(2001ལོའི་ཟླ་5ཚེས་21ཉིན་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བདུན་པའི་ཚོགས་འདུ་ཐེངས་བཞི་པའི་ཐོག་གྲོས་འཆམ་བྱུང་བ་དང་། 2017ལོའི་ཟླ་1ཚེས་15ཉིན་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བཅུ་པའི་ཚོགས་འདུ་ཐེངས་ལྔ་པའི་ཐོག་བསྐྱར་བཅོས་བྱས། 2024ལོའི་ཟླ་9ཚེས་26ཉིན་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་བཅུ་གཉིས་པའི་ཐོག 《བོད་རང་སྐྱོང་ལྗོངས་ཀྱི་ཁྲིམས་བཟོའི་སྲོལ་ཡིག》ལ་བཟོ་བཅོས་རྒྱག་རྒྱུའི་སྐོར་གྱི་གཏན་འབེབས་གཞིར་བཟུང་དག་བཅོས་བྱས)

དཀར་ཆག

ལེའུ་དང་པོ། སྤྱིའི་རྩ་དོན།

ལེའུ་གཉིས་པ། ཁྲིམས་བཟོའི་དབང་ཚད།

ལེའུ་གསུམ་པ། ཁྲིམས་བཟོའི་འཆར་འགོད་དང་། ཁྲིམས་བཟོའི་འཆར་གཞི། ཁྲིམས་སྲོལ་གྱི་འཆར་ཟིན་བཅས་ཟིན་འགོད།

ལེའུ་བཞི་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཁྲིམས་བཟོའི་གོ་རིམ།

ལེའུ་ལྔ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཁྲིམས་བཟོའི་གོ་རིམ།

ལེའུ་དྲུག་པ། ཆུས་བཙུགས་པའི་གྲོང་ཁྱེར་གྱི་ས་གནས་རང་བཞིན་གྱི་ཁྲིམས་སྲོལ་ལ་ཆོག་མཆན་འགོད་རིམ།

ལེའུ་བདུན་པ། ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ཀྱི་འགྲེལ་བཤད།

ལེའུ་བརྒྱད་པ། དེ་མིན་གྱི་གཏན་འབེབས།

ལེའུ་དགུ་པ། ཞར་བྱུང་དོན་ཚན།

བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་སྤྱི་བསྒྲགས།

〔2024〕ཡིག་ཨང་13པ།

《〈བོད་རང་སྐྱོང་ལྗོངས་ཀྱི་ཁྲིམས་བཟོའི་སྲོལ་ཡིག〉ལ་བཟོ་བཅོས་རྒྱག་རྒྱུའི་སྐོར་གྱི་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཆོད་དོན》འདི་2024ལོའི་ཟླ་9ཚེས་26ཉིན་གྱི་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་བཅུ་གཉིས་པའི་ཐོག་གྲོས་ཞིབ་བྱས་ནས་གྲོས་འཆམ་བྱུང་དོན་བཞིན། ད་ལྟ་ཁྱབ་བསྒྲགས་བྱ་རྒྱུ་ཡིན་ཞིང་། 2024ལོའི་ཟླ་10ཚེས་1ཉིན་ནས་བཟུང་ལག་བསྟར་བྱེད་ཆེད་དམིགས་སུ་སྤྱི་བསྒྲགས་འདི་སྤེལ་བ་ཡིན།

བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ནས།

2024ལོའི་ཟླ་9ཚེས་26ལ།

ལེའུ་དང་པོ། སྤྱིའི་རྩ་དོན།

དོན་ཚན་དང་པོ། ཁྲིམས་བཟོའི་བྱེད་སྒོ་ཚད་ལྡན་དང་ཁྲིམས་བཟོའི་གོ་རིམ་འཐུས་ཚང་དུ་བཏང་ནས་ཁྲིམས་བཟོའི་སྤུས་ཚད་མཐོ་རུ་གཏོང་བ་དང་། ཁྲིམས་བཟོ་རྒྱུར་ཁྲིད་སྟོན་དང་སྐུལ་སྤེལ་གཏོང་བའི་ནུས་པ་འདོན་སྤེལ་བྱས་ཏེ། ཁྲིམས་བཞིན་བོད་ལྗོངས་སྐྱོང་བར་ཕྱོགས་ཡོངས་ནས་སྐུལ་འདེད་གཏོང་ཆེད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས》དང་། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁྲིམས་བཟོའི་བཅའ་ཁྲིམས》《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་ས་ཁོངས་རང་སྐྱོང་བཅའ་ཁྲིམས》བཅས་གཞིར་བཟུང་རང་སྐྱོང་ལྗོངས་ཀྱི་དོན་དངོས་དང་ཟུང་འབྲེལ་གྱིས་སྲོལ་ཡིག་འདི་བཟོས་པ་ཡིན།

དོན་ཚན་གཉིས་པ། རང་སྐྱོང་ལྗོངས་ཀྱི་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་བཟོ་འབེབས་དང་། བཟོ་བཅོས། མེད་པར་བཟོ་བ། འགྲེལ་བཤད་བཅས་བྱ་རྒྱུ་དང་། དེ་བཞིན་ཆུས་བཙུགས་པའི་གྲོང་ཁྱེར་གྱིས་བཟོས་པའི་ས་གནས་རང་བཞིན་གྱི་ཁྲིམས་སྲོལ་ལ་ཆོག་མཆན་སྤྲོད་པར་སྲོལ་ཡིག་འདི་སྤྱད་ན་འཐུས།

ཆུས་བཙུགས་པའི་གྲོང་ཁྱེར་གྱི་ས་གནས་རང་བཞིན་གྱི་ཁྲིམས་སྲོལ་བཟོ་འབེབས་དང་། བཟོ་བཅོས། མེད་པར་བཟོ་བ། འགྲེལ་བཤད་བཅས་བྱེད་སྐབས། སྲོལ་ཡིག་འདིའི་འབྲེལ་ཡོད་གཏན་འབེབས་དཔྱད་གཞིར་བཟུང་ཆོག

དོན་ཚན་གསུམ་པ། ཁྲིམས་བཟོ་སྐབས་ངེས་པར་དུ་ཀྲུང་གོ་གུང་ཁྲན་ཏང་གི་འགོ་ཁྲིད་མཐའ་འཁྱོངས་ཀྱིས་མར་ཁེ་སི་ལེ་ཉིང་རིང་ལུགས་དང་། མའོ་ཙེ་ཏུང་གི་དགོངས་པ། ཏེང་ཞའོ་ཕིང་གི་རིགས་པའི་གཞུང་ལུགས། “མཚོན་བྱེད་གསུམ”གྱི་དགོངས་པ་གལ་ཆེན། ཚན་རིག་དང་མཐུན་པའི་གོང་འཕེལ་ལྟ་བ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་བཅས་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱས་ཏེ། དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་ལེན་བསྟར་ནས“དོན་ཆེན་བཞིར”དམིགས་པ་དང་“འཛུགས་གཏོད་བཞིར”ནུས་ཤུགས་གཅིག་ཏུ་བསྒྲིལ་ཏེ། བོད་ལྗོངས་ཡུན་རིང་བདེ་འཁོད་དང་སྤུས་ཚད་མཐོ་བའི་གོང་འཕེལ་འགྲོ་བར་ཁྲིམས་སྐྱོང་གི་ཐོག་ནས་འགན་སྲུང་བྱེད་དགོས།

དོན་ཚན་བཞི་པ། ཁྲིམས་བཟོ་སྐབས་ངེས་པར་དུ་ཚན་རིག་དང་མཐུན་པའི་ཁྲིམས་བཟོ་དང་། དམངས་གཙོའི་ཁྲིམས་བཟོ། ཁྲིམས་ལྟར་ཁྲིམས་བཟོ་བཅས་མཐའ་འཁྱོངས་བྱས་ཏེ། ས་གནས་རང་བཞིན་གྱི་ཁྲིམས་སྲོལ་བཟོ་འབེབས་དང་། བཟོ་བཅོས། མེད་པར་བཟོ་བ། འགྲེལ་བཤད་རྒྱག་པ་སོགས་ཀྱི་ཐོག་ནས་ས་གནས་རང་བཞིན་གྱི་ཁྲིམས་སྲོལ་ལག་བསྟར་བྱེད་པའི་རང་བཞིན་དང་། ཁ་གསབ་རང་བཞིན། འཚོལ་ཞིབ་རང་བཞིན་བཅས་ཀྱི་ནུས་པ་འདོན་སྤེལ་དང་། ཁྲིམས་བཟོའི་མ་ལག་རང་བཞིན་དང་། སྤྱི་ཡོངས་རང་བཞིན། མཉམ་སྡེབ་རང་བཞིན། དུས་ཆོད་རང་བཞིན་བཅས་ཆེ་རུ་གཏོང་དགོས།

དོན་ཚན་ལྔ་པ། ཁྲིམས་བཟོ་སྐབས་ངེས་པར་དུ་རྩ་ཁྲིམས་ཀྱི་གཏན་འབེབས་དང་། རྩ་དོན། དགོངས་དོན་བཅས་དང་མཐུན་དགོས་པ་དང་། ཁྲིམས་བཀོད་དབང་ཚད་དང་གོ་རིམ་ལྟར་རྒྱལ་ཁབ་སྤྱི་ཡོངས་ཀྱི་ཁེ་ཕན་ལ་དམིགས་ཏེ། སྤྱི་ཚོགས་རིང་ལུགས་ཁྲིམས་ལུགས་ཀྱི་གཅིག་གྱུར་དང་། ལ་རྒྱ། དབང་གྲགས་བཅས་ལ་སྲུང་སྐྱོང་བྱེད་དགོས།

ཁྲིམས་བཟོ་སྐབས་ངེས་པར་དུ་དཔལ་འབྱོར་འཛུགས་སྐྲུན་ལྟེ་བར་འཛིན་རྒྱུ་མཐའ་འཁྱོངས་དང་བསྒྱུར་བཅོས་སྒོ་དབྱེ་མཐའ་འཁྱོངས་ཀྱིས་གོང་འཕེལ་གྱི་འདུ་ཤེས་གསར་པ་ལག་བསྟར་བྱེད་པ་དང་། དཔལ་འབྱོར་དང་སྤྱི་ཚོགས་གོང་འཕེལ་གཏོང་བའི་བླང་བྱ་དང་འཚམ་དགོས་ལ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་པར་འགན་སྲུང་བྱེད་དགོས།

ས་གནས་རང་བཞིན་གྱི་ཁྲིམས་སྲོལ་ཚད་ལྡན་བཟོ་སྐབས་ངེས་པར་དུ་ས་གནས་ཀྱི་ཁྱད་ཆོས་མངོན་དགོས་པ་དང་། ཁ་གསལ་ཞིབ་ཕྲ་དང་དོན་གཉེར་གོ་ཆོད་ཡིན་པ། དམིགས་བཀར་རང་བཞིན་དང་ལག་ལེན་བསྟར་འཐུས་ཀྱི་རང་བཞིན་ལྡན་དགོས། གོང་ཁྲིམས་ནང་གཏན་འབེབས་གསལ་པོ་བྱས་པའི་ནང་དོན་རིགས་ལ་སྤྱིར་བསྐྱར་དུ་གཏན་འབེབས་བཟོ་མི་དགོས།

དོན་ཚན་དྲུག་པ། ཁྲིམས་བཟོ་སྐབས་ངེས་པར་དུ་མི་དམངས་ཀྱི་འདོད་བློ་མཚོན་དགོས་པ་དང་། བརྒྱུད་རིམ་ཧྲིལ་པོའི་མི་དམངས་དམངས་གཙོ་མཐའ་འཁྱོངས་དང་གོང་འཕེལ་གཏོང་བ། བརྟག་དཔྱད་ཞིབ་འཇུག་བྱེད་པར་ཤུགས་སྣོན་རྒྱག་པ། བསམ་འཆར་རྒྱ་ཁྱབ་ཏུ་ཉན་པ་བཅས་བྱ་རྒྱུ་མ་ཟད། མི་དམངས་མང་ཚོགས་ཀྱིས་ཐབས་ལམ་སྣ་མང་བརྒྱུད་ཁྲིམས་བཟོའི་བྱེད་སྒོའི་ནང་ཞུགས་པར་འགན་ལེན་བྱེད་དགོས།

ཁྲིམས་བཟོ་སྐབས་ངེས་པར་དུ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུ་གཙོ་གནད་དུ་བཟུང་ཞིང་། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དར་སྤེལ་བཏང་སྟེ། རྒྱལ་ཁབ་གཅིག་གྱུར་དང་། མི་རིགས་མཐུན་སྒྲིལ། སྤྱི་ཚོགས་བརྟན་ལྷིང་བཅས་ཡོང་བར་སྲུང་སྐྱོང་བྱེད་དགོས།

དོན་ཚན་བདུན་པ། ཁྲིམས་བཟོ་སྐབས་ངེས་པར་དུ་ཏང་ཨུད་ཀྱིས་འགོ་ཁྲིད་བྱེད་པ་དང་། མི་དམངས་འཐུས་ཚོགས་ཀྱིས་གཙོ་ཁྲིད་བྱེད་པ། སྲིད་གཞུང་ལ་བརྟེན་པ། ཕྱོགས་ཁག་གིས་ཐེ་ཞུགས་བྱེད་པ་བཅས་ཀྱི་ཁྲིམས་བཟོའི་ལས་རྣམ་མཐའ་འཁྱོངས་དང་འཐུས་ཚང་དུ་གཏོང་དགོས།

རང་སྐྱོང་ལྗོངས་མི་དམངས་འཐུས་མི་ཚོགས་ཆེན་དང་དེའི་རྒྱུན་ལས་ཨུ་ཡོན་ལྷན་ཁང་གིས་ངེས་པར་དུ་ཁྲིམས་བཟོའི་ལས་དོན་ཁྲོད་ཀྱི་གཙོ་ཁྲིད་ནུས་པ་འདོན་སྤེལ་བྱས་ཏེ། ཁྲིམས་བཟོའི་ལས་དོན་སྒྲིག་འཛུགས་དང་མཐུན་སྦྱོར་བྱེད་པར་ཤུགས་སྣོན་རྒྱག་དགོས།

ལེའུ་གཉིས་པ། ཁྲིམས་བཟོའི་དབང་ཚད།

དོན་ཚན་བརྒྱད་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱིས་གཤམ་གསལ་དོན་གནད་ཁག་ལ་ས་གནས་རང་བཞིན་གྱི་ཁྲིམས་སྲོལ་བཟོ་ཆོག་པ་སྟེ།

(གཅིག) རང་སྐྱོང་ལྗོངས་ཀྱི་གལ་འགངས་ཆེ་བའི་དོན་གནད་གཏན་འབེབས་བྱེད་དགོས་རིགས་དང་།

(གཉིས) རང་སྐྱོང་ལྗོངས་མི་དམངས་འཐུས་མི་ཚོགས་ཆེན་དང་དེའི་རྒྱུན་ལས་ཨུ་ཡོན་ལྷན་ཁང་གི་ཁྲིམས་བཟོའི་གོ་རིམ་གཏན་འབེབས་བྱེད་དགོས་རིགས།

(གསུམ) རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཁྲིམས་བཅད་འགན་འཁྲི་དང་དོན་གྲོས་གོ་རིམ་ལ་གཏན་འབེབས་ཞིབ་ཕྲ་བཟོ་དགོས་རིགས།

(བཞི) དེ་མིན་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱིས་ངེས་པར་དུ་ས་གནས་རང་བཞིན་གྱི་ཁྲིམས་སྲོལ་བཟོ་དགོས་རིགས་བཅས་སོ།

དོན་ཚན་དགུ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་གཤམ་གསལ་དོན་གནད་རིགས་ལ་ས་གནས་རང་བཞིན་གྱི་ཁྲིམས་སྲོལ་བཟོ་ཆོག་པ་སྟེ།

(གཅིག) བཅའ་ཁྲིམས་དང་སྲིད་འཛིན་ཁྲིམས་སྲོལ་ལག་བསྟར་བྱེད་པར་ས་གནས་རང་བཞིན་གྱི་ཁྲིམས་སྲོལ་ཐོག་ནས་གཏན་འབེབས་ཞིབ་ཕྲ་བཟོ་དགོས་རིགས་དང་།

(གཉིས) ས་གནས་ལས་དོན་གཏོགས་ཁོངས་ལ་ས་གནས་རང་བཞིན་གྱི་ཁྲིམས་སྲོལ་བཟོ་དགོས་རིགས།

(གསུམ) རྒྱལ་ཁབ་ཆེད་གཏོགས་ཀྱི་ཁྲིམས་བཟོའི་དབང་ཚད་ཕུད། བཅའ་ཁྲིམས་དང་སྲིད་འཛིན་ཁྲིམས་སྲོལ་ད་དུང་བཟོས་མེད་རིགས།

(བཞི) བཅའ་ཁྲིམས་ཀྱི་དབང་ཆ་ཐོབ་དོན་བཞིན་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་གཏན་འབེབས་བྱེད་དགོས་རིགས།

(ལྔ) རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་འགན་དབང་ཁོངས་སུ་གཏོགས་པའི་དོན་གནད་གཞན་དག་རིགས་བཅས་སོ།

རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྲོལ་རིང་། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ནས་བཟོས་པའི་ས་གནས་རང་བཞིན་གྱི་ཁྲིམས་སྲོལ་ལ་ཁ་གསབ་དང་བཟོ་བཅོས་འགའ་ཞིག་བརྒྱབ་ཆོག འོན་ཀྱང་ཁྲིམས་སྲོལ་དེའི་གཞི་རྩའི་རྩ་དོན་དང་རྒྱབ་འགལ་མི་འགྲོ་བ་བྱེད་དགོས།

དོན་ཚན་བཅུ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱིས་རང་སྐྱོང་ལྗོངས་ཀྱི་ཆབ་སྲིད་དང་། དཔལ་འབྱོར། རིག་གནས་བཅས་ཀྱི་ཁྱད་ཆོས་ལ་གཞིགས་ནས་རང་སྐྱོང་སྲོལ་ཡིག་དང་ཁེར་སྤྱོད་སྲོལ་ཡིག་བཟོ་ཆོག རང་སྐྱོང་སྲོལ་ཡིག་དང་ཁེར་སྤྱོད་སྲོལ་ཡིག་དེ་རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་ཕུལ་ནས་ཆོག་མཆན་ཐོབ་རྗེས་གཞི་ནས་རྩིས་འགྲོ་ཡོད།

རང་སྐྱོང་སྲོལ་ཡིག་དང་ཁེར་སྤྱོད་སྲོལ་ཡིག་ལ་བཟོ་བཅོས་རྒྱག་དབང་དང་མེད་པར་བཟོ་དབང་དེ་ཐོག་མའི་བཟོ་འབེབས་བྱེད་མཁན་ལས་ཁུངས་ལ་ཡོད།

ལེའུ་གསུམ་པ། ཁྲིམས་བཟོའི་འཆར་འགོད་དང་། ཁྲིམས་བཟོའི་འཆར་གཞི། ཁྲིམས་སྲོལ་གྱི་འཆར་ཟིན་བཅས་ཟིན་འགོད།

དོན་ཚན་བཅུ་གཅིག་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་ངེས་པར་དུ་རང་སྐྱོང་ལྗོངས་ཀྱི་དཔལ་འབྱོར་སྤྱི་ཚོགས་གོང་འཕེལ་གཏོང་བ་དང་དམངས་གཙོའི་ཁྲིམས་སྐྱོང་འཛུགས་སྤེལ་བྱེད་པའི་དགོས་མཁོར་གཞིགས་ནས་ཁྲིམས་བཟོའི་འཆར་འགོད་དང་ཁྲིམས་བཟོའི་འཆར་གཞི་བཟོ་དགོས།

ཆུས་བཙུགས་པའི་གྲོང་ཁྱེར་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་ཁྲིམས་བཟོའི་འཆར་འགོད་དང་ཁྲིམས་བཟོའི་འཆར་གཞི་བཟོ་སྐབས་ངེས་པར་དུ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་བསམ་འཆར་བསྡུ་ལེན་བྱེད་དགོས།

དོན་ཚན་བཅུ་གཉིས་པ། ཁྲིམས་བཟོའི་འཆར་འགོད་དང་ཁྲིམས་བཟོའི་འཆར་གཞི་བཟོ་སྐབས་ཁྲིམས་བཟོའི་གྲོས་འཆར་གྱི་རྣམ་གྲངས་ཡོང་ཁུངས་སུ།

(གཅིག) རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་འཐུས་མིས་བཏོན་པའི་གྲོས་གཞི་དང་གྲོས་འཆར་རིགས་དང་།

(གཉིས) ས་གནས་རང་བཞིན་གྱི་ཁྲིམས་སྲོལ་གྱི་གྲོས་གཞི་འདོན་དབང་ཡོད་པའི་ལས་ཁུངས་ཀྱིས་བཏོན་པའི་ཁྲིམས་བཟོའི་གྲོས་འཆར་གྱི་རྣམ་གྲངས་རིགས།

(གསུམ) སྤྱི་ཚོགས་ཐོག་ཡོངས་བསྒྲགས་སུ་བསྡུ་ལེན་བྱས་པའི་ཁྲིམས་བཟོའི་གྲོས་འཆར་གྱི་རྣམ་གྲངས་རིགས།

(བཞི) ཁྲིམས་བཟོས་རྗེས་ཀྱི་ཚོད་སྐོར་དང་ཁྲིམས་སྒྱུར་ཞིབ་བཤེར་བྱེད་པའི་ཁྲོད་བཏོན་པའི་གནད་དོན་མང་ས་དང་། བཟོ་བཅོས་རྒྱག་དགོས་ངེས་ཡིན་པའམ་ཡང་ན་མེད་པར་བཟོ་དགོས་ངེས་ཡིན་པའི་རྣམ་གྲངས་རིགས།

(ལྔ) ཁྲིམས་བཟོ་དགོས་རིགས་ཀྱི་རྣམ་གྲངས་གཞན་དག་བཅས་ཚུད་ཡོད།

ཁྲིམས་བཟོའི་གྲོས་འཆར་གྱི་རྣམ་གྲངས་ཡིན་ཕྱིན་ངེས་པར་དུ་ཡིག་ཐོག་ཡིན་དགོས་པ་དང་། ནང་དོན་གཙོ་བོར་ཁྲིམས་བཟོའི་རྣམ་གྲངས་ཀྱི་མིང་དང་། ཁྲིམས་བཟོའི་དགོས་ངེས་རང་བཞིན་དང་ལག་ལེན་བསྟར་འཐུས་རང་བཞིན། ཁྲིམས་བཟོའི་གཞི་འཛིན་ས། དེ་བཞིན་ཐག་གཅོད་དགོས་པའི་གནད་དོན་གཙོ་བོ་སོགས་ཚུད་ཡོད།

དོན་ཚན་བཅུ་གསུམ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཁྲིམས་བཟོའི་འཆར་འགོད་དང་ཁྲིམས་བཟོའི་འཆར་གཞིའི་ནང་འཇུག་རྩིས་ཡོད་པའི་ཁྲིམས་བཟོའི་གྲོས་འཆར་གྱི་རྣམ་གྲངས་ཡིན་ཕྱིན་ངེས་པར་དུ་རིགས་སྒྲུབ་ཁུངས་སྐྱེལ་བྱེད་དགོས།

ཁྲིམས་བཟོའི་གྲོས་འཆར་གྱི་རྣམ་གྲངས་ལ་རིགས་སྒྲུབ་ཁུངས་སྐྱེལ་བྱེད་སྐབས། འབྲེལ་ཡོད་ཁྱབ་ཁོངས་ཀྱི་རིགས་གཅིག་མཁས་དབང་དང་། དངོས་སུ་ལས་དོན་སྒྲུབ་མཁན། མི་དམངས་འཐུས་མི་ཚོགས་ཆེན་གྱི་འཐུས་མི། དེ་བཞིན་འབྲེལ་ཡོད་ཚན་པའི་འགན་འཁུར་བ་བཅས་གདན་འདྲེན་ཞུ་ཆོག

དོན་ཚན་བཅུ་བཞི་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ཁྲིམས་ལུགས་ལས་དོན་ཨུ་ཡོན་ལྷན་ཁང་གིས་ངེས་པར་དུ་རྣམ་གྲངས་ཁོངས་སུ་འཇུག་པར་རིགས་སྒྲུབ་ཁུངས་སྐྱེལ་བྱས་ཚུལ་ལ་གཞིགས་ཏེ། ཁྲིམས་བཟོའི་འཆར་འགོད་ཀྱི་འཆར་ཟིན་དང་ཁྲིམས་བཟོའི་འཆར་གཞིའི་འཆར་ཟིན་བཟོས་ནས། རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཚོགས་འདུར་གྲོས་ཞིབ་ཀྱིས་གྲོས་འཆམ་གནང་རོགས་ཞུ་དགོས།

དོན་ཚན་བཅོ་ལྔ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཆེད་དོན་ཨུ་ཡོན་ལྷན་ཁང་དང་། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པ། རང་སྐྱོང་ལྗོངས་མི་དམངས་སྲིད་གཞུང་དང་དེའི་འབྲེལ་ཡོད་སྡེ་ཚན། མི་དམངས་ཚོགས་པ། སྤྱི་ཚོགས་རྩ་འཛུགས་བཅས་ཀྱིས་ངེས་པར་དུ་ཁྲིམས་བཟོའི་འཆར་འགོད་དང་ཁྲིམས་བཟོའི་འཆར་གཞི་ལག་བསྟར་སྒྲིག་འཛུགས་བྱེད་དགོས།

ཁྲིམས་བཟོའི་འཆར་འགོད་དང་ཁྲིམས་བཟོའི་འཆར་གཞིའི་ནང་བཅུག་པའི་ཁྲིམས་བཟོའི་རྣམ་གྲངས་རིགས་དུས་ཐོག་ཏུ་གྲོས་ཞིབ་བྱ་རྒྱུར་ཕུལ་མ་ཐུབ་ཚེ། གྲོས་གཞི་འདོན་མཁན་གྱིས་ངེས་པར་དུ་ཀྲུའུ་རེན་ཚོགས་འདུར་སྙན་སེང་ཞུ་དགོས་པ་མ་ཟད་གནས་ཚུལ་གསལ་བཤད་རྒྱག་དགོས།

