ཚེས་21ཉིན་གྱི་སྔ་དྲོར། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་རེན་ཝེ་ཡིས་ལྗོངས་ཡོངས་ཀྱི་གཙོ་གནད་རྣམ་གྲངས་ཀྱི་བཀོད་སྒྲིག་སྐུལ་སྤེལ་ཚོགས་འདུ་གཙོ་སྐྱོང་གནང་ཞིང་། 2026ལོའི་ལྗོངས་ཡོངས་ཀྱི་གཙོ་གནད་རྣམ་གྲངས་ཀྱི་འཆར་གཞི་དང་དུས་ཚིགས་དང་པོའི་འགག་སྒྲོལ་བྱ་སྤྱོད་ཇུས་གཞིར་ཞིབ་འཇུག་གིས་འབྲེལ་ཡོད་ལས་དོན་བཀོད་སྒྲིག་གནང་བ་རེད།

རེན་ཝེ་ཡིས་བསྟན་དོན། 2026ལོ་ནི“ལོ་ལྔ་ཚན་བཅོ་ལྔ་པའི”འགོ་འཛུགས་ལོ་ཡིན་པས།2026ལོའི་དཔལ་འབྱོར་ལས་དོན་ཡག་པོ་བསྒྲུབ་རྒྱུ་གལ་འགངས་ཆེན་པོ་ཡིན། ས་གནས་ཁག་དང་སྡེ་ཚན་ཁག་གིས་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་རིམ་བྱུང་དང་དེ་བཞིན་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་དགོངས་དོན་ལག་བསྟར་ནན་ཏན་བྱས་ཏེ། རང་སྐྱོང་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་ལྟར་དམིགས་ཚད་དང་ལས་འགན་གཏན་འཁེལ་བྱས་ནས་ནུས་ཤུགས་ཡོད་རྒུས་རྣམ་གྲངས་མ་འཇོག་དོན་འཁྱོལ་ལ་དམ་འཛིན་གྱིས“ལོ་ལྔ་ཚན་བཅོ་ལྔ་པའི”འགོ་ཡག་པོ་འཛུགས་པ་དང་ཐོག་མའི་གོམ་སྟབས་ཡག་པོ་སྤོ་བར་འགན་ལེན་བྱེད་དགོས།

རེན་ཝེ་ཡིས་ནན་བཤད་གནང་དོན། རིམ་པ་ཁག་དང་སྡེ་ཚན་ཁག་གིས་རྣམ་གྲངས་མ་འཇོག་གི“གྲུ་རྡོའི”ནུས་པར་ངོས་འཛིན་གང་ལེགས་ཀྱིས་འདོན་སྤེལ་བྱས་ཏེ་མི་རྒྱུ་གཉིས་ཀྱི་མ་འཇོག་ཟུང་འབྲེལ་དམ་ཟབ་བྱ་རྒྱུར་སྐུལ་འདེད་གཏོང་བ་དང་། རྨང་གཞིའི་སྒྲིག་བཀོད་དང་། འཛད་སྤྱོད་རྒྱ་སྐྱེད། དམངས་འཚོ་ལེགས་གཏོང་། ཐོན་ལས་འཕེལ་རྒྱས་སོགས་འགག་རྩའི་ཁྱབ་ཁོངས་ལ་དམིགས་ཏེ་རྒྱུ་རྐྱེན་གཙོ་བོའི་འགན་ལེན་ཧུར་ཐག་བྱས་ནས་རྣམ་གྲངས་འཛུགས་སྐྲུན་ལ་ཞབས་འདེགས་ཞུ་དགོས། རྣམ་གྲངས་འཛུགས་སྐྲུན་གྱི་འབྱུང་རྩ་རྒྱ་ཆེར་བཏང་ནས་རྒྱལ་ཁབ་ཀྱི་མ་འཇོག་དང་། ཁེ་ལས་ཀྱི་མ་འཇོག དམངས་ཁྲོད་ཀྱི་མ་འཇོག་བཅས་ཀྱི་ཐབས་ལམ་གཙོ་བོའི་ནུས་པ་འདོན་སྤེལ་དང་། རྒྱལ་ཁབ་ཀྱིས་བོད་ལ་གནང་བའི་དམིགས་བསལ་སྲིད་ཇུས་རྣམ་གྲངས་ཀྱི་མ་དངུལ་རྒྱབ་སྐྱོར་གྱི་ནུས་པ་འདོན་སྤེལ་དང་དང་ལེན་ཡག་པོ། དགེ་མཚན་ལྡན་པའི་ནོར་སྲིད་སྲིད་ཇུས་ཀྱིས་མ་འཇོག་བརྟན་པོ་ཡོང་བའི་འབྲེལ་ཡོད་བཀོད་སྒྲིག་དོན་འཁྱོལ་ཡག་པོ་བཅས་བྱས་ཏེ་ཆེད་དོན་བུན་འཛིན་མ་དངུལ་བེད་སྤྱོད་ཡག་པོ་དང་། བེད་སྤྱོད་འདང་ངེས། བེད་སྤྱོད་གནད་སྨིན་བཅས་བྱེད་དགོས། རང་འགུལ་ངང་བརྩོན་ལེན་ཧུར་ཐག་བྱས་ཏེ“ལོ་ལྔ་ཚན་བཅོ་ལྔ་པའི”འཆར་འགོད་རྣམ་གྲངས་དོན་འཁྱོལ་བྱེད་མགྱོགས་སུ་གཏོང་བ་དང་། རྣམ་གྲངས་ཀྱི་དུས་འགོའི་ལས་དོན་གཏིང་ཟབ་དང་ཏན་ཏིག་སྒྲུབ་པ། རྣམ་གྲངས་གསོག་འཇོག་ཧུར་ཐག་བཅས་བྱས་ཏེ་རྣམ་གྲངས་འཛུགས་སྐྲུན་ལ་སྐུལ་འདེད་མགྱོགས་སུ་གཏོང་དགོས། འགན་འཁྲི་འཁུར་ཤུགས་ཆེ་རུ་བཏང་ནས་རྣམ་གྲངས་ཀྱི་སྐབས་བསྟུན་ལེགས་སྒྲིག་དང་བཀོད་གཏོང་ཡག་པོ་བྱས་ཏེ་རྣམ་གྲངས་འཛུགས་སྐྲུན་ལ་སྐུལ་འདེད་གཏོང་བ་དང་། དཔལ་འབྱོར་གྱི་སྤུས་ཚད་མཐོར་འདེགས་ནུས་ལྡན་དང་གྲངས་ཚད་ལུགས་མཐུན་ངང་འཕར་བར་སྐུལ་འདེད་གཏོང་དགོས།