དཀར་ཆག

ལེའུ་དང་པོ། སྤྱིའི་རྩ་དོན།

ལེའུ་གཉིས་པ། སྐྱེ་ཁམས་བདེ་འཇགས་ཀྱི་བཀོད་པ།

ལེའུ་གསུམ་པ། སྐྱེ་ཁམས་སྲུང་སྐྱོབ་དང་སླར་གསོ་བྱེད་ཕྱོགས།

ལེའུ་བཞི་པ། སྐྱེ་ཁམས་ཀྱི་ཉེན་ཁ་འགོག་ཟོན་བྱེད་ཕྱོགས།

ལེའུ་ལྔ་པ། འགན་སྲུང་དང་ལྟ་སྐུལ་བྱེད་ཕྱོགས།

ལེའུ་དྲུག་པ། བཅའ་ཁྲིམས་ཀྱི་འགན་འཁྲི།

ལེའུ་བདུན་པ། ཞར་བྱུང་།

བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་སྤྱི་བསྒྲགས།

〔2025〕ཡིག་ཨང་7པ།

《〈ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མཚོ་བོད་ས་མཐོའི་སྐྱེ་ཁམས་སྲུང་སྐྱོབ་བཅའ་ཁྲིམས〉ལག་བསྟར་བྱ་རྒྱུའི་བོད་རང་སྐྱོང་ལྗོངས་ཀྱི་བྱ་ཐབས》འདི་2025ལོའི་ཟླ་3ཚེས་28ཉིན་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་བཅོ་ལྔ་པའི་ཐོག་གྲོས་འཆམ་བྱུང་དོན་བཞིན་ད་ལྟ་ཁྱབ་བསྒྲགས་བྱ་རྒྱུ་ཡིན་ཞིང་། 2025ལོའི་ཟླ་8ཚེས་1ཉིན་ནས་ལག་བསྟར་བྱ་རྒྱུ།

བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་།

2025ལོའི་ཟླ་3ཚེས་28ཉིན།

ལེའུ་དང་པོ། སྤྱིའི་རྩ་དོན།

དོན་ཚན་དང་པོ། སྐྱེ་ཁམས་སྲུང་སྐྱོབ་ལ་ཤུགས་སྣོན་རྒྱག་པ་དང་། སྐྱེ་ཁམས་ཀྱི་ཉེན་ཁ་འགོག་ཟོན་བྱེད་པ། སྐྱེ་ཁམས་ཀྱི་བདེ་འཇགས་འགན་སྲུང་བྱེད་པ་བཅས་ཀྱི་ཐོག་ནས་མཛེས་སྡུག་ལྡན་པའི་བོད་ལྗོངས་དང་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་སྐྲུན་བྱས་ཏེ་རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་བཅད་བརྟན་པོར་འཛུགས་པ་དང་། དཔལ་འབྱོར་དང་སྤྱི་ཚོགས་རྒྱུན་མཐུད་གོང་འཕེལ་ཡོང་བར་སྐུལ་འདེད་བཏང་ནས་མི་དང་རང་བྱུང་ཁམས་ཞི་མཐུན་མཉམ་གནས་ཡོང་ཐུབ་པ་བྱ་ཆེད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མཚོ་བོད་ས་མཐོའི་སྐྱེ་ཁམས་སྲུང་སྐྱོབ་བཅའ་ཁྲིམས》སོགས་བཅའ་ཁྲིམས་དང་སྲིད་འཛིན་ཁྲིམས་སྲོལ་གཞིར་བཟུང་རང་སྐྱོང་ལྗོངས་ཀྱི་དོན་དངོས་དང་ཟུང་འབྲེལ་གྱིས་བྱ་ཐབས་འདི་གཏན་ལ་ཕབ་པ་ཡིན།

དོན་ཚན་གཉིས་པ། རང་སྐྱོང་ལྗོངས་ཀྱི་སྲིད་འཛིན་ས་ཁོངས་ནང་སྐྱེ་ཁམས་སྲུང་སྐྱོབ་དང་འབྲེལ་བ་ཡོད་པའི་བྱེད་སྒོ་སྤེལ་སྐབས་བྱ་ཐབས་འདི་སྤྱད་ན་འཐུས། བྱ་ཐབས་འདིའི་ནང་གཏན་འབེབས་བྱས་མེད་ཕྱིན་འབྲེལ་ཡོད་བཅའ་ཁྲིམས་དང་ཁྲིམས་སྲོལ་གྱི་གཏན་འབེབས་གཞན་དག་སྤྱད་ན་འཐུས།

དོན་ཚན་གསུམ་པ། སྐྱེ་ཁམས་སྲུང་སྐྱོབ་ལས་དོན་སྤེལ་སྐབས་ངེས་པར་དུ་རང་བྱུང་ཁམས་ལ་བརྩི་འཇོག་དང་། རང་བྱུང་ཁམས་ལ་བསྟུན་པ། རང་བྱུང་ཁམས་ལ་སྲུང་སྐྱོབ་བཅས་བྱ་རྒྱུ་མཐའ་འཁྱོངས་བྱེད་དགོས་པ་དང་། སྐྱེ་ཁམས་སྲུང་སྐྱོབ་བྱ་རྒྱུ་དེ་གལ་འགངས་ཆེ་ཤོས་སུ་འཛིན་རྒྱུ་མཐའ་འཁྱོངས་ཀྱིས་རང་བྱུང་སླར་གསོ་ཡོང་རྒྱུ་གཙོ་བོར་བཟུང་ནས་རང་བྱུང་སྐྱེ་ཁམས་ཀྱི་བདེ་འཇགས་མཐའ་ཚད་བརྟན་པོ་སྲུང་དགོས་པ། གཅིག་གྱུར་འཆར་འགོད་ཀྱིས་མཐུན་སྦྱོར་དང་། རིགས་དབྱེ་ཇུས་འདོན། ཚན་རིག་དང་མཐུན་པའི་འགོག་ཟོན། རིམ་ལྡན་བཅོས་སྐྱོང་བཅས་བྱ་རྒྱུ་མཐའ་འཁྱོངས་བྱེད་དགོས་པ་བཅས་ཡིན།

དོན་ཚན་བཞི་པ། རང་སྐྱོང་ལྗོངས་ཀྱིས་སྐྱེ་ཁམས་སྲུང་སྐྱོབ་ཀྱི་མཐུན་སྦྱོར་ལམ་སྲོལ་འཛུགས་པ་དང་འཐུས་སྒོ་ཚང་དུ་བཏང་ནས་སྐྱེ་ཁམས་སྲུང་སྐྱོབ་ལས་དོན་ཁྲོད་ཀྱི་གལ་ཆེའི་གནད་དོན་ཞིབ་འཇུག་ཐག་གཅོད་བྱེད་དགོས།

རྫོང་རིམ་ཡན་གྱི་མི་དམངས་སྲིད་གཞུང་གིས་ངེས་པར་དུ་སྐྱེ་ཁམས་སྲུང་སྐྱོབ་ལས་དོན་ལ་སྒྲིག་འཛུགས་དང་འགོ་ཁྲིད་བྱ་རྒྱུར་ཤུགས་སྣོན་བརྒྱབ་སྟེ་སྐྱེ་ཁམས་སྲུང་སྐྱོབ་བྱེད་འགན་འཁུར་དགོས་ཤིང་། སྐྱེ་ཁམས་སྲུང་སྐྱོབ་ལས་དོན་དེ་རྒྱལ་དམངས་དཔལ་འབྱོར་དང་སྤྱི་ཚོགས་གོང་འཕེལ་གཏོང་རྒྱུའི་འཆར་འགོད་ནང་འཇུག་རྒྱུ་མ་ཟད། སྐྱེ་ཁམས་སྲུང་སྐྱོབ་བྱེད་པར་མཁོ་བའི་འགྲོ་གྲོན་དག་གཏན་འབེབས་བཞིན་རིམ་པ་དེ་གའི་ནོར་སྲིད་སྔོན་རྩིས་ནང་འཇུག་རྒྱུ།

རྫོང་རིམ་ཡན་གྱི་མི་དམངས་སྲིད་གཞུང་གི་འཕེལ་སྒྱུར་དང་། ནོར་སྲིད། རང་བྱུང་ཐོན་ཁུངས། སྐྱེ་ཁམས་ཁོར་ཡུག སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན། ཆུ་དོན་སྲིད་འཛིན། ཞིང་ལས་གྲོང་གསེབ། རིག་གནས་དང་ཡུལ་སྐོར། ནགས་ལས་རྩྭ་ཐང་སོགས་འབྲེལ་ཡོད་སྡེ་ཚན་གྱིས་འགན་འཁྲི་ཁག་བགོས་ལྟར་སྐྱེ་ཁམས་སྲུང་སྐྱོབ་ཀྱི་འབྲེལ་ཡོད་ལས་དོན་ལ་འགན་འཁུར་དགོས།

ཤང་དང་གྲོང་རྡལ་མི་དམངས་སྲིད་གཞུང་དང་ཁྲོམ་གཞུང་དོན་གཅོད་ཁང་གིས་སྲིད་འཛིན་ས་ཁོངས་དེ་གའི་སྐྱེ་ཁམས་སྲུང་སྐྱོབ་ལས་དོན་ཡག་པོ་སྒྲུབ་དགོས།

ཡུལ་མི(གྲོང་མི)ཨུ་ཡོན་ལྷན་ཁང་གིས་ངེས་པར་དུ་མི་དམངས་སྲིད་གཞུང་དང་འབྲེལ་ཡོད་སྡེ་ཚན་ལ་གཞོགས་འདེགས་བྱས་ཏེ་སྐྱེ་ཁམས་སྲུང་སྐྱོབ་ཀྱི་ལས་དོན་ཡག་པོ་སྒྲུབ་དགོས།

དོན་ཚན་ལྔ་པ། འཕེལ་སྒྱུར་དང་། ཚན་རྩལ། སྤྱི་བདེ། ནོར་སྲིད། རང་བྱུང་ཐོན་ཁུངས། སྐྱེ་ཁམས་ཁོར་ཡུག སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན། ཆུ་དོན་སྲིད་འཛིན། ཞིང་ལས་གྲོང་གསེབ། རིག་གནས་དང་ཡུལ་སྐོར། འཕྲལ་སྡོམ་དོ་དམ། ནགས་ལས་རྩྭ་ཐང་། གནམ་གཤིས། ས་ཡོམ་སོགས་འབྲེལ་ཡོད་སྡེ་ཚན་གྱིས་ངེས་པར་དུ་སྐྱེ་ཁམས་སྲུང་སྐྱོབ་ཀྱི་མཉམ་སྒྲུབ་དང་ཆ་འཕྲིན་མཉམ་སྤྱོད་ལམ་སྲོལ་འཛུགས་པ་དང་འཐུས་སྒོ་ཚང་དུ་བཏང་སྟེ། སྡེ་ཚན་ཁག་དབར་མཐུན་སྦྱོར་གཞོགས་འདེགས་ཀྱིས་ཆ་འཕྲིན་མཉམ་སྤྱོད་བྱ་རྒྱུར་ཤུགས་སྣོན་བརྒྱབ་ནས་སྐྱེ་ཁམས་སྲུང་སྐྱོབ་ལས་དོན་ལ་མཉམ་དུ་སྐུལ་འདེད་གཏོང་དགོས།

དོན་ཚན་དྲུག་པ། རིམ་ཁག་མི་དམངས་སྲིད་གཞུང་དང་དེ་བཞིན་འཕེལ་སྒྱུར་དང་། སློབ་གསོ། རང་བྱུང་ཐོན་ཁུངས། སྐྱེ་ཁམས་ཁོར་ཡུག ཆུ་དོན་སྲིད་འཛིན། ཞིང་ལས་གྲོང་གསེབ། རིག་གནས་དང་ཡུལ་སྐོར། ནགས་ལས་རྩྭ་ཐང་སོགས་འབྲེལ་ཡོད་སྡེ་ཚན་གྱིས་བྱ་ཐབས་ནུས་ལྡན་སྤྱད་དེ་མཚོ་བོད་ས་མཐོའི་སྲོལ་རྒྱུན་གྱི་སྐྱེ་ཁམས་རིག་གནས་ཤུལ་བཞག་སྲུང་སྐྱོབ་བྱས་ནས་མཚོ་བོད་ས་མཐོའི་ཕུལ་བྱུང་གི་སྐྱེ་ཁམས་རིག་གནས་དར་སྤེལ་གཏོང་དགོས་པ་དང་། སྐྱེ་ཁམས་སྲུང་སྐྱོབ་བྱ་རྒྱུའི་སྐོར་གྱི་བཅའ་ཁྲིམས་དང་ཁྲིམས་སྲོལ་དང་། དེ་བཞིན་ཚན་རིག་ཤེས་བྱ་དྲིལ་བསྒྲགས་དང་ཁྱབ་གདལ་གཏོང་བའི་ལས་དོན་ལ་ཤུགས་སྣོན་བརྒྱབ་སྟེ། རྒྱལ་ཡོངས་ཀྱི་སྐྱེ་ཁམས་ཉིན་མོ་དང་རང་སྐྱོང་ལྗོངས་ཀྱི་སྐྱེ་ཁམས་ཤེས་དཔལ་དྲིལ་བསྒྲགས་ཟླ་བ་སོགས་དང་ཟུང་འབྲེལ་བྱས་ནས་སྐྱེ་ཁམས་སྲུང་སྐྱོབ་བརྗོད་དོན་གཙོ་བོར་བཟུང་བའི་དྲིལ་བསྒྲགས་སློབ་གསོའི་བྱེད་སྒོ་སྤེལ་ཏེ་སྐྱེ་ཁམས་ཤེས་དཔལ་འདུ་ཤེས་བརྒྱུད་སྤེལ་བྱེད་པ་མ་ཟད། འབྱུང་འཕྲོད་ཐཱན་ཉུང་གི་འཚོ་བ་སྐྱེལ་སྟངས་དར་སྤེལ་བཏང་ནས། དམངས་ཡོངས་ཀྱི་སྐྱེ་ཁམས་ཤེས་དཔལ་གྱི་བྱང་ཚད་མཐོ་རུ་གཏོང་དགོས།

གཞི་རིམ་མང་ཚོགས་རང་བཞིན་གྱི་རང་སྐྱོང་རྩ་འཛུགས་དང་། སྤྱི་ཚོགས་རྩ་འཛུགས། སྐྱེ་ཁམས་ཁོར་ཡུག་སྲུང་སྐྱོབ་དང་བླངས་པ་བཅས་ཀྱིས་སྐྱེ་ཁམས་སྲུང་སྐྱོབ་སྐོར་གྱི་བཅའ་ཁྲིམས་དང་ཁྲིམས་སྲོལ། དེ་བཞིན་ཚན་རིག་ཤེས་བྱ་དྲིལ་བསྒྲགས་དང་ཁྱབ་གདལ་གཏོང་བའི་ལས་དོན་ལ་བསྔགས་སྐུལ་དང་རྒྱབ་སྐྱོར་བྱས་ཏེ་སྐྱེ་ཁམས་སྲུང་སྐྱོབ་ཀྱི་རྣམ་པ་བཟང་པོ་གཏོད་དགོས།

གསར་འགྱུར་སྨྱན་སྦྱོར་གྱིས་ངེས་པར་དུ་སྐྱེ་ཁམས་སྲུང་སྐྱོབ་ཀྱི་བཅའ་ཁྲིམས་ཁྲིམས་སྲོལ་དང་ཚན་རིག་ཤེས་བྱའི་སྐོར་གྱི་སྤྱི་ཕན་དྲིལ་བསྒྲགས་ལས་དོན་སྤེལ་ནས་སྐྱེ་ཁམས་སྲུང་སྐྱོབ་ཐད་ཀྱི་ཁྲིམས་འགལ་བྱ་སྤྱོད་ལ་ཁྲིམས་ལྟར་གླེང་ཕྱོགས་ཀྱི་ལྟ་སྐུལ་བྱེད་དགོས།

དོན་ཚན་བདུན་པ། རང་སྐྱོང་ལྗོངས་ཀྱིས་སྐྱེ་ཁམས་སྲུང་སྐྱོབ་ཐད་ལ་ཚན་རིག་དང་མཐུན་པའི་རྟོག་ཞིབ་དང་ཞིབ་འཇུག་བྱ་རྒྱུར་སྐུལ་མ་གཏོང་བ་དང་སྦྲགས་རྒྱབ་སྐྱོར་བྱས་ནས། གནམ་གཤིས་འགྱུར་ལྡོག་དང་། སྐྱེ་དངོས་ཀྱི་སྣ་མང་རང་བཞིན། སྐྱེ་ཁམས་སྲུང་སྐྱོབ་དང་སླར་གསོ། ཆུ་དཔྱད་དང་ཆུའི་ཐོན་ཁུངས། གངས་རི་དང་འཁྱགས་རོམ། ས་མཐོའི་འཁྱགས་ས། ས་ཆུ་སྲུང་འཛིན། ཐང་རྒོད་དུ་འགྱུར་རིགས་འགོག་བཅོས། ཆུ་མཚོ་རིམ་འགྱུར། ས་གཤིས་ཁོར་ཡུག རང་བྱུང་གནོད་འཚེར་ལྟ་བཤེར་གྱིས་ཉེན་ཟོན་སྔོན་བརྡ་དང་འགོག་བཅོས། ནུས་རྒྱུ་དང་གནམ་གཤིས་ཐོན་ཁུངས་གསར་སྤེལ་བེད་སྤྱོད་དང་སྲུང་སྐྱོབ། སྐྱེ་ཁམས་མ་ལག་ཐཱན་འདུས། སོན་རྒྱུའི་ཐོན་ཁུངས་སྲུང་སྐྱོབ་སོགས་ཁྱབ་ཁོངས་ཀྱི་གལ་ཆེའི་ཚན་རྩལ་གནད་དོན་ལ་ཞིབ་འཇུག་དང་ཚན་རྩལ་གྱི་རྨང་གཞིའི་སྒྲིག་བཀོད་གལ་ཆེན་འཛུགས་སྐྲུན་བཅས་བྱ་རྒྱུར་ཤུགས་སྣོན་བརྒྱབ་ནས་སྐྱེ་ཁམས་སྲུང་སྐྱོབ་ཀྱི་ཆེད་ལས་ལག་རྩལ་ཤེས་ལྡན་པ་གསོ་སྐྱོང་བྱེད་མགྱོགས་སུ་བཏང་སྟེ་སྐྱེ་ཁམས་སྲུང་སྐྱོབ་ཐད་ཀྱི་ཚན་རྩལ་ཆུ་ཚད་མཐོ་རུ་གཏོང་དགོས།

