ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོ་གཏིང་ཟབ་དང་ཏན་ཏིག་སྤེལ་བ་དང་། ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་བྱེད་པ། རང་སྐྱོང་ལྗོངས་ཏང་ཨུད་ཀྱི་ལས་ཀའི་བླང་བྱ་དང་ཧྲུའུ་ཅི་ཝང་ཅུན་ཀྲེང་གིས་རང་སྐྱོང་ལྗོངས་ཏང་ཨུད་ཀྱི་སྲིད་ཇུས་ཞིབ་འཇུག་ཁང་གི་ལས་དོན་ཐད་བཏོན་གནང་བའི་མཛུབ་སྟོན་དང་མཆན་བཀོད་མཛུབ་སྟོན་གྱི་དགོངས་དོན་ཕྱོགས་ཡོངས་ནས་དོན་འཁྱོལ་བྱེད་པ། སྲིད་ཇུས་ཞིབ་འཇུག་ལས་བྱེད་པའི་ནུས་པ་ཆེ་རུ་དང་བྱང་ཚད་མཐོ་རུ་ཏན་ཏིག་གཏོང་བ། རྩོམ་སྲོལ་དང་སྤྱོད་ཚུལ་ལེགས་སུ་གཏོང་བར་སྐུལ་འདེད་གཏོང་བ་བཅས་བྱས་ཏེ། རྩོམ་ཡིག་བྲིས་ནས་སྲིད་དོན་ལ་གཞོགས་འདེགས་ཞུ་བ་དང་། སློབ་སྦྱོང་བྱས་ནས་འཇོན་ཐང་ཆེ་རུ་གཏོང་བ། བརྩི་བཀུར་བཅངས་ནས་བྱ་བ་སྒྲུབ་པ། བློ་རིག་ལ་བརྟེན་ནས་གསར་གཏོད་བཅས་བྱས་ནས་གཟུགས་བརྙན་གསར་པ་དང་། ཆུ་ཚད་གསར་པ། སྤྱོད་ཚུལ་གསར་པ་བཅས་མངོན་པར་བྱ་ཆེད། ཟླ་5ཚེས་11ཉིན་ནས་ཚེས་15ཉིན་བར་རང་སྐྱོང་ལྗོངས་ཏང་ཨུད་སྲིད་ཇུས་ཞིབ་འཇུག་ཁང་གིས་ལྗོངས་ཡོངས་ཀྱི་སྲིད་ཇུས་ཞིབ་འཇུག་ཁོངས་གཏོགས་ཀྱི་ལས་སྒོའི་གསོ་སྦྱོང་འཛིན་གྲྭ་གཉེར་བ་རེད། ས་ཁུལ(གྲོང་ཁྱེར)ཨུ་ལྷན་ཁག་གི་སྲིད་ཇུས་ཞིབ་འཇུག་ཁང(སྒྱུར་བཅོས་གཞུང་དོན་ཁང་དང་། ནོར་དཔལ་གཞུང་དོན་ཁང་། ཏང་འཛུགས་སྐྱོང་གཞུང་དོན་ཁང)དང་རང་སྐྱོང་ལྗོངས(ཀྲུང་དབྱང)ཐད་གཏོགས་ཚན་པའི་རྩོམ་ཡིག་ལས་ཀའི་འགན་འཁུར་བློ་མཐུན་དང་དེ་བཞིན་སྲིད་ཇུས་ཞིབ་འཇུག་ཁང་གི་ལས་གནས་སུ་ཡོད་པའི་བློ་མཐུན་བསྡོམས་140ལྷག་ཙམ་གསོ་སྦྱོང་ནང་ཞུགས་ཡོད།

འཛིན་གྲྭ་འཚོགས་པའི་མཛད་སྒོའི་ཐོག་རང་སྐྱོང་ལྗོངས་ཏང་ཨུད་སྲིད་ཇུས་ཞིབ་འཇུག་ཁང་གི་ཀྲུའུ་རེན་སུན་ཤང་ཅུན་གྱིས། རྩོམ་སྲོལ་ནི་ཏང་སྲོལ་དང་སྲིད་སྲོལ་གྱི་གཅིག་བསྡུས་མཚོན་ཚུལ་ཞིག་ཡིན་པ་དང་རྩོམ་སྲོལ་དང་སྤྱོད་ཚུལ་ལེགས་སུ་གཏོང་བ་ནི་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོ་གཏིང་ཟབ་དང་ཏན་ཏིག་ཡོང་བའི་བྱེད་ཐབས་གལ་ཆེན་ཞིག་རེད། མིག་སྔའི་རྩོམ་སྲོལ་ཁྲོད་གནས་པའི་མངོན་གསལ་དོད་པའི་གནད་དོན་ལ་དམིགས་ནས། འཆར་ཟིན་འགོད་པའི་སྐབས“ཁ་གསལ་བརྒྱད”ཐུབ་པར་བྱེད་དགོས་ཤིང་། རྩོམ་གྱི་རིགས་དང་། བླང་བྱ། ཚིག་སྦྱོར། གླེང་ཡུལ། ཐོབ་ཐང་། སྐབས་དོན། ཞིབ་ཕྲ་དང་མདོར་བསྡུས། ཉམས་འགྱུར་བཅས་ཁ་གསལ་པོ་དགོས་པ་དང་།“གོ་རིམ་བདུན”ཏེ་བླང་བྱ་ཁ་གསལ་དང་། དཔྱད་ཡིག་འཚོལ་བསྡུ། བརྟག་དཔྱད་ཞིབ་འཇུག རྩ་གནད་བཟོ་བ། རྩོམ་འབྲི་བ། བསམ་འཆར་བསྡུ་ལེན། བཟོ་བཅོས་འཐུས་ཚང་བཅས་བྱས་ཏེ། ནུས་ཤུགས་ཡོད་རྒུས་རྩོམ་འབྲིའི་ནུས་པའི་ཆུ་ཚད་མཐོ་རུ་གཏོང་བ་དང་། རྩོམ་སྲོལ་ལེགས་སུ་གཏོང་བ། “སྙིང་བསྡུས་ཞིབ་སྦྱང་དང་། དངོས་འབྲེལ་དངོས་སྒྲུབ། གསར་གཏོད་གཏིང་ཟབ”བཅས་ཀྱི་རྩོམ་སྲོལ་དར་སྤེལ་ཤུགས་ཆེན་བཏང་ནས་ལྗོངས་ཡོངས་ཀྱི་སྲིད་ཇུས་ཞིབ་འཇུག་ཁོངས་གཏོགས་ཀྱི་རྩོམ་ཡིག་འཆར་ཟིན་འགོད་པའི་རླུང་ཕྱོགས་སྟོན་རྟགས་ཀྱི་ནུས་པ་དངོས་སུ་འདོན་དགོས་ཞེས་བརྗོད་པ་རེད།