ཟླ་8ཚེས་20ཉིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་དོན་སྙན་སེང་གསན་སྐབས་ནན་བཤད་གནང་དོན། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོའི་གྲུབ་འབྲས་དང་ཉམས་མྱོང་ཡག་པོ་སྤྱད་དེ། སྤྱོད་ཚུལ་འཛུགས་སྐྱོང་རྒྱུན་རྣམ་ཅན་དང་ཕུགས་ཕན་ཅན་གྱི་ལམ་སྲོལ་འཐུས་སྒོ་ཚང་དུ་གཏོང་དགོས། སྤྱི་ཁྱབ་ཧྲུའུ་ཅིའི་གསུང་བཤད་གལ་ཆེན་གྱི་དགོངས་དོན་ལ་རང་ལྗོངས་ཀྱི་རྒྱ་ཆེའི་ཏང་ཡོན་ལས་བྱེད་པའི་ཁྲོད་ཚུར་སྣང་ལན་ཆ་ཆེན་པོ་བྱུང་ཞིང་། ཚང་མས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་རྩ་བའི་གཞི་འཛིན་སར་བྱས་ཏེ། སློབ་སྦྱོང་སློབ་གསོའི་གྲུབ་འབྲས་རྒྱུན་མཐུད་སྲ་བརྟན་དང་རྒྱ་སྐྱེད་གཏོང་བ་དང་། རྒྱུན་རྣམ་ཅན་དང་ཕུགས་ཕན་ཅན་གྱི་ལམ་སྲོལ་དོན་འཁྱོལ་གྱིས་སྤྱོད་ཚུལ་དེ་བས་ཡག་པ་དང་བྱེད་ཐབས་དེ་བས་ཏན་ཏིག་ལ་བརྟེན་ནས། མཐུན་སྒྲིལ་དང་། འབྱོར་ཕྱུག ཤེས་དཔལ། ཞི་མཐུན། མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་པར་འཛད་མེད་སྒུལ་ཤུགས་སྣོན་གྱི་ཡིན་ཞེས་གཅིག་རྗེས་གཉིས་མཐུད་ངང་བཤད།

ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོ་སྤེལ་ཚུན། རང་སྐྱོང་ལྗོངས་སྨན་རྫས་ལྟ་འདོམས་ཅུས་ཀྱིས་སློབ་སྦྱོང་སློབ་གསོ་དང་སྨན་རྫས་བདེ་འཇགས་སྲ་བརྟན་དང་མཐོར་འདེགས་སོགས་ཀྱི་ལས་དོན་མཉམ་འདྲེས་གཏིང་ཟབ་བྱས་ཏེ། ཆེད་དོན་ཏང་གི་སློབ་ཚན་འཚོགས་པ་དང་སྲིད་གཙང་ཉེན་བརྡའི་སློབ་གསོའི་རྟེན་གཞིར་ལྟ་སྐོར་ལ་སྐྱོད་པ་སོགས་སྣ་མང་ཕུན་སུམ་ཚོགས་པའི་རྣམ་པ་བརྒྱུད་སློབ་སྦྱོང་སློབ་གསོ་མི་སེམས་སུ་ཟུག་པ་དང་དོན་འཁྱོལ་ཐུབ་ནས་ཕན་འབྲས་ཐོན་པར་སྐུལ་འདེད་བཏང་ཡོད། དེ་དང་ཆབས་ཅིག ལྟ་བསྡུར་ཞིབ་བཤེར་བྱས་ནས་ཤེས་རྟོགས་བྱུང་བའི་གནད་དོན་གྱི་གསལ་ཐོ་བཀོད་ནས་དག་ཐེར་དོན་འཁྱོལ་གྱི་ཞིབ་ཕྲའི་འགན་འཁྲི་མི་སྒེར་ལ་བརྩིས་སྤྲོད་པ་དང་དག་ཐེར་དོན་ཐོག་ཏུ་འཁྱོལ་ཐུབ་པ་བྱས་ཡོད། “ང་ཚོས་སློབ་སྦྱོང་སློབ་གསོའི་གྲུབ་འབྲས་རྒྱུན་མཐུད་སྲ་བརྟན་དུ་བཏང་སྟེ། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་དོན་འཁྱོལ་བྱས་ནས་རྩ་བ་ཚུགས་པར་སྐུལ་འདེད་བཏང་ཐོག སྨན་རྫས་བདེ་འཇགས་ལ་ལྟ་འདོམས་བྱེད་པར་སྒྲིག་ཁྲིམས་དང་སྤྱོད་ཚུལ་གྱི་འགན་ལེན་བརྟན་པོ་བྱེད་ཀྱི་ཡིན”ཞེས་བོད་རང་སྐྱོང་ལྗོངས་སྨན་རྫས་ལྟ་འདོམས་ཅུས་ཕྱོགས་བསྡུས་ཁྲུའུ་ཡི་ཁྲུའུ་ཀྲང་ལི་ཝེ་ཡིས་བཤད།

