རང་སྐྱོང་ལྗོངས་ཀྱི་ཞིང་འབྲོག་པའི་འབབ་འཕར་ལས་དོན་ཚོགས་འདུ་འཚོགས་པ།
ཉེ་ཆར། རང་སྐྱོང་ལྗོངས་ཀྱིས་ཞིང་འབྲོག་པའི་འབབ་འཕར་ལས་དོན་ཚོགས་འདུ་འཚོགས་ཏེ། ལོ་སྟོད་ཀྱི་འབབ་འཕར་ཕན་འབྲས་རྩིས་བཤེར་དང་དུས་བབ་ལ་ཞིབ་དཔྱད་བྱས་ནས་ལོ་སྨད་ཀྱི་འབབ་འཕར་ལས་དོན་ལ་སྐུལ་འདེད་གཏོང་ཤུགས་ཆེ་རུ་བཏང་ཡོད། ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་རེན་ཝེ་ཚོགས་འདུར་ཞུགས་པ་དང་འབྲེལ་གསུང་བཤད་གནང་བ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཚེ་རིང་ཕུན་ཚོགས་ཀྱིས་ཚོགས་འདུ་གཙོ་སྐྱོང་གནང་བ་རེད།
རེན་ཝེ་ཡིས། རིམ་པ་ཁག་དང་སྡེ་ཚན་ཁག་གིས་གདེང་ཚོད་དང་ཆོད་སེམས་བརྟན་དུ་གཏོང་བ་དང་། འགན་འཁྲི་ཁུར་སེམས་ཆེ་རུ་གཏོང་བ། ལས་ཀའི་གཙོ་གནད་མངོན་གསལ་དོད་དུ་གཏོང་བ། སྲིད་ཇུས་མཐུན་སྦྱོར་བྱེད་ཤུགས་ཆེ་རུ་གཏོང་བ་བཅས་བྱས་ཏེ། སེམས་ཤུགས་གཅིག་ཏུ་བསྒྲིལ་ནས་ཞིང་འབྲོག་པའི་འབབ་འཕར་འགག་སྒྲོལ་དམག་འཐབ་ལ་མུ་མཐུད་རྒྱལ་ཁ་ལེན་དགོས། དམངས་ཕྱུག་ཐོན་ལས་འཕེལ་རྒྱས་ཤུགས་ཆེན་བཏང་ནས་ཞིང་འབྲོག་པའི་གཉེར་སྐྱོང་རང་བཞིན་གྱི་ཡོང་འབབ་མང་དུ་གཏོང་རྒྱུར་ཤུགས་རྒྱག་པ་དང་། ཐབས་མང་མཉམ་དུ་སྤྱད་དེ་ལས་ཞུགས་བྱེད་རྒྱ་ཆེ་རུ་བཏང་ནས་ཞིང་འབྲོག་པའི་གླ་ཕོགས་རང་བཞིན་གྱི་ཡོང་འབབ་མང་དུ་གཏོང་རྒྱུར་ཤུགས་རྒྱག་པ། གྲོང་གསེབ་ཀྱི་སྒྱུར་བཅོས་མུ་མཐུད་གཏིང་ཟབ་ཏུ་བཏང་ནས་ཞིང་འབྲོག་པའི་རྒྱུ་ནོར་རང་བཞིན་གྱི་ཡོང་འབབ་མང་དུ་གཏོང་རྒྱུར་ཤུགས་རྒྱག་པ། སྲིད་ཇུས་དོན་འཁྱོལ་ལ་དམ་འཛིན་ནན་པོ་བྱས་ནས་ཞིང་འབྲོག་པའི་སྤོ་སྒྱུར་རང་བཞིན་གྱི་ཡོང་འབབ་མང་དུ་གཏོང་རྒྱུར་ཤུགས་རྒྱག་པ། གཙོ་གནད་ས་ཁོངས་ཀྱི་མི་ཚོགས་ལ་དམ་པོར་དམིགས་ནས་གཞི་ཁྱོན་རང་བཞིན་གྱི་དབུལ་ལོག་མི་ཡོང་བ་བྱེད་རྒྱུའི་མཐའ་ཚད་མཐའ་གཅིག་ཏུ་སྲུང་བ། སེམས་ཤུགས་གཅིག་སྒྲིལ་དང་མཉམ་འཛིན་སྤྱི་སྒྲུབ་བྱས་ནས་ཞིང་འབྲོག་པའི་ཡོང་འབབ་བརྟན་པོའི་ངང་འཕར་བར་མཉམ་དུ་སྐུལ་འདེད་གཏོང་བ་བཅས་བྱས་ཏེ། དངོས་སྒྲུབ་འབད་སྒྲུབ་དང་གྲུབ་འབྲས་དངོས་ལ་བརྟེན་ནས་རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བར་བསུ་བ་ཞུ་དགོས་ཞེས་ནན་བཤད་གནང་བ་རེད།
འབྲེལ་ཡོད་གསར་འགྱུར།