ཟླ་2ཚེས་28ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་རང་སྐྱོང་ལྗོངས་ཏང་ཨུད་རྒྱུན་ལས་ཨུ་ལྷན་གྱི་ཚོགས་འདུ་གཙོ་སྐྱོང་གནང་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཉེ་དུས་ཀྱི་གསུང་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན་བརྒྱུད་བསྒྲགས་དང་སློབ་སྦྱོང་ནན་ཏན་གནང་བ་མ་ཟད། རང་ལྗོངས་ཀྱི་ལག་བསྟར་དོན་འཁྱོལ་ལས་དོན་ལ་ཞིབ་འཇུག་ཀྱང་གནང་བ་རེད།

ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དཔྱིད་གསར་དུས་ཆེན་གྱི་སྔ་ནུབ་ཏུ་པེ་ཅིང་དུ་རྟོག་ཞིབ་དང་གཞི་རིམ་གྱི་ལས་བྱེད་པ་དང་མང་ཚོགས་ལ་འཚམས་འདྲི་དང་། དམག་དཔུང་ལ་འཚམས་འདྲི། ཏང་ཕྱིའི་མི་སྣ་དང་མཉམ་དུ་དཔྱིད་གསར་དུས་ཆེན་ལ་བསུ་བ་ཞུ་བ་བཅས་གནང་སྐབས་དང་། 2026ལོའི་དཔྱིད་གསར་དུས་ཆེན་གྱི་ལྷན་འཛོམས་རྟེན་འབྲེལ་ཚོགས་འདུའི་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་དང་། ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་། ཧྲུའུ་ཅི་ཁྲུའུ་ཡི་ཧྲུའུ་ཅི། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་དང་། རྒྱལ་སྲིད་སྤྱི་ཁྱབ་ཁང་། རྒྱལ་ཡོངས་སྲིད་གྲོས་བཅས་ཀྱི་ཏང་ཙུའི་ཁོངས་མི། ཆེས་མཐོའི་མི་དམངས་ཁྲིམས་ཁང་དང་ཆེས་མཐོའི་མི་དམངས་ཞིབ་དཔྱོད་ཁང་གི་ཏང་ཙུའི་ཧྲུའུ་ཅི་བཅས་ཀྱི་འགན་སྒྲུབ་གསལ་ཞུའི་སྙན་ཞུར་གཟིགས་ཞིབ་གནང་སྐབས་བཏོན་གནང་བའི་བླང་བྱ་གལ་ཆེན་གྱི་དགོངས་དོན་སོགས་བརྒྱུད་བསྒྲགས་དང་སློབ་སྦྱོང་བྱས་པ་རེད། ཝང་ཅུན་ཀྲེང་གིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་བླང་བྱ་གལ་ཆེན་ནི་གཟིགས་རྒྱང་རིང་བ་དང་། དགོངས་པ་གཏིང་ཟབ་པ། ནང་དོན་ཕུན་སུམ་ཚོགས་པ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་ཁྲོད་ཀྱི་རིགས་པའི་གཞུང་ལུགས་དང་ལག་ལེན་གྱི་གནད་དོན་གལ་ཆེན་རབ་དང་རིམ་པར་ཚན་རིག་དང་མཐུན་པའི་སྒོ་ནས་ལན་བཏབ་པས། ང་ཚོས་ལས་དོན་ཡག་པོ་སྒྲུབ་པར་མདུན་སྐྱོད་ཀྱི་ཁ་ཕྱོགས་གསལ་སྟོན་དང་རྩ་བའི་གཞི་འཛིན་ས་མཁོ་འདོན་གནང་ཡོད། ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས“གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་གོ་བ་གཏིང་ཟབ་ལེན་པ་དང་། “འདུ་ཤེས་བཞི”ཟབ་ཏུ་གཏོང་བ། “གདེང་ཚོད་བཞི”བརྟན་དུ་གཏོང་བ། “སྲུང་སྐྱོང་གཉིས”ཐུབ་པར་བྱེད་པ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་རྒྱུན་སྲིང་ལྷོད་མེད་ཀྱིས་དོན་འཁྱོལ་ཡག་པོ་བྱེད་པ། “དོན་ཆེན་བཞི”དོན་འཁྱོལ་ལ་གོ་རིམ་ལྡན་པའི་སྒོ་ནས་དམ་འཛིན་ནན་པོ་བྱེད་པ། ལས་འགན་གཙང་སྒྲུབ་དང་ལས་ཀར་འབད་བརྩོན་བཅས་བྱས་ཏེ། བོད་ཀྱི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་རྣམ་པ་གསར་པ་རྒྱུན་ཆད་མེད་པར་གཏོད་དགོས།

ཝང་ཅུན་ཀྲེང་གིས་ནན་བཤད་གནང་དོན། རིཌ་པའི་གཞུང་ལུགས་དང་དོན་དངོས་ཟུང་འབྲེལ་བྱ་རྒྱུ་མཐའ་འཁྱོངས་བྱས་ཏེ་བློ་བརྟན་འགྱུར་མེད་ངང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་དོན་ཐོག་ཏུ་འཁྱོལ་བར་བྱེད་དགོས། སྤུས་ཚད་མཐོ་བའི་འཕེལ་རྒྱས་ཀྱི་བརྗོད་དོན་གཙོ་བོར་དམ་འཛིན་བརྟན་པོ་བྱེད་པ་དང་། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་།  གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱེད་པ། “ཚང་དགོས་པ་གསུམ་དང་ཕན་འདོགས་པ་གཅིག”གི་སྤྱིའི་བླང་བྱ་དོན་འཁྱོལ་བཅས་བྱས་ཏེ་ཕན་ནུས་ལྡན་པའི་མ་འཇོག་མུ་མཐུད་རྒྱ་སྐྱེད་གཏོང་བ་དང་། རྣམ་གྲངས་གལ་ཆེན་འཛུགས་སྐྲུན་ལ་སྐུལ་འདེད་ཏན་ཏིག་གཏོང་བ། ཡུལ་བབ་དང་བསྟུན་ནས་ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་བ། སྲོལ་རྒྱུན་ཐོན་ལས་ཀྱི་སྤུས་ཚད་མཐོར་འདེགས་དང་ཕན་འབྲས་ཆེར་གཏོང་ལ་སྐུལ་འདེད་གཏོང་བ། ཚོང་གཉེར་ཁོར་ཡུག་ལེགས་སུ་གཏོང་བ། འཕེལ་རྒྱས་ཀྱི་ནང་གནས་སྒུལ་ཤུགས་ཆེ་རུ་གཏོང་བ་བཅས་བྱེད་དགོས། གྲོང་ཁྱེར་བཅོས་སྐྱོང་དེང་རབས་ཅན་གྱི་ཆུ་ཚད་རྒྱུན་ཆད་མེད་པར་མཐོ་རུ་བཏང་ནས་མི་དམངས་གྲོང་ཁྱེར་གྱི་འདུ་ཤེས་བརྟན་དུ་གཏོང་བ་དང་། གྲོང་ཁྱེར་གྱི་ནང་རྒྱས་རྣམ་པའི་གོང་འཕེལ་མཐའ་འཁྱོངས་བྱེད་པ། ཐོན་སྐྱེད་དང་གྲོང་ཁྱེར་མཉམ་འདྲེས་དང་གྲོང་ཁྱེར་དང་གྲོང་གསེབ་མཉམ་འདྲེས་ལ་སྤྱི་འདོམས་སྐུལ་འདེད་གཏོང་བ། གྲོང་ཁྱེར་གསར་སྒྱུར་གྱི་བྱ་སྤྱོད་གཏིང་ཟབ་སྤེལ་བ། ལོ་རྒྱུས་རིག་གནས་ཤུལ་བཞག་སྲུང་སྐྱོང་ཡག་པོ་བཅས་བྱེད་དགོས། དམངས་འཚོ་འགན་སྲུང་དང་ལེགས་སུ་གཏོང་ཤུགས་ཆེ་རུ་བཏང་ནས་ཡང་དག་པའི་སྲིད་དོན་ལས་རྗེས་ཀྱི་ལྟ་བ་བརྟན་པོར་འཛུགས་པ་དང་ལག་ལེན་བསྟར་བ་དང་། མང་ཚོགས་ཉེ་འགྲམ་གྱི་དོན་ཆུང་ཏང་ཨུད་དང་སྲིད་གཞུང་གི་དོན་ཆེན་དུ་བརྩིས་ནས་དམ་འཛིན་བྱེད་པ། དམངས་འཚོའི་དོན་དངོས་ཡག་པོ་ཧུར་ཐག་སྒྲུབ་པ། བདེ་ཐང་བོད་ལྗོངས་བསྐྲུན་མགྱོགས་སུ་གཏོང་བ། སྤྱི་ཚོགས་འགན་སྲུང་ཆུ་ཚད་མཐོ་རུ་གཏོང་བ་བཅས་བྱས་ནས་མི་རིགས་ཁག་གི་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་རྒྱུན་ཆད་མེད་པར་ཆེ་རུ་གཏོང་དགོས། རྒྱལ་སྲུང་དང་དམག་དཔུང་གི་དེང་རབས་ཅན་འཛུགས་སྐྲུན་ལ་རྒྱབ་སྐྱོར་ཤུགས་ཆེན་བྱས་ཏེ། རྒྱལ་སྲུང་སྐུལ་སློང་ནུས་པ་མུ་མཐུད་ཆེ་རུ་གཏོང་བ་དང་། དམག་དམངས་མཉམ་འདྲེས་ཀྱི་འཕེལ་རྒྱས་གཏིང་ཟབ་ཡོང་བར་སྐུལ་འདེད་གཏོང་བ། གཉིས་བཀུར་མཉམ་སྐྲུན་ལས་དོན་ཡག་པོ་སྒྲུབ་པ་བཅས་བྱས་ཏེ། བོད་སྡོད་དཔུང་སྡེར་ལས་ཀ་དང་འཚོ་བའི་ཆ་རྐྱེན་བཟང་པོ་ཧུར་ཐག་བསྐྲུན་དགོས།

ཝང་ཅུན་ཀྲེང་གིས་ནན་བཤད་གནང་དོན། སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱས་ཏེ“ལོ་ལྔ་ཚན་བཅོ་ལྔ་པའི”འགོ་ཡག་པོ་འཛུགས་རྒྱུའི་འགན་ལེན་བྱེད་དགོས་ཤིང་། ཏང་གིས་ཕྱོགས་ཡོངས་ལ་འགོ་ཁྲིད་བྱ་རྒྱུ་མཐའ་འཁྱོངས་ཀྱིས་ཆབ་སྲིད་ཀྱི་སྒྲིག་ཁྲིམས་དང་ཆབ་སྲིད་ཀྱི་སྒྲིག་ལམ་ནན་དུ་གཏོང་བ་དང་། ཀྲུང་དབྱང་གི་གཏན་འབེབས་དོན་ཚན་བརྒྱད་དང་དེ་བཞིན་དེའི་ལག་བསྟར་ཞིབ་སྲོལ་གྱི་དགོངས་དོན་དོན་འཁྱོལ་ནན་པོ་བྱས་ཏེ་སྲོལ་བཟང་སྤྱོད་གཙང་གི་ཆབ་སྲིད་ཁོར་ཡུག་བརྟན་དུ་གཏོང་དགོས། གཙོ་འགན་གཙོ་ལས་ལ་དམིགས་ཏེ་འགོ་ཚུགས་ལོའི་འགན་འཁྲི་འཁུར་སེམས་དང་དགོས་གཏུག་གི་བསམ་པ་ཆེ་རུ་གཏོང་བ་དང་། རང་སྐྱོང་ལྗོངས་ཏང་ཨུད་ཀྱི་ལས་ཀའི་བླང་བྱ་གཞིར་བཟུང་། བསམ་ཕྱོགས་ཁ་གསལ་དང་བྱེད་ཐབས་ཞིབ་ཚགས་སུ་བཏང་ནས་བཀོད་སྒྲིག་ཁག་དོན་འཁྱོལ་ཡོང་བར་སྐུལ་འདེད་གཏོང་དགོས། བརྟན་ལྷིང་སྲུང་སྐྱོང་ལས་དོན་ལ་ཚད་མཐོའི་མཐོང་ཆེན་གྱིས་འགན་འཁྲི་ནན་དུ་དང་དོན་འཁྱོལ་ལ་དམ་འཛིན་བྱས་ནས། སྤྱི་ཚོགས་བཅོས་སྐྱོང་མ་ལག་དང་བཅོས་སྐྱོང་ནུས་པའི་དེང་རབས་ཅན་གྱི་ཆུ་ཚད་མཐོ་རུ་བཏང་སྟེ། སྤྱི་ཚོགས་སྤྱི་ཡོངས་ཞི་མཐུན་བརྟན་ལྷིང་འགན་ལེན་གྱིས་རྒྱལ་ཡོངས་ཀྱི་ཚོགས་འདུ་གཉིས་ལ་བརྟན་ལྷིང་དང་གོ་རིམ་ལྡན་པའི་སྤྱི་ཚོགས་ཀྱི་ཁོར་ཡུག་ཅིག་བསྐྲུན་དགོས།

ཚོགས་འདུའི་ཐོག་ཀྲུང་དབྱང་སྒྲིག་ཨུད་དང་རྒྱལ་ཁབ་ལྟ་ཞིབ་ཨུ་ལྷན་གྱི་མང་ཚོགས་ཉེ་འགྲམ་གྱི་ཚུལ་མིན་སྤྱོད་ཚུལ་དང་རུལ་སུངས་ཀྱི་གནད་དོན་གཅིག་སྡུད་བཅོས་སྒྲིག་གི་ཕྱོགས་བསྡོམས་གཟེངས་བསྟོད་དང་2026ལོའི་སྐུལ་སློང་བཀོད་སྒྲིག་ཚོགས་འདུའི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་པ་དང་། 2025ལོའི་རང་ལྗོངས་ཀྱི་འབྲེལ་ཡོད་ལས་དོན་གནས་ཚུལ་གྱི་སྙན་སེང་གསན་པ་རེད། ཝང་ཅུན་ཀྲེང་གིས། འདས་ཟིན་པའི་ལོ་གཅིག་རིང་། རང་སྐྱོང་ལྗོངས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་སློབ་སྦྱོང་དང་ལག་བསྟར་གཏིང་ཟབ་བྱས་ནས། མང་ཚོགས་ཉེ་འགྲམ་གྱི་ཚུལ་མིན་སྤྱོད་ཚུལ་དང་རུལ་སུངས་ཀྱི་གནད་དོན་གཅིག་སྡུད་བཅོས་སྒྲིག་བྱ་རྒྱུ་དེ་ཆབ་སྲིད་ཀྱི་ལས་འགན་གལ་ཆེན་ཞིག་ལ་བརྩི་རྒྱུ་མཐའ་འཁྱོངས་ཀྱིས་ཆེད