དབུ་ཤོག>སྲིད་དོན།>སྲིད་དོན་གསར་འགྱུར།
  • ལི་ཆང་གིས་བོད་དུ་བརྟག་ཞིབ་གནང་སྐབས་ནན་བཤད་གནང་དོན།

    ​རྒྱལ་ཁབ་ཀྱི་གཙོ་གནད་ལས་གྲྭའི་རྣམ་གྲངས་སྤུས་ཚད་མཐོ་པོས་ལག་བསྟར་བྱས་ཏེ་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བ་དང་མི་རིགས་ཁག་གི་མི་དམངས་ཀྱི་བདེ་རྩ་ཆེ་རུ་གཏོང་དགོས།

  • ཡོང་ཁུངས།  ཤིན་ཧྭ་གསར་འགྱུར་ཁང་།    |     སྤེལ་དུས།  2025-07-21

    ཟླ་7ཚེས་18དང་ཚེས་19ཉིན། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་དང་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་བོད་དུ་བརྟག་ཞིབ་གནང་བར་ཕེབས་ཤིང་། འདི་ནི་ཟླ་7ཚེས་18ཉིན་ལི་ཆང་གིས་ཉིང་ཁྲི་རུ་ཁྲོན་བོད་ལྕགས་ལམ་གསེར་སྐྱེམས་ལའི་ཕུག་ལམ་གྱི་ཐོན་སྒོར་ཕེབས་ནས་ཕུག་ལམ་གྱི་ཨར་སྐྲུན་གནས་ཚུལ་ལ་གཟིགས་ཞིབ་དང་འཛུགས་སྐྲུན་གྱི་འཕེལ་རིམ་མཁྱེན་རྟོགས་གནང་བཞིན་པ།

    ཤིན་ཧྭ་གསར་འགྱུར་ཁང་ལྷ་ས་ནས་ཟླ་7ཚེས་19ཉིན་གློག་འཕྲིན་འབྱོར་གསལ། ཟླ་7ཚེས་18དང་ཚེས་19ཉིན། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་དང་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་བོད་དུ་བརྟག་ཞིབ་གནང་བར་ཕེབས་ཤིང་། ཁོང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བོད་ཀྱི་ལས་དོན་སྐོར་གྱི་རྣམ་བཤད་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་གཏིང་ཟབ་བྱས་ནས། སྐྱེ་ཁམས་སྲུང་སྐྱོང་སྔོན་ལ་འཇོག་རྒྱུ་མཐའ་འཁྱོངས་ཀྱིས་རྒྱལ་ཁབ་ཀྱི་གཙོ་གནད་ལས་གྲྭའི་རྣམ་གྲངས་སྤུས་ཚད་མཐོ་པོས་ལག་བསྟར་བྱེད་པ་དང་། ཁྱད་ལྡན་ལེགས་ཆའི་ཐོན་ལས་ཡུལ་བབ་དང་བསྟུན་ཏེ་སྐྱེད་སྲིང་བྱེད་པ། དཔལ་འབྱོར་དང་སྤྱི་ཚོགས་འཕེལ་རྒྱས་ལ་རྒྱུན་མཐུད་སྐུལ་འདེད་གཏོང་བ་བཅས་བྱས་ནས་མི་རིགས་ཁག་གི་མི་དམངས་ཀྱི་བདེ་རྩ་ཟམ་མི་ཆད་པར་ཆེ་རུ་གཏོང་དགོས་པའི་ནན་བཤད་གནང་བ་རེད།

