ཟླ་9ཚེས་24ནས་27ཉིན་བར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཧུའུ་ཁྲང་ཧྲེང་གིས་གཞིས་རྩེ་གྲོང་ཁྱེར་སྐྱིད་གྲོང་རྫོང་དང་། གཉའ་ནང་རྫོང་། དིང་རི་རྫོང་། ལྷ་རྩེ་རྫོང་། ས་སྐྱ་རྫོང་། བསམ་གྲུབ་རྩེ་ཆུས་བཅས་སུ་བརྟག་ཞིབ་གནང་ཞིང་། འདི་ནི་ཧུའུ་ཁྲང་ཧྲེང་གིས་མང་ཚོགས་ཀྱི་ཁྱིམ་དུ་ཐོན་སྐྱེད་དང་འཚོ་བའི་གནས་ཚུལ་མཁྱེན་རྟོགས་ཞིབ་ཕྲ་གནང་བཞིན་པ།

ཟླ་9ཚེས་24ནས་27ཉིན་བར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཧུའུ་ཁྲང་ཧྲེང་གིས་གཞིས་རྩེ་གྲོང་ཁྱེར་སྐྱིད་གྲོང་རྫོང་དང་། གཉའ་ནང་རྫོང་། དིང་རི་རྫོང་། ལྷ་རྩེ་རྫོང་། ས་སྐྱ་རྫོང་། བསམ་གྲུབ་རྩེ་ཆུས་བཅས་སུ་བརྟག་ཞིབ་གནང་ཞིང་། ཁོང་གིས་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་གཏིང་ཟབ་བྱས་ཏེ། དམངས་ཆེད་ཐོག་མའི་བསམ་འདུན་བརྟན་སྲུང་དང་། རང་ངོས་ཀྱི་དོན་དངོས་ལ་གཞི་ཚུགས་པ། འགན་འཁྲི་འཁུར་སེམས་ཆེ་རུ་གཏོང་བ། གཞིས་རྩེའི་བྱ་གཞག་ཁག་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་གཏོང་བ་བཅས་བྱས་ཏེ། མཛེས་སྡུག་ལྡན་པའི་འཚོ་བར་བཅངས་པའི་མི་དམངས་ཀྱི་རེ་འདོད་ཟམ་མི་ཆད་པར་སྐོང་དགོས་པའི་ནན་བཤད་གནང་བ་རེད།

སྐྱིད་གྲོང་རྫོང་རྟ་དམག་གྲོང་ཚོ་དང་། གཉའ་ནང་རྫོང་ཞབས་ཁ་གྲོང་ཚོ། དིང་རི་རྫོང་སྒང་དཀར་གྲོང་རྡལ་དམངས་ཕན་ཞབས་ཞུ་ཚོམས་ཆེན། དིང་རི་རྫོང་ངན་པ་གྲོང་ཚོ། ལྷ་རྩེ་རྫོང་ཆུ་ཁུ་གྲོང་ཚོ་དང་ཐང་དཀར་གྲོང་ཚོ། ས་སྐྱ་རྫོང་ཁྲོམ་མདའ་གྲོང་ཚོ། བསམ་གྲུབ་རྩེ་ཆུས་ལྷ་ཁུད་གྲོང་ཚོ་དང་བདེ་ལེགས་སྡེ་ཁུལ་གྱི་ཏང་དམངས་ཞབས་ཞུ་ལྟེ་གནས་བཅས་སུ། ཧུའུ་ཁྲང་ཧྲེང་གིས་གཞི་རིམ་གྱི་ལས་བྱེད་པ་དང་བཀའ་མོལ་ཞིབ་ཕྲ་གནང་སྟེ་གཞི་རིམ་ཏང་འཛུགས་སྐྱོང་དང་གཞི