དོན་ཚན་བཅུ་དྲུག་པ། ཁྲིམས་བཟོའི་འཆར་འགོད་དང་ཁྲིམས་བཟོའི་འཆར་གཞི་ལག་བསྟར་བྱེད་རིང་ལེགས་སྒྲིག་འོས་འཚམ་བྱེད་དགོས་རིགས། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ཁྲིམས་ལུགས་ལས་དོན་ཨུ་ཡོན་ལྷན་ཁང་གིས་ཆེད་དོན་ཨུ་ཡོན་ལྷན་ཁང་དང་འབྲེལ་ཡོད་ཕྱོགས་ཁག་གི་གྲོས་འཆར་གཞིར་བཟུང་། ཇུས་གཞི་བཟོས་ཏེ་ཀྲུའུ་རེན་ཚོགས་འདུར་ཕུལ་རྗེས་ཞིབ་བཤེར་གཏན་འབེབས་བྱེད་དགོས།

དོན་ཚན་བཅུ་བདུན་པ། རང་སྐྱོང་ལྗོངས་མི་དམངས་སྲིད་གཞུང་གིས་ལོ་འཁོར་མོའི་ཁྲིམས་བཟོའི་འཆར་གཞི་བཟོ་སྐབས། ངེས་པར་དུ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཁྲིམས་བཟོའི་འཆར་འགོད་དང་ཕན་ཚུན་ཟུང་འབྲེལ་བྱེད་དགོས།

རང་སྐྱོང་ལྗོངས་མི་དམངས་སྲིད་གཞུང་གི་ལོ་འཁོར་རྗེས་མའི་ཁྲིམས་བཟོའི་འཆར་གཞིའི་ནང་འཇུག་རྩིས་ཡོད་པའི་ཁྲིམས་བཟོའི་རྣམ་གྲངས་རིགས་ངེས་པར་དུ་ལོ་རེའི་ལོ་མཇུག་གོང་ཡིག་ཐོག་ནས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་འབུལ་དགོས།

རང་སྐྱོང་ལྗོངས་མི་དམངས་སྲིད་གཞུང་གི་ལོ་འཁོར་གྱི་ཁྲིམས་བཟོའི་འཆར་གཞིར་གྲོས་འཆམ་བྱུང་རྗེས་ངེས་པར་དུ་འཕྲལ་མར་ཡིག་ཐོག་ནས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་འབུལ་དགོས།

དོན་ཚན་བཅོ་བརྒྱད་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ནམ་ཡང་ན་རྒྱུན་ལས་ཨུ་ཡོན་ལྷན་ཁང་ལ་ཁྲིམས་སྲོལ་གྲོས་གཞི་འདོན་སྐབས། གྲོས་གཞི་འདོན་མཁན་གྱིས་ཁྲིམས་སྲོལ་འཆར་ཟིན་ཟིན་འགོད་སྒྲིག་འཛུགས་བྱེད་དགོས།

ཁྲིམས་སྲོལ་འཆར་ཟིན་ཟིན་འགོད་བྱེད་མཁན་ཚན་པས་ངེས་པར་དུ་རང་འགུལ་ངང་འབྲེལ་ཡོད་ཆེད་དོན་ཨུ་ཡོན་ལྷན་ཁང་དང་རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པར་ཟིན་འགོད་བྱས་ཚུལ་སྙན་སེང་ཞུ་དགོས། འབྲེལ་ཡོད་ཆེད་དོན་ཨུ་ཡོན་ལྷན་ཁང་དང་རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པས་ངེས་པར་དུ་ཁྲིམས་སྲོལ་འཆར་ཟིན་ཟིན་འགོད་བྱེད་པའི་ནང་སྔོན་ནས་ཐེ་ཞུགས་བྱས་ཏེ་གནས་ཚུལ་ཤེས་རྟོགས་དང་བསམ་འཆར་འདོན་དགོས།

ཕྱོགས་བསྡུས་རང་བཞིན་དང་། ཁྱོན་ཡོངས་རང་བཞིན། རྨང་གཞིའི་རང་བཞིན་བཅས་ལྡན་པའི་ཁྲིམས་སྲོལ་འཆར་ཟིན་གལ་ཆེན་རིགས་ཟིན་འགོད་བྱེད་དགོས་ཚེ། འབྲེལ་ཡོད་ཆེད་དོན་ཨུ་ཡོན་ལྷན་ཁང་ངམ་ཡང་ན་རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པས་ཟིན་འགོད་སྒྲིག་འཛུགས་བྱས་ན་ཆོག ཆེད་ལས་རང་བཞིན་ཆེ་ཙམ་ལྡན་པའི་ཁྲིམས་སྲོལ་འཆར་ཟིན་རིགས་ཟིན་འགོད་བྱེད་དགོས་ཚེ། འབྲེལ་ཡོད་རིགས་གཅིག་མཁས་དབང་དང་། སློབ་ཁྲིད་ཚན་ཞིབ་ཚན་པ། སྤྱི་ཚོགས་རྩ་འཛུགས་བཅས་སྒྲིག་འཛུགས་བྱེད་པའམ་ཡང་ན་དེ་དག་མངགས་བཅོལ་གྱིས་ཟིན་འགོད་བྱས་ན་ཆོག

ལེའུ་བཞི་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཁྲིམས་བཟོའི་གོ་རིམ།

དོན་ཚན་བཅུ་དགུ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཀྲུའུ་ཞི་ཚོགས་པས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ལ་ཁྲིམས་སྲོལ་གྱི་གྲོས་གཞི་འདོན་ཆོག་པ་དང་། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཚོགས་འདུར་གྲོས་ཞིབ་བྱེད་དགོས།

རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་དང་། རང་སྐྱོང་ལྗོངས་མི་དམངས་སྲིད་གཞུང་། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཆེད་དོན་ཨུ་ཡོན་ལྷན་ཁང་བཅས་ཀྱིས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ལ་ཁྲིམས་སྲོལ་གྱི་གྲོས་གཞི་འདོན་ཆོག་པ་དང་། ཀྲུའུ་ཞི་ཚོགས་པས་ཚོགས་འདུའི་གྲོས་རིམ་ནང་འཇུག་དགོས་མིན་གཏན་འཁེལ་བྱེད་དགོས།

དོན་ཚན་ཉི་ཤུ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་འཐུས་མི་བཅུ་ཡན་གྱིས་མིང་མཉམ་བཀོད་ཐོག་ནས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ལ་ཁྲིམས་སྲོལ་གྱི་གྲོས་གཞི་འདོན་ཆོག་པ་དང་། ཀྲུའུ་ཞི་ཚོགས་པས་ཚོགས་ཆེན་གྱི་གྲོས་རིམ་ནང་འཇུག་དགོས་མིན་གཏན་འཁེལ་བྱས་ཆོག ཡང་ན་སྔོན་ལ་འབྲེལ་ཡོད་ཆེད་དོན་ཨུ་ཡོན་ལྷན་ཁང་ལ་གྲོས་ཞིབ་བྱ་རྒྱུར་སྤྲད་དེ་ཚོགས་ཆེན་གྱི་གྲོས་རིམ་ནང་འཇུག་དགོས་མིན་བསམ་འཆར་འདོན་དགོས་པ་དང་། དེ་རྗེས་ཀྲུའུ་ཞི་ཚོགས་པས་ཚོགས་ཆེན་གྱི་གྲོས་རིམ་ནང་འཇུག་དགོས་མིན་གཏན་འཁེལ་བྱེད་དགོས། ཚོགས་ཆེན་གྱི་གྲོས་རིམ་ནང་བཅུག་མེད་ཚེ། ངེས་པར་དུ་ཚོགས་ཆེན་ལ་སྙན་སེང་ཞུ་བའམ་ཡང་ན་གྲོས་གཞི་འདོན་མཁན་ལ་གསལ་བཤད་རྒྱག་དགོས།

ཆེད་དོན་ཨུ་ཡོན་ལྷན་ཁང་གིས་གྲོས་ཞིབ་བྱེད་སྐབས། གྲོས་གཞི་འདོན་མི་ཚོགས་འདུར་གདན་འདྲེན་ཞུས་ནས་བསམ་འཆར་བཤད་ཆོག

དོན་ཚན་ཉེར་གཅིག་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ལ་བཏོན་པའི་ཁྲིམས་སྲོལ་གྱི་གྲོས་གཞི་ཁག་དེ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྲོལ་རིང་། སྔོན་ལ་རྒྱུན་ལས་ཨུ་ཡོན་ལྷན་ཁང་ལ་བཏོན་ཆོག་པ་དང་། རྒྱུན་ལས་ཨུ་ཡོན་ལྷན་ཁང་གིས་སྲོལ་ཡིག་འདིའི་ལེའུ་ལྔ་པའི་གཏན་འབེབས་ནང་འཁོད་ཀྱི་གོ་རིམ་ལྟར་གྲོས་ཞིབ་བྱས་རྗེས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ལ་གྲོས་ཞིབ་གནང་རོགས་ཞུ་རྒྱུ་གཏན་འཁེལ་བྱ་རྒྱུ་དང་། རྒྱུན་ལས་ཨུ་ཡོན་ལྷན་ཁང་གིས་ཚོགས་ཆེན་གྱི་ཚང་འཛོམས་ཚོགས་འདུར་གསལ་བཤད་རྒྱག་རྒྱུ་དང་། ཡང་ན་གྲོས་གཞི་འདོན་མཁན་གྱིས་ཚོགས་ཆེན་གྱི་ཚང་འཛོམས་ཚོགས་འདུར་གསལ་བཤད་རྒྱག་དགོས།

དོན་ཚན་ཉེར་གཉིས་པ། རྒྱུན་ལས་ཨུ་ཡོན་ལྷན་ཁང་གིས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཚོགས་འདུར་གྲོས་ཞིབ་གནང་རོགས་ཞུ་རྒྱུར་གཏན་འཁེལ་བྱས་པའི་ཁྲིམས་སྲོལ་གྱི་གྲོས་གཞི་ཡིན་ཕྱིན། ངེས་པར་དུ་ཚོགས་འདུ་མ་འཚོགས་གོང་གི་ཉིན་སུམ་ཅུའི་སྔོན་དུ་ཁྲིམས་སྲོལ་གྱི་འཆར་ཟིན་དེ་འཐུས་མིར་པར་འགྲེམས་བྱེད་དགོས།

དོན་ཚན་ཉེར་གསུམ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྱི་གྲོས་གཞི་ཡིན་ཕྱིན། ཚོགས་ཆེན་གྱི་ཚང་འཛོམས་ཚོགས་འདུས་གྲོས་གཞི་འདོན་མཁན་གྱི་གསལ་བཤད་ཉན་རྗེས་འཐུས་མིའི་ཚོགས་པ་ཁག་གིས་གྲོས་ཞིབ་བྱེད་དགོས།

འཐུས་མིའི་ཚོགས་པ་ཁག་གིས་ཁྲིམས་སྲོལ་གྲོས་གཞིར་གྲོས་ཞིབ་བྱེད་སྐབས། གྲོས་གཞི་འདོན་མཁན་གྱིས་ངེས་པར་དུ་མི་མངགས་ནས་བསམ་འཆར་ཉན་པ་དང་དྲི་བར་ལན་རྒྱག་དགོས།

འཐུས་མིའི་ཚོགས་པ་ཁག་གིས་ཁྲིམས་སྲོལ་གྲོས་གཞིར་གྲོས་ཞིབ་བྱེད་སྐབས། འབྲེལ་ཡོད་ལས་ཁུངས་དང་རྩ་འཛུགས་ཀྱིས་ངེས་པར་དུ་འཐུས་མི་ཚོགས་པའི་བླང་བྱ་ལྟར་མི་མངགས་ནས་གནས་ཚུལ་ངོ་སྤྲོད་བྱེད་དགོས།

དོན་ཚན་ཉེར་བཞི་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྱི་གྲོས་གཞི་ཡིན་ཕྱིན། འབྲེལ་ཡོད་ཆེད་དོན་ཨུ་ཡོན་ལྷན་ཁང་གིས་གྲོས་ཞིབ་བྱས་ནས་དེ་སྐོར་གྱི་བསམ་འཆར་ཀྲུའུ་ཞི་ཚོགས་པར་སྙན་སེང་ཞུ་དགོས་པ་མ་ཟད་ཚོགས་འདུར་པར་འགྲེམས་ཀྱང་བྱེད་དགོས།