    ལི་ཆང་གིས་ཉིང་ཁྲིར་དང་ཐོག་ཁྲོན་བོད་ལྕགས་ལམ་གསེར་སྐྱེམས་ལའི་ཕུག་ལམ་གྱི་ཐོན་སྒོར་ཕེབས་ནས་ཕུག་ལམ་གྱི་ཨར་སྐྲུན་གནས་ཚུལ་ལ་གཟིགས་ཞིབ་དང་འཛུགས་སྐྲུན་གྱི་འཕེལ་རིམ་མཁྱེན་རྟོགས་གནང་བ་མ་ཟད། ཨར་སྐྲུན་མི་སྣ་དང་སྤེལ་རེས་ཀྱང་གནང་ནས་ཨར་སྐྲུན་ཚོགས་པས་རྙོག་འཛིང་ཆེ་བའི་ས་གཤིས་དང་གནམ་གཤིས་ཆ་རྐྱེན་ཁྱད་བསད་ཀྱིས་དཀའ་སྤྱད་ལས་སྒྲུབ་དང་ལས་གྲྭ་འཛུགས་སྐྲུན་གྱི་དཀའ་གནད་རྒྱུན་མཐུད་སེལ་བར་བསྔགས་བརྗོད་ཆེན་པོ་གནང་ཞིང་། ཁོང་གིས་ཁྲོན་བོད་ལྕགས་ལམ་བསྐྲུན་ཟིན་ནས་མེ་འཁོར་ཤར་གཏོང་ཐུབ་པ་དེས་བོད་ཀྱི་འཕེལ་རྒྱས་དང་དམངས་འཚོ་ལེགས་གཏོང་ལ་སྐུལ་འདེད་གཏོང་བའི་ཐད་དོན་སྙིང་གལ་ཆེན་ལྡན་ཡོད། ཚང་མས་ཐོག་མཐའ་བར་གསུམ་དུ་སྤུས་ཚད་དང་བདེ་འཇགས་ཨང་དང་པོར་བཞག་ནས་ཚན་རིག་དང་མཐུན་ལ་གོ་རིམ་ལྡན་པའི་ངང་ཨར་སྐྲུན་མཐའ་འཁྱོངས་ཀྱིས་བརྒྱུད་རིམ་ཧྲིལ་པོའི་སྤུས་ཚད་དོ་དམ་ཚོད་འཛིན་ལ་དམ་འཛིན་ཏན་ཏིག་བྱས་ཏེ་ལས་གྲྭར་ལོ་རྒྱུས་ཀྱི་ཚོད་བགམ་ཐེག་པའི་འགན་ལེན་བྱེད་དགོས། གློག་ཤུགས་དང་འཕྲིན་གཏོང་སོགས་ལྷན་སྦྱར་སྒྲིག་བཀོད་འཛུགས་སྐྲུན་ལ་མགྱོགས་མྱུར་སྐུལ་འདེད་བཏང་ནས། རྒྱབ་ཕྱོགས་མཁོ་སྒྲུབ་ཞབས་ཞུ་འགན་ལེན་ཡག་པོ་བྱས་ཏེ་ལས་གྲྭ་བདེ་བླག་ངང་ལག་བསྟར་བྱེད་པར་ཆ་རྐྱེན་བཟང་པོ་སྐྲུན་དགོས། སྨན་གླིང་ཆུ་ཤུགས་གློག་ཁང་གི་ཆུ་རགས་གནས་ཡུལ་དང་ཡར་ཉང་འདམ་རར། ལི་ཆང་གིས་ཨར་སྐྲུན་སྒྲིག་ཆས་དང་བྲག་སྙིང་གསོར་འབིགས་བྱས་པ་སོགས་ལ་གཟིགས་ཞིབ་གནང་བ་དང་། ཡར་ཀླུང་གཙང་པོའི་སྨད་རྒྱུད་ཀྱི་ཆུ་གློག་ལས་གྲྭ་གསར་སྤེལ་དང་། ཚན་རྩལ་འགག་སྒྲོལ། ཡུལ་མི་གནས་སྤོ་བཀོད་སྒྲིག་སོགས་ཀྱི་ལས་ཀའི་སྙན་སེང་གསན་པ་མ་ཟད། འདམ་རའི་སྐྱེ་ཁམས་ཁོར་ཡུག་སྲུང་སྐྱོང་གནས་ཚུལ་ཡང་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་ཡར་ཀླུང་གཙང་པོའི་སྨད་རྒྱུད་ཀྱི་ཆུ་གློག་ལས་གྲྭ་ནི་གཞི་ཁྱོན་ཆེ་བ་དང་། དུས་ཡུན་རིང་བ། ཤུགས་རྐྱེན་ཟབ་པ་བཅས་ཡིན་པའི་དུས་རབས་ཀྱི་ལས་གྲྭ་ཞིག་རེད། སྔོན་ཐོན་ལག་རྩལ་དང་། སྒྲིག་ཆས། བཟོ་རྩལ། རྒྱུ་ཆ་སོགས་བེད་སྤྱོད་ཧུར་ཐག་བཏང་ནས། སྤུས་ཚད་མཐོ་པོས་འཛུགས་སྐྲུན་བྱེད་པར་འདེགས་སྐྱོར་ནུས་ལྡན་བྱེད་པ་དང་ཆབས་ཅིག འབྲེལ་ཡོད་ཁྱབ་ཁོངས་ཀྱི་ཚན་རྩལ་གསར་གཏོད་དང་ཐོན་ལས་གསར་གཏོད་ལ་ཁྲིད་སྟོན་བྱེད་དགོས། སྐྱེ་ཁམས་སྲུང་སྐྱོང་ལ་མཐོང་ཆེན་ལྷག་པར་བྱས་ནས་སྐྱེ་ཁམས་ཁོར་ཡུག་ལ་གཏོར་སྐྱོན་མི་ཕོག་པའི་འགན་ལེན་བྱེད་དགོས། ཡུལ་མི་གནས་སྤོའི་བཀོད་སྒྲིག་ལས་དོན་ཞིབ་ཚགས་དང་ཡག་པོ་བསྒྲུབས་ནས། ལས་གྲྭ་འཛུགས་སྐྲུན་ལ་སྐུལ་འདེད་གཏོང་བ་དེ་ས་གནས་དེ་གའི་མང་ཚོགས་ཀྱི་ལས་ཞུགས་འབབ་འཕར་ལ་སྐུལ་འདེད་གཏོང་བ་དང་ཟུང་འབྲེལ་དེ་བས་ལེགས་པ་བྱེད་དགོས། ཚད་མཐོའི་ལས་འགན་སྒྲུབ་སེམས་དང་། ལོ་རྒྱུས་དང་མི་དམངས་ལ་འགན་འཁུར་བའི་སྙིང་སྟོབས་ལ་བརྟེན་ནས། ཡར་ཀླུང་གཙང་པོའི་སྨད་རྒྱུད་ཀྱི་ཆུ་གློག་ལས་གྲྭ་དེ་ཉིད་དུས་རབས་གསར་པའི་མཚོན་རྟགས་རང་བཞིན་གྱི་གཙོ་གནད་ལས་གྲྭ་ཞིག་ཏུ་སྐྲུན་དགོས་པའི་ནན་བཤད་གནང་བ་རེད།

