(1999ལོའི་ཟླ་4ཚེས་1ཉིན་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བདུན་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་དྲུག་པའི་ཐོག་གྲོས་འཆམ་བྱུང་བ། 2002ལོའི་ཟླ་དང་པོའི་ཚེས་20ཉིན་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བདུན་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་ཉེར་བཞི་པའི་ཐོག་དག་བཅོས་ཐེངས་དང་པོ་བྱས། 2011ལོའི་ཟླ་11ཚེས་24ཉིན་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་དགུ་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་ཉེར་ལྔ་པའི་ཐོག《〈བོད་རང་སྐྱོང་ལྗོངས་ཀྱི་ཆུ་བེད་ལས་གྲྭའི་དོ་དམ་སྲོལ་ཡིག〉སོགས་ཁྲིམས་སྲོལ་ཁག་8ལ་བཟོ་བཅོས་རྒྱག་རྒྱུའི་སྐོར་གྱི་གཏན་འབེབས》གཞིར་བཟུང་དག་བཅོས་ཐེངས་གཉིས་པ་བྱས། 2025ལོའི་ཟླ་5ཚེས་27ཉིན་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་བཅུ་བདུན་པའི་ཐོག《〈བོད་རང་སྐྱོང་ལྗོངས་ཀྱི་ཐོག་ཟོན་གེགས་སེལ་སྲོལ་ཡིག〉སོགས་ས་གནས་རང་བཞིན་གྱི་ཁྲིམས་སྲོལ་11ལ་བཟོ་བཅོས་རྒྱག་རྒྱུ་དང〈བོད་རང་སྐྱོང་ལྗོངས་ཀྱི་ས་གཤིས་ཁོར་ཡུག་དོ་དམ་སྲོལ་ཡིག〉མེད་པ་བཟོ་རྒྱུའི་སྐོར་གྱི་གཏན་འབེབས》གཞིར་བཟུང་དག་བཅོས་ཐེངས་གསུམ་པ་བྱས)

དཀར་ཆག

ལེའུ་དང་པོ། སྤྱིའི་རྩ་དོན།

ལེའུ་གཉིས་པ། གཏེར་རྫས་ཐོན་ཁུངས་རྩད་ཞིབ།

ལེའུ་གསུམ་པ། གཏེར་རྫས་ཐོན་ཁུངས་སྔོག་འདོན།

ལེའུ་བཞི་པ། གཏེར་ཁ་འཚོལ་དབང་དང་གཏེར་ཁ་འདོན་དབང་འཚོང་བཤུག

ལེའུ་ལྔ་པ། མཉམ་སྡེབ་གཏེར་རིའི་ཁེ་ལས་དང་ཁེར་རྐྱང་གཏེར་འདོན།

ལེའུ་དྲུག་པ། གཏེར་རྫས་ཐོན་ཁུངས་སྲུང་སྐྱོབ་དང་དོ་དམ།

ལེའུ་བདུན་པ། བཅའ་ཁྲིམས་ཀྱི་འགན་འཁྲི།

ལེའུ་བརྒྱད་པ། ཞར་བྱུང་།

ལེའུ་དང་པོ། སྤྱིའི་རྩ་དོན།

དོན་ཚན་དང་པོ། གཏེར་རྫས་ཐོན་ཁུངས་རྩད་ཞིབ་དང་། གསར་སྤེལ་བེད་སྤྱོད། སྲུང་སྐྱོབ་དོ་དམ་བཅས་བྱ་རྒྱུར་ཤུགས་སྣོན་རྒྱག་པ་དང་། གཏེར་ལས་སྒྲིག་ལམ་སྲུང་སྐྱོང་བྱས་ཏེ་དཔལ་འབྱོར་གོང་འཕེལ་འགྲོ་རྒྱུར་སྐུལ་འདེད་གཏོང་ཆེད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གཏེར་རྫས་ཐོན་ཁུངས་བཅའ་ཁྲིམས》དང་འབྲེལ་ཡོད་བཅའ་ཁྲིམས་དང་ཁྲིམས་སྲོལ་གཞིར་བཟུང་རང་སྐྱོང་ལྗོངས་ཀྱི་དོན་དངོས་དང་ཟུང་འབྲེལ་གྱིས་སྲོལ་ཡིག་འདི་བཟོས་པ་ཡིན།

དོན་ཚན་གཉིས་པ། རང་སྐྱོང་ལྗོངས་ཀྱི་སྲིད་འཛིན་ས་ཁོངས་སུ་གཏེར་རྫས་ཐོན་ཁུངས་རྩད་ཞིབ་དང་གསར་སྤེལ་བེད་སྤྱོད་བྱེད་མཁན་ཚན་པ་དང་། མི་སྒེར། དེ་བཞིན་ས་གཤིས་གཏེར་རྫས་ལྟ་ཞིབ་དོ་དམ་སྡེ་ཚན་བཅས་ཀྱིས་ངེས་པར་དུ་སྲོལ་ཡིག་འདིར་སྲུང་བརྩི་ཞུ་དགོས།

དོན་ཚན་གསུམ་པ། གཏེར་རྫས་ཐོན་ཁུངས་ནི་རྒྱལ་ཁབ་ལ་དབང་བ་ཡིན། ས་ངོས་སམ་ཡང་ན་ས་འོག་གི་གཏེར་རྫས་ཐོན་ཁུངས་ཀྱི་བདག་དབང་རྒྱལ་ཁབ་ལ་ཡོད་པས་གཏེར་རྫས་ཡོད་སའི་ས་ཆའི་བདག་དབང་ངམ་ཡང་ན་བེད་སྤྱོད་གཏོང་དབང་སུ་ལ་ཡོད་རུང་དེར་འགྱུར་བ་གཏོང་རྒྱུ་མེད།

རིམ་ཁག་མི་དམངས་སྲིད་གཞུང་གིས་ངེས་པར་དུ་འགོ་ཁྲིད་བྱ་རྒྱུར་ཤུགས་སྣོན་བརྒྱབ་སྟེ་གཏེར་རྫས་ཐོན་ཁུངས་ལུགས་མཐུན་གསར་སྤེལ་བེད་སྤྱོད་བྱེད་ཐུབ་པའི་འགན་སྲུང་བྱེད་དགོས་པ་ལས། རྩ་འཛུགས་གང་ཞིག་གམ་ཡང་ན་མི་སྒེར་སུ་ཞིག་ཡིན་རུང་གཏེར་རྫས་ཐོན་ཁུངས་ཧམ་བཟུང་བྱེད་པ་དང་། གཏོར་བཤིག་གཏོང་བའམ་ཡང་ན་ཐབས་ཚུལ་འགྱུར་བའི་ཉོ་ཚོང་བྱེད་པ་བཅས་བྱེད་མི་ཆོག

དོན་ཚན་བཞི་པ། རིམ་ཁག་མི་དམངས་སྲིད་གཞུང་གིས་གཏེར་རྫས་ཐོན་ཁུངས་རྩད་ཞིབ་དང་གསར་སྤེལ་བྱེད་སྐབས་ངེས་པར་དུ་གཅིག་གྱུར་འཆར་འགོད་དང་། ལུགས་མཐུན་བཀོད་སྒྲིག ཕྱོགས་བསྡུས་འཚོལ་ཞིབ། ལུགས་མཐུན་སྔོག་འདོན། ཕྱོགས་བསྡུས་བེད་སྤྱོད་བཅས་བྱེད་པའི་མཛད་ཕྱོགས་ལག་བསྟར་བྱེད་དགོས།

རང་སྐྱོང་ལྗོངས་མི་དམངས་སྲིད་གཞུང་གིས་བཟོས་པའི་གཏེར་རྫས་ཐོན་ཁུངས་གསར་སྤེལ་བེད་སྤྱོད་བྱེད་ཕྱོགས་ཀྱི་འཆར་འགོད་དེ་ངེས་པར་དུ་རྒྱལ་དམངས་དཔལ་འབྱོར་དང་སྤྱི་ཚོགས་གོང་འཕེལ་གཏོང་ཕྱོགས་ཀྱི་འཆར་གཞིའི་ནང་འཇུག་དགོས།

རང་སྐྱོང་ལྗོངས་ཀྱི་སྲིད་འཛིན་ས་ཁོངས་ནང་གཏེར་རྫས་ཐོན་ཁུངས་གསར་སྤེལ་བྱས་ཕྱིན་ངེས་པར་དུ་ས་གནས་དང་གཏེར་ཁ་ཡོད་སའི་མང་ཚོགས་ཀྱི་ཁེ་ཕན་ལ་ལྟ་རྟོག་ཐུབ་པ་བྱས་ནས་ས་གནས་ཀྱི་དཔལ་འབྱོར་གོང་འཕེལ་དང་སྤྱི་ཚོགས་ཡར་ཐོན་ཡོང་རྒྱུར་སྐུལ་འདེད་གཏོང་དགོས།

དོན་ཚན་ལྔ་པ། རང་སྐྱོང་ལྗོངས་མི་དམངས་སྲིད་གཞུང་གིས་བཅའ་ཁྲིམས་ཀྱི་གཏན་འབེབས་དང་རྒྱལ་ཁབ་ཀྱི་གཅིག་གྱུར་འཆར་འགོད་ལྟར་ས་གནས་དེ་གས་གསར་སྤེལ་བྱས་པའི་གཏེར་རྫས་ཐོན་ཁུངས་རིགས་ངེས་པར་དུ་སྔོན་ལ་ལུགས་མཐུན་གསར་སྤེལ་བེད་སྤྱོད་བྱས་ན་འགྲིག

ཐག་རིང་ལུང་ཁུག་དང་དབུལ་ཕོངས་ས་ཁུལ་གྱིས་གཏེར་ལས་གསར་སྤེལ་ལས་ཀ་བྱེད་པར་རིམ་ཁག་མི་དམངས་སྲིད་གཞུང་གིས་ངེས་པར་དུ་སྐུལ་ལྕག་དང་། རོགས་སྐྱོར། ཁྲིད་སྟོན་བཅས་ཧུར་ཐག་བྱེད་དགོས།

དོན་ཚན་དྲུག་པ། གཏེར་རྫས་ཐོན་ཁུངས་རྩད་ཞིབ་དང་སྔོག་འདོན་བྱེད་མཁན་རིགས་ལ་ངེས་པར་དུ་རྒྱལ་ཁབ་དང་རང་སྐྱོང་ལྗོངས་ཀྱིས་གཏན་འབེབས་བྱས་པའི་འོས་ཐོབ་ཀྱི་ཆ་རྐྱེན་འཛོམས་དགོས་པའི་ཐོག་ཁྲིམས་ལྟར་ཁག་སོ་སོར་རེ་འདུན་ཞུ་དགོས་པ་དང་། ཆོག་མཆན་ཐོབ་རྗེས་གཏེར་ཁ་འཚོལ་དབང་དང་གཏེར་ཁ་འདོན་དབང་ཡོད།

རིམ་ཁག་མི་དམངས་སྲིད་གཞུང་གིས་ངེས་པར་དུ་གཏེར་ཁ་འཚོལ་དབང་དང་གཏེར་ཁ་འདོན་དབང་ལ་སྲུང་སྐྱོབ་བྱས་ཏེ་བཙན་གནོད་མི་ཕོག་པ་བྱེད་དགོས་པ་དང་། སྲིད་འཛིན་ས་ཁོངས་ནང་གི་གཞུང་ཁོངས་གཏེར་རིའི་ཁེ་ལས་དང་གཏེར་རིའི་ཁེ་ལས་གཞན་དག་གི་གཏེར་ཁུལ་ས་ཁོངས་ནང་གི་རྒྱུན་ལྡན་སྒྲིག་ལམ་ལ་སྲུང་སྐྱོང་བྱེད་དགོས།

དོན་ཚན་བདུན་པ། གཏེར་ཁ་འཚོལ་དབང་དང་གཏེར་ཁ་འདོན་དབང་རིན་དོད་ཡོད་པའི་ཐོག་ནས་ཐོབ་པ་བྱེད་པའི་ལམ་ལུགས་ལག་བསྟར་བྱ་རྒྱུ། གཏེར་ཁ་འཚོལ་དབང་དང་གཏེར་ཁ་འདོན་དབང་རིན་དོད་ཡོད་པའི་ཐོག་ནས་ཐོབ་པ་བྱེད་པའི་གྲོན་དངུལ་དེ་རྒྱལ་ཁབ་དང་རང་སྐྱོང་ལྗོངས་ཀྱི་གཏན་འབེབས་བཞིན་ལག་བསྟར་བྱ་རྒྱུ་དང་། གཏན་འབེབས་ལྟར་གྲོན་དངུལ་ཆག་ཡང་དང་རྩ་ཆག་གཏོང་རྒྱུའི་རེ་འདུན་ཞུས་ནའང་འགྲིག

རྒྱལ་ཁབ་དང་རང་སྐྱོང་ལྗོངས་ཀྱིས་དམིགས་འཛུགས་བྱས་པའི་གཏེར་ཁ་འཚོལ་དབང་དང་གཏེར་ཁ་འདོན་དབང་ཕུད། ད་དུང་འོས་སྐུལ་དང་འོས་དཔོད་བྱེད་སྟངས་ལ་བརྟེན་ནས་གཏེར་ཁ་འཚོལ་དབང་དང་གཏེར་ཁ་འདོན་དབང་ལེགས་འདེམས་ཐོག་འོས་ཐོན་བྱུང་ཁོངས་སུ་གཏན་འཁེལ་བྱས་ན་འགྲིག

གཏེར་རྫས་ཐོན་ཁུངས་སྔོག་འདོན་བྱེད་སྐབས་ངེས་པར་དུ་རྒྱལ་ཁབ་དང་རང་སྐྱོང་ལྗོངས་ཀྱི་གཏན་འབེབས་གཞིར་བཟུང་ཐོན་ཁུངས་ཀྱི་དཔྱ་ཁྲལ་དང་ཐོན་ཁུངས་ཀྱི་ཟད་གྲོན་གསབ་དངུལ་འཇལ་དགོས།

ཁྲིམས་ལྟར་ཐོབ་པའི་གཏེར་ཁ་འཚོལ་དབང་དང་གཏེར་ཁ་འདོན་དབང་དེ་ཆོག་མཆན་ཐོབ་པ་བརྒྱུད་ཁྲིམས་ལྟར་མི་གཞན་ལ་འཚོང་བཤུག་བཏང་ན་འགྲིག་ཀྱང་གཏེར་ཁ་འཚོལ་དབང་དང་གཏེར་ཁ་འདོན་དབང་བར་འཚོང་བརྒྱབ་སྟེ་ཁྲིམས་འགལ་གྱི་ཁེ་འབབ་རག་ཐབས་བྱེད་རིགས་ནན་འགོག་བྱེད་དགོས།

དོན་ཚན་བརྒྱད་པ། རྒྱལ་ཁབ་ཕྱི་ནང་གི་མ་རྩ་གཏོང་མཁན་གྱིས་ཁྲིམས་ལྟར་སྲིད་འཛིན་ས་ཁོངས་དེ་གའི་ནང་གཏེར་རྫས་ཐོན་ཁུངས་རྩད་ཞིབ་དང་སྔོག་འདོན་བྱ་རྒྱུའི་སྐུལ་ལྕག་གཏོང་དགོས།

དོན་ཚན་དགུ་པ། རིམ་ཁག་མི་དམངས་སྲིད་གཞུང་གིས་གཏེར་རྫས་ཐོན་ཁུངས་སྲུང་སྐྱོབ་དང་། རྩད་ཞིབ། གསར་སྤེལ་བཅས་བྱ་རྒྱུའི་ཚན་རྩལ་ཞིབ་འཇུག་ལ་སྐུལ་འདེད་གཏོང་རྒྱུ་དང་སྔོན་ཐོན་གྱི་ལག་རྩལ་ཁྱབ་གདལ་གཏོང་རྒྱུ། གཏེར་རྫས་ཐོན་ཁུངས་རྩད་ཞིབ་དང་གསར་སྤེལ་བྱ་རྒྱུའི་ཚན་རིག་ལག་རྩལ་གྱི་གནས་ཚད་མཐོ་རུ་གཏོང་རྒྱུ་མ་ཟད། གྲུབ་འབྲས་གཟེངས་སུ་ཐོན་མཁན་གྱི་ཚན་པ་དང་མི་སྒེར་ལ་བྱ་དགའ་སྤྲོད་དགོས།

དོན་ཚན་བཅུ་པ། གཏེར་རྫས་ཐོན་ཁུངས་རྩད་ཞིབ་དང་སྔོག་འདོན་བྱེད་སྐབས་ངེས་པར་དུ་ས་ཆ་གྲོན་ཆུང་གིས་སྤྱད་དེ་ཁོར་ཡུག་ལ་སྲུང་སྐྱོབ་དང་། གནོད་འཚེ་འགོག་བཅོས། ས་ཆུ་སྲུང་འཛིན། ས་ཞིང་བསྐྱར་སྦོལ། སྐྱེ་དངོས་བསྐྱར་འདེབས་བཅས་ཀྱི་ལས་ཀར་ཤུགས་སྣོན་རྒྱག་དགོས།

དོན་ཚན་བཅུ་གཅིག་པ། རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་གྱིས་སྲིད་འཛིན་ས་ཁོངས་དེ་གའི་ནང་དུ་གཏེར་རྫས་ཐོན་ཁུངས་རྩད་ཞིབ་དང་སྔོག་འདོན་བྱ་རྒྱུའི་ཐད་ལྟ་སྐུལ་དོ་དམ་གྱི་ལས་ཀའི་འགན་འཁུར་རྒྱུ། རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་གྱིས་གཏེར་རྫས་ཐོན་ཁུངས་རྩད་ཞིབ་དང་སྔོག་འདོན་བྱ་རྒྱུའི་ཐད་ལྟ་སྐུལ་དོ་དམ་ཀྱི་ལས་ཀ་བྱེད་པར་རང་སྐྱོང་ལྗོངས་མི་དམངས་སྲིད་གཞུང་གི་འབྲེལ་ཡོད་གཙོ་འགན་སྡེ་ཚན་གྱིས་གཞོགས་འདེགས་བྱ་རྒྱུ།

གྲོང་ཁྱེར(ས་ཁུལ)དང་རྫོང་རིམ་པའི་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་གྱིས་སྲིད་འཛིན་ས་ཁོངས་དེ་གའི་ནང་དུ་གཏེར་རྫས་ཐོན་ཁུངས་རྩད་ཞིབ་དང་སྔོག་འདོན་བྱ་རྒྱུའི་ཐད་ལྟ་སྐུལ་དོ་དམ་གྱི་ལས་ཀའི་འགན་འཁུར་རྒྱུ། གྲོང་ཁྱེར(ས་ཁུལ)དང་རྫོང་རིམ་པའི་མི་དམངས་སྲིད་གཞུང་གི་འབྲེལ་ཡོད་གཙོ་འགན་སྡེ་ཚན་གྱིས་རིམ་པ་གཅིག་མཚུངས་ཀྱི་ས་གཤིས་གཏེར་རྫས་གཙོ་འགན་སྡེ་ཚན་གྱིས་གཏེར་རྫས་ཐོན་ཁུངས་རྩད་ཞིབ་དང་སྔོག་འདོན་བྱ་རྒྱུའི་ཐད་ལྟ་སྐུལ་དོ་དམ་གྱི་ལས་ཀ་བྱེད་པར་གཞོགས་འདེགས་བྱ་རྒྱུ།

ལེའུ་གཉིས་པ། གཏེར་རྫས་ཐོན་ཁུངས་རྩད་ཞིབ།

དོན་ཚན་བཅུ་གཉིས་པ། གཏེར་རྫས་ཐོན་ཁུངས་རྩད་ཞིབ་བྱེད་སྐབས་གཅིག་གྱུར་གྱི་ས་ཁོངས་སུ་ཐོ་འགོད་དོ་དམ་བྱེད་པའི་ལམ་ལུགས་ལག་བསྟར་བྱ་རྒྱུ།

རང་སྐྱོང་ལྗོངས་མི་དམངས་སྲིད་གཞུང་གི་ས་གཤིས་གཏེར་རྫས་གཙོ་འགན་སྡེ་ཚན་གྱིས་གཏན་འབེབས་ཀྱི་དབང་ཚད་དང་རྒྱལ་སྲིད་སྤྱི་ཁྱབ་ཁང་གི་ས་གཤིས་གཏེར་རྫས་གཙོ་འགན་སྡེ་ཚན་གྱིས་དབང་ཆ་སྤྲད་པ་གཞིར་བཟུང་སྲིད་འཛིན་ས་ཁོངས་དེ་གའི་ནང་གི་གཏེར་རྫས་ཐོན་ཁུངས་རྩད་ཞིབ་ཀྱི་ཐོ་འགོད་དོ་དམ་ལས་ཀར་འགན་འཁུར་རྒྱུ།

རང་སྐྱོང་ལྗོངས་མི་དམངས་སྲིད་གཞུང་གི་ས་གཤིས་གཏེར་རྫས་གཙོ་འགན་སྡེ་ཚན་གྱིས་གནས་ཚུལ་དངོས་ལ་གཞིགས་ཏེ་གཏེར་རྫས་ཐོན་ཁུངས་རྩད་ཞིབ་བྱ་རྒྱུའི་རྣམ་གྲངས་ཁག་གཅིག་གྲོང་ཁྱེར་མི་དམངས་སྲིད་གཞུང་དང་ས་གནས་སྲིད་འཛིན་ཀུང་ཧྲུའུ་ཡི་ས་གཤིས་གཏེར་རྫས་གཙོ་འགན་སྡེ་ཚན་ལ་ཞིབ་མཆན་ཐོ་འགོད་བྱ་རྒྱུ་དང་རྩད་ཞིབ་འཁྲོལ་འཛིན་སྤྲོད་རྒྱུའི་དབང་ཆ་སྤྲད་ན་འགྲིག

ཐོ་འགོད་དོ་དམ་ལས་ཁུངས་ཀྱིས་རྩད་ཞིབ་ཀྱི་ཐོ་འགོད་འགྲོ་ལུགས་བསྒྲུབས་རྗེས་འབྲེལ་ཡོད་དཔྱད་ཡིག་རྣམས་ངེས་པར་དུ་དུས་བཀག་ནང་རིམ་པ་གོང་མའི་ས་གཤིས་གཏེར་རྫས་གཙོ་འགན་སྡེ་ཚན་ལ་སྙན་དཔོད་ཞུ་དགོས།

དོན་ཚན་བཅུ་གསུམ་པ། གཏེར་ཁ་འཚོལ་དབང་གི་རེ་འདུན་ཞུ་མཁན་ནི་གཏེར་རྫས་ཐོན་ཁུངས་རྩད་ཞིབ་བྱ་རྒྱུའི་ཐད་མ་དངུལ་གཏོང་མཁན་དེ་ཡིན་པ་དང་། རྒྱལ་ཁབ་དང་རང་སྐྱོང་ལྗོངས་ཀྱིས་མ་དངུལ་བཏང་ནས་རྩད་ཞིབ་བྱེད་པའི་གཏེར་ཁ་འཚོལ་དབང་གི་རེ་འདུན་ཞུ་མཁན་ནི་རྩད་ཞིབ་མངགས་བཅོལ་དང་ལེན་བྱེད་མཁན་ཚན་པ་དེ་ཡིན།

དོན་ཚན་བཅུ་བཞི་པ། གཏེར་ཁ་འཚོལ་དབང་རེ་འདུན་ཞུ་མཁན་གྱིས་གཏེར་ཁ་འཚོལ་དབང་རེ་འདུན་ཞུ་སྐབས་ངེས་པར་དུ་ཐོ་འགོད་དོ་དམ་བྱེད་མཁན་ལས་ཁུངས་ལ་གཤམ་གསལ་གྱི་དཔྱད་ཡིག་འབུལ་དགོས་པ་སྟེ།

(གཅིག)རྩད་ཞིབ་བྱེད་མཁན་ཚན་པའི་ས་གཤིས་རྩད་ཞིབ་ཀྱི་འོས་བབ་ལག་ཁྱེར་དང་།

(གཉིས)རྩད་ཞིབ་བྱ་རྒྱུའི་རྣམ་གྲངས་ཀྱི་མ་དངུལ་ཡོང་ཁུངས་དཔང་ཡིག

(གསུམ)རེ་ཞུའི་ཐོ་འགོད་ཡི་གེ་དང་ས་ཆ། རེ་ཞུའི་ཁུལ་ཁོངས་ཀྱི་ས་བཀྲ།

(བཞི)རྩད་ཞིབ་ལས་ཀའི་འཆར་གཞི་དང་རྩད་ཞིབ་ཀྱི་གན་རྒྱའམ་ཡང་ན་རྩད་ཞིབ་མངགས་བཅོལ་བྱས་པའི་དཔང་ཡིག

(ལྔ)རྩད་ཞིབ་བྱ་རྒྱུའི་ཇུས་གཞི་དང་ཞར་བྱུང་ཡིག་ཆ།

(དྲུག)རྒྱལ་ཁབ་དང་རང་སྐྱོང་ལྗོངས་ཀྱི་ས་གཤིས་གཏེར་རྫས་གཙོ་འགན་སྡེ་ཚན་གྱི་གཏན་འབེབས་བཞིན་འབུལ་དགོས་པའི་དཔྱད་ཡིག་གཞན་དག་བཅས་སོ།

དོན་ཚན་བཅོ་ལྔ་པ། ཐོ་འགོད་དོ་དམ་ལས་ཁུངས་ཀྱིས་ངེས་པར་དུ་རེ་འདུན་ཞུ་ཡིག་འབྱོར་ཉིན་ནས་བཟུང་ཉིན་བཞི་བཅུའི་ནང་ཚུན་དུ་རེ་འདུན་ཞུ་ཡིག་སྔ་རྟིང་གི་རྩ་དོན་ལྟར་ཐོ་འགོད་ཆོག་མིན་གཏན་འཁེལ་བྱེད་དགོས་པ་མ་ཟད། གཏེར་ཁ་འཚོལ་དབང་གི་རེ་འདུན་ཞུ་མཁན་ལ་བརྡ་ཐོ་གཏོང་དགོས།

ཐོ་འགོད་བྱས་ཆོག་པའི་གཏེར་ཁ་འཚོལ་དབང་རེ་འདུན་ཞུ་མཁན་གྱིས་ངེས་པར་དུ་བརྡ་ཐོ་འབྱོར་ཉིན་ནས་བཟུང་ཉིན་སུམ་ཅུའི་ནང་ཚུན་དུ་ཐོ་འགོད་དོ་དམ་ལས་ཁུངས་ལ་གཏེར་ཁ་འཚོལ་དབང་བེད་སྤྱོད་བྱེད་གྲོན་དང་། དེ་བཞིན་རྒྱལ་ཁབ་དང་རང་སྐྱོང་ལྗོངས་ཀྱིས་གཏེར་ཁ་རྩད་ཞིབ་བྱ་རྒྱུར་མ་དངུལ་བཏང་ནས་ཐོབ་པའི་གཏེར་ཁ་འཚོལ་དབང་གི་རིན་དངུལ་འབུལ་དགོས་པའི་ཐོག་ཐོ་འགོད་འགྲོ་ལུགས་སྒྲུབ་དགོས་པ་དང་རྩད་ཞིབ་འཁྲོལ་འཛིན་བླངས་ནས་གཏེར་ཁ་འཚོལ་དབང་ཡོད་པ་བྱ་རྒྱུ།

གཏེར་ཁ་འཚོལ་དབང་བེད་སྤྱོད་བྱེད་གྲོན་དང་གཏེར་ཁ་འཚོལ་དབང་གི་རིན་དངུལ་དེ་རྒྱལ་ཁབ་ཀྱིས་གཏན་འབེབས་བྱས་པའི་ཆག་ཡང་དང་རྩ་ཆག་གཏོང་རྒྱུའི་ཆ་རྐྱེན་དང་མཐུན་ཚེ་གཏེར་ཁ་འདོན་དབང་རེ་འདུན་ཞུ་མཁན་གྱིས་རེ་འདུན་ཞུས་པ་བརྒྱུད་ཐོ་འགོད་དོ་དམ་ལས་ཁུངས་ཀྱིས་ཞིབ་བཤེར་ཆོག་མཆན་སྤྲད་རྗེས་ཆག་ཡང་དང་རྩ་ཆག་བཏང་ན་འགྲིག

ཐོ་འགོད་དོ་དམ་ལས་ཁུངས་ཀྱིས་ཐོ་འགོད་མ་བྱས་པ་རྣམས་ངེས་པར་དུ་གཏེར་ཁ་འཚོལ་དབང་རེ་འདུན་ཞུ་མཁན་ལ་ཡིག་ཐོག་ནས་རྒྱུ་མཚན་གསལ་བཤད་བྱེད་དགོས།

དོན་ཚན་བཅུ་དྲུག་པ། གཏེར་ཁ་འཚོལ་དབང་ཡོད་མཁན་གྱིས་རྩད་ཞིབ་བྱ་རྒྱུའི་ཆོག་མཆན་ཐོབ་པའི་རྩད་ཞིབ་བྱེད་ཁོངས་ནང་རྩད་ཞིབ་ཀྱི་ལས་ཀ་བྱེད་དབང་ཡོད་པ་དང་རྩད་ཞིབ་བྱེད་ཁོངས་ནང་ནས་གཏེར་རིགས་སྔོན་ལ་རྙེད་མཁན་དེར་སྔོན་ལ་གཏེར་ཁ་འཚོལ་དབང་དང་སྔོག་འདོན་བྱེད་དབང་ཡོད། གཏེར་ཁ་འཚོལ་དབང་ཡོད་མཁན་གྱིས་གཏེར་རིགས་གཙོ་གྲས་རྩད་ཞིབ་བྱེད་པ་དང་སྦྲགས་ངེས་པར་དུ་དེའི་མཉམ་ཐོན་དང་ཞོར་ཐོན་གྱི་གཏེར་རྫས་ལ་ཕྱོགས་བསྡུས་རྩད་ཞིབ་ཀྱི་གདེང་འཇོག་བྱེད་དགོས།

