ལའེ་ཅའོ་ཡིས་ལྷ་ས་པེ་ཅིང་ཚོད་ལྟའི་སློབ་འབྲིང་དང་ལྷ་ས་མངའ་རིས་མཐོ་རིམ་སློབ་འབྲིང་དུ་སློབ་གསོའི་ཤེས་ལྡན་པའི“ཚོགས་སྒྲིག་རྣམ་པའི”བོད་སྐྱོར་ལས་དོན་ལ་བརྟག་ཞིབ་གནང་བ།
ཉེ་ཆར། ལྗོངས་ཏང་ཨུད་ཀྱི་རྒྱུན་ཨུ་དང་རྩ་འཛུཌ་པུའི་པུའུ་ཀྲང་ལའེ་ཅའོ་ཡིས་ལྷ་ས་པེ་ཅིང་ཚོད་ལྟའི་སློབ་འབྲིང་དང་ལྷ་ས་མངའ་རིས་མཐོ་རིམ་སློབ་འབྲིང་དུ་ཕེབས་ནས་སློབ་གསོའི་ཤེས་ལྡན་པའི“ཚོགས་སྒྲིག་རྣམ་པའི”བོད་སྐྱོར་ལས་དོན་ལ་བརྟག་ཞིབ་དང་མཁྱེན་རྟོགས་གནང་བ་མ་ཟད། སློབ་གསོའི“ཚོགས་སྒྲིག་རྣམ་པའི”བོད་སྐྱོར་ཤེས་ལྡན་པར་འཚམས་འདྲིའང་གནང་བ་རེད།
ལྷ་ས་པེ་ཅིང་ཚོད་ལྟའི་སློབ་འབྲིང་དུ། ལའེ་ཅའོ་ཡིས་སློབ་མའི་ཉལ་ཁང་དང་། ཟ་ཁང་། སློབ་ཁྲིད་ཐོག་ཁང་། ནུས་མང་ཐོག་ཁང་། མཆོང་རྒྱུག་འཕེན་གསུམ་ལུས་རྩལ་ཐང་། ལུས་རྩལ་ཁང་། དཔེ་མཛོད་ཁང་བཅས་འཛུགས་སྐྲུན་དང་བེད་སྤྱོད་ཀྱི་གནས་ཚུལ་ལ་ས་གནས་ས་ཐོག་ཏུ་གཟིགས་ཞིབ་དང་སློབ་གྲྭའི་རིག་གནས་མྱོང་ལེན་གནང་ལ། སློབ་གྲྭའི་དོ་དམ་ལམ་སྲོལ་དང་། དགེ་སློབ་གསོ་སྐྱོང་། སློབ་ཚན་གསར་སྤེལ། སློབ་གསོ་ཚན་ཞིབ་སོགས་ཀྱི་ལས་དོན་མཁྱེན་རྟོགས་གནང་བ་མ་ཟད། པེ་ཅིང་གྲོང་ཁྱེར་གྱི་སློབ་གསོའི“ཚོགས་སྒྲིག་རྣམ་པའི”བོད་སྐྱོར་ཤེས་ལྡན་པ་དང་ངོ་ཐུག་གདོང་འཕྲད་ཀྱིས་བཞུགས་མོལ་ཡང་གནང་བ་རེད། ཁོང་གིས། རྒྱལ་སའི་སློབ་གསོའི་ཐོན་ཁུངས་ལ་བརྟེན་ནས་མདུན་ཕྱོགས་དང་རྒྱབ་ཕྱོགས་མཉམ་འགུལ་བྱེད་ཤུགས་ཆེ་རུ་གཏོང་བ་དང་། སློབ་ཁྲིད་ཀྱི་ཆུ་ཚད་མཐོ་རུ་གཏོང་བ། སློབ་ཚན་སྣེ་མང་ཅན་གྱི་མ་ལག་འཛུགས་པ། སློབ་གསོ་དོ་སྙོམས་འཕེལ་རྒྱས་ལ་སྐུལ་འདེད་གཏོང་བ་བཅས་ཀྱི་ཐད་བརྒྱུད་རོགས་ཁྲིད་གསུམ་གྱི་ནུས་པ་གང་ལེགས་འདོན་དགོས་