འདི་ནི་ཧུའུ་ཁྲང་ཧྲེང་གིས《འུན་ཤིང་ཀོང་ཇོ》ཡི་དངོས་ལྗོངས་ཟློས་གར་ཁང་དུ་འཁྲབ་སྟོན་མི་སྣར་བྱམས་བརྩེའི་འཚམས་འདྲི་གནང་བ་དང་། རིག་གནས་ཡུལ་སྐོར་མཉམ་འདྲེས་འཕེལ་རྒྱས་དང་རིག་གནས་བསམ་བཀོད་ཐོན་རྫས་ཇུས་འགོད་གསར་སྤེལ་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བཞིན་པ།

འདི་ནི་ཧུའུ་ཁྲང་ཧྲེང་ལྷ་ས་གྲོང་ཁྱེར་སེམས་སྐྱིད་སོལ་རླངས་ཚ་ཤུགས་ཚད་ཡོད་འགན་འཁྲི་ཀུང་སིར་ཕེབས་ནས་བཀོད་གཏོང་བཀོད་འདོམས་ལྟེ་གནས་ཀྱི་ལས་དོན་སྤེལ་ཚུལ་ལ་གཟིགས་ཞིབ་གནང་བ་དང་སོལ་རླངས་གསོག་ནུས་དང་བདེ་འཇགས་འགན་ལེན་གྱི་བྱ་ཐབས་དོན་འཁྱོལ་བྱེད་ཚུལ་ལ་བཀའ་འདྲི་ཞིབ་ཕྲ་གནང་བཞིན་པ།

ཟླ་10ཚེས་1ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཧུའུ་ཁྲང་ཧྲེང་གིས་ལྷ་ས་གྲོང་ཁྱེར་གྱི་རིག་གནས་ཡུལ་སྐོར་ཁྲོམ་ར་དང་། དུས་ཆེན་གྱི་མཁོ་སྤྲོད་འགན་ལེན། བདེ་འཇགས་ཐོན་སྐྱེད་སོགས་ཀྱི་ལས་དོན་ལ་བརྟག་ཞིབ་གནང་སྐབས། རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ལྗོངས་ཡོངས་ཀྱི་མི་རིགས་ཁག་གི་ལས་བྱེད་མང་ཚོགས་དང་ལས་གནས་བརྟན་སྲུང་བྱེད་མཁན་ལས་དོན་པར་ལྷག་བསམ་ཟོལ་མེད་ཀྱི་འཚམས་འདྲི་དང་དུས་ཆེན་གྱི་སྨོན་འདུན་ཞུས་པ་རེད།

ཀརྨ་ཚེ་བརྟན་དང་། ཀུང་ཧུའེ་ཚའེ། ཟླ་བ་ཚེ་རིང་། ཀྲང་ཧུང་པོ། སྒྲོལ་དཀར་བཅས་མཉམ་དུ་ཕེབས་ཡོད་པ་རེད།

《འུན་ཤིང་ཀོང་ཇོའི》དངོས་ལྗོངས་ཟློས་གར་ནི་རྒྱ་བོད་མི་རིགས་དབར་འགྲོ་འོང་དང་། སྤེལ་རེས། མཉམ་འདྲེས་བཅས་བྱས་པའི་རིག་གནས་སྤུས་རྟགས་ཤིག་ཡིན་པ་དང་། འཁྲབ་སྟོན་བྱེད་འགོ་ཚུགས་ཚུན། མཐའ་འཁོར་གྱི་རིག་གནས་ཡུལ་སྐོར་ཐོན་ལས་ལ་མ་དངུལ་སྒོར་དུང་ཕྱུར་བརྒྱ་ལྷག་ཙམ་ཡོང་བར་སྐུལ་ཁྲིད་བྱས་ཡོད། ཧུའུ་ཁྲང་ཧྲེང་དེ་གར་ཕེབས་ནས་འཁྲབ་སྟོན་མི་སྣར་བྱམས་བརྩེའི་ངང་གཟིགས་པ་དང་འཚམས་འདྲི་གནང་སྟེ། རིག་གནས་ཡུལ་སྐོར་མཉམ་འདྲེས་འཕེལ་རྒྱས་དང་རིག་གནས་བསམ་བཀོད་ཐོན་རྫས་ཇུས་འགོད་དང་གསར་སྤེལ་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་རེད། ཁོང་གིས། རིག་རྩལ་གསར་རྩོམ་བྱེད་སྐབས་ཞི་ཅིན་ཕིང་གི་རིག་གནས་དགོངས་པ་རྩ་བའི་གཞི་འཛིན་སར་བྱ་རྒྱུ་མཐའ་འཁྱོངས་བྱེད་དགོས་ཤིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གིས་བོད་ཀྱི་མི་རིགས་ཁག་གི་མི་དམངས་ལ་ཐུགས་ཁུར་ཟབ་མོ་གནང་ལུགས་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་དང་མི་རིགས་མཐུན་སྒྲིལ་ཆེ་མོའི་འདུ་ཤེས་རིག་རྩལ་གསར་རྩོམ་ནང་མཉམ་འདྲེས་དམ་ཟབ་བྱེད་པ་དང་། མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་ཀྱི་གསོན་ཉམས་དོད་པའི་ལག་ལེན་ལ་བརྟེན་ནས་དུས་རབས་གསར་པའི་བོད་ཀྱི་གཏམ་རྒྱུད་དང་མི་རིགས་མཐུན་སྒྲིལ་གྱི་གཏམ་རྒྱུད་ཡག་པོ་ཤོད་དགོས། རིག་གནས་ཡུལ་སྐོར་འཕེལ་རྒྱས་དང་མང་ཚོགས་ཀྱི་འབབ་འཕར་ཟུང་འབྲེལ་དམ་ཟབ་བྱེད་དགོས་ཤིང་། ཁྱད་ལྡན་རིག་གནས་ཡུལ་སྐོར་ཐོན་ཁུངས་ལ་བརྟེན་ནས་མང་ཚོགས་ཀྱི་འབབ་འཕར་ཐབས་ལམ་རྒྱ་ཆེར་གཏོང་བ་དང་། མང་ཚོགས་དེའི་ནང་ཞུགས་པ་དང་ལས་ཞུགས་བརྟན་པོ་ཡོང་བར་སྐུལ་ཁྲིད་བྱེད་པའི་ཐད་མུ་མཐུད་ཤུགས་སྣོན་རྒྱག་པ། རིག་གནས་བསམ་བཀོད་ཐོན་རྫས་ཀྱི་གསར་གཏོད་ནུས་པ་ཆེ་རུ་གཏོང་བ། རྙིང་འབུད་གསར་འདོན་དང་ཁྱད་ཆོས་མངོན་གསལ་དོད་པོ་ཡོང་བ་བཅས་བྱས་ནས་མང་ཚོགས་དེ་བས་མང་བ་ཡུལ་སྐོར་ལ་བརྟེན་ནས་ཡོང་འབབ་གསོག་པ་དང་ཕྱུག་འགྱུར་ལམ་བུར་སྐྱོད་ཐུབ་པ་བྱེད་དགོས། སེམས་ནུས་ཡོད་རྒུས་ཞབས་ཞུ་འགན་ལེན་ཏན་ཏིག་བྱེད་དགོས་ཤིང་། འཕྲལ་སྡོམ་ཇུས་གཞི་དང་སྔོན་ཇུས་འཐུས་སྒོ་ཚང་དུ་གཏོང་བ་དང་། ས་གནས་ས་ཐོག་གི་བདེ་འཇགས་དོ་དམ་དང་འགྲིམ་འགྲུལ་ཁྲིད་སྟོན་ལ་ཤུགས་སྣོན་རྒྱག་པ། སྨན་བཅོས་འཕྲོད་སྦྱོར་དང་གྲང་འགོག་དྲོད་སྲུང་སོགས་ཀྱི་ལས་དོན་ཞིབ་ཚགས་ངང་ཡག་པོ་སྒྲུབ་པ་བཅས་བྱས་ནས་རྒྱ་ཆེའི་ཡུལ་སྐོར་བ་ཚོ་དགའ་སྤྲོའི་ངང་ཡོང་བ་དང་སྣང་བ་སྐྱིད་པོས་ལོག་ཐུབ་པ་བྱས་ཏེ“བློ་ཡིད་ཚིམ་ཚད”ལ་བརྟེན་ནས“བསྐྱར་དུ་ཡོང་ཚད”མང་དུ་གཏོང་དགོས། སྤུས་ལེགས་ཀྱི་འདུ་ཤེས་ཟབ་ཏུ་གཏོང་དགོས་ཤིང་། བོད་ཀྱི་རིག་གནས་ཀྱི་རྩ་རྒྱུན་ཟབ་མོ་སྔོག་འདོན་བྱེད་པ་དང་། ཡག་ཐོག་ཡག་བརྩེགས་ཡོང་བའི་ནང་སྦྱོང་བྱེད་པ། བརྩམས་ཆོས་ཀྱི་སྒྱུ་རྩལ་རིན་ཐང་རྒྱུན་ཆད་མེད་པར་ཆེ་རུ་གཏོང་བ། འཁྲབ་སྟོན་པའི་གར་སྟེགས་ཐོག་གི་འཁྲབ་སྟངས་ལ་ཞུན་བརྡར་གཏོང་བ་བཅས་བྱས་ནས། ངོ་མཚར་ཆེ་ཤོས་ཀྱི་ལེ་ཚན་དེ་ལྟད་མོ་བའི་སྤྱན་ལམ་དུ་འབུལ་དགོས་པ་དང་། 《འུན་ཤིང་ཀོང་ཇོའི》དངོས་ལྗོངས་ཟློས་གར་དེ་མི་རིགས་མཐུན་སྒྲིལ་མཚོན་པའི་ཟློས་གར་རྩེ་གྲ་ཞིག་ཏུ་དངོས་འབྲེལ་འགྱུར་བར་བྱེད་དགོས་ཞེས་གསུངས་པ་རེད།

སྐུ་འབུམ་ཐང་ཕྱོགས་བསྡུས་ཞིང་ཟོག་ཁྲོམ་རར་ཚོང་ཟོག་སྣ་ཚོགས་ཀྱིས་ཁེངས་ཤིང་། འཛད་སྤྱོད་པ་རྒྱུན་ཆད་རྒྱུ་མེད་པ་དང་ཟས་ཀྱི་དྲི་ཞིམ་གང་ས་ནས་མཐུལ་བཞིན་མཆིས། ཧུའུ་ཁྲང་ཧྲེང་གིས་སྤྲོ་སྣང་ཆེན་པོས་ཚོང་ཟོག་སྣ་ཚོགས་ཀྱི་ཁྲོམ་བཀྱག་མདུན་དུ་ཕེབས་ནས་ཚོང་དུད་དང་སྤེལ་རེས་ཡང་ཡང་གནང་ནས་ཟོག་ཁུངས་དང་། རིན་གོང་། མཁོ་སྤྲོད་བཅས་ཀྱི་གནས་ཚུལ་བཀའ་འདྲི་གནང་བ་རེད། དེ་རྗེས་འབྲེལ་ཡོད་སྡེ་ཚན་ལ་ཚོང་གཉེར་ཁོར