རང་སྐྱོང་ལྗོངས་ཀྱི་འགོ་ཁྲིད་ཀྱིས་དམངས་གཉེར་ཁེ་ལས་དང་ཚོང（མཐུན）ཚོགས་ལ་བརྟག་ཞིབ་གནང་བ།
ཚེས་6ཉིན། རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་། ལྗོངས་བཟོ་ཚོང་མཉམ་འབྲེལ་ལྷན་ཚོགས་ཀྱི་ཀྲུའུ་ཞི། སྤྱི་ཁྱབ་ཚོང་ཚོགས་ཀྱི་ཚོགས་གཙོ་བཅས་ཡིན་པའི་རྡོ་རྗེ་ཚེ་སྒྲུབ་ཀྱིས་རུ་སྣེ་ཁྲིད་དེ་རང་ལྗོངས་ཀྱི་དམངས་གཉེར་ཁེ་ལས་དང་ཚོང(མཐུན)ཚོགས་ཁག་གཅིག་ལ་ཕེབས་ནས་བརྟག་ཞིབ་གནང་བ་དང་སྦྲགས་དམངས་གཉེར་དཔལ་འབྱོར་ཀྱི་འཁོར་སྐྱོད་གནས་ཚུལ་མཁྱེན་རྟོགས་ཀྱང་གནང་བ་རེད།
བརྟག་ཞིབ་ཚོགས་ཆུང་དང་བཅས་པ་བོད་ལྗོངས་དེང་རབས་སྨན་ཁང་དང་། ཁྲུང་ཆིང་གྲོང་ཁྱེར་བོད་ལྗོངས་ཚོང་ཚོགས་ལྷ་ས་དོན་གཅོད་ཁྲུའུ། ཉིང་ཁྲི་མེ་ཏོག་ཇ་ལས་ཚད་ཡོད་ཀུང་སིའི་ལྷ་སའི་ཆེད་ཚོང་ཁང་། བོད་རང་སྐྱོང་ལྗོངས་སི་ཁྲོན་ཚོང་ཚོགས་བཅས་ལ་སྔ་རྗེས་སུ་ཕེབས་ནས་དེ་དག་གི་འཁོར་སྐྱོད་དང་འཕེལ་རྒྱས་གནས་ཚུལ་ས་གནས་ས་ཐོག་ཏུ་མཁྱེན་རྟོགས་གནང་བ་དང་སྦྲགས། འབྲེལ་ཡོད་འགན་འཁུར་བ་དང་སྤེལ་རེས་གནང་ནས་ཐོན་སྐྱེད་གཉེར་སྐྱོང་བྱེད་རིང་འཕྲད་པའི་དཀའ་ངལ་དང་གནད་དོན་དག་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས། རང་ལྗོངས་ཀྱི་དམངས་གཉེར་ཁེ་ལས་དང་ཚོང(མཐུན)ཚོགས་ཁག་གིས་ཚོང་འགུགས་མ་འདྲེན་དང་། མི་རིགས་མཐུན་སྒྲིལ། གྲོང་གསེབ་དར་རྒྱས་སོགས་ཀྱི་ཐད་ལ་འབད་བརྩོན་དང་དེར་ཐོབ་པའི་གྲུབ་འབྲས་ལ་ཁས་ལེན་གང་ལེགས་གནང་བ་རེད།
བརྟག་ཞིབ་ཚོགས་ཆུང་གིས་ནན་བཤད་གནང་དོན། དམངས་གཉེར་ཁེ་ལས་དང་ཚོང(མཐུན)ཚོགས་ཁག་གིས་དམངས་གཉེར་དཔལ་འབྱོར་འཕེལ་རྒྱས་གཏོང་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་། མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱས་ནས་ལྟེ་བའི་འགྲན་རྩོད་ནུས་པ་མུ་མཐུད་ཆེ་རུ་གཏོང་བ་དང་། གསར་གཏོད་ལ་བརྟེན་ནས་བྱ་གཞག་འཕེལ་རྒྱས་ལ་སྣེ་ཁྲིད་བྱས་ཏེ་ས་ཁོངས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་འགྲོ་བར་སྟོབས་ཤུགས་དེ་བས་ཆེ་བ་ལེགས་སྐྱེས་སུ་འབུལ་དགོས། ལྗོངས་བཟོ་ཚོང་མཉམ་འབྲེལ་ལྷན་ཚོགས་ཀྱིས་ཞབས་ཞུའི་འདུ་ཤེས་ཟབ་ཏུ་བཏང་ཐོག་སྲིད་གཞུང་དང་ཁེ་ལས་འབྲེལ་གཏུག་ཐབས་ལམ་ཤར་གཏོང་བྱས་ཏེ་དངོས་སྒྲུབ་ཀྱི་བྱེད་ཐབས་དང་སྙིང་ཉེ་བའི་ཞབས་ཞུར་བརྟེན་ནས་ལྗོངས་ཡོངས་ཀྱི་དམངས་གཉེར་དཔལ་འབྱོར་འཕེལ་རྒྱས་འགྲོ་བར་རམ་འདེགས་བྱེད་དགོས།
འབྲེལ་ཡོད་གསར་འགྱུར།