་རིམ་བཅོས་སྐྱོང་གི་གནས་ཚུལ་མཁྱེན་རྟོགས་ཞིབ་ཕྲ་གནང་བ་མ་ཟད། བསམ་འཆར་དང་གྲོས་འགོ་ནན་ཏན་གསན་པ་རེད། ཧུའུ་ཁྲང་ཧྲེང་གིས། གཞི་རིམ་སྟོབས་ཆེར་སོང་ན་གཞི་ནས་ལས་དོན་ཁག་ཏན་ཏིག་སྒྲུབ་ཐུབ། དེར་བརྟེན་ནུས་ཤུགས་ཡོད་རྒུས་གཞི་རིམ་ཏང་རྩ་འཛུགས་སྟོབས་ཆེར་གཏོང་བ་དང་གཞི་རིམ་གྱི་ཏང་ཡོན་དཔུང་ཁག་འཛུགས་སྐྱོང་ལ་ཤུགས་སྣོན་བརྒྱབ་ནས། གཞི་རིམ་ཏང་རྩ་འཛུགས་ཀྱི་གོང་བུ་འགྲིལ་ཤུགས་དང་། བློ་ཁ་ཕྱོགས་ནུས། འཐབ་ནུས་བཅས་ཆེ་རུ་རྒྱུན་ཆད་མེད་པར་བཏང་སྟེ། ཏང་གིས་བོད་དུ་སྲིད་སྐྱོང་བའི་རྨང་གཞི་བརྟན་དུ་གཏོང་དགོས། ཏང་དང་མང་ཚོགས་དང་ལས་བྱེད་པ་དང་མང་ཚོགས་དབར་གྱི་འབྲེལ་བ་ཟབ་ཏུ་བཏང་ནས་མང་ཚོགས་ཀྱི་ལས་དོན་ངང་རྒྱུད་རིང་ལ་ཞིབ་ཚགས་པོས་སྒྲུབ་པ་དང་རྒྱུན་རྣམ་ཅན་གྱི་སྒོ་ནས་གྲོང་ཚོ་དང་དུད་ཚང་དུ་བསྐྱོད་དེ་ལས་དོན་ཁག་མང་ཚོགས་ཀྱི་བློ་ལ་བབས་པ་ཞིག་སྒྲུབ་དགོས། གཞི་རིམ་ཏང་རྩ་འཛུགས་ཀྱི་དམག་འཐབ་མཁར་རྫོང་གི་ནུས་པ་དང་ཏང་ཡོན་གྱི་གདོང་ལེན་དཔེ་བཟང་གི་ནུས་པ་གང་ལེགས་འདོན་པ་དང་། མང་ཚོགས་ཀྱི་ཟུར་ཚད་ནས་གནད་དོན་ལ་བསམ་བློ་མང་ཙམ་གཏོང་བ་དང་ལས་དོན་མང་ཙམ་སྒྲུབ་པ། སེམས་ནུས་ཡོད་རྒུས་ལས་ཞུགས་དང་། སློབ་གསོ། སྨན་བཅོས། རྒན་གསོ། བུ་བཅོལ་སོགས་དམངས་འཚོའི་བྱ་བ་དངོས་ཡག་པོ་སྒྲུབ་པ་བཅས་བྱས་ཏེ། མི་རིགས་ཁག་གི་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་རྒྱུན་ཆད་མེད་པར་ཆེ་རུ་གཏོང་དགོས། དུས་རབས་གསར་པའི“ཧྥེང་ཆའོ་ཡི་ཉམས་མྱོང”མཐའ་འཁྱོངས་དང་འཕེལ་རྒྱས་གཏོང་བ་དང་། ལམ་སྲོལ་དང་གཞི་རྟེན་གསར་གཏོད་བྱེད་པ། ལས་ཀའི་རྩིས་ཐོ་ཞིབ་ཚགས་བཟོ་བ། འགལ་ཟླ་དང་རྩོད་གཞི་རང་འགུལ་ངང་གྲལ་བཤེར་དང་སེལ་བ་བཅས་བྱས་ཏེ། གནད་དོན་ཐོན་བཟོ་ཡོད་པའི་དུས་དང་མ་ཐོན་གོང་ནས་སེལ་གང་ཐུབ་བྱེད་དགོས། གཞི་རིམ་གྱི་ལས་བྱེད་པར་སེམས་ཁུར་དང་གཅེས་སྐྱོང་བྱེད་པ་དང་། བསམ་པའི་རིག་གནས་འཚོ་བ་ཕུན་སུམ་ཚོགས་སུ་གཏོང་བ། སེམས་ཁྲལ་སེལ་རོགས་བཅས་བྱས་ཏེ་ཁོང་ཚོ་ལས་གནས་ཐོག་ལས་སྒྲུབ་ལས་གཏོད་དེ་བས་ཡག་པོ་ཡོང་བར་བྱེད་དགོས་ཞེས་གསུངས་པ་རེད།

ཧུའུ་ཁྲང་ཧྲེང་སྔ་རྗེས་སུ་གྲོང་མི་པ་སངས་བཀྲ་ཤིས་དང་། ཚེ་དབང་དཔལ་ལྡན། ཚེ་རིང་ཆུང་བདག ཕུན་ཚོགས་ཚེ་རིང་། བསྟན་འཛིན་དབང་འདུས། དབང་འདུས། སྤེན་པ་བཅས་ཀྱི་ཁྱིམ་དུ་ཕེབས་ནས་ཁྱིམ་ཚང་གི་ཡོང་འབབ་ཡོང་ཁུངས་མཁྱེན་རྟོགས་ཞིབ་ཕྲ་གནང་བ་མ་ཟད། ཐོན་སྐྱེད་དང་འཚོ་བའི་གནས་ཚུལ་སྐོར་བྱམས་བརྩེའི་ངང་བཀའ་འདྲི་གནང་བ་རེད། ཧུའུ་ཁྲང་ཧྲེང་གིས། ད་ཆའི་བདེ་སྐྱིད་ལྡན་པའི་འཚོ་བ་ལས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལམ་ལུགས་ཀྱི་མངོན་གསལ་དོད་པའི་ཁྱད་འཕགས་རང་བཞིན་གང་ལེགས་མངོན་ཡོད་པས། ཚང་མས་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་དམིགས་བསལ་ཐུགས་ཁུར་གྱི་བཀའ་དྲིན་ཚོར་བར་བྱས་ཏེ་གདེང་ཚོད་བརྟན་དུ་གཏོང་བ་དང་ཡང་འབད་བསྐྱར་འབད་བྱས་ནས་དེ་བས་བདེ་སྐྱིད་དང་མཛེས་སྡུག་ལྡན་པའི་འཚོ་བ་གཏོད་དགོས་ཞེས་གསུངས་པ་རེད། ཁོང་གིས། ཆ་འཕྲིན་ཅན་གྱི་བྱེད་ཐབས་གང་ལེགས་སྤྱད་དེ་རྒྱུན་རྣམ་ཅན་གྱི་སྒོ་ནས་དབུལ་ལོག་དང་དབུལ་ཕོངས་སྔོན་འགོག་བྱེད་པའི་ལམ་སྲོལ་དོན་འཁྱོལ་དང་། འགུལ་རྣམ་ལྟ་ཞིབ་ཚད་ལེན་ཏན་ཏིག་དང་ཞིབ་ཚགས། དབུལ་ལོག་དང་དབུལ་ཕོངས་ཀྱི་ཉེན་ཁ་སྔ་ཙམ་ཤེས་རྟོགས་དང་སྔ་ཙམ་ཐེ་ཇུས་བཅས་བྱས་ནས་རོགས་སྐྱོར་བྱེད་ཐབས་གནད་སྨིན་དང་ཕན་འབྲས་ཐོན་པའི་འགན་ལེན་བྱེད་དགོས། ཐོན་ཁུངས་ཀྱི་ལེགས་ཆར་གཞི་ཚུགས་ཏེ་རྫོང་ཁོངས་དཔལ་འབྱོར་འཕེལ་རྒྱས་ཤུགས་ཆེན་གཏོང་བ་དང་། ཕྱུག་འགྱུར་སྣེ་ཁྲིད་པའི་ནུས་པ་ཡག་པོ་འདོན་པ། ཞིང་འབྲོག་པའི་མཉམ་ལས་ཁང་རྒྱ་སྟོབས་ཆེ་རུ་གཏོང་བ། ཡུལ་བབ་དང་བསྟུན་ནས་ཁྱད་ལྡན་ཐོན་ལས་འཕེལ་རྒྱས་གཏོང་བ། ཞིང་འབྲོག་ལས་ཀྱི་སྤུས་རྟགས་གཏོད་པ་བཅས་བྱས་ནས་ནང་སྐྱེས་ཀྱི་འཕེལ་རྒྱས་སྒུལ་ཤུགས་ཆེ་རུ་གཏོང་དགོས། རྩལ་ནུས་གསོ་སྦྱོང་ལ་ཤུགས་སྣོན་རྒྱག་པ་དང་། འབབ་འཕར་ཐབས་ལམ་ཡངས་སུ་གཏོང་བ། ཞིང་འབྲོག་པ་སྒོ་རྩར་ལས་ཞུགས་འབབ་འཕར་ཐུབ་པར་སྐུལ་འདེད་གཏོང་བ། གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་འཛུགས་སྐྲུན་ཧུར་ཐག་བཅས་བྱས་ཏེ། གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་ཏན་ཏིག་གཏོང་དགོས། གཞི་རིམ་གྱི་ལས་བྱེད་པ་མང་ཚོགས་དང་རྦད་དེ་འབྲེལ་འདྲིས་དང་། སྲིད་ཇུས་ཁོང་དུ་ཆུད་པ། གནས་ཚུལ་དངོས་གསལ་རྟོགས། མང་ཚོགས་ཀྱི་དཀའ་ངལ་དངོས་ཐག་གཅོད་ཡག་པོ་བཅས་བྱས་ཏེ། མང་ཚོགས་ཀྱི་གྲོགས་པོ་བློས་ཐུབ་དང་། དྲོ་སྐྱིད་སྦྱིན་མཁན། སྙིང་ཉེ་བཟང་པོ་བཅས་དངོས་འབྲེལ་བྱེད་དགོས་པའི་ནན་བཤད་གནང་བ་རེད། ལྷ་རྩེ་རྫོང་ཐང་དཀར་གྲོང་ཚོའི་གྲོང་གསེབ་བདེ་སྐྱིད་ཁང་དུ། ཧུའུ་ཁྲང་ཧྲེང་གིས་འཁོར་སྐྱོད་དོ་དམ་གྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་དང་ལྟོ་ཆས་ཟ་བར་ཡོང་མཁན་མང་ཚོགས་དང་བྱམས་བརྩེའི་བཀའ་མོལ་གནང་ཞིང་། ཁོང་གིས“རྒན་གཅིག་གཞོན་གཅིག”ལ་གཅེས་སྐྱོང་བྱས་ནས་རྒྱུན་མཐུད་ཆོག་པའི་འཕེལ་རྒྱས་ནུས་པ་རྒྱུན་ཆད་མེད་པར་ཆེ་རུ་བཏང་སྟེ་དངུལ་སྐར་ལི་ཙམ་ཡང་མང་ཚོགས་ལ་སྤྱོད་དགོས་པ་དང་། གྲོང་གསེབ་སྨན་པས་ཤེས་བྱ་སྦྱོང་བར་ཤུགས་སྣོན་རྒྱག་པ་དང་ལས་སྒོའི་ཆུ་ཚད་མཐོ་རུ་བཏང་ནས་མང་ཚོགས་ལ་དེ་བས་ལེགས་པ་དང་དེ་བས་སྟབས་བདེ་བའི་སྨན་བཅོས་འཕྲོད་བསྟེན་གྱི་ཞབས་འདེགས་ཞུ་དགོས་པའི་ནན་བཤད་གནང་བ་རེད།