དོན་ཚན་ཉེར་ལྔ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྱི་གྲོས་གཞི་ཡིན་ཕྱིན། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་གིས་འཐུས་མིའི་ཚོགས་པ་ཁག་དང་འབྲེལ་ཡོད་ཆེད་དོན་ཨུ་ཡོན་ལྷན་ཁང་གི་གྲོས་ཞིབ་བསམ་འཆར་ལ་གཞིགས་ཏེ། ཁྲིམས་སྲོལ་གྱི་གྲོས་གཞིར་གཅིག་གྱུར་ཐོག་གྲོས་ཞིབ་བྱས་རྗེས། ཀྲུའུ་ཞིའི་ཚོགས་པར་གྲོས་ཞིབ་བྱས་པའི་སྙན་ཞུ་དང་ཁྲིམས་སྲོལ་འཆར་ཟིན་གྱི་བཟོ་བཅོས་མ་ཟིན་བཟོ་འདོན་བྱེད་དགོས། གཅིག་མཐུན་བྱུང་མེད་པའི་བསམ་འཆར་གལ་ཆེ་རིགས། ངེས་པར་དུ་གྲོས་ཞིབ་བྱས་པའི་སྙན་ཞུའི་ནང་གསལ་བཤད་རྒྱག་དགོས་པ་དང་། ཀྲུའུ་ཞི་ཚོགས་པའི་ཚོགས་འདུར་གྲོས་ཞིབ་བྱས་ནས་གྲོས་འཆམ་བྱུང་རྗེས། ཚོགས་འདུར་པར་འགྲེམས་བྱེད་དགོས།

དོན་ཚན་ཉེར་དྲུག་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྱི་གྲོས་གཞིའི་རིགས། དགོས་ངེས་ཀྱི་སྐབས་སུ་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞིས་འཐུས་མིའི་ཚོགས་པ་ཁག་གི་ཚོགས་གཙོའི་ཚོགས་འདུ་སྐོང་ཚོགས་བྱས་ཏེ། ཁྲིམས་སྲོལ་གྲོས་གཞིའི་ནང་གི་གནད་དོན་གལ་ཆེན་ཐད་འཐུས་མིའི་ཚོགས་པ་ཁག་གིས་བཏོན་པའི་གྲོས་ཞིབ་བསམ་འཆར་ཉན་རྗེས་གྲོས་བསྡུར་བྱས་ཆོག་པ་མ་ཟད། གྲོས་བསྡུར་བྱས་ཚུལ་དང་བསམ་འཆར་རྣམས་ཀྲུའུ་ཞི་ཚོགས་པར་སྙན་སེང་ཞུ་དགོས།

ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞིས་ཀྱང་ཁྲིམས་སྲོལ་གྲོས་གཞིའི་ནང་གི་དམིགས་བཀར་གནད་དོན་གལ་ཆེན་རིགས། འཐུས་མི་ཚོགས་པས་འོས་འདེམས་བྱས་པའི་འབྲེལ་ཡོད་འཐུས་མི་བསྐོངས་ནས་གྲོས་བསྡུར་བྱས་ཆོག་པ་མ་ཟད། གྲོས་བསྡུར་བྱས་ཚུལ་དང་བསམ་འཆར་རྣམས་ཀྲུའུ་ཞི་ཚོགས་པར་སྙན་སེང་ཞུ་དགོས།

དོན་ཚན་ཉེར་བདུན་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྲོས་གཞིའི་རིགས་བརྡས་ཐག་གཅོད་རྒྱུར་མ་སྤྲད་གོང་། གྲོས་གཞི་འདོན་མཁན་གྱིས་ཕྱིར་འཐེན་བྱ་རྒྱུའི་རེ་བ་བཏོན་ཚེ། ངེས་པར་དུ་རྒྱུ་མཚན་གསལ་བཤད་བྱས་རྗེས། ཀྲུའུ་ཞི་ཚོགས་པའི་མོས་མཐུན་ཐོབ་དགོས་པ་མ་ཟད་ཚོགས་ཆེན་ལ་སྙན་སེང་ཞུས་རྗེས་ཁྲིམས་སྲོལ་གྲོས་གཞི་དེར་གྲོས་ཞིབ་བྱེད་མཚམས་འཕྲལ་མར་འཇོག་དགོས།

དོན་ཚན་ཉེར་བརྒྱད་པ། ཁྲིམས་སྲོལ་གྲོས་གཞིར་གྲོས་ཞིབ་བྱེད་པའི་ཁྲོད། གནད་དོན་གལ་ཆེན་ཡོད་རིགས་ལ་ད་དུང་ཞིབ་འཇུག་བྱེད་དགོས་ཚེ། ཀྲུའུ་ཞི་ཚོགས་པས་འདོན་རྒྱུ་དང་། ཚོགས་ཆེན་གྱི་ཚང་འཛོམས་ཚོགས་འདུར་གཏན་འཁེལ་བྱུང་རྗེས། རྒྱུན་ལས་ཨུ་ཡོན་ལྷན་ཁང་ལ་དབང་བསྐུར་ཏེ་འཐུས་མིའི་བསམ་འཆར་གཞིར་བཟུང་གྲོས་ཞིབ་སྔར་ལས་ལྷག་པར་བྱས་ནས་གཏན་འཁེལ་བྱ་རྒྱུ་མ་ཟད། གཏན་འཁེལ་བྱས་ཚུལ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཐེངས་རྗེས་མའི་ཚོགས་འདུར་སྙན་སེང་ཞུས་ཆོག་ལ། རྒྱུན་ལས་ཨུ་ཡོན་ལྷན་ཁང་ལ་དབང་བསྐུར་ཏེ་འཐུས་མིའི་བསམ་འཆར་གཞིར་བཟུང་གྲོས་ཞིབ་སྔར་ལས་ལྷག་པར་བྱས་ནས་བཟོ་བཅོས་ཀྱི་ཇུས་གཞི་འདོན་རྒྱུ་དང་། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཐེངས་རྗེས་མའི་ཚོགས་འདུར་གྲོས་ཞིབ་བྱས་ནས་གཏན་འཁེལ་གནང་རོགས་ཞུས་ཀྱང་ཆོག

དོན་ཚན་ཉེར་དགུ་པ། ཁྲིམས་སྲོལ་འཆར་ཟིན་གྱི་བཟོ་བཅོས་མ་ཟིན་ལ་འཐུས་མིའི་ཚོགས་པ་ཁག་གིས་གྲོས་ཞིབ་བྱས་པ་བརྒྱུད། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་གིས་འཐུས་མིའི་ཚོགས་པ་ཁག་གི་གྲོས་ཞིབ་བསམ་འཆར་གཞིར་བཟུང་བཟོ་བཅོས་བརྒྱབ་ནས་ཁྲིམས་སྲོལ་འཆར་ཟིན་གྱི་བརྡས་ཐག་གཅོད་ཡིག་བཟོ་འདོན་བྱེད་དགོས། ཁྲིམས་སྲོལ་འཆར་ཟིན་གྱི་བརྡས་ཐག་གཅོད་ཡིག་དེ་ཀྲུའུ་ཞི་ཚོགས་པས་ཚོགས་ཆེན་གྱི་ཚང་འཛོམས་ཚོགས་འདུར་བརྡས་ཐག་གཅོད་རོགས་ཞུ་དགོས་པ་དང་། འཐུས་མི་ཡོངས་ཀྱི་ཕྱེད་ཀ་ཡན་ལས་བརྒལ་ན་གྲོས་འཆམ་བྱུང་བ་ཡིན།

དོན་ཚན་སུམ་ཅུ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཐོག་གྲོས་འཆམ་བྱུང་བའི་ཁྲིམས་སྲོལ་དེ་ཚོགས་ཆེན་གྱི་ཀྲུའུ་ཞི་ཚོགས་པས་སྤྱི་བསྒྲགས་སྤེལ་རྗེས་ཁྱབ་བསྒྲགས་བྱེད་དགོས།

ལེའུ་ལྔ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཁྲིམས་བཟོའི་གོ་རིམ།

དོན་ཚན་སོ་གཅིག་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཚོགས་འདུས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་ཁྲིམས་སྲོལ་གྱི་གྲོས་གཞི་བཏོན་ཆོག་པ་དང་། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་ཐོག་གྲོས་ཞིབ་བྱེད་དགོས།

རང་སྐྱོང་ལྗོངས་མི་དམངས་སྲིད་གཞུང་དང་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཆེད་དོན་ཨུ་ཡོན་ལྷན་ཁང་གིས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་ཁྲིམས་སྲོལ་གྱི་གྲོས་གཞི་བཏོན་ནས། ཀྲུའུ་རེན་ཚོགས་འདུས་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་འཇུག་དགོས་མིན་གཏན་འཁེལ་བྱས་ཆོག་ལ། འབྲེལ་ཡོད་ཆེད་དོན་ཨུ་ཡོན་ལྷན་ཁང་ལ་གྲོས་ཞིབ་བྱ་རྒྱུར་སྤྲད་དེ་སྙན་ཞུ་བཟོ་འདོན་བྱས་རྗེས། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་འཇུག་དགོས་མིན་གཏན་འཁེལ་བྱས་ཆོག

དོན་ཚན་སོ་གཉིས་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཁོངས་མི་ལྔ་ཡན་གྱིས་མིང་མཉམ་བཀོད་ཐོག་ནས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་ཁྲིམས་སྲོལ་གྱི་གྲོས་གཞི་བཏོན་ནས། ཀྲུའུ་རེན་ཚོགས་འདུས་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་འཇུག་དགོས་མིན་གཏན་འཁེལ་བྱས་ཆོག་ལ། ཡང་ན་སྔོན་ལ་འབྲེལ་ཡོད་ཆེད་དོན་ཨུ་ཡོན་ལྷན་ཁང་ལ་གྲོས་ཞིབ་བྱ་རྒྱུར་སྤྲད་དེ་ཚོགས་འདུའི་གྲོས་རིམ་ནང་འཇུག་དགོས་མིན་གྱི་བསམ་འཆར་བཏོན་རྗེས། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་འཇུག་དགོས་མིན་གཏན་འཁེལ་ཡང་བྱས་ཆོག རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་མ་བཅུག་ཚེ། རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཚོགས་འདུས་རྒྱུན་ལས་ཨུ་ཡོན་ལྷན་ཁང་གི་ཚོགས་འདུར་སྙན་སེང་ཞུ་བའམ་ཡང་ན་གྲོས་གཞི་འདོན་མཁན་ལ་གསལ་བཤད་རྒྱག་དགོས།

ཆེད་དོན་ཨུ་ཡོན་ལྷན་ཁང་གིས་གྲོས་ཞིབ་བྱེད་སྐབས། གྲོས་གཞི་འདོན་མི་ཚོགས་འདུར་གདན་འདྲེན་ཞུས་ནས་བསམ་འཆར་ཤོད་ཆོག

དོན་ཚན་སོ་གསུམ་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྱི་གྲོས་གཞི་ཡིན་ཕྱིན། ངེས་པར་དུ་ཚོགས་འདུ་མ་འཚོགས་གོང་གི་ཉིན་བདུན་སྔོན་དུ་ཁྲིམས་སྲོལ་གྱི་འཆར་ཟིན་དེ་རྒྱུན་ལས་ཨུ་ཡོན་ལྷན་ཁང་གི་ཁོངས་མིར་པར་འགྲེམས་བྱེད་དགོས།

དོན་ཚན་སོ་བཞི་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྱི་གྲོས་གཞི་ཡིན་ཕྱིན། ངེས་པར་དུ་རྒྱུན་ལས་ཨུ་ཡོན་ལྷན་ཁང་གི་ཚོགས་འདུར་གྲོས་ཞིབ་ཐེངས་གསུམ་བྱས་རྗེས་བརྡས་ཐག་གཅོད་རྒྱུར་འབུལ་དགོས།

རྒྱུན་ལས་ཨུ་ཡོན་ལྷན་ཁང་གི་ཚོགས་འདུས་ཁྲིམས་སྲོལ་གྲོས་གཞིར་གྲོས་ཞིབ་ཐེངས་དང་པོ་བྱེད་སྐབས། གྲོས་གཞི་འདོན་མཁན་གྱི་གསལ་བཤད་དང་འབྲེལ་ཡོད་ཆེད་དོན་ཨུ་ཡོན་ལྷན་ཁང་གི་གྲོས་ཞིབ་བསམ་འཆར་དང་སྙན་ཞུ་ཉན་ནས་ཁྲིམས་སྲོལ་འཆར་ཟིན་ལ་གྲོས་ཞིབ་བྱེད་དགོས།

རྒྱུན་ལས་ཨུ་ཡོན་ལྷན་ཁང་གི་ཚོགས་འདུས་ཁྲིམས་སྲོལ་གྲོས་གཞིར་གྲོས་ཞིབ་ཐེངས་གཉིས་པ་བྱེད་སྐབས། ཁྲིམས་སྲོལ་གྱི་འཆར་ཟིན་བཟོ་བཅོས་བྱས་ཚུལ་དང་གཙོ་བོའི་གནད་དོན་སྐོར་གྱི་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་གི་སྙན་ཞུ་ཉན་ནས་སྔར་བས་གྲོས་ཞིབ་བྱེད་དགོས།

རྒྱུན་ལས་ཨུ་ཡོན་ལྷན་ཁང་གི་ཚོགས་འདུས་ཁྲིམས་སྲོལ་གྲོས་གཞིར་གྲོས་ཞིབ་ཐེངས་གསུམ་པ་བྱེད་སྐབས། ཁྲིམས་སྲོལ་འཆར་ཟིན་ལ་གྲོས་ཞིབ་བྱས་འབྲས་སྐོར་གྱི་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་གི་སྙན་ཞུ་ཉན་ནས་ཁྲིམས་སྲོལ་འཆར་ཟིན་གྱི་བཟོ་བཅོས་མ་ཟིན་ལ་གྲོས་ཞིབ་བྱེད་དགོས།