དོན་ཚན་བཅུ་བདུན་པ། རྒྱལ་ཁབ་ཀྱི་དམིགས་བསལ་གཏན་འབེབས་ཡོད་པ་ཕུད་དེ་བྱིངས་ཀྱི་རྩད་ཞིབ་འཁྲོལ་འཛིན་གོ་ཆོད་པའི་ཡུན་ཚད་རིང་ཤོས་ལོ་གསུམ་ཡིན། རྩད་ཞིབ་འཁྲོལ་འཛིན་དེ་ཁྲིམས་ལྟར་དུས་ཚད་རིང་དུ་གཏོང་རྒྱུ་དང་། འགྱུར་བ་གཏོང་རྒྱུའམ་ཡང་ན་གཏེར་ཁ་འཚོལ་དབང་སོར་འཇོག་བྱ་རྒྱུ་བཅས་དགོས་པའི་དབང་གིས་རེ་འདུན་ཞུས་ན་འགྲིག

གཏེར་ཁ་འཚོལ་དབང་ཡོད་མཁན་གྱིས་དུས་ཚད་ལས་བརྒལ་ནས་རྒྱུན་མཐུད་སྔོག་འདོན་བྱ་རྒྱུའི་ཐོ་འགོད་འགྲོ་ལུགས་མ་གཉེར་ཚེ་རྩད་ཞིབ་འཁྲོལ་འཛིན་དེ་རང་ཤུགས་ཀྱིས་རྩིས་མེད་དུ་འགྲོ་གི་ཡོད། ལུགས་མཐུན་གྱི་རྒྱུ་མཚན་ལ་བརྟེན་ནས་རྩད་ཞིབ་ཀྱི་རྣམ་གྲངས་མེད་པ་བཟོ་བའམ་ཡང་ན་རྣམ་གྲངས་ལེགས་གྲུབ་ཟིན་པ་དང་དེ་བཞིན་གཏེར་ཁ་འཚོལ་དབང་སོར་འཇོག་བྱེད་པའི་དུས་ཚད་ཐིམ་པ་བཅས་ཡིན་ཚེ་རྩད་ཞིབ་འཁྲོལ་འཛིན་དེ་ངེས་པར་དུ་མེད་པ་བཟོ་དགོས།

དོན་ཚན་བཅོ་བརྒྱད་པ། གཏེར་ཁ་འཚོལ་དབང་ཡོད་མཁན་གྱིས་ངེས་པར་དུ་རྩད་ཞིབ་འཁྲོལ་འཛིན་བླངས་ཉིན་ནས་བཟུང་རྒྱལ་ཁབ་དང་རང་སྐྱོང་ལྗོངས་ཀྱི་འབྲེལ་ཡོད་གཏན་འབེབས་གཞིར་བཟུང་རྩད་ཞིབ་ཀྱི་གཏོང་ཆ་ཉུང་ཤོས་ཐོག་ནས་ལེགས་གྲུབ་བྱེད་དགོས།

རང་བྱུང་གནོད་འཚེ་སོགས་ལྡོག་ཐབས་མེད་པའི་རྒྱུ་རྐྱེན་ལས་རྩད་ཞིབ་ཀྱི་ལས་ཀ་རྒྱུན་ལྡན་བཞིན་བྱེད་མ་ཐུབ་ཚེ་གཏེར་ཁ་འཚོལ་དབང་ཡོད་མཁན་གྱིས་ངེས་པར་དུ་རྒྱུན་ལྡན་གྱི་རྩད་ཞིབ་ལས་ཀ་བསྐྱར་གསོ་བྱས་ཉིན་ནས་བཟུང་ཉིན་སུམ་ཅུའི་ནང་ཚུན་དུ་ཐོ་འགོད་དོ་དམ་ལས་ཁུངས་ལ་དེ་མཚུངས་ཀྱི་རྩད་ཞིབ་གཏོང་ཆ་ཉུང་ཤོས་ཞིབ་འཐེན་ཡོང་རེ་ཞུ་བའི་སྙན་ཞུ་འབུལ་དགོས་པ་དང་། ཐོ་འགོད་དོ་དམ་ལས་ཁུངས་ཀྱིས་ངེས་པར་དུ་སྙན་ཞུ་འབྱོར་ཉིན་ནས་བཟུང་ཉིན་སུམ་ཅུའི་ནང་ཚུན་དུ་མཆན་བཀོད་བཀའ་ལན་སློག་དགོས།

དོན་ཚན་བཅུ་དགུ་པ། གཏེར་ཁ་འཚོལ་དབང་ཡོད་མཁན་གྱིས་ངེས་པར་དུ་རྩད་ཞིབ་འཁྲོལ་འཛིན་བླངས་ཉིན་ནས་བཟུང་ཟླ་བ་དྲུག་གི་ནང་ཚུན་དུ་ལས་འགོ་འཛུགས་དགོས། རྩད་ཞིབ་ཀྱི་ལས་འགོ་ཚུགས་སྐབས་ངེས་པར་དུ་རྩད་ཞིབ་རྣམ་གྲངས་ཡོད་སའི་རྫོང་རིམ་པའི་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་ལ་སྙན་སེང་ཞུ་དགོས་པ་མ་ཟད་ཐོ་འགོད་དོ་དམ་ལས་ཁུངས་ལ་ལས་འགོ་ཚུགས་པའི་གནས་ཚུལ་སྙན་སེང་ཞུ་དགོས།

དོན་ཚན་ཉི་ཤུ་པ། གཏེར་ཁ་འཚོལ་དབང་ཡོད་མཁན་གྱིས་རྩད་ཞིབ་འཁྲོལ་འཛིན་གྱི་གོ་ཆོད་དུས་ཚད་ནང་རྩད་ཞིབ་བྱེད་སྐབས་འཚོལ་རིམ་བཞིན་དུ་སྔོག་འདོན་བྱ་རྒྱུའི་རྒྱལ་ཁབ་ཀྱི་གཏན་འབེབས་དང་བླང་བྱ་དང་མཐུན་པའི་གཏེར་རྫས་ཆགས་གཞི་རྙོག་རྫིང་ཆེ་རིགས་བཙལ་རྙེད་ཐུབ་ཚེ་སྔོག་འདོན་བྱ་རྒྱུའི་རེ་འདུན་ཞུ་ཆོག་པ་དང་ཐོ་འགོད་དོ་དམ་ལས་ཁུངས་ཀྱི་ཆོག་མཆན་ཐོབ་རྗེས་གཏེར་ཁ་སྔོག་འདོན་བྱ་རྒྱུའི་འགྲོ་ལུགས་གཉེར་དགོས།

དོན་ཚན་ཉེར་གཅིག་པ། གཤམ་གསལ་གྱི་གནས་ཚུལ་གང་རུང་ཞིག་ཡོད་ཕྱིན་གཏེར་ཁ་འཚོལ་དབང་ཡོད་མཁན་གྱིས་ངེས་པར་དུ་རྩད་ཞིབ་འཁྲོལ་འཛིན་གྱི་གོ་ཆོད་དུས་ཚད་ནང་ཐོ་འགོད་དོ་དམ་ལས་ཁུངས་ལ་ཐོ་འགོད་བརྗེ་སྒྱུར་བྱ་རྒྱུའི་རེ་འདུན་ཞུ་དགོས་པ་སྟེ།

(གཅིག)རྩད་ཞིབ་བྱེད་ཁོངས་རྒྱ་ཆེར་གཏོང་བའམ་ཡང་ན་ཆུང་དུ་གཏོང་བ་དང་།

(གཉིས)བཙལ་བྱའི་གཏེར་རིགས་ལ་འགྱུར་བ་གཏོང་བ།

(གསུམ)གཏེར་ཁ་འཚོལ་དབང་འཚོང་བཤུག་གཏོང་རྒྱུར་ཁྲིམས་ལྟར་ཆོག་མཆན་སྤྲོད་པ།

(བཞི)གཏེར་ཁ་འཚོལ་དབང་ཡོད་མཁན་གྱི་མིང་ངམ་ཡང་ན་གནས་ཡུལ་འགྱུར་བ་གཏོང་བ་བཅས་སོ།

དོན་ཚན་ཉེར་གཉིས་པ། རྨང་གཞིའི་རང་བཞིན་དང་སྤྱི་ཕན་རང་བཞིན་གྱི་ས་གཤིས་བརྟག་དཔྱད་བྱེད་སྐབས་ངེས་པར་དུ་རྒྱལ་ཁབ་དང་རང་སྐྱོང་ལྗོངས་ཀྱི་འབྲེལ་ཡོད་གཏན་འབེབས་གཞིར་བཟུང་ཐོ་འགོད་དོ་དམ་ལས་ཁུངས་ལ་ས་གཤིས་བརྟག་དཔྱད་ཀྱི་འགྲོ་ལུགས་གཉེར་དགོས།

དོན་ཚན་ཉེར་གསུམ་པ། གཏེར་རྫས་ཐོན་ཁུངས་རྩད་ཞིབ་བྱས་འབྲས་ཀྱི་ཡིག་ཚགས་དཔྱད་ཡིག་དང་གཏེར་རིགས་འདུས་འབོར་གྱི་བསྡོམས་རྩིས་དཔྱད་ཡིག་ལ་གཅིག་གྱུར་གྱི་དོ་དམ་ལམ་ལུགས་ལག་བསྟར་བྱས་ཏེ་རྒྱལ་སྲིད་སྤྱི་ཁྱབ་ཁང་གི་གཏན་འབེབས་ལྟར་ཕྱོགས་བསྡུས་རྩིས་འབུལ་ཞུ་དགོས་པའམ་ཡང་ན་རེའུ་མིག་བཀོད་དེ་འབུལ་དགོས།

རྩད་ཞིབ་སྙན་ཞུ་དང་རིན་ཐང་ལྡན་པའི་རྩད་ཞིབ་དཔྱད་ཡིག་གཞན་དག་རྒྱལ་ཁབ་ཀྱི་འབྲེལ་ཡོད་གཏན་འབེབས་གཞིར་བཟུང་རིན་དོད་ཡོད་པའི་ཐོག་ནས་བེད་སྤྱོད་གཏོང་རྒྱུ།

ལེའུ་གསུམ་པ། གཏེར་རྫས་ཐོན་ཁུངས་སྔོག་འདོན།

དོན་ཚན་ཉེར་བཞི་པ། གཤམ་གསལ་གྱི་གཏེར་རྫས་ཐོན་ཁུངས་སྔོག་འདོན་བྱ་རྒྱུར་རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་གྱིས་བཅའ་ཁྲིམས་དང་ཁྲིམས་སྲོལ་གྱི་གཏན་འབེབས་གཞིར་བཟུང་ཞིབ་མཆན་ཐོ་འགོད་བྱས་ནས་གཏེར་འདོན་འཁྲོལ་འཛིན་སྤྲོད་དགོས་པ་སྟེ།

(གཅིག)གཏེར་རྫས་འདུས་འབོར་འབྲིང་གྲས་ཡིན་པའི་གཏེར་རྫས་ཐོན་ཁུངས་དང་།

(གཉིས)གཏེར་ཁུལ་ཁྱབ་ཁོངས་གྲོང་ཁྱེར(ས་གནས)གྱི་སྲིད་འཛིན་ས་ཁོངས་ལས་བརྒལ་བའི་གཏེར་རྫས་ཐོན་ཁུངས།

(གསུམ)རྒྱལ་སྲིད་སྤྱི་ཁྱབ་ཁང་གི་ས་གཤིས་གཏེར་རྫས་གཙོ་འགན་སྡེ་ཚན་གྱིས་རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་ལ་ཞིབ་མཆན་ཐོ་འགོད་བྱ་རྒྱུའི་དབང་ཆ་སྤྲད་པའི་གཏེར་རྫས་ཐོན་ཁུངས་བཅས་སོ།

གཤམ་གསལ་གྱི་གཏེར་རྫས་ཐོན་ཁུངས་རིགས་སྔོག་འདོན་བྱ་རྒྱུར་གྲོང་ཁྱེར་མི་དམངས་སྲིད་གཞུང་དང་ས་གནས་སྲིད་འཛིན་ཀུང་ཧྲུའི་ས་གཤིས་གཏེར་རྫས་གཙོ་འགན་སྡེ་ཚན་གྱིས་སྲོལ་ཡིག་འདི་གཞིར་བཟུང་ཞིབ་མཆན་ཐོ་འགོད་བྱས་ནས་གཏེར་འདོན་འཁྲོལ་འཛིན་སྤྲོད་དགོས་པ་སྟེ།

(གཅིག)གཏེར་རྫས་གསོག་འབོར་གྱི་གཞི་ཁྱོན་ཆུང་གྲས་ཡིན་པའི་གཏེར་རྫས་ཐོན་ཁུངས་དང་།

(གཉིས)གཏེར་ཁུལ་ཁྱབ་ཁོངས་རྫོང(གྲོང་ཁྱེར་དང་ཆུད)གི་སྲིད་འཛིན་ས་ཁོངས་ལས་བརྒལ་བའི་གཏེར་རྫས་ཐོན་ཁུངས།

(གསུམ)རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་གྱིས་གྲོང་ཁྱེར་མི་དམངས་སྲིད་གཞུང་དང་ས་གནས་སྲིད་འཛིན་ཀུང་ཧྲུའི་ས་གཤིས་གཏེར་རྫས་གཙོ་འགན་སྡེ་ཚན་ལ་ཞིབ་མཆན་ཐོ་འགོད་བྱ་རྒྱུའི་དབང་ཆ་སྤྲད་པའི་གཏེར་རྫས་ཐོན་ཁུངས་བཅས་སོ།

ཁ་ཐོར་ཆུང་ཙག་གི་གཏེར་རྫས་ཐོན་ཁུངས་སྔོག་འདོན་བྱ་རྒྱུར་རྫོང་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་གྱིས་སྲོལ་ཡིག་འདི་གཞིར་བཟུང་ཞིབ་མཆན་ཐོ་འགོད་བྱས་ནས་གཏེར་འདོན་འཁྲོལ་འཛིན་སྤྲོད་དགོས།

མི་སྒེར་གྱིས་རང་མཁོའི་གཏེར་རྫས་ཕྲན་བུ་སྔོག་འདོན་བྱེད་པར་སྔོག་ས་ཐོ་འགོད་བྱེད་མི་དགོས་ཤིང་། དེར་ཤང(གྲོང་རྡལ)མི་དམངས་སྲིད་གཞུང་གིས་སྔོག་ས་དམིགས་འཛུགས་བྱས་ན་འགྲིག

དོན་ཚན་ཉེར་ལྔ་པ། གཏེར་རྫས་གསོག་འབོར་གྱི་གཞི་ཁྱོན་འབྲིང་གྲས་ཡན་གྱི་གཏེར་རྫས་ཐོན་ཁུངས་སྔོག་འདོན་བྱེད་པར་ངེས་པར་དུ་གཤམ་གསལ་གྱི་ཆ་རྐྱེན་འཛོམས་དགོས་པ་སྟེ།

(གཅིག)གཏེར་རྫས་གསོག་འབོར་དོ་དམ་སྡེ་ཚན་གྱིས་ཞིབ་མཆན་བཀོད་པའི་ས་གཤིས་རྩད་ཞིབ་ཀྱི་སྙན་ཞུ་ཞིབ་ཕྲ་ཡོད་པ་དང་།

