ཧུའུ་ཁྲང་ཧྲེང་གིས་ལྗོངས་ཡོངས་ཀྱི་བརྟན་ལྷིང་སྲུང་སྐྱོང་ལས་དོན་ལ་བརྙན་ལམ་ནས་བཀོད་གཏོང་གནང་སྐབས་ནན་བཤད་གནང་དོན།
ལས་རེས་ལྟ་སྲུང་དང་ཞབས་ཞུ་འགན་སྲུང་ལ་ཤུགས་སྣོན་བརྒྱབ་ནས་མི་དམངས་མང་ཚོཌ་རྣམས་དུས་བདེ་འཆམ་མཐུན་གྱི་དུས་ཆེན་ཞིག་གཏོང་ཐུབ་པའི་འགན་ལེན་བྱེད་དགོས།
ཀརྨ་ཚེ་བརྟན་དང་། ལིའུ་ཅང་། ཀུང་ཧུའེ་ཚའེ་ཞུགས་པ།
རྒྱལ་སྟོན་གུང་གསེང་གི་ཉིན་དང་པོར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཧུའུ་ཁྲང་ཧྲེང་རང་སྐྱོང་ལྗོངས་བརྟན་ལྷིང་སྲུང་སྐྱོང་བཀོད་འདོམས་པུའུ་རུ་ཕེབས་ནས་ལྗོངས་ཡོངས་ཀྱི་བརྟན་ལྷིང་སྲུང་སྐྱོང་ལས་དོན་སྤེལ་ཚུལ་ལ་བརྙན་ལམ་ནས་བཀོད་གཏོང་གནང་ཞིང་། ཁོང་གིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་གཏིང་ཟབ་བྱས་ཏེ། “རྟག་ཏུ་བློ་བཟོད་མི་བདེ་བའི”ཆབ་སྲིད་ཀྱི་འགན་འཁྲི་འཁུར་སེམས་ལ་བརྟེན་ནས་ལས་རེས་ལྟ་སྲུང་ལ་ཤུགས་སྣོན་རྒྱག་པ་དང་། ཞབས་ཞུ་འགན་སྲུང་བྱེད་ཤུགས་ཆེ་རུ་གཏོང་བ། ནུས་ཤུགས་ཡོད་རྒུས་ཉེན་ཁ་འགོག་ཟོན་དང་། བདེ་འཇགས་འགན་ལེན། བརྟན་ལྷིང་སྲུང་སྐྱོང་། འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ནས། མི་དམངས་མང་ཚོགས་རྣམས་དུས་བདེ་འཆམ་མཐུན་གྱི་དུས་ཆེན་ཞིག་གཏོང་ཐུབ་པའི་འགན་ལེན་བྱེད་དགོས་ཞེས་ནན་བཤད་གནང་བ་རེད།
ཀརྨ་ཚེ་བརྟན་དང་། ལིའུ་ཅང་། ཀུང་ཧུའེ་ཚའེ། ཟླ་བ་ཚེ་རིང་། ཀྲང་ཧུང་པོ། ཀྲུའུ་ཧྲོའུ་ཁོ། སྒྲོལ་དཀར་བཅས་ཞུགས་པ་རེད།
ཧུའུ་ཁྲང་ཧྲེང་རང་སྐྱོང་ལྗོངས་བརྟན་ལྷིང་སྲུང་སྐྱོང་བཀོད་འདོམས་པུའུ་རུ་ཕེབས་རྗེས། ཁོང་གིས་ལྷ་ས་དང་། གཞིས་རྩེ། ལྷོ་ཁ། ཉིང་ཁྲི། ཆབ་མདོ། ནག་ཆུ། མངའ་རིས་བཅས་དང་། དེ་བཞིན་རང་སྐྱོང་ལྗོངས་གནམ་གཤིས་ཅུས་སོགས་ས་ཁུལ་དང་གྲོང་ཁྱེར་ཚན་པ་དང་སྦྲེལ་མཐུད་གནང་ནས། ས་གནས་ཁག་དང་སྡེ་ཚན་ཁག་གི་ལས་རེས་ལྟ་སྲུང་ལས་དོན་ལ་ཞིབ་བཤེར་བཀོད་གཏོང་དང་། རྒྱལ་སྟོན་གུང་གསེང་རིང་གི་གཙོ་གནད་ལས་དོན་དོན་འཁྱོལ་བྱས་ཚུལ་མཁྱེན་རྟོགས་གནང་བ་དང་ཆབས་ཅིག