ཀརྨ་ཚེ་བརྟན་གྱིས་རང་སྐྱོང་ལྗོངས་སྲིད་གཞུང་གི་རྒྱུན་ལས་ཚོགས་འདུ་གཙོ་སྐྱོང་གནང་བ།
ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཀརྨ་ཚེ་བརྟན་གྱིས་རང་སྐྱོང་ལྗོངས་སྲིད་གཞུང་གི་རྒྱུན་ལས་ཚོགས་འདུ་གཙོ་སྐྱོང་གནང་ནས། 2026ལོའི་རང་སྐྱོང་ལྗོངས་ཀྱི་གཙོ་གནད་རྣམ་གྲངས་བཀོད་སྒྲིག་དང་རང་སྐྱོང་ལྗོངས་ཀྱི་མཚན་ཉིད་རིག་པ་དང་སྤྱི་ཚོགས་ཚན་རིག་གི་ཕུལ་བྱུང་གྲུབ་འབྲས་བྱ་དགའ་སོགས་ཀྱི་ལས་དོན་ལ་ཞིབ་འཇུག་གནང་བ་རེད།
ཚོགས་འདུའི་ཐོག་བསྟན་དོན། རྣམ་གྲངས་འཛུགས་སྐྲུན་ནི་དཔལ་འབྱོར་འཕེལ་རྒྱས་ཀྱི་སྲོག་རྩ་དང་། མ་འཇོག་ནི་དཔལ་འབྱོར་འཕར་བར་སྣེ་ཁྲིད་བྱེད་པའི་སྒུལ་ཤུགས་གཙོ་བོ། རྣམ་གྲངས་ལ་དམ་འཛིན་བྱེད་པ་ནི་འཕེལ་རྒྱས་ལ་དམ་འཛིན་བྱེད་པ་དང་། མ་འཇོག་ལ་དམ་འཛིན་བྱེད་པ་ནི་འབྱུང་འགྱུར་ལ་དམ་འཛིན་བྱེད་པ་ཞིག་བཅས་ཡིན། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པ་དང་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱེད་པ་དང་། རང་སྐྱོང་ལྗོངས་ཏང་ཨུད་ཀྱི་བླང་བྱར་དམིགས་ནས་རྣམ་གྲངས་འཛུགས་སྐྲུན་གལ་ཆེན་གྱི་གནད་འགག་དམ་འཛིན་ནན་པོ་བྱེད་པ། འགན་འཁྲི་དོན་འཁྱོལ་བྱེད་ཤུགས་ཆེ་རུ་གཏོང་བ་དང་རྒྱུ་ཆ་གཙོ་བོ་འགན་ལེན་ལ་ཤུགས་སྣོན་རྒྱག་པ་བཅས་བྱས་ཏེ་གཙོ་གནད་རྣམ་གྲངས་སྔ་ཙམ་ལས་འགོ་འཛུགས་པ་དང་། སྔ་ཙམ་སྤྱོད་ཐུབ་པ། སྔ་ཙམ་ཕན་འབྲས་ཐོན་པ་བཅས་བྱེད་དགོས། “མ་དངུལ་བཏང་ཚེ་ངེས་པར་དུ་ཕན་འབྲས་ཐོན་པ་དང་ཕན་འབྲས་མ་ཐོན་ན་ངེས་པར་དུ་འགན་འཁྲི་བདའ་འདེད་གཏོང་བའི”འདུ་ཤེས་བརྟན་པོར་འཛུགས་པ་དང་། ལས་རྗེས་ལ་གདེང་འཇོག་དང་གྲུབ་འབྲས་ཉེར་སྤྱོད་ལ་ཤུགས་སྣོན་རྒྱག་པ། ནོར་སྲིད་མ་དངུལ་སྤྱོད་པའི་ཕན་འབྲས་ཆེ་རུ་གཏོང་བ་བཅས་བྱེད་དགོས། སྡེ་ཚན་དབར་མཐུན་སྦྱོར་དང་གཞོགས་འདེགས་བྱེད་ཤུགས་ཆེ་རུ་གཏོང་བ་དང་། རྣམ་གྲངས་ཀྱི་དུས་འཁོར་ཧྲིལ་པོའི་དོ་དམ་ལ་ཤུགས་སྣོན་རྒྱག་པ། བདེ་འཇགས་དང་སྤུས་ཚད་ལྟ་འདོམས་ནན་དུ་གཏོང་བ་བཅས་བྱས་ཏེ་ཞིབ་བཤེར་གྱི་ཉམས་སད་ཐེག་ཐུབ་པའི་འདུ་འགོད་རྩེ་གྲ་དང་ལོ་བརྒྱའི་འདུ་འགོད་གཏོད་དགོས།
ཚོགས་འདུའི་ཐོག་བསྟན་དོན། མཚན་ཉིད་རིག་པ་དང་སྤྱི་ཚོགས་ཚན་རིག་ནི་མི་རྣམས་ཀྱིས་འཇིག་རྟེན་ཤེས་རྟོགས་དང་འཇིག་རྟེན་སྒྱུར་བཀོད་བྱེད་པའི་ལག་ཆ་གལ་ཆེན་ཞིག་དང་ལོ་རྒྱུས་འཕེལ་རྒྱས་དང་སྤྱི་ཚོགས་ཡར་རྒྱས་ལ་སྐུལ་འདེད་གཏོང་བའི་སྟོབས་ཤུགས་གལ་ཆེན་ཞིག་རེད། ཡང་དག་པའི་རིན་ཐང་གི་ཁ་ཕྱོགས་དང་རིག་གཞུང་གི་སྟོན་ཕྱོགས་མཐའ་འཁྱོངས་བྱས་ཏེ་བོད་ཀྱི་ཁྱད་ཆོས་ལྡན་པའི་ལེགས་ཆའི་རིག་ཚན་བསྐྲུན་པར་ཤུགས་སྣོན་རྒྱག་པ་དང་། མ་ལག་དང་ཟུང་འབྲེལ་བྱས་ཏེ་བོད་འདི་ཉིད་གནའ་སྔ་མོ་ནས་བཟུང་མེས་རྒྱལ་གྱི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་པ་དང་མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་ཀྱི་ལོ་རྒྱུས་ཀྱི་དོན་དངོས་ལ་ཞིབ་འཇུག་སྔོག་འདོན་དང་། ལེགས་སྒྲིག དྲིལ་བསྒྲགས་བཅས་བྱེད་པ། རིག་གཞུང་གི་མ་རྩོམ་ནུས་པའི་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ། གྲུབ་འབྲས་གཞན་སྒྱུར་བེད་སྤྱོད་ལ་ཤུགས་སྣོན་རྒྱག་པ་བཅས་བྱས་ཏེ་བོད་ཀྱི་མཚན་ཉིད་རིག་པ་དང་སྤྱི་ཚོགས་ཚན་རིག་གི་ཤུགས་རྐྱེན་ནུས་པ་མུ་མཐུད་ཆེ་རུ་གཏོང་དགོས། རྒྱ་ཆེའི་སྤྱི་ཚོགས་ཚན་རིག་ལས་དོན་པ་ཚོས་རིག་གནས་ལ་བརྟེན་ནས་མི་སེམས་མགུ་བ་དང་། རིག་གནས་ལ་བརྟེན་ནས་མི་གསོ་སྐྱོང་བྱེད་པ། རིག་གནས་ལ་བརྟེན་ནས་རྩ་བ་བརྟན་གཏོང་བཅས་ཀྱི་འོས་འགན་ཏན་ཏིག་ཁུར་ཏེ་མང་ཚོགས་ཀྱི་དགོས་མཁོར་དམིགས་ནས་དོགས་གཞི་སེལ་བ་དང་། གནས་ལུགས་བརྗོད་པ། དོ་ཁུར་ཐག་གཅོད་བཅས་བྱས་ཏེ་གནས་ལུགས་ཁུངས་བཙན་གྱི་དཔྱད་རྩོམ་འབྲི་ཐུབ་པར་བྱེད་དགོས།
འབྲེལ་ཡོད་གསར་འགྱུར།