དོན་ཚན་བརྒྱད་པ། ཚན་པ་གང་ཞིག་དང་མི་སུ་ཞིག་ཡིན་རུང་ཚང་མར་སྐྱེ་ཁམས་སྲུང་སྐྱོབ་བྱེད་པའི་འོས་འགན་ཡོད་ལ། སྐྱེ་ཁམས་སྲུང་སྐྱོབ་ཐད་ཀྱི་ཁྲིམས་འགལ་བྱེད་སྤྱོད་ཁྲིམས་བཞིན་ཐེར་འདོན་དང་ཞུ་གཏུག་རྒྱག་པའི་དབང་ཆའང་ཡོད།

ཚན་པ་དང་མི་སྒེར་གྱིས་ཁྲིམས་བཞིན་ཞལ་འདེབས་འབུལ་བ་དང་། རོགས་དངུལ་སྤྲོད་པ། དང་བླངས་ཞབས་ཞུ་སྒྲུབ་པ་སོགས་ཀྱི་བྱ་ཐབས་སྤྱད་དེ་སྐྱེ་ཁམས་སྲུང་སྐྱོབ་བྱེད་སྒོའི་ནང་ཞུགས་རྒྱུར་རང་སྐྱོང་ལྗོངས་ཀྱིས་སྐུལ་མ་དང་རྒྱབ་སྐྱོར་བྱེད་དགོས།

རྒྱལ་ཁབ་དང་རང་སྐྱོང་ལྗོངས་ཀྱི་འབྲེལ་ཡོད་གཏན་འབེབས་གཞིར་བཟུང་། སྐྱེ་ཁམས་སྲུང་སྐྱོབ་ཐད་གྲུབ་འབྲས་གཟེངས་སུ་ཐོན་པའི་ཚན་པ་དང་མི་སྒེར་ལ་གཟེངས་བསྟོད་དང་བྱ་དགའ་སྤྲོད་རྒྱུ།

ལེའུ་གཉིས་པ། སྐྱེ་ཁམས་བདེ་འཇགས་ཀྱི་བཀོད་པ།

དོན་ཚན་དགུ་པ། རང་སྐྱོང་ལྗོངས་མི་དམངས་སྲིད་གཞུང་གིས་ངེས་པར་དུ་འཕེལ་སྒྱུར་སོགས་འབྲེལ་ཡོད་སྡེ་ཚན་སྒྲིག་འཛུགས་བྱས་ནས་ཚན་རིག་དང་མཐུན་པའི་ངང་སྐྱེ་ཁམས་བདེ་འཇགས་སྲུང་བཅད་སྲུང་སྐྱོབ་དང་འཛུགས་སྐྲུན་བྱེད་པའི་འཆར་འགོད་བཟོ་དགོས་པ་མ་ཟད། སྐྱེ་ཁམས་བདེ་འཇགས་སྲུང་བཅད་སྲུང་སྐྱོབ་དང་འཛུགས་སྐྲུན་བྱེད་པའི་དམིགས་ཚད་དང་། ལས་འགན་གཙོ་བོ། ལས་གྲྭ་གལ་ཆེན། འགན་སྲུང་བྱ་ཐབས་སོགས་ཀྱི་ནང་དོན་ཁ་གསལ་བཟོས་ནས། སྐྱེ་ཁམས་བདེ་འཇགས་སྲུང་བཅད་སྲུང་སྐྱོབ་དང་འཛུགས་སྐྲུན་བྱེད་པའི་འཆར་འགོད་ལག་བསྟར་བྱས་འབྲས་ལ་དཔྱད་དཔོག་བྱེད་དགོས།

དོན་ཚན་བཅུ་པ། རྫོང་རིམ་ཡན་གྱི་མི་དམངས་སྲིད་གཞུང་གིས་ངེས་པར་དུ་རང་བྱུང་ཐོན་ཁུངས་སོགས་འབྲེལ་ཡོད་སྡེ་ཚན་སྒྲིག་འཛུགས་བྱས་ཏེ། ཚན་རིག་དང་མཐུན་པའི་ངང་སྲིད་འཛིན་ས་ཁོངས་དེ་གའི་གཞུང་ཁོངས་བར་སྟོང་གི་འཆར་འགོད་བཟོ་བ་དང་། བར་སྟོང་ཆགས་སྟངས་དང་། སྤྱོད་སྒོ་ཚོད་འཛིན་བྱ་ཐབས། ལག་བསྟར་བྱ་ཐབས་སོགས་ཀྱི་ནང་དོན་ཁ་གསལ་བཟོ་བ། ཞིང་ལས་དང་། སྐྱེ་ཁམས། གྲོང་ཁྱེར་གྲོང་རྡལ་སོགས་ཀྱི་བྱེད་ནུས་བར་སྟོང་ཚན་རིག་དང་མཐུན་པའི་ངང་ཁྱབ་བཀོད་བྱེད་པ། རྨོ་ཞིང་དང་གཏན་འཇགས་གཞི་རྩའི་ས་ཞིང་གི་ཚད་ཐིག་དང་། སྐྱེ་ཁམས་སྲུང་སྐྱོབ་ཀྱི་དམར་ཐིག གྲོང་ཁྱེར་གྲོང་རྡལ་གསར་སྤེལ་བྱེད་པའི་མཚམས་ཐིག་སོགས་ཀྱི་ཚད་བཀག་དབྱེ་འབྱེད་གཏན་འབེབས་བྱས་ཏེ་དོན་འཁྱོལ་བྱེད་པ། ཐོན་ལས་གོང་འཕེལ་གྱི་དམིགས་ཚད་དང་ཐོན་ཁུངས་ཁོར་ཡུག་གི་ཐེག་ནུས་ལ་གཅིག་གྱུར་འཆར་འགོད་བྱེད་པ་བཅས་ཀྱི་ཐོག་ནས་གཞུང་ཁོངས་བར་སྟོང་གསར་སྤེལ་དང་། སྲུང་སྐྱོབ། བེད་སྤྱོད། སླར་གསོ་བཅས་དོ་སྙོམས་ཡོང་བར་བྱས་ཏེ། བར་སྟོང་གི་ཐོན་ཁུངས་གྲོན་ཆུང་ལེགས་བསྡུས་ཀྱིས་སྤྱོད་ཕྱོད་ཆེ་རུ་གཏོང་ཐུབ་པ་བྱེད་དགོས།

གཞུང་ཁོངས་བར་སྟོང་གསར་སྤེལ་དང་བེད་སྤྱོད་བྱ་རྒྱུ་དེ་གཞུང་ཁོངས་བར་སྟོང་གི་སྤྱོད་སྒོ་བཀག་སྡོམ་བྱེད་པའི་བླང་བྱ་དང་མཐུན་དགོས། སྐྱེ་ཁམས་བར་སྟོང་གི་སྤྱོད་སྒོ་བསྒྱུར་ཕྱིན། ངེས་པར་དུ་ནགས་ཚལ་དང་། རྩྭ་ཐང་། ཆུ་བོ། མཚེའུ། འདམ་ར། འཁྱགས་རོམ། ཐང་རྒོད་སོགས་སྐྱེ་ཁམས་མ་ལག་གི་སྐྱེ་ཁམས་བྱེད་ནུས་ཆེ་རུ་གཏོང་རྒྱུར་ཕན་ཐོགས་པ་བྱེད་དགོས།

དོན་ཚན་བཅུ་གཅིག་པ། རང་སྐྱོང་ལྗོངས་མི་དམངས་སྲིད་གཞུང་གིས་ངེས་པར་དུ་སྐྱེ་ཁམས་ཁོར་ཡུག་སོགས་འབྲེལ་ཡོད་སྡེ་ཚན་སྒྲིག་འཛུགས་བྱས་ཏེ་སྐྱེ་ཁམས་ཁོར་ཡུག་དང་ཐོན་ཁུངས་བེད་སྤྱོད་བྱས་ཚུལ་ལ་གཞིགས་ནས་སྐྱེ་ཁམས་སྲུང་སྐྱོབ་ཀྱི་དམར་ཐིག་དང་། ཁོར་ཡུག་སྤུས་ཚད་ཀྱི་མཐའ་ཚད། ཐོན་ཁུངས་སྤྱོད་ཚད་མཐོ་ཤོས་བཅས་ཀྱི་བླང་བྱ་ལྟར། གཞུང་ཁོངས་བར་སྟོང་འཆར་འགོད་དང་འབྲེལ་མཐུད་གང་ལེགས་བྱས་ཏེ།རང་སྐྱོང་ལྗོངས་སྐྱེ་ཁམས་ཁོར་ཡུག་གི་ཁུལ་དབྱེ་ལྟ་སྡོམ་ཇུས་གཞི་བཟོས་ནས་སྐྱེ་ཁམས་སྲུང་སྐྱོབ་བྱེད་ཁོངས་དེ་སྔོན་ཚུད་སྲུང་སྐྱོབ་ཚན་པ་དང་། གཙོ་གནད་ལྟ་སྡོམ་ཚན་པ། སྤྱིར་བཏང་ལྟ་སྡོམ་ཚན་པ་བཅས་སུ་དབྱེ་ཐོག སྐྱེ་ཁམས་ཁོར་ཡུག་གི་བྱེད་ནུས་ངེས་གནས་དང་གཞུང་ཁོངས་བར་སྟོང་གི་སྤྱོད་སྒོ་ཚོད་འཛིན་བྱེད་པའི་བླང་བྱ་གཞིར་བཟུང་། རང་སྐྱོང་ལྗོངས་ཀྱི་སྐྱེ་ཁམས་ཁོར་ཡུག་གི་ཆོག་འཁྲོལ་གསལ་ཐོ་ནན་པོ་བཟོས་ཏེ་རྒྱལ་སྲིད་སྤྱི་ཁྱབ་ཁང་གི་སྐྱེ་ཁམས་ཁོར་ཡུག་གཙོ་འགན་སྡེ་ཚན་ལ་སྙན་དཔོད་ཞུས་རྗེས་ལག་བསྟར་བྱེད་དགོས།

ཆུད་བཙུགས་པའི་གྲོང་ཁྱེར(ས་ཁུལ)མི་དམངས་སྲིད་གཞུང(སྲིད་འཛིན་ཀུང་ཧྲུའུ)གིས་རང་སྐྱོང་ལྗོངས་སྐྱེ་ཁམས་ཁོར་ཡུག་གི་ཁུལ་དབྱེ་ལྟ་སྡོམ་ཇུས་གཞི་དང་སྐྱེ་ཁམས་ཁོར་ཡུག་གི་ཆོག་འཁྲོལ་གསལ་ཐོ་གཞིར་བཟུང་། སྲིད་འཛིན་ས་ཁོངས་དེ་གའི་སྐྱེ་ཁམས་ཁོར་ཡུག་གི་ཁུལ་དབྱེ་ལྟ་སྡོམ་ཇུས་གཞི་དང་སྐྱེ་ཁམས་ཁོར་ཡུག་གི་ཆོག་འཁྲོལ་གསལ་ཐོ་ནན་པོ་བཟོས་ནས་རང་སྐྱོང་ལྗོངས་སྐྱེ་ཁམས་ཁོར་ཡུག་གཙོ་གཉེར་སྡེ་ཚན་ལ་སྙན་དཔོད་ཞུས་རྗེས་ལག་བསྟར་བྱེད་དགོས།

དོན་ཚན་བཅུ་གཉིས་པ། རང་སྐྱོང་ལྗོངས་ཀྱིས་སྲིད་ཇུས་ཐོག་ནས་རྒྱབ་སྐྱོར་དང་། ཚན་རྩལ་ལ་བརྟེན་ནས་འདེགས་སྐྱོར། མ་དངུལ་འགན་སྲུང་། ལྟ་བཤེར་དང་ལྟ་སྡོམ། དྲིལ་བསྒྲགས་སློབ་གསོ་སོགས་ཀྱི་བྱ་ཐབས་སྤྱད་དེ་ནགས་ཚལ་དང་། མཐོ་གྲང་ན་ཁ། རྩྭ་ཐང་། ཆུ་བོ། མཚེའུ། འདམ་ར། གངས་རི་འཁྱགས་རོམ། ས་མཐོའི་འཁྱགས་ས། ཐང་རྒོད། ཆུ་མིག་གི་ཆུ་ཁོངས་སོགས་སྐྱེ་ཁམས་མ་ལག་སྲུང་སྐྱོབ་བྱེད་ཤུགས་ཆེ་རུ་བཏང་སྟེ། གཙང་གསུམ་ཆུ་འགོའི་རྩྭ་ཐང་དང་། ན་ཁ། འདམ་ར་བཅས་ཀྱི་སྐྱེ་ཁམས་ནུས་པ་ཐོན་ཁུལ་དང་། བོད་ཤར་ལྷོའི་ས་མཐོའི་མཐའ་མཚམས་ནགས་ཚལ་གྱི་སྐྱེ་ཁམས་ནུས་པ་ཐོན་ཁུལ། བོད་ནུབ་བྱང་གི་བྱང་ཐང་ས་མཐོའི་ཐང་རྒོད་སྐྱེ་ཁམས་ནུས་པ་ཐོན་ཁུལ། ཇོ་མོ་གླང་མའི་སྐྱེ་དངོས་སྣ་མང་སྲུང་སྐྱོབ་དང་ཆུ་རྩ་གསོ་འཁྱོངས་ཀྱི་སྐྱེ་ཁམས་ནུས་པ་ཐོན་ཁུལ་སོགས་རྒྱལ་ཁབ་ཀྱི་གཙོ་གནད་སྐྱེ་ཁམས་ནུས་པ་ཐོན་ཁུལ་གྱི་ཆུ་རྩ་གསོ་འཁྱོངས་དང་། སྐྱེ་དངོས་སྣ་མང་རང་བཞིན་སྲུང་སྐྱོབ། ས་ཆུ་སྲུང་འཛིན། རླུང་འགོག་བྱེ་འཇགས་སོགས་ཀྱི་སྐྱེ་ཁམས་ནུས་པ་ཆེ་རུ་གཏོང་དགོས།

དོན་ཚན་བཅུ་གསུམ་པ། རང་སྐྱོང་ལྗོངས་མི་དམངས་སྲིད་གཞུང་གིས་ངེས་པར་དུ་ནགས་ལས་རྩྭ་ཐང་སོགས་འབྲེལ་ཡོད་སྡེ་ཚན་སྒྲིག་འཛུགས་བྱས་ཏེ་ཚན་རིག་དང་མཐུན་པའི་སྒོ་ནས་རང་བྱུང་སྲུང་སྐྱོབ་བྱེད་གནས་ཀྱི་མཚམས་ཐིག་ཁྱབ་ཁོངས་དང་ནུས་པ་ཐོན་ཁོངས་གཏན་འཁེལ་བྱེད་པ་མ་ཟད། ལུགས་དང་མཐུན་པའི་སྒོ་ནས་རང་བྱུང་སྲུང་སྐྱོབ་བྱེད་གནས་ཀྱི་བར་སྟོང་འཆར་འགོད་བྱས་ཏེ་གཙོ་གནད་དཔེ་མཚོན་གྱི་སྐྱེ་ཁམས་མ་ལག་འཐུས་ཚང་ཁུལ་དང་། སྐྱེ་ཁམས་ཁོར་ཡུག་ཚོར་སྐྱེན་ཁུལ། དེ་བཞིན་དཀོན་ཞིང་སྟོངས་ལ་ཉེ་བའམ་ས་ཁོངས་དེ་གར་དམིགས་སུ་ཡོད་པའི་རི་སྐྱེས་སྲོག་ཆགས་དང་རྩི་ཤིང་རང་བྱུང་གཅིག་སྡུད་ཁུལ། གནས་སྡོད་བྱ་ཡུལ་གལ་ཆེན། རང་བྱུང་རྗེས་ཤུལ་གལ་ཆེན། རང་བྱུང་མཛེས་ལྗོངས་ཁུལ་གལ་ཆེན་སོགས་ཀྱི་ས་ཁོངས་སུ་རྒྱལ་ཁབ་སྤྱི་གླིང་དང་། རང་བྱུང་སྲུང་སྐྱོབ་ཁུལ། རང་བྱུང་སྤྱི་གླིང་སོགས་རང་བྱུང་སྲུང་སྐྱོབ་ཁུལ་ཁྲིམས་བཞིན་བཙུགས་ཐོག བྱང་ཐང་དང་ཇོ་མོ་གླང་མ་སོགས་ཀྱི་རང་བྱུང་སྲུང་སྐྱོབ་ཁུལ་འཛུགས་སྐྲུན་བྱེད་མགྱོགས་སུ་བཏང་ནས་རང་བྱུང་སྐྱེ་ཁམས་མ་ལག་གལ་ཆེན་གྱི་གདོད་མའི་རང་བཞིན་དང་ཆ་ཚང་རང་བཞིན་མ་ཉམས་རྒྱུན་འཛིན་བྱེད་དགོས།

དོན་ཚན་བཅུ་བཞི་པ། རང་སྐྱོང་ལྗོངས་ཀྱི་ཐོན་ལས་གྲུབ་ཆ་དང་ཁྱབ་བཀོད་དེ་ངེས་པར་དུ་སྐྱེ་ཁམས་མ་ལག་དང་ཐོན་ཁུངས་ཁོར་ཡུག་གི་ཐེག་ནུས་དང་འཚམ་ཐུབ་པ་བྱེད་དགོས།