དོན་ཚན་སོ་ལྔ་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྲོས་གཞིའི་ཐད་ཕྱོགས་ཁག་གི་བསམ་འཆར་གཅིག་མཐུན་བྱུང་ཚེ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུར་གྲོས་ཞིབ་ཐེངས་གཉིས་བྱས་རྗེས་བརྡས་ཐག་གཅོད་རྒྱུར་སྤྲོད་ཆོག ཆ་ཤས་ལ་བཟོ་བཅོས་བརྒྱབ་པའི་ཁྲིམས་སྲོལ་གྲོས་གཞིའི་ཐད་ཕྱོགས་ཁག་གི་བསམ་འཆར་གཅིག་མཐུན་བྱུང་བའམ་ཡང་ན་ཛ་དྲག་ཆེ་བའི་གནས་ཚུལ་བྱུང་ཚེ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུར་གྲོས་ཞིབ་ཐེངས་གཅིག་བྱས་རྗེས་བརྡས་ཐག་གཅོད་རྒྱུར་སྤྲོད་ནའང་ཆོག

དོན་ཚན་སོ་དྲུག་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུས་ཁྲིམས་སྲོལ་གྱི་གྲོས་གཞིར་གྲོས་ཞིབ་བྱེད་སྐབས། གྲོས་གཞི་འདོན་མཁན་གྱིས་ངེས་པར་དུ་མི་མངགས་ནས་བསམ་འཆར་ཉན་པ་དང་དྲི་བར་ལན་རྒྱག་དགོས།

རྒྱུན་ལས་ཨུ་ཡོན་ལྷན་ཁང་གི་ཚོགས་འདུས་ཁྲིམས་སྲོལ་གྱི་གྲོས་གཞིར་གྲོས་ཞིབ་བྱེད་སྐབས། བླང་བྱ་གཞིར་བཟུང་འབྲེལ་ཡོད་ལས་ཁུངས་དང་རྩ་འཛུགས་ཀྱིས་ངེས་པར་དུ་མི་མངགས་ནས་གནས་ཚུལ་ངོ་སྤྲོད་བྱེད་དགོས།

དོན་ཚན་སོ་བདུན་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྲོས་གཞིར་འབྲེལ་ཡོད་ཆེད་དོན་ཨུ་ཡོན་ལྷན་ཁང་གིས་གྲོས་ཞིབ་བྱེད་དགོས་པ་མ་ཟད། རྒྱུན་ལས་ཨུ་ཡོན་ལྷན་ཁང་ལ་གྲོས་ཞིབ་བྱས་པའི་བསམ་འཆར་སྙན་སེང་ཞུས་ནས། རྒྱུན་ལས་ཨུ་ཡོན་ལྷན་ཁང་གི་ཚོགས་འདུར་པར་འགྲེམས་བྱེད་དགོས།

འབྲེལ་ཡོད་ཆེད་དོན་ཨུ་ཡོན་ལྷན་ཁང་གིས་ཁྲིམས་སྲོལ་གྲོས་གཞིར་གྲོས་ཞིབ་བྱེད་སྐབས། ཆེད་དོན་ཨུ་ཡོན་ལྷན་ཁང་གཞན་དག་གི་ཁོངས་མི་དང་རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པའི་ལས་བྱ་ཚོགས་འདུར་གདན་འདྲེན་ཞུས་ནས་བསམ་འཆར་ཤོད་ཆོག

འབྲེལ་ཡོད་ཆེད་དོན་ཨུ་ཡོན་ལྷན་ཁང་གིས་ཁྲིམས་སྲོལ་གྲོས་གཞིར་གྲོས་ཞིབ་བྱེད་སྐབས། དགོས་མཁོར་གཞིགས་ཏེ། འབྲེལ་ཡོད་ལས་ཁུངས་དང་རྩ་འཛུགས་ཀྱིས་འགན་འཁུར་མི་སྣ་མངགས་ནས་གནས་ཚུལ་གསལ་བཤད་བྱེད་དགོས་པའི་བླང་བྱ་འདོན་ཆོག

དོན་ཚན་སོ་བརྒྱད་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྱི་གྲོས་གཞི་ཡིན་ཕྱིན། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་གིས་རྒྱུན་ལས་ཨུ་ཡོན་ལྷན་ཁང་གི་ཁོངས་མིའི་གྲོས་ཞིབ་བསམ་འཆར་དང་། འབྲེལ་ཡོད་ཆེད་དོན་ཨུ་ཡོན་ལྷན་ཁང་གི་གྲོས་ཞིབ་བསམ་འཆར། ཕྱོགས་ཁག་གིས་བཏོན་པའི་བསམ་འཆར་བཅས་ལ་གཞིགས་ནས་གཅིག་གྱུར་ཐོག་གྲོས་ཞིབ་བྱ་རྒྱུ་དང་། བཟོ་བཅོས་བྱས་ཚུལ་གྱི་སྙན་ཞུའམ་ཡང་ན་གྲོས་ཞིབ་བྱས་འབྲས་ཀྱི་སྙན་ཞུ་དང་ཁྲིམས་སྲོལ་འཆར་ཟིན་གྱི་བཟོ་བཅོས་མ་ཟིན་བཟོ་འདོན་བྱེད་དགོས་པ་མ་ཟད། གཅིག་མཐུན་མ་བྱུང་བའི་གལ་ཆེའི་བསམ་འཆར་རིགས། ངེས་པར་དུ་བཟོ་བཅོས་བྱས་ཚུལ་གྱི་སྙན་ཞུའམ་ཡང་ན་གྲོས་ཞིབ་བྱས་འབྲས་ཀྱི་སྙན་ཞུའི་ནང་གསལ་བཤད་རྒྱག་དགོས། འབྲེལ་ཡོད་ཆེད་དོན་ཨུ་ཡོན་ལྷན་ཁང་གི་གལ་ཆེའི་གྲོས་ཞིབ་བསམ་འཆར་བདག་སྤྲོད་བྱས་མེད་ཚེ། ངེས་པར་དུ་འབྲེལ་ཡོད་ཆེད་དོན་ཨུ་ཡོན་ལྷན་ཁང་ལ་བརྡ་ལན་སྤྲོད་དགོས།

རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་གིས་ཁྲིམས་སྲོལ་གྲོས་གཞིར་གྲོས་ཞིབ་བྱེད་སྐབས། ངེས་པར་དུ་འབྲེལ་ཡོད་ཆེད་དོན་ཨུ་ཡོན་ལྷན་ཁང་གི་ཁོངས་མི་ཚོགས་འདུར་གདན་འདྲེན་ཞུས་ནས་བསམ་འཆར་འདོན་དུ་འཇུག་དགོས།

དོན་ཚན་སོ་དགུ་པ། ཆེད་དོན་ཨུ་ཡོན་ལྷན་ཁང་གིས་ཁྲིམས་སྲོལ་གྲོས་གཞིར་གྲོས་ཞིབ་བྱེད་སྐབས། ངེས་པར་དུ་ཚང་འཛོམས་ཚོགས་འདུ་འཚོག་རྒྱུ་དང་། ཁོངས་མི་ཡོངས་ཀྱི་ཕྱེད་ཀ་ཡན་བརྒལ་ན་གྲོས་འཆམ་བྱུང་ཡོད།

ཁྲིམས་སྲོལ་འཆར་ཟིན་གྱི་གལ་ཆེའི་གནད་དོན་ཐད་ཆེད་དོན་ཨུ་ཡོན་ལྷན་ཁང་དབར་བསམ་འཆར་གཅིག་མཐུན་མ་བྱུང་ཚེ། ངེས་པར་དུ་ཀྲུའུ་རེན་ཚོགས་འདུར་སྙན་སེང་ཞུ་དགོས།

དོན་ཚན་བཞི་བཅུ་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྲོས་གཞིར་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་དང་། འབྲེལ་ཡོད་ཆེད་དོན་ཨུ་ཡོན་ལྷན་ཁང་། རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པ་བཅས་ཀྱིས་ངེས་པར་དུ་བརྟག་ཞིབ་བྱ་རྒྱུ་དང་ཕྱོགས་ཁག་གི་བསམ་འཆར་ཉན་དགོས། བསམ་འཆར་ཉན་སྟངས་དེ་བཞུགས་མོལ་ཚོགས་འདུ་དང་། རིགས་སྒྲུབ་ཁུངས་སྐྱེལ་ཚོགས་འདུ། གཟུ་ཉན་ཚོགས་འདུ་སོགས་ཀྱི་རྣམ་པ་སྤྱད་ན་ཆོག

རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཆེད་དོན་ཨུ་ཡོན་ལྷན་ཁང་དང་རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པས་ངེས་པར་དུ་ཁྲིམས་སྲོལ་འཆར་ཟིན་དེ་འབྲེལ་ཡོད་ཁྱབ་ཁོངས་ཀྱི་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་འཐུས་མི་དང་། འབྲེལ་ཡོད་ལས་ཁུངས། རྩ་འཛུགས། རིགས་གཅིག་མཁས་དབང་བཅས་ལ་ཕུལ་ནས་བསམ་འཆར་བསྡུ་ལེན་བྱེད་དགོས།

དོན་ཚན་ཞེ་གཅིག་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྱི་གྲོས་གཞི་ཡིན་ཕྱིན། ངེས་པར་དུ་ཀྲུའུ་རེན་ཚོགས་འདུས་ཡོངས་བསྒྲགས་མི་བྱེད་རྒྱུ་གཏན་འཁེལ་བྱས་པ་ཕུད། དེ་བྱིངས་ཀྱི་ཁྲིམས་སྲོལ་འཆར་ཟིན་ཁག་སྤྱི་ཚོགས་ཐོག་ཡོངས་བསྒྲགས་བྱས་ནས་བསམ་འཆར་བསྡུ་ལེན་བྱེད་དགོས།

དོན་ཚན་ཞེ་གཉིས་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུས་ཁྲིམས་སྲོལ་གྱི་གྲོས་གཞིར་གྲོས་ཞིབ་བྱེད་སྐབས། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་འབྲེལ་ཡོད་འཐུས་མི་དང་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཁྲིམས་བཟོའི་བློ་འདྲིའི་རིགས་གཅིག་མཁས་དབང་མིང་མཛོད་ནང་གི་རིགས་གཅིག་མཁས་དབང་ཚོགས་འདུར་གདན་འདྲེན་ཞུས་ནས་བསམ་འཆར་ཉན་ཆོག

དོན་ཚན་ཞེ་གསུམ་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྱི་གྲོས་གཞི་ཡིན་ཕྱིན། རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པས་ངེས་པར་དུ་རྒྱུན་ལས་ཨུ་ཡོན་ལྷན་ཁང་གི་ཁོངས་མིའི་གྲོས་ཞིབ་བསམ་འཆར་དང་། ཕྱོགས་ཁག་གིས་བཏོན་པའི་བསམ་འཆར། དེ་བཞིན་འབྲེལ་ཡོད་དཔྱད་ཡིག་གཞན་དག་བཅས་བསྡུ་རུབ་དང་ལེགས་སྒྲིག་བྱས་ཏེ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་དང་འབྲེལ་ཡོད་ཆེད་དོན་ཨུ་ཡོན་ལྷན་ཁང་ལ་སྐྱེལ་དགོས་པ་མ་ཟད། དགོས་མཁོར་གཞིགས་ནས་རྒྱུན་ལས་ཨུ་ཡོན་ལྷན་ཁང་གི་ཚོགས་འདུར་པར་འགྲེམས་བྱེད་དགོས།

དོན་ཚན་ཞེ་བཞི་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྱི་གྲོས་གཞི་ཡིན་ཕྱིན། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་གིས་གྲོས་ཞིབ་བྱས་འབྲས་ཀྱི་སྙན་ཞུ་བཟོ་འདོན་མ་བྱས་གོང་། ཆེད་དོན་ཨུ་ཡོན་ལྷན་ཁང་དང་རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པ་གཞན་དག་གིས་ཁྲིམས་སྲོལ་འཆར་ཟིན་ནང་གི་གཙོ་བོའི་ལམ་ལུགས་ཚད་ལྡན་བཟོ་བའི་ལག་ལེན་བསྟར་འཐུས་རང་བཞིན་དང་། ཁྲིམས་སྲོལ་བཟོ་འདོན་གྱི་གོ་སྐབས། ཁྲིམས་སྲོལ་ལག་བསྟར་གྱི་སྤྱི་ཚོགས་ཕན་འབྲས། དེ་བཞིན་ཐོན་སྲིད་པའི་གནད་དོན་སོགས་ལ་ཚོད་སྐོར་བྱས་ཆོག ཚོད་སྐོར་བྱས་ཚུལ་དེ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་གིས་གྲོས་ཞིབ་བྱས་འབྲས་སྙན་ཞུའི་ནང་གསལ་བཤད་རྒྱག་དགོས།

