ཉེ་ཆར། 《བོད་ལྗོངས་གསར་པ》(རྒྱ་ཡིག)དུས་དེབ་2025ལོའི་འདོན་ཐེངས་གཉིས་པའི་ཐོག་བོད་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་2024ལོའི་ཟླ་10ཚེས་21ཉིན་ལྗོངས་ཡོངས་ཀྱི་བཟོ་ལས་དཔེ་གསར་ཅན་ལ་སྐུལ་འདེད་གཏོང་བའི་ཚོགས་ཆེན་ཐོག་གནང་བའི《བཟོ་ལས་དཔེ་གསར་ཅན་གྱི་ཆུ་ཚད་མཐོ་རུ་ཧུར་ཐག་བཏང་ནས་བོད་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས》ཞེས་པའི་གསུང་བཤད་གལ་ཆེན་བཀོད་ཡོད་པ་རེད།

གཏམ་བཤད་དེ་ཁག་གསུམ་དུ་ཕྱེ་ཡོད་པ་སྟེ། གཅིག་ནས་ཆབ་སྲིད་ཀྱི་ཚུགས་གནས་མཐོ་རུ་དང་བསམ་བློའི་ངོས་འཛིན་ཟབ་ཏུ་བཏང་སྟེ། བཟོ་ལས་དཔེ་གསར་ཅན་ལ་སྐུལ་འདེད་གཏོང་བའི་འགན་འཁྲིའི་བསམ་པ་དང་ལས་འགན་སྒྲུབ་སེམས་ཆེ་རུ་ཏན་ཏིག་གཏོང་དགོས་པ་དང་། གཉིས་ནས་དུས་བབ་ཁོང་དུ་ཡང་དག་ཆུད་པ་དང་ལས་ཀའི་བསམ་ཕྱོགས་ཁ་གསལ་བཟོས་ཏེ། བོད་ཀྱི་བཟོ་ལས་དཔེ་གསར་ཅན་ལ་སྐུལ་འདེད་གཏོང་བའི་གདེང་ཚོད་དང་ཆོད་སེམས་བརྟན་དུ་གཏོང་དགོས་པ། གསུམ་ནས་དམིགས་ཚད་དང་ལས་འགན་ཁ་གསལ་བཟོ་བ་དང་ལས་ཀའི་གཙོ་གནད་འབུར་དུ་ཐོན་པར་བྱས་ཏེ། རང་ལྗོངས་ཀྱི་བཟོ་ལས་དཔེ་གསར་ཅན་འཕེལ་རྒྱས་གཏོང་བའི་ཆུ་ཚད་མཐོ་རུ་ཏན་ཏིག་གཏོང་དགོས་པ་བཅས་རེད།

གསུང་བཤད་ནང་བསྟན་དོན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བཟོ་ལས་དཔེ་གསར་ཅན་གྱི་རིགས་པའི་གཞུང་ལུགས་དང་ལག་ལེན་གྱི་གནད་དོན་གལ་ཆེན་རབ་དང་རིམ་པར་རྒྱས་བཤད་གལ་ཆེན་གནང་བ་མ་ཟད། དགོངས་པ་གསར་པ་དང་། ལྟ་བ་གསར་པ། ཆོད་གཏམ་གསར་པ་བཅས་རབ་དང་རིམ་པ་བཏོན་གནང་ནས། དུས་བབ་གསར་པའི་འོག་གི་བཟོ་ལས་ཅན་གྱི་ཆོས་ཉིད་རང་བཞིན་གྱི་ངོས་འཛིན་ཕུན་སུམ་ཇེ་ཚོགས་དང་འཕེལ་རྒྱས་ཆེན་པོ་བཏང་གནང་ལ། བཟོ་ལས་དཔེ་གསར་ཅན་ལ་སྐུལ་འདེད་གཏོང་བར་རྩ་བའི་གཞི་འཛིན་ས་དང་བྱ་སྤྱོད་ཀྱི་ཕྱོགས་སྟོན་ཡང་མཁོ་འདོན་གནང་ཡོད། རང་སྐྱོང་ལྗོངས་ཏང་ཨུད་ཀྱིས་བཟོ་ལས་དཔེ་གསར་ཅན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་ལག་བསྟར་མཐའ་གཅིག་ཏུ་བྱས་ཏེ། བོད་ཀྱི་དོན་དངོས་དང་མཐུན་པའི་བཟོ་ལས་དཔེ་གསར་ཅན་གྱི་བགྲོད་ལམ་དུ་བློ་བརྟན་འགྱུར་མེད་ངང་སྐྱོད་པ་དང་བཟོ་ལས་ཐོན་ལས་ཀྱི་གཞི་ཁྱོན་རྒྱུན་ཆད་མེད་པར་ཆེ་རུ་དང་གྲུབ་ཆ་རྒྱུན་ཆད་མེད་པར་ལེགས་སུ་བཏང་ནས། བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་ནུས་ལྡན་བྱས་ཡོད།

གསུང་བཤད་ནང་བསྟན་དོན། བཟོ་ལས་ནི་རྒྱལ་དམངས་དཔལ་འབྱོར་གྱི་སྲོག་རྩ་རེད་ལ། རྒྱལ་ཁབ་འཛུགས་པའི་གཞི་རྩ་དང་རྒྱལ་ཁབ་སྟོབས་ཆེར་གཏོང་བའི་རྨང་གཞིའང་རེད། བཟོ་ལས་དཔེ་གསར་ཅན་ལ་སྐུལ་འདེད་གཏོང་བ་ནི་ཏང་ཀྲུང་དབྱང་གིས་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་འཐབ་ཇུས་སྤྱི་ཡོངས་དང་འཛམ་གླིང་ལ་ལོ་བརྒྱར་འཕྲད་མ་མྱོང་བའི་འགྱུར་ལྡོག་ཆེན་པོར་སྤྱི་འདོམས་བྱེད་ཆེད་བཏོན་པའི་འཐབ་ཇུས་བཀོད་སྒྲིག་གལ་ཆེན་ཞིག་རེད། ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་དང་རྒྱ་ཆེའི་ལས་བྱེད་པས་བཟོ་ལས་དཔེ་གསར་ཅན་ལ་སྐུལ་འདེད་གཏོང་བའི་དོན་སྙིང་གལ་ཆེན་ལ་ངོས་འཛིན་གཏིང་ཟབ་བྱེད་པ་དང་། བཟོ་ལས་ལ་དམ་འཛིན་བྱེད་པ་ནི་འཕེལ་རྒྱས་ལ་དམ་འཛིན་བྱེད་པ་དང་། བཟོ་ལས་ལ་དམ་འཛིན་བྱེད་པ་ནི་སྒོ་དབྱེར་དམ་འཛིན་བྱེད་པ། བཟོ་ལས་ལ་དམ་འཛིན་བྱེད་པ་ནི་བརྟན་ལྷིང་ལ་དམ་འཛིན་བྱེད་པ་བཅས་ཡིན་པའི་བསམ་བློའི་འདུ་ཤེས་བརྟན་པོར་བཙུགས་ཏེ། ཕུགས་ཡུན་གྱི་མིག་རྒྱང་དང་། འགྱུར་མེད་ཀྱི་ཆོད་སེམས། དངོས་སྒྲུབ་ཀྱི་བྱེད་ཐབས་བཅས་ལ་བརྟེན་ནས་བོད་ཀྱི་བཟོ་ལས་དཔེ་གསར་ཅན་ལ་སྐུལ་འདེད་མགྱོགས་པོ་གཏོང་དགོས། གཅིག