རྫོང་རིམ་ཡན་གྱི་མི་དམངས་སྲིད་གཞུང་གིས་ངེས་པར་དུ་ཁུལ་ཁོངས་དཔལ་འབྱོར་གྱི་ཁྱབ་བཀོད་ལ་གཅིག་གྱུར་འཆར་འགོད་ཀྱིས་གཙོ་ནུས་ཐོན་ཁུལ་གྱི་འཐབ་ཇུས་དང་ལམ་ལུགས་དོན་འཁྱོལ་ནན་པོ་བྱས་ཏེ། ཐོན་ལས་ཀྱི་གྲུབ་ཆ་ལེགས་སྒྲིག་དང་ཐོན་སྐྱེད་ནུས་ཤུགས་ཀྱི་ཁྱབ་བཀོད་ལེགས་སུ་གཏོང་དགོས། ཐོན་ཁུངས་གྲོན་ཆུང་དང་ཁོར་ཡུག་འཕྲོད་ཆེ་བའི་ཐོན་ལས་སྔོན་ཚུད་དུ་གོང་འཕེལ་བཏང་ནས་སྲོལ་རྒྱུན་བཟོ་སྐྲུན་ལས་རིགས་འབྱུང་འཕྲོད་ཐཱན་ཉུང་གི་ཕྱོགས་སུ་རིམ་སྤོར་བྱ་རྒྱུར་ཁྲིད་སྟོན་གྱིས་སྐྱེ་ཁམས་ཡུལ་སྐོར་དང་། ཁྱད་ལྡན་རིག་གནས། ཁྱད་ལྡན་ཞིང་འབྲོག་ལས། མི་རིགས་ཀྱི་ཁྱད་ལྡན་ལག་ཤེས་བཟོ་ལས་སོགས་ས་ཁོངས་ཀྱི་དམིགས་བསལ་ཁྱད་ཆོས་ལྡན་པའི་སྐྱེ་ཁམས་ཐོན་ལས་གོང་འཕེལ་འོས་འཚམ་བཏང་སྟེ་འབྱུང་འཕྲོད་དང་། ཐཱན་ཉུང་། རྒྱུན་འཁོར་བཅས་ཀྱི་དཔལ་འབྱོར་མ་ལག་འཛུགས་པ་དང་འཐུས་སྒོ་ཚང་དུ་གཏོང་དགོས།

ཐོན་ལས་རྣམ་གྲངས་གསར་བཟོ་རྒྱས་སྐྲུན་བྱེད་སྐབས། ས་ཁོངས་ཀྱི་བྱེད་ནུས་གཙོ་བོའི་ངེས་གནས་དང་རྒྱལ་ཁབ་ཀྱི་ཐོན་ལས་སྲིད་ཇུས་ཀྱི་བླང་བྱ་དང་མཐུན་པར་བྱས་ནས། རང་བྱུང་ཐོན་ཁུངས་གསར་སྤེལ་དང་ཐོན་ལས་ཆོག་འཐུས་དང་ཕྱིར་འཐེན་གྱི་གཏན་འབེབས་ལག་བསྟར་ནན་པོ་བྱེད་དགོས།

ལེའུ་གསུམ་པ། སྐྱེ་ཁམས་སྲུང་སྐྱོབ་དང་སླར་གསོ་བྱེད་ཕྱོགས།

དོན་ཚན་བཅོ་ལྔ་པ། རང་སྐྱོང་ལྗོངས་ཀྱིས་སྐྱེ་ཁམས་སྲུང་སྐྱོབ་དང་སླར་གསོ་བྱ་རྒྱུར་ཤུགས་སྣོན་བརྒྱབ་སྟེ་རང་བྱུང་སླར་གསོ་གཙོ་བོར་བཟུང་བ་དང་། རང་བྱུང་སླར་གསོ་དང་མི་ཐབས་སླར་གསོ་ཟུང་འབྲེལ་བྱེད་པའི་རིམ་ལྡན་བཅོས་སྐྱོང་བྱ་ཐབས་སྤྱད་ཐོག ཚན་རྩལ་དང་། བཅའ་ཁྲིམས། སྲིད་ཇུས། དཔལ་འབྱོར་སོགས་ཀྱི་བྱ་ཐབས་ཕྱོགས་བསྡུས་བེད་སྤྱོད་བྱས་ཏེ། རི་ཆུ་ནགས་ཞིང་མཚེའུ་བྱེ་ལ་སོགས་རང་བྱུང་སྐྱེ་ཁམས་ཀྱི་གཙོ་རྒྱུ་མཐའ་དག་གཞི་གཅིག་ཏུ་སྲུང་སྐྱོབ་དང་སླར་གསོ་བྱ་རྒྱུར་སྐུལ་འདེད་གཏོང་དགོས།

དོན་ཚན་བཅུ་དྲུག་པ། རང་སྐྱོང་ལྗོངས་མི་དམངས་སྲིད་གཞུང་སྐྱེ་ཁམས་ཁོར་ཡུག་གཙོ་འགན་སྡེ་ཚན་གྱིས་ངེས་པར་དུ་ལྗོངས་ཡོངས་ཀྱི་སྐྱེ་ཁམས་སྲུང་སྐྱོབ་དང་སླར་གསོའི་ལས་དོན་ལ་ལྟ་སྡོམ་བྱ་རྒྱུར་ཤུགས་སྣོན་བརྒྱབ་སྟེ་དུས་བཀག་ལྟར་ལྗོངས་ཡོངས་དང་གཙོ་གནད་ས་ཁོངས་ཀྱི་སྐྱེ་ཁམས་མ་ལག་གི་སྐྱེ་ཁམས་གནས་ཚུལ་ལ་ཚོད་སྐོར་བྱེད་པ་མ་ཟད། སྐྱེ་ཁམས་སྲུང་སྐྱོབ་དང་སླར་གསོའི་ལས་གཞི་སྤེལ་འབྲས་ལ་ལྟ་བཤེར་དང་ཚོད་སྐོར་བྱེད་དགོས།

རྫོང་རིམ་ཡན་གྱི་མི་དམངས་སྲིད་གཞུང་རང་བྱུང་ཐོན་ཁུངས་དང་། སྐྱེ་ཁམས་ཁོར་ཡུག ཆུའི་སྲིད་འཛིན། ནགས་ལས་རྩྭ་ཐང་སོགས་འབྲེལ་ཡོད་སྡེ་ཚན་གྱིས་ངེས་པར་དུ་འགན་འཁྲི་ཁག་བགོས་ལྟར། སྲིད་འཛིན་ས་ཁུལ་དེ་གའི་སྐྱེ་ཁམས་སྲུང་སྐྱོབ་ཀྱི་དམར་ཐིག་དང་། རང་བྱུང་སྲུང་སྐྱོབ་བྱེད་གནས། སྐྱེ་ཁམས་ནུས་པ་ཐོན་ཁུལ་སོགས་ཀྱི་གཙོ་གནད་ཁུལ་ཁོངས་དང་།དེ་བཞིན་ནགས་ཚལ་དང་། མཐོ་གྲང་ན་ཁ། རྩྭ་ཐང་། ཆུ་བོ། མཚེའུ། འདམ་ར། གངས་རི་འཁྱགས་རོམ། ས་མཐོའི་འཁྱགས་ས། ཐང་རྒོད། ཆུ་མིག་གི་ཆུ་ཁོངས་སོགས་ཀྱི་སྐྱེ་ཁམས་མ་ལག་ལ་སྐྱེ་ཁམས་སྲུང་སྐྱོབ་དང་སླར་གསོ་བྱེད་དུ་འཇུག་དགོས།

དོན་ཚན་བཅུ་བདུན་པ། རང་སྐྱོང་ལྗོངས་མི་དམངས་སྲིད་གཞུང་གིས་ངེས་པར་དུ་འབྲེལ་ཡོད་སྡེ་ཚན་སྒྲིག་འཛུགས་བྱས་ཏེ་གངས་རི་འཁྱགས་རོམ་དང་འཁྱགས་ས་སྲུང་སྐྱོབ་བྱེད་པའི་འཆར་འགོད་བཟོ་དགོས་པ་དང་། སྲུང་སྐྱོབ་འཆར་འགོད་ནང་ངེས་པར་དུ་མིག་སྔ་དང་དུས་ཡུན་རིང་བའི་དམིགས་ཚད་དང་། སྲུང་སྐྱོབ་བྱ་ཐབས། ལས་འགན་གཙོ་བོ། འགན་སྲུང་བྱ་ཐབས། གཙོ་གནད་སྲུང་སྐྱོབ་བྱེད་ཁོངས་སོགས་ཀྱི་ནང་དོན་ཁ་གསལ་འགོད་དགོས། ཆུད་བཙུགས་པའི་གྲོང་ཁྱེར(ས་ཁུལ)མི་དམངས་སྲིད་གཞུང(སྲིད་འཛིན་ཀུང་ཧྲུའུ)གིས་ངེས་པར་དུ་འབྲེལ་ཡོད་སྡེ་ཚན་སྒྲིག་འཛུགས་བྱས་ཏེ་གངས་རི་འཁྱགས་རོམ་དང་འཁྱགས་ས་སྲུང་སྐྱོབ་བྱེད་པའི་འཆར་འགོད་བཞིན་སྲིད་འཛིན་ས་ཁོངས་དེ་གའི་གངས་རི་འཁྱགས་རོམ་དང་འཁྱགས་ས་སྲུང་སྐྱོབ་བྱེད་པའི་ཇུས་གཞི་བཟོ་དགོས།

རང་སྐྱོང་ལྗོངས་མི་དམངས་སྲིད་གཞུང་གིས་ངེས་པར་དུ་བྱང་ཐང་ས་མཐོ་དང་། ཧི་མ་ལ་ཡའི་རི་རྒྱུད། གངས་ཏི་སིའི་རི་རྒྱུད། གཉན་ཆེན་ཐང་ལྷའི་རི་རྒྱུད། སྦུ་སུབ་ལའི་རི་རྒྱུད་སོགས་ཁུལ་ཁོངས་ཀྱི་འཁྱགས་ཞྭ་འཁྱོགས་རོམ་ཆེ་གྲས་དང་གཞི་ཁྱོན་ཆུང་བའི་འཁྱགས་རོམ་ཁྱུ་ཚོགས་སོགས་སྐྱེ་ཁམས་སྲུང་སྐྱོབ་ཀྱི་དམར་ཐིག་ནང་འཇུག་དགོས། གཙོ་གནད་ཀྱི་གངས་རི་འཁྱགས་རོམ་དང་སྤྱིར་བཏང་གི་གངས་རི་འཁྱགས་རོམ་སྲུང་སྐྱོབ་བྱེད་པའི་མིང་གཞུང་བཟོས་ནས་གཙོ་གནད་གངས་རི་འཁྱགས་རོམ་ཁུལ་བཀག་སྡོམ་གྱིས་སྲུང་སྐྱོབ་བྱེད་པ་མ་ཟད། བྱ་ཐབས་ནུས་ལྡན་སྤྱད་དེ་མི་བཟོས་གནོད་སྐྱོན་ཚོད་འཛིན་ནན་པོ་བྱེད་དགོས་པ་དང་། སྤྱིར་བཏང་གི་གངས་རི་འཁྱགས་རོམ་ལ་བབ་མཚུངས་ཀྱི་སྲུང་སྐྱོབ་བྱ་ཐབས་སྤྱོད་དགོས།

རང་སྐྱོང་ལྗོངས་མི་དམངས་སྲིད་གཞུང་གིས་ངེས་པར་དུ་འབྲེལ་ཡོད་སྡེ་ཚན་སྒྲིག་འཛུགས་བྱས་ཏེ་འཁྱགས་སའི་ཐོན་ཁུངས་ལ་བརྟག་དཔྱད་བྱས་ཁར། འཁྱགས་སའི་ཁུལ་གྱི་སྲུང་སྐྱོབ་བྱེད་ཁོངས་དབྱེ་ནས་ལོ་མང་འཁྱགས་སའི་ཁུལ་དང་འཁྱགས་ཚད་འབྲིང་བའི་འཁྱགས་སའི་ཁུལ་ལ་སྲུང་སྐྱོབ་བྱ་རྒྱུར་ཤུགས་སྣོན་བརྒྱབ་ཐོག ལོ་མང་འཁྱགས་སའི་ཁུལ་གྱི་ཐོན་ཁུངས་གསར་སྤེལ་བྱ་རྒྱུར་ཚོད་འཛིན་ནན་པོ་བྱེད་པ་མ་ཟད། ལོ་མང་འཁྱགས་སའི་ཁུལ་གྱི་གྲོང་ཁྱེར་གྲོང་རྡལ་གྱི་འཆར་འགོད་དང་། དེ་བཞིན་འགྲིམ་འགྲུལ་དང་། གདོང་ལམ། གློག་གཏོང་སྒྱུར་སོགས་གཙོ་གནད་ལས་གྲྭའི་རྣམ་གྲངས་ལ་ཞིབ་མཆན་ནན་པོ་འགོད་དགོས།

དོན་ཚན་བཅོ་བརྒྱད་པ། རིམ་ཁག་མི་དམངས་སྲིད་གཞུང་གིས་གཙང་པོ་དང་མཚེའུ་ལ་དོ་དམ་དང་སྲུང་སྐྱོབ་བྱེད་པའི་ལམ་ལུགས་འཛུགས་པ་དང་ཚགས་ཚུད་དུ་བཏང་ནས། ཆུ་དཔོན་དང་མཚེའུ་དཔོན་ལམ་ལུགས་འཐུས་སྒོ་ཚང་དུ་གཏོང་བ་དང་། གཙང་པོ་དང་མཚེའུ་ཡི་སྐྱེ་ཁམས་སྲུང་སྐྱོབ་དང་མ་ལག་བཅོས་སྐྱོང་བྱེད་པར་སྐུལ་འདེད་གཏོང་བའི་ཐོག་ནས། ཡར་ཀླུང་གཙང་པོ་དང་། འབྲི་ཆུ། རྫ་ཆུ། རྒྱལ་མོ་རྔུལ་ཆུ་སོགས་གཙོ་གནད་གཙང་པོ་དང་། སེར་གླིང་མཚོ། གནམ་མཚོ། ཡར་འབྲོག་གཡུ་མཚོ། མ་ཕམ་གཡུ་མཚོ་སོགས་གཙོ་གནད་མཚེའུ་ལ་སྐོར་ཞིབ་ལྟ་སྡོམ་དང་། རྒྱང་བསྟེན་ལྟ་བཤེར། མངོན་མེད་རྐྱེན་ངན་གྲལ་བཤེར། གཙང་བཤེར་བཅོས་སྒྲིག་སོགས་ཀྱི་ལས་དོན་སྤེལ་ཤུགས་ཆེ་རུ་གཏོང་དགོས།

རྫོང་རིམ་ཡན་གྱི་མི་དམངས་སྲིད་གཞུང་གིས་ངེས་པར་དུ་ཁྲིམས་བཞིན་སྲིད་འཛིན་ས་ཁོངས་དེ་གའི་ཆུ་ལམ་དང་མཚེའུ་ཡི་དོ་དམ་བྱེད་ཁོངས་གཏན་འཁེལ་བྱེད་པ་དང་སྦྲགས་ཡོངས་བསྒྲགས་བྱས་ནས། ཆུ་བོ་དང་མཚེའུ་ཡི་དོ་དམ་སྲུང་སྐྱོབ་འཛིན་སྡོམ་ཁུལ་དང་སྐྱེ་ཁམས་བར་ཆོད་ཁུལ་བབ་བསྟུན་གཏན་འཁེལ་བྱེད་པའི་ཁར། ཆུ་བོ་དང་མཚེའུ་ཡི་ཆུ་ཁོངས་དང་འགྲམ་ཐིག་འཛིན་སྡོམ་བྱེད་པའི་མཚམས་ཐིག་ཁ་གསལ་བཟོས་ནས་དེ་མཚུངས་ཀྱི་སྲུང་སྐྱོབ་ངོ་རྟགས་བཟོ་བ་མ་ཟད། ཆུ་བོ་དང་མཚེའུ་ཡི་འགྲམ་ཐིག་སླར་གསོ་བྱེད་པའི་འཆར་གཞི་བཟོས་ནས་ལག་བསྟར་བྱེད་དུ་བཅུག་སྟེ་ཆུ་བོ་དང་མཚེའུ་ཡི་རང་བྱུང་འགྲམ་ཐིག་གི་བསྡུར་ཚད་འགན་སྲུང་བྱས་ནས། ཆུ་བོ་དང་མཚེའུ་ཡི་འགྲམ་ཐིག་སྐྱེ་ཁམས་ཀྱི་ནུས་པ་སླར་གསོ་ཐུབ་པ་བྱེད་དགོས།

ཆུ་ལམ་དང་། མཚེའུ་ཡི་ཆུ་ཁོངས། འགྲམ་ཐིག་བཅས་ཁྲིམས་དང་འགལ་ནས་བཟུང་སྤྱོད་བྱེད་མི་ཆོག

དོན་ཚན་བཅུ་དགུ་པ། རྫོང་རིམ་ཡན་གྱི་མི་དམངས་སྲིད་གཞུང་གིས་ངེས་པར་དུ་ཆུ་ལམ་བྱེ་འདོན་ལ་དོ་དམ་བྱེད་ཤུགས་ཆེ་རུ་བཏང་སྟེ། རྩ་འཛུགས་ཀྱི་འགོ་ཁྲིད་དང་། མཉམ་འབྲེལ་ཐོག་ཁྲིམས་སྒྱུར། ས་ཁོངས་མཉམ་ལས་བཅས་ཀྱི་ལམ་སྲོལ་འཛུགས་པ་དང་ཚགས་ཚུད་དུ་བཏང་ནས། ཆུ་ལམ་བྱེ་འདོན་ལ་དོ་དམ་བྱ་རྒྱུར་ལྟ་བཤེར་དང་། བརྡ་ཁྱབ། དཔྱད་ཞིབ། འགན་འདེད་བཅས་བྱེད་ལམ་ཚགས་ཚུད་དུ་གཏོང་དགོས།

རྫོང་རིམ་ཡན་གྱི་མི་དམངས་སྲིད་གཞུང་གི་ཆུའི་སྲིད་འཛིན་གཙོ་འགན་སྡེ་ཚན་གྱིས་ངེས་པར་དུ་ཆུ་ལམ་བྱེ་འདོན་གྱི་བཀག་སྡོམ་ཁུལ་དང་བཀག་སྡོམ་དུས་ཡུན་ཡོངས་བསྒྲགས་བྱེད་དགོས་པ་མ་ཟད། བཀག་སྡོམ་མཚོན་རྟགས་མངོན་གསར་དོད་སར་འཛུགས་དགོས། ཆུ་ལམ་ནས་བྱེ་རྡོ་འདོན་པའི་བྱེད་སྒོར་ལྟ་སྐུལ་དང་དོ་དམ་བྱ་རྒྱུར་ཤུགས་སྣོན་བརྒྱབ་ཐོག ཁྲིམས་འགལ་གྱིས་ཆུ་ལམ་ནས་བྱེ་རྡོ་འདོན་རིགས་དུས་ཐོག་ཏུ་ཞིབ་བཤེར་ཐག་གཅོད་བྱེད་དགོས། སྔོག་འདོན་བཀག་སྡོམ་ཁུལ་དང་བཀག་སྡོམ་དུས་ཡུན་ནང་ཆུ་ལམ་ནས་བྱེ་རྡོ་འདོན་རིགས་གཏན་ནས་མི་ཐོན་པ་བྱེད་དགོས།