ལས་དོན་མི་སྣར་གཟིགས་པ་དང་འཚམས་འདྲི་གནང་བ་མ་ཟད། འཐབ་ས་དང་པོ་བརྟན་སྲུང་བྱེད་མཁན་རྒྱ་ཆེའི་ཏང་ཡོན་དང་ལས་བྱེད་པར་དུས་ཆེན་གྱི་འཚམས་འདྲི་དང་སྙིང་དབུས་ནས་ཐུགས་རྗེ་ཆེ་ཞུས་པ་རེད།
ཧུའུ་ཁྲང་ཧྲེང་གིས་ནན་བཤད་གནང་དོན། སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་བརྟན་པོ་བཙུགས་ནས། དུས་དང་རྣམ་པ་ཀུན་ཏུ་བརྟན་ལྷིང་སྲུང་སྐྱོང་གི་རྩ་བ་དེ་དམ་པོར་འཛིན་པ་དང་། རང་འགུལ་ངང་བདེ་འཇགས་དང་བརྟན་ལྷིང་གཏོད་རྒྱུ་མཐའ་འཁྱོངས། བརྟན་ལྷིང་སྲུང་སྐྱོང་གི་བྱ་ཐབས་ཁག་དོན་འཁྱོལ་ལ་དམ་འཛིན་ནན་པོ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དོན་འཁྱོལ་དང་ཕན་འབྲས་ཐོན་པར་ཇི་མ་ཇི་བཞིན་སྐུལ་འདེད་གཏོང་བ་བཅས་བྱས་ཏེ། བྱ་སྤྱོད་དངོས་ཀྱི་ཐོག་ནས“གཏན་འཁེལ་གཉིས”ལ་བརྩི་བཀུར་མཐའ་གཅིག་ཏུ་ཞུ་བ་དང“སྲུང་སྐྱོང་གཉིས”མཐའ་གཅིག་ཏུ་ཐུབ་པ་བྱེད་དགོས། “འཕྱུགས་པ་གཏན་ནས་མེད་པ་དང་གཅིག་འཕྱུགས་ན་ཐམས་ཅད་ཕུང་བའི”ལས་ཀའི་ཚད་གཞི་མཐའ་འཁྱོངས་བྱས་ཏེ། ཉེན་བརྡ་རྒྱུན་སྒྲོག་དང་རྟག་ཏུ་དོགས་ཟོན་དང་། སེམས་ཁྲལ་གྱི་འདུ་ཤེས་ཟབ་ཏུ་གཏོང་བ། ལྷོད་གཡེང་དང་སྟེས་དབང་གི་བསམ་བློ་ཁྱད་བསད། སྔོན་ལ་བྱ་སྤྱོད་སྤེལ་བ་དང་རང་འགུལ་དམག་འཐབ་ཡག་པོ་རྒྱག་པ། བཀོད་གཏོང་ཞིབ་བཤེར་ལ་ཤུགས་སྣོན་རྒྱག་པ། ཚད་གཞི་དང་སྤུས་ཚད་མཐོ་པོས་ལས་དོན་ཁག་ལ་དམ་འཛིན་ཡག་པོ་བཅས་བྱས་ཏེ། ལྗོངས་ཡོངས་ཀྱི་མཐུན་སྒྲིལ་བརྟན་ལྷིང་གི་ཆབ་སྲིད་དང་སྤྱི་ཚོགས་ཀྱི་རྣམ་པ་རྒྱུན་མཐུད་བརྟན་དུ་གཏོང་དགོས། ཉེན་ཁའི་དཔྱོད་ནུས་ཆེ་རུ་བཏང་སྟེ། དུས་ཐོག་ཏུ་ཐོན་ཉེན་ཡོད་པའི་ཆ་འཕྲིན་ཁོང་དུ་ཆུད་པ་དང་། འཕེལ་ཕྱོགས་སྟངས་འཛིན་དང་། ཚན་རིག་དང་མཐུན་པའི་དབྱེ་ཞིབ། གནད