(གཉིས)གཏེར་ལས་འཛུགས་སྐྲུན་རྣམ་གྲངས་ལག་བསྟར་བྱེད་ཐུབ་མིན་གྱི་ཞིབ་འཇུག་སྙན་ཞུ་ཡོད་པ།

(གསུམ)ལུགས་དང་མཐུན་པའི་གཏེར་ཁ་སྔོག་འདོན་གྱི་ཇུས་འགོད་ཡོད་པ།

(བཞི)གཏན་འཁེལ་བྱས་པའི་གཏེར་ཁུལ་ཁྱབ་ཁོངས་ཡོད་པ།

(ལྔ)གཏེར་རི་འཛུགས་སྐྲུན་གྱི་གཞི་ཁྱོན་དང་འཚམ་པའི་མ་དངུལ་དང་། སྒྲིག་ཆས། ལག་རྩལ་པ་ཡོད་པ་བཅས་སོ།

དོན་ཚན་ཉེར་དྲུག་པ། གཏེར་རྫས་གསོག་འབོར་གྱི་གཞི་ཁྱོན་ཆུང་གྲས་ཡིན་པའི་གཏེར་རྫས་ཐོན་ཁུངས་སྔོག་འདོན་བྱེད་པར་ངེས་པར་དུ་གཤམ་གསལ་གྱི་ཆ་རྐྱེན་འཛོམས་དགོས་པ་སྟེ།

(གཅིག)གཏེར་རྫས་གསོག་འབོར་དོ་དམ་སྡེ་ཚན་གྱིས་ཞིབ་མཆན་བཀོད་པའི་ས་གཤིས་རྩད་ཞིབ་ཀྱི་ཡོངས་ཁྱབ་སྙན་ཞུ་ཡོད་པ་དང་།

(གཉིས)ལུགས་དང་མཐུན་པའི་གཏེར་ཁ་སྔོག་འདོན་གྱི་ཇུས་འགོད་ཡོད་པ།

(གསུམ)ཆོག་མཆན་ཐོབ་ཟིན་པའི་རྩོད་གཞི་མེད་པའི་གཏེར་ཁུལ་ཁྱབ་ཁོངས་ཡོད་པ།

(བཞི)གཏེར་ལས་འཛུགས་སྐྲུན་གྱི་གཞི་ཁྱོན་དང་འཚམ་པའི་མ་དངུལ་དང་། སྒྲིག་ཆས། ལག་རྩལ་པ་ཡོད་པ་བཅས་སོ།

དོན་ཚན་ཉེར་བདུན་པ། ཁ་ཐོར་ཆུང་ཙག་གི་གཏེར་རྫས་ཐོན་ཁུངས་སྔོག་འདོན་བྱེད་པར་ངེས་པར་དུ་གཤམ་གསལ་གྱི་ཆ་རྐྱེན་འཛོམས་དགོས་པ་སྟེ།

(གཅིག)ས་གཤིས་རྩད་ཞིབ་ཀྱི་འོས་བབ་ཡོད་པའི་ཚན་པས་ཕུལ་བའི་ལས་ཀའི་ཚད་དེ་གཏེར་གནས་ཀྱི་ཞིབ་བཤེར་སྙན་ཞུའི་ས་གཤིས་དཔྱད་ཡིག་ལས་དམའ་བ་མེད་པ་དང་།

(གཉིས)ཅུང་ལུགས་དང་མཐུན་པའི་གཏེར་ཁ་སྔོག་འདོན་གྱི་ཇུས་གཞི་ཡོད་པ།

(གསུམ)ཆོག་མཆན་ཐོབ་ནས་རྩོད་གཞི་མེད་པའི་གཏེར་ཁུལ་ཁྱབ་ཁོངས་ཡོད་པ་བཅས་སོ།

དོན་ཚན་ཉེར་བརྒྱད་པ། གཏེར་ཁ་འདོན་དབང་རེ་འདུན་ཞུ་མཁན་གྱིས་གཏེར་འདོན་འཁྲོལ་འཛིན་ཞུ་སྐབས་ངེས་པར་དུ་ཐོ་འགོད་དོ་དམ་ལས་ཁུངས་ལ་གཤམ་གསལ་གྱི་དཔྱད་ཡིག་འབུལ་དགོས་པ་སྟེ།

(གཅིག)ཐོ་འགོད་རེ་འདུན་ཞུ་ཡིག་དང་གཏེར་ཁུལ་ཁྱབ་ཁོངས་འདི་ཡིན་གྱི་ས་བཀྲ་དང་།

(གཉིས)གཏེར་ཁ་འདོན་དབང་རེ་འདུན་ཞུ་མཁན་གྱི་འོས་ཐོབ་ཆ་རྐྱེན་གྱི་དཔང་ཡིག

(གསུམ)གཏེར་རྫས་ཐོན་ཁུངས་གསར་སྤེལ་དང་བེད་སྤྱོད་བྱེད་པའི་ཇུས་གཞི།

(བཞི)ཁྲིམས་ལྟར་གཏེར་འདོན་ཁེ་ལས་འཛུགས་རྒྱུའི་ཆོག་མཆན་ཐོབ་ཡིག

(ལྔ)གཏེར་རྫས་ཐོན་ཁུངས་སྔོག་འདོན་བྱས་པ་དེས་ཁོར་ཡུག་ལ་ཤུགས་རྐྱེན་ཇི་ཡོང་གི་དཔྱད་གདེང་སྙན་ཞུ་དང་ས་ཆུ་སྲུང་འཛིན་གྱི་ཇུས་གཞི།

(དྲུག)རྒྱལ་ཁབ་དང་རང་སྐྱོང་ལྗོངས་ས་གཤིས་གཏེར་རྫས་གཙོ་འགན་སྡེ་ཚན་གྱིས་གཏན་འབེབས་བྱས་པའི་དཔྱད་ཡིག་གཞན་དག་བཅས་སོ།

དོན་ཚན་ཉེར་དགུ་པ། ཐོ་འགོད་དོ་དམ་ལས་ཁུངས་ཀྱིས་ངེས་པར་དུ་རེ་འདུན་ཞུ་ཡིག་འབྱོར་ཉིན་ནས་ཉིན་བཞི་བཅུའི་ནང་ཚུན་དུ་ཐོ་འགོད་ཆོག་མིན་གཏན་འཁེལ་བྱ་རྒྱུ་མ་ཟད། གཏེར་ཁ་འདོན་དབང་རེ་འདུན་བྱེད་མཁན་ལ་བརྡ་ཐོ་གཏོང་དགོས།

ཐོ་འགོད་ཀྱི་ཆོག་མཆན་ཐོབ་རྗེས་གཏེར་ཁ་འདོན་དབང་རེ་འདུན་ཞུ་མཁན་གྱིས་ངེས་པར་དུ་བརྡ་ཐོ་འབྱོར་ཉིན་ནས་ཉིན་སུམ་ཅུའི་ནང་ཚུན་དུ་ཐོ་འགོད་དོ་དམ་ལས་ཁུངས་ལ་གཏེར་ཁ་འདོན་དབང་བེད་སྤྱོད་གྲོན་དངུལ་དང་། དེ་བཞིན་རྒྱལ་ཁབ་དང་རང་སྐྱོང་ལྗོངས་ཀྱིས་གཏེར་ཁ་རྩད་ཞིབ་ལ་མ་དངུལ་བཏང་ནས་ཐོབ་པའི་གཏེར་ཁ་འཚོལ་དབང་གི་རིན་དངུལ་འབུལ་དགོས་ཤིང་། ཐོ་འགོད་ཀྱི་འགྲོ་ལུགས་གཉེར་བསྒྲུབས་པ་དང་། གཏེར་འདོན་འཁྲོལ་འཛིན་བླངས་རྗེས་གཏེར་ཁ་འདོན་དབང་ཡོད་མཁན་ལ་གྱུར་པ་ཡིན།

ཐོ་འགོད་ཀྱི་མོས་མཐུན་མ་ཐོབ་མཁན་ལ་ཐོ་འགོད་དོ་དམ་ལས་ཁུངས་ཀྱིས་རེ་འདུན་ཞུ་ཡིག་འབྱོར་ཉིན་ནས་ཉིན་བཞི་བཅུའི་ནང་ཚུན་དུ་ཡིག་ཐོག་ནས་གཏེར་ཁ་འདོན་དབང་རེ་འདུན་ཞུ་མཁན་ལ་རྒྱུ་མཚན་གསལ་བཤད་བྱེད་དགོས།

དོན་ཚན་སུམ་ཅུ་པ། གཏེར་ཁ་འདོན་དབང་བེད་སྤྱོད་གྲོན་དངུལ་དང་གཏེར་ཁ་འདོན་དབང་གི་རིན་དངུལ་ཐད་གཤམ་གསལ་གྱི་གནས་ཚུལ་གང་རུང་ཞིག་ཡོད་པར་གཏེར་ཁ་འདོན་དབང་ཡོད་མཁན་གྱིས་རེ་འདུན་ཞུས་ནས་རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་གྱིས་ཁྲིམས་ལྟར་ཞིབ་བཤེར་ཆོག་མཆན་སྤྲད་རྗེས་ཆག་ཡང་དང་རྩ་ཆག་བཏང་ན་འགྲིག་པ་སྟེ།

(གཅིག)ཐག་རིང་ལུང་ཁུག་དང་ས་ཁུལ་དབུལ་པོའི་གཏེར་རྫས་ཐོན་ཁུངས་སྔོག་འདོན་བྱེད་པ་དང་།

(གཉིས)རྒྱལ་ཁབ་ལ་ཁ་ཐང་བའི་གཏེར་ཁའི་རིགས་སྔོག་འདོན་བྱེད་པ།

(གསུམ)རང་བྱུང་གནོད་འཚེ་སོགས་ལྡོག་ཐབས་མེད་པའི་རྒྱུ་རྐྱེན་གྱིས་གཏེར་འདོན་ཁེ་ལས་ལ་གྱོང་གུན་ཆེན་པོ་བཟོས་པའམ་ཡང་ན་ཐོན་སྐྱེད་བྱེད་མཚམས་འཇོག་དགོས་བྱུང་བ།

(བཞི)རྒྱལ་སྲིད་སྤྱི་ཁྱབ་ཁང་དང་རང་སྐྱོང་ལྗོངས་མི་དམངས་སྲིད་གཞུང་གིས་གཏན་འབེབས་བྱས་པའི་གནས་ཚུལ་གཞན་དག་བཅས་སོ།

གཏེར་ཁ་འདོན་དབང་བེད་སྤྱོད་གྲོན་དངུལ་དང་། དེ་བཞིན་རྒྱལ་ཁབ་དང་རང་སྐྱོང་ལྗོངས་ཀྱིས་གཏེར་ཁ་རྩད་ཞིབ་ལ་མ་དངུལ་བཏང་ནས་ཐོབ་པའི་གཏེར་ཁ་འཚོལ་དབང་གི་རིན་དངུལ་འབུལ་དགོས་ཤིང་། ཞིབ་ཕྲའི་བྱ་ཐབས་རང་སྐྱོང་ལྗོངས་མི་དམངས་སྲིད་གཞུང་གིས་གཏན་འབེབས་བྱེད་དགོས་པ་མ་ཟད། སྔོན་རྩིས་ཀྱི་ཁོངས་སུ་བཅུག་ནས་དོ་དམ་ཡང་བྱེད་དགོས།

དོན་ཚན་སོ་གཅིག་པ། ཐོ་འགོད་དོ་དམ་ལས་ཁུངས་ཀྱིས་གཏེར་འདོན་འཁྲོལ་འཛིན་སྤྲད་རྗེས་ངེས་པར་དུ་གཏེར་ཁུལ་ཁྱབ་ཁོངས་གནས་སའི་རྫོང་རིམ་པའི་མི་དམངས་སྲིད་གཞུང་ལ་བརྡ་ཐོ་གཏོང་དགོས་པ་དང་རྫོང་རིམ་པའི་མི་དམངས་སྲིད་གཞུང་གིས་ངེས་པར་དུ་བརྡ་ཐོ་འབྱོར་ཉིན་ནས་ཉིན་དགུ་བཅུའི་ནང་ཚུན་དུ་གཏེར་ཁུལ་ཁྱབ་ཁོངས་སུ་སྤྱི་བསྒྲགས་སྤེལ་དགོས་པ་མ་ཟད། གཏེར་ཁ་འདོན་དབང་ཡོད་མཁན་གྱི་རེ་བ་ལྟར་ས་མཚམས་དབྱེ་རྟགས་རྒྱག་པའམ་ཡང་ན་ས་ངོས་ཀྱི་མཚོན་རྟགས་འགེལ་རྒྱུ་སྒྲིག་འཛུགས་བྱེད་དགོས།

ཐོ་འགོད་དོ་དམ་ལས་ཁུངས་ཀྱིས་ཐོ་འགོད་འགྲོ་ལུགསགཉེར་་བསྒྲུབས་རྗེས་ངེས་པར་དུ་དུས་བཀག་ནང་འབྲེལ་ཡོད་དཔྱད་ཡིག་རྣམས་རིམ་པ་བཞིན་རིམ་པ་གཅིག་གིས་མཐོ་བའི་ས་གཤིས་གཏེར་རྫས་གཙོ་འགན་སྡེ་ཚན་ལ་སྙན་དཔོད་ཞུ་དགོས།

དོན་ཚན་སོ་གཉིས་པ། གཤམ་གསལ་གྱི་གནས་ཚུལ་གང་རུང་ཞིག་ཡོད་ཚེ་གཏེར་ཁ་འདོན་དབང་ཡོད་མཁན་གྱིས་ངེས་པར་དུ་གཏེར་འདོན་འཁྲོལ་འཛིན་གྱི་གོ་ཆོད་དུས་ཚད་ནང་ཐོ་འགོད་དོ་དམ་ལས་ཁུངས་ལ་བརྗེ་སྒྱུར་གྱི་ཐོ་འགོད་བྱ་རྒྱུའི་རེ་འདུན་ཞུ་དགོས་པ་སྟེ།

(གཅིག)གཏེར་ཁུལ་ཁྱབ་ཁོངས་བརྗེ་སྒྱུར་བྱེད་པ་དང་།

(གཉིས)སྔོག་འདོན་བྱེད་པའི་གཏེར་རིགས་གཙོ་བོ་བརྗེ་སྒྱུར་བྱེད་པ།

(གསུམ)སྔོག་འདོན་བྱེད་སྟངས་བརྗེ་སྒྱུར་བྱེད་པ།

(བཞི)གཏེར་འདོན་ཁེ་ལས་ཀྱི་མིང་ངམ་ཡང་ན་གནས་ཡུལ་བརྗེ་སྒྱུར་བྱེད་པ།

(ལྔ)ཁྲིམས་ལྟར་ཆོག་མཆན་ཐོབ་ནས་གཏེར་ཁ་འདོན་དབང་ནང་བཤུག་གཏོང་བ་བཅས་སོ།

ལེའུ་བཞི་པ། གཏེར་ཁ་འཚོལ་དབང་དང་གཏེར་ཁ་འདོན་དབང་བརྒྱུད་བཤུག

དོན་ཚན་སོ་གསུམ་པ། རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་གྱིས་ངེས་པར་དུ་བཅའ་ཁྲིམས་དང་ཁྲིམས་སྲོལ་ནང་གཏན་འབེབས་བྱས་པའི་དབང་ཚད་གཞིར་བཟུང་། སྲིད་འཛིན་ས་ཁོངས་དེ་གའི་ནང་གི་གཏེར་ཁ་འཚོལ་དབང་དང་གཏེར་ཁ་འདོན་དབང་བརྒྱུད་བཤུག་གཏོང་བར་ཞིབ་མཆན་འགོད་རྒྱུའི་འགན་འཁུར་དགོས།

དོན་ཚན་སོ་བཞི་པ། གཏེར་ཁ་འཚོལ་དབང་ནང་བཤུག་གཏོང་བར་ངེས་པར་དུ་གཤམ་གསལ་གྱི་ཆ་རྐྱེན་འཛོམས་དགོས་པ་སྟེ།

(གཅིག)གཏེར་ཁ་འཚོལ་དབང་ཡོད་མཁན་གྱིས་རྩད་ཞིབ་འཁྲོལ་འཛིན་བླངས་པའི་ཉིན་ནས་དུས་ཡུན་ལོ་གཉིས་སོང་བའམ་ཡང་ན་རྩད་ཞིབ་བྱེད་ཁུལ་དུ་ད་དུང་རྩད་ཞིབ་སྔོག་འདོན་བྱ་རྒྱུ་ཡོད་པའི་གཏེར་རྫས་རིགས་རྙེད་པ་དང་།

(གཉིས)གཏེར་ཁ་འཚོལ་དབང་ཡོད་མཁན་གྱིས་གཏན་འབེབས་བྱས་པའི་རྩད་ཞིབ་ཀྱི་གཏོང་ཆ་ཉུང་ཤོས་ཐོག་ནས་ལེགས་གྲུབ་བྱེད་པ།

(གསུམ)གཏེར་ཁ་འཚོལ་དབང་ལ་རྩོད་གཞི་མེད་པ།

(བཞི)རྒྱལ་ཁབ་དང་རང་སྐྱོང་ལྗོངས་ཀྱི་འབྲེལ་ཡོད་གཏན་འབེབས་ལྟར་གཏེར་ཁ་འཚོལ་དབང་བེད་སྤྱོད་གྲོན་དངུལ་དང་གཏེར་ཁ་འཚོལ་དབང་གི་རིན་དངུལ་འཇལ་ཟིན་པ།

(ལྔ)རྒྱལ་སྲིད་སྤྱི་ཁྱབ་ཁང་དང་རང་སྐྱོང་ལྗོངས་ས་གཤིས་གཏེར་རྫས་གཙོ་འགན་སྡེ་ཚན་གྱིས་གཏན་འབེབས་བྱས་པའི་ཆ་རྐྱེན་གཞན་དག་བཅས་སོ།

དོན་ཚན་སོ་ལྔ་པ། གཏེར་ཁ་འདོན་དབང་ནང་བཤུག་གཏོང་བར་ངེས་པར་དུ་གཤམ་གསལ་གྱི་ཆ་རྐྱེན་འཛོམས་དགོས་པ་སྟེ།

(གཅིག)གཏེར་ཁ་འདོན་དབང་རག་པའི་གཏེར་འདོན་ཁེ་ལས་ཀྱིས་ཁེ་ལས་ཟླ་སྒྲིལ་དང་། ཁ་གྱེས་ཟུར་འཛུགས། གཞན་དང་མ་རྩ་མཉམ་འཇོག་དང་མཉམ་ལས་གཉེར་སྐྱོང་བཅས་བྱས་པའི་རྐྱེན་དང་། ཡང་ན་ཁེ་ལས་ཀྱི་རྒྱུ་ནོར་འཚོང་བ་དང་དེ་བཞིན་ཁེ་ལས་ཀྱི་མ་དངུལ་བདག་དབང་བརྗེ་སྒྱུར་བྱེད་པའི་གནས་ཚུལ་གཞན་དག་གི་རྐྱེན་པས་གཏེར་ཁ་འདོན་དབང་གཙོ་བོ་བརྗེ་སྒྱུར་བྱེད་དགོས་བྱུང་བའི་རིགས་དང་།

(གཉིས)གཏེར་ཁ་འདོན་དབང་ཡོད་མཁན་གྱིས་གཏེར་འདོན་བྱས་ནས་ལོ་གཅིག་སོང་བ།

(གསུམ)གཏེར་ཁ་འདོན་དབང་ལ་རྩོད་གཞི་མེད་པ།

(བཞི)རྒྱལ་ཁབ་དང་རང་སྐྱོང་ལྗོངས་ཀྱི་འབྲེལ་ཡོད་གཏན་འབེབས་ལྟར་ཐོན་ཁུངས་ཀྱི་དཔྱ་ཁྲལ་དང་། གཏེར་རྫས་ཐོན་ཁུངས་ཟད་གྲོན། གཏེར་ཁ་འདོན་དབང་བེད་སྤྱོད་གྲོན་དངུལ། གཏེར་ཁ་འདོན་དབང་གི་རིན་དངུལ་བཅས་འཇལ་ཟིན་པ།

(ལྔ)རྒྱལ་སྲིད་སྤྱི་ཁྱབ་ཁང་དང་རང་སྐྱོང་ལྗོངས་ས་གཤིས་གཏེར་རྫས་གཙོ་འགན་སྡེ་ཚན་གྱིས་གཏན་འབེབས་བྱས་པའི་ཆ་རྐྱེན་གཞན་དག་བཅས་སོ།

གཞུང་ཁོངས་གཏེར་འདོན་ཁེ་ལས་ཀྱིས་གཏེར་ཁ་འདོན་དབང་ནང་བཤུག་གཏོང་རྒྱུའི་ཆོག་མཆན་མ་ཞུས་གོང་ངེས་པར་དུ་སྔོན་ལ་གཏེར་འདོན་ཁེ་ལས་གཙོ་འགན་སྡེ་ཚན་གྱི་མོས་མཐུན་ཐོབ་པ་བྱེད་དགོས།

དོན་ཚན་སོ་དྲུག་པ། གཏེར་ཁ་འཚོལ་དབང་དང་གཏེར་ཁ་འདོན་དབང་ཡོད་མཁན་གྱིས་གཏེར་ཁ་འཚོལ་དབང་དང་གཏེར་ཁ་འདོན་དབང་ནང་བཤུག་གཏོང་རྒྱུའི་རེ་འདུན་ཞུ་སྐབས་ངེས་པར་དུ་རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་ལ་གཤམ་གསལ་གྱི་དཔྱད་ཡིག་འབུལ་དགོས་པ་སྟེ།

(གཅིག)ནང་བཤུག་གཏོང་རྒྱུའི་ཞུ་ཡིག་དང་།

(གཉིས)ནང་བཤུག་གཏོང་མཁན་དང་ནང་བཤུག་གཏོང་ཡུལ་གཉིས་པོས་མིང་རྟགས་བཀོད་པའི་ནང་བཤུག་གཏོང་རྒྱུའི་གན་རྒྱ།

(གསུམ)ནང་བཤུག་གཏོང་ཡུལ་གྱི་མིའི་འོས་ཐོབ་ཆ་རྐྱེན་གྱི་དཔང་ཡིག

(བཞི)རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་གྱིས་འདོན་དགོས་ལུགས་ཀྱི་རེ་བ་བཏོན་པའི་འབྲེལ་ཡོད་ཀྱི་དཔྱད་ཡིག་གཞན་དག་བཅས་སོ།

གཞུང་ཁོངས་གཏེར་འདོན་ཁེ་ལས་ཀྱིས་གཏེར་ཁ་འདོན་དབང་ནང་བཤུག་གཏོང་སྐབས་ད་དུང་ངེས་པར་དུ་འབྲེལ་ཡོད་གཙོ་འགན་སྡེ་ཚན་གྱིས་ནང་བཤུག་གཏོང་རྒྱུ་མོས་མཐུན་བྱས་པའི་ཆོག་མཆན་ཡིག་ཆ་འབུལ་དགོས།

དོན་ཚན་སོ་བདུན་པ། ཞིབ་མཆན་དོ་དམ་ལས་ཁུངས་ཀྱིས་ངེས་པར་དུ་གཏེར་ཁ་འཚོལ་དབང་དང་གཏེར་ཁ་འདོན་དབང་ནང་བཤུག་གཏོང་རྒྱུའི་ཞུ་ཡིག་འབྱོར་ཉིན་ནས་ཉིན་བཞི་བཅུའི་ནང་ཚུན་དུ་ནང་བཤུག་བཏང་ཆོག་མིན་གཏན་འཁེལ་བྱེད་དགོས་པ་མ་ཟད། ནང་བཤུག་གཏོང་མཁན་དང་ནང་བཤུག་གཏོང་ཡུལ་ལ་ཡིག་ཐོག་ནས་བརྡ་ཐོ་གཏོང་དགོས། ནང་བཤུག་བཏང་ཆོག་ན་ནང་བཤུག་གཏོང་རྒྱུའི་གན་རྒྱ་དེ་ཆོག་མཆན་ཐོབ་པའི་ཉིན་ནས་གོ་ཆོད། ནང་བཤུག་གཏོང་མཁན་དང་ནང་བཤུག་གཏོང་ཡུལ་གྱིས་ངེས་པར་དུ་ནང་བཤུག་གཏོང་རྒྱུའི་ཆོག་མཆན་ཐོབ་པའི་བརྡ་ཐོ་འབྱོར་བའི་ཉིན་ནས་ཉིན་དྲུག་ཅུའི་ནང་ཚུན་དུ་དེ་སྔའི་ཐོ་འགོད་དོ་དམ་ལས་ཁུངས་སུ་བརྗེ་སྒྱུར་གྱི་ཐོ་འགོད་འགྲོ་ལུགས་གཉེར་བར་སྐྱོད་དགོས།

རྒྱལ་ཁབ་དང་རང་སྐྱོང་ལྗོངས་ཀྱིས་མ་དངུལ་བཏང་ནས་རྩད་ཞིབ་བྱས་ཏེ་བྱུང་བའི་གཏེར་ཁ་འཚོལ་དབང་དང་གཏེར་ཁ་འདོན་དབང་ནང་བཤུག་གཏོང་སྐབས་ངེས་པར་དུ་ཚོད་སྐོར་གྱི་འོས་བབ་ཡོད་པའི་ལས་ཁུངས་ཀྱིས་མ་རྩར་ཕྱོགས་ཡོངས་ནས་ཚོད་སྐོར་བྱེད་དགོས།

དོན་ཚན་སོ་བརྒྱད་པ། གཏེར་ཁ་འདོན་དབང་བོགས་མར་གཏོང་སྐབས་ངེས་པར་དུ་གཤམ་གསལ་གྱི་ཆ་རྐྱེན་འཛོམས་དགོས་པ་སྟེ།

(གཅིག)གཏེར་འདོན་འཁྲོལ་འཛིན་གྱི་གོ་ཆོད་དུས་ཚོད་ནང་ཡིན་པ་དང་།

(གཉིས)གཏེར་ཁ་འདོན་དབང་ལ་རྩོད་གཞི་མེད་པའི་རིགས།

(གསུམ)གཏེར་ཁ་འདོན་དབང་ཡོད་མཁན་གྱིས་སྔོན་རྩིས་ཀྱི་གཏོང་སྒོའི་བརྒྱ་ཆ་བཞི་བཅུ་ཞེ་ལྔ་ཡན་བཏང་བ།

(བཞི)བོགས་མ་ལེན་མཁན་ལ་སྔོག་འདོན་བྱ་རྒྱུའི་གཏེར་རིགས་དང་གཏེར་རྫས་གསོག་འབོར་གྱི་གཞི་ཁྱོན་དང་འཚམ་པའི་མ་དངུལ་དང་། སྒྲིག་ཆས། ལག་རྩལ་ཆ་རྐྱེན་བཅས་ཡོད་དགོས་པ།

(ལྔ)རྒྱལ་སྲིད་སྤྱི་ཁྱབ་ཁང་དང་རང་སྐྱོང་ལྗོངས་ས་གཤིས་གཏེར་རྫས་གཙོ་འགན་སྡེ་ཚན་གྱིས་གཏན་འབེབས་བྱས་པའི་ཆ་རྐྱེན་གཞན་དག་བཅས་སོ།

གཞུང་ཁོངས་གཏེར་འདོན་ཁེ་ལས་ཀྱིས་གཏེར་ཁ་འདོན་དབང་བོགས་མར་གཏོང་སྐབས་ད་དུང་ངེས་པར་དུ་གཙོ་འགན་སྡེ་ཚན་གྱིས་གཏེར་ཁ་འདོན་དབང་བོགས་མར་གཏོང་རྒྱུར་མོས་མཐུན་བྱས་པའི་ཆོག་མཆན་ཐོབ་པའི་ཡིག་ཆ་འབུལ་དགོས།

དོན་ཚན་སོ་དགུ་པ། གཏེར་ཁ་འདོན་དབང་བོགས་མར་གཏོང་སྐབས་ངེས་པར་དུ་བོགས་མ་གཏོང་ལེན་གྱི་གན་རྒྱ་འཇོག་དགོས། དོ་བདག་ཕྱོགས་གཉིས་ཀས་གན་རྒྱ་བཞག་པའི་ཉིན་ནས་ཉིན་སུམ་ཅུའི་ནང་ཚུན་དུ་བོགས་མ་གཏོང་ལེན་གྱི་གན་རྒྱ་འཁྱེར་ནས་དེ་སྔའི་ཐོ་འགོད་དོ་དམ་ལས་ཁུངས་ཀྱི་ཞིབ་མཆན་ཐོབ་པ་བྱ་རྒྱུ་དང་ཆབས་ཅིག རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་ལ་ཕུལ་ནས་ཆོག་མཆན་ཞུ་དགོས། བོགས་མ་བཏང་བའི་གན་རྒྱ་དེ་ཆོག་མཆན་ཐོབ་པའི་ཉིན་ནས་གོ་ཆོད།

གཏེར་ཁ་འདོན་དབང་བོགས་མར་གཏོང་བའི་གན་རྒྱར་ངེས་པར་དུ་དོ་བདག་ཕྱོགས་གཉིས་ཀའི་ཁེ་དབང་དང་འོས་འགན་གཏན་འབེབས་ཁ་གསལ་བཟོ་དགོས། དེའི་ནང་དོན་ངེས་པར་དུ་རྒྱལ་ཁབ་ཀྱི་འབྲེལ་ཡོད་བཅའ་ཁྲིམས་ཁྲིམས་སྲོལ་དང་མཐུན་དགོས།

གཏེར་ཁ་འདོན་དབང་ཡོད་མཁན་གྱིས་གཏེར་ཁ་འདོན་དབང་དུས་གཅིག་ཏུ་བོགས་མར་ལེན་མི་གཉིས་ཡན་ལ་སྤྲོད་མི་ཆོག་པ་དང་། བོགས་མར་ལེན་མིས་ནང་བཤུག་གཏོང་མི་ཆོག