བྱེ་འདོན་ལས་སྒྲུབ་པས་ངེས་པར་དུ་བྱེ་འདོན་ལས་སར་མཚོན་རྟགས་གསལ་པོ་འགེལ་དགོས། འཚོལ་བསྡུ་བྱས་པའི་བྱེ་རྡོ་དེ་དག་ཆོག་མཆན་ཐོབ་པའི་ས་ཆར་སྤུངས་དགོས་པ་དང་། བྱེ་རྡོའི་སྙིགས་རོ་དང་དེ་བཞིན་བེད་མེད་དངོས་རོ་གཞན་དག་དུས་ཐོག་ཏུ་གཙང་སེལ་བྱེད་དགོས།

དོན་ཚན་ཉི་ཤུ་པ། རྫོང་རིམ་ཡན་གྱི་མི་དམངས་སྲིད་གཞུང་གིས་ངེས་པར་དུ་ཆུའི་སྲིད་འཛིན་དང་འཕེལ་སྒྱུར་སོགས་འབྲེལ་ཡོད་སྡེ་ཚན་སྒྲིག་འཛུགས་བྱས་ཏེ་ལོ་འཁོར་མོའི་ཆུ་སྤྱོད་ཚད་དང་ཆུ་སྤྱོད་ཕྱོད་ཚོད་འཛིན་བྱེད་པའི་ལམ་ལུགས་འཛུགས་པ་དང་ཚགས་ཚུད་དུ་གཏོང་དགོས།

རྫོང་རིམ་ཡན་གྱི་མི་དམངས་སྲིད་གཞུང་གི་ཆུའི་སྲིད་འཛིན་གཙོ་འགན་སྡེ་ཚན་གྱིས་ངེས་པར་དུ་སྐྱེ་ཁམས་བཞུར་ཚད་ཀྱི་ཆུ་བོ་དང་མཚེའུ་ཡི་མིང་གཞུང་འཐུས་སྒོ་ཚང་དུ་བཏང་ནས། གཙང་པོ་དང་མཚེའུ་ཡི་སྐྱེ་ཁམས་བཞུར་ཚད་འགན་སྲུང་བྱེད་པའི་དམིགས་ཚད་ཁ་གསལ་བཟོ་དགོས་པ་མ་ཟད། གཙང་པོ་དང་མཚེའུ་ཡི་སྐྱེ་ཁམས་བཞུར་ཚད་ལ་ལྟ་བཤེར་དང་ཉེན་ཟོན་སྔོན་བརྡ་གཏོང་བར་ཤུགས་སྣོན་རྒྱག་དགོས། གཙང་པོ་དང་མཚེའུ་ཡི་སྐྱེ་ཁམས་བཞུར་ཚད་འགན་སྲུང་བྱེད་པའི་དམིགས་ཚད་ཁ་གསལ་བཟོས་ཏེ་རིམ་མཚུངས་སྐྱེ་ཁམས་ཁོར་ཡུག་དང་རང་བྱུང་ཐོན་ཁུངས་སོགས་འབྲེལ་ཡོད་སྡེ་ཚན་གྱི་བསམ་འཆར་བསྡུ་ལེན་བྱེད་དགོས། གཙང་པོ་དང་མཚེའུ་ཡི་སྐྱེ་ཁམས་བཞུར་ཚད་འགན་ལེན་བྱས་ཚུལ་དེ་ཆུ་དཔོན་དང་མཚེའུ་དཔོན་ལམ་ལུགས་ཀྱི་གཅིག་གྱུར་དོ་དམ་བྱེད་ཁོངས་སུ་འཇུག་དགོས།

ཆུ་མཛོད་དང་། ཆུ་ཤུགས་གློག་ཁང་། ཆུ་རགས་སོགས་ཆུ་བེད་ཆུ་གློག་ལས་གཞི་དང་ཆུའི་ཐོན་ཁུངས་བགོ་སྒྲིག་བྱེད་པའི་ལས་གཞིར་ངེས་པར་དུ་རྒྱལ་ཁབ་དང་རང་སྐྱོང་ལྗོངས་ཀྱི་འབྲེལ་ཡོད་ཚད་གཞི་ལྟར་སྐྱེ་ཁམས་བཞུར་ཚད་ལ་ལྟ་བཤེར་བྱེད་པའི་སྒྲིག་བཀོད་འཐུས་ཚང་འཛུགས་དགོས་པ་མ་ཟད། སྐྱེ་ཁམས་བཞུར་ཚད་གཤམ་འབུད་བྱ་ཐབས་དོན་འཁྱོལ་བྱེད་དགོས།

དོན་ཚན་ཉེར་གཅིག་པ། ཆུ་ནུས་ཐོན་ཁུངས་གསར་སྤེལ་དང་བེད་སྤྱོད་བྱེད་སྐབས་ངེས་པར་དུ་རྒྱལ་ཁབ་དང་རང་སྐྱོང་ལྗོངས་ཀྱི་གོང་འཕེལ་འཆར་འགོད་དང་། འབབ་རྒྱུད་དམ་ས་ཁོངས་ཀྱི་ཕྱོགས་བསྡུས་འཆར་འགོད། དེ་བཞིན་སྐྱེ་ཁམས་སྲུང་སྐྱོབ་ཀྱི་བླང་བྱ་བཅས་དང་མཐུན་དགོས་པ་མ་ཟད། སྔོན་གྲབས་ཆུ་འབོར་དེ་ཆུའི་ཐོན་ཁུངས་ཀྱི་འཐབ་ཇུས་བགོ་སྒྲིག་དང་གྲབས་གསོག་བྱ་རྒྱུར་སྤྱོད་དགོས།

གྲོང་མིས་གློག་སྤྱོད་པ་དང་མཐའ་མཚམས་སྲ་བརྟན་དུ་གཏོང་བའི་དགོས་མཁོ་སྐོང་རྒྱུ་ཕུད། ཆུ་ཤུགས་གློག་འདོན་གྱི་རྣམ་གྲངས་ཆུང་གྲས་གསར་དུ་སྐྲུན་མི་ཆོག བསྐྲུན་ཟིན་པའི་ཆུ་ཤུགས་གློག་འདོན་གྱི་རྣམ་གྲངས་ཆུང་གྲས་རིགས་འབབ་རྒྱུད་ཀྱི་ཕྱོགས་བསྡུས་འཆར་འགོད་དམ་སྐྱེ་ཁམས་སྲུང་སྐྱོབ་ཀྱི་བླང་བྱ་དང་མ་མཐུན་ཚེ། ཁྲིམས་བཞིན་རིགས་དབྱེ་དག་ཐེར་བྱེད་དུ་འཇུག་དགོས་པ་མ་ཟད། བྱ་ཐབས་སྤྱད་དེ་རིམ་བཞིན་ཕྱིར་འཐེན་བྱེད་དགོས།

དོན་ཚན་ཉེར་གཉིས་པ། རྫོང་རིམ་ཡན་གྱི་མི་དམངས་སྲིད་གཞུང་གི་རང་བྱུང་ཐོན་ཁུངས་དང་ཆུའི་སྲིད་འཛིན་སོགས་འབྲེལ་ཡོད་སྡེ་ཚན་གྱིས་འགན་འཁྲི་ཁག་བགོས་ལྟར། ས་འོག་ཚ་ནུས་ཀྱི་ཆུའི་ཐོན་ཁུངས་ལ་དཔྱད་གདེང་བྱས་ཏེ་ཚན་རིག་དང་མཐུན་པའི་ངང་ས་འོག་ཚ་ནུས་ཀྱི་ཆུའི་ཐོན་ཁུངས་ལ་སྲུང་སྐྱོབ་བྱེད་པའི་ཁྱབ་ཁོངས་དབྱེ་འབྱེད་གཏན་འབེབས་བྱེད་པ་དང་སྦྲགས་རིམ་མཚུངས་མི་དམངས་སྲིད་གཞུང་ལ་ཞུས་ནས་ཆོག་མཆན་ཐོབ་རྗེས་ལག་བསྟར་བྱེད་དགོས། ས་འོག་ཚ་ནུས་ཀྱི་ཆུའི་ཐོན་ཁུངས་གསར་སྤེལ་དང་བེད་སྤྱོད་བྱེད་སྐབས། ངེས་པར་དུ་བཟོ་རྩལ་ལུགས་མཐུན་སྤྱད་དེ་སྔོག་འདོན་བྱེད་ཚད་ཚོད་འཛིན་ནན་པོ་བྱས་ནས་སྔོག་འདོན་དང་ཁ་གསབ་དོ་སྙོམས་ཡོང་བར་བྱེད་དགོས།

རྫོང་རིམ་ཡན་གྱི་མི་དམངས་སྲིད་གཞུང་གི་རང་བྱུང་ཐོན་ཁུངས་གཙོ་འགན་སྡེ་ཚན་གྱིས་ངེས་པར་དུ་ཆུའི་སྲིད་འཛིན་དང་སྐྱེ་ཁམས་ཁོར་ཡུག་སོགས་འབྲེལ་ཡོད་སྡེ་ཚན་དང་མཉམ་དུ་ས་འོག་ཚ་ནུས་ཀྱི་ཆུའི་ཐོན་ཁུངས་ཀྱི་ཆུ་དྲོད་དང་། ཆུ་གནས། ཆུ་སྤུས། བཞུར་ཚད་བཅས་དང་དེ་བཞིན་མཐའ་འཁོར་ས་གཤིས་ཁོར་ཡུག་ལ་སྐབས་བསྟུན་ལྟ་བཤེར་བྱ་རྒྱུར་ཤུགས་སྣོན་རྒྱག་དགོས་པ་མ་ཟད། དུས་བཀག་ལྟར་ལྟ་བཤེར་ཆ་འཕྲིན་ཡོངས་བསྒྲགས་བྱེད་དགོས།

དོན་ཚན་ཉེར་གསུམ་པ། རྫོང་རིམ་ཡན་གྱི་མི་དམངས་སྲིད་གཞུང་གིས་ངེས་པར་དུ་འབྲེལ་ཡོད་གཏན་འབེབས་ལྟར། ནགས་སའི་སྤྱོད་སྒོ་དོ་དམ་བྱེད་པའི་ལམ་ལུགས་ལག་བསྟར་ནན་པོ་བྱེད་པ་དང་། རང་བྱུང་ནགས་ཚལ་སྲུང་སྐྱོབ་བྱེད་པར་ཕྱོགས་ཡོངས་ནས་ཤུགས་སྣོན་རྒྱག་པ། རང་བྱུང་ནགས་ཚལ་གཅོད་རིགས་ཚོད་འཛིན་ནན་པོ་བྱེད་པ། གདོད་མའི་ས་རྒྱུད་རང་བཞིན་གྱི་སྔོ་ཁེབས་ལ་སྲུང་སྐྱོབ་བྱེད་ཤུགས་ཆེ་རུ་གཏོང་བ། ནགས་ཚལ་སྐྱེ་ཁམས་མ་ལག་གི་གྲུབ་ཆ་ལེགས་སུ་གཏོང་བ་བཅས་བྱེད་དགོས།

རྫོང་རིམ་ཡན་གྱི་མི་དམངས་སྲིད་གཞུང་གིས་ངེས་པར་དུ་སྤྱི་ཕན་ནགས་ཚལ་འཛུགས་སྐྱོང་བྱ་རྒྱུར་ཤུགས་སྣོན་རྒྱག་པ་དང་སྦྲགས་སྲུང་སྐྱོབ་ནན་པོ་བྱས་ཏེ། སྤྱི་ཕན་ནགས་ཚལ་གྱི་བདག་སྐྱོང་འགན་འཁུར་ཚན་པས་ཚན་རིག་དང་མཐུན་པའི་གཉེར་སྐྱོང་བྱེད་པར་སྐུལ་འདེད་གཏོང་དགོས། རྒྱལ་དམངས་དཔལ་འབྱོར་དང་སྤྱི་ཚོགས་གོང་འཕེལ་བྱུང་ཚུལ་ལ་གཞིགས་ནས་སྤྱི་ཕན་ནགས་ཚལ་གྱི་སྐྱེ་ཁམས་ཕན་འབྲས་སྐྱོང་གསབ་ཀྱི་ཚད་གཞི་སྐབས་བསྟུན་ལེགས་སྒྲིག་བྱེད་དགོས་པ་མ་ཟད། གལ་ཆེའི་སྐྱེ་ཁམས་ནུས་པ་ཐོན་ཁུལ་སྲུང་སྐྱོབ་བྱེད་པའི་དགོས་མཁོ་དང་ནགས་ཚལ་གྱི་སྤུས་ཚད་ལེགས་ཉེས་ལ་གཞིགས་ཏེ་བར་ཁྱད་ཡོད་པའི་ཁ་གསབ་རིམ་བཞིན་སྤྲོད་དགོས།

དོན་ཚན་ཉེར་བཞི་པ། རྫོང་རིམ་ཡན་གྱི་མི་དམངས་སྲིད་གཞུང་གིས་ངེས་པར་དུ་རྩྭ་ཐང་སྲུང་སྐྱོབ་བྱ་རྒྱུར་ཤུགས་སྣོན་བརྒྱབ་ནས། གཞི་རྩའི་རྩྭ་ཐང་ལ་སྲུང་སྐྱོབ་དང་དོ་དམ་སྔར་བས་ནན་པོ་བྱས་ཏེ་ཁེབས་རྒྱ་ཆུང་དུ་མི་འགྲོ་བ་དང་། སྤུས་ཚད་ཞན་དུ་མི་འགྲོ་བ། སྤྱོད་སྒོར་འགྱུར་བ་མི་འགྲོ་བ་བཅས་ཀྱི་འགན་ལེན་བྱེད་དགོས།

རྫོང་རིམ་ཡན་གྱི་མི་དམངས་སྲིད་གཞུང་དང་དེའི་འབྲེལ་ཡོད་སྡེ་ཚན་གྱིས་ངེས་པར་དུ་རྩྭ་ཐང་སྐྱེ་ཁམས་སྲུང་སྐྱོབ་དང་ཕྱུགས་ལས་གོང་འཕེལ་གཏོང་བར་གཅིག་གྱུར་འཆར་འགོད་གྱིས་མཐུན་སྦྱོར་བྱས་ཏེ། ས་ཆ་དེ་གའི་དངོས་ཡོད་གནས་ཚུལ་དང་ཟུང་འབྲེལ་བྱས་ནས་དུས་བཀག་ལྟར་རྩྭ་ཐང་གི་ཕྱུགས་ཟོག་ཤོང་ཚད་གཏན་འཁེལ་བྱེད་དགོས་པ་མ་ཟད། རྩྭ་ཕྱུགས་དོ་སྙོམས་ཡོང་ཐབས་བྱེད་པའི་ཁར། ཚན་རིག་དང་མཐུན་པའི་སྒོ་ནས་རྩྭ་ཁ་བཀག་ཁུལ་དབྱེ་འབྱེད་གཏན་འབེབས་བྱས་ཏེ། རྩྭ་ཕྱུགས་ག་འཛོལ་མི་ཡོང་བ་བྱེད་དགོས། སྐྱེ་ནུས་ཉམས་ཞན་དང་། ཐང་རྒོད་ཅན། བ་ཚྭ་ཅན། བྱེ་རྡོ་ཅན་བཅས་སུ་འགྱུར་ཚབས་ཆེ་བའི་རྩྭ་ཐང་དང་སྐྱེ་ཁམས་ཉམས་ཞན་ཁུལ་གྱི་རྩྭ་ཐང་དུ་རྩྭ་ཁ་འགོག་པ་དང་ཕྱུགས་འཚོ་མཚམས་འཇོག་པའི་ལམ་ལུགས་ལག་བསྟར་བྱེད་དགོས།

རྫོང་རིམ་ཡན་གྱི་མི་དམངས་སྲིད་གཞུང་གི་ཞིང་ལས་གྲོང་གསེབ་དང་། ནགས་ལས་རྩྭ་ཐང་སོགས་འབྲེལ་ཡོད་སྡེ་ཚན་གྱིས་ངེས་པར་དུ་འགན་འཁྲི་ཁག་བགོས་ལྟར། རྩྭ་ཐང་སྤྱོད་མཁན་དང་རྩྭ་ཐང་འགན་གཙང་ལེན་མཁན་ལ་ཁྲིད་སྟོན་གྱིས་གཟན་རྩྭ་འདེབས་འཛུགས་དང་གསོག་ཉར་བྱས་ནས་གཟན་ཆག་མཁོ་སྤྲོད་བྱེད་ཚད་མང་དུ་གཏོང་བ་དང་། ཕྱུགས་གྲངས་དང་སྣ་རིགས་དེ་བཞིན་ཁྱབ་སྟངས་ལ་སོགས་དོ་སྙོམས་ཡོང་ཐབས་བྱེད་པ། ཕྱུགས་སྣ་ལེགས་འགྱུར་བྱེད་པ། ཕྱུགས་ཁྱུའི་གྲུབ་ཆ་ལེགས་སྒྲིག་བྱེད་པ། བཤས་གཏོང་ཚད་མཐོ་རུ་གཏོང་བ་སོགས་ཀྱི་བྱ་ཐབས་སྤྱད་དེ་རྩྭ་ཐང་བེད་སྤྱོད་ལུགས་དང་མཐུན་པར་བྱེད་དགོས།