    ལྷ་སར། ལི་ཆང་གིས་ཆུ་ཤུར་ཚལ་སྣེའི་རྒྱལ་ཁབ་དེང་རབས་ཞིང་ལས་དཔེ་སྟོན་ཁུལ་དུ་ཕེབས་ནས་རང་སྐྱོང་ལྗོངས་ཀྱི་ཞིང་འབྲོག་ལས་ཀྱི་ཐོན་ལས་འཕེལ་རྒྱས་དང་ས་མཐོའི་སྐྱེ་དངོས་ཞིབ་འཇུག་སུའོ་འཛུགས་སྐྲུན་སོགས་ཀྱི་ངོ་སྤྲོད་གསན་པ་དང་། དཔེ་སྟོན་ཁུལ་གྱི་ཤིང་འབྲས་དང་སྔོ་ཚལ་དང་། ས་མཐོའི་ཁྱད་ལྡན་བཟའ་བཅའ་དང་འཐུང་བྱ། མི་རིགས་ཀྱི་ལག་ཤེས་ཐོན་རྫས་སོགས་ཀྱི་འགྲེམས་སྟོན་ལ་གཟིགས་ཤིང་། ཁོང་གིས། ཁྱད་ལྡན་ལེགས་ཆའི་ཐོན་ཁུངས་སྤྱད་དེ་ས་མཐོའི་ཞིང་འབྲོག་ལས་འཕེལ་རྒྱས་གཏོང་རྒྱུ་ནི་དམངས་ཕྱུག་བོད་དར་གྱི་དམ་འཛིན་བྱ་གཞི་གལ་ཆེན་ཞིག་ཡིན་པས། ཞིང་འབྲོག་ལས་ཀྱི་ལག་རྩལ་གསར་པ་དཔེ་སྟོན་ཁྱབ་གདལ་གཏོང་བར་ཤུགས་སྣོན་བརྒྱབ་ནས། ས་མཐོའི་སོན་གསོ་སོགས་ལ་ཚད་བརྒལ་གསར་པ་ཧུར་ཐག་ཡོང་བར་བྱེད་པ་དང་། དེང་རབས་ཞིང་ལས་ཐོན་ལས་གླིང་དང་ཁྱད་ལྡན་ཐོན་ལས་ཁྱུ་ཚོགས་སོགས་ལ་བརྟེན་ནས། ཞིང་འབྲོག་ལས་གཞི་ཁྱོན་ཅན་དང་སྤུས་རྟགས་ཅན་གྱི་འཕེལ་རྒྱས་ལ་སྐུལ་འདེད་གཏོང་དགོས། ཚན་རྩལ་ཤེས་པ་དང་དོ་དམ་ལ་མཁས་པའི་ཆེད་ལས་ཞིང་འབྲོག་པ་གསར་པ་དེ་བས་མང་བ་གསོ་སྐྱོང་དང་། ཞིང་འབྲེལ་ཞིང་ཁྲིད་ལམ་སྲོལ་གསར་གཏོད་བྱས་ནས་མང་ཚོགས་ཕྱུག་པོ་ཆགས་པར་སྐུལ་ཁྲིད་དེ་བས་ལེགས་པ་བྱེད་དགོས་ཞེས་གསུངས་པ་རེད། བརྟག་ཞིབ་གནང་རིང་། ལི་ཆང་གིས་ཕེབས་ལམ་དུ་ལྷོ་རི་བྱང་རིའི་སྔོ་འགྱུར་ལས་གྲྭར་གཟིགས་ཞིབ་གནང་ནས། ས་གནས་དེ་གའི་ལས་བྱེད་པར་ཕྱོགས་ཁག་གི་སྟོབས་ཤུགས་སྐོང་འཐེན་གང་ལེགས་ཀྱིས་ནགས་བཟོ་སྔོ་འགྱུར་ནང་རྒྱ་ཁྱབ་ངང་ཞུགས་ཏེ། སྐྱེ་ཁམས་བཟང་པོར་བརྟེན་ནས་དམངས་འཚོར་ཕན་པ་འདོགས་དགོས་པའི་སྐུལ་ལྕག་གནང་བ་རེད།