་སྨིན་སྔོན་ཚུད་ཉེན་བརྡ་གཏོང་བ། དངོས་འཐབ་ནང་སྦྱོང་ལ་ཤུགས་སྣོན་རྒྱག་པ། སྔ་ཙམ་ནས་ཤེས་རྟོགས་དང་། སྔ་ཙམ་ནས་སྙན་ཞུ། སྔ་ཙམ་ནས་ཐག་གཅོད་ཧུར་ཐག་ཐུབ་པ་བཅས་བྱས་ནས་ཉེན་ཁའི་མངོན་མེད་རྐྱེན་ངན་ཐོན་མ་ཐག་དང་མ་ཐོན་གོང་ནས་སེལ་ཐུབ་པ་བྱེད་དགོས། ཁྲིམས་ལྟར་དགོན་སྡེ་དོ་དམ་ལ་ཤུགས་སྣོན་བརྒྱབ་སྟེ“རྒྱལ་ཁབ་ཀྱི་འདུ་ཤེས་དང་། སྤྱི་དམངས་ཀྱི་འདུ་ཤེས། ཁྲིམས་སྐྱོང་གི་འདུ་ཤེས”བཅས་ཀྱི་སློབ་གསོ་གཏིང་ཟབ་དང་རྒྱ་ཆེར་སྤེལ་བ་དང་། རྒྱ་ཆེའི་གྲྭ་བཙུན་དང་དད་ལྡན་མང་ཚོགས་ལ“མོས་སེམས་ལྔ”རྒྱུན་ཆད་མེད་པར་ཟབ་ཏུ་གཏོང་བར་ཁྲིད་སྟོན། བློ་བརྟན་འགྱུར་མེད་ངང་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ། “དགོན་སྡེ་གཅིག་ལ་ཐབས་ཇུས་གཅིག”མཐའ་འཁྱོངས། ཁྲིམས་ལྟར་དོ་དམ་ལ་ཤུགས་སྣོན་རྒྱག་པ། དགོན་སྡེའི་རྒྱུན་གཏན་གྱི་སྒྲིག་ལམ་ཏན་ཏིག་སྲུང་བ་བཅས་བྱས་ནས། ཆོས་ལུགས་ལས་དོན་གྱི་རང་འགུལ་དབང་ཆ་སྟངས་འཛིན་ནན་པོ་བྱེད་དགོས། སྤྱི་ཚོགས་བདེ་འཇགས་ཕྱོགས་བསྡུས་བཅོས་སྐྱོང་ལ་དམ་འཛིན་ཏན་ཏིག་དང་ཞིབ་ཚགས་བྱས་ཏེ། འགལ་ཟླ་དང་གནད་དོན་གྱི་ཉེན་ཁའི་གསལ་ཐོ་ཞིབ་ཕྲ་བཟོ་བ་དང་། རིགས་དབྱེ་ཇུས་བསྟར་དང་འབེན་གཏད་ཤུགས་འདོན་མཐའ་འཁྱོངས། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་སྤོང་བ། ཁྱིམ་ཚང་དང་ཁྱིམ་མཚེས་སོགས་ཀྱི་འགལ་ཟླ་དང་རྩོད་གཞི་སྣ་ཚོགས་དུས་ཐོག་ཏུ་གྲལ་བཤེར་དང་སེལ་བ། འགལ་ཟླ་གཅིག་སེལ་བ་དང་ཁུལ་གཅིག་བརྟན་ལྷིང་དངོས་འབྲེལ་ཐུབ་པ་བཅས་བྱས་ནས། སྤྱི་ཚོགས་བཅོས་སྐྱོང་མ་ལག་དང་བཅོས་སྐྱོང་ནུས་པའི་དེང་རབས་ཅན་གྱི་ཆུ་ཚད་རྒྱུན་ཆད་མེད་པར་མཐོ་རུ་གཏོང་དགོས། འགན་སྒྲུབ་ལས་གྲབས་ལ་ཤུགས་སྣོན་བརྒྱབ་སྟེ། བྱེད་པོའི་འགན་འཁྲི་ནན་དུ་གཏོང་བ་དང་། ལས་རེས་སྣེ་ཁྲིད་ལམ་ལུགས་ལག་བསྟར་ནན་པོ། སྐོར་ཞིབ་འགོག་ཟོན་བྱེད་ཤུགས་ཆེ་རུ་གཏོང་བ། ཉེན་རྟོག་པ་མཐོང་ཚད་མང་དུ་དང་དོ་དམ་ཐུབ་ཚད་མཐོ་རུ་གཏོང་བ། འཕྲལ་སྡོམ་ཐག་གཅོད་སྔོན་ཇུས་ཏན་ཏིག་དང་ཞིབ་ཚགས་བཟོ་བ། གདེང་ཚོད་ཡོད་པ་དང་ཁ་གཏད་ནུས་ལྡན་གཅོག་ཐུབ་པ་བཅས་བྱས་ནས། མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་ལ་སྲུང་སྐྱོང་ཏན་ཏིག་བྱེད་དགོས། བདེ་འཇགས་ཐོན་སྐྱེད་ཀྱི་འགན་འཁྲི་དོན་འཁྱོལ་ནན་པོ་བྱས་ཏེ། ས་ཁོངས་སྲུང་བའི་འགན་འཁྲི་ཡོད་པ་དང་། ས་ཁོངས་སྲུང་བའི་འགན་འཁྲི་འཁུར་བ། ས་ཁོངས་སྲུང་བའི་འགན་འཁྲི་སྒྲུབ་པ་བཅས་མཐའ་འཁྱོངས་དང་། འགྲོ་ལམ་འགྲིམ་འགྲུལ་དང་། བཟོ་སྐྲུན་ཨར་ལས། ནགས་ཚལ་མེ་ཟོན། ཉེན་ཡོད་རྫས་འགྱུར་དངོས་རྫས་སོགས་གཙོ་གནད་ཁྱབ་ཁོངས་དང་མཛེས་ལྗོངས་ཁུལ་དང་མཛེས་ལྗོངས་ས་ཚིགས་དང་། འགྲུལ་སྐྱེལ་འབབ་ཚུགས། ཚོང་ར་དང་སྒོ་རྩིས་ཚོང་ཁང་སོགས་མི་སྣ་འདུ་འཛོམས་ཆེ་སར་དམ་པོར་དམིགས་པ། བདེ་འཇགས་འགོག་ཟོན་བྱ་ཐབས་དོན་འཁྱོལ་ཏན་ཏིག་དང་ཞིབ་ཚགས་བཅས་བྱས་ནས། ལས་འཛོལ་ཚབས་ཆེན་དང་ཧ་ཅང་ཚབས་ཆེན་སྔོན་འགོག་མཐའ་གཅིག་ཏུ་བྱེད་དགོས། དུས་བདེ་འཆམ་མཐུན་གྱི་དུས་ཆེན་གྱི་རྣམ་པ་ཞིག་བཏོད་དེ“མང་ཚོགས་རྣམས་དུས་ཆེན་གཏོང་བ་དང་ལས་བྱེད་པས་འགག་སྒོ་སྲུང་བའི”འགན་འཁྲི་འཁུར་སེམས་ལ་བརྟེན་ནས། དུས་ཆེན་གྱི་ཁྲོམ་རའི་མཁོ་སྤྲོད་འགན་ལེན་དང་ཡུལ་སྐོར་ཁྲོམ་རའི་ལྟ་འདོམས་ལ་ཤུགས་སྣོན་རྒྱག་པ་དང་། ཟོག་གོང་བརྟན་པོ་རྒྱུན་འཁྱོངས། བཟའ་བཅའི་བདེ་འཇགས་འགན་སྲུང་། ཁྲིམས་སྒྱུར་ཞིབ་བཤེར་བྱེད་ཤུགས་ཆེ་རུ་གཏོང་བ། ཞབས་ཞུའི་ནུས་པ་དང་ཆུ་ཚད་མཐོ་རུ་གཏོང་བ། མང་ཚོགས་ཀྱི་ལུགས་མཐུན་རེ་ཞུ་ཐག་གཅོད་ནུས་ལྡན། འཛད་སྤྱོད་པའི་ཁེ་དབང་འགན་སྲུང་། སྐྱིད་ཉམས་མཉམ་སྲུང་དང་ཤེས་དཔལ་དར་སྲོལ་མཉམ་གཏོད་བཅས་བྱས་ནས། བོད་ཀྱི་འཕེལ་རྒྱས་ཁོར་ཡུག་དང་གཟུགས་བརྙན་བཟང་པོ་ཐུན་མོང་ཐོག་སྲུང་སྐྱོང་ཡག་པོ་བྱེད་དགོས།
འབྲེལ་ཡོད་གསར་འགྱུར།