་ཡུག་རྒྱུན་མཐུད་ལེགས་སུ་གཏོང་བ་དང་། ཁྲོམ་རའི་གཉེར་སྐྱོང་བྱེད་པོ་ན་གཞོན་སྐྱེད་སྲིང་ཤུགས་ཆེན་བྱེད་པ། གཞོན་ནུའི་ལས་གཏོད་ཀྱི་སྤྲོ་སེམས་འཕེལ་བ་བཅས་བྱས་ཏེ། ཕྲན་ཚེགས་ཁེ་ལས་ཀྱི་བྱེད་པོའི་སྐྱེ་སྟོབས་ཀྱི་དཔལ་འབར་བར་བརྟེན་ནས་གྲོང་ཁྱེར་དང་གྲོང་གསེབ་ཀྱི་ཟས་རིགས་དཔལ་འབྱོར་དར་རྒྱས་ཡོང་བར་བྱེད་དགོས་པའི་བླང་བྱ་བཏོན་པ་རེད། མེ་ཏོག་སོས་པའི་ཚོང་ཁང་དུ་ཧུའུ་ཁྲང་ཧྲེང་གིས་མེ་ཏོག་ཉོ་བཞིན་པའི་མང་ཚོགས་ཉི་སྒྲོན་དང་གླེང་མོལ་གནང་ཞིང་། རྒྱལ་སྟོན་དུས་ཆེན་དགའ་གཏོང་བྱ་ཆེད། ཉི་སྒྲོན་གྱི་ནང་མི་ཚོས་ཞོགས་པ་སྔ་པོ་ནས་རྒྱལ་དར་གསར་པ་བསྒྲེངས་པ་མ་ཟད་ཆེད་མངགས་མེ་ཏོག་སོས་པ་ཉོ་བར་ཡོང་ནས་ཁྱིམ་དུ་མཛེས་རྒྱན་སྤྲོས་རྩིས་ཡོད་པ་མཁྱེན་རྗེས། ཧུའུ་ཁྲང་ཧྲེང་གིས་དགའ་སྤྲོའི་ངང“ཁྱེད་ཚོའི་རང་འགུལ་ངང་རྒྱལ་དར་སྒྲེང་བའི་བྱེད་སྤྱོད་ལས་མེས་རྒྱལ་ལ་དགའ་ཞེན་བྱེད་པའི་ལྷག་བསམ་གང་ལེགས་མངོན་བཞིན་ཡོད། ཚང་མས་རྒྱལ་གཅེས་ཁྱིམ་གཅེས་ཀྱི་སྲོལ་རྒྱུན་བཟང་པོ་མུ་མཐུད་དར་སྤེལ་བཏང་ནས། བློ་སེམས་གཅིག་མཐུན་གྱིས་འབད་འབུངས་བྱས་ཏེ་འཚོ་བ་ཇི་ཙམ་བསྐྱལ་བ་དེ་ཙམ་གྱིས་ཡག་ཏུ་འགྲོ་རྒྱུའི་རེ་བ་ཡོད། ཁྱེད་ཚོ་རྒྱལ་སྟོན་སྤྲོ་པོ་དང་ཁྱིམ་ཚང་བདེ་སྐྱིད་ཡོང་བའི་སྨོན་འདུན་ཞུ་རྒྱུ་ཡིན”ཞེས་གསུངས་པ་རེད།

ཧུའུ་ཁྲང་ཧྲེང་གིས་ནན་བཤད་གནང་དོན། དུས་ཆེན་དང་གུང་གསེང་ནི་མང་ཚོགས་ཀྱི་ཉོ་སྒྲུབ་དགོས་མཁོ་ཆེ་ཤོས་དང་མང་ཤོས་ཀྱི་དུས་མཚམས་ཤིག་ཡིན་པས། མཁོ་སྤྲོད་སྦྲེལ་མཐུད་ལ་ཤུགས་སྣོན་རྒྱག་པ་དང་། ཁྲོམ་རའི་མཁོ་སྤྲོད་ཕུན་སུམ་ཚོགས་སུ་གཏོང་བ། དུས་ཆེན་རིང་གི་ཁྲོམ་རའི་དགོས་མཁོའི་ཁྱད་ཆོས་དང་ཟུང་འབྲེལ་བྱེད་པ། མཁོ་སྤྲོད་འགན་ལེན་དང་རིན་གོང་བརྟན་པོ་ཡོང་ཤུགས་ཆེ་རུ་གཏོང་བ་བཅས་བྱས་ནས། དམངས་འཚོའི་ཚོང་ཟོག་གི་གྲངས་འབོར་འདང་ངེས་ཡོད་པ་དང་། སྣ་ཁ་ཕུན་སུམ་ཚོགས་པ། རིན་གོང་ལུགས་མཐུན་ཡིན་པ། སྤུས་ཚད་བློས་འགེལ་ཆོག་པ་བཅས་ཡོང་བར་བྱས་ཏེ་མི་དམངས་མང་ཚོགས་ཀྱི་སྣ་མང་ཅན་གྱི་འཛད་སྤྱོད་དགོས་མཁོ་སྐོང་དགོས། བཟའ་བཅའི་སྤུས་ཚད་བདེ་འཇགས་ལྟ་འདོམས་ལ་ཤུགས་སྣོན་རྒྱག་པ་དང་། བཟའ་བཅའི་བདེ་འཇགས་ཞིབ་དཔྱད་ཚད་ལེན་ལ་ཤུགས་སྣོན་རྒྱག་པ། ཁྲོམ་རའི་རིན་གོང་སྒྲིག་ལམ་ཚད་ལྡན་དུ་གཏོང་བ་བཅས་བྱས་ནས། ཟོག་གོང་ཧམ་སྤོར་དང་། རིན་གོང་གཡོ་བསླུ། སྤུས་ཞན་སྤུས་ལེགས་སུ་བརྫུ་བ་སོགས་ཀྱི་བྱེད་སྤྱོད་ལ་རྡུང་རྡེག་མཐའ་གཅིག་ཏུ་གཏོང་རྒྱུ་མཐའ་འཁྱོངས་ཀྱིས་ཁྲོམ་རའི་བཅོས་སྐྱོང་རྒྱུན་མཐུད་ལེགས་སུ་གཏོང་བ་དང་གྲལ་འགྲིག་ལ་གོ་རིམ་ལྡན་པའི་ཁྲོམ་རའི་ཁོར་ཡུག་བཏོད་ནས། མང་ཚོགས་བློ་བདེ་པོས་མཁོ་ཆས་ཉོ་ཐུབ་པ་དང་བཟའ་བཅའ་སྤྱོད་ཐུབ་པ་བྱེད་དགོས།

ཧུའུ་ཁྲང་ཧྲེང་ལྷ་ས་གྲོང་ཁྱེར་སེམས་དྲོད་འབར་རླངས་ཚ་ཤུགས་ཚད་ཡོད་འགན་འཁྲི་ཀུང་སིར་ཕེབས་ནས་ས་གནས་ས་ཐོག་ཏུ་འབར་རླངས་བདག་སྐྱོང་བ་དང་འབྲེལ་མཐུད་གནང་བ་དང་། བཀོད་གཏོང་བཀོད་འདོམས་ལྟེ་གནས་ཀྱི་ལས་དོན་སྤེལ་ཚུལ་ལ་གཟིགས་ཞིབ་དང་། འབར་རླངས་གསོག་ནུས་དང་བདེ་འཇགས་འགན་ལེན་གྱི་བྱ་ཐབས་དོན་འཁྱོལ་སོགས་ཀྱི་གནས་ཚུལ་བཀའ་འདྲི་ཞིབ་ཚགས་གནང་བ་རེད། འབར་རླངས་ཀུང་སི་དེས་བདེ་འཇགས་ཀྱི་མཐའ་ཚད་བརྟན་སྲུང་གིས་གཟབ་ནན་དང་ཞིབ་ཚགས་ཀྱི་ལས་ཀའི་ཚད་གཞིར་བརྟེན་ནས་ལས་སྒྲུབ་ཐད་ནོར་འཛོལ་སྤུ་ཙམ་ཡང་མི་ཤོར་བའི་འགན་ལེན་བྱས་ཏེ་སྤྱོད་མཁན་གྱི་བློ་ཡིད་ཚིམ་ཚད་100%ཟིན་པ་མཁྱེན་སྐབས་ཧུའུ་ཁྲང་ཧྲེང་གིས་གདེང་འཇོག་གང་ལེགས་གནང་ཞིང་། ཁོང་གིས། བདེ་འཇགས་ཐོན་སྐྱེད་ནི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་སྤྱི་ཡོངས་དང་འབྲེལ་བ་ཡོད་ལ། མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་དང་ཡང་འབྲེལ་བ་ཡོད། མི་དམངས་དང་ཚེ་སྲོག་གོང་དུ་བཀུར་རྒྱུ་མཐའ་འཁྱོངས་ཀྱིས་ལྟ་འདོམས་ཀྱི་འགན་འཁྲི་དང་གཏོགས་ཁོངས་ཀྱི་འགན་འཁྲི་དོན་འཁྱོལ་ནན་པོ་བྱེད་པ་དང་། དུས་དང་རྣམ་པ་ཀུན་ཏུ་བདེ་འཇགས་ཐོན་སྐྱེད་ཀྱི་རྩ་བ་དེ་དམ་པོར་བཟུང་ནས། ཉེན་ཡོད་རྫས་འགྱུར་དངོས་རྫས་དང་། གཏེར་རི། ཨར་སྐྲུན། འགྲོ་ལམ་འགྲིམ་འགྲུལ། འབར་རླངས་སོགས་གཙོ་གནད་ལས་རིགས་དང་ཁྱབ་ཁོངས་ལ་དམིགས་ནས། ཉེན་ཁ་དང་མངོན་མེད་རྐྱེན་ངན་སྣ་ཚོགས་གྲལ་བཤེར་བཅོས་སྒྲིག་གཏིང་ཟབ་བྱས་ཏེ་བདེ་འཇགས་ཐོན་སྐྱེད་ཀྱི་མཐའ་ཚད་བརྟན་པོ་སྲུང་དགོས། དུས་ཆེན་དང་གུང་གསེང་ནི་རང་བྱུང་འབར་རླངས་སྤྱོད་མང་བའི་དུས་ཡིན་པས། འབར་རླངས་བདེ་འཇགས་ཀྱི་དྲིལ་བསྒྲགས་སློབ་གསོར་ཤུགས་སྣོན་བརྒྱབ་སྟེ་མང་ཚོགས་ཀྱི་བདེ་འཇགས་དོགས་ཟོན་འདུ་ཤེས་དང་འཕྲལ་སྡོམ་ཐག་གཅོད་ནུས་པ་ཆེ་རུ་བཏང་ནས་མཉམ་འགོག་མཉམ་བཅོས་ཀྱི་རྣམ་པ་བཟང་པོ་ཞིག་ཆགས་པར་བྱེད་དགོས། ཞབས་ཞུ་འགན་ལེན་གྱི་ཐབས་ལམ་ཤར་གཏོང་དང་། མཁོ་སྤྲོད་འགན་ལེན་གྱི་བཀོད་གཏོང་གནད་སྨིན་ཡོང་བར་བྱེད་པ། བཀོད་གཏོང་ཇུས་གཞི་སྟབས་བསྟུན་ལེགས་སུ་གཏོང་བ། གནད་དོན་མགྱོགས་མྱུར་ནུས་ཆེ་དང་སེམས་རྩ་འཁོལ་པོས་ཐག་གཅོད་བཅས་བྱས་ནས། “སེམས་དྲོད་འབར་རླངས”ཀྱིས་མང་ཚོགས་ལ་དངོས་འབྲེལ“དྲོ་སྐྱིད”སྦྱིན་ཏེ་མི་དམངས་མང་ཚོགས་དུས་བདེ་འཆམ་མཐུན་གྱི་དུས་ཆེན་ཞིག་གཏོང་ཐུབ་པའི་འགན་ལེན་བྱེད་དགོས།