ཟླ་8ཚེས་20ཉིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་དོན་སྙན་སེང་གསན་སྐབས་ནན་བཤད་གནང་དོན། བོད་ཀྱི་ལས་དོན་ཡག་པོ་སྒྲུབ་པར་ངེས་པར་དུ་ཏང་གི་འགོ་ཁྲིད་མཐའ་འཁྱོངས་དང་ཏང་འཛུགས་སྐྱོང་ལ་ཤུགས་སྣོན་རྒྱག་དགོས། སྤྱི་ཁྱབ་ཧྲུའུ་ཅིའི་གསུང་བཤད་གལ་ཆེན་གྱི་དགོངས་དོན་ལ་རང་ལྗོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཁྲོད་ཚུར་སྣང་ལན་ཆ་ཆེན་པོ་བྱུང་ནས། ཚང་མས། ཀྲུང་གོ་གུང་ཁྲན་ཏང་མེད་ན་སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་མེད་པས། ནམ་ཡང་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་བྱས་ཏེ། དེ་བས་མཛེས་སྡུག་ལྡན་པའི་བདེ་སྐྱིད་འཚོ་བ་གཏོད་ཀྱི་ཡིན་ཞེས་གཅིག་རྗེས་གཉིས་མཐུད་ངང་བརྗོད།

ད་ལོ་ལོ་88ལ་སླེབས་པའི་བོད་རང་སྐྱོང་ལྗོངས་རི་འཛེག་རུ་ཁག་གི་ཏང་ཀྲི་པུའི་དེ་སྔའི་ཧྲུའུ་ཅི་བློ་ཚེས། “ང་རང་ཁྱིམ་ཚང་དབུལ་པོའི་བུ་ཕྲུག་ཅིག་ནས་རི་འཛེག་ལུས་རྩལ་པ་ཞིག་དང་རི་འཛེག་རུ་ཁག་གི་རྩལ་ཁྲིད་པ་ཞིག་ཏུ་གྱུར་པ་ནི་ཀྲུང་གོ་གུང་ཁྲན་ཏང་གིས་འགོ་ཁྲིད་གནང་བའི་བོད་ལྗོངས་གསར་པར་མངོན་འགྱུར་བྱུང་བ་ཞིག་རེད། མ་གཞི་ང་རང་རྒན་ཡོལ་ཞུས་ཟིན་ཡང་། ངས་ད་ལྟའི་དུས་བཟང་འདིར་གཅེས་སྤྲས་ཡག་པོ་བྱས་ཏེ། མུ་མཐུད་ནུས་ཤུགས་ལྷག་མ་བཏོན་ནས་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་བྱས་ཏེ། མཛེས་སྡུག་ལྡན་པའི་བོད་ལྗོངས་འཛུགས་སྐྲུན་ལ་རང་ཉིད་ཀྱི་སྟོབས་ཤུགས་སྐྱེས་སུ་འབུལ་གྱི་ཡིན”ཞེས་སེམས་འགུལ་ཆེན་པོ་ཐེབས་བཞིན་བརྗོད།

གཞིས་རྩེ་གྲོང་ཁྱེར་སྤྱི་བདེ་ཅུས་བསམ་གྲུབ་རྩེ་ཡན་ལག་ཅུས་གྲོང་ནུབ་མངགས་གཏོང་ཁང་གིས་སྤྱི་ལེ་ངོས་གྲུ་15.42ཀྱི་ས་ཆར་སྲུང་སྐྱོང་བྱེད་ཀྱི་ཡོད་ཅིང་། སུའོ་ཀྲང་བསྟན་པ་ཚེ་རིང་གིས“བོད་ཀྱི་འཕེལ་རྒྱས་ནི་ཚང་མས་མིག་མཐོང་ལག་ཟིན་ཐུབ་པ་ཞིག་རེད། ང་ཚོའི་ཁོངས་གཏོགས་ཀྱི་ཁྲོམ་གཞུང་དང་སྲང་ལམ་གྱི་དུས་བདེ་ཞོད་འཇགས་དང་འཆམ་མཐུན་གྱི་རྣམ་པ་ནི་གསོན་ཉམས་ལྡན་པའི་བསྡུས་རིས་ཤིག་རེད། ང་ཚོས་མུ་མཐུད་འགན་འཁྲིའི་ས་ཁོངས་ཚང་མར་བསྐྱོད་དེ་སེམས་རྩ་འཁོལ་བའི་ཞབས་འདེགས་ལ་བརྟེན་ནས་ཏང་ཀྲུང་དབྱང་གི་ཐུགས་ཁུར་དང་དྲོ་སྐྱིད་བརྒྱུད་སྤྲོད་ཀྱིས་མི་སེར་གྱི་བདེ་སྐྱིད་དང་དུས་བདེ་ཞོད་འཇགས་ལ་སྲུང་སྐྱོང་བྱེད་ཀྱི་ཡིན”ཞེས་བཤད།