དོན་ཚན་བཞི་བཅུ་པ། གཏེར་ཁ་འདོན་དབང་གཏའ་མར་འཇོག་སྐབས་ངེས་པར་དུ་བཅའ་ཁྲིམས་དང་། ཁྲིམས་སྲོལ། སྲོལ་ཡིག་འདིའི་དོན་ཚན་སོ་ལྔ་པའི་ནང་གཏན་འབེབས་བྱས་པའི་ཆ་རྐྱེན་བཅས་དང་མཐུན་དགོས།

གཏེར་ཁ་འདོན་དབང་གཏའ་མར་འཇོག་སྐབས་ངེས་པར་དུ་གཏའ་མའི་གན་རྒྱ་འཇོག་དགོས། དོ་བདག་ཕྱོགས་གཉིས་ཀས་ངེས་པར་དུ་གཏའ་མར་བཞག་པའི་ཉིན་ནས་ཉིན་སུམ་ཅུའི་ནང་ཚུན་དུ་གཏེར་འདོན་འཁྲོལ་འཛིན་དང་གཏའ་འཇོག་གི་གན་རྒྱ་འཁྱེར་ནས་དེ་སྔའི་ཐོ་འགོད་དོ་དམ་ལས་ཁུངས་སུ་གཏའ་མར་བཞག་པའི་ཐོ་འགོད་བྱེད་པ་དང་ཆབས་ཅིག རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་ལ་སྙན་དཔོད་ཞུ་དགོས་པ་དང་། གཏའ་འཇོག་གན་རྒྱ་དེ་ཐོ་འགོད་བྱས་པའི་ཉིན་ནས་གོ་ཆོད།

གཏེར་ཁ་འདོན་དབང་གཏའ་མར་འཇོག་སྐབས་དེའི་གཏེར་ཁུལ་ཁྱབ་ཁོངས་ནང་གི་གཏེར་ཁ་སྔོག་འདོན་བྱ་རྒྱུའི་རྨང་གཞིའི་སྒྲིག་བཀོད་དེ་དང་ཆབས་ཅིག་གཏའ་མར་འཇོག་དགོས།

དོན་ཚན་ཞེ་གཅིག་པ། གཏེར་ཁ་འདོན་དབང་གཏའ་མར་བཞག་པའི་རྐྱེན་གྱིས་གཏེར་ཁ་འདོན་དབང་འགྱུར་བ་བྱུང་བའི་རིགས་ངེས་པར་དུ་གཏེར་ཁ་འདོན་དབང་ནང་བཤུག་གཏོང་རྒྱུའི་འབྲེལ་ཡོད་གཏན་འབེབས་བཞིན་ཆོག་མཆན་ཞུ་རྒྱུའི་འགྲོ་ལུགས་གཉེར་དགོས།

གཏའ་འཇོག་གན་རྒྱར་འགྱུར་བ་བྱུང་བ་དང་། མེད་པ་བཟོ་བའམ་ཡང་ན་མཚམས་འཇོག་བཅས་བྱེད་སྐབས་གཏའ་མ་འཇོག་མཁན་དང་གཏའ་མར་ལེན་མཁན་ཕྱོགས་གཉིས་ཀས་གན་རྒྱར་འགྱུར་བ་བྱུང་བ་དང་། མེད་པ་བཟོ་བའམ་ཡང་ན་མཚམས་འཇོག་བྱས་པའི་ཉིན་ནས་ཉིན་བཅུའི་ནང་ཚུན་དུ་གཏའ་འཇོག་ཐོ་འགོད་ལས་ཁུངས་ལ་ཡིག་ཐོག་ནས་སྙན་ཞུ་འབུལ་དགོས།

ལེའུ་ལྔ་པ། མཉམ་སྡེབ་གཏེར་འདོན་ཁེ་ལས་དང་ཁེར་རྐྱང་གཏེར་འདོན་པ།

དོན་ཚན་ཞེ་གཉིས་པ། རིམ་ཁག་མི་དམངས་སྲིད་གཞུང་གིས་ངེས་པར་དུ་མཉམ་སྡེབ་གཏེར་འདོན་ཁེ་ལས་དང་ཁེར་རྐྱང་གཏེར་འདོན་པར“རོགས་སྐྱོར་ཧུར་ཐག་དང་། འཆར་འགོད་ལུགས་མཐུན། ཁྲིད་སྟོན་ཡང་དག དོ་དམ་ལ་ཤུགས་སྣོན་བཅས་བྱེད་པའི་མཛད་ཕྱོགས་ལག་བསྟར་བྱས་ནས་མཉམ་སྡེབ་གཏེར་འདོན་ཁེ་ལས་དང་ཁེར་རྐྱང་གཏེར་འདོན་པར་རྒྱལ་ཁབ་ཀྱི་གཏན་འཁེལ་བྱས་པའི་ཁྱབ་ཁོངས་ནང་གཏེར་རྫས་ཐོན་ཁུངས་སྔོག་འདོན་བྱ་རྒྱུའི་སྐུལ་མ་གཏོང་དགོས།

གཏེར་རྫས་གསོག་འབོར་གྱི་གཞི་ཁྱོན་དེ་གཏེར་འདོན་ཁེ་ལས་ཀྱིས་སྔོག་འདོན་བྱ་རྒྱུ་དང་འཚམ་པའི་གཏེར་རྫས་ཐོན་ཁུངས་དང་། རྒྱལ་ཁབ་ཀྱིས་གཏན་འབེབས་བྱས་པའི་སྲུང་སྐྱོབ་རང་བཞིན་གྱི་སྔོག་འདོན་བྱ་རྒྱུའི་དམིགས་བསལ་གཏེར་རིགས། རྒྱལ་ཁབ་ཀྱིས་གཏན་འབེབས་བྱས་པའི་མི་སྒེར་གྱིས་སྔོག་འདོན་བྱེད་མི་ཆོག་པའི་གཏེར་རྫས་ཐོན་ཁུངས་གཞན་དག་བཅས་མི་སྒེར་ནས་སྔོག་འདོན་བྱེད་མི་ཆོག

དོན་ཚན་ཞེ་གསུམ་པ། རིམ་ཁག་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་སྡེ་ཚན་དང་། ས་གཤིས་རྩད་ཞིབ་ཚན་པ། གཞུང་ཁོངས་གཏེར་འདོན་ཁེ་ལས་བཅས་ཀྱིས་ངེས་པར་དུ “རོགས་སྐྱོར་ཧུར་ཐག་དང་། རིན་དོད་གཉིས་ཕན”གྱི་རྩ་དོན་ལྟར་མཉམ་སྡེབ་གཏེར་འདོན་ཁེ་ལས་དང་ཁེར་རྐྱང་གཏེར་འདོན་པར་ས་གཤིས་གཏེར་རྫས་ཀྱི་དཔྱད་ཡིག་དང་གཏེར་ཁ་སྔོག་འདོན་བྱེད་པའི་ལག་རྩལ་ཇུས་འདྲི་མཁོ་འདོན་བྱེད་དགོས་པ་དང་། ཤང(གྲོང་རྡལ)དང་གྲོང་ཚོས་གཉེར་བའི་མཉམ་སྡེབ་གཏེར་འདོན་ཁེ་ལས་དང་། ཞིང་འབྲོག་མང་ཚོགས། དེ་བཞིན་ལས་བྲལ་ལག་ཁྱེར་ཡོད་པའི་ལས་བཟོ་པ་ཁེར་རྐྱང་གིས་གཏེར་ཁ་སྔོག་འདོན་བྱེད་སྐབས་ངེས་པར་དུ་ཞབས་འདེགས་ཞུ་དགོས།

དོན་ཚན་ཞེ་བཞི་པ། རིམ་ཁག་མི་དམངས་སྲིད་གཞུང་གིས་ཞིང་འབྲོག་ཁུལ་གྱི་མཉམ་སྡེབ་གཏེར་འདོན་ཁེ་ལས་དང་ཁེར་རྐྱང་གཏེར་ཁ་འདོན་མཁན་ལ་ས་གནས་དེ་གའི་ཤང་གྲོང་མཉམ་སྡེབ་ཁེ་ལས་དང་ཁེར་རྐྱང་བཟོ་ཚོང་ཐེམ་དུད་ལ་ད་ལྟ་ལག་བསྟར་བྱེད་བཞིན་པའི་གཟིགས་སྐྱོང་སྲིད་ཇུས་ཚང་མ་ལག་བསྟར་བྱ་རྒྱུ།

ལྗོངས་ཕྱིའི་ཁེ་ལས་དང་ཁེར་རྐྱང་བཟོ་ཚོང་ཐེམ་དུད་ཀྱིས་ཞིང་འབྲོག་ཁུལ་གྱི་མཉམ་སྡེབ་གཏེར་འདོན་ཁེ་ལས་དང་ཁེར་རྐྱང་གཏེར་འདོན་པ་དང་རོགས་རེས་མཉམ་གཉེར་བྱེད་པའི་རིགས་ལ་ས་གནས་དེ་གའི་ཤང་གྲོང་མཉམ་སྡེབ་ཁེ་ལས་དང་ཁེར་རྐྱང་བཟོ་ཚོང་ཐེམ་དུད་ལ་ད་ལྟ་ལག་བསྟར་བྱེད་བཞིན་པའི་གཟིགས་སྐྱོང་སྲིད་ཇུས་ལག་བསྟར་བྱ་རྒྱུ།

དོན་ཚན་ཞེ་ལྔ་པ། གཏེར་རྫས་གསོག་འབོར་གྱི་གཞི་ཁྱོན་དེ་ས་གནས་ནས་སྔོག་འདོན་བྱ་རྒྱུ་དང་འཚམ་པའི་ཐར་ཐོར་ཆུང་ཙག་གི་ཐོན་ཁུངས་རྣམས་ངེས་པར་དུ་དེ་མཚུངས་ཀྱི་འོས་ཐོབ་ཆ་རྐྱེན་འཛོམས་པའི་ས་གནས་དེ་གའི་གཏེར་འདོན་ཁེ་ལས་དང་ཁེར་རྐྱང་གཏེར་འདོན་པར་སྔོན་ལ་སྔོག་འདོན་བྱེད་དུ་འཇུག་དགོས།

དོན་ཚན་ཞེ་དྲུག་པ། མཉམ་སྡེབ་གཏེར་འདོན་ཁེ་ལས་དང་ཁེར་རྐྱང་གཏེར་འདོན་པས་ངེས་པར་དུ་ལག་རྩལ་གྱི་ཆུ་ཚད་དང་གཏེར་རྫས་ཐོན་ཁུངས་བེད་སྤྱོད་བྱེད་ཚད་མཐོ་རུ་གཏོང་དགོས། གཏེར་རྫས་ཐོན་ཁུངས་གང་བྱུང་དུ་སྔོག་འདོན་དང་གཏོར་བཤིག་གཏོང་བར་བཀག་འགོག་བྱེད་དགོས།

ལེའུ་དྲུག་པ། གཏེར་རྫས་ཐོན་ཁུངས་སྲུང་སྐྱོང་དང་དོ་དམ།

དོན་ཚན་ཞེ་བདུན་པ། གཏེར་རིགས་གཙོ་གྲས་སྔོག་འདོན་བྱེད་སྐབས་བཟོ་ལས་ཐད་རིན་ཐང་ཡོད་པའི་མཉམ་སྐྱེས་གཏེར་རྫས་དང་ཞོར་སྐྱེས་གཏེར་རྫས་རིགས་ལ་ངེས་པར་དུ་གཅིག་གྱུར་འཆར་འགོད་དང་། ཕྱོགས་བསྡུས་སྔོག་འདོན། ལུགས་མཐུན་བེད་སྤྱོད་བཅས་བྱེད་དགོས། དེ་མིན་གནས་སྐབས་རིང་ཕྱོགས་བསྡུས་བེད་སྤྱོད་བྱེད་མི་ཐུབ་པའི་རིགས་ལ་ངེས་པར་དུ་ནུས་ལྡན་གྱི་སྲུང་སྐྱོང་བྱ་ཐབས་སྤྱོད་དགོས།

དོན་ཚན་ཞེ་བརྒྱད་པ། གཏེར་རྫས་ཐོན་ཁུངས་སྔོག་འདོན་བྱེད་སྐབས་སྔོག་འདོན་གྱི་གོ་རིམ་དང་། གཏེར་ཁ་སྔོག་འདོན་བྱེད་ཐབས། གཏེར་འདེམས་བཟོ་རྩལ་བཅས་ངེས་པར་དུ་ལུགས་མཐུན་ཡོང་བ་བྱེད་དགོས། གཏེར་འདོན་ཁེ་ལས་ཀྱི་གཏེར་འདོན་ཚུར་བསྡུ་བྱེད་ཚད་དང་། གཏེར་ཁ་ཟད་ཚད། གཏེར་འདེམས་ཚུར་བསྡུ་བྱེད་ཚད་བཅས་ངེས་པར་དུ་འཆར་འགོད་ཀྱི་རེ་བ་དང་མཐུན་པ་བྱེད་དགོས། རིམ་ཁག་ས་གཤིས་གཏེར་རྫས་གཙོ་འགན་སྡེ་ཚན་གྱིས་ངེས་པར་དུ་དུས་བཀག་ཐོག་དཔྱད་ཞིབ་བྱེད་དགོས།

དོན་ཚན་ཞེ་དགུ་པ། གཏེར་རྫས་ཐོན་ཁུངས་སྔོག་འདོན་བྱེད་སྐབས་སྐྱེ་ཁམས་ཁོར་ཡུག་ལ་སྲུང་སྐྱོང་བྱ་རྒྱུའི་ཐད་ངེས་པར་དུ“སུས་གསར་སྤེལ་བྱས་ན་དེས་སྲུང་སྐྱོང་དང་། སུས་སྦགས་བཙོག་བཟོས་ན་དེས་བཅོས་སྐྱོང་། སུས་གཏོར་སྐྱོན་བཏང་ན་དེས་སླར་གསོ་བཅས་བྱེད་དགོས་པའི”རྩ་དོན་མཐའ་འཁྱོངས་བྱེད་དགོས། གཏེར་ཁུལ་ཁོར་ཡུག་སྦགས་བཙོག་བཟོས་པ་དང་གཏོར་སྐྱོན་བཏང་བར་གཏེར་ཁ་སྔོག་འདོན་བྱེད་དབང་ཡོད་མིར་བཅོས་སྐྱོང་དང་སླར་གསོ་བྱེད་པའི་འགན་འཁྲི་ཡོད།

གཏེར་རྫས་ཐོན་ཁུངས་སྔོག་འདོན་བྱེད་སྐབས་ངེས་པར་དུ་སྔོག་འདོན་བྱེད་རིང་ཐོན་པའི་ཆུ་སྙིགས་དང་། རླངས་སྙིགས། སྙིགས་རོ། རྡོ་རོ། གཏེར་རོ་བཅས་གཙང་མ་བཟོ་དགོས་པ་ལས་གཙང་ཆུ་དང་། མཚེའུ། ཆུ་མཛོད། དེ་བཞིན་ཆེད་དམིགས་སྐྱུར་འཇོག་བྱེད་སའི་ཡུར་བུ་ཕུད་པ་བཅས་ནང་གཤོ་བ་དང་འབུད་གཏོང་བྱེད་མི་ཆོག བཙོག་དངོས་འབུད་གཏོང་བྱ་རྒྱུ་དེ་ངེས་པར་དུ་རྒྱལ་ཁབ་དང་རང་སྐྱོང་ལྗོངས་ཀྱིས་གཏན་འབེབས་བྱས་པའི་བཙོག་སྐྱོན་འབུད་ཚད་ཀྱི་ཚད་གཞི་དང་འཚམ་པ་བྱེད་དགོས།