རྣམ་གླིང་རྫོང་ཨུད་ཀྱིས་སློབ་སྦྱོང་སློབ་གསོའི་ཁྲོད་བརྟག་དཔྱད་ཞིབ་འཇུག་བྱ་རྒྱུར་མཐོང་ཆེན་བྱས་ཏེ། མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཁག་134ཐག་གཅོད་ནུས་ལྡན་བྱས་པ་དེ་མ་དངུལ་སྒོར་ཁྲི་911.27དང་འབྲེལ་བ་ཡོད། “ང་ཚོས་དེ་བས་བློ་བརྟན་འགྱུར་མེད་ཀྱི་དད་སེམས་དང་། དེ་བས་དངོས་སྒྲུབ་ཀྱི་སྤྱོད་ཚུལ། དེ་བས་ནུས་ལྡན་གྱི་བྱ་ཐབས་བཅས་ལ་བརྟེན་ནས་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་མི་སེམས་སུ་གཏིང་ཟབ་ཟུག་ནས་གོམས་སྲོལ་དུ་འགྱུར་བར་སྐུལ་འདེད་གཏོང་གི་ཡིན”ཞེས་རྣམ་གླིང་རྫོང་ཨུད་ཀྱི་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོའི་ལས་དོན་ཆེད་དོན་ཚན་ཁག་གི་འགན་འཁུར་བ་དབྱང་ཏི་ཧྲེང་གིས་བཤད།

ལྷ་ས་གྲོང་ཁྱེར་ཆུ་ཤུར་རྫོང་ཆུ་ཤུར་གྲོང་རྡལ་ཏང་ཨུད་ཀྱི་ཧྲུའུ་ཅི་གཞོན་པ་ཧའོ་དབྱི་ནན་གྱིས“ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་དོན་འཁྱོལ་བྱེད་པའི་འགག་རྩ་ནི་མང་ཚོགས་དང་འབྲེལ་བ་དམ་ཟབ་བྱ་རྒྱུ་དེ་རེད། ང་ཚོས་ཞིང་ཁ་དང་འབྲོག་སར་བསྐྱོད་ནས་མང་ཚོགས་ཀྱི་སྙིང་གཏམ་ཉན་ཏེ། ཞབས་ཞུ་ཏན་ཏིག་དང་བཅོས་སྐྱོང་ཞིབ་ཕྲ་བྱས་ནས་ཕྱི་ཚུལ་རིང་ལུགས་མཐའ་གཅིག་ཏུ་གཏན་འགོག་གིས་དམ་པ་དོན་གཉེར་གྱི་རྣམ་པ་གཏོད་ཀྱི་ཡིན”ཞེས་བཤད།

སྤུ་ཧྲེང་རྫོང་ཨུད་ཀྱི་ཧྲུའུ་ཅི་གཞོན་པ་དང་གྲོང་སྡོད་ལས་དོན་གྱི་སྤྱི་ཁྱབ་སྣེ་ཁྲིད་པ་ཡུས་ཅིན་མིང་གིས“རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བ་འགོ་ཚུགས་ས་གསར་པར་བྱས་ཏེ། སློབ་སྦྱོང་སློབ་གསོ་རྒྱུན་རྣམ་ཅན་དང་། ཕུགས་ཕན་ཅན། ལམ་ལུགས་ཅན་བཅས་ལ་སྐུལ་འདེད་གཏོང་བ་དང་། དམངས་ལ་ཞབས་འདེགས་ཞུ་རྒྱུ་དེ་ཕྱོགས་ཡོངས་ལ་ཁྱབ་པར་བྱས་ནས་དམངས་ཆེད་དང་། དངོས་སྒྲུབ། སྤྱོད་གཙང་བཅས་སྲོལ་བཟང་དུ་འགྱུར་བ་བྱེད་ཀྱི་ཡིན”ཞེས་བཤད།