རང་སྐྱོང་ལྗོངས་ཀྱི་འགོ་ཁྲིད་ཀྱིས“དམིགས་པ་ལྔའི” ལས་དོན་སྤེལ་ཚུལ་ལ་བརྟག་ཞིབ་གནང་བ།
ཚེས་5ཉིན། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལུའོ་མེ་ཡིས་བརྟག་ཞིབ་ཚོགས་ཆུང་གི་སྣེ་ཁྲིད་དེ་ལྷ་ས་གྲོང་ཁྱེར་ལྷུན་གྲུབ་རྫོང་ལྕང་ར་ཤར་ཤང་ལྷ་སྡིངས་གྲོང་ཚོའི་འཕྲོད་བསྟེན་ཁང་དང་། ལྕང་ར་ཤར་ཤང་སློབ་ཆུང་། བྱང་ཁ་ཤང་འཕྲོད་བསྟེན་ཁང་། ལྷུན་གྲུབ་རྫོང་མི་དམངས་སྨན་ཁང་སོགས་སུ་ཕེབས་ནས“དམིགས་པ་ལྔའི”ལས་དོན་སྤེལ་ཚུལ་ལ་ས་གནས་ས་ཐོག་ཏུ་བརྟག་ཞིབ་གནང་བ་རེད།
བརྟག་ཞིབ་ཚོགས་ཆུང་གིས། ལྷ་ས་གྲོང་ཁྱེར་གྱི“དམིགས་པ་ལྔའི”བླང་བྱ་དོན་འཁྱོལ་བྱས་ཏེ་འཕྲོད་བསྟེན་བདེ་ཐང་གི“བྱ་སྤྱོད་ཁག་བརྒྱད”ལ་སྐུལ་འདེད་བཏང་བའི་ཐད་ཐོབ་པའི་ཕན་འབྲས་ལ་ཁས་ལེན་གང་ལེགས་བྱས་ཤིང་། སྨན་བཅོས་ཞབས་ཞུའི་མ་ལག་འཛུགས་སྐྱོང་ལ་རྒྱུན་མཐུད་ཤུགས་སྣོན་བརྒྱབ་སྟེ། ཚགས་དམ་རྣམ་པའི་རྫོང་ཁོངས་སྨན་བཅོས་ཀྱི་ཐུན་མོང་སྒྲིག་གཞིའི་ལེགས་ཆ་གང་ལེགས་བཏོན་ནས་སྤུས་ལེགས་སྨན་བཅོས་ཀྱི་ཐོན་ཁུངས་གཞི་རིམ་དུ་ཁྱབ་པར་སྐུལ་འདེད་གཏོང་དགོས་པ་དང་། འགན་འཁྲི་སྔར་བས་ནན་དཀྲི་དང་ཐབས་མང་མཉམ་སྤྱོད་ཀྱིས་གྲོང་ཁྱེར་དང་གྲོང་གསེབ་ཀྱི་གྲོང་མིའི་བདེ་ཐང་ལ་བརྟག་དཔྱད་ཡག་པོ་བྱེད་དགོས། ཕྱོགས་བསྡུས་སྔོན་འགོག་དང་ཚོད་འཛིན་བྱེད་ཐབས་རྒྱུན་མཐུད་དོན་འཁྱོལ་བྱས་ཏེ། ཐུམ་འབུའི་ནད་དང་གྲུམ་བུ་ཚིགས་ཆེན་ནད་འགུལ་རྣམ་གཙང་སེལ་བྱེད་པ་དང་། བྱིས་པའི་ལྷན་སྐྱེས་སྙིང་ནད་དང་སྐྱ་གྲིབ་ནད་ཕོག་པའི་ནད་པར“སྨན་བཅོས་བྱེད་དགོས་རིགས་ཚང་མར་སྨན་བཅོས་བྱེད་པ་དང་སྨན་བཅོས་བྱེད་འདོད་ཡོད་རིགས་ཚང་མར་སྨན་བཅོས་ཐུབ་པའི”འགན་ལེན་བྱེད་དགོས། སྡེ་ཚན་ཁག་གིས་མཉམ་འགུལ་ལ་སྐུལ་འདེད་བཏང་སྟེ། སློབ་མ་དང་ཞིང་འབྲོག་ཁུལ་མང་ཚོགས་ཀྱི་འཚོ་བཅུད་བཟའ་བཅའི་གྲུབ་ཆ་ནུས་ཤུགས་ཡོད་རྒུས་ལེགས་སུ་བཏང་ནས་དམངས་ཡོངས་ཀྱི་བདེ་ཐང་བྱང་ཚད་མཐོ་རུ་གཏོང་དགོས། སློབ་ཆེན་སློབ་མ་གྲོང་ཚོའི་སྨན་པ་བསྡུ་བའི་ལས་དོན་ལ་རྒྱུན་མཐུད་སྐུལ་འདེད་གཏོང་བ་དང་གྲོང་ཚོའི་སྨན་པ་གསོ་སྦྱོང་བྱེད་ཤུགས་ཆེ་རུ་བཏང་སྟེ། གཞི་རིམ་འཕྲོད་བསྟེན་ཞབས་ཞུའི་ནུས་པ་ཆེ་རུ་གཏོང་དགོས། རིམས་འགོག་སྨན་ཁབ་རྒྱག་པའི་རིག་ནུས་ཅན་གྱི་དོ་དམ་ལ་སྐུལ་འདེད་གཏོང་བ་དང་བདེ་ཐང་དྲིལ་བསྒྲགས་སློབ་གསོར་ཤུགས་སྣོན་བརྒྱབ་སྟེ། མང་ཚོགས་ལ་ནད་མི་ཕོག་པ་དང་ནད་ཕོག་ཚད་ཉུང་དུ་གཏོང་བར་འབད་བརྩོན་བྱེད་དགོས། སྨན་བཅོས་འགན་བཅོལ་སྒྱུར་བཅོས་ལ་བློ་བརྟན་འགྱུར་མེད་ངང་སྐུལ་འདེད་བཏང་སྟེ། སྨན་རྫས་སྒྲིག་གཞི་དང་སྨན་རྫས་ཐོན་ལས་ཀྱི་སྤུས་ཚད་མཐོ་བའི་འཕེལ་རྒྱས་ལ་མཐུན་རྐྱེན་སྔར་བས་ཡག་པོ་སྦྱོར་དགོས། “སྨན་བཅོས་དང་། སྨན་བཅོས་འགན་བཅོལ། སྨན་བཅོས་སྡེ་ཚན”བཅས་མཐུན་སྦྱོར་ངང་འཕེལ་རྒྱས་དང་བཅོས་སྐྱོང་ལ་སྐུལ་འདེད་བཏང་སྟེ། མང་ཚོགས་ཀྱི་བདེ་ཐང་ཐད་ཀྱི་ཐོབ་སྣང་དང་ཁྱབ་གདལ་རང་བཞིན་སྔར་བས་ལེགས་སུ་གཏོང་དགོས་པའི་ནན་བཤད་བྱས་ཡོད།
འབྲེལ་ཡོད་གསར་འགྱུར།