བཟོ་ལས་དཔེ་གསར་ཅན་ལ་སྐུལ་འདེད་མགྱོགས་པོ་གཏོང་བ་ནི་ཏང་ཀྲུང་དབྱང་གི་འཐབ་ཇུས་བཀོད་སྒྲིག་དོན་འཁྱོལ་བྱེད་པའི་བྱེད་ཐབས་ནུས་ལྡན་ཞིག་དང་། གཉིས། བཟོ་ལས་དཔེ་གསར་ཅན་ལ་སྐུལ་འདེད་མགྱོགས་པོ་གཏོང་བ་ནི་ས་མཐོའི་དཔལ་འབྱོར་སྤུས་ཚད་མཐོ་པོས་འཕེལ་རྒྱས་གཏོང་རིང་བརྒྱུད་དགོས་ངེས་ཀྱི་ལམ་བུ་ཞིག གསུམ། བཟོ་ལས་དཔེ་གསར་ཅན་ལ་སྐུལ་འདེད་མགྱོགས་པོ་གཏོང་བ་ནི་དམངས་འཚོ་ལེགས་སུ་གཏོང་བ་དང་མི་སེམས་གཅིག་ཏུ་སྒྲིལ་བའི་ལྡོག་མེད་ཀྱི་བླང་བྱ་ཞིག་བཅས་རེད།

གསུང་བཤད་ནང་ནན་བཤད་གནང་དོན། བོད་ཀྱི་བཟོ་ལས་དཔེ་གསར་ཅན་ལ་སྐུལ་འདེད་གཏོང་བ་ནི་རྒྱལ་ཁབ་ཀྱི་དགོས་མཁོ་དང་། བོད་ཀྱི་འཇོན་ནུས། མང་ཚོགས་ཀྱི་རེ་སྒུག འབྱུང་འགྱུར་གྱི་ཁ་ཕྱོགས་བཅས་ལ་སྤྱི་འདོམས་བྱེད་པའི་ཟུང་འབྲེལ་བྱེད་ས་རེད་ལ། དཔལ་འབྱོར་ཕྱོགས་སྒྱུར་འཕེལ་རྒྱས་གཏོང་བའི་འགག་གནད་སྒྲོལ་སའང་རེད། བཟོ་ལས་དཔེ་གསར་ཅན་ལ་སྐུལ་འདེད་གཏོང་བའི་ངོས་ནས་བརྗོད་ན། རང་ལྗོངས་ལ་འགྲན་ཟླ་བྲལ་བའི་འཕེལ་རྒྱས་ཀྱི་ལེགས་ཆ་ལྡན་ཡོད་པ་སྟེ། གཅིག་ནི་སྲིད་ཇུས་ཀྱི་ལེགས་ཆ་ཡིན་ཞིང་། ཏང་ཀྲུང་དབྱང་གིས་དུས་ཡུན་རིང་པོའི་ནང་བོད་ལ་དམིགས་བསལ་གྱི་གཟིགས་སྐྱོང་སྲིད་ཇུས་རབ་དང་རིམ་པ་བཏོན་ནས། རྨང་གཞིའི་འཛུགས་སྐྲུན་དང་། ཐོན་ལས། ནོར་ཁྲལ། དངུལ་རྩ། ཤེས་ལྡན་པ་སོགས་ལ་རྒྱབ་སྐྱོར་ཤུགས་ཆེན་བྱས་ཡོད་ལ། བཟོ་ལས་དཔེ་གསར་ཅན་ལ་སྐུལ་འདེད་གཏོང་བར་སྲིད་ཇུས་ཀྱི་འགན་སྲུང་ཡང་མཁོ་འདོན་བྱས་ཡོད། དེས་ན། ཀྲུང་དབྱང་གིས་བོད་ལ་བཏོན