དོན་ཚན་ལྔ་བཅུ་པ། གཏེར་རྫས་ཐོན་ཁུངས་སྔོག་འདོན་བྱས་པའི་རྐྱེན་གྱིས་ས་གཤིས་ཁོར་ཡུག་ལ་གཏོར་སྐྱོན་ཕོག་པའམ་ཡང་ན་དེའི་རྐྱེན་གྱིས་ས་གཤིས་ཀྱི་གནོད་འཚེ་ཕོག་པའི་རིགས་ངེས་པར་དུ་འཕྲལ་མར་ས་གནས་དེ་གའི་ས་གཤིས་གཏེར་རྫས་གཙོ་འགན་སྡེ་ཚན་ལ་སྙན་སེང་ཞུ་དགོས་པ་དང་ཆབས་ཅིག དགོས་ངེས་ཀྱི་བྱ་ཐབས་སྤྱད་ནས་བསྐྱར་གསོ་དང་བཅོས་སྐྱོང་ཐུབ་པ་བྱས་ཏེ་གནོད་འཚེ་ཆེ་རུ་མི་འགྲོ་བ་བྱེད་དགོས།

དོན་ཚན་ང་གཅིག་པ། ས་ཞིང་དང་། རྩྭ་ཁ། ནགས་ས། ས་ཆུ་མི་ཤོར་བར་བྱེད་པའི་སྒྲིག་ཆས་བཅས་ལ་གཏེར་ཁ་སྔོག་འདོན་བྱས་པའི་རྐྱེན་གྱིས་གཏོར་སྐྱོན་ཕོག་ཚེ། གཏེར་འདོན་ཚན་པའམ་ཡང་ན་མི་སྒེར་གྱིས་ངེས་པར་དུ་ས་ཞིང་བསྐྱར་སློག་བསྐྱར་སྦོལ་དང་ཤིང་འཛུགས་རྩྭ་འདེབས་སོགས་ཀྱི་བྱེད་ཐབས་ལ་བརྟེན་ནས་བསྐྱར་གསོ་ཐུབ་པ་བྱེད་དགོས།

དོན་ཚན་ང་གཉིས་པ། གཏེར་ཁ་འདོན་དབང་ཡོད་མཁན་གྱིས་གཏེར་ཁ་སྔོག་འདོན་བྱེད་པའི་བརྒྱུད་རིམ་ནང་ངེས་པར་དུ་གཏེར་ཁུལ་གནས་སའི་རྫོང་རིམ་པའི་མི་དམངས་སྲིད་གཞུང་ས་གཤིས་གཏེར་ཁ་གཙོ་འགན་དོ་དམ་སྡེ་ཚན་ལ་གཏེར་ཁའི་ཐོན་ཁུངས་གསར་སྤེལ་བེད་སྤྱོད་བྱས་ཚུལ་གྱི་བསྡོམས་རྩིས་རེའུ་མིག་དང་དེ་བཞིན་འབྲེལ་ཡོད་ཀྱི་དཔྱད་ཡིག་གཞན་དག་འབུལ་དགོས།

རྫོང་རིམ་པ་ཡན་གྱི་མི་དམངས་སྲིད་གཞུང་ས་གཤིས་གཏེར་ཁའི་གཙོ་འགན་དོ་དམ་སྡེ་ཚན་གྱིས་ངེས་པར་དུ་གཏེར་ཁའི་ཐོན་ཁུངས་གསར་སྤེལ་བེད་སྤྱོད་བྱས་ཚུལ་གྱི་འབྲེལ་ཡོད་བསྡོམས་རྩིས་རེའུ་མིག་རིམ་པ་བཞིན་གོང་འབུལ་ཞུ་དགོས།

དོན་ཚན་ང་གསུམ་པ། རྫོང་རིམ་པ་ཡན་གྱི་མི་དམངས་སྲིད་གཞུང་ས་གཤིས་གཏེར་རྫས་གཙོ་འགན་དོ་དམ་སྡེ་ཚན་དང་། བཟོ་ཚོང་སྲིད་འཛིན་དོ་དམ་སྡེ་ཚན་གྱིས་ངེས་པར་དུ་གཏེར་ཁ་འདྲེན་འཚོང་གི་ལྷུ་ཚིགས་ལ་ལྟ་སྐུལ་དོ་དམ་བྱ་རྒྱུར་ཤུགས་སྣོན་རྒྱག་དགོས།

གཏེར་ཁ་ཉོ་སྒྲུབ་བྱེད་མཁན་ཚན་པའམ་གཏེར་ཁ་འདོན་མཁན་མི་སྒེར་ལ་ངེས་པར་དུ་གཏེར་ཁ་ཚོང་གཉེར་ལག་ཁྱེར་ཡོད་ཚེ། གཏེར་རིའི་ཁེ་ལས་ཀྱིས་གཞི་ནས་གཏེར་ཁ་བཙོངས་ཆོག

གཏེར་ཁ་འཚོང་མཁན་གྱི་གཏེར་རིའི་ཁེ་ལས་དང་གཏེར་ཁ་འདོན་མཁན་མི་སྒེར་ལ་ངེས་པར་དུ་གཏེར་འདོན་ལག་ཁྱེར་ཡོད་དགོས། གལ་སྲིད་གཏེར་འདོན་ལག་ཁྱེར་མེད་ཚེ་ཉོ་སྒྲུབ་ཚན་པ་དང་མི་སྒེར་གྱིས་གཏེར་ཁ་ཉོ་མི་ཆོག

རྒྱལ་ཁབ་དང་རང་སྐྱོང་ལྗོངས་ཀྱིས་གཏན་འཁེལ་བྱས་པའི་དམིགས་འཛུགས་ཚན་པས་གཅིག་གྱུར་ཉོ་སྒྲུབ་བྱ་རྒྱུའི་གཏེར་ཁའི་རིགས་ཡིན་ཚེ། ངེས་པར་དུ་དམིགས་འཛུགས་ཚན་པ་དེ་རང་ལ་འཚོང་དགོས་པ་ལས་ཚན་པ་དང་མི་སྒེར་གཞན་དག་སུས་ཀྱང་ཉོ་སྒྲུབ་བྱེད་མི་ཆོག་པ་དང་། གཏེར་རིའི་ཁེ་ལས་དང་གཏེར་ཁ་འདོན་མཁན་མི་སྒེར་གྱིས་དམིགས་འཛུགས་བྱས་མེད་པའི་ཚན་པར་བཙོང་མི་ཆོག

དོན་ཚན་ང་བཞི་པ། གཏེར་འདོན་ལག་ཁྱེར་གྱི་གོ་ཆོད་དུས་ཡུན་ནམ་ཡང་ན་དུས་བཀག་ཐིམ་རྗེས་ལས་འཛོལ་གྱིས་རྐྱེན་པས་ལས་མཚམས་འཇོག་པའམ་ཡང་ན་གཏེར་དོང་བཀབ་ཚེ། གཏེར་ཁ་འདོན་དབང་ཡོད་མཁན་གྱིས་ངེས་པར་དུ་ལས་མཚམས་མ་བཞག་གོང་ངམ་ཡང་ན་གཏེར་དོང་མ་བཀབ་གོང་གི་ཉིན་སུམ་ཅུའི་ཚུན་དུ་དེ་སྔའི་ལག་ཁྱེར་སྤྲོད་མཁན་ལས་ཁུངས་ལ་གཤམ་གསལ་གྱི་དཔྱད་ཡིག་འབུལ་དགོས་པ་དང་། ཆོག་མཆན་ཐོབ་རྗེས་གཞི་ནས་ལས་མཚམས་འཇོག་པའམ་ཡང་ན་གཏེར་དོང་བཀབ་དགོས་པ་མ་ཟད། གཏེར་འདོན་ལག་ཁྱེར་གྱི་ཐོ་བསུབ་པའི་འགྲོ་ལུགས་ཀྱང་གཉེར་དགོས་པ་སྟེ།

(གཅིག)ལས་མཚམས་འཇོག་པའམ་ཡང་ན་གཏེར་དོང་བསུབ་རྒྱུའི་རེ་འདུན་སྙན་ཞུ་དང་།

(གཉིས)གཏེར་ཁ་གསོག་འབོར་ཞིབ་བཤེར་རྩིས་བསུབ་ཀྱི་སྙན་ཞུ་དང་དེ་བཞིན་གཏེར་ཁ་གསོག་འབོར་དོ་དམ་སྡེ་ཚན་གྱི་ཆོག་མཆན་ཐོབ་ཡིག

(གསུམ)ལས་མཚམས་མ་བཞག་གོང་ངམ་ཡང་ན་གཏེར་དོང་མ་བཀབ་གོང་གི་སྔོག་འདོན་ལས་གྲྭའི་གནས་ཚུལ་དང་དེ་བཞིན་དེར་བདེ་འཇགས་མེད་པའི་ཉེན་ཁ་ཡོང་གཞིའི་གསལ་བཤད་དཔྱད་ཡིག

(བཞི)འབྲེལ་ཡོད་གཙོ་འགན་དོ་དམ་སྡེ་ཚན་གྱིས་ཞིབ་བཤེར་གཏན་འབེབས་བྱས་པའི་ས་ཞིང་བསྐྱར་སློག་བསྐྱར་སྦོལ་དང་ཁོར་ཡུག་སྲུང་སྐྱོབ་བྱས་ཚུལ་གྱི་སྙན་ཞུ་བཅས་སོ།

དོན་ཚན་ང་ལྔ་པ། གཏེར་ཁའི་ཐོན་ཁུངས་སྔོག་འདོན་གྱི་ལོ་འཁོར་ཞིབ་བཤེར་ལམ་ལུགས་དང་གཏེར་ཁ་ལྟ་ཞིབ་ལམ་ལུགས་ལག་ལེན་བསྟར་རྒྱུ་དང་། ཞིབ་ཕྲའི་བྱ་ཐབས་དེ་རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་ཁ་གཙོ་འགན་དོ་དམ་སྡེ་ཚན་གྱིས་བཟོ་རྒྱུ།

དོན་ཚན་ང་དྲུག་པ། རྫོང་རིམ་པ་ཡན་གྱི་མི་དམངས་སྲིད་གཞུང་ས་གཤིས་གཏེར་ཁ་གཙོ་འགན་དོ་དམ་སྡེ་ཚན་གྱིས་བཅའ་ཁྲིམས་དང་ཁྲིམས་སྲོལ་གྱི་གཏན་འབེབས་ལ་གཞིགས་ཏེ་གཏེར་ཁ་འཚོལ་དབང་དང་གཏེར་ཁ་སྔོག་འདོན་བྱེད་དབང་ཡོད་མཁན་ལ་ལྟ་སྐུལ་ཞིབ་བཤེར་བྱེད་དགོས་ལ། གཏེར་ཁ་འཚོལ་དབང་དང་གཏེར་ཁ་སྔོག་འདོན་བྱེད་དབང་ཡོད་མཁན་གྱིས་ངེས་པར་དུ་གནས་ཚུལ་ཇི་མ་ཇི་བཞིན་སྙན་སེང་ཞུ་བ་དང་སྦྲགས་འབྲེལ་ཡོད་ཀྱི་དཔྱད་ཡིག་མཁོ་འདོན་བྱེད་དགོས།

དོན་ཚན་ང་བདུན་པ། གཏེར་ཁ་འཚོལ་དབང་དང་སྔོག་འདོན་བྱེད་དབང་ཡོད་མཁན་དབར་གཏེར་ཁུལ་ཁྱབ་ཁོངས་ཐད་རྩོད་གཞི་བྱུང་ཚེ། དོ་བདག་ཕན་ཚུན་གྲོས་མོལ་བྱས་ནས་ཐག་གཅོད་བྱེད་དགོས་པ་མ་ཟད། གྲོས་མོལ་བྱས་འབྲས་གཏེར་ཁུལ་གནས་སའི་རྫོང་རིམ་པའི་མི་དམངས་སྲིད་གཞུང་ས་གཤིས་གཏེར་ཁ་གཙོ་འགན་དོ་དམ་སྡེ་ཚན་ལ་སྙན་སེང་ཐོ་འགོད་ཞུ་དགོས། གལ་ཏེ་གྲོས་མོལ་ལམ་ལྷོངས་མ་བྱུང་ཚེ་ལག་ཁྱེར་སྤྲོད་མཁན་ཐོ་འགོད་དོ་དམ་ལས་ཁུངས་ནང་གི་རིམ་པ་མཐོ་བ་དེས་ཁྲིམས་ལྟར་ཁྲུན་ཐག་གཅོད་དགོས།

ལེའུ་བདུན་པ། བཅའ་ཁྲིམས་ཀྱི་འགན་འཁྲི།

དོན་ཚན་ང་བརྒྱད་པ། སྲོལ་ཡིག་འདིའི་གཏན་འབེབས་ལས་འགལ་ཏེ་གཏེར་ཁའི་རྩད་ཞིབ་ལག་ཁྱེར་མེད་པར་རང་དགར་རྩད་ཞིབ་བྱེད་པ་དང་། ཆོག་མཆན་ཐོབ་པའི་རྩད་ཞིབ་ཁྱབ་ཁོངས་ལས་བརྒལ་ཏེ་རྩད་ཞིབ་བྱེད་རིགས་ལ་ཁྲིམས་འགལ་གྱི་བྱེད་སྤྱོད་མཚམས་འཇོག་བྱེད་དུ་འཇུག་རྒྱུ་དང་ཐ་ཚིག་སྒྲོག་རྒྱུ་མ་ཟད། གནས་ཚུལ་ཚབས་ཆེ་རིགས་ཡོད་མཁན་ལ་སྒོར་ཁྲི་10མན་གྱི་དངུལ་ཆད་འགེལ་ཆོག

དོན་ཚན་ང་དགུ་པ། སྲོལ་ཡིག་འདིའི་གཏན་འབེབས་ལས་འགལ་ཏེ་གཏེར་འདོན་ལག་ཁྱེར་མེད་པར་རང་དགར་གཏེར་ཁ་སྔོག་འདོན་བྱེད་པ་དང་། རང་དགར་རྒྱལ་ཁབ་ཀྱི་འཆར་འགོད་གཏེར་ཁུལ་དུ་སྐྱོད་པ། ཡང་ན་རྒྱལ་དམངས་དཔལ་འབྱོར་ལ་རིན་ཐང་ཆེན་པོ་ལྡན་པའི་གཏེར་ཁུལ་ཁྱབ་ཁོངས་སུ་གཏེར་ཁ་སྔོག་འདོན་བྱེད་པ། རྒྱལ་ཁབ་ནས་གཏན་འབེབས་ལག་བསྟར་བྱས་པའི་སྲུང་སྐྱོང་རང་བཞིན་གྱི་ཐོག་ནས་སྔོག་འདོན་བྱ་རྒྱུའི་དམིགས་བསལ་གཏེར་རིགས་རང་དགར་སྔོག་འདོན་བཅས་བྱས་ཚེ། སྔོག་འདོན་བྱེད་མཚམས་འཇོག་ཏུ་འཇུག་པ་དང་གྱོང་གུན་གསབ་ཏུ་བཅུག་སྟེ་སྔོག་འདོན་བྱས་པའི་གཏེར་ཁ་དང་ཁྲིམས་འགལ་ལས་བྱུང་བའི་ཐོབ་ཆ་རྣམས་གཞུང་བཞེས་གཏོང་རྒྱུ་དང་སྦྲགས་སྒོར་ཁྲི་10མན་གྱི་དངུལ་ཆད་འགེལ་ཆོག

