ཚེས་16ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཀརྨ་ཚེ་བརྟན་གྱིས་རང་སྐྱོང་ལྗོངས་སྲིད་གཞུང་གི་ཚང་འཛོམས་གྲོས་ཚོགས་གཙོ་སྐྱོང་གནང་ནས། རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་བཞི་པར་གྲོས་ཞིབ་དང་ཞིབ་བཤེར་ལ་འབུལ་རྩིས་ཡོད་པའི《སྲིད་གཞུང་གི་ལས་དོན་སྙན་སྒྲོན(ཞིབ་བཤེར་ལ་འབུལ་རྒྱུའི་མ་ཟིན)》དང་། 《བོད་རང་སྐྱོང་ལྗོངས་ཀྱི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་ཕྱོགས་ཀྱི་ལོ་ལྔ་ཚན་བཅོ་ལྔ་པའི་འཆར་འགོད་རྩ་གནད(འཆར་ཟིན)》 《བོད་རང་སྐྱོང་ལྗོངས་ཀྱི་2025ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འཆར་གཞི་ལག་བསྟར་བྱས་ཚུལ་དང་2026ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འཆར་གཞིའི་འཆར་ཟིན་གྱི་སྙན་སྒྲོན(ཞིབ་བཤེར་ལ་འབུལ་རྒྱུའི་མ་ཟིན)》 《བོད་རང་སྐྱོང་ལྗོངས་ཀྱི་2025ལོའི་སྔོན་རྩིས་ལག་བསྟར་བྱས་ཚུལ་དང་2026ལོའི་སྔོན་རྩིས་འཆར་ཟིན་སྐོར་གྱི་སྙན་སྒྲོན(ཞིབ་བཤེར་ལ་འབུལ་རྒྱུའི་མ་ཟིན)》བཅས་ལ་ཆེད་དོན་ཞིབ་འཇུག་བྱས་པ་རེད།

ཀརྨ་ཚེ་བརྟན་གྱིས་གསུངས་དོན། 2025ལོར། རང་སྐྱོང་ལྗོངས་ཏང་ཨུད་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་འོག ས་གནས་ཁག་དང་སྡེ་ཚན་ཁག་གིས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་ཕྱོགས་ཡོངས་ནས་ལག་བསྟར་བྱས་ཏེ། སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་དེ་བས་བྱས་པ་དང་། འཕྲལ་མར་སྒྲུབ་པ་དང་དངོས་འཛིན་དངོས་སྒྲུབ་ཀྱིས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གྲུབ་འབྲས་གསར་པ་རྒྱུན་མཐུད་ཐོབ་པར་སྐུལ་འདེད་བཏང་ནས། “ལོ་ལྔ་ཚན་བཅུ་བཞི་པའི”མཇུག་བདེ་བླག་ངང་བསྡུས་ཡོད།

ཀརྨ་ཚེ་བརྟན་གྱིས་ནན་བཤད་གནང་དོན། 2026ལོ་ནི“ལོ་ལྔ་ཚན་བཅོ་ལྔ་པའི”འཆར་འགོད་འགོ་ཚུགས་ལོ་ཡིན་པས། འགོ་འཛུགས་རྒྱུ་དེ་སྤྱི་ཡོངས་དང་འབྲེལ་བ་ཡོད་པ་དང་གོམ་པ་སྤོ་འགོ་ཚུགས་པ་དེས་རྗེས་མཐུད་ཀྱི་ལས་རིམ་ཐག་གཅོད་ཐུབ་ཀྱི་ཡོད། སྤུས་ཚད་མཐོ་པོས《སྲིད་གཞུང་གི་ལས་དོན་སྙན་སྒྲོན》གྱི་འཆར་ཟིན་ཡག་པོ་འགོད་པ་དང་། “ལོ་ལྔ་ཚན་བཅོ་ལྔ་པའི”འཆར་འགོད་རྩ་གནད་ཡག་པོ་བཟོ་བ། དམངས་འཚོའི་བྱ་བ་དངོས་དང་འཆར་གཞིའི་སྔོན་རྩིས་བཀོད་སྒྲིག་ཡག་པོ་བྱེད་པ་བཅས་ནི“ལོ་ལྔ་ཚན་བཅོ་ལྔ་པ”འགོ་ཡག་པོ་འཛུགས་རྒྱུའི་ངོས་ནས་བརྗོད་ན་དོན་སྙིང་གལ་ཆེན་ལྡན་ཡོད། “གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པ་དང་། “སྲུང་སྐྱོང་གཉིས”མཐའ་གཅིག་ཏུ་ཐུབ་པར་བྱེད་པ། “དོན་ཆེན་བཞི”དོན་འཁྱོལ་ལ་དམ་པོར་དམིགས་པ། རང་འགུལ་ངང་ཚད་གཞི་དང་ཡང་ཡང་བསྡུར་བ། ཕྱོགས་ཁག་གི་བསམ་འཆར་དང་གྲོས་འགོ་རྒྱ་ཁྱབ་ངང་ཉན་པ་དང་བསྡུ་ལེན་གང་ལེགས་བཅས་བྱས་ཏེ་སྔར་བས་བཟོ་བཅོས་དང་འཐུས་སྒོ་ཚང་དུ་གཏོང་དགོས། 《རྩ་གནད་འཆར་ཟིན》དང་། འཆར་གཞིའི་སྙན་སྒྲོན། སྔོན་རྩིས་སྙན་སྒྲོན་བཅས་དང་སྲིད་གཞུང་གི་ལས་དོན་སྙན་སྒྲོན་སྦྲེལ་མཐུད་ཡག་པོ་བྱས་ཏེ། གོང་འོག་འབྲེལ་མཐུད་དང་མཐུན་སྦྱོར་མཉམ་འགུལ་ཡོང་བར་འགན་ལེན་གྱིས་ཀྲུང་དབྱང་གི་དགོངས་དོན་སྔར་བས་ལག་བསྟར་ཡག་པོ་དང་། བོད་ཀྱི་དོན་དངོས་དང་འཚམ་པ། མི་དམངས་ཀྱི་རེ་སྒུག་དང་མཐུན་པ་བཅས་ཡོང་བར་བྱེད་དགོས།

ཀརྨ་ཚེ་བརྟན་གྱིས་ནན་བཤད་གནང་དོན། “ལས་སྒྲུབ”མཐའ་འཁྱོངས་བྱས་ཏེ་ལས་འགན་དོན་འཁྱོལ་ལ་སྐུལ་འདེད་གཏོང་བའི་ཐད་སླར་ཡང་ཤུགས་སྣོན་བརྒྱབ་ནས། “ལོ་ལྔ་ཚན་བཅོ་ལྔ་པའི”འགོ་ཚུགས་ཀྱི་འགག་རྩའི་ལྷུ་ཚིགས་ལ་དམ་པོར་དམིགས་ཏེ་ཇུས་འགོད་ནན་ཏན་དང་བརྒྱུད་རིམ་ལྡན་པའི་བཀོད་སྒྲིག་བྱེད་པ་དང་། སྔོན་ཚུད་ནས་གྲ་སྒྲིག་ཡག་པོ་བྱེད་པ། རང་འགུལ་དམག་འཐབ་ཡག་པོ་རྒྱག་པ་བཅས་བྱེད་དགོས། དཔལ་འབྱོར་འཁོར་སྐྱོད་ལ་དམ་པོར་དམིགས་པ་དང་། སྲིད་ཇུས་ཀྱི་ཕན་ནུས་གང་ལེགས་འདོན་པ། ནུས་ལྡན་གྱི་མ་འཇོག་རྒྱ་ཆེར་ཧུར་ཐག་གཏོང་བ། ཡུལ་བབ་དང་བསྟུན་ནས་ས་མཐོའི་ཁྱད་ལྡན་ལེགས་ཆའི་ཐོན་ལས་འཕེལ་རྒྱས་གཏོང་བ། འཛད་སྤྱོད་ཀྱི་མི་མངོན་པའི་སྟོབས་ཤུགས་རྒྱུན་མཐུད་འཕེལ་བར་བྱེད་པ། ཚོང་གཉེར་ཁོར་ཡུག་ཟམ་མི་ཆད་པར་ལེགས་སུ་གཏོང་བ་བཅས་བྱས་ཏེ། དུས་ཚིགས་དང་པོར“འགོ་འཛུགས་བཀྲ་ཤིས”ཡོང་བའི་བརྩོན་ལེན་བྱེད་དགོས། མི་སྐྱོང་མ་འཇོག་དང་དངོས་པོའི་མ་འཇོག་ཟུང་དུ་འབྲེལ་རྒྱུ་མཐའ་འཁྱོངས་དང་། སེམས་ནུས་དང་བརྩེ་སེམས་ལ་བརྟེན་ནས་དམངས་འཚོ་འགན་ལེན་དང་ལེགས་སུ་བཏང་སྟེ། འཕེལ་རྒྱས་ཀྱི་གྲུབ་འབྲས་ཀྱིས་ལྗོངས་ཡོངས་ཀྱི་མི་རིགས་ཁག་གི་མི་དམངས་ལ་དེ་བས་མང་བ་དང་དེ་བས་དྲང་གཞག་ངང་ཕན་པ་ཐོབ་པར་བྱས་ཏེ་ཀྲུང་ཧྭ་མི་རིགས་གཅིག་མཐུན་ཚོགས་པ་མཉམ་འཛུགས་དང་མཛེས་སྡུག་ལྡན་པའི་བོད་ལྗོངས་ཀྱི་ལེའུ་གསར་པ་རྩོམ་པར་མཉམ་ཤུགས་ཆེན་པོ་གཅིག་ཏུ་སྒྲིལ་དགོས།