དོན་ཚན་ཞེ་ལྔ་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་པའི་ཁྲིམས་སྲོལ་གྲོས་གཞི་ཁག་བརྡས་ཐག་གཅོད་རྒྱུར་མ་ཕུལ་གོང་། གྲོས་གཞི་འདོན་མཁན་གྱིས་ཕྱིར་འཐེན་བྱ་རྒྱུའི་རེ་བ་བཏོན་ཚེ། ངེས་པར་དུ་རྒྱུ་མཚན་གསལ་བཤད་རྒྱག་དགོས་ཁར། དེར་ཀྲུའུ་རེན་ཚོགས་འདུའི་མོས་མཐུན་ཐོབ་དགོས་པ་མ་ཟད། རྒྱུན་ལས་ཨུ་ཡོན་ལྷན་ཁང་ལ་སྙན་སེང་ཞུས་ནས་ཁྲིམས་སྲོལ་གྲོས་གཞིར་གྲོས་ཞིབ་བྱེད་མཚམས་འཕྲལ་མར་འཇོག་དགོས།

དོན་ཚན་ཞེ་དྲུག་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུས་ཁྲིམས་སྲོལ་གྲོས་གཞིར་གྲོས་ཞིབ་ཐེངས་གསུམ་བྱས་རྗེས། ད་དུང་གནད་དོན་ཆེན་པོར་ཞིབ་འཇུག་སྔར་ལས་ལྷག་པར་བྱེད་དགོས་ཡོད་ཚེ། ཀྲུའུ་རེན་ཚོགས་འདུས་བཏོན་རྗེས། རྒྱུན་ལས་ཨུ་ཡོན་ལྷན་ཁང་གི་ཚང་འཛོམས་ཚོགས་འདུའི་ཐོག་མོས་མཐུན་བྱུང་བ་བརྒྱུད། གནས་སྐབས་རིང་བརྡས་ཐག་མི་གཅོད་པར་འབྲེལ་ཡོད་ཆེད་དོན་ཨུ་ཡོན་ལྷན་ཁང་ལ་སྤྲད་དེ་གྲོས་ཞིབ་སྔར་ལས་ལྷག་པར་བྱེད་ཆོག

དོན་ཚན་ཞེ་བདུན་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་ཞིབ་ནང་བཅུག་པའི་ཁྲིམས་སྲོལ་གྱི་གྲོས་གཞིའི་ཁྲིམས་སྲོལ་འདི་བཟོ་བའི་དགོས་ངེས་རང་བཞིན་དང་ལག་ལེན་བསྟར་འཐུས་རང་བཞིན་སོགས་གལ་ཆེའི་གནད་དོན་ཐད་ལ་ཕྱོགས་ཁག་གི་བསམ་འཆར་གཅིག་མཐུན་མ་བྱུང་བར་གྲོས་ཞིབ་བྱེད་མཚམས་བཞག་ནས་ལོ་གཉིས་སོང་བའམ་ཡང་ན་གནས་སྐབས་བརྡས་ཐག་གཅོད་རྒྱུར་མ་སྤྲད་པར་ལོ་གཉིས་སོང་ཡང་ད་དུང་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་ནས་གྲོས་ཞིབ་བྱས་མེད་ཚེ། ཀྲུའུ་རེན་ཚོགས་འདུས་གྲོས་ཞིབ་བྱེད་མཚམས་འཇོག་རྒྱུ་གཏན་འཁེལ་བྱ་རྒྱུ་མ་ཟད། རྒྱུན་ལས་ཨུ་ཡོན་ལྷན་ཁང་ལ་སྙན་སེང་ཞུས་ཆོག དགོས་ངེས་ཀྱི་སྐབས་སུ་ཀྲུའུ་རེན་ཚོགས་འདུས་གྲོས་ཞིབ་དུས་འགྱངས་བྱ་རྒྱུ་གཏན་འཁེལ་བྱས་ཀྱང་ཆོག

དོན་ཚན་ཞེ་བརྒྱད་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུས་ཁྲིམས་སྲོལ་འཆར་ཟིན་གྱི་བཟོ་བཅོས་མ་ཟིན་ལ་གྲོས་ཞིབ་བྱས་རྗེས། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་གིས་རྒྱུན་ལས་ཨུ་ཡོན་ལྷན་ཁང་གི་ཁོངས་མིའི་གྲོས་ཞིབ་བསམ་འཆར་ལ་གཞིགས་ནས་བཟོ་བཅོས་བརྒྱབ་རྗེས་ཁྲིམས་སྲོལ་འཆར་ཟིན་གྱི་བརྡས་ཐག་གཅོད་ཡིག་བཟོ་འདོན་བྱེད་དགོས། ཁྲིམས་སྲོལ་འཆར་ཟིན་གྱི་བརྡས་ཐག་གཅོད་ཡིག་དེ། ཀྲུའུ་རེན་ཚོགས་འདུས་རྒྱུན་ལས་ཨུ་ཡོན་ལྷན་ཁང་གི་ཚང་འཛོམས་ཚོགས་འདུར་བརྡས་ཐག་གཅོད་རོགས་ཞུ་རྒྱུ་གཏན་འཁེལ་བྱེད་དགོས་པ་དང་། རྒྱུན་ལས་ཨུ་ཡོན་ལྷན་ཁང་གི་ཁོངས་མི་ཡོངས་ཀྱི་ཕྱེད་ཀ་ཡན་བརྒལ་ནས་གྲོས་འཆམ་བྱུང་བ་ཡིན་དགོས།

དོན་ཚན་ཞེ་དགུ་པ། ཁྲིམས་སྲོལ་འཆར་ཟིན་གྱི་བརྡས་ཐག་གཅོད་ཡིག་ལ་བརྡས་ཐག་གཅོད་རྒྱུའི་ཚང་འཛོམས་ཚོགས་འདུ་མ་འཚོགས་གོང་གི་ཆུ་ཚོད་བཞིའི་སྔོན་དུ་རྒྱུན་ལས་ཨུ་ཡོན་ལྷན་ཁང་གི་ཁོངས་མི་ལྔ་ཡན་གྱིས་མིང་མཉམ་བཀོད་ཐོག་ནས་བརྡས་ཐག་གཅོད་ཡིག་ནང་བསམ་འཆར་གཅིག་མཐུན་མ་བྱུང་བའི་གལ་ཆེའི་དོན་ཚན་རེ་ཟུང་ལ་བསམ་འཆར་མི་འདྲ་བ་འདོན་ཆོག ཀྲུའུ་རེན་ཚོགས་འདུས་གཏན་འཁེལ་བྱས་པ་བརྒྱུད། གལ་ཆེའི་དོན་ཚན་ཁག་རྒྱུན་ལས་ཨུ་ཡོན་ལྷན་ཁང་གི་ཚོགས་འདུར་ལོགས་སུ་བརྡས་ཐག་གཅོད་རོགས་ཞུ་ཆོག རྒྱུན་ལས་ཨུ་ཡོན་ལྷན་ཁང་ཁོངས་མི་ཡོངས་ཀྱི་ཕྱེད་ཀ་ཡན་གྱིས་གྲོས་འཆམ་བྱུང་རྗེས། ཁྲིམས་སྲོལ་འཆར་ཟིན་གྱི་བརྡས་ཐག་གཅོད་ཡིག་ལ་བསྐྱར་དུ་བརྡས་ཐག་གཅོད་དགོས།

ལོགས་སུ་བརྡས་ཐག་གཅོད་རྒྱུའི་དོན་ཚན་ལ་རྒྱུན་ལས་ཨུ་ཡོན་ལྷན་ཁང་ཁོངས་མི་ཡོངས་ཀྱི་ཕྱེད་ཀ་ཡན་གྱིས་གྲོས་འཆམ་མ་བྱུང་ཚེ། ཀྲུའུ་རེན་ཚོགས་འདུས་གཏན་འཁེལ་བྱས་པ་བརྒྱུད། ཁྲིམས་སྲོལ་འཆར་ཟིན་གྱི་བརྡས་ཐག་གཅོད་ཡིག་ལ་གནས་སྐབས་བརྡས་ཐག་མ་བཅད་པར་འབྲེལ་ཡོད་ཆེད་དོན་ཨུ་ཡོན་ལྷན་ཁང་ལ་སྤྲད་དེ་གྲོས་ཞིབ་སྔར་ལས་ལྷག་པ་བྱེད་དགོས།

དོན་ཚན་ལྔ་བཅུ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཚོགས་འདུས་བརྡས་ཐག་བཅད་པ་བརྒྱུད་གྲོས་འཆམ་མ་བྱུང་བའི་ཁྲིམས་སྲོལ་གྱི་གྲོས་གཞིའི་རིགས། གྲོས་གཞི་འདོན་མཁན་གྱིས་ཁྲིམས་སྲོལ་དེ་ངེས་པར་དུ་བཟོ་འབེབས་བྱེད་དགོས་འདུག་སྙམ་ཚེ། ཁྲིམས་བཀོད་ཀྱི་གོ་རིམ་གཞིར་བཟུང་བསྐྱར་དུ་འདོན་ཆོག་པ་དང་། ཀྲུའུ་རེན་ཚོགས་འདུས་ཚོགས་འདུའི་གྲོས་རིམ་ནང་འཇུག་དགོས་མིན་གཏན་འཁེལ་བྱེད་དགོས།

དོན་ཚན་ང་གཅིག་པ། རྒྱུན་ལས་ཨུ་ཡོན་ལྷན་ཁང་ནས་གྲོས་འཆམ་བྱུང་བའི་ཁྲིམས་སྲོལ་ཡིན་ཕྱིན། རྒྱུན་ལས་ཨུ་ཡོན་ལྷན་ཁང་གིས་སྤྱི་བསྒྲགས་སྤེལ་ནས་ཁྱབ་བསྒྲགས་བྱེད་དགོས།

ལེའུ་དྲུག་པ། ཆུས་བཙུགས་པའི་གྲོང་ཁྱེར་གྱི་ས་གནས་རང་བཞིན་གྱི་ཁྲིམས་སྲོལ་ལ་ཆོག་མཆན་འགོད་རིམ།

དོན་ཚན་ང་གཉིས་པ། ཆུས་བཙུགས་པའི་གྲོང་ཁྱེར་མི་དམངས་འཐུས་མི་ཚོགས་ཆེན་དང་དེའི་རྒྱུན་ལས་ཨུ་ཡོན་ལྷན་ཁང་གིས་ས་གནས་རང་བཞིན་གྱི་ཁྲིམས་སྲོལ་བཟོ་འབེབས་དང་། བཟོ་བཅོས། མེད་པར་བཟོ་བ། འགྲེལ་བཤད་བཅས་བྱེད་སྐབས། ངེས་པར་དུ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་ཁྲིམས་བཞིན་ཆོག་མཆན་འགོད་རོགས་ཞུ་དགོས།

དོན་ཚན་ང་གསུམ་པ། ཆུད་བཙུགས་པའི་གྲོང་ཁྱེར་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་ངེས་པར་དུ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་མ་འཚོགས་གོང་གི་ཉིན་སུམ་ཅུའི་སྔོན་དུ་ཆོག་མཆན་འགོད་རོགས་ཞུ་རྒྱུའི་གྲོས་གཞི་འདོན་དགོས།

ཆོག་མཆན་འགོད་རོགས་ཞུ་རྒྱུའི་གྲོས་གཞི་འབུལ་སྐབས་ངེས་པར་དུ་ཆོག་མཆན་འགོད་རོགས་ཞུ་རྒྱུའི་ས་གནས་རང་བཞིན་གྱི་ཁྲིམས་སྲོལ་གྱི་མ་ཡིག་དང་། གསལ་བཤད། སྙན་ཞུ་བཅས་དང་དེ་བཞིན་རིགས་སྒྲུབ་ཁུངས་སྐྱེལ་དང་དཔང་ཉན་གནས་ཚུལ་སོགས་ཀྱི་འབྲེལ་ཡོད་དཔྱད་ཡིག་འབུལ་དགོས།

དོན་ཚན་ང་བཞི་པ། ཆོག་མཆན་འགོད་རོགས་ཞུ་རྒྱུའི་ས་གནས་རང་བཞིན་གྱི་ཁྲིམས་སྲོལ་ལ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་གིས་ཞིབ་བཤེར་བསམ་འཆར་འདོན་རྒྱུ་མ་ཟད། ཀྲུའུ་རེན་ཚོགས་འདུར་སྙན་སེང་ཞུས་རྗེས་ཀྲུའུ་རེན་ཚོགས་འདུས་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་འཇུག་དགོས་མིན་གཏན་འཁེལ་བྱེད་དགོས།

དོན་ཚན་ང་ལྔ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་ནས། ཆོག་མཆན་འགོད་རོགས་ཞུ་རྒྱུའི་ཆུད་བཙུགས་པའི་གྲོང་ཁྱེར་གྱི་ས་གནས་རང་བཞིན་གྱི་ཁྲིམས་སྲོལ་ཡིན་ཕྱིན། རྒྱུན་ལས་ཨུ་ཡོན་ལྷན་ཁང་གི་ཚང་འཛོམས་ཚོགས་འདུའི་ཐོག་གྲོས་གཞི་འདོན་མཁན་གྱི་གསལ་བཤད་དང་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་གི་ཞིབ་བཤེར་སྙན་ཞུ་ཉན་རྗེས། ཁྲིམས་སྲོལ་འཆར་ཟིན་ལ་གྲོས་ཞིབ་བྱེད་དགོས། སྤྱིར་བཏང་ཐོག་རྒྱུན་ལས་ཨུ་ཡོན་ལྷན་ཁང་གི་ཚོགས་འདུས་གྲོས་ཞིབ་ཐེངས་གཅིག་བྱས་རྗེས་བརྡས་ཐག་གཅོད་རྒྱུར་འབུལ་དགོས།

