ཚེས་22ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་ཏང་ཙུའི་ཧྲུའུ་ཅི་དང་ཀྲུའུ་རེན་ཡན་ཅིན་ཧའེ་ཡིས་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་ཏང་ཙུའུ་ཡི་2025ལོའི་ཚོགས་འདུ(རྒྱ་ཆེ)ཐེངས་བདུན་པ་གཙོ་སྐྱོང་གནང་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཉེ་དུས་ཀྱི་གསུང་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན་བརྒྱུད་བསྒྲགས་སློབ་སྦྱོང་དང་། ཏང་ཀྲུང་དབྱང་དང་རང་སྐྱོང་ལྗོངས་ཏང་ཨུད་ཀྱི་འབྲེལ་ཡོད་ཚོགས་འདུའི་དགོངས་དོན་བརྒྱུད་བསྒྲགས་སློབ་སྦྱོང་གནང་བ་མ་ཟད། ལག་བསྟར་དོན་འཁྱོལ་གྱི་ལས་དོན་བཀོད་སྒྲིག་ཀྱང་གནང་བ་རེད།

ཡན་ཅིན་ཧའེ་ཡིས་ནན་བཤད་གནང་དོན། ད་ལོ་ནི“ལོ་ལྔ་ཚན་བཅུ་བཞི་པའི”འཆར་འགོད་མཇུག་བསྡུའི་ལོ་ཡིན་ལ། “ལོ་ལྔ་ཚན་བཅོ་ལྔ་པའི”འཆར་འགོད་བཀོད་སྒྲིག་གི་ལོ་ཡང་ཡིན་པས་མི་དམངས་འཐུས་ཚོགས་ཀྱི་ལས་དོན་ཡག་པོ་སྒྲུབ་པར་ཤུགས་རྐྱེན་ཟབ་མོ་ལྡན་ཡོད། ཁྲིམས་བཟང་བཟོ་བ་དང་སྐྱོང་མཁས་ལ་སྐུལ་འདེད་བཏང་ནས་ཁྲིམས་བཞིན་བོད་སྐྱོང་གི་རྨང་གཞི་བརྟན་དུ་གཏོང་བ་དང་། ཁྲིམས་འཛུགས་ལས་དོན་ཁྲོད་ཀྱི་མི་དམངས་འཐུས་ཚོགས་ཀྱི་གཙོ་ཁྲིད་ནུས་པ་བཏོན་ཏེ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ་དང་ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་རྒྱུ་དེ་ས་གནས་རང་བཞིན་གྱི་ཁྲིམས་སྲོལ་བཟོ་བའི་སྔོན་འགྲོའི་ཞིབ་བཤེར་གྱི་ཆ་རྐྱེན་དང་ཐོ་འགོད་ཞིབ་བཤེར་གྱི་ནང་དོན་གལ་ཆེན་ལ་མཐའ་གཅིག་ཏུ་བརྩི་བ་དང་། གཙོ་གནད་ཁྱབ་ཁོངས་དང་གསར་དར་ཁྱབ་ཁོངས་ཀྱི“ནུས་ཆེ་དང་། གནད་སྨིན། སྟབས་བསྟུན”བཅས་ཀྱི་ཁྲིམས་འཛུགས་རྣམ་གྲངས་ཚན་རིག་དང་མཐུན་པའི་སྒོ་ནས་འཆར་འགོད་བྱེད་པ། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཁྲིམས་འཛུགས་ཆེད་དོན་ཚོགས་འདུའི་ལམ་ལུགས་འཚོལ་ཞིབ་བྱས་ནས་འཛུགས་པ་བཅས་བྱས་ཏེ། མི་དམངས་འཐུས་ཚོགས་ཀྱི་ཁྲིམས་འཛུགས་ལས་དོན་བརྟན་པོའི་ངང་སྤེལ་རྒྱུར་སྐུལ་འདེད་གཏོང་དགོས། ལྟ་སྐུལ་བྱེད་ཤུགས་ཆེ་རུ་གཏོང་བ་དང་སྤུས་འབྲས་ཆེ་རུ་བཏང་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རམ་འདེགས་བྱེད་པ་དང་། སྔོན་རྩིས་ཀྱི་ལས་འབྲས་དོ་དམ་སྲོལ་ཡིག་འཚོལ་ཞིབ་བྱས་ནས་བཟོ་བ། དཔལ་འབྱོར་ཁྱབ་ཁོངས་ཀྱི་བཅའ་ཁྲིམས་ཁྲིམས་སྲོལ་གྱི་ཁྲིམས་སྒྱུར་ཞིབ་བཤེར་བྱེད་པ།“གཞུང་གཅིག་དང་ཁང་གཉིས”ཀྱི་ལག་བསྟར་བྱས་ཚུལ་གྱི་ཆེད་དོན་སྙན་སྒྲོན་དང་རང་ལྗོངས་ཀྱི་གཞུང་ཁོངས་ཁེ་ལས་ཀྱི་མ་རྩའི་རིགས་ཀྱི་དོན་ཚན་གལ་ཆེན་གྱི་ཐབས་ཇུས་དོ་དམ་བྱས་ཚུལ་སྐོར་གྱི་སྙན་ཞུ་ཉན་ནས་གྲོས་ཞིབ་བྱེད་པ། ལྟ་སྐུལ་ལས་དོན་གྱི་བཙན་ཐབས་རང་བཞིན་དང་ཕན་འབྲས་ཆེ་རུ་གཏོང་བ་བཅས་བྱས་ཏེ། མི་དམངས་འཐུས་ཚོགས་ཀྱི་ལྟ་སྐུལ་གྱི་ལས་འགན་ཡག་པོ་སྒྲུབ་དགོས། འཇོན་ཐང་ཆེ་རུ་གཏོང་བ་དང་རྩ་བ་བརྟན་དུ་བཏང་ནས་ཉམས་སད་ཐེག་ཐུབ་པའི་ལས་བྱེད་པའི་དཔུང་ཁག་ཅིག་གཏོད་པ་དང་། ཡན་ལག་ཏང་ཙུའུ་ཁག་གི་ལོ་འཁོར་གྱི་ལས་ཀའི་གཙོ་གནད་དང་སློབ་སྦྱོང་འཆར་གཞི་ཚན་རིག་དང་མཐུན་པའི་ངང་བཟོ་བ། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོ་ཏན་ཏིག་སྤེལ་བ། མི་དམངས་འཐུས་ཚོགས་ཀྱི་ལས་དོན་ནང་མང་ཚོགས་ཞུགས་པའི་ལམ་སྲོལ་འཐུས་སྒོ་ཚང་དུ་གཏོང་བ། ལས་ཁུངས་ཆ་འཕྲིན་ཅན་འཛུགས་སྐྱོང་ལ་སྐུལ་འདེད་གཏོང་བ་བཅས་བྱས་ཏེ། མི་དམངས་འཐུས་ཚོགས་ཀྱི་དྲིལ་བསྒྲགས་ལས་དོན་ལ་དམ་འཛིན་ཏན་ཏིག་བྱེད་དགོས།