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་སྐྱོང་ལ་སྐུལ་འདེད་གཏོང་རྒྱུ་གཙོ་རྐང་དུ་བཟུང་ནས་ཅིང་བོད་ཕུགས་བསམ་ཆེན་པོའི་འཛིན་གྲྭའི་རྣམ་གྲངས་ལག་ལེན་གཏིང་ཟབ་བསྟར་ནས། བོད་ཀྱི་སློབ་མ་མེས་རྒྱལ་གྱི་ས་ཆར་ལྟ་བར་ཁྲིད་དེ་ཆུང་དུས་ནས་ཀྲུང་གོའི་སེམས་པ་དང་ཀྲུང་ཧྭའི་བླ་སྲོག་གཏོད་དགོས་ཞེས་གསུངས།
ལྷ་ས་མངའ་རིས་མཐོ་རིམ་སློབ་འབྲིང་དུ་ཕེབས་སྐབས། ལའེ་ཅའོ་ཡིས་སློབ་གྲྭའི་དགེ་སློབ་དང་བྱམས་བརྩེའི་ངང་བཀའ་མོལ་གནང་ནས་ཞག་སྡོད་དང་། སློབ་གཉེར། དགེ་རྒན་སོགས་ཀྱི་གནས་ཚུལ་བཀའ་འདྲི་ཞིབ་ཕྲ་གནང་བ་མ་ཟད། ཧྲའན་ཤིས་ཞིང་ཆེན་གྱི་སློབ་གསོའི“ཚོགས་སྒྲིག་རྣམ་པའི”བོད་སྐྱོར་ཤེས་ལྡན་པས“བོད་དུ་ཡོང་དོན་གང་ཡིན་པ་དང་། བོད་དུ་ཅི་ཞིག་སྒྲུབ་པ། བོད་ནས་བྲལ་སྐབས་ཅི་ཞིག་འཇོག་ཐུབ་པ”བཅས་ཀྱི་བསམ་བློའི་འཁྱེར་སོ་བཅངས་ནས་གངས་ལྗོངས་ས་མཐོའི་སློབ་གསོའི་བྱ་གཞག་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་སྟོབས་ཤུགས་ལེགས་སྐྱེས་སུ་འབུལ་དགོས་པའི་སྐུལ་ལྕག་གནང་བ་རེད། ཁོང་གིས། སློབ་གསོའི་གནས་ཚུལ་ཞིབ་འཇུག་ལ་ཤུགས་སྣོན་རྒྱག་པ་དང་མངའ་རིས་ས་ཁུལ་གྱི་རྨང་གཞིའི་སློབ་གསོ་ཞན་པའི་གནད་དོན་ལ་དམིགས་ནས་དམིགས་སའི་རང་བཞིན་ལྡན་པའི་ངང་རྩིས་རིག་དང་། དངོས་ཁམས་རིག་པ། རྫས་འགྱུར་རིག་པ། སྐད་ཡིག་དང་ཕྱི་སྐད་བཅས་ཀྱི་སློབ་ཁྲིད་ཀྱི་ཚན་ཞིབ་ཆུ་ཚད་མཐོ་རུ་བཏང་སྟེ་སློབ་གཉེར་སྤུས་ཚད་ལེགས་སུ་ཏན་ཏིག་གཏོང་དགོས། སློབ་མའི་ལུས་སེམས་གཉིས་ཀའི་བདེ་ཐང་ཡོང་བར་སེམས་ཁུར་བྱས་ཏེ་བཟའ་བཏུང་དང་། སྦྱོང་བརྡར། སེམས་ཁམས་བདེ་ཐང་སོགས་ཕྱོགས་གང་ཅིའི་ཐད་ནས་འགོ་བཙུགས་ཏེ་ཕྱོགས་ཡོངས་འཕེལ་རྒྱས་འགྲོ་བར་སྐུལ་འདེད་གཏོང་དགོས་པའི་ནན་བཤད་གནང་བ་རེད།