ཟླ་9ཚེས་3ཉིན་གྱི་སྔ་དྲོར། ཀྲུང་གོ་མི་དམངས་ཀྱི་རི་འགོག་དམག་འཁྲུག་དང་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ་80འཁོར་བར་དྲན་གསོ་ཞུ་བའི་ཚོགས་ཆེན་པེ་ཅིང་དུ་གཟབ་རྒྱས་ངང་འཚོགས་ཤིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གསུང་བཤད་གལ་ཆེན་གནང་བ་དང་གཟིགས་སྦྲེང་དཔུང་སྡེར་གཟིགས་ཞིབ་གནང་བ་རེད། རང་སྐྱོང་ལྗོངས་ཏང་ཨུད་ཀྱི་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གིས་ལྷ་སར་ཚོགས་ཆེན་མཉམ་དུ་བལྟས་པ་དང་སློབ་སྦྱོང་བྱས་ཤིང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་གཙོ་སྐྱོང་དང་གསུང་བཤད་གནང་བ་རེད།

ཝང་ཅུན་ཀྲེང་གིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་ནི་དུས་བབ་ཕྱག་གཟིགས་དང་། དགོངས་པ་གཏིང་ཟབ་པ། ནང་དོན་ཕུན་སུམ་ཚོགས་པ། འབད་བརྩོན་བྱེད་པར་ལྕག་སྐུལ་གནང་བ་བཅས་ཡིན་ལ། ལོ་རྒྱུས་དང་འབྱུང་འགྱུར་གྱི་མཐོ་ཚད་ནས་རྒྱལ་ནང་དང་རྒྱལ་སྤྱིའི་ཁྱོན་ཡོངས་གཉིས་ལ་གཅིག་འདོམས་གནང་སྟེ། ཀྲུང་གོ་མི་དམངས་ཀྱིས་དཀའ་སྤྱད་ཚད་མེད་ངང་རི་འགོག་དམག་འཁྲུག་བྱས་པའི་ལོ་རྒྱུས་ལ་བརྩེ་དུང་ཟབ་མོའི་ངང་ཕྱིར་དྲན་དང་། ཀྲུང་གོ་མི་དམངས་ཀྱི་རི་འགོག་དམག་འཁྲུག་གི་དོན་སྙིང་གལ་ཆེན་ལ་གསལ་འགྲེལ་གཏིང་ཟབ། དྲང་བདེན་ལ་རྒྱལ་ཁ་ཐོབ་ངེས་དང་། ཞི་བདེར་རྒྱལ་ཁ་ཐོབ་ངེས། མི་དམངས་ལ་རྒྱལ་ཁ་ཐོབ་ངེས་བཅས་ཀྱི་བདེན་དོན་རླབས་པོ་ཆེ་གསལ་སྟོན་ནུས་ལྡན། རྒྱང་ལམ་གསར་པར་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་སྐུལ་འདེད་གཏོང་བའི་མདུན་སྐྱོད་ཁ་ཕྱོགས་གསལ་སྟོན་བཅས་གནང་བས། ཏང་ཡོངས་དང་། དམག་ཡོངས། རྒྱལ་ཡོངས་མི་རིགས་ཁག་གི་མི་དམངས་བཅས་ཀྱིས་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་ཞུམ་མེད་བློ་སྟོབས་སྔར་བས་འཕེལ་བ་དང་། ཀྲུང་གོའི་ཕུགས་འདུན་བློ་སེམས་གཅིག་མཐུན་ངང་མཉམ་དུ་གཏོད་པའི་སྟོབས་ཤུགས་རླབས་པོ་ཆེ་གཅིག་སྒྲིལ་ཐུབ་ངེས་རེད། དམག་གཟིགས་མཛད་སྒོ་ལས་ཀྲུང་གོ་གུང་ཁྲན་ཏང་གི་འགོ་ཁྲིད་འོག་རྒྱལ་ཁབ་ཉིན་རེ་ལས་མ་འདས་པར་དར་རྒྱས་གོང་འཕེལ་དང་དམག་དཔུང་འཕེལ་རྒྱས་དང་སྟོབས་ཆེར་རྒྱུན་ཆད་མེད་པར་འགྲོ་བའི་རྒྱལ་ཁབ་དང་དམག་དཔུང་གི་གཟི་དཔལ་གང་ལེགས་མཚོན་པ་དང་། ཞི་ཅིན་ཕིང་གི་དམག་དཔུང་སྟོབས་ཆེའི་དགོངས་པའི་བདེན་དོན་གྱི་སྟོབས་ཤུགས་དང་ལག་ལེན་གྱི་སྟོབས་ཤུགས་གང་ལེགས་མངོན་པ་མ་ཟད། དུས་རབས་གསར་པའི་མི་དམངས་དམག་དཔུང་གི་ཆབ་སྲིད་ལ་བརྟེན་ནས་དམག་དཔུང་འཛུགས་སྐྱོང་གི་རྣམ་པ་གསར་པ་དང་། སྟོབས་ཤུགས་གྲུབ་ཚུལ་གྱི་བཀོད་པ་གསར་པ། དེང་རབས་ཅན་འཛུགས་སྐྲུན་གྱི་འཕེལ་རིམ་གསར་པ། དམག་འཐབ་གྲ་སྒྲིག་གི་ཕན་འབྲས་གསར་པ་བཅས་ཀྱང་གཅིག་སྡུད་ཐོག་མཚོན་ཡོད། དེ་ནི་དུས་རབས་གསར་པར་རི་འགོག་དམག་འཁྲུག་གི་སྙིང་སྟོབས་རླབས་པོ་ཆེ་མུ་མཐུད་རྒྱུན་འཛིན་བྱེད་པའི་མཚོན་ཚུལ་གལ་ཆེན་ཞིག་རེད། ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་དམག་གཟིགས་གཟབ་རྒྱས་ཀྱི་ཁྲོད་ནས་ཀྲུང་གོ་མི་དམངས་ཀྱིས་མཛད་རྗེས་བསྐལ་བརྒྱར་བརྟན་པའི་རི་འགོག་དམག་འཁྲུག་གི་ལོ་རྒྱུས་སྙན་ངག་བརྩམས་ནས་རི་འགོག་དམག་འཁྲུག་གི་སྙིང་སྟོབས་རླབས་པོ་ཆེ་ཆགས་ཚུལ་གསལ་པོར་རྟོགས་དགོས། རི་འགོག་དམག་འཁྲུག་གི་སྙིང་སྟོབས་རླབས་པོ་ཆེ་ནི་ཀྲུང་གོ་མི་དམངས་ཀྱི་བསམ་པའི་རྒྱུ་ནོར་ཧ་ཅང་རྩ་ཆེན་ཞིག་ཡིན་པ་དང་། དེའི་ནང་རྒྱལ་ཁབ་ཀྱི་ཁེ་ཕན་དང་མི་རིགས་ཀྱི་ལ་རྒྱ་སྲུང་སྐྱོང་བྱེད་པའི་བསམ་པའི་རྒྱབ་རྟེན་དང་། རྒྱལ་ཁབ་ཀྱི་རང་ཚུགས་རང་དར་བརྩོན་ལེན་བྱ་ཆེད་བློ་བརྟན་ཞུམ་མེད་ཀྱིས་འཐབ་རྩོད་བྱེད་པའི་བསམ་པའི་ཀ་རྟེན། རྒྱལ་ཁབ་སྟོབས་འབྱོར་མངའ་ཐང་རྒྱས་ཆེད་འབད་འཐབ་ལྷོད་མེད་བྱེད་པའི་ཡུན་རིང་གི་སྒུལ་ཤུགས་བཅས་འདུས་ཡོད་པ་གསལ་པོར་རྟོགས་དགོས། ཀྲུང་གོ་མི་དམངས་བཅིངས་འགྲོལ་དམག་ནི་ཐོག་མཐའ་བར་གསུམ་དུ་ཏང་དང་མི་དམངས་ཀྱིས་རྦད་དེ་བློས་འགེལ་ཆོག་པའི་དཔའ་བོའི་དཔུང་སྡེ་ཞིག་ཡིན་པ་དང་། ནམ་ཡང་རྒྱལ་ཁབ་སྲུང་སྐྱོབ་བྱེད་མཁན་དང་། སྤྱི་ཚོགས་རིང་ལུགས་སྲུང་སྐྱོབ་བྱེད་མཁན། མི་དམངས་ཀྱི་ཁེ་ཕན་སྲུང་སྐྱོབ་བྱེད་མཁན་བཅས་ཡིན་པ་གསལ་པོར་རྟོགས་དགོས།

ཝང་ཅུན་ཀྲེང་གིས་ནན་བཤད་གནང་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཚོགས་ཆེན་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་བྱ་རྒྱུ་དེ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་དུ་གཟིགས་ཞིབ་གནང་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་བྱེད་པ་དང་ཟུང་འབྲེལ་བྱས་ཏེ། “གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པ་དང་། “འདུ་ཤེས་བཞི”ཟབ་ཏུ་གཏོང་བ་དང་། “གདེང་ཚོད་བཞི”བརྟན་དུ་གཏོང་བ། “སྲུང་སྐྱོང་གཉིས”ཐུབ་པ་བཅས་བྱེད་དགོས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ཀྱི་ལས་དོན་ལ་ཚད་མཐོའི་མཐོང་ཆེན་གནང་ལུགས་དང་བོད་ཀྱི་མི་དམངས་ལ་ཐུགས་ཁུར་ཟབ་མོ་གནང་ལུགས་གང་ལེགས་ཚོར་བར་བྱས་ནས་འབད་འབུངས་མདུན་སྐྱོད་ཀྱི་སྟོབས་ཤུགས་བསྡུ་ལེན་བྱེད་པ་དང་། ཕུལ་བྱུང་སྲོལ་རྒྱུན་དར་སྤེལ་གཏོང་བ། བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་བློ་བརྟན་འགྱུར་མེད་ངང་ལག་བསྟར་དོན་འཁྱོལ་བྱེད་པ། རྒྱུན་སྲིང་ལྷོད་མེད་ངང“དོན་ཆེན་བཞི”དོན་འཁྱོལ་ལ་སྐུལ་འདེད་གཏོང་བ། ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་མགྱོགས་པོ་གཏོང་བ། སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་ཧུར་ཐག་བཅས་བྱས་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་གངས་ལྗོངས་ས་མཐོར་རྩ་བ་ཚུགས་ནས་འབྲས་བུ་སྨིན་པའི་འགན་ལེན་བྱེད་དགོས།