དོན་ཚན་ང་དྲུག་པ། ཆོག་མཆན་འགོད་རོགས་ཞུ་རྒྱུའི་ཆུད་བཙུགས་པའི་གྲོང་ཁྱེར་གྱི་ས་གནས་རང་བཞིན་གྱི་ཁྲིམས་སྲོལ་གྱི་ཁྲིམས་མཐུན་རང་བཞིན་ལ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་ངེས་པར་དུ་ཞིབ་བཤེར་བྱེད་དགོས། རྩ་ཁྲིམས་དང་། བཅའ་ཁྲིམས། སྲིད་འཛིན་ཁྲིམས་སྲོལ། དེ་བཞིན་རང་སྐྱོང་ལྗོངས་ཀྱི་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་དང་འགལ་བ་མེད་ཚེ། ངེས་པར་དུ་ཟླ་བཞིའི་ནང་ཚུན་དུ་ཆོག་མཆན་སྤྲོད་དགོས། རྩ་ཁྲིམས་དང་། བཅའ་ཁྲིམས། སྲིད་འཛིན་ཁྲིམས་སྲོལ། དེ་བཞིན་རང་སྐྱོང་ལྗོངས་ཀྱི་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་དང་འགལ་བ་ཡོད་ཚེ། ཆོག་མཆན་མ་སྤྲད་ན་འགྲིག་ལ། བཟོ་བཅོས་རྒྱག་རྒྱུའི་བསམ་འཆར་ཟུར་བཀོད་ཀྱིས་ཆོག་མཆན་ཞུ་བའམ་ཕྱིར་བསློགས་ནས་བཟོ་བཅོས་བརྒྱབ་རྗེས་ཆོག་མཆན་གནང་རོགས་ཞུས་ནའང་འགྲིག

དོན་ཚན་ང་བདུན་པ། ཆོག་མཆན་འགོད་རོགས་ཞུ་རྒྱུའི་ཆུད་བཙུགས་པའི་གྲོང་ཁྱེར་གྱི་ས་གནས་རང་བཞིན་གྱི་ཁྲིམས་སྲོལ་ལ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་ཞིབ་བཤེར་བྱེད་སྐབས། རང་སྐྱོང་ལྗོངས་མི་དམངས་སྲིད་གཞུང་གི་སྒྲིག་སྲོལ་དང་འགལ་བ་ཡོད་པ་ཤེས་རྟོགས་བྱུང་ཚེ་ངེས་པར་དུ་ཐག་གཅོད་ཆོད་དོན་འཇོག་དགོས།

དོན་ཚན་ང་བརྒྱད་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ནས་ཆོག་མཆན་སྤྲད་པའི་ཆུད་བཙུགས་པའི་གྲོང་ཁྱེར་གྱི་ས་གནས་རང་བཞིན་གྱི་ཁྲིམས་སྲོལ་ཡིན་ཕྱིན། ཆུད་བཙུགས་པའི་གྲོང་ཁྱེར་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་སྤྱི་བསྒྲགས་སྤེལ་ནས་ཁྱབ་བསྒྲགས་བྱེད་དགོས།

བཟོ་བཅོས་རྒྱག་རྒྱུའི་བསམ་འཆར་ཟུར་བཀོད་ཀྱིས་ཆོག་མཆན་སྤྲད་པའི་ས་གནས་རང་བཞིན་གྱི་ཁྲིམས་སྲོལ་ཡིན་ཕྱིན། ཆོག་མཆན་འགོད་རོགས་ཞུ་མཁན་ལས་ཁུངས་ཀྱིས་ངེས་པར་དུ་བཟོ་བཅོས་རྒྱག་རྒྱུའི་བསམ་འཆར་ལྟར་བཟོ་བཅོས་བརྒྱབ་རྗེས་ལག་བསྟར་བྱ་རྒྱུའི་ཁྱབ་བསྒྲགས་བྱེད་དགོས།

ལེའུ་བདུན་པ། ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ཀྱི་འགྲེལ་བཤད།

དོན་ཚན་ང་དགུ་པ། རང་སྐྱོང་ལྗོངས་ཀྱི་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ཀྱི་འགྲེལ་བཤད་རྒྱག་དབང་དེ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་ཡོད།

རང་སྐྱོང་ལྗོངས་ཀྱི་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ཀྱི་ཞིབ་ཕྲའི་གོ་དོན་གསལ་པོ་བཟོ་དགོས་པའམ་ཡང་ན་བཟོ་འབེབས་བྱས་རྗེས་གནས་ཚུལ་གསར་པ་ཐོན་པར་གོ་ཆོད་ཁྲིམས་སྲོལ་དང་སྲོལ་ཡིག་གི་གཞི་འཛིན་ས་གསལ་པོ་བཟོ་དགོས་རིགས་ལ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ནས་འགྲེལ་བཤད་རྒྱག་དགོས།

དོན་ཚན་དྲུག་ཅུ་པ། རང་སྐྱོང་ལྗོངས་མི་དམངས་སྲིད་གཞུང་དང་། རང་སྐྱོང་ལྗོངས་ལྟ་ཞིབ་ཨུ་ལྷན། རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་། རང་སྐྱོང་ལྗོངས་མི་དམངས་ཞིབ་དཔྱོད་ཁང་། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཆེད་དོན་ཨུ་ཡོན་ལྷན་ཁང་། ཆུད་བཙུགས་པའི་གྲོང་ཁྱེར་གྱི་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་བཅས་ཀྱིས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ལ་འགྲེལ་བཤད་རྒྱག་རོགས་ཞུ་རྒྱུའི་རེ་བ་བཏོན་ཆོག

སྤྱི་ཚོགས་ཚོགས་པ་དང་། ཁེ་ལས་དང་བྱ་གཞག་རྩ་འཛུགས། རྩ་འཛུགས་གཞན་དག དེ་བཞིན་སྤྱི་དམངས་བཅས་ཀྱིས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ལ་འགྲེལ་བཤད་རྒྱག་རོགས་ཞུ་རྒྱུའི་གྲོས་འཆར་བཏོན་ཆོག

དོན་ཚན་རེ་གཅིག་པ། ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ཀྱི་འགྲེལ་བཤད་འཆར་ཟིན་དེ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ཁྲིམས་ལུགས་ལས་དོན་ཨུ་ཡོན་ལྷན་ཁང་གིས་ཞིབ་འཇུག་བྱས་ནས་བཟོ་འབེབས་བྱས་རྗེས། ཀྲུའུ་རེན་ཚོགས་འདུས་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་འཇུག་དགོས་མིན་གཏན་འཁེལ་བྱེད་དགོས།

དོན་ཚན་རེ་གཉིས་པ། རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་གྲོས་རིམ་ནང་བཅུག་པའི་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ཀྱི་འགྲེལ་བཤད་འཆར་ཟིན་ལ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཁྲིམས་ལུགས་ཨུ་ཡོན་ལྷན་ཁང་གིས་རྒྱུན་ལས་ཨུ་ཡོན་ལྷན་ཁང་གི་ཁོངས་མིའི་གྲོས་ཞིབ་བསམ་འཆར་གཞིར་བཟུང་གྲོས་ཞིབ་དང་བཟོ་བཅོས་རྒྱག་དགོས་པ་དང་། འགྲེལ་བཤད་འཆར་ཟིན་གྱི་བརྡས་ཐག་གཅོད་ཡིག་བཟོ་འདོན་བྱས་པར་རྒྱུན་ལས་ཨུ་ཡོན་ལྷན་ཁང་གི་ཁོངས་མིའི་ཕྱེད་ཀ་ཡན་གྱི་མོས་མཐུན་བྱུང་འཕྲལ་གྲོས་འཆམ་བྱུང་བ་ཡིན།

དོན་ཚན་རེ་གསུམ་པ། རང་སྐྱོང་སྲོལ་ཡིག་དང་ཁེར་སྤྱོད་སྲོལ་ཡིག་གི་འགྲེལ་བཤད་དེར་རྒྱུན་ལས་ཨུ་ཡོན་ལྷན་ཁང་གི་ཚོགས་འདུས་གྲོས་ཞིབ་བྱས་ནས་གྲོས་འཆམ་བྱུང་རྗེས། རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་ཆོག་མཆན་ཐོབ་རྗེས་གཞི་ནས་རྩིས་འགྲོ་ཡོད།

དོན་ཚན་རེ་བཞི་པ། ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ཀྱི་འགྲེལ་བཤད་དེ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་སྤྱི་བསྒྲགས་སྤེལ་ནས་ཁྱབ་བསྒྲགས་བྱེད་དགོས།

ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ཀྱི་འགྲེལ་བཤད་དེར་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་དང་ནུས་པ་གཅིག་མཚུངས་ཡོད།

དོན་ཚན་རེ་ལྔ་པ། ཆུད་བཙུགས་པའི་གྲོང་ཁྱེར་མི་དམངས་འཐུས་མི་ཚོགས་ཆེན་དང་དེའི་རྒྱུན་ལས་ཨུ་ཡོན་ལྷན་ཁང་གིས་བཟོ་འབེབས་བྱས་པའི་ས་གནས་རང་བཞིན་གྱི་ཁྲིམས་སྲོལ་ལ་ཆུད་བཙུགས་པའི་གྲོང་ཁྱེར་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་འགྲེལ་བཤད་རྒྱག་དགོས།

ཆུད་བཙུགས་པའི་གྲོང་ཁྱེར་གྱི་ས་གནས་རང་བཞིན་གྱི་ཁྲིམས་སྲོལ་གྱི་འགྲེལ་བཤད་དེ་ངེས་པར་དུ་གྲོང་ཁྱེར་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་གྲོས་ཞིབ་བྱས་ནས་གྲོས་འཆམ་བྱུང་བ་བརྒྱུད། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་ཕུལ་ནས་ཆོག་མཆན་ཐོབ་རྗེས་གྲོང་ཁྱེར་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་སྤྱི་བསྒྲགས་སྤེལ་ནས་ཁྱབ་བསྒྲགས་བྱེད་དགོས།

དོན་ཚན་རེ་དྲུག་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ཁྲིམས་ལུགས་ལས་དོན་ཨུ་ཡོན་ལྷན་ཁང་གིས་འབྲེལ་ཡོད་ཀྱི་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ཀྱི་ཞིབ་ཕྲའི་ལས་ཀའི་གནད་དོན་འདྲི་རྩད་བྱས་ཚེ། དེར་ཞིབ་འཇུག་དང་ལན་འདེབས་བྱས་ཆོག་པ་མ་ཟད། རྒྱུན་ལས་ཨུ་ཡོན་ལྷན་ཁང་ལ་སྙན་ཐོ་དཔོ་དགོས།

ལེའུ་བརྒྱད་པ། དེ་མིན་གྱི་གཏན་འབེབས།

དོན་ཚན་རེ་བདུན་པ། ཁྲིམས་སྲོལ་གྲོས་གཞི་འདོན་སྐབས་ངེས་པར་དུ་རྒྱལ་ཁབ་ཀྱི་སྤྱི་སྤྱོད་སྐད་ཡིག་དང་བོད་སྐད་ཡིག་གཉིས་ཀྱི་ཐོག་ནས་ཁྲིམས་སྲོལ་འཆར་ཟིན་གྱི་མ་ཡིག་དང་གསལ་བཤད་མཉམ་དུ་འདོན་དགོས་པ་མ་ཟད། དགོས་ངེས་ཀྱི་དཔྱད་ཡིག་མཁོ་འདོན་བྱེད་དགོས།

ཁྲིམས་སྲོལ་འཆར་ཟིན་གྱི་གསལ་བཤད་ནང་ངེས་པར་དུ་ཁྲིམས་སྲོལ་བཟོ་རྒྱུའམ་ཡང་ན་བཟོ་བཅོས་རྒྱག་རྒྱུའི་དགོས་ངེས་རང་བཞིན་དང་། ལག་ལེན་བསྟར་འཐུས་རང་བཞིན། ནང་དོན་གཙོ་བོ། དེ་བཞིན་འཆར་ཟིན་བཟོ་བའི་བརྒྱུད་རིམ་ཁྲོད་བསམ་འཆར་ཤུགས་ཆེན་མ་མཐུན་པའི་རིགས་མཐུན་སྦྱོར་ཐག་གཅོད་བྱས་ཚུལ་བཅས་ཚུད་དགོས།

དོན་ཚན་རེ་བརྒྱད་པ། ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ནང་ཆེད་དམིགས་དོན་གནད་ཐད་ལེ་ལག་ཚང་བའི་གཏན་འབེབས་བཟོ་དགོས་པའི་བླང་བྱ་གསལ་པོ་བཏོན་ཡོད་ཚེ། འབྲེལ་ཡོད་སྡེ་ཚན་གྱིས་ངེས་པར་དུ་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ནང་ལེ་ལག་ཚང་བའི་གཏན་འབེབས་ཀྱི་དུས་བཀག་ལོགས་སུ་བཟོས་ཡོད་པ་ཕུད། ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ལག་ལེན་བསྟར་ཉིན་ནས་ལོ་གཅིག་གི་ནང་ཚུན་དུ་གཏན་འབེབས་བཟོ་དགོས། འབྲེལ་ཡོད་སྡེ་ཚན་གྱིས་དུས་བཀག་ནང་ཚུན་དུ་ལེ་ལག་ཚང་བའི་གཏན་འབེབས་བཟོ་མ་ཐུབ་ཚེ། ངེས་པར་དུ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་གནས་ཚུལ་གསལ་བཤད་རྒྱག་དགོས།