ཉིང་ཁྲི་གྲོང་ཁྱེར་ཀོང་པོ་རྒྱ་མདའ་རྫོང་ཐའེ་ཀྲའོ་གྲོང་ཚོའི་ཏང་ཀྲི་པུའི་ཧྲུའུ་ཅི་འཇམ་དབྱངས་ཆོས་གྲགས་ཀྱིས“ལྟ་སྐོར་བར་གསལ་འགྲེལ་བྱེད་རིམ་བཞིན་འགྲེམས་ཁང་ནང་གི་ཅ་དངོས་དང་འགྲེལ་ཚིག་ལས་ཏང་ཀྲུང་དབྱང་གི་ཐུགས་ཁུར་ཚོར་གྱི་འདུག ཐའེ་ཀྲའོ་གྲོང་ཚོ་ནི་ཉིང་ཁྲིའི་སྒྱུར་བཅོས་སྒོ་དབྱེའི་སྔོན་སྤེལ་ཁུལ་གྱི་གཙོ་གནད་རྣམ་གྲངས་ལག་ལེན་བསྟར་ཁུལ་ཡིན་པས། ང་ཚོས་ངེས་པར་དུ་གདོང་དམག་ཡག་པོ་བྱས་ཏེ། བློ་རྩ་བརྟན་པོས་ཡར་རྒྱས་བརྩོན་ལེན་དང་བློ་རྩེ་གཅིག་སྒྲིམ་གྱིས་ཐའེ་ཀྲའོ་གྲོང་ཚོ་དེ་བས་མཛེས་སྡུག་དང་དར་རྒྱས་ཡོང་བ་བྱེད་ཀྱི་ཡིན”ཞེས་བཤད།

མངའ་རིས་ས་ཁུལ་སྒར་རྫོང་སེང་གེ་ཁ་འབབ་གྲོང་རྡལ་དར་རྒྱས་སྡེ་ཁུལ་གྱི་ཏང་ཀྲི་པུའི་ཧྲུའུ་ཅི་ཚེ་རིང་རྒྱལ་པོས“‘ཡུལ་མིའི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་བྱེད་པའི’རྒྱུན་གཏན་གྱི་ལས་ཀའི་ཁྲོད་ཏང་གི་གསར་གཏོད་རིགས་པའི་གཞུང་ལུགས་སྡེ་ཁུལ་ལས་དོན་གྱི་ཞིབ་ཕྲའི་ལག་ལེན་དུ་བསྒྱུར་ཚེ། ད་གཟོད་ཡུལ་མི་བློ་ཡིད་ཚིམ་པའི་ལས་ཀ་བྱེད་ཐུབ་པ་ངས་ཚོར་བྱུང་། སླད་ཕྱིན་ངས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་ཟབ་སྦྱོང་མཐིལ་རྟོགས་ལ་ཤུགས་སྣོན་བརྒྱབ་ནས་ཏང་གི་དམངས་ཕན་སྲིད་ཇུས་སྡེ་ཁུལ་གྱི་ཕྱོགས་ཡོངས་དང་ཁྱིམ་ཚང་ཚང་མར་ཁྱབ་ཐུབ་པ་བྱེད་ཀྱི་ཡིན”ཞེས་བཤད།