ཆོག་མཆན་ཐོབ་པའི་གཏེར་ཁུལ་ཁྱབ་ཁོངས་ལས་བརྒལ་ཏེ་གཏེར་ཁ་སྔོག་འདོན་བྱས་ཚེ་ཆོག་མཆན་ཐོབ་པའི་ཁྱབ་ཁོངས་སུ་ཕྱིར་བཤིག་རྒྱག་ཏུ་བཅུག་ནས་སྔོག་འདོན་དང་གྱོང་གུན་གསབ་ཏུ་བཅུག་ཐོག་མཚམས་ཐིག་ལས་བརྒལ་ཏེ་སྔོག་འདོན་བྱས་པའི་གཏེར་ཁ་དང་ཁྲིམས་འགལ་ལས་བྱུང་བའི་ཐོབ་ཆ་རྣམས་གཞུང་བཞེས་གཏོང་རྒྱུ་དང་སྦྲགས་སྒོར་ཁྲི་10མན་གྱི་དངུལ་ཆད་འགེལ་ཆོག གལ་ཏེ་ཆོག་མཆན་ཐོབ་པའི་གཏེར་ཁུལ་ཁྱབ་ཁོངས་སུ་ཕྱིར་བཤིག་མ་བརྒྱབ་པར་སྔོག་འདོན་བྱས་ཏེ་གཏེར་ཁའི་ཐོན་ཁུངས་ལ་གཏོར་སྐྱོན་བཟོས་ཚེ་གཏེར་འདོན་ལག་ཁྱེར་མེད་པར་བཟོ་རྒྱུ།

དོན་ཚན་དྲུག་ཅུ་པ། སྲོལ་ཡིག་འདིའི་གཏན་འབེབས་ལས་འགལ་ཏེ་གཏེར་ཁ་འཚོལ་དབང་དང་། གཏེར་ཁ་འདོན་དབང་རང་དགར་ནང་བཤུག་བཏང་བ་དང་རང་དགར་ངང་གཏེར་ཁ་འདོན་དབང་བོགས་མར་བཏང་ཚེ་ཡོ་བསྲང་བྱེད་དུ་འཇུག་རྒྱུ་དང་། ཁྲིམས་འགལ་ལས་བྱུང་བའི་ཐོབ་ཆ་རྣམས་གཞུང་བཞེས་གཏོང་རྒྱུ་དང་སྦྲགས་སྒོར་ཁྲི་10མན་གྱི་དངུལ་ཆད་འགེལ་རྒྱུ། གནས་ཚུལ་ཚབས་ཆེན་ཡོད་རིགས་ལ་རྩད་ཞིབ་བྱེད་དབང་ལག་ཁྱེར་དང་གཏེར་འདོན་ལག་ཁྱེར་མེད་པར་བཟོ་རྒྱུ།

སྲོལ་ཡིག་འདིའི་གཏན་འབེབས་ལས་འགལ་ཏེ་རང་དགར་གཏེར་ཁ་འདོན་དབང་གཏའ་མར་འཇོག་མཁན་ལ་ཡོ་བསྲང་བྱེད་དུ་འཇུག་རྒྱུ་དང་། ཁྲིམས་འགལ་ལས་བྱུང་བའི་ཐོབ་ཆ་རྣམས་གཞུང་བཞེས་གཏོང་རྒྱུ་དང་སྦྲགས་སྒོར་5000མན་གྱི་དངུལ་ཆད་འགེལ་རྒྱུ། གནས་ཚུལ་ཚབས་ཆེ་རིགས་ལ་གཏེར་འདོན་ལག་ཁྱེར་མེད་པར་བཟོ་རྒྱུ།

དོན་ཚན་རེ་གཅིག་པ། སྲོལ་ཡིག་འདིའི་གཏན་འབེབས་ཇི་བཞིན་ལོ་འཁོར་སྙན་ཞུ་དང་འབྲེལ་ཡོད་ཀྱི་དཔྱད་ཡིག་མི་འབུལ་བ་དང་། ལྟ་སྐུལ་ཞིབ་བཤེར་དང་ལེན་མི་བྱེད་པའམ་ཡང་ན་མི་བདེན་རྫུན་སྒྲིག་བྱས་ཚེ་ཁྲིམས་འགལ་གྱི་བྱེད་སྤྱོད་མཚམས་འཇོག་བྱེད་དུ་འཇུག་རྒྱུ་དང་། ཐ་ཚིག་བསྒྲགས་ཀྱང་ད་དུང་ཁྲིམས་འགལ་གྱི་བྱེད་སྤྱོད་མཚམས་འཇོག་མི་བྱེད་མཁན་ལ་སྒོར་ཁྲི་5མན་གྱི་དངུལ་ཆད་འགེལ་ཆོག གནས་ཚུལ་ཚབས་ཆེ་རིགས་ལ་གཏེར་འདོན་ལག་ཁྱེར་མེད་པར་བཟོ་རྒྱུ།

དོན་ཚན་རེ་གཉིས་པ། སྲོལ་ཡིག་འདིའི་གཏན་འབེབས་ལས་འགལ་ཏེ་རྩད་ཞིབ་ལག་ཁྱེར་དང་གཏེར་འདོན་ལག་ཁྱེར་བརྗེ་སྒྱུར་གྱི་ཐོ་འགོད་དམ་ཡང་ན་མེད་པ་བཟོ་བའི་ཐོ་འགོད་ཀྱི་འགྲོ་ལུགས་མ་གཉེར་མཁན་ལ་ཡོ་བསྲང་བྱེད་དུ་འཇུག་རྒྱུ་དང་། དུས་བཀག་ལས་བརྒལ་ཡང་ཡོ་བསྲང་མ་བྱས་ཚེ་རྩད་ཞིབ་ལག་ཁྱེར་དང་གཏེར་འདོན་ལག་ཁྱེར་མེད་པར་བཟོ་རྒྱུ།

དོན་ཚན་རེ་གསུམ་པ། གཏེར་ཁ་འདོན་དབང་ཡོད་མཁན་གྱིས་གཏོར་བཤིག་རང་བཞིན་གྱི་གཏེར་ཁའི་ཐོན་ཁུངས་སྔོག་འདོན་བྱེད་པ་དང་། ཉེས་གསོག་གི་ཚད་ལ་མ་སླེབས་ཚེ་སྔོག་འདོན་བྱེད་མཚམས་འཇོག་ཏུ་འཇུག་རྒྱུ་དང་། སྔོག་འདོན་བྱས་པའི་གཏེར་ཁ་དང་ཁྲིམས་འགལ་ལས་བྱུང་བ་དག་གཞུང་བཞེས་གཏོང་རྒྱུ་དང་སྦྲགས་སྒོར་ཁྲི་5ཡན་ནས་ཁྲི་10མན་གྱི་དངུལ་ཆད་བཀལ་ཐོག་གཏེར་འདོན་ལག་ཁྱེར་མེད་པར་བཟོ་རྒྱུ།

དོན་ཚན་རེ་བཞི་པ། སྲོལ་ཡིག་འདིའི་དོན་ཚན་ང་གསུམ་པའི་གཏན་འབེབས་ལས་འགལ་ཏེ་གཏེར་ཁ་ཉོ་སྒྲུབ་དང་ཕྱིར་འཚོང་བྱས་ཚེ། ཉོ་འཚོང་གི་བྱེད་སྤྱོད་མཚམས་འཇོག་ཏུ་འཇུག་རྒྱུ་དང་། ཁྲིམས་འགལ་ལས་བྱུང་བའི་ཐོབ་ཆ་དག་གཞུང་བཞེས་གཏོང་རྒྱུ་དང་སྦྲགས་སྒོར་ཁྲི་1ཡན་ནས་ཁྲི་10མན་གྱི་དངུལ་ཆད་འགེལ་ཆོག

གཏེར་ཁའི་འཚོང་གཉེར་ལག་ཁྱེར་མེད་པར་གཏེར་ཁའི་ཐོན་ཁུངས་ཉོ་སྒྲུབ་དང་ཕྱིར་འཚོང་བྱེད་མཁན་ལ་རྒྱལ་ཁབ་དང་རང་སྐྱོང་ལྗོངས་ཀྱི་འབྲེལ་ཡོད་གཏན་འབེབས་གཞིར་བཟུང་ཆད་པ་གཅོད་རྒྱུ།

དོན་ཚན་རེ་ལྔ་པ། སྲོལ་ཡིག་འདིའི་གཏན་འབེབས་བཞིན་ངེས་པར་དུ་འཇལ་དགོས་པའི་འགྲོ་གྲོན་མ་འཇལ་མཁན་ལ་དུས་བཀག་ནང་འཇལ་དུ་འཇུག་རྒྱུ་དང་། དུས་བཀག་ནང་སྔར་བཞིན་མ་འཇལ་ཚེ་རྩད་ཞིབ་ལག་ཁྱེར་དང་གཏེར་འདོན་ལག་ཁྱེར་མེད་པར་བཟོ་རྒྱུ།

དོན་ཚན་རེ་དྲུག་པ། སྲོལ་ཡིག་འདིའི་དོན་ཚན་ཞེ་དགུ་པ་དང་། ལྔ་བཅུ་པ། ང་གཅིག་པ་བཅས་ཀྱི་གཏན་འབེབས་ལས་འགལ་མཁན་ལ་འབྲེལ་ཡོད་ཀྱི་བཅའ་ཁྲིམས་དང་ཁྲིམས་སྲོལ་གཞིར་བཟུང་ཆད་པ་གཅོད་རྒྱུ་དང་། གཞན་གྱི་ཐོན་སྐྱེད་དང་འཚོ་བར་གྱོང་གུན་བཟོས་ཚེ་ཁྲིམས་ལྟར་སྐྱིན་ཚབ་འཇལ་དུ་འཇུག་རྒྱུ།

དོན་ཚན་རེ་བདུན་པ། སྲོལ་ཡིག་འདིའི་དོན་ཚན་ང་བརྒྱད་པ་ནས་དོན་ཚན་རེ་གཉིས་པའི་བར་དང་། དོན་ཚན་རེ་ལྔ་པ་བཅས་ཀྱི་ནང་གཏན་འབེབས་བྱས་པའི་སྲིད་འཛིན་གྱི་ཆད་པ་གཅོད་རྒྱུ་དེ་རྫོང་པ་རིམ་ཡན་གྱི་མི་དམངས་སྲིད་གཞུང་ས་གཤིས་གཏེར་ཁ་གཙོ་འགན་དོ་དམ་སྡེ་ཚན་གྱིས་གཏན་འཁེལ་བྱ་རྒྱུ་དང་། དོན་ཚན་རེ་གསུམ་པའི་ནང་གཏན་འབེབས་བྱས་པའི་སྲིད་འཛིན་གྱི་ཆད་པ་གཅོད་རྒྱུ་དེ་རང་སྐྱོང་ལྗོངས་མི་དམངས་སྲིད་གཞུང་ས་གཤིས་གཏེར་ཁ་གཙོ་འགན་དོ་དམ་སྡེ་ཚན་ནས་གཏན་འཁེལ་བྱ་རྒྱུ། དོན་ཚན་རེ་བཞི་པའི་ནང་གཏན་འབེབས་བྱས་པའི་སྲིད་འཛིན་གྱི་ཆད་པ་གཅོད་རྒྱུ་དེ་རྫོང་རིམ་པ་རིམ་ཡན་གྱི་མི་དམངས་སྲིད་གཞུང་བཟོ་ཚོང་སྲིད་འཛིན་དོ་དམ་སྡེ་ཚན་གྱིས་གཏན་འཁེལ་བྱ་རྒྱུ།

རྩད་ཞིབ་ལག་ཁྱེར་དང་གཏེར་འདོན་ལག་ཁྱེར་མེད་པར་བཟོ་རྒྱུའི་སྲིད་འཛིན་གྱི་ཆད་པ་གཅོད་རིགས་དེ་སྔའི་ཐོ་འགོད་དོ་དམ་ལས་ཁུངས་གྱིས་གཏན་འཁེལ་བྱ་རྒྱུ།

དོན་ཚན་རེ་བརྒྱད་པ། ས་གཤིས་གཏེར་ཁ་གཙོ་འགན་དོ་དམ་སྡེ་ཚན་གྱི་རྒྱལ་ཁབ་ལས་དོན་པའམ་ཡང་ན་འབྲེལ་ཡོད་སྡེ་ཚན་གྱི་རྒྱལ་ཁབ་ལས་བྱེད་པ་གཞན་དག་གིས་འགན་དབང་གང་བྱུང་སྤྱོད་པ་དང་། ཉེ་ཕྱོགས་གཡོ་ཟོལ། རང་འགན་སྣང་མེད། མི་བདེན་རྫུན་སྒྲིག གསང་བ་ཕྱིར་གྱར་བཅས་བྱས་པའི་ཁར་གཏེར་ཁའི་ཐོན་ཁུངས་རྩད་ཞིབ་དང་སྔོག་འདོན་བྱ་རྒྱུར་ཁྲིམས་འགལ་གྱིས་ཆོག་མཆན་སྤྲད་ཀྱང་། ཉེས་གསོག་གི་ཚད་ལ་མ་སླེབས་ཚེ་རང་གནས་སའི་ཚན་པ་དང་གོང་རིམ་གཙོ་འགན་དོ་དམ་ལས་ཁུངས་སམ་ཡང་ན་ལྟ་ཞིབ་ལས་ཁུངས་ཀྱིས་སྲིད་འཛིན་ཆད་པ་གཅོད་རྒྱུ།

དོན་ཚན་རེ་དགུ་པ། སྲོལ་ཡིག་འདིའི་གཏན་འབེབས་ལས་འགལ་ཏེ་ཉེས་གསོག་གི་ཚད་ལ་སླེབས་ཚེ་ཁྲིམས་འཛིན་ལས་ཁུངས་ཀྱིས་ཁྲིམས་ལྟར་ཉེས་དོན་གྱི་འགན་འཁྲི་བདའ་འདེད་གཏོང་རྒྱུ།

ལེའུ་བརྒྱད་པ། ཞར་བྱུང་།

དོན་ཚན་བདུན་ཅུ་པ། སྲོལ་ཡིག་འདི་1999ལོའི་ཟླ་7ཚེས་1ཉིན་ནས་བཟུང་ལག་ལེན་བསྟར་རྒྱུ།