དོན་ཚན་རེ་དགུ་པ། ཁྲིམས་སྲོལ་བཟོ་འབེབས་དང་བཟོ་བཅོས་བྱས་རྗེས་ལག་ལེན་བསྟར་ནས་ལོ་གཉིས་སོང་ཚེ། ཁྲིམས་སྲོལ་ལག་བསྟར་བྱེད་མཁན་ལས་ཁུངས་ཀྱིས་ངེས་པར་དུ་རྒྱུན་ལས་ཨུ་ཡོན་ལྷན་ཁང་ལ་ཁྲིམས་སྲོལ་ལག་བསྟར་བྱས་ཚུལ་ཡིག་ཐོག་ནས་སྙན་སེང་ཞུ་དགོས། འབྲེལ་ཡོད་ཆེད་དོན་ཨུ་ཡོན་ལྷན་ཁང་དང་རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པས་ཁྲིམས་སྲོལ་ལག་བསྟར་གྱི་སྙན་ཞུའི་གནས་ཚུལ་ལ་གཞིགས་ཏེ། ཁྲིམས་སྲོལ་ལམ་ཡང་ན་ཁྲིམས་སྲོལ་ནང་གི་འབྲེལ་ཡོད་གཏན་འབེབས་ལ་ཁྲིམས་བཟོས་རྗེས་ཀྱི་ཚོད་སྐོར་བྱ་རྒྱུ་སྒྲིག་འཛུགས་བྱེད་དགོས། ཚོད་སྐོར་བྱས་ཚུལ་ངེས་པར་དུ་རྒྱུན་ལས་ཨུ་ཡོན་ལྷན་ཁང་ལ་སྙན་སེང་ཞུ་དགོས།

དོན་ཚན་བདུན་ཅུ་པ། ཁྲིམས་བཟོའི་འཆར་འགོད་ཀྱི་འཆར་ཟིན་དང་། ཁེ་ཕན་དང་འབྲེལ་བ་ཡོད་པར་ལེགས་སྒྲིག་ཆེན་པོ་བྱེད་པའམ་ཡང་ན་སྤྱི་ཚོགས་ཀྱིས་ཡོངས་ཁྱབ་ཏུ་དོ་ཁུར་བྱེད་པའི་གལ་ཆེའི་ཁྲིམས་སྲོལ་གྱི་འཆར་ཟིན་བཟོ་སྐབས། ངེས་པར་དུ་ཁྲིམས་བཟོའི་གྲོས་མོལ་བྱས་ནས་སྲིད་གྲོས་ཨུ་ཡོན་དང་། དམངས་གཙོའི་ཏང་ཤོག བཟོ་ཚོང་མཉམ་འབྲེལ་ལྷན་ཚོགས། ཏང་ཤོག་གང་ལའང་མི་གཏོགས་པའི་མི་སྣ། མི་དམངས་ཚོགས་པ། སྤྱི་ཚོགས་རྩ་འཛུགས་བཅས་ཀྱི་བསམ་འཆར་དང་གྲོས་འགོ་ཉན་དགོས།

དོན་ཚན་དོན་གཅིག་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་དང་དེའི་རྒྱུན་ལས་ཨུ་ཡོན་ལྷན་ཁང་གིས་བཟོ་འབེབས་བྱས་པའི་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ཀྱི་ནང་ངེས་པར་དུ་ལག་བསྟར་བྱ་རྒྱུའི་དུས་ཚོད་གཏན་འཁེལ་གསལ་པོ་བཟོ་དགོས་པ་དང་། ཁྱབ་བསྒྲགས་སམ་ཡང་ན་དུས་དེབ་སོགས་ལ་འགོད་སྐབས་ངེས་པར་དུ་བཟོ་འབེབས་བྱེད་མཁན་ལས་ཁུངས་དང་། གྲོས་འཆམ་བྱུང་དུས་སམ་ཡང་ན་ཆོག་མཆན་འགོད་མཁན་ལས་ཁུངས། ཆོག་མཆན་བཀོད་དུས་བཅས་གསལ་པོ་འགོད་དགོས།

ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ལ་གྲོས་འཆམ་བྱུང་བའམ་ཡང་ན་ཆོག་མཆན་ཐོབ་རྗེས་ཀྱི་ཉིན་སུམ་ཅུའི་ནང་ཚུན་ལ་ངེས་པར་དུ《བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་སྤྱི་བསྒྲགས》དང་《བོད་ལྗོངས་ཉིན་རེའི་ཚགས་པར》ཐོག་འགོད་དགོས།

《བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་སྤྱི་བསྒྲགས》ཐོག་བཀོད་པའི་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ཀྱི་མ་ཡིག་དེ་ཚད་ལྡན་མ་ཡིག་ཡིན།

དོན་ཚན་དོན་གཉིས་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་དང་དེའི་རྒྱུན་ལས་ཨུ་ཡོན་ལྷན་ཁང་གིས་བཟོ་འབེབས་དང་། བཟོ་བཅོས། མེད་པར་བཟོ་བ། འགྲེལ་བཤད་བཅས་བྱས་པའི་ས་གནས་རང་བཞིན་གྱི་ཁྲིམས་སྲོལ་དང་། རྒྱུན་ལས་ཨུ་ཡོན་ལྷན་ཁང་གིས་ཆོག་མཆན་སྤྲད་པའི་ས་གནས་རང་བཞིན་གྱི་ཁྲིམས་སྲོལ་དང་དེའི་འགྲེལ་བཤད་ཡིན་ཕྱིན། ངེས་པར་དུ་ཁྱབ་བསྒྲགས་བྱས་རྗེས་ཀྱི་ཉིན་སུམ་ཅུའི་ནང་ཚུན་དུ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ནས་རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་དང་རྒྱལ་སྲིད་སྤྱི་ཁྱབ་ཁང་ལ་སྙན་ཐོ་དཔོ་དགོས།

རང་སྐྱོང་སྲོལ་ཡིག་དང་ཁེར་སྤྱོད་སྲོལ་ཡིག་བཟོ་འབེབས་དང་། བཟོ་བཅོས། མེད་པར་བཟོ་བ། འགྲེལ་བཤད་བཅས་བྱེད་སྐབས། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་གྲོས་འཆམ་བྱུང་རྗེས་ཀྱི་ཉིན་སུམ་ཅུའི་ནང་ཚུན་དུ་རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་ཆོག་མཆན་ཞུ་དགོས།

དོན་ཚན་དོན་གསུམ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་ཆོག་མཆན་གནང་རོགས་ཞུས་པའི་རང་སྐྱོང་སྲོལ་ཡིག་དང་ཁེར་སྤྱོད་སྲོལ་ཡིག་ལ་རྒྱལ་ཡོངས་མི་དམངས་འཐུས་མི་ཚོགས་ཆེན་ཆེད་དོན་ཨུ་ཡོན་ལྷན་ཁང་གིས་ཞིབ་བཤེར་བྱས་ནས་བསམ་འཆར་རམ་ཡང་ན་བཟོ་བཅོས་རྒྱག་རྒྱུའི་གྲོས་འཆར་བཏོན་ཚེ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པས་གནས་ཚུལ་གསལ་བཤད་རྒྱག་དགོས་པ་དང་། བཟོ་བཅོས་རྒྱག་དགོས་ཚེ། ཁྲིམས་སྲོལ་བཟོ་བཅོས་ཀྱི་གོ་རིམ་ལྟར་བཟོ་བཅོས་བརྒྱབ་རྗེས། གཏན་འབེབས་ཀྱི་དུས་བཀག་ནང་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་འབྲེལ་ཡོད་ཆེད་དོན་ཨུ་ཡོན་ལྷན་ཁང་ལ་ལན་སྤྲོད་བྱེད་དགོས།

དོན་ཚན་དོན་བཞི་པ། ཆུད་བཙུགས་པའི་གྲོང་ཁྱེར་མི་དམངས་འཐུས་མི་ཚོགས་ཆེན་དང་དེའི་རྒྱུན་ལས་ཨུ་ཡོན་ལྷན་ཁང་གིས་ས་ཁོངས་མཐུན་སྦྱོར་ངང་གོང་འཕེལ་གཏོང་བའི་དགོས་མཁོར་གཞིགས་ནས་ས་གནས་རང་བཞིན་གྱི་ཁྲིམས་སྲོལ་མཉམ་དུ་བཟོས་ཏེ་སྲིད་འཛིན་ས་ཁོངས་དེ་གའམ་འབྲེལ་ཡོད་ས་ཁོངས་སུ་ལག་བསྟར་བྱས་ཆོག རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་དང་། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་འབྲེལ་ཡོད་ཆེད་དོན་ཨུ་ཡོན་ལྷན་ཁང་། རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པ་བཅས་ཀྱིས་ངེས་པར་དུ་དེར་མཛུབ་ཁྲིད་དང་མཐུན་སྦྱོར་བྱེད་རྒྱུར་ཤུགས་སྣོན་རྒྱག་དགོས།

དོན་ཚན་དོན་ལྔ་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་དགོས་མཁོ་དངོས་ལ་གཞིགས་ནས་གཞི་རིམ་དུ་ཁྲིམས་བཟོའི་འབྲེལ་གཏུག་ས་ཚིགས་བཙུགས་ཏེ་གཞི་རིམ་གྱི་མང་ཚོགས་དང་འབྲེལ་ཡོད་ཕྱོགས་ཁག་གིས་ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག་བཅས་ཀྱི་འཆར་ཟིན་དང་དེ་བཞིན་ཁྲིམས་བཟོའི་ལས་དོན་ཐད་བཏོན་པའི་བསམ་འཆར་གང་ལེགས་ཉན་དགོས།

དོན་ཚན་དོན་དྲུག་པ། རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ལས་དོན་ཚན་པས་ངེས་པར་དུ་ཁྲིམས་བཟོའི་དྲིལ་བསྒྲགས་ལས་དོན་ལ་ཤུགས་སྣོན་བརྒྱབ་ནས་རྣམ་པ་འདྲ་མིན་གྱི་ཐོག་ནས་ཁྲིམས་བཟོའི་ཆ་འཕྲིན་ཁྱབ་བསྒྲགས་དང་། གནས་ཚུལ་ངོ་སྤྲོད། དོ་ཁུར་ལན་སྤྲོད་པ་བཅས་བྱེད་དགོས།

དོན་ཚན་དོན་བདུན་པ། ས་གནས་རང་བཞིན་གྱི་ཁྲིམས་སྲོལ་དང་། རང་སྐྱོང་སྲོལ་ཡིག ཁེར་སྤྱོད་སྲོལ་ཡིག སྒྲིག་སྲོལ། དེ་བཞིན་ཚད་ལྡན་རང་བཞིན་གྱི་ཡིག་ཆ་གཞན་དག་བཅས་ལ། བཟོ་འབེབས་བྱེད་མཁན་ལས་ཁུངས་ཀྱིས་ཁྲིམས་ལུགས་གཅིག་གྱུར་ལ་སྲུང་སྐྱོབ་བྱེད་པའི་རྩ་དོན་དང་བསྒྱུར་བཅོས་གོང་འཕེལ་གཏོང་བའི་དགོས་མཁོར་གཞིགས་ནས་གཙང་བཤེར་བྱེད་དགོས།

ལེའུ་དགུ་པ། ཞར་བྱུང་།

དོན་ཚན་དོན་བརྒྱད་པ། རང་སྐྱོང་ལྗོངས་མི་དམངས་སྲིད་གཞུང་གི་སྒྲིག་སྲོལ་བཟོ་འབེབས་དང་། བཟོ་བཅོས། མེད་པར་བཟོ་བ་བཅས་བྱེད་སྐབས། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁྲིམས་བཟོའི་བཅའ་ཁྲིམས》དང་རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་གཏན་འབེབས་གཞིར་བཟུང་ལག་བསྟར་བྱེད་དགོས།

དོན་ཚན་དོན་དགུ་པ། སྲོལ་ཡིག་འདི་སྤྱི་བསྒྲགས་བྱས་ཉིན་ནས་ལག་བསྟར་བྱེད་དགོས། 2001ལོའི་ཟླ་5ཚེས་21ཉིན་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བདུན་པའི་ཚོགས་འདུ་ཐེངས་བཞི་པའི་ཐོག་གྲོས་འཆམ་བྱུང་བའི《བོད་རང་སྐྱོང་ལྗོངས་ཀྱི་ཁྲིམས་བཟོའི་སྲོལ་ཡིག》དེ་དུས་གཅིག་ཏུ་རྩིས་མེད་གཏོང་རྒྱུ།

(བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གཞུང་དོན་ཐིང་ནས་མཁོ་འདོན་བྱས)