་པའི་དམིགས་བསལ་སྲིད་ཇུས་ཁག་ཁོང་དུ་བརྟན་པོ་ཆུད་པར་བྱེད་པ་དང་བཟོ་ལས་དཔེ་གསར་ཅན་ལ་སྐུལ་འདེད་གཏོང་བའི་རྒྱལ་ཁབ་ཀྱི་རྒྱབ་སྐྱོར་སྲིད་ཇུས་ཡག་པོ་སྤྱོད་པར་འབད་བརྩོན་ལྷོད་མེད་བྱས་ཏེ། ཐོན་ལས་འཁོར་སྦྲེལ་གྱི་རྣམ་གྲངས་ཆེ་གྲས་དང་། རྣམ་གྲངས་ལེགས་གྲས། ཁེ་ལས་ཆེ་གྲས། ཁེ་ལས་ལེགས་གྲས་བཅས་དེ་བས་མང་བ་འདྲེན་འགུགས་བྱས་ནས། སྲིད་ཇུས་ཀྱི་ཁེ་སྤོགས་འཕེལ་རྒྱས་ཀྱི་སྟོབས་ནུས་སུ་སྒྱུར་དགོས་པ་དང་། གཉིས་ནི་ཐོན་ཁུངས་ཀྱི་ལེགས་ཆ་ཡིན་ཞིང་། ཐོན་ཁུངས་ནི་བཟོ་ལས་དཔལ་འབྱོར་འཕེལ་རྒྱས་གཏོང་བའི་དངོས་པོའི་རྨང་གཞི་གལ་ཆེན་ཞིག་རེད། བོད་ལ་ཐོན་ཁུངས་ཧ་ཅང་ཕུན་སུམ་ཚོགས་པས་བཟོ་ལས་དཔེ་གསར་ཅན་འཕེལ་རྒྱས་གཏོང་བར་མི་མངོན་པའི་སྟོབས་ཤུགས་ཧ་ཅང་ཆེན་པོ་དང་མདུན་ལམ་ཡངས་པོ་ཡོད། དེས་ན། ཐོན་ཁུངས་ཀྱི་རང་སྤུས་ལ་གཞི་བཙུགས་ནས་སྔོག་འདོན་གཏིང་ཟབ་དང་བེད་སྤྱོད་གང་ལེགས་བྱས་ཏེ། ཐོན་ཁུངས་ཀྱི་ལེགས་ཆ་དེ་ཐོན་ལས་ཀྱི་ལེགས་ཆ་དང་འཕེལ་རྒྱས་ཀྱི་ལེགས་ཆར་ཏན་ཏིག་སྒྱུར་དགོས། གསུམ་ནི་ས་བབ་ཀྱི་ལེགས་ཆ་ཡིན་ཞིང་། བོད་ནི་ཨེ་ཤེ་ཡ་ལྷོ་མར་སྒོ་མོ་ཕྱེ་བའི་བགྲོད་ལམ་གལ་ཆེན་ཞིག་རེད་ལ། ནུབ་རྒྱུད་ཐོན་འབྱེད་ཆེ་མོ་དང་ཧི་མ་ལ་ཡའི་མཐའ་འཁོར་གྱི་དཔལ་འབྱོར་མཉམ་ལས་ཁུལ་གྱི་ས་ཁོངས་གལ་ཆེན་ཞིག་ཀྱང་རེད། དེས་ན། ས་བབ་ཀྱི་ལེགས་ཆ་དང་མཐའ་མཚམས་སྒོ་དབྱེའི་གོ་སྐབས་ལ་གཞི་བཙུགས་ནས། བཟོ་ལས་དཔེ་གསར་ཅན་ལ་སྐུལ་འདེད་མགྱོགས་པོ་བཏང་སྟེ། ཐོན་ལས་ཀྱི་ལེགས་ཆ་འདོན་སྤེལ་དང་། བཟོ་ལས་ཀྱི་ནུས་ཕྱོད་འདོན་སྤྲོད། འཕེལ་རྒྱས་ཀྱི་སྒུལ་ནུས་རྒྱུན་མཐུད་ཆེར་གཏོང་། སྒོ་དབྱེའི་གསོན་ཤུགས་འཕེལ་བ་བཅས་བྱེད་དགོས། བཞི་ནི་རྗེས་འཕེལ་གྱི་ལེགས་ཆ་ཡིན་ཞིང་། བོད་ཀྱི་ཐོན་ལས་འཕེལ་རྒྱས་ཀྱི་འགོ་འཛུགས་འགོར་བ་ནི་ཞན་ཆ་ཡིན་ལ་ལེགས་ཆའང་ཡིན། བལྟོས་བཅས་ཀྱི་སྟོང་ཆ་ཆེ་བའི་རྨང་གཞིའི་ཐོག་གདམ་ག་བྱ་གཞི་མང་བ་དང་འཕེལ་རྒྱས་ཀྱི་འགོ་ཚུགས་ཚད་གཞི་མཐོ་བས། སྔོན་ཐོན་གྱི་ཐོན་ལས་ལག་རྩལ་དང་དོ་དམ་བྱ་ཐབས་སྤྱད་དེ་སྟོབས་ཤུགས་གཅིག་སྡུད་བྱས་ནས་བཟོ་ལས་དཔེ་གསར་ཅན་ལ་སྐུལ་འདེད་གཏོང་བའི་མཛེས་སྡུག་ལྡན་པའི་འཆར་གཞི་འགོད་ཆོག དེས་ན། བོད་ཀྱི་དོན་དངོས་ལ་གཞི་བཙུགས་ནས་རྗེས་འཕེལ་གྱི་ལེགས་ཆ་འདོན་སྤེལ་གྱིས་སྔོན་ཐོན་ལ་སློབ་སྦྱོང་བྱས་ནས་ཧེ་བག་འཚོལ་བ་དང་ཉམས་མྱོང་དཔྱད་གཞིར་བཟུང་ནས་མཐོར་གཏོང་ལ་སྐུལ་འདེད་བཏང་སྟེ། འཕེལ་རྒྱས་ཀྱི་མྱུར་ཚད་དེ་བས་མགྱོགས་པ་དང་འཕེལ་རྒྱས་ཀྱི་སྤུས་ཚད་དེ་བས་མཐོ་བའི་ཐོག་ནས། དཔལ་འབྱོར་སྤུས་ཚད་མཐོ་པོས་འཕེལ་རྒྱས་འགྲོ་བཞིན་པའི་རྒྱལ་ཡོངས་ཀྱི་གོམ་སྟབས་ཀྱི་རྗེས་སུ་ཧུར་ཐག་སྙེག་དགོས།

གསུང་བཤད་ནང་བསྟན་དོན། གོ་སྐབས་དང་ལེགས་ཆ་མཐོང་བ་དང་དུས་མཚུངས། བོད་འདི་ཉིད་བཟོ་ལས་ཅན་ཐོག་མའི་དུས་ནས་དུས་འབྲིང་དུ་སྐྱོད་པའི་དུས་མཚམས་སུ་གནས་པ་དང་། གཞི་ཁྱོན་དང་སྤྱི་འབོར་ཉུང་བ་དང་། ཐོན་ལས་འཕེལ་རྒྱས་ཀྱི་ཆུ་ཚད་དམའ་བ། སྣེ་འདྲེན་ཁེ་ལས་ཉུང་བ། ཐོན་ལས་འཁོར་སྦྲེལ་ཐུང་བ་སོགས་མངོན་གསལ་དོད་པའི་ཞན་ཆའང་ཡོད་པ་གསལ་པོ་མཐོང་བར་བྱེད་དགོས། གནད་དོན་དེ་དག་ལ་ཚད་མཐོའི་མཐོང་ཆེན་གྱིས་བྱེད་ཐབས་ནུས་ལྡན་སྤྱད་དེ་ཐག་གཅོད་རྒྱུན་ཆད་མེད་པར་བྱེད་དགོས་པ་སྟེ། གཅིག་ནས་ཚན་རྩལ་གསར་གཏོད་མཐའ་འཁྱོངས་དང་། གཉིས་ནས་ལྗང་མདོག་འཕེལ་རྒྱས་མཐའ་འཁྱོངས། གསུམ་ནས་ཁྱུ་ཚོགས་དང་འཁོར་སྦྲེལ་མཐུན་སྦྱོར་མཐའ་འཁྱོངས། བཞི་ནས་ཡུལ་བབ་དང་བསྟུན་རྒྱུ་མཐའ་འཁྱོངས། ལྔ་ནས་འདུ་ཤེས་བསྒྱུར་རྒྱུ་མཐའ་འཁྱོངས་བཅས་བྱེད་དགོས།

