ཟླ་11ཚེས་5ཉིན། རང་སྐྱོང་ལྗོངས་མི་དམངས་སྲིད་གཞུང་དང་རང་སྐྱོང་ལྗོངས་སྤྱི་ཁྱབ་བཟོ་ཚོགས་ཀྱི་མཉམ་འབྲེལ་ཚོགས་འདུ་འཚོགས་པ་རེད། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཀརྨ་ཚེ་བརྟན་གྱིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་ཧྭ་རྒྱལ་ཡོངས་སྤྱི་ཁྱབ་བཟོ་ཚོགས་བཙུགས་ནས་ལོ་ངོ་100 འཁོར་བར་རྟེན་འབྲེལ་ཞུ་བ་དང་རྒྱལ་ཡོངས་ངལ་རྩོལ་དཔེ་བཟང་དང་སྔོན་ཐོན་ལས་དོན་པའི་གཟེངས་བསྟོད་ཚོགས་ཆེན་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་དང་བོད་ལ་གཟིགས་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། ལྗོངས་ཏང་ཨུད་ཀྱི་ལས་ཀའི་བླང་བྱ་གཞིར་བཟུང་། མི་རིགས་ཁག་གི་ལས་བཟོ་དང་མང་ཚོགས་རྒྱ་ཁྱབ་ངང་མཐུན་སྒྲིལ་སྐུལ་སློང་བྱས་ཏེ་འབད་འབུངས་ཡར་བརྩོན་གྱི་རྣམ་འགྱུར་ཐོག་ནས་དུས་རབས་ཀྱི་རླབས་རྒྱུན་གྱི་མདུན་དུ་དཔའ་ངར་ཆེན་པོས་ལངས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་བོད་ཀྱི་ལེའུ་རྩོམ་ཆེད་བཟོ་པའི་གྲལ་རིམ་གྱི་བློ་གྲོས་དང་སྟོབས་ཤུགས་སྐྱེས་སུ་འབུལ་དགོས་ཞེས་ནན་བཤད་གནང་བ་རེད།

ཀརྨ་ཚེ་བརྟན་གྱིས་ནན་བཤད་གནང་དོན། དུས་རབས་ཀྱི་བརྗོད་དོན་གཙོ་བོར་དམ་པོར་གཞིགས་པ་དང་ལྟེ་བ་དང་སྤྱི་ཡོངས་ལ་དམིགས་ནས་རང་འགུལ་ངང་བྱས་རྗེས་ཧུར་ཐག་བཞག་སྟེ། འཛུགས་གཏོད་བཞིར”ཞབས་འདེགས་ཧུར་ཐག་ཞུ་རིང་ཐེག་པ་ཁུར་ལེན་མངོན་པ་དང་།ལས་བཟོ་མང་ཚོགས་ཀྱི་ལས་སྒྲུབ་ལས་གཏོད་ལ་མཐུན་སྒྲིལ་སྣེ་ཁྲིད་བྱེད་རིང་སྐུལ་ལྕག་དང་ནུས་ཤུགས་འདོན་པ། ལྷག་བསམ་རྣམ་དག་གིས་ལས་བཟོ་མང་ཚོགས་ལ་ཞབས་འདེགས་ཞུ་བ་དང་ལས་བཟོ་མང་ཚོགས་རྣམས་ཕྱོགས་ཡོངས་ནས་འཕེལ་རྒྱས་ཡོང་བར་སྐུལ་འདེད་གཏོང་བའི་ཐད་སེམས་ནུས་འདོན་དགོས། སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་བརྟན་པོ་བཙུགས་ནས་ལས་བཟོའི་དཔུང་ཁག་གི་མཐུན་སྒྲིལ་གཅིག་གྱུར་དང་སྤྱི་ཚོགས་ཀྱི་སྤྱི་ཡོངས་ཞི་མཐུན་བརྟན་ལྷིང་སྲུང་སྐྱོང་མཐའ་གཅིག་ཏུ་བྱེད་དགོས། ས་མཐོའི་ཁྱད་ཆོས་དང་དགེ་མཚན་ལྡན་པའི་ཐོན་ལས་འཕེལ་རྒྱས་གཏོང་བར་དམིགས་ནས། “བོད་ཀྱི་བཟོ་བོ”དང“རྒྱལ་ཁབ་ཆེན་པོའི་བཟོ་བོ”སྐྱེད་སྲིང་གི་འཆར་གཞི་རྒྱུན་མཐུད་སྤེལ་བ་དང་། རྒྱ་ཆེའི་ལས་བཟོ་ཚོས“ལོ་ལྔ་ཚན་བཅོ་ལྔ་པའི”སྤུས་ཚད་མཐོ་བའི་འཕེལ་རྒྱས་ལ་བྱས་རྗེས་འཇོག་པར་སྐུལ་སློང་དང་ལྕག་སྐུལ་བྱེད་པ། ལས་བཟོའི་ཁྲིམས་མཐུན་ཁེ་དབང་སྲུང་སྐྱོང་ཡག་པོ་བྱས་ནས་ལས་བཟོ་མང་ཚོགས་ཀྱི་བདེ་རྩ་ཆེ་རུ་གཏོང་གང་ཐུབ་བྱེད་པ། ངལ་རྩོལ་དཔེ་བཟང་བའི་སྙིང་སྟོབས་དང་། ངལ་རྩོལ་སྙིང་སྟོབས། བཟོ་བོའི་སྙིང་སྟོབས་བཅས་དར་སྤེལ་ཤུགས་ཆེན་བཏང་སྟེ། ངལ་རྩོལ་དཔེ་བཟང་བར་བརྩི་འཇོག་དང་། སེམས་ཁུར། གསར་གཏོད་ལ་སྐུལ་མ་གཏོང་བ་བཅས་ཀྱི་སྤྱི་ཚོགས་ཀྱི་དར་སྲོལ་བཟང་པོ་ཧུར་ཐག་སྐྲུན་དགོས།

ཀརྨ་ཚེ་བརྟན་གྱིས་ནན་བཤད་གནང་དོན། བཟོ་ཚོགས་ནི་ཏང་གིས་ལས་བཟོ་མང་ཚོགས་དང་འབྲེལ་བ་བྱེད་པའི་སྦྲེལ་ཟམ་དང་སྦྲེལ་ཐག་ལྟ་བུ་རེད། ལྗོངས་ཡོངས་ཀྱི་སྲིད་གཞུང་ཁོངས་གཏོགས་ཀྱིས་སྔར་རྒྱུན་བཞིན་བཟོ་ཚོགས་ཀྱི་ལས་དོན་ལ་རྒྱབ་སྐྱོར་བྱེད་པ་དང་། མཉམ་འབྲེལ་ཚོགས་འདུའི་ལམ་ལུགས་མཐའ་འཁྱོངས་དང་འཐུས་ཚང་དུ་གཏོང་བ། འབྲེལ་གཏུག་དང་མཐུན་སྦྱོར་བྱེད་ཤུགས་ཆེ་རུ་གཏོང་བ། གྲོས་ཐག་བཅད་པའི་དོན་དག་དོན་འཁྱོལ་བྱེད་པ། བཟོ་ཚོགས་ཀྱིས་ཁྲིམས་ལྟར་འགན་འཁྲི་སྒྲུབ་པ་དང་ལས་བཟོ་མང་ཚོགས་ལ་ཞབས་འདེགས་དེ་བས་ལེགས་པ་ཞུ་བར་སྐུལ་འདེད་གཏོང་བ་བཅས་བྱས་ཏེ། སྲིད་གཞུང་དང་བཟོ་ཚོགས་ཕན་ཚུན་རྒྱབ་སྐྱོར་དང་གཞོགས་འདེགས་བྱེད་པའི་རྣམ་པ་བཟང་པོ་ཆགས་པར་བྱེད་དགོས།

ཐང་མིང་དབྱིང་གིས་རང་སྐྱོང་ལྗོངས་སྤྱི་ཁྱབ་བཟོ་ཚོགས་ཀྱི་ལས་ཀའི་གནས་ཚུལ་བརྡ་ཁྱབ་བཏང་བ་དང་། ལུའོ་མེ་ཡིས་ཚོགས་འདུ་གཙོ་སྐྱོང་གནང་བ་རེད། ཚོགས་འདུའི་ཐོག་སྲིད་གཞུང་གིས་བཟོ་ཚོགས་འཕེལ་རྒྱས་ལ་རྒྱབ་སྐྱོར་བྱེད་པའི་འབྲེལ་ཡོད་གནས་ཚུལ་སྐོར་གྱི་སྙན་སེང་ཉན་པ་རེད།