ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་སྨན་གླིང་གྲོང་ཁྱེར་དུ་བརྟག་ཞིབ་གནང་ཞིང་། འདི་ནི་ཝང་ཅུན་ཀྲེང་གིས་སྨན་གླིང་གྲོང་ཁྱེར་ཁ་ཉག་གྲོང་མི་སྡོད་ཁུལ་གྱི་ཨར་ལས་བྱ་ཡུལ་དུ་འབྲེལ་ཡོད་ལས་ཀའི་འཕེལ་རིམ་སྐོར་ལ་མཁྱེན་རྟོགས་གནང་བཞིན་པ།

● མང་ཚོགས་ཀྱི་ཐོན་སྐྱེད་འཚོ་བར་སེམས་ཁུར་དང་། ལས་ཀ་བྱེད་སྟངས་དང་བྱེད་ཐབས་ལ་དོ་སྣང་། རྒྱལ་ཁབ་ཀྱི་གཙོ་གནད་ལས་གྲྭར་ཞབས་ཞུའི་ལས་དོན་ཡག་པོ་སྒྲུབ་པ་བཅས་བྱས་ཏེ། དེང་རབས་ཅན་འཛུགས་སྐྲུན་གྱི་གྲུབ་འབྲས་ལས་ཞིང་འབྲོག་མང་ཚོགས་ལ་ཕན་པ་དེ་བས་མང་བ་དང་དེ་བས་ལེགས་པ་ཐོབ་པར་བྱེད་དགོས།

ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་སྨན་གླིང་གྲོང་ཁྱེར་དུ་བརྟག་ཞིབ་གནང་སྐབས་ནན་བཤད་གནང་དོན། ཏང་ཀྲུང་དབྱང་གི་མཛད་ཕྱོགས་སྲིད་ཇུས་དང་རང་སྐྱོང་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་ཕྱོགས་ཡོངས་ནས་ལག་བསྟར་དང་། མང་ཚོགས་ཀྱི་ཐོན་སྐྱེད་འཚོ་བར་སེམས་ཁུར། ལས་ཀ་བྱེད་སྟངས་དང་བྱེད་ཐབས་ལ་དོ་སྣང་། རྒྱལ་ཁབ་ཀྱི་གཙོ་གནད་ལས་གྲྭར་ཞབས་ཞུའི་ལས་དོན་ཡག་པོ་སྒྲུབ་པ། གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་ཏན་ཏིག་གཏོང་བ་བཅས་བྱས་ཏེ། དེང་རབས་ཅན་འཛུགས་སྐྲུན་གྱི་གྲུབ་འབྲས་ལས་ཞིང་འབྲོག་མང་ཚོགས་ལ་ཕན་པ་དེ་བས་མང་བ་དང་དེ་བས་ལེགས་པ་ཐོབ་པར་བྱེད་དགོས།

སྨན་གླིང་གྲོང་ཁྱེར་གྱིས་རྫོང་གྲོང་ཁྱེར་ལ་བསྒྱུར་བ་དང་རྒྱལ་ཁབ་ཀྱི་གཙོ་གནད་ལས་གྲྭ་ལག་བསྟར་བྱེད་པ་སོགས་འཕེལ་རྒྱས་ཀྱི་གོ་སྐབས་དམ་འཛིན་བྱས་ཏེ། གྲོང་ཁྱེར་འཛུགས་སྐྲུན་དང་གྲོང་ཁྱེར་གྱི་གཞི་ཁྱོན་འཕེལ་རྒྱས་ཀྱི་བར་མཐོངས་རྒྱ་ཆེར་གཏོང་བར་ནུས་ཤུགས་ཡོད་རྒུས་སྐུལ་འདེད་བཏང་ནས། ཤང་དང་གྲོང་རྡལ་གྱི་འཛུགས་སྐྲུན་རྣམ་གྲངས་ཁག་གཅིག་སྐྲུན་འགོ་ཚུགས་ཡོད། རྨང་གཞིའི་སྒྲིག་བཀོད་ཆ་ཚང་པོ་འདུག་གམ། ཐོན་ལས་གང་འདྲ་བྱས་ནས་འཕེལ་རྒྱས་གཏོང་རྩིས་ཡོད་དམ། མང་ཚོགས་ཀྱི་འཚོ་བ་གང་འདྲ་འདུག་གམ་ཞེས་ཝང་ཅུན་ཀྲེང་གིས་ཐུགས་ཁུར་ཟབ་མོས་བཀའ་འདྲི་གནང་ཞིང་། སྨན་གླིང་གྲོང་ཁྱེར་ཁ་ཉག་གྲོང་མི་སྡོད་ཁུལ་དང་བཀྲ་ཤིས་རབ་བརྟན་ཚོང་འདུས་གྲོང་རྡལ་འཛུགས་སྐྲུན་ས་ཚིགས་ཀྱི་ཨར་ལས་བྱ་ཡུལ་དུ་ཕེབས་སྐབས། ཝང་ཅུན་ཀྲེང་གིས་སྤྱིའི་འཆར་འགོད་དང་སྲིད་ཇུས་དོན་འཁྱོལ་སོགས་ཀྱི་གནས་ཚུལ་བཀའ་འདྲི་ཞིབ་ཕྲ་གནང་ཞིང་། འབྲེལ་ཡོད་སྡེ་ཚན་གྱིས་ཚན་རིག་དང་མཐུན་པའི་འཆར་འགོད་སྔོན་ལ་ལག་ལེན་བསྟར་རྒྱུ་མཐའ་འཁྱོངས་དང་། རྨང་གཞིའི་སྒྲིག་བཀོད་དང་ལེ་ལག་ཚང་བའི་སྒྲིག་བཀོད་འཛུགས་སྐྲུན་འཐུས་སྒོ་ཚང་དུ་གཏོང་བ། ཐོན་ལས་འཆར་འགོད་ལ་ཤུགས་སྣོན་རྒྱག་པ་བཅས་བྱས་ཏེ། གྲོང་ཚོའི་སྤུས་ཚད་ལེགས་སུ་གཏོང་དགོས། བྱེད་པོའི་འགན་འཁྲི་ནན་དུ་གཏོང་བ་དང་། སྤུས་ཚད་དང་བདེ་འཇགས་ལྟ་འདོམས་ལ་ཤུགས་སྣོན་རྒྱག་པ། བདེ་འཇགས་ཐོན་སྐྱེད་བྱེད་ཐབས་དོན་འཁྱོལ་ཞིབ་ཚགས་བཅས་བྱས་ནས། ནུས་ཤུགས་ཡོད་རྒུས་རྩེར་སོན་ལས་གྲྭ་དང་བློ་བདེའི་ལས་གྲྭ་སྐྲུན་དགོས་པའི་བླང་བྱ་བཏོན་གནང་བ་རེད།

ཝང་ཅུན་ཀྲེང་གིས་སྨན་གླིང་གྲོང་རྡལ་ཉི་ཟེར་གྲོང་ཚོའི་དམངས་ཕན་ཞབས་ཞུའི་ཚོམས་ཆེན་དང་མཐའ་མཚམས་གྲོང་ཚོ་དང་གྲོང་རྡལ་འཛུགས་སྐྲུན་འགྲེམས་ཁང་དུ་ཕེབས་ཏེ། དམངས་ཕན་ཞབས་ཞུའི་ལས་དོན་སྒྲུབ་གཉེར་དང་། གྲོང་མིའི་ཐོན་སྐྱེད་འཚོ་བ། ཁྱད་ལྡན་ཐོན་ལས་འཕེལ་རྒྱས་སོགས་ཀྱི་གནས་ཚུལ་མཁྱེན་རྟོགས་ནན་ཏན་གནང་བ་རེད། ཁོང་གིས་གསུངས་དོན། རྣམ་གྲངས་ལས་འགོ་ཚུགས་པ་ནས་བཟུང་རྒྱ་ཆེའི་མང་ཚོགས་ཀྱིས་ལྟ་བར་འགྱུར་ལྡོག་གཏོང་བ་དང་། དཀའ་ངལ་ཁྱད་བསད། གཞོགས་འདེགས་ཧུར་ཐག་བཅས་བྱས་ཏེ། ཏང་ཨུད་དང་སྲིད་གཞུང་གི་རོགས་རམ་འོག་ལས་ལ་བརྩོན་པའི་ལག་གཉིས་ལ་བརྟེན་ནས་ཁྱིམ་གཞིས་གསར་པ་བསྐྲུན་པ་དང་འཚོ་བ་གསར་པ་བཏོད་ཡོད། ཁང་པ་གསར་པའི་ནང་སྤོས་པ་ནི་ལས་ཀའི་གོམ་སྟབས་དང་པོ་ཙམ་རེད། རྗེས་མཐུད་ཀྱི་ལས་དོན་ད་དུང་མང་པོ་ཡོད། འབྲེལ་ཡོད་སྡེ་ཚན་གྱིས་རང་འགུལ་ངང་འཐབ་ས་དང་པོར་བསྐྱོད་ནས་མང་ཚོགས་ཀྱི་འབོད་སྒྲ་ཉན་པ་དང་། མང་ཚོགས་ཀྱི་ལུགས་དང་མཐུན་ལ་ཁྲིམས་དང་མཐུན་པའི་རེ་འདུན་རྣམས་ཐབས་བརྒྱ་ཇུས་སྟོང་གིས་སྐོང་གང་ཐུབ་བྱས་ཏེ། མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་རྒྱུན་ཆད་མེད་པར་ཆེ་རུ་གཏོང་དགོས།

བརྟག་ཞིབ་གནང་རིང་། ཝང་ཅུན་ཀྲེང་གིས་གསུང་དོན། རྒྱལ་ཁབ་ཀྱི་གཙོ་གནད་ལས་གྲྭ་འཛུགས་སྐྲུན་ལ་ནུས་ཤུགས་ཡོད་རྒུས་རྒྱབ་སྐྱོར་བྱེད་པ་ནི་བོད་ཀྱིས་རང་འགུལ་ངང་རྒྱལ་ཁབ་ཀྱི་འཕེལ་རྒྱས་འཐབ་ཇུས་ལ་ཞབས་འདེགས་ཞུ་བ་དང་དེའི་ནང་ཞུགས་པའི་ལག་ལེན་དངོས་རེད། ཆབ་སྲིད་དང་སྤྱི་ཡོངས་ཀྱི་མཐོ་ཚད་ནས་ཞབས་ཞུའི་འགན་སྲུང་དང་རྒྱུ་རྐྱེན་གཙོ་བོའི་འགན་སྲུང་བྱེད་ཤུགས་ཆེ་རུ་གཏོང་བ་དང་། སྲིད་ཇུས་ཀྱི་དྲིལ་བསྒྲགས་ཁྲིད་སྟོན་དང་དཔེ་སྟོན་སྐུལ་ཁྲིད་ཡག་པོ་བྱེད་པ། དཔལ་འབྱོར་གྱི་རྩིས་ཡག་པོ་རྒྱག་དགོས་ལ་དམངས་འཚོ་དང་སྐྱེ་ཁམས་ཀྱི་རྩིས་ཀྱང་ཡག་པོ་རྒྱག་དགོས་པ་བཅས་བྱས་ཏེ་ཚན་རིག་དང་མཐུན་ལ་བརྟན་ཞིང་གོ་རིམ་ལྡན་པའི་སྒོ་ནས་འབྲེལ་ཡོད་ལས་དོན་ཁག་སྐུལ་འདེད་གཏོང་དགོས། དམངས་འཚོ་གལ་ཆེ་ཤོས་དང་གཙོ་བོར་འཛིན་རྒྱུ་བློ་ལ་བརྟན་པོར་བཅངས་ནས། འགྲོ་ལམ་དང་། ཆུ་མཁོ་འདོན། གློག་ཤུགས། འཕྲིན་གཏོང་སོགས