འདི་ནི་ཟླ་10ཚེས་1ཉིན་གྱི་སྔ་དྲོར། བོད་རང་སྐྱོང་ལྗོངས་ཀྱིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་77འཁོར་བར་རྟེན་འབྲེལ་ཞུ་བའི“རྒྱལ་དར་སྒྲེང་བ་དང་རྒྱལ་གླུ་ལེན་པའི”མཛད་སྒོ་ལྷ་སའི་ཕོ་བྲང་པོ་ཏ་ལའི་ཐང་ཆེན་དུ་འཚོགས་པ།

མཛེས་སྡུག་རི་ཀླུང་འཁྲུངས་སྐར་རྟེན་འབྲེལ་འགྲིག གངས་ལྗོངས་ས་མཐོའི་འཕེལ་རྒྱས་རྣམ་པ་གསར། ཟླ་10ཚེས་1ཉིན་གྱི་སྔ་དྲོར། བོད་རང་སྐྱོང་ལྗོངས་ཀྱིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་77འཁོར་བར་རྟེན་འབྲེལ་ཞུ་བའི“རྒྱལ་དར་སྒྲེང་བ་དང་རྒྱལ་གླུ་ལེན་པའི”མཛད་སྒོ་ལྷ་སའི་ཕོ་བྲང་པོ་ཏ་ལའི་ཐང་ཆེན་དུ་འཚོགས་པ་རེད།

ཧུའུ་ཁྲང་ཧྲེང་དང་། ཡན་ཅིན་ཧའེ། ཀརྨ་ཚེ་བརྟན། ལིའུ་ཅང་། ཀུང་ཧུའེ་ཚའེ། ལའེ་ཅའོ། ཚེ་རིང་ཐར། བསྟན་པ། ཞུས་ཀྲི་ཝུན་བཅས་ཞུགས་པ་དང་། ཟླ་བ་ཚེ་རིང་གིས་གཙོ་སྐྱོང་གནང་བ་རེད།

སྟོན་ཟླ་བཅུ་པའི་ལྷ་སའི་ནམ་མཁའ་སྔོ་ཞིང་དྭངས། ཕོ་བྲང་པོ་ཏ་ལའི་ཐང་ཆེན་དུ“ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་77འཁོར་བར་སྤྲོ་སེམས་འཁོལ་པོས་རྟེན་འབྲེལ་ཞུ”ཞེས་པའི་སྦྱར་ཡིག་ཧ་ཅང་མངོན་གསལ་དོད་ཅིང་། གང་སར་དུས་ཆེན་གྱི་རྣམ་པས་ཁེངས།

ཆུ་ཚོད་9པ་ཙམ་ལ། རྒྱལ་དར་སྒྲེང་བའི་མཛད་སྒོ་དངོས་སུ་འགོ་ཚུགས། དཔའ་ཉམས་དོད་པའི་རྒྱལ་དར་སྲུང་སྐྱེལ་རུ་ཁག་གིས་གོམ་སྟབས་བརྟན་པོས་སྐར་ལྔའི་དར་དམར་རྒྱལ་དར་སྒྲེང་སྟེགས་སུ་སྲུང་སྐྱེལ་བྱས། རྔམ་བརྗིད་ལྡན་པའི《བློས་བླངས་དམག་གི་མདུན་སྐྱོད་གླུ་གཞས》དང་བསྟུན་ནས་དམར་མདངས་རབ་ཏུ་བཀྲ་བའི་སྐར་ལྔའི་དར་དམར་དལ་བུར་བསྒྲེངས། ས་ཡུལ་དངོས་ཀྱི་ལས་རིགས་ཁག་གི་མི་སྣས་སྒམ་བརླིང་ངང་རྒྱལ་དར་ལ་མིག་འདུད་ཞུས་པ་དང་བརྩེ་བ་ཟབ་མོས་རྒྱལ་དར་ལ་ལྟ་བཞིན་སྐད་གསང་མཐོན་པོས་རྒྱལ་གླུ་བླངས་ནས་ཏང་ལ་བླ་ན་མེད་པའི་གུས་འདུད་དང་རླབས་ཆེན་མེས་རྒྱལ་ལ་སྨོན་འདུན་བཟང་པོ་ཞུ་ལུགས་མཚོན་པར་བྱས་པ་རེད།

རྒྱལ་དར་སྒྲེང་བའི་མཛད་སྒོར་ཞུགས་མཁན་མི་རིགས་ཁག་གི་ལས་བྱེད་པ་དང་མང་ཚོགས་ཚོས“ལོ་ལྔ་ཚན་བཅོ་ལྔ་པར”ཕྱོགས་ནས། ངེས་པར་དུ་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་དེ་བས་མཐུན་སྒྲིལ་དམ་ཟབ་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་གཏིང་ཟབ་བྱེད་པ། བརྟན་ལྷིང་དང་། འཕེལ་རྒྱས། སྐྱེ་ཁམས། མཐའ་སྟོབས་བཅས་ཀྱི་དོན་ཆེན་བཞིར་དམིགས་པ། མཐུན་སྒྲིལ་རྡོག་རྩ་གཅིག་སྒྲིལ་དང་དྲིན་ཚོར་ཡར་བརྩོན་བཅས་བྱས་ནས། མཐུན་སྒྲིལ་དང་། འབྱོར་ཕྱུག ཤེས་དཔལ། ཞི་མཐུན། མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་སྐྲུན་ཆེད་སྟོབས་ཤུགས་སྐྱེས་སུ་འབུལ་རྒྱུ་ཡིན་ཞེས་གཅིག་མཇུག་གཉིས་མཐུད་ངང་བརྗོད་པ་རེད།

རང་སྐྱོང་ལྗོངས་ཀྱི་ཞིང་ཆེན་དང་ཅུན་རིམ་པའི་འགོ་ཁྲིད་བློ་མཐུན་དང་། ལྗོངས(ཀྲུང་དབྱང)ཐད་གཏོགས་ཚན་པ་དང་ལྷ་ས་གྲོང་ཁྱེར་གྱི་ལས་བྱེད་པ་དང་ལས་བཟོ། བཅིངས་འགྲོལ་དམག དྲག་ཆས་ཉེན་རྟོག་དཔོན་དམག དགེ་སློབ། ལས་བྲལ་དང་རྒན་ཡོལ་ཞུས་པའི་ལས་བྱེད་པ་དང་ལས་བཟོ་རྒན་གྲས། གྲོང་མི་མང་ཚོགས། གྲྭ་བཙུན་གྱི་འཐུས་མི་སོགས་ཞུགས་ཡོད་པ་རེད།