དོན་ཚན་ཉེར་ལྔ་པ། རྫོང་རིམ་ཡན་གྱི་མི་དམངས་སྲིད་གཞུང་དང་དེའི་ནགས་ལས་རྩྭ་ཐང་གཙོ་འགན་སྡེ་ཚན་གྱིས་ངེས་པར་དུ་ས་མཐོའི་ཐང་རྒོད་སྔོ་ཁེབས་དང་། མཐོ་གྲང་ན་སྤང་། དེ་བཞིན་ས་མཐོའི་ཐང་རྒོད་རྩྭ་ཐང་བཅས་ལ་སྲུང་སྐྱོབ་ནན་པོ་བྱས་ནས། ཐང་རྒོད་ས་ཞིང་དུ་བྱེ་བཀག་ནགས་སྐྱོང་རྩྭ་གསོ་དང་། དེ་བཞིན་རྩྭ་ཁ་བཀག་པ་དང་། རྩྭ་ཁ་རེས་སྐོར། རྩྭ་ར་བསྙལ་བ། རང་བྱུང་སྡོང་ཕྲན་ནགས་ཚལ་གསོ་སྐྱོང་དང་སོན་ཤུགས་སླར་གསོ། སྐྱས་སྤོས་རྩྭ་གསོ་སོགས་ཀྱི་བཅོས་སྐྱོང་སླར་གསོ་བྱ་ཐབས་སྤྱད་དེ། ཐང་རྒོད་སྐྱེ་ཁམས་སྲུང་སྐྱོབ་དང་ཐང་རྒོད་ས་ཞིང་ཕྱོགས་བསྡུས་བཅོས་སྐྱོང་བྱེད་ཤུགས་ཆེ་རུ་གཏོང་དགོས།

དོན་ཚན་ཉེར་དྲུག་པ། རིམ་ཁག་མི་དམངས་སྲིད་གཞུང་དང་དེ་བཞིན་འབྲེལ་ཡོད་སྡེ་ཚན་གྱིས་བྱ་ཐབས་སྤྱད་དེ་མིས་འདམ་ར་དང་དེའི་སྐྱེ་དངོས་སྣ་མང་རང་བཞིན་ལ་ཤུགས་རྐྱེན་ངན་པ་བཟོ་རིགས་སྔོན་འགོག་དང་ཚོད་འཛིན་བྱས་ནས་འདམ་རའི་སྦགས་བཙོག་འགོག་བཅོས་བྱ་རྒྱུར་ཤུགས་སྣོན་བརྒྱབ་སྟེ། འདམ་ར་ཉམས་ཞན་དུ་འགྲོ་བའི་མིས་བཟོས་ཤུགས་རྐྱེན་དང་རང་བྱུང་ཤུགས་རྐྱེན་ཆུང་དུ་བཏང་ནས་འདམ་རའི་སྐྱེ་ཁམས་ནུས་པ་བརྟན་འཁྱོངས་ཐུབ་པ་བྱེད་དགོས།

རྫོང་རིམ་ཡན་གྱི་མི་དམངས་སྲིད་གཞུང་གིས་རང་བྱུང་ཐོན་ཁུངས་དང་། ཆུའི་སྲིད་འཛིན། ཞིང་ལས་གྲོང་གསེབ། ནགས་ལས་རྩྭ་ཐང་སོགས་འབྲེལ་ཡོད་སྡེ་ཚན་སྒྲིག་འཛུགས་ཀྱིས་ཚན་རིག་དང་མཐུན་པར་རིགས་པས་ཁུངས་སྐྱེལ་བྱེད་དགོས་ལ། སླར་གསོའི་ཆ་རྐྱེན་འཛོམས་པའི་སྔར་ཡོད་འདམ་ར་དང་། ཞན་འགྱུར་འདམ་ར། བ་ཚྭ་ཅན་གྱི་འདམ་ར་སོགས་ཀྱི་སྐྱེ་ཁམས་ལ་ཡུལ་བབ་དང་བསྟུན་ནས་ཆུ་གསབ་པ་དང་། རང་བྱུང་འདམ་རའི་འགྲམ་རྒྱུད་སྲུང་སྐྱོང་བྱེད་པ། སྔོ་ཁེབས་སླར་གསོ་བྱེད་པ། སྦགས་བཙོག་གཙང་སེལ་བྱེད་པ། འཚོ་གནས་ཁུལ་གྱི་སྐྱེ་ཁམས་སླར་གསོ་བྱེད་པ། གནོད་ལྡན་སྐྱེ་དངོས་འགོག་བཅོས་བྱེད་པ། འགོག་གསོ་དང་ཕྱུགས་བཀག་སོགས་ཀྱི་བྱ་ཐབས་སྤྱད་དེ་འདམ་རའི་སྐྱེ་ཁམས་ནུས་པ་སླར་གསོ་བྱེད་དགོས།

དོན་ཚན་ཉེར་བདུན་པ། རིམ་ཁག་མི་དམངས་སྲིད་གཞུང་དང་འབྲེལ་ཡོད་སྡེ་ཚན་གྱིས་རྨོ་ཞིང་སྲུང་སྐྱོབ་ལམ་ལུགས་ནན་ཤོས་དོན་འཁྱོལ་བྱས་ཏེ་རྨོ་ཞིང་སྲུང་སྐྱོབ་དང་ལྟ་སྡོམ་བྱེད་པའི་འགན་འཁྲིའི་ལམ་ལུགས་འཛུགས་པ་དང་འཐུས་སྒོ་ཚང་དུ་བཏང་ནས་རྨོ་ཞིང་སྲུང་སྐྱོབ་ཀྱི་དམར་ཐིག་ནན་པོར་སྲུང་དགོས།

རྫོང་རིམ་ཡན་གྱི་མི་དམངས་སྲིད་གཞུང་གི་ཞིང་ལས་གྲོང་གསེབ་གཙོ་འགན་སྡེ་ཚན་གྱིས་འབྱུང་འཕྲོད་སྐྱེ་ཁམས་དང་བདེ་འཇགས་ཕྱོད་ཆེའི་ཞིང་ལས་ཐོན་སྐྱེད་ལག་རྩལ་ཁྱབ་གདལ་དང་བེད་སྤྱོད་ཀྱིས་ཞིང་ལས་ཐོན་སྐྱེད་པས་རྫས་ལུད་དང་། ཞིང་སྨན། ཕྱུགས་སྨན་སོགས་ཚོད་འཛིན་ནན་པོ་བྱ་རྒྱུར་ཁྲིད་སྟོན་བྱེད་དགོས་པ་དང་། ལོ་ཏོག་སོག་མ་ཕྱོགས་བསྡུས་བེད་སྤྱོད་དང་ཞིང་སྤྱོད་སྐྱི་སྲབ་དང་ཞིང་སྨན་ཕྱུགས་སྨན་གྱི་ཐུམ་སྒྲིལ་སྙིགས་རོ་སོགས་ཕྱིར་བསྡུ་གཙང་སེལ་བྱས་ནས་རྨོ་ཞིང་གི་སྐྱེ་ཁམས་ཁོར་ཡུག་སྲུང་སྐྱོབ་དང་ལེགས་བཅོས་བྱེད་དགོས།

ཞིང་ལས་ཐོན་སྐྱེད་གཉེར་སྐྱོང་པས་ཚན་རིག་དང་མཐུན་པའི་སྒོ་ནས་འདེབས་གསོ་ཟུང་འབྲེལ་དང་། འདེབས་འཛུགས་ཀྱི་གྲུབ་ཆ་ལེགས་སྒྲིག ས་རྒྱུ་ལེགས་བཅོས། ས་རྒྱུའི་གཤིན་ཚད་མཐོར་གཏོང་། སྐྱེ་ཁམས་འཁོར་སྐྱོད། ནད་འབུ་གནོད་མེད་འགོག་ཟོན་སོགས་ཀྱི་བྱ་ཐབས་སྤྱད་དེ། ཚན་རིག་དང་མཐུན་པའི་ངང་རྨོ་ཞིང་བེད་སྤྱོད་བྱས་ནས་རྨོ་ཞིང་གི་རྨང་གཞིའི་ས་བཅུད་ལེགས་སུ་གཏོང་དགོས།

དོན་ཚན་ཉེར་བརྒྱད་པ། རང་སྐྱོང་ལྗོངས་མི་དམངས་སྲིད་གཞུང་སྐྱེ་ཁམས་ཁོར་ཡུག་གཙོ་གཉེར་སྡེ་ཚན་གྱིས་འཕེལ་སྒྱུར་དང་། སློབ་གསོ། ཚན་རྩལ། ནོར་སྲིད། རང་བྱུང་ཐོན་ཁུངས། སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན། ཆུའི་སྲིད་འཛིན། ཞིང་ལས་གྲོང་གསེབ། འཕྲོད་བསྟེན་བདེ་ཐང་། ཁྲོམ་ར་ལྟ་འདོམས། ནགས་ལས་རྩྭ་ཐང་སོགས་འབྲེལ་ཡོད་སྡེ་ཚན་དང་མཉམ་དུ་ཚན་རིག་དང་མཐུན་པའི་སྒོ་ནས་སྐྱེ་དངོས་སྣ་མང་རང་བཞིན་སྲུང་སྐྱོབ་བྱེད་པའི་རང་སྐྱོང་ལྗོངས་ཀྱི་འཐབ་ཇུས་དང་བྱ་སྤྱོད་འཆར་གཞི་བཟོས་ཏེ་སྐྱེ་དངོས་སྣ་མང་རང་བཞིན་གྱི་སྲུང་སྐྱོབ་དམིགས་ཚད་དང་། ལས་འགན་གཙོ་བོ། ལས་གྲྭ་གལ་ཆེན། འགན་སྲུང་བྱ་ཐབས་སོགས་ཁ་གསལ་བཟོས་རྗེས། རང་སྐྱོང་ལྗོངས་མི་དམངས་སྲིད་གཞུང་ལ་སྙན་སེང་ཞུས་ནས་ཆོག་མཆན་ཐོབ་རྗེས་ཡོངས་བསྒྲགས་བྱེད་པ་དང་སྦྲགས་ལག་བསྟར་བྱེད་དགོས།

རྫོང་རིམ་ཡན་གྱི་མི་དམངས་སྲིད་གཞུང་གིས་འབྲེལ་ཡོད་སྡེ་ཚན་སྒྲིག་འཛུགས་བྱས་ནས་སྐྱེ་དངོས་སྣ་མང་རང་བཞིན་སྲུང་སྐྱོབ་བྱེད་པའི་རང་སྐྱོང་ལྗོངས་ཀྱི་འཐབ་ཇུས་དང་བྱ་སྤྱོད་འཆར་གཞི་གཞིར་བཟུང་། སྲིད་འཛིན་ས་ཁོངས་དེ་གའི་སྐྱེ་དངོས་སྣ་མང་རང་བཞིན་སྲུང་སྐྱོབ་བྱེད་པའི་ཇུས་གཞི་བཟོ་དགོས་པ་མ་ཟད་དུས་བཀག་ལྟར་སྐྱེ་དངོས་སྣ་མང་རང་བཞིན་གྱི་ཐོན་ཁུངས་ལ་ཡོངས་བཤེར་དང་ཆེད་དོན་བརྟག་དཔྱད་བྱས་ནས། སྐྱེ་དངོས་སྣ་མང་རང་བཞིན་སྲུང་སྐྱོབ་བྱེད་པའི་སྲིད་ཇུས་བྱ་ཐབས་དོན་འཁྱོལ་བྱས་ཐོག སྐྱེ་ཁམས་བར་ཁྱམས་འཛུགས་པ་དང་འཐུས་སྒོ་ཚང་དུ་བཏང་ནས་སྐྱེ་ཁམས་མ་ལག་གི་ཆ་ཚང་རང་བཞིན་དང་བརྒྱུད་སྦྲེལ་རང་བཞིན་ཆེ་རུ་གཏོང་དགོས།

དོན་ཚན་ཉེར་དགུ་པ། རང་སྐྱོང་ལྗོངས་མི་དམངས་སྲིད་གཞུང་གིས་ནགས་ལས་རྩྭ་ཐང་དང་ཞིང་ལས་གྲོང་གསེབ་སོགས་འབྲེལ་ཡོད་སྡེ་ཚན་སྒྲིག་འཛུགས་བྱས་ཏེ་རི་སྐྱེས་སྲོག་ཆགས་དང་སྐྱེ་དངོས་ཐོན་ཁུངས་ཀྱི་ཆ་འཕྲིན་མཛོད་འཛུགས་པ་དང་འཐུས་སྒོ་ཚང་དུ་བཏང་ནས་རི་སྐྱེས་སྲོག་ཆགས་དང་སྐྱེ་དངོས་ཐོན་ཁུངས་ལ་བརྟག་དཔྱད་དང་ལྟ་བཤེར་བྱས་ཏེ་དངོས་རིགས་ཡིག་ཚགས་ཚགས་ཚུད་པོ་བཟོ་དགོས། གསའ་དང་། འབྲོང་། གཙོད། ཤྭ་སྐྱ། བྷང་ག་ལའི་སྟག ཁྲུང་ཁྲུང་སྐེ་ནག་སོགས་དང་། སྲོ་ལོ་དམར་པོ་དང་ཤུག་སྡོང་ཆེན་པོ་སོགས་རྩ་ཆེ་ཞིང་སྟོངས་ལ་ཉེ་བའམ་ཡང་ན་དམིགས་བསལ་སྲུང་སྐྱོབ་ཀྱི་རིན་ཐང་ལྡན་པའི་རི་སྐྱེས་སྲོག་ཆགས་དང་སྐྱེ་དངོས་རང་བྱུང་གཅིག་སྡུད་ཁུལ་དང་འཚོ་སྡོད་ཁུལ་གལ་ཆེན་དུ་ཁྲིམས་བཞིན་རང་བྱུང་སྲུང་སྐྱོབ་ཁུལ་འཛུགས་པ་མ་ཟད། རི་སྐྱེས་སྲོག་ཆགས་དང་སྐྱེ་དངོས་སྲུང་སྐྱོབ་ཁུལ། དེ་བཞིན་རི་སྐྱེས་སྐྱེ་དངོས་གཅོད་འབྲེག་བཀག་སྡོམ་ཁུལ་སོགས་སྐྱེ་ཁམས་ནུས་པ་སྲུང་སྐྱོབ་ཁུལ་དབྱེ་འབྱེད་གཏན་འཁེལ་བྱས་ཏེ་སྲུང་སྐྱོབ་མཚོན་རྟགས་འཛུགས་པ་དང་སྦྲགས་སྲུང་སྐྱོབ་བྱ་ཐབས་ཡོངས་བསྒྲགས་བྱས་ནས་གཙོ་གནད་དུ་སྲུང་སྐྱོབ་བྱེད་དགོས།

རྫོང་རིམ་ཡན་གྱི་མི་དམངས་སྲིད་གཞུང་ནགས་ལས་རྩྭ་ཐང་དང་ཞིང་ལས་གྲོང་གསེབ་གཙོ་འགན་སྡེ་ཚན་གྱིས་འབྲེལ་ཡོད་སྡེ་ཚན་དང་མཉམ་དུ་རི་སྐྱེས་སྲོག་ཆགས་ཀྱི་གནས་སྤོ་རྒྱུད་སྤེལ་བྱེད་ས་དང་འཚོ་སྡོད་ཁུལ་སྲུང་སྐྱོབ་བྱེད་པར་ཤུགས་སྣོན་རྒྱག་དགོས་ལ། སྐོར་སྲུང་ལྟ་བཤེར་དང་། མི་ཐབས་ལ་བརྟེན་ནས་རྒྱུད་སྤེལ། འཚོ་སྡོད་ཁུལ་སླར་གསོ་སྒྱུར་བཀོད། གནས་སྤོ་སྲུང་སྐྱོབ་སོགས་ཀྱི་བྱ་ཐབས་སྤྱད་དེ་སྟོངས་ལ་ཉེ་བའི་རི་སྐྱེས་སྲོག་ཆགས་ལ་མྱུར་སྐྱོབ་རང་བཞིན་གྱི་སྲུང་སྐྱོབ་བྱེད་དགོས།

རི་སྐྱེས་སྲོག་ཆགས་ཀྱིས་མི་ལ་རྨས་སྐྱོན་བཏང་བ་དང་། ཕྱུགས་རིགས་དང་ལོ་ཏོག་གམ་ཡང་ན་རྒྱུ་ནོར་གཞན་དག་ལ་གྱོང་གུན་བཟོས་ཕྱིན། ཁྲིམས་ལྟར་གུན་ཚབ་འཇལ་དགོས།

དོན་ཚན་སུམ་ཅུ་པ། རྫོང་རིམ་ཡན་གྱི་མི་དམངས་སྲིད་གཞུང་གིས་རང་བྱུང་ཐོན་ཁུངས་དང་། སྐྱེ་ཁམས་ཁོར་ཡུག ཆུའི་སྲིད་འཛིན། ནགས་ལས་རྩྭ་ཐང་སོགས་འབྲེལ་ཡོད་སྡེ་ཚན་སྒྲིག་འཛུགས་བྱས་ཏེ། གཙང་པོའི་ཆུ་འགོ་ཁུལ་དང་། འཐུང་ཆུའི་ཆུ་འགོ་སྲུང་སྐྱོབ་ཁུལ། ཆུ་རྩ་གསོ་ཁུལ། དེ་བཞིན་ཆུ་འགོ་གལ་ཆེན་དང་། ས་ཆུ་ཤོར་རིགས་གཙོ་གནད་སྔོན་འགོག་ཁུལ་དང་བཅོས་སྐྱོང་ཁུལ། མི་འབོར་འདུས་ཚད་བལྟོས་བཅས་མཐོ་བའི་ས་མཐོའི་ལུང་གཞུང་ཁུལ། སྐྱེ་ཁམས་འགོག་སྲུང་ཁུལ་སོགས་གཙོ་གནད་ས་ཁོངས་སུ་བསྡམས་གསོ་བྱས་ཏེ་སྲུང་སྐྱོབ་དང་རང་བྱུང་སླར་གསོ། དེ་བཞིན་ཞིང་སྲུང་ནགས་ཚལ་དང་། ཆུ་རྩ་གསོ་འཁྱོངས་ནགས་ཚལ། ཆུ་ངོགས་འགོག་སྲུང་ནགས་ཚལ་སོགས་འཛུགས་སྐྱོང་བྱེད་པའི་ཐབས་ལམ་སྤྱད་དེ་ས་ཆུ་སྲུང་འཛིན་གྱི་ནུས་པ་ཆེ་རུ་གཏོང་བ་དང་སྦྲགས། ས་ཆུ་ཤོར་རིགས་སྔོན་འགོག་དང་ཐོན་ཚད་ཇེ་ཉུང་དུ་གཏོང་དགོས།

ས་ཆུ་ཤོར་ཚབས་ཆེ་བ་དང་སྐྱེ་ཁམས་ཉམས་ཞན་ས་ཁོངས་སུ་ས་ཆུ་ཤོར་སྲིད་པའི་ཐོན་སྐྱེད་འཛུགས་སྐྲུན་གཏན་ནས་བྱེད་མི་ཆོག གལ་ཏེ་རྒྱལ་ཁབ་གོང་འཕེལ་གཏོང་བའི་འཐབ་ཇུས་དང་རྒྱལ་ཇུས་དམངས་འཚོའི་རྐྱེན་པས་འཛུགས་སྐྲུན་བྱེད་དགོས་ཕྱིན། ཚན་རིག་དང་མཐུན་པའི་རིགས་པས་ཁུངས་སྐྱེལ་བྱེད་དགོས་པ་མ་ཟད། ཁྲིམས་བཞིན་ས་ཆུ་སྲུང་འཛིན་གྱི་ཇུས་གཞིར་ཞིབ་མཆན་འགོད་པ་སོགས་ཀྱི་འགྲོ་ལུགས་བསྒྲུབས་ནས་འགལ་རྐྱེན་ཚོད་འཛིན་ནན་པོ་བྱེད་དགོས།

དོན་ཚན་སོ་གཅིག་པ། གཏེར་ལས་དབང་ཆ་སྤྲོད་སྐབས་རྒྱལ་ཁོངས་བར་སྟོང་འཆར་འགོད་དང་གཏེར་རྫས་ཐོན་ཁུངས་འཆར་འགོད་ཀྱི་བླང་བྱ་དང་མཐུན་པ་བྱེད་དགོས། སྐྱེ་ཁམས་སྲུང་སྐྱོབ་དོ་དམ་གྱི་བླང་བྱ་དང་མི་མཐུན་པར་འབྲི་ཆུ་དང་། རྫ་ཆུ། ཡར་ཀླུང་གཙང་པོ། རྒྱལ་མོ་རྔུལ་ཆུ་སོགས་གཙང་པོའི་ཆུ་འགོ་རང་བྱུང་སྲུང་སྐྱོབ་ཁུལ་དུ་བྱེ་གཏེར་སྔོག་འདོན་གྱི་བྱེད་སྒོ་གཏན་ནས་སྤེལ་མི་ཆོག

གཏེར་ལས་དབང་ཆ་ཡོད་མཁན་གྱིས་གཏེར་ཁའི་ཐོན་ཁུངས་རྩད་ཞིབ་དང་སྔོག་འདོན་བྱེད་སྐབས་སྔོན་ཐོན་གོ་ཆོད་ཀྱི་བཟོ་རྩལ་དང་། སྒྲིག་ཆས། ཐོན་རྫས་བཅས་སྤྱོད་དགོས་པ་དང་། ཁོར་ཡུག་སྲུང་སྐྱོབ་དང་བདེ་འཇགས་འགན་ལེན་ཐུབ་པའི་རྩད་ཞིབ་དང་སྔོག་འདོན་གྱི་ལག་རྩལ་དང་ཐབས་ལམ་བདམས་ཏེ་གཏེར་ཁའི་ཐོན་ཁུངས་དང་སྐྱེ་ཁམས་ཁོར་ཡུག་ལ་གཏོར་སྐྱོན་མི་ཕོག་པའམ་ཡང་ན་དེ་ཙམ་མི་ཕོག་པ་བྱེད་དགོས། རྒྱལ་ཁབ་ཀྱིས་ཕྱིར་འདོར་བཀའ་རྒྱ་གནང་བའི་བཟོ་རྩལ་དང་། སྒྲིག་ཆས། ཐོན་རྫས། ལག་རྩལ་བཅས་སྤྱོད་མི་ཆོག

གཏེར་རྫས་ཐོན་ཁུངས་སྔོག་འདོན་བྱེད་སྐབས་ཚན་རིག་དང་མཐུན་པའི་ངང་གཏེར་རྫས་ཐོན་ཁུངས་སྔོག་འདོན་བྱ་རྒྱུའི་ཇུས་གཞི་དང་གཏེར་ཁུལ་སྐྱེ་ཁམས་སླར་གསོ་བྱ་རྒྱུའི་ཇུས་གཞི་བཟོ་དགོས། གསར་སྤེལ་གཏེར་རི་ཡིན་ཕྱིན་འབྱུང་འཕྲོད་གཏེར་རིའི་ཚད་གཞི་གཞིར་བཟུང་འཆར་འགོད་ཇུས་འགོད་དང་འཛུགས་གཉེར་དོ་དམ་ནན་པོ་བྱེད་དགོས། གཏེར་རྫས་ཐོན་ཁུངས་སྔོག་འདོན་བྱེད་སྐབས་ཚན་རིག་དང་མཐུན་པའི་སྒོ་ནས་གཏེར་རྫས་ཐོན་ཁུངས་སྔོག་འདོན་བྱ་རྒྱུའི་ཇུས་གཞི་དང་གཏེར་ཁུལ་གྱི་སྐྱེ་ཁམས་སླར་གསོ་བྱ་རྒྱུའི་ཇུས་གཞི་བཟོ་དགོས། གཏེར་ཁ་སྔོག་འདོན་བྱེད་སྐབས་འབྱུང་འཕྲོད་ཅན་དུ་རིམ་སྤོར་སྒྱུར་བཀོད་བྱས་ཏེ་སྔོག་འདོན་བྱས་པ་ལས་ཐོན་པའི་ཆུ་སྙིགས་དང་། རླངས་རོ། སྙིགས་རོ། རྡོ་རོ་སོགས་བེད་མེད་ཟོག་རོ་ཁྲིམས་ལྟར་གཙང་སེལ་བྱས་ནས་གཏེར་སྙིགས་གསོག་མཛོད་ལས་གཉེར་དོ་དམ་བྱ་རྒྱུར་ཤུགས་སྣོན་རྒྱག་དགོས།

(པར་ངོས་བདུན་པར་གཟིགས)(པར་ངོས་དྲུག་པར་མཐུད)

དོན་ཚན་སོ་གཉིས་པ། རྫོང་རིམ་པ་ཡན་གྱི་མི་དམངས་སྲིད་གཞུང་གིས་རང་བྱུང་ཐོན་ཁུངས་སོགས་འབྲེལ་ཡོད་སྡེ་ཚན་སྒྲིག་འཛུགས་བྱས་ནས་ལོ་རྒྱུས་ཐོག་ལུས་པའི་གཏེར་རིའི་སྐྱེ་ཁམས་སླར་གསོ་བྱེད་མགྱོགས་སུ་བཏང་སྟེ་འཛུགས་སྐྲུན་བྱེད་བཞིན་པ་དང་ལས་གཉེར་བྱེད་པའི་གཏེར་རིར་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་དགོས་པ་དང་། གཏེར་ཁ་འདོན་དབང་ཡོད་མཁན་ལ་ཁྲིམས་ལྟར་གཏེར་རིའི་ས་གཤིས་ཁོར་ཡུག་སྲུང་སྐྱོབ་དང་། གཏེར་རིའི་སྦགས་བཙོག་འགོག་བཅོས་དང་སླར་གསོ་བཅོས་སྐྱོང་བཅས་ཀྱི་འགན་འཁྲི་བསྒྲུབ་རྒྱུར་སྐུལ་འདེད་གཏོང་དགོས་པ། གཏེར་རིའི་ས་གཤིས་ཁོར་ཡུག་ལེགས་བཅོས་བྱས་ནས་ཁོར་ཡུག་ལ་བཙོག་སྐྱོན་མི་གཏོང་བ་དང་སྐྱེ་ཁམས་ལ་གཏོར་སྐྱོན་མི་ཕོག་པ་བྱེད་དགོས།

ལེའུ་བཞི་པ། སྐྱེ་ཁམས་ཀྱི་ཉེན་ཁ་འགོག་ཟོན་བྱེད་ཕྱོགས།

དོན་ཚན་སོ་གསུམ་པ། རྫོང་རིམ་པ་ཡན་གྱི་མི་དམངས་སྲིད་གཞུང་གིས་རང་བྱུང་གནོད་འཚེར་བརྟག་དཔྱད་དཔྱད་གདེང་དང་ལྟ་ཞིབ་ཚད་ལེན་གྱིས་ཉེན་བརྡ་གཏོང་བའི་ལམ་སྲོལ་འཛུགས་པ་དང་འཐུས་སྒོ་ཚང་དུ་བཏང་སྟེ། རང་བྱུང་ཐོན་ཁུངས་དང་། སྐྱེ་ཁམས་ཁོར་ཡུག ཆུའི་སྲིད་འཛིན། འཕྲལ་སྡོམ་དོ་དམ། གནམ་གཤིས། ས་ཡོམ་སོགས་འབྲེལ་ཡོད་སྡེ་ཚན་སྒྲིག་འཛུགས་བྱས་ནས་གངས་རུད་དང་། འཁྱགས་རུད། ཆུ་རུད། རི་ཉིལ་བ། ལྡེབས་ཉིལ་བ། ས་ཡོམ། འདམ་རྡོའི་ཆུ་རུད། འཁྱགས་མཚོའི་རགས་ཁ་ཤོར་བ། འཁྱགས་ས་བཞུར་བ། ནགས་ཚལ་དང་རྩྭ་ཐང་གི་མེ་སྐྱོན། དྲག་ཆར(ཁ་བ)འབབ་པ། ཐན་པ་བསྟན་པ་སོགས་ཀྱི་རང་བྱུང་གནོད་འཚེར་བརྟག་དཔྱད་དཔྱད་གདེང་དང་ལྟ་ཞིབ་ཚད་ལེན་གྱིས་ཉེན་བརྡ་གཏོང་དགོས་པ་དང་། རང་བྱུང་གནོད་འཚེའི་སྔོན་བརྡ་དང་ཉེན་བརྡའི་ཆ་འཕྲིན་ཁྲིམས་ལྟར་འགྲེམས་བསྒྲགས་བྱས་ནས་རང་བྱུང་གནོད་འཚེ་དང་ཁོར་ཡུག་སྦགས་བཙོག་གི་བྱུར་རྐྱེན་སོགས་ཐོལ་བྱུང་དོན་རྐྱེན་ལ་འཕྲལ་སྡོམ་སྔོན་ཇུས་བཟོ་དགོས།

དོན་ཚན་སོ་བཞི་པ། རྫོང་རིམ་པ་ཡན་གྱི་མི་དམངས་སྲིད་གཞུང་གིས་འཕེལ་སྒྱུར་དང་། སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན། འགྲིམ་འགྲུལ་སྐྱེལ་འདྲེན། ཆུའི་སྲིད་འཛིན། འཕྲལ་སྡོམ་དོ་དམ། གནམ་གཤིས། ས་ཡོམ་སོགས་འབྲེལ་ཡོད་སྡེ་ཚན་སྒྲིག་འཛུགས་བྱས་ནས་རང་བྱུང་གནོད་འཚེ་ཕྱོགས་བསྡུས་བཅོས་སྒྲིག་བྱ་རྒྱུར་ཤུགས་སྣོན་རྒྱག་དགོས་པ་དང་། འབྲེལ་ཡོད་འཛུགས་སྐྲུན་ལས་གྲྭའི་བཙན་ཤེད་རང་བཞིན་གྱི་ཚད་གཞི་སོགས་ལག་བསྟར་བྱས་ཚུལ་ལ་ལྟ་སྐུལ་ཞིབ་བཤེར་བྱས་ནས་རང་བྱུང་གནོད་འཚེ་སྔོན་འགོག་བྱ་རྒྱུའི་འབྲེལ་ཡོད་ཚད་གཞིའི་བླང་བྱ་དང་མཐུན་ཐུབ་པ་བྱེད་དགོས། ཆུ་ལོག་དང་ཞོད་སྐྱོན་ཐན་སྐྱོན་དང་། འཁྱགས་མཚོའི་རགས་ཁ་ཤོར་བ། ནགས་ཚལ་དང་རྩྭ་ཐང་གི་མེ་སྐྱོན། ས་གཤིས་ཀྱི་གནོད་འཚེ། ས་ཡོམ་སོགས་ཀྱི་རང་བྱུང་གནོད་འཚེ་སྔོན་འགོག་དང་དེར་ཁ་གཏད་གཅོག་པའི་ནུས་པ་ཆེ་རུ་གཏོང་དགོས།

འགྲིམ་འགྲུལ་དང་། ཆུ་བེད། གློག་ཤུགས། གྲོང་སྲིད། མཐའ་མཚམས་འགག་སྒོ་སོགས་རྨང་གཞིའི་སྒྲིག་བཀོད་ལས་གྲྭ་འཛུགས་སྐྲུན་དང་ལས་གཉེར་ཚན་པས་རང་བྱུང་གནོད་འཚེ་ཐོན་ཉེན་ཆེ་བའི་རང་བཞིན་དང་འགོག་བཅོས་བྱེད་འཐུས་ཀྱི་རང་བཞིན་ལ་གཅིག་གྱུར་འཆར་འགོད་ཀྱིས་བསམ་གཞིགས་བྱས་ཏེ། ཕྱོགས་བསྡུས་རང་བྱུང་གནོད་འཚེ་ཐོན་པའི་ཉེན་ཁ་ཇི་ཡོང་ཚོད་སྐོར་བྱེད་པ་དང་། ཕྱོགས་བསྡུས་བཅོས་སྐྱོང་བྱ་ཐབས་སྤྱད་དེ། ལས་གྲྭ་འཛུགས་སྐྲུན་དང་ལས་གཉེར་བྱེད་རིང་གི་རང་བྱུང་གནོད་འཚེ་འགོག་བཅོས་བྱ་རྒྱུར་ཤུགས་སྣོན་བརྒྱབ་ནས་རང་བྱུང་གནོད་འཚེའི་ཤུགས་རྐྱེན་སྔོན་འགོག་གམ་ཡང་ན་ཆུང་དུ་གཏོང་དགོས་པ་དང་། མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་འགན་སྲུང་བྱེད་དགོས།

དོན་ཚན་སོ་ལྔ་པ། འཛུགས་སྐྲུན་རྣམ་གྲངས་ཀྱིས་ཁོར་ཡུག་ལ་གནོད་འཚེ་བཟོ་ཚད་ལ་གཞིགས་ནས་འཛུགས་སྐྲུན་རྣམ་གྲངས་ཀྱི་ཁོར་ཡུག་གནོད་འཚེ་དཔྱད་དཔོག་ལ་ཁྲིམས་ལྟར་རིགས་དབྱེ་དོ་དམ་བྱ་རྒྱུ། འཛུགས་སྐྲུན་རྣམ་གྲངས་ཀྱི་ཁོར་ཡུག་གནོད་འཚེ་དཔྱད་དཔོག་ཡིག་ཆར་ཆོག་མཆན་ཐོབ་རྗེས། འཛུགས་སྐྲུན་རྣམ་གྲངས་ཀྱི་ངོ་བོ་དང་། གཞི་ཁྱོན། ས་ཡུལ། སྤྱོད་རྒྱུའི་ཐོན་སྐྱེད་བཟོ་རྩལ་ལམ་ཡང་ན་སྦགས་བཙོག་འགོག་བཅོས་དང་སྐྱེ་ཁམས་ལ་གཏོར་སྐྱོན་མི་ཕོག་པའི་བྱ་ཐབས་བཅས་ལ་འགྱུར་ལྡོག་ཆེན་པོ་བྱུང་རིགས་ལ། འཛུགས་སྐྲུན་ཚན་པས་ཁོར་ཡུག་གནོད་འཚེ་དཔྱད་དཔོག་ཡིག་ཆར་བསྐྱར་དུ་སྙན་སེང་བཀའ་འཁྲོལ་ཞུ་དགོས།

གཙོ་གནད་ལས་གྲྭ་འཛུགས་སྐྲུན་བྱས་ཏེ་སྐྱེ་ཁམས་དང་ས་གཤིས་ཁོར་ཡུག་ལ་ཤུགས་རྐྱེན་ཐེབས་སྲིད་རིགས་ལ། འཛུགས་སྐྲུན་ཚན་པས་ལས་གྲྭའི་རྒྱུད་ཀྱི་སྐྱེ་ཁམས་དང་ས་གཤིས་ཁོར་ཡུག་གི་ཚོར་སྐྱེན་ཉམས་ཞན་ཡིན་པའི་ས་ཁོངས་ཀྱི་གནས་ཚུལ་ལ་གཞིགས་ནས་ལམ་རྒྱུད་སྐྱེ་ཁམས་དང་ས་གཤིས་ཁོར་ཡུག་ལ་ལྟ་བཤེར་བྱ་རྒྱུའི་ཇུས་གཞི་བཟོས་ཏེ། སྐྱེ་ཁམས་དང་ས་གཤིས་ཁོར་ཡུག་གི་ཤུགས་རྐྱེན་ལ་ཚེ་སྲོག་འཁོར་ཡུན་ཧྲིལ་པོར་ལྟ་ཞིབ་ཚད་ལེན་བྱེད་པ་དེའི་ནང་ལས་གྲྭ་འགོ་མ་བཙུགས་གོང་དུ་གདིང་གཞིར་ལྟ་བཤེར་བྱེད་པ་དང་། ལས་གྲྭ་འཛུགས་སྐྲུན་བྱེད་རིང་སྐྱེ་ཁམས་དང་ས་གཤིས་ཁོར་ཡུག་གི་ཤུགས་རྐྱེན་ལ་ལྟ་བཤེར་བྱེད་པ། ལས་གྲྭ་ལས་གཉེར་བྱེད་རིང་སྐྱེ་ཁམས་དང་ས་གཤིས་ཁོར་ཡུག་གི་འགྱུར་ལྡོག་དང་སྲུང་སྐྱོབ་སླར་གསོར་རྗེས་འདེད་ལྟ་བཤེར་བྱེད་པ་བཅས་ཚུད་ཡོད།

