ཡན་ཅིན་ཧའེ་ཡིས་རྒྱུན་ལས་ཨུ་ལྷན་གྱི་ཚོགས་འདུར་ཟུར་ཞུགས་བྱེད་མཁན་རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་དང་རྫོང་རིམ་པའི་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་འགན་འཁུར་བློ་མཐུན་དང་བཞུགས་མོལ་གནང་བ།
རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་བཅོ་བརྒྱད་པ་འཚོག་རིང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་ཡན་ཅིན་ཧའེ་ཡིས་རྒྱུན་ལས་ཨུ་ལྷན་གྱི་ཚོགས་འདུར་ཟུར་ཞུགས་བྱེད་མཁན་རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་དང་རྫོང་རིམ་པའི་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་འགན་འཁུར་བློ་མཐུན་དང་བཞུགས་མོལ་གནང་སྟེ། “མི་དམངས་འཐུས་ཚོགས་ཀྱི་འཐུས་མི་གཞི་རིམ་བཅོས་སྐྱོང་ལ་ཞུགས་པའི”བརྗོད་དོན་གཙོ་བོར་དམིགས་ནས་སྤེལ་རེས་གནང་བ་རེད།
བཞུགས་མོལ་ཚོགས་འདུའི་ཐོག རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་དང་རྫོང་རིམ་པའི་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་འགན་འཁུར་བློ་མཐུན་7གྱིས་རང་ངོས་ཀྱི་འགན་སྒྲུབ་བྱེད་ཚུལ་དང་ཟུང་འབྲེལ་བྱས་ནས་ཉམས་མྱོང་དང་བྱེད་ཐབས་མཉམ་སྤྱོད་བྱས་པ་མ་ཟད། བསམ་འཆར་དང་གྲོས་འགོ་ཡང་བཏོན་པ་རེད། ཡན་ཅིན་ཧའེ་ཡིས་ནན་ཏན་ངང་གསན་རྗེས། འཐུས་མིའི་བསམ་འཆར་དང་གྲོས་འགོ་གསེད་བཀྲོལ་ཕྱོགས་བསྡུས་དང་དབྱེ་ཞིབ་ནན་ཏན་བྱས་ནས་འབྲེལ་ཡོད་སྡེ་ཚན་ལ་ཞིབ་འཇུག་སྒྲུབ་གཉེར་བྱ་རྒྱུར་སྐྱེལ་དགོས་པའི་བླང་བྱ་བཏོན་གནང་བ་རེད།
ཡན་ཅིན་ཧའེ་ཡིས་ནན་བཤད་གནང་དོན། གཞི་རིམ་གྱི་བྱ་བ་ནི་དོན་ཆུང་མིན་པར་ཚང་མ་ཆབ་སྲིད་དང་འབྲེལ་ཡོད། རྒྱ་ཆེའི་མི་དམངས་འཐུས་ཚོགས་ཀྱི་འཐུས་མི་ཚོས“མི་དམངས་ཀྱིས་ང་འཐུས་མིར་བདམས་པ་དང་ངས་འཐུས་མི་བྱེད་པ་ནི་མི་དམངས་ཀྱི་ཆེད་དུ་ཡིན་པའི”འགྱུར་མེད་དམ་བཅའ་བློ་ལ་བརྟན་པོར་ངེས་ཏེ། རང་སྐྱོང་ལྗོངས་ཏང་ཨུད་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་འོག མི་དམངས་ཀྱི་ལངས་ཕྱོགས་ཐོག་བརྟན་པོར་ལངས་པ་དང་ལྷག་བསམ་རྣམ་དག་ངང་འགན་འཁྲི་བསྒྲུབས་ནས་གཞི་རིམ་བཅོས་སྐྱོང་ཆེད་མི་དམངས་འཐུས་ཚོགས་ཀྱི་འཐུས་མིའི་བློ་གྲོས་དང་སྟོབས་ཤུགས་སྐྱེས་སུ་འབུལ་དགོས། “མཐོ་ས”ནས་སྣེ་ཁྲིད་བྱེད་པ་དང་ཆབ་སྲིད་ཀྱི་ལངས་ཕྱོགས་ཐོག་བརྟན་པོར་ལངས་ཏེ། བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་མང་ཚོགས་ཀྱིས་གོ་ཐུབ་པའི“འཚོ་བའི་སྐོར་གྱི་སྐད་ཆར”འགྱུར་བར་བྱས་ནས་མི་རིགས་ཁག་གི་མང་ཚོགས་ཚོས“ཕན་པ་གང་ནས་ཐོབ་པ་དང་