ཚེས་21ཉིན་གྱི་སྔ་དྲོར། “འགན་འཁྲི་བློ་ལ་བརྟན་པོར་ངེས། གངས་ལྗོངས་བརྗིད་ཆེའི་ལེའུ་རྩོམ”ཨོ་རྩལ་འགྲན་ཚོགས་ཀྱི་ཨང་དང་པོའི་སྐོར་སྐྱོད་སྒྲོག་འགྲེལ་ཚོགས་པ་དང་པེ་ཅིང་གྲོང་ཁྱེར་གྱི་བོད་སྐྱོར་ལས་བྱེད་པའི་ངོ་འཕྲད་ཚོགས་འདུ་འཚོགས་པ་རེད།

རྒྱལ་ཁབ་ལུས་རྩལ་སྤྱི་ཁྱབ་ཅུས་ཀྱི་ཅུས་ཀྲང་དང་ཏང་ཙུའི་ཧྲུའུ་ཅི་ཀའོ་ཀྲི་ཏན་དང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལྕགས་རྭ་བློ་བཟང་བསྟན་འཛིན་ཚོགས་འདུར་ཞུགས་པ་རེད།

ངོ་འཕྲད་ཚོགས་འདུར་ཕ་རི་སིའི་ཨོ་རྩལ་འགྲན་ཚོགས་ལ་ཨང་དང་པོ་ཐོབ་མཁན་མ་ལུང་དང་། ཧོང་ཡུས་ཐིང་། ཁྲེན་ཆིང་ཁྲེན། ལུང་ཏའོ་དབྱི། ཀུའོ་ཆི་ཆི། ལི་ཆན་བཅས་དང་པེ་ཅིང་གྲོང་ཁྱེར་གྱི་བོད་སྐྱོར་ལས་བྱེད་ཤེས་ལྡན་པས་འགན་འཁྲི་འགན་འཁུར་དང་། དད་སེམས་དང་ཕུགས་འདུན་ལ་དམིགས་ནས་སྤེལ་རེས་བྱས་པ་རེད། བྱེད་སྒོ་སྤེལ་རིང་ཨོ་རྩལ་འགྲན་ཚོགས་ཀྱི་ཨང་དང་པོ་ཐོབ་མཁན་དྲུག་གིས་པེ་ཅིང་གྲོང་ཁྱེར་གྱི་བོད་སྐྱོར་ལས་བྱེད་ཤེས་ལྡན་པའི་འཐུས་མིར་སྤོ་ལོའི་ཡོ་ཆས་སྤྲད་པ་རེད།

ད་ཐེངས་ཀྱི་ངོ་འཕྲད་ཚོགས་འདུ་ནི“ཕ་རི་སིའི་རྒྱལ་ཁ་ཕུ་ཐག་གཅོད། ཨོ་རྩལ་འགྲན་ཚོགས་ཀྱི་ཉམས་འགྱུར་ངོམས། ཨོ་རྩལ་འགྲན་ཚོགས་ཀྱི་ཨང་དང་པོ་དང་ངོ་ཐུག་གདོང་འཕྲད”ཀྱི་སྐོར་སྐྱོད་སྒྲོག་འགྲེལ་གྱི་བོད་ལྗོངས་ས་ཚུགས་བྱེད་སྒོའི་གྲས་ཤིག་རེད། ད་ཐེངས་ཀྱི་སྐོར་སྐྱོད་སྒྲོག་འགྲེལ་བྱེད་སྒོ་ཟླ་7ཚེས་17ཉིན་ནས་ཚེས་22ཉིན་བར་སྤེལ་བ་དང་། ཨོ་རྩལ་འགྲན་ཚོཌ་ཀྱི་ཨང་དང་པོ་ཐོབ་མཁན་ཉིང་ཁྲི་དང་ལྷ་སའི་ཁེ་ལས་དང་། གྲོང་གསེབ། སློབ་གྲྭ དམག་སྒར་སོགས་སུ་བསྐྱོད་དེ་སྒྲོག་འགྲེལ་དང་སྤེལ་རེས་བྱེད་སྒོ་སྤེལ་ནས། བོད་ཀྱི་མི་རིགས་ཁག་གི་མང་ཚོགས་དང་ངོ་ཐུག་གདོང་འཕྲད་ངང་སྤེལ་རེས་གཏིང་ཟབ་བྱས་ཏེ་མིག་དཔེའི་སྟོབས་ཤུགས་བཏོན་ཡོད། དེའི་རིང་ད་དུང“ཀྲུང་གོའི་ལུས་རྩལ་བསྐྱར་དུ་ཡང་རྩེར་འཛེགས་པའི”བརྗོད་དོན་གཙོ་བོའི་བྱེད་སྒོ་སྤེལ་ནས། ཀྲུང་ཧྭའི་ལུས་རྩལ་གྱི་སྙིང་སྟོབས་དང་ཀྲུང་ཧྭའི་ཕུལ་བྱུང་རིག་གནས་ཀྱིས་མི་རིགས་ཁག་གི་མི་དམངས་ལ་ཤུགས་རྐྱེན་བཟང་པོ་ཐེབས་པར་བྱས་ནས། མི་རིགས་ཁག་འགྲོ་འོང་དང་། སྤེལ་རེས། མཉམ་འདྲེས་བཅས་རྒྱ་ཁྱབ་བྱེད་པར་སྐུལ་འདེད་བཏང་སྟེ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་བཏང་བ་རེད།