གཙོ་གནད་ལས་གྲྭ་འཛུགས་སྐྲུན་བྱེད་སྐབས་རི་སྐྱེས་སྲོག་ཆགས་ཀྱི་གཙོ་གནད་འཚོ་སྡོད་ཁུལ་དང་། གནས་སྤོ་ཕྱིར་རྒྱུ་བྱེད་ལམ། དེ་བཞིན་རྒྱལ་ཁབ་ཀྱིས་གཙོ་གནད་དུ་སྲུང་སྐྱོབ་བྱེད་པའི་རི་སྐྱེས་སྐྱེ་དངོས་རང་བྱུང་གཅིག་སྡུད་ཁྱབ་ཁུལ་བཅས་ལ་གཡོལ་གང་ཐུབ་བྱེད་དགོས་པ་དང་། གཡོལ་ཐབས་གཏན་ནས་མེད་ཚེ། རི་སྐྱེས་སྲོག་ཆགས་ཀྱི་བགྲོད་ལམ་བཟོ་བ་དང་གནས་སྤོ་བྱ་ཡུལ་སྲུང་སྐྱོབ་བྱེད་པ་སོགས་ཀྱི་ཐབས་ལམ་སྤྱད་དེ་ལམ་ཐིག་གནས་ས་དང་། ལས་གྲྭའི་རྣམ་པ། ཨར་ལས་ཇུས་གཞི་བཅས་ལེགས་སུ་བཏང་ནས་རང་བྱུང་སྐྱེ་ཁམས་མ་ལག་དང་རི་སྐྱེས་སྲོག་ཆགས། དེ་བཞིན་སྐྱེ་དངོས་བཅས་ལ་གནོད་འཚེ་མི་ཕོག་པའམ་ཡང་ན་ཕོག་ཉུང་དུ་གཏོང་དགོས།

དོན་ཚན་སོ་དྲུག་པ། རྫོང་རིམ་པ་ཡན་གྱི་མི་དམངས་སྲིད་གཞུང་གིས་སྲིད་འཛིན་ས་ཁོངས་དེ་གའི་ནང་གི་སོན་རྒྱུའི་ཐོན་ཁུངས་ལ་སྲུང་སྐྱོབ་དང་དོ་དམ་བྱ་རྒྱུར་ཤུགས་སྣོན་རྒྱག་པ་དང་། འཆར་གཞི་ཡོད་པའི་སྒོ་ནས་སོན་རྒྱུའི་ཐོན་ཁུངས་ལ་ཡོངས་བཤེར་དང་། འཚོལ་བསྡུ། ལེགས་སྒྲིག དཔྱད་འདོམས། ཐོ་འགོད། ཉར་ཚགས། སྤེལ་རེས། བེད་སྤྱོད་བཅས་བྱེད་དུ་བཅུག་སྟེ། རྩ་ཆེ་ཞིང་སྟོངས་ལ་ཉེ་བ་དང་ཁྱད་ཆོས་ལྡན་པའི་ས་གནས་ཀྱི་སྣ་རིགས་སོན་རྒྱུ་གཙོ་གནད་དུ་བཟུང་ནས་འཚོལ་བསྡུ་བྱེད་དགོས་པ་དང་། དགོས་མཁོར་གཞིགས་ནས་ཁྲིམས་ལྟར་སྣ་རིགས་སོན་རྒྱུའི་ཐོན་ཁུངས་མཛོད་དང་། སོན་རྩིའི་ཐོན་ཁུངས་སྲུང་སྐྱོབ་ཁུལ། སོན་རྩིའི་ཐོན་ཁུངས་སྲུང་སྐྱོབ་བྱ་ཡུལ་བཅས་འཛུགས་དགོས།

ཚན་པ་གང་ཞིག་དང་མི་སུ་ཞིག་གིས་ཀྱང་སོན་རྩིའི་ཐོན་ཁུངས་བཙན་བཟུང་དང་གཏོར་བཤིག་གཏོང་མི་ཆོག རྒྱལ་ཁབ་དང་རང་སྐྱོང་ལྗོངས་ཀྱིས་གཙོ་གནད་སྲུང་སྐྱོབ་བྱེད་པའི་རང་བྱུང་སོན་རྩིའི་ཐོན་ཁུངས་འཚོལ་བསྡུའམ་ཡང་ན་གཅོད་འབྲེག་བྱེད་རིགས་བཀག་འགོག་བྱེད་དགོས། ཚན་རིག་ཞིབ་འཇུག་དང་། གནོད་ལྡན་སྐྱེ་དངོས་འགོག་བཅོས། རང་བྱུང་གནོད་འཚེ་འགོག་བཅོས་སོགས་དམིགས་བསལ་གནས་ཚུལ་གྱིས་རྐྱེན་པས་འཚོལ་བསྡུའམ་ཡང་ན་གཅོད་འབྲེག་བྱེད་དགོས་ཚེ་ཁྲིམས་ལྟར་ཆོག་མཆན་ཐོབ་པར་བྱེད་དགོས།

དོན་ཚན་སོ་བདུན་པ། རྫོང་རིམ་པ་ཡན་གྱི་མི་དམངས་སྲིད་གཞུང་གིས་རང་བྱུང་ཐོན་ཁུངས་དང་། སྐྱེ་ཁམས་ཁོར་ཡུག ཞིང་ལས་དང་གྲོང་གསེབ། ནགས་ལས་རྩྭ་ཐང་། འགག་སྒོ་སོགས་འབྲེལ་ཡོད་ཚན་པ་སྒྲིག་འཛུགས་བྱས་ཏེ། ཕྱི་ཡོང་སྐྱེ་དངོས་ལ་ཡོངས་བཤེར་བྱེད་དགོས་པ་མ་ཟད། ས་ཁོངས་ཀྱི་ཕྱི་ཡོང་དངོས་རིགས་དང་། གཙོ་གནད་འགོག་ཟོན་བྱེད་ཁོངས། འགོག་ཟོན་བྱ་ཐབས་བཅས་ཁ་གསལ་བཟོས་ནས། ཕྱི་ཡོང་དངོས་རིགས་ནང་འདྲེན་བྱེད་པའི་ཉེན་ཁར་དཔྱད་དཔོག་དང་འཇུག་འཐུས་ལམ་ལུགས་ནན་དུ་བཏང་སྟེ་ཕྱི་ཡོང་དངོས་རིགས་འགག་སྒོ་ནས་འགོག་ཟོན་བྱེད་ཤུགས་ཆེ་རུ་བཏང་ནས་ཕྱི་ཡོང་དངོས་རིགས་ལ་བརྟག་དཔྱད་དང་། ལྟ་ཞིབ་ཚད་ལེན། ཉེན་ཟོན་སྔོན་བརྡ། ཚོད་འཛིན། དཔྱད་དཔོག གཙང་སེལ། སྐྱེ་ཁམས་སླར་གསོ་སོགས་བྱེད་པར་ཤུགས་སྣོན་རྒྱག་དགོས།

ཚན་པ་གང་ཞིག་དང་མི་སུ་ཞིག་གིས་ཀྱང་ཆོག་མཆན་མ་ཐོབ་པར་རང་དགར་ཕྱི་ཡོང་སྐྱེ་དངོས་ནང་འདྲེན་དང་གློད་མི་ཆོག

དོན་ཚན་སོ་བརྒྱད་པ། རྫོང་རིམ་པ་ཡན་གྱི་མི་དམངས་སྲིད་གཞུང་གིས་འཕེལ་སྒྱུར་དང་། རང་བྱུང་ཐོན་ཁུངས། སྐྱེ་ཁམས་ཁོར་ཡུག འཕྲལ་སྡོམ་དོ་དམ། ནགས་ལས་རྩྭ་ཐང་། གནམ་གཤིས་སོགས་འབྲེལ་ཡོད་ཚན་པ་སྒྲིག་འཛུགས་བྱས་ཏེ། ས་ངོས་ཀྱི་རིམ་པ་མང་བའི་བྱེད་ནུས་ལྟ་ཞིབ་ཚད་ལེན་དྲ་རྒྱ་བཟོ་རྒྱུར་སྐུལ་འདེད་གཏོང་དགོས་པ་དང་། གནམ་གཤིས་ཀྱི་གནོད་འཚེ་དང་གནམ་གཤིས་འགྱུར་ལྡོག་གིས་སྐྱེ་ཁམས་བདེ་འཇགས་ལ་ཤུགས་རྐྱེན་ཐེབས་ཚུལ་ཐད་ལྟ་ཞིབ་ཚད་ལེན་བྱེད་ཤུགས་ཆེ་རུ་གཏོང་དགོས་ཤིང་། བྱང་ཐང་ས་མཐོ་དང་། ཧི་མ་ལ་ཡའི་རི་རྒྱུད། གངས་ཏི་སེའི་རི་རྒྱུད། གཉན་ཆེན་ཐང་ལྷའི་རི་རྒྱུད། གདང་ལའི་རི་རྒྱུད་སོགས་ས་ཁོངས་ནང་གི་འཁྱགས་ཞྭ་དང་འཁྱགས་རོམ་ཆེ་གྲས་དང་། གཞི་ཁྱོན་ཆུང་བའི་འཁྱགས་རོམ་ཚོགས་པ། གཙང་གསུམ་ཆུ་འགོ་དང་བོད་ནུབ་བྱང་གི་བྱང་ཐང་ས་མཐོའི་མཐོ་གྲང་རྩྭ་ཐང་གི་སྔོ་ཁེབས་ཞན་འགྱུར་དང་། ས་ཆུ་ཤོར་བ། ས་ཆ་བྱེ་འགྱུར། བོད་བྱང་ཐང་གི་མཚོ་མོའི་ཆུ་ཁ་མཐོ་རུ་འགྲོ་བ་སོགས་ཚོར་སྣང་སྐྱེན་པའི་ཁྱབ་ཁོངས་དང་གཙོ་གནད་ས་ཁོངས་ཀྱི་གནམ་གཤིས་འགྱུར་ཚུལ་ལ་སྐབས་བསྟུན་ལྟ་ཞིབ་ཚད་ལེན་དང་ཤུགས་རྐྱེན་ལ་དཔྱད་དཔོག་བྱེད་དགོས་པ་མ་ཟད། ཁ་གཏད་གཅོག་པའི་གྲོས་འགོ་བཏོན་ནས་གནོད་འཚེ་ཕྱོགས་བསྡུས་འགོག་ཟོན་དང་གནམ་གཤིས་འགྱུར་ལྡོག་ལ་འཕྲོད་པའི་ནུས་པ་ཆེ་རུ་གཏོང་དགོས།

ལེའུ་ལྔ་པ། འགན་སྲུང་དང་ལྟ་སྐུལ་བྱེད་ཕྱོགས།

དོན་ཚན་སོ་དགུ་པ། རྫོང་རིམ་པ་ཡན་གྱི་མི་དམངས་སྲིད་གཞུང་གིས་ནོར་སྲིད་ཀྱི་དོན་གཅོད་དབང་ཆ་དང་གཏོང་སྒོའི་འགན་འཁྲིའི་དབྱེ་བར་གཞིགས་ནས། མ་དངུལ་གཏོང་ཤུགས་ཆེ་རུ་གཏོང་བ་དང་། མ་དངུལ་རིགས་ཁག་གཅིག་གྱུར་འཆར་འགོད་ཀྱིས་བེད་སྤྱོད་ཡག་པོ་བཏང་སྟེ། གཙོ་གནད་དུ་སྐྱེ་ཁམས་སྲུང་སྐྱོབ་དང་ཉམས་གསོའི་ལས་གྲྭ་སྤེལ་རྒྱུར་རྒྱབ་སྐྱོར་བྱེད་དགོས།

དོན་ཚན་བཞི་བཅུ་པ། རང་སྐྱོང་ལྗོངས་མི་དམངས་སྲིད་གཞུང་གིས་ནོར་སྲིད་སོགས་འབྲེལ་ཡོད་སྡེ་ཚན་སྒྲིག་འཛུགས་བྱས་ནས་རྒྱལ་ཁབ་དང་རང་སྐྱོང་ལྗོངས་ཀྱི་འབྲེལ་ཡོད་གཏན་འབེབས་བཞིན་མ་དངུལ་སྒྱུར་སྤྲོད་ལམ་ལུགས་འཐུས་སྒོ་ཚང་དུ་བཏང་ནས་སྐྱེ་ཁམས་ནུས་པ་ཐོན་ཁོངས་གལ་ཆེན་རྣམས་རང་སྐྱོང་ལྗོངས་ཀྱིས་གཤམ་ལ་སྐྱེ་ཁམས་སྐྱོང་གསབ་མ་དངུལ་སྒྱུར་སྤྲོད་བྱེད་ཁོངས་སུ་ཕྱོགས་ཡོངས་ནས་འཇུག་དགོས་པ་དང་། ནོར་སྲིད་ཀྱི་སྒྱུར་སྤྲོད་བྱེད་ཐབས་སོགས་ལ་བརྟེན་ནས་གཙོ་གནད་སྐྱེ་ཁམས་ས་ཁུལ་གྱི་གཞི་རྩའི་སྤྱི་པའི་ཞབས་ཞུ་འགན་སྲུང་བྱེད་ནུས་ཆེ་རུ་བཏང་སྟེ། སྐྱེ་ཁམས་ཁོར་ཡུག་གི་གཙོ་རྒྱུ་གལ་ཆེན་སྲུང་སྐྱོབ་བྱེད་མཁན་ཚན་པ་དང་མི་སྒེར་ལ་ཁ་གསབ་སྤྲོད་པ་དང་། སྐྱེ་ཁམས་སྲུང་སྐྱོབ་དང་དམངས་འཚོ་ལེགས་བཅོས་ཟུང་འབྲེལ་བྱེད་པར་སྐུལ་འདེད་གཏོང་དགོས།

རང་སྐྱོང་ལྗོངས་ཀྱིས་སྐྱེ་ཁམས་ཕན་པ་ཐོབ་ཁུལ་དང་སྐྱེ་ཁམས་སྲུང་སྐྱོབ་ཁུལ་དུ་སྐྱེ་ཁམས་སྐྱོང་གསབ་ལམ་སྲོལ་བཟོ་རྒྱུར་སྐུལ་ལྕག་བཏང་ནས་ས་ཁུལ་དབར་འཕྲེད་ཕྱོགས་ཀྱི་སྐྱེ་ཁམས་སྐྱོང་གསབ་བྱེད་དགོས།

རང་སྐྱོང་ལྗོངས་ཀྱིས་སྐྱེ་ཁམས་སྐྱོང་གསབ་ཁྲོམ་ར་ཅན་དུ་གོང་འཕེལ་གཏོང་རྒྱུར་སྐུལ་འདེད་བཏང་ནས་སྐྱེ་ཁམས་ཐོན་རྫས་གཉེར་སྐྱོང་གསར་སྤེལ་ལམ་སྲོལ་འཐུས་སྒོ་ཚང་དུ་གཏོང་བ་དང་། ཁྱད་ལྡན་སྐྱེ་ཁམས་ཐོན་རྫས་ས་ཁོངས་ཀྱི་སྤྱི་སྤྱོད་སྤུས་རྟགས་གཏོད་རྒྱུར་སྐུལ་མ་བཏང་ནས་སྣ་མང་ཅན་གྱི་སྐྱེ་ཁམས་ཐོན་རྫས་ཀྱི་རིན་ཐང་མངོན་གྱུར་ཡོང་བའི་ཐབས་ལམ་ཞིག་ཆགས་པ་བྱེད་དགོས།

དོན་ཚན་ཞེ་གཅིག་པ། རང་སྐྱོང་ལྗོངས་ཀྱིས་སྐྱེ་ཁམས་སྲུང་སྐྱོབ་དང་སླར་གསོའི་ཐད་སྤྱི་ཚོགས་ཀྱི་མ་རྩ་གཏོང་རྒྱུའི་སྣ་མང་ཅན་གྱི་མ་དངུལ་འདུ་གཏོང་ལམ་སྲོལ་འཛུགས་པ་དང་འཐུས་སྒོ་ཚང་དུ་བཏང་ནས་སྐྱེ་ཁམས་སྲུང་སྐྱོབ་དང་སླར་གསོ་བྱེད་པའི་ཁྲོད་སྤྱི་ཕན་རྩ་འཛུགས་ཐེ་ཞུགས་དང་སྤྱི་ཚོགས་ཀྱི་མ་རྩ་འཇོག་རྒྱུར་སྐུལ་ལྕག་དང་རྒྱབ་སྐྱོར་བྱས་ཏེ། སྐྱེ་ཁམས་ཐོན་རྫས་གསར་སྤེལ་དང་། ཐོན་ལས་གོང་འཕེལ། ཚན་རྩལ་གསར་གཏོད། ལག་རྩལ་ཞབས་ཞུ། གེགས་འགོག་གེགས་སེལ། འཕྲལ་སྡོམ་རོགས་སྐྱོབ་སོགས་ཀྱི་བྱེད་སྒོ་སྤེལ་དགོས།

རང་སྐྱོང་ལྗོངས་ཀྱིས་དངུལ་རྩའི་ལས་ཚན་ལ་སྐུལ་ལྕག་བཏང་ནས་དངུལ་རྩའི་ཐོན་རྫས་དང་ཞབས་ཞུ་གསར་གཏོད་བྱེད་ཤུགས་ཆེ་རུ་བཏང་སྟེ་སྐྱེ་ཁམས་སྲུང་སྐྱོབ་དང་སླར་གསོ་སོགས་རྣམ་གྲངས་ཀྱི་མ་དངུལ་བསྡུ་རྒྱུག་གི་སྣ་མང་དགོས་མཁོ་སྐོང་ཐུབ་པ་བྱེད་དགོས།

དོན་ཚན་ཞེ་གཉིས་པ། རྫོང་རིམ་པ་ཡན་གྱི་མི་དམངས་སྲིད་གཞུང་གིས་འབྱུང་འཕྲོད་ཐཱན་ཉུང་དང་། ཁོར་ཡུག་མཛེས་པ། སྐྱེ་ཁམས་འཚོ་སྡོད་རུང་བ་བཅས་ཀྱི་མཛེས་སྡུག་ལྡན་པའི་གྲོང་ཁྱེར་འཛུགས་སྐྲུན་བྱ་རྒྱུར་སྐུལ་འདེད་གཏོང་དགོས་པ་དང་། འབྱུང་འཕྲོད་ཨར་སྐྲུན་གྱི་འདུ་ཤེས་ཁྱབ་སྤེལ་བཏང་ནས་འབྱུང་འཕྲོད་ཨར་སྐྲུན་གྱི་ལག་རྩལ་སྤྱད་དེ་འབྱུང་འཕྲོད་སྐྱེ་ཁམས་གྲོང་ཁུལ་འཛུགས་སྐྲུན་ལ་སྐུལ་འདེད་གཏོང་དགོས་པ། འཚོ་བའི་གད་སྙིགས་རིགས་དབྱེ་བྱ་ཐབས་ཁྱབ་སྤེལ་གཏོང་བ་དང་། འཚོ་བའི་བཙོག་ཆུ་དང་གད་སྙིགས་བསྡུ་རུབ་གཙང་སེལ་བྱེད་ནུས་ཆེ་རུ་བཏང་ནས་ཆུ་བོ་དྭངས་ཤིང་མཚོ་ངོགས་སྔོ་བ་དང་ཡུལ་ལྗོངས་མཛེས་པའི་སྐྱེ་ཁམས་གྲོང་ཁྱེར་འཛུགས་སྐྲུན་བྱེད་དགོས།