་དོན་བཅོས་སྒྲིག་དང་། ཁུངས་སྣེ་གྲལ་བཤེར། གྱོད་གཞི་ཞིབ་གཅོད། སྒྲིག་སྲོལ་ལམ་ལུགས་འཛུགས་པ་བཅས་ཀྱི་ལས་དོན་ཁག་ལ་གཞི་གཅིག་ཏུ་སྐུལ་འདེད་བཏང་སྟེ་མང་ཚོགས་ཀྱིས་བསམ་འཆར་ཆེན་པོ་ཡོད་པའི་མངོན་གསལ་དོད་པའི་གནད་དོན་ཁག་གཅིག་ཐག་གཅོད་ནུས་ལྡན་ཐུབ་ནས་གཅིག་སྡུད་བཅོས་སྒྲིག་ཐད་ཕན་འབྲས་བཟང་པོ་ཐོན་ཡོད། ད་ལོ་ནི་གཅིག་སྡུད་བཅོས་སྒྲིག་གི་རྒྱལ་ཁ་ཕུ་ཐག་གཅོད་པའི་འགག་རྩའི་ལོ་ཞིག་ཡིན་ཞིང་། བསམ་བློའི་ངོས་འཛིན་ཟབ་ཏུ་བཏང་ནས། གཅིག་སྡུད་བཅོས་སྒྲིག་དེ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་ཞིབ་ཕྲའི་བྱ་སྤྱོད་ཅིག་ཏུ་བརྩི་བ་དང་། ཡང་དག་པའི་སྲིད་དོན་ལས་རྗེས་ཀྱི་ལྟ་བ་བརྟན་པོར་འཛུགས་པ་དང་ལག་ལེན་བསྟར་བའི་ཞིབ་ཕྲའི་མཚོན་ཚུལ་ཞིག་ཏུ་བརྩི་བ། “ཏང་ཨུད་དང་སྲིད་གཞུང་གིས་གཙོ་འགན་འཁུར་བ་དང་། སྒྲིག་ཨུད་ཀྱིས་སྣེ་ཁྲིད་དེ་སྤྱི་ཡོངས་ལ་དམ་འཛིན་བྱེད་པ། སྡེ་ཚན་གྱིས་མཐུན་སྦྱོར་སྐུལ་འདེད་གཏོང་བ། གྲོང་ཁྱེར་དང་རྫོང་གིས་ཐད་ཀར་དམ་འཛིན་བྱེད་པ”བཅས་ཀྱི་མཉམ་འགུལ་ལམ་སྲོལ་འཐུས་སྒོ་ཚང་དུ་བཏང་སྟེ། རིམ་པ་ཁག་དང་སྡེ་ཚན་ཁག་གིས་དག་ཐེར་དོན་འཁྱོལ་ལ་དམ་འཛིན་བྱེད་པར་སྐུལ་འདེད་གཏོང་དགོས། དག་ཐེར་བཅོས་སྒྲིག་གི་ཕན་འབྲས་ཆེ་རུ་བཏང་ནས། “སློབ་གྲྭའི་ཟ་མ”དང་། གྲོང་གསེབ་དར་རྒྱས་ཀྱི་མ་དངུལ་བེད་སྤྱོད། ཞིང་པ་ལས་མིའི་གླ་ཆ་འགྱངས་ཆད་སོགས་གཙོ་གནད་ཁྱབ་ཁོངས་ཀྱི་མངོན་གསལ་དོད་པའི་གནད་དོན་མུ་མཐུད་བཅོས་སྒྲིག་གཏིང་ཟབ་བྱས་ཏེ། ལས་རིགས་ཁོངས་གཏོགས་ཀྱི་དོན་དངོས་དང་ཟུང་འབྲེལ་དང་བྱེད་ཐབས་བཏོན་ཏེ་ཚོར་ཐུབ་པ་དང་ཁྱབ་ཐུབ་པའི་གྲུབ་འབྲས་དེ་བས་མང་བར་བརྟེན་ནས་མང་ཚོགས་ཀྱི་ཡིད་ཆེས་ཐོབ་པར་བྱེད་དགོས། དམ་བསྒྲགས་རྣམ་པ་རྒྱུན་འཁྱོངས་ཀྱིས་ལས་རིགས་བཅོས་སྒྲིག་གི་གཙོ་གནད་ལ་དམིགས་ནས། རང་འགུལ་ངང་སྟབས་བསྟུན་གྲལ་བཤེར་བྱེད་པ་དང་། གྱོད་གཞི་ཞིབ་གཅོད་དང་དག་ཐེར་དང་བཅོས་སྒྲིག་ལ་སྐུལ་འདེད་གཏོང་བ་གཉིས་ཀར་མཐོང་ཆེན་བྱ་རྒྱུ་མཐའ་འཁྱོངས་བྱེད་པ། སྒྲིག་སྲོལ་དང་ལམ་ལུགས་འཐུས་སྒོ་ཚང་དུ་གཏོང་བ། ཕུགས་ཕན་ལམ་སྲོལ་འཛུགས་པ་བཅས་བྱས་ཏེ་བཅོས་སྒྲིག་གི་ཕན་ནུས་ཆེ་རུ་ཏན་ཏིག་གཏོང་དགོས། མགོ་ནས་མཇུག་བར་མུ་མཐུད་མཐའ་འཁྱོངས་ཀྱིས་དུས་རབས་གསར་པའི་ཏང་གི་མང་ཚོགས་ལམ་ཕྱོགས་སུ་ཡག་པོ་བསྐྱོད་ནས། གཞི་རིམ་བཅོས་སྐྱོང་ཁྲོད་ཀྱི་འགག་གནད་དང་དཀའ་གནད་དུས་ཐོག་ཏུ་ཐག་གཅོད་བྱེད་པ་དང་། ལྟ་སྐུལ་དང་རོགས་སྐྱོར་བྱེད་ཤུགས་ཆེ་རུ་བཏང་སྟེ་གཞི་རིམ་གྱི་རྨང་གཞི་བརྟན་དུ་གཏོང་དགོས།

ཚོགས་འདུའི་ཐོག་2026ལོའི་ལྗོངས་ཡོངས་ཀྱི་གཙོ་གནད་འཛུགས་སྐྲུན་རྣམ་གྲངས་ཀྱི་འཆར་གཞིར་གྲོས་ཞིབ་བྱས་ཤིང་། ཝང་ཅུན་ཀྲེང་གིས་རྣམ་གྲངས་ནི་གནས་དང་། ཐོན་ལས་ནི་ཐིག དཔལ་འབྱོར་ནི་ངོས་བཅས་ཡིན་པས་རྣམ་གྲངས་དེ་དཔལ་འབྱོར་ལས་དོན་གྱི་སྲོག་ཐིག་དང་དམ་འཛིན་བྱ་གཞི་གཙོ་བོར་བརྩིས་ཏེ། རང་ངོས་ཀྱི་ལས་དོན་དང་རྒྱལ་ཁབ་སྲིད་ཇུས་ཀྱི་ཟུང་འབྲེལ་བྱ་གཞི་འཚོལ་ཞིབ་གནད་སྨིན་བྱེད་པ་དང་། རྒྱལ་ཁབ་པུའུ་ཨུད་དང་འབྲེལ་ཡོད་ཁེ་ལས་དང་འབྲེལ་མཐུད་བྱེད་ཤུགས་ཆེ་རུ་གཏོང་བ། ཚན་རིག་དང་མཐུན་པའི་ངང་འཆར་འགོད་དང་སྔ་སྣུར་ནས་གྲབས་གསོག་བཅས་བྱས་ཏེ་རྣམ་གྲངས་དེ་བས་མང་བ་རྒྱལ་ཁབ་ཀྱི“འཆར་འགོད་ཆེན་པོའི”ནང་འཇུག་ཐུབ་པའི་བརྩོན་ལེན་བྱེད་དགོས། དུས་འགོའི་ལས་དོན་ཡག་པོ་སྒྲུབ་པ་དང་། རྒྱུ་རྐྱེན་གཙོ་བོའི་འགན་ལེན་ལ་ཤུགས་སྣོན་རྒྱག་པ། རྒྱུ་རྐྱེན་གཙོ་བོ་རྣམ་གྲངས་དང་བསྟུན་རྒྱུ་མཐའ་འཁྱོངས་བྱེད་པ། ཐོན་ཁུངས་བཀོད་སྒྲིག་གནད་སྨིན་བྱེད་པ། བདེ་འཇགས་ཐོན་སྐྱེད་ལ་མཐོང་ཆེན་བྱེད་པ། རྣམ་གྲངས་གལ་ཆེན་དོན་འཁྱོལ་ཡོང་བར་འགན་ལེན་བྱེད་པ་བཅས་བྱས་ཏེ་གཙོ་གནད་རྣམ་གྲངས་ཚད་བརྒལ་ཡོང་བར་བརྟེན་ནས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཏན་ཏིག་གཏོང་དགོས་ཞེས་གསུངས་པ་རེད།