    ལི་ཆང་གིས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གྲུབ་འབྲས་ལ་ཁས་ལེན་གང་ལེགས་གནང་བ་མ་ཟད། བོད་ཀྱི་རྒྱ་ཆེའི་ལས་བྱེད་པ་དང་མང་ཚོགས་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བཀའ་མངགས་ཟབ་མོ་བློ་ལ་བརྟན་པོར་ངེས་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་བཙུགས་ཏེ། བརྟན་ལྷིང་དང་། འཕེལ་རྒྱས། སྐྱེ་ཁམས། མཐའ་སྟོབས་བཅས་ཀྱི་དོན་ཆེན་བཞིར་དམ་འཛིན་ཡག་པོ་བྱས་ནས། སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་བྱེད་རིང་གྲུབ་འབྲས་གསར་པ་རྒྱུན་ཆད་མེད་པར་ཐོབ་པར་བྱེད་དགོས་པའི་རེ་བ་བཏོན་གནང་བ་རེད།

    ཝུའུ་ཀྲེང་ལུང་བརྟག་ཞིབ་གནང་བར་ལྷན་དུ་ཕེབས་ཡོད་པ་རེད།

    འགན་འཁུར་རྩོམ་སྒྲིག་པ། ཉི་མ་ཚེ་རིང་།

འབྲེལ་ཡོད་གསར་འགྱུར།