་རྨང་གཞིའི་སྒྲིག་བཀོད་འཛུགས་སྐྲུན་ལ་སྤྱི་འདོམས་སྐུལ་འདེད་གཏོང་བ་དང་། འཕྲོད་བསྟེན་དང་རྒན་གསོ་སོགས་སྤྱི་པའི་ཞབས་ཞུའི་རྣམ་གྲངས་ལ་མུ་མཐུད་དམ་འཛིན་ཡག་པོ་བྱེད་པ། དམངས་ཕན་ཞབས་ཞུའི་ལས་ཀའི་ལམ་སྲོལ་འཐུས་སྒོ་ཚང་དུ་གཏོང་བ། མང་ཚོགས་ཀྱི་ལས་དོན་ངང་རྒྱུད་རིང་ལ་ཞིབ་ཚགས་པོའི་སྒོ་ནས་ཡག་པོ་བསྒྲུབས་ཏེ་མང་ཚོགས་ཀྱི་གཏོགས་སེམས་ཆེ་རུ་གཏོང་དགོས། རྗེས་མཐུད་ཀྱི་རོགས་སྐྱོར་ཕུགས་ཕན་ལམ་སྲོལ་འཐུས་སྒོ་ཚང་དུ་གཏོང་བ་དང་བདེ་སྡོད་དང་ལས་བརྩོན་སྦྲེལ་མཐུད་ཡག་པོ་བྱས་ཏེ། མང་ཚོགས་ཀྱི་ལས་ཞུགས་བརྟན་པོ་དང་། ཐོན་ལས་འཕེལ་རྒྱས། སྡེ་ཁུལ་བཅོས་སྐྱོང་སོགས་གཙོ་གནད་ལས་དོན་ལ་སྡེབ་གཅིག་ཏུ་སྐུལ་འདེད་གཏོང་བ་དང་། ཡུལ་བབ་དང་བསྟུན་ནས་ཁྱད་ལྡན་སྤུས་ལེགས་ཐོན་ལས་སྐྱེད་སྲིང་བྱེད་པ། ལས་ཞུགས་འབབ་འཕར་གྱི་ཐབས་ལམ་རྒྱ་ཆེར་གཏོང་བ་བཅས་བྱས་ནས་རང་ངོས་འཕེལ་རྒྱས་ཀྱི་ནུས་པ་ཆེ་རུ་གཏོང་དགོས། ཏང་འཛུགས་སྐྱོང་གིས་གཞི་རིམ་བཅོས་སྐྱོང་ལ་སྣེ་ཁྲིད་བྱེད་ཤུགས་ཆེ་རུ་གཏོང་བ་དང་། གཞི་རིམ་ཏང་རྩ་འཛུགས་ཀྱི་འཐབ་འཛིང་བཙན་རྫོང་གི་ནུས་པ་དང་ཏང་ཡོན་གྱི་གདོང་ལེན་དཔེ་བཟང་གི་ནུས་པ་གང་ལེགས་འདོན་པ། མི་རིགས་མཐུན་སྒྲིལ་ཡར་ཐོན་གྱི་འཛུགས་གཏོད་ལས་དོན་གཏིང་ཟབ་སྤེལ་བ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་དྲིལ་བསྒྲགས་སློབ་གསོ་རྒྱུན་རྣམ་ཅན་གྱི་སྒོ་ནས་སྐུལ་འདེད་གཏོང་བ། ཤེས་དཔལ་འཛུགས་གཏོད་དང་། ཡུལ་སྲོལ་སྒྱུར་བ། སྡོད་མལ་ཁོར་ཡུག་བཅོས་སྒྲིག་སོགས་ཀྱི་ལས་དོན་གཏིང་ཟབ་སྤེལ་ཏེ། སེམས་ནུས་གཅིག་སྒྲིལ་གྱིས་དེ་བས་བདེ་སྐྱིད་དང་མཛེས་སྡུག་ལྡན་པ་དང་གནས་འཕྲོད་ལས་འཚམ་གྱི་ཁྱིམ་གཞིས་གསར་པ་འཛུགས་སྐྲུན་བྱེད་དགོས།