གཞིས་རྩེ་རྒྱལ་སྤྱིའི་སྐམ་སའི་གྲུ་ཁའི་ཕྱིར་གཏོང་དངོས་ཟོག་ཞིབ་བཤེར་ར་བ་དང་གཞིས་རྩེ་ལས་རིགས་ལག་རྩལ་སློབ་གླིང་དུ་ཕེབས་སྐབས། ཧུའུ་ཁྲང་ཧྲེང་གིས་ས་ཡུལ་དངོས་སུ་ཞིབ་བཤེར་ར་བའི་འཁོར་སྐྱོད་དང་མཐོ་སློབ་འཛུགས་སྐྱོང་སོགས་ཀྱི་གནས་ཚུལ་ལ་བརྟག་ཞིབ་གནང་བ་རེད། ཁོང་གིས། ས་བབ་ཀྱི་ལེགས་ཆར་གཞི་ཚུགས་ཏེ་ཨེ་ཤེ་ཡ་ལྷོ་མར་ཕྱོགས་ནས་སྒོ་མོ་དབྱེ་བའི་བགྲོད་ལམ་གལ་ཆེན་འཛུགས་སྐྲུན་ལ་དམིགས་ཏེ་ཚོང་འགུགས་མ་འདྲེན་བྱེད་ཤུགས་ཆེ་རུ་གཏོང་བ་དང་། ཕུལ་བྱུང་ཁེ་ལས་བཅའ་སྡོད་བྱ་རྒྱུའི་ཡིད་དབང་འགུག་པ། གཞི་ཁྱོན་ཅན་གྱི་གཉེར་སྐྱོང་ཕན་འབྲས་ཆེ་རུ་གཏོང་བ། འགག་སྒྲོལ་སྟབས་བདེ་ཅན་ལ་སྐུལ་འདེད་གཏོང་བ། ཕྱིར་གཏོང་ནང་འདྲེན་གྱི་ཚོང་དོན་ལས་དོན་ཏན་ཏིག་སྒྲུབ་པ་བཅས་བྱས་ནས་འཕེལ་རྒྱས་ཀྱི་སྒུལ་ནུས་ཆེ་རུ་གང་ལེགས་གཏོང་དགོས། སྒོ་དབྱེའི་སློབ་གཉེར་མཐའ་འཁྱོངས་དང་། རིག་ཚན་འཛུགས་སྐྱོང་ལ་ཤུགས་སྣོན། དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དགོས་མཁོར་དམིགས་ནས་ཆེད་ལས་ཀྱི་བཀོད་པ་དང་རིག་ཚན་བཀོད་སྒྲིག་ལེགས་སུ་གཏོང་བ། ཐོན་སློབ་ཞིབ་གསུམ་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ། ཆེད་ལས་ཀྱི་རྩལ་ནུས་ཤེས་ལྡན་པ་སྔར་ལས་མང་བ་གསོ་སྐྱོང་བཅས་བྱེད་དགོས། རྒྱ་ཆེའི་སློབ་མར་སློབ་སྦྱོང་གི་གོམས་གཤིས་དང་། བསམ་གཞིག་གི་གོམས་གཤིས། འཚོ་བའི་གོམས་གཤིས་བཅས་བཟང་པོ་འཇགས་པར་བྱས་ནས་ཕུགས་འདུན་ཆེན་པོ་གཏོད་པ་དང་བློ་སྟོབས་བརྟན་པོར་ཞུན་བརྡར་སྤྲོས་པ་དང་། ཆེད་ལས་ཤེས་བྱ་ཡག་པོ་སྦྱོང་བ་དང་ཕྱོགས་བསྡུས་བྱང་ཚད་མཐོ་རུ་གཏོང་བ། ལུས་སེམས་བདེ་ཐང་རྒྱུན་འཁྱོངས་དང་གསར་གཏོད་ཀྱི་གསོན་ཤུགས་འཕེལ་བ་བཅས་བྱེད་དགོས་པའི་ནན་བཤད་གནང་བ་རེད།