རིམ་ཁག་མི་དམངས་སྲིད་གཞུང་གིས་ཞིང་ལས་ཀྱི་སྙིགས་རོ་ཐོན་ཁུངས་ཅན་བེད་སྤྱོད་དང་ཞིང་འབྲོག་ཁུལ་གྱི་འཚོ་བའི་བཙོག་ཆུ་དང་གད་སྙིགས་གཙང་སེལ་བྱེད་ཤུགས་ཆེ་རུ་གཏོང་བ་དང་། ཞིང་འབྲོག་ཁུལ་གྱི་འཕྲོད་བསྟེན་གསང་སྤྱོད་སྒྱུར་བཀོད་དང་གྲོང་གསེབ་སྔོ་སྒྱུར་ལ་སྐུལ་འདེད་གཏོང་བ། ཞིང་འབྲོག་མང་ཚོགས་ཀྱིས་འགྲོ་ལམ་གཡས་གཡོན་དང་ཁང་པའི་རྒྱབ་མདུན་དུ་ཤིང་འཛུགས་སྔོ་སྲུང་དང་གྲོང་ཚོའི་གཙང་སྦྲ་བྱ་སྤྱོད་སྤེལ་རྒྱུར་ཁྲིད་སྟོན་བཅས་བྱས་ཏེ། ཞིང་འབྲོག་ཁུལ་གྱི་མིའི་འཚོ་སྡོད་ཁོར་ཡུག་མུ་མཐུད་ལེགས་སུ་གཏོང་བ་དང་སྐྱེ་ཁམས་འཚོ་སྡོད་རུང་བའི་མཛེས་སྡུག་ལྡན་པའི་གྲོང་གསེབ་འཛུགས་སྐྲུན་བྱེད་དགོས།

དོན་ཚན་ཞེ་གསུམ་པ། རྫོང་རིམ་པ་ཡན་གྱི་མི་དམངས་སྲིད་གཞུང་གིས་རང་བྱུང་ཐོན་ཁུངས་དང་། སྐྱེ་ཁམས་ཁོར་ཡུག ནགས་ལས་རྩྭ་ཐང་། ཆུའི་སྲིད་འཛིན། ཞིང་ལས་གྲོང་གསེབ་སོགས་འབྲེལ་ཡོད་སྡེ་ཚན་སྒྲིག་འཛུགས་བྱས་ཏེ་སྐྱེ་ཁམས་སྲུང་སྐྱོབ་ཐད་ཀྱི་ཁྲིམས་འགལ་བྱེད་སྤྱོད་ཞུ་གཏུག་ཐེར་འདོན་བྱེད་པའི་ལམ་ལུགས་བཟོས་ནས། ཐད་ཀར་ཞིབ་གཅོད་དང་དུས་བཅད་ཞིབ་གཅོད་དམ་ཡང་ན་འཁྲི་འགན་སྒྲུབ་སྤྲོད། མཇུག་འདེད་སྒྲུབ་སྐུལ་སོགས་ཀྱི་བྱེད་ཐབས་སྤྱད་དེ། སྐྱེ་ཁམས་སྲུང་སྐྱོབ་ཐད་ཀྱི་ཁྲིམས་འགལ་བྱ་སྤྱོད་ལ་ཁྲིམས་ལྟར་ཞིབ་བཤེར་ཐག་གཅོད་བྱེད་དགོས། སྐྱེ་ཁམས་སྲུང་སྐྱོབ་ལས་ཀའི་འབྲེལ་ཡོད་ཆ་འཕྲིན་ཁྲིམས་ལྟར་ཡོངས་བསྒྲགས་བྱེད་དགོས་པ་དང་། སྤྱི་དམངས་ཐེ་ཞུགས་བྱེད་པའི་ལས་རིམ་འཐུས་སྒོ་ཚང་དུ་གཏོང་དགོས།

དོན་ཚན་ཞེ་བཞི་པ། རང་སྐྱོང་ལྗོངས་ཀྱིས་དགོས་མཁོར་གཞིགས་ཏེ། མཚོ་སྔོན་ཞིང་ཆེན་དང་། ཤིན་ཅང་ཡུ་གུར་རང་སྐྱོང་ལྗོངས། སི་ཁྲོན་ཞིང་ཆེན། ཀན་སུའུ་ཞིང་ཆེན། ཡུན་ནན་ཞིང་ཆེན་སོགས་འབྲེལ་ཡོད་ས་གནས་དང་ས་གནས་ཀྱི་ཁྲིམས་འཛུགས་དང་། སྒྲིག་ཁོངས་འཆར་འགོད། ལྟ་སྐུལ་ཁྲིམས་སྒྱུར། གལ་ཆེའི་དངོས་རིགས་གནས་སྤོ། སྐྱེ་ཁམས་བར་ཁྱམས་སྦྲེལ་མཐུད་རྒྱ་ཆེར་གཏོང་བ་སོགས་ཀྱི་ཐད་རོགས་ལས་བྱ་རྒྱུར་ཤུགས་སྣོན་བརྒྱབ་ནས། ཆ་འཕྲིན་ཐོན་ཁུངས་མཉམ་སྤྱོད་ཐུབ་པ་བྱས་ཐོག སྲིད་འཛིན་ས་ཁོངས་ལས་བརྒལ་བའི་སྐྱེ་ཁམས་སྲུང་སྐྱོབ་ཀྱི་ཁྲིམས་སྒྱུར་མཐུན་སྦྱོར་ལམ་སྲོལ་རིམ་བཞིན་བཟོས་ཏེ། ཁྲིམས་འགལ་གྱོད་དོན་ཚབས་ཆེན་དང་། སྲིད་འཛིན་ས་ཁོངས་དང་སྐྱེ་ཁམས་འཁྲུག་སླ་བའི་ས་ཁོངས་ལས་བརྒལ་བའི་ཁྲིམས་འགལ་གྱོད་དོན་ལ་ཁྲིམས་ལྟར་མཉམ་འབྲེལ་ཁྲིམས་སྒྱུར་བྱས་ནས་སྐྱེ་ཁམས་སྲུང་སྐྱོབ་ལས་ཀར་མཉམ་དུ་སྐུལ་སྤེལ་གཏོང་དགོས།

དོན་ཚན་ཞེ་ལྔ་པ། རང་སྐྱོང་ལྗོངས་ཀྱིས་སྐྱེ་ཁམས་སྲུང་སྐྱོབ་ཀྱི་ལས་རྗེས་གདེང་འཇོག་གི་དཔྱད་ཞིབ་ལམ་ལུགས་ལག་བསྟར་བྱས་ཏེ། ཁོར་ཡུག་སྤུས་ཚད་མཐོར་གཏོང་དང་། སྐྱེ་ཁམས་སྲུང་སྐྱོབ་ཀྱི་ཕན་འབྲས། སྐྱེ་ཁམས་ཐོན་རྫས་མཁོ་འདོན་བྱེད་ནུས་སོགས་དམིགས་ཚད་མ་ལག་ནང་འཇུག་དགོས། རྫོང་རིམ་པ་ཡན་གྱི་མི་དམངས་སྲིད་གཞུང་གིས་བྱ་དགའ་ཆད་གཅོད་ལམ་སྲོལ་བཟོ་བ་དང་ཚགས་ཚུད་དུ་བཏང་ནས་སྐྱེ་ཁམས་སྲུང་སྐྱོབ་ལས་དོན་དེ་ལོ་འཁོར་གྱི་ཕྱོགས་བསྡུས་དཔྱད་ཞིབ་དམིགས་ཚད་མ་ལག་ནང་འཇུག་དགོས།

རྫོང་རིམ་པ་ཡན་གྱི་མི་དམངས་སྲིད་གཞུང་གིས་དུས་བཀག་ལྟར་རིམ་པ་དེ་གའི་མི་དམངས་འཐུས་མི་ཚོགས་ཆེན་ནམ་ཡང་ན་དེའི་རྒྱུན་ལས་ཨུ་ཡོན་ལྷན་ཁང་ལ་སྐྱེ་ཁམས་སྲུང་སྐྱོབ་བྱས་ཚུལ་སྙན་སེང་ཞུ་དགོས།

དོན་ཚན་ཞེ་དྲུག་པ། རང་སྐྱོང་ལྗོངས་ཀྱིས་སྐྱེ་ཁམས་སྲུང་སྐྱོབ་ཀྱི་ཁྲིམས་འཛིན་འགན་སྲུང་ལས་དོན་ལ་ཤུགས་སྣོན་བརྒྱབ་སྟེ། འབྲེལ་ཡོད་ཚན་པས་སྐྱེ་ཁམས་སྲུང་སྐྱོབ་བྱ་རྒྱུའི་ཐད་ཁྲིམས་ལུགས་ཀྱི་ཞབས་ཞུ་མཁོ་འདོན་བྱ་རྒྱུར་སྐུལ་ལྕག་གཏོང་དགོས།

རིམ་ཁག་སྲིད་འཛིན་ལས་ཁུངས་དང་། མི་དམངས་ཁྲིམས་ཁང་། མི་དམངས་ཞིབ་དཔྱོད་ཁང་བཅས་ཀྱིས་སྐྱེ་ཁམས་སྲུང་སྐྱོབ་ཐད་ཀྱི་ཁྲིམས་འགལ་བྱ་སྤྱོད་ཁྲིམས་ལྟར་རྩད་ཞིབ་ཐག་གཅོད་བྱེད་པའམ་ཡང་ན་རང་བྱུང་ཐོན་ཁུངས་དང་སྐྱེ་ཁམས་ཁོར་ཡུག་གཏོར་སྐྱོན་གྱི་གུན་གསབ་གཏུག་བཤེར་དང་སྤྱི་ཕན་གཏུག་བཤེར་སོགས་ཀྱི་གྱོད་དོན་ཐག་གཅོད་བྱེད་རིང་། ཉེས་གསོག་གི་དོགས་གཞི་ཡོད་པ་ཤེས་རྟོགས་བྱུང་ཚེ། ཉེས་གསོག་གི་ཁུངས་སྣེ་དེ་མྱུལ་ཞིབ་དང་བརྟག་དཔྱད་བྱ་རྒྱུའི་འགན་དབང་ཡོད་པའི་ལས་ཁུངས་ལ་སྐྱེལ་སྤྲོད་བྱེད་དགོས་པ་དང་། ཁྲིམས་བཞིན་ཉེས་དོན་འགན་འཁྲི་བདའ་འདེད་གཏོང་མི་དགོས་པའམ་ཉེས་དོན་གྱི་ཆད་པ་གཅོད་མི་དགོས་ཀྱང་སྲིད་འཛིན་གྱི་འགན་འཁྲི་བདའ་འདེད་གཏོང་དགོས་པའམ་ཡང་ན་སྐྱེ་ཁམས་ཁོར་ཡུག་གཏོར་སྐྱོན་བཏང་བར་གུན་གསབ་འཇལ་འགན་འཁུར་དགོས་ཕྱིན། མྱུལ་ཞིབ་དང་བརྟག་དཔྱད་བྱ་རྒྱུའི་འགན་དབང་ཡོད་པའི་ལས་ཁུངས་དང་དེ་བཞིན་མི་དམངས་ཁྲིམས་ཁང་དང་མི་དམངས་ཞིབ་དཔྱོད་ཁང་གིས་འབྲེལ་ཡོད་སྲིད་འཛིན་ལས་ཁུངས་ལ་དུས་ཐོག་ཏུ་གྱོད་གཞི་སྐྱེལ་སྤྲོད་བྱེད་དགོས།

སྐྱེ་ཁམས་ཁོར་ཡུག་དང་ཐོན་ཁུངས་སྲུང་སྐྱོབ་ལ་གཏོར་བཤིག་བཏང་བ་དང་སྤྱི་ཚོགས་ཀྱི་སྤྱི་པའི་ཁེ་ཕན་ལ་གནོད་འཚེ་བཏང་བའི་ཁུངས་སྣེ་དེ་སྲིད་འཛིན་ལས་ཁུངས་ཀྱིས་མི་དམངས་ཞིབ་དཔྱོད་ཁང་ལ་དུས་ཐོག་ཏུ་ཤོད་དགོས་པ་དང་། སྲིད་འཛིན་ལས་ཁུངས་ཀྱིས་སྐྱེ་ཁམས་ཁོར་ཡུག་དང་ཐོན་ཁུངས་སྲུང་སྐྱོབ་ལ་ལྟ་སྐུལ་དོ་དམ་བྱེད་འགན་འཁུར་བའི་ཁྲོད་ཁྲིམས་འགལ་བྱ་སྤྱོད་སྤེལ་བའམ་ཡང་ན་ལས་་ཀ་མི་བྱེད་པའི་རིགས་ཡོད་ཚེ། མི་དམངས་ཞིབ་དཔྱོད་ཁང་གིས་དེར་ཁྲིམས་བཞིན་འགན་འཁྲི་བསྒྲུབ་རྒྱུའི་སྐུལ་འདེད་གཏོང་དགོས།

ལེའུ་དྲུག་པ། བཅའ་ཁྲིམས་ཀྱི་འགན་འཁྲི།

དོན་ཚན་ཞེ་བདུན་པ། རིམ་ཁག་མི་དམངས་སྲིད་གཞུང་དང་། སྐྱེ་ཁམས་སྲུང་སྐྱོབ་ལ་ལྟ་འདོམས་བྱེད་འགན་ཡོད་པའི་སྡེ་ཚན་གྱིས་སྐྱེ་ཁམས་སྲུང་སྐྱོབ་བྱེད་པའི་ཁྲོད་རང་འགན་སྣང་མེད་དུ་འཇོག་པ་དང་། འགན་དབང་གང་བྱུང་དུ་སྤྱོད་པ། ཉེར་ཕྱོགས་གཡོ་ཟོལ་བྱེད་པ་བཅས་ཀྱི་རིགས་ཐོན་ཚེ། འགན་འཁྲི་ཡོད་པའི་འགོ་ཁྲིད་མི་སྣ་དང་ཐད་ཀའི་འགན་འཁུར་བར་ཁྲིམས་བཞིན་ཆད་པ་གཅོད་དགོས་པ་དང་། ཉེས་གསོག་གི་ཚད་ལ་སླེབས་ཚེ་ཁྲིམས་བཞིན་ཉེས་དོན་གྱི་འགན་འཁྲི་བདའ་འདེད་གཏོང་དགོས།

དོན་ཚན་ཞེ་བརྒྱད་པ། ཁོར་ཡུག་ལ་བཙོག་སྐྱོན་དང་སྐྱེ་ཁམས་ལ་གཏོར་སྐྱོན་བཏང་ནས་མི་གཞན་ལ་གནོད་སྐྱོན་བཟོས་ཚེ། དབང་གནོད་གཏོང་མཁན་གྱིས་དབང་གནོད་བཏང་བའི་འགན་འཁྲི་འཁུར་དགོས།

གཏན་འབེབས་དང་འགལ་ནས་སྐྱེ་ཁམས་ཁོར་ཡུག་ལ་གནོད་སྐྱོན་བཟོས་ཚེ། རྒྱལ་ཁབ་ཀྱིས་གཏན་ལ་ཕབ་པའི་ལས་ཁུངས་སམ་ཡང་ན་བཅའ་ཁྲིམས་ནང་གཏན་ལ་ཕབ་པའི་རྩ་འཛུགས་ཀྱིས་དབང་གནོད་གཏོང་མཁན་ལ་སླར་གསོ་བྱེད་འགན་འཁུར་བ་དང་། སྐྱིན་གསབ་འཇལ་བ། འབྲེལ་ཡོད་གྲོན་དངུལ་འཇལ་བ་བཅས་ཀྱི་རེ་འདུན་ཞུ་དབང་ཡོད། གུན་གསབ་འཇལ་འགན་འཁུར་མཁན་གྱིས་ངེས་པར་དུ་སྐྱེ་ཁམས་ཁོར་ཡུག་གི་གནོད་འཚེ་བརྟག་དཔྱད་དང་ཆོད་སྡོམ་དཔྱད་དཔོག་སོགས་བྱེད་པའི་ལས་ཀར་ཁྲིམས་བཞིན་གཞོགས་འདེགས་བྱེད་དགོས་པ་དང་། སྐྱེ་ཁམས་ཁོར་ཡུག་ལ་གནོད་སྐྱོན་ཕོག་རིགས་སླར་གསོ་དང་། དེ་བཞིན་སྐྱིན་གསབ་དང་འབྲེལ་ཡོད་གྲོན་དངུལ་འཇལ་བ་སོགས་ཀྱི་འགན་འཁྲི་འཁུར་དགོས།

དོན་ཚན་ཞེ་དགུ་པ། བྱ་ཐབས་འདིའི་གཏན་འབེབས་ལས་འགལ་ཡང་། བྱ་ཐབས་འདིའི་ནང་ཆད་གཅོད་གཏན་འབེབས་བྱས་མེད་རིགས་ལ། བཅའ་ཁྲིམས་དང་ཁྲིམས་སྲོལ་གཞན་དག་ནང་ཆད་གཅོད་གཏན་འབེབས་ཡོད་ཚེ། གཏན་འབེབས་དེ་བཞིན་ཆད་པ་གཅོད་དགོས།

ལེའུ་བདུན་པ། ཞར་བྱུང་།

དོན་ཚན་ལྔ་བཅུ་པ། བྱ་ཐབས་འདི་2025ལོའི་ཟླ་8ཚེས་1ཉིན་ནས་བཟུང་ལག་བསྟར་བྱ་རྒྱུ།

(བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་དྲུང་ཡིག་ཁྲུའུ་ནས་མཁོ་འདོན་བྱས)