། ཕན་པ་གང་དུ་ཡོད་པ”གསལ་པོར་ཤེས་པ་བྱེད་དགོས། སྤྱི་ཡོངས་ཀྱི་འདུ་ཤེས་བརྟན་དུ་བཏང་ནས“བརྟན་ལྷིང་ཐད་གནས་ཚུལ་མི་ཐོན་པ་དང་། འཕེལ་རྒྱས་ཁྲོད་རྗེས་སུ་མི་ལུས་པ། སྐྱེ་ཁམས་ལ་གཏོར་བཤིག་མི་ཐེབས་པ། མཐའ་སྟོབས་ཐད་ལྷོད་གཡེང་མི་འགྲོ་བ”བཅས་ཀྱི་སྤྱི་ཡོངས་དང་བསྟུན་ནས། གཞི་རིམ་གྱི་རང་འགན་གཙང་སྒྲུབ་དེས་ལོ་རྒྱུས་དང་མི་དམངས་ཀྱི་ཞིབ་བཤེར་གྱི་ཉམས་སད་ཐེག་ཐུབ་པར་བྱེད་དགོས། བསམ་བློའི་ཐུན་མོང་ངོས་འཛིན་གཅིག་སྡུད་བྱེད་པ་དང་། མི་དམངས་ཁྲོད་རྩ་བ་ཚུགས་པ། མི་རིགས་ཁག་གི་མང་ཚོགས་སྣེ་ཁྲིད་དེ་ཏང་གི་མཐའ་འཁོར་དུ་མཐུན་སྒྲིལ་བཅས་བྱས་ཏེ་མཐུན་ཆ་ཆེ་ཤོས་གཏོད་དགོས། “ཞིབ་ཕྲ”ནས་ཤུགས་སྣོན་རྒྱག་པ་དང་། དམངས་ཀྱི་གནས་ཚུལ་དེ་བས་གསལ་རྟོགས་ཐུབ་པ། གྲོས་འགོ་གནད་འཁེལ་ཐུབ་པ་བཅས་བྱས་ནས་གནད་དོན་ཐག་གཅོད་བྱ་རྒྱུར་སྐུལ་འདེད་གཏོང་དགོས། ལས་དོན་དངོས་དེ་བས་ཡག་པོ་སྒྲུབ་པ་དང་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ལ་དམིགས་ནས་འཐུས་མིའི་བསམ་འཆར་དང་གྲོས་འགོ་དངོས་སུ་སྤྱད་དེ། མིག་མཐོང་ལག་ཟིན་ཐུབ་པའི་གནད་དོན་ཁག་གཅིག་ཐག་གཅོད་བྱ་རྒྱུར་སྐུལ་འདེད་གཏོང་དགོས། འགལ་ཟླ་འདུམ་འགྲིག་ཡག་པོ་བྱེད་པ་དང་། ལས་རིགས་ཁག་ནས་ཡོང་བ་དང་ཡུལ་བབ་དམངས་འདུན་ལ་རྒྱུས་མངའ་ཆེ་བའི་འཐུས་མིའི་ལེགས་ཆ་འདོན་པ། ཁྲིམས་ལུགས་དང་གནས་ལུགས་ཤོད་པ་བཅས་བྱས་ནས་འགལ་ཟླ་ཆུང་ས་ནས་སེལ་བ་དང་གཞི་རིམ་དུ་ཐག་གཅོད་བྱེད་དགོས། དཀའ་གནད་འགག་སྒྲོལ་བྱེད་པ་དང་། གཞི་རིམ་གྱི་འཐབ་ས་དང་པོར་སྐྱོད་པ། གྲོང་གསེབ་དར་རྒྱས་ཀྱི་སྣེ་ཁྲིད་པ་བྱེད་པ། ས་གནས་ཀྱི་ཐོན་ཁུངས་ལ་གཞི་ཚུགས་པ། ཐོན་ལས་གཉེར་བ་དང་དངོས་གཉེར་དར་རྒྱུར་སྣེ་ཁྲིད་བཅས་བྱས་ནས་མང་ཚོགས་ལ་རོགས་རམ་བྱས་ཏེ་འབབ་འཕར་ཐབས་ལམ་རྒྱ་ཆེར་གཏོང་དགོས། གནད་དོན་གཅིག་སྡུད་ཁུལ་དུ་སྐྱོད་པ་དང་། དཀའ་གནད་ཐག་གཅོད་བྱེད་མཁན་ཞིག་བྱེད་པ། “མི་དམངས་འཐུས་ཚོགས་ཀྱི་སྟོབས་ཤུགས”ལ་བརྟེན་ནས་འབྲེལ་ཡོད་སྡེ་ཚན་གྱིས་བྱེད་ཐབས་དངོས་འདོན་རྒྱུར་སྐུལ་འདེད་གཏོང་བ། གནད་དོན་རེ་རེ་བཞིན་ཐག་གཅོད་བཅས་བྱས་ནས་གནད་དོན་ཐག་གཅོད་མ་བྱུང་བར་ལས་དོན་སྒྲུབ་དགོས། ཚོད་བགམ་ཆེན་པོའི་མདུན་དུ་ལངས་ཕོད་པ་དང་། འཕྲལ་སྡོམ་དང་དོན་རྐྱེན་ཐག་གཅོད་བྱེད་མཁན་གྱི“གདོང་ལེན་པ”ཞིག་བྱེད་པ། ཉེན་ཁའི་དུས་སུ་གདོང་མཆོང་བྱེད་ཕོད་པ་དང་སྤོབས་སེམས་ཆེན་པོས་འགན་འཁྲི་འཁུར་བ། བློ་ཁོག་ཆེན་པོས་མདུན་སྐྱོད་བཅས་བྱས་ཏེ་བྱ་སྤྱོད་དངོས་ལ་བརྟེན་ནས“མི་དམངས་འཐུས་ཚོགས་ཀྱི་འཐུས་མིའི”ནུས་པ་འདོན་དགོས།
འབྲེལ་ཡོད་གསར་འགྱུར།