ཚེས་6ཉིན་གྱི་སྔ་དྲོར། 2025ལོའི་ཀྲུང་གོའི་བོད་ལྗོངས་ཀྱི་ཧི་མ་ལ་ཡ་བརྒལ་བའི་རྒྱལ་སྤྱིའི་གཞུང་ལམ་རྐང་འཁོར་མཐར་ཟད་འགྲན་བསྡུར་སྐབས་དྲུག་པ་ལྷ་ས་གྲོང་ཁྱེར་གྱི་ཕོ་བྲང་པོ་ཏ་ལའི་ཐང་ཆེན་དུ་འགོ་ཚུགས་ཤིང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་ཡན་ཅིན་ཧའེ་འགོ་ཚུགས་མཛད་སྒོར་ཞུགས་ནས་སྐབས་འདིའི་འགྲན་བསྡུར་འགོ་ཚུགས་པའི་ཁྱབ་བསྒྲགས་གནང་བ་རེད།

འགྲན་ཞུགས་རྐང་འཁོར་རུ་ཁག་17ཡི་རུ་མིའི་འཐུས་མི་སྔ་རྗེས་སུ་གར་སྟེགས་གཙོ་བོར་འཛེགས་པ་དང་ས་གནས་ས་ཐོག་གི་ལྟད་མོ་བ་ཚོས་སྤྲོ་སེམས་འཁོལ་པོས་དགའ་བསུ་ཞུས་པ་རེད།

ཆུ་ཚོད་10དང་སྐར་མ་30ཙམ་དུ། ཡན་ཅིན་ཧའེ་ཡིས་2025ལོའི་ཀྲུང་གོའི་བོད་ལྗོངས་ཀྱི་ཧི་མ་ལ་ཡ་བརྒལ་བའི་རྒྱལ་སྤྱིའི་གཞུང་ལམ་རྐང་འཁོར་མཐར་ཟད་འགྲན་བསྡུར་སྐབས་དྲུག་པ་འགོ་ཚུགས་པའི་ཁྱབ་བསྒྲགས་གནང་བ་དང་སྦྲགས་ཚོན་ཁྲ་ཅན་གྱི་ཤོག་སྦག་སྤར་བས་ཚོགས་ར་ཡོངས་སུ་ཐལ་མོའི་རྡེབ་སྒྲས་ཁེངས།

ཧི་མ་ལ་ཡ་བརྒལ་བའི་རྒྱལ་སྤྱིའི་གཞུང་ལམ་རྐང་འཁོར་མཐར་ཟད་འགྲན་བསྡུར་2018ལོ་ཚུན་དུ་སྐབས་ལྔ་བདེ་བླག་ངང་གཉེར་བ་རེད། སྐབས་འདིའི་མཐར་ཟད་འགྲན་བསྡུར་གཉེར་དོན་ནི་རང་སྐྱོང་ལྗོངས་དབུ་བརྙེས་ནས་ལོ་ངོ་60ཡི་རིང་ལྗོངས་ཡོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐོབ་པའི་གྲུབ་འབྲས་ཆེན་པོ་མངོན་པ་དང་ཀྲུང་གོའི་བོད་ཀྱི་གཏམ་རྒྱུད་ཡག་པོ་བརྗོད་པའི་ལས་སྟེགས་གལ་ཆེན་ཞིག་ཡིན་པས། ལུས་རྩལ་འགྲན་བསྡུར་གྱིས་འཛད་སྤྱོད་ལ་སྐུལ་ཁྲིད་བྱེད་པའི་ནུས་པ་སྔར་བས་འདོན་པ་དང་། “འགྲན་བསྡུར་དང་མཉམ་དུ་ཡུལ་སྐོར་བྱེད་པའི”སྤུས་རྟགས་གཏོད་རྒྱུར་སྐུལ་འདེད་གཏོང་བ། དུས་རབས་གསར་པའི་ཀྲུང་གོའི་བོད་ཀྱི་གཏམ་རྒྱུད་ཡག་པོ་བརྗོད་པ། བོད་ཀྱི་གསུང་སྒྲ་ཁྱབ་སྤེལ་ཡག་པོ་གཏོང་བ་བཅས་བྱས་ནས། འཛམ་གླིང་ལ་དངོས་འབྲེལ་དང་ཕྱོགས་ཡོངས་ཀྱི་སྤྱི་ཚོགས་རིང་ལུགས་ཀྱི་བོད་གསར་མངོན་པར་དོན་སྙིང་གལ་ཆེན་ལྡན་ཡོད།