ཉེ་ཆར། ལྗོངས་ཏང་ཨུད་ཀྱི་རྒྱུན་ཨུ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་རེན་ཝེ་ཡིས་རང་སྐྱོང་ལྗོངས་སྲིད་གཞུང་གི་ཆེད་དོན་ཚོགས་འདུ་གཙོ་སྐྱོང་གནང་སྟེ། འཕྲལ་སྡོམ་དོ་དམ་དང་གནོད་འཚེ་སྔོན་འགོག་ཉུང་གཏོང་དང་རྒུད་སྐྱོབ་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་དང་མཛུབ་སྟོན་དང་མཆན་འགོད་མཛུབ་སྟོན་རབ་དང་རིམ་པའི་དགོངས་དོན་ལག་བསྟར་དོན་འཁྱོལ་གཏིང་ཟབ་དང་། རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་ཀའི་བླང་བྱ་ལག་བསྟར་དོན་འཁྱོལ། ལྗོངས་ཡོངས་ཀྱི་འཁྱགས་མཚོའི་ཉེན་ཁ་དང་གནོད་འཚེའི་དུས་བབ་ལ་དབྱེ་ཞིབ་བྱས་ནས་གོམ་སྟབས་རྗེས་མའི་ལས་དོན་བཀོད་སྒྲིག་གནང་བ་རེད།

རེན་ཝེ་ཡིས། ཉེ་བའི་ལོ་ཤས་རིང་། གོ་ལ་ཧྲིལ་པོའི་གནམ་གཤིས་འགྱུར་ལྡོག་གི་ཤུགས་རྐྱེན་འོག་རང་ལྗོངས་ཀྱི་འཁྱགས་མཚོའི་གནོད་འཚེ་ཐོན་པའི་ཉེན་ཁ་རྒྱུན་ཆད་མེད་པར་ཆེ་རུ་ཕྱིན་པ་དང་གནོད་འཚེར་དོགས་ཟོན་དང་བཅོས་སྐྱོང་གི་ལས་འགན་ཉིན་བཞིན་ལྕི་རུ་འགྲོ་བཞིན་ཡོད། རིམ་ཁག་སྡེ་ཚན་ཁག་གིས་འཁྱགས་མཚོའི་གནོད་འཚེ་ཐོན་པ་དང་གནོད་འཚེ་བཟོ་བའི་ཁྱད་ཆོས་དང་དུས་ཡུན་རིང་པོའི་བཅོས་སྐྱོང་བྱེད་ཕྱོགས་ཁོང་དུ་ཆུད་པ་དང་། འཁྱགས་མཚོའི་ཉེན་ཁའི་མངོན་མེད་རྐྱེན་ངན་གྱི་ཚད་གཞི་ཕྱོགས་ཡོངས་ནས་གསལ་པོ་རྟོགས་པ། ལྟ་ཞིབ་ཚད་ལེན་དང་སྔོན་བརྡ་གཏོང་བར་ཤུགས་སྣོན་ཏན་ཏིག་རྒྱག་པ། འཕྲལ་སྡོམ་ཉེན་འགོག་སྔོན་ཇུས་ཟམ་མི་ཆད་པར་འཐུས་སྒོ་ཚང་དུ་གཏོང་བ། གནོད་འཚེ་འགོག་བཅོས་ཆུ་ཚད་མཐོ་རུ་གཏོང་བ་བཅས་བྱེད་དགོས། མངའ་ཁོངས་ཀྱི་འགན་འཁྲི་ནན་དུ་དང་འཁྱགས་མཚོའི་གནོད་འཚེ་ཐོན་སྲིད་པའི་གནས་ཚུལ་འགུལ་རྣམ་གྱིས་ཁོང་དུ་ཆུད་པར་བྱེད་པ་དང་། གནོད་འཚེ་སྔོན་འགོག་ཉུང་གཏོང་དང་རྒུད་སྐྱོབ་བྱེད་ཐབས་ཁག་དོན་འཁྱོལ་ཞིབ་ཕྲ་བྱེད་པ། ཤུགས་རྐྱེན་ཐེབས་པའི་ས་ཁོངས་དབྱེ་འབྱེད་དང་མང་ཚོགས་གནས་སྤོའི་ཇུས་གཞི་བཟོ་བ་བཅས་བྱས་ནས། ཐོལ་བྱུང་གི་ཛ་དྲག་གནས་ཚུལ་ཐོན་རྗེས་འཕྲལ་མར་དང་ལེན་དང་འཕྲལ་མར་ཐག་གཅོད་ཐུབ་པར་བྱེད་དགོས། སྡེ་ཚན་གྱི་ལྟ་འདོམས་འགན་འཁྲི་འཁུར་ཤུགས་ཆེ་རུ་བཏང་ནས་ཚན་རིག་དང་མཐུན་པའི་ཞིབ་འཇུག་དང་། ས་གཤིས་ཐོན་ཁུངས། ཆུ་ལམ་ཆུ་དཔྱད། གནོད་འགོག་བཅོས་སྐྱོང་། འཕྲལ་སྡོམ་ཉེན་སྐྱོབ་ཀྱི་རྒྱུ་རྐྱེན་ཆ་ཚང་། བརྒྱུད་རིམ་ཧྲིལ་པོའི་མཐུན་སྦྱོར་མཉམ་འགུལ་བཅས་འཛུགས་པ་དང་མཉམ་འཛིན་སྤྱི་སྒྲུབ་ཀྱི་ལས་ཀའི་མཉམ་ཤུགས་རྒྱུན་ཆད་མེད་པར་ཆགས་པར་བྱས་ནས། རང་ལྗོངས་ཀྱི་རང་བྱུང་གནོད་འཚེ་འགོག་བཅོས་ཀྱི་ཆུ་ཚད་མཐོ་རུ་ཏན་ཏིག་གཏོང་དགོས་པའི་ནན་བཤད་གནང་བ་རེད།