཞིག་དང་ཁོང་ཚོས་མི་སེར་ལ་བློ་ཡིད་ཚིམ་པའི་དམངས་འཚོའི་འདྲི་ཤོག་ཅིག་སྤྲོད་པའི་དམིགས་ཡུལ་ཞིག་རེད།