གསུང་བཤད་ཀྱི་མཇུག་ཏུ། རིམ་ཁག་ཏང་ཨུད་དང་སྲིད་གཞུང་གིས་དུས་རབས་གསར་པ་དང་རྒྱང་ལམ་གསར་པར་བཟོ་ལས་དཔེ་གསར་ཅན་ལ་སྐུལ་འདེད་གཏོང་བའི་གཞི་རྩའི་ཆོས་ཉིད་ཁོང་དུ་གཏིང་ཟབ་ཆུད་པ་དང་། བཟོ་ལས་ཅན་གྱི་ཡོངས་ཁྱབ་ཆོས་ཉིད་དང་བོད་ཀྱི་དམིགས་བསལ་ཁྱད་ཆོས་ཟུང་འབྲེལ་མཐའ་འཁྱོངས་ཀྱིས་རྩེར་སོན་ཅན་དང་། རིག་ནུས་ཅན། ལྗང་མདོག་ཅན་བཅས་ཁ་ཕྱོགས་སུ་བྱས་ནས། བོད་ཀྱི་ཁྱད་ཆོས་ལྡན་པའི་དེང་རབས་བཟོ་ལས་མ་ལག་མགྱོགས་མྱུར་བཙུགས་ཏེ། རྒྱལ་ཡོངས་དང་མཉམ་དུ་བཟོ་ལས་དཔེ་གསར་ཅན་གཞི་རྩའི་ཆ་ནས་མངོན་འགྱུར་ཡོང་བར་འབད་བརྩོན་བྱེད་དགོས་པའི་ནན་བཤད་གནང་བ་སྟེ།

གཅིག་ནས་ཐོན་ལས་འཛུགས་སྐྲུན་ལ་སྤྱི་འདོམས་སྐུལ་འདེད་བཏང་སྟེ། ངེས་གནས་ཁ་གསལ་དང་ཁྱད་ཆོས་མངོན་གསལ་དོད་པའི་ཐོན་ལས་མ་ལག་འཛུགས་དགོས་ཤིང་། སྲོལ་རྒྱུན་ཐོན་ལས་སྒྱུར་བཀོད་རིམ་སྤོར་དང་། ཁྱད་ལྡན་ཐོན་ལས་ལེགས་སུ་དང་སྟོབས་ཆེར་གཏོང་བ། གསར་དར་ཐོན་ལས་སྐྱེད་སྲིང་དང་སྟོབས་ཆེར་གཏོང་བ། འབྱུང་འགྱུར་གྱི་ཐོན་ལས་འཆར་འགོད་འཛུགས་སྐྲུན་བཅས་ལ་དམ་འཛིན་ཡག་པོ་བྱེད་དགོས།

གཉིས་ནས་ཐོན་ལས་ལེགས་གཏོང་རིམ་སྤོར་ལ་སྐུལ་འདེད་བཏང་སྟེ། གནས་མང་འདེགས་སྐྱོར་དང་སྣ་མང་འཕེལ་རྒྱས་ཀྱི་ཐོན་ལས་ཀྱི་བཀོད་པ་ཆགས་པར་བྱེད་དགོས་ཤིང་། གྲངས་འཛིན་གྱི་ནུས་པ་འདོན་པར་སྐུལ་འདེད་ཧུར་ཐག་གཏོང་བ་དང་། བློ་བརྟན་འགྱུར་མེད་ངང་ལྗང་མདོག་ཅན་གྱི་སྒྱུར་བཀོད་བྱེད་པ། ལེགས་བསྡུས་ཅན་གྱི་འཕེལ་རྒྱས་ལ་སྐུལ་འདེད་ཧུར་ཐག་གཏོང་བ། རྒྱུན་སྲིང་ལྷོད་མེད་ངང་སྤུས་རྟགས་ཅན་ཡག་པོ་གཏོད་པ་བཅས་བྱེད་དགོས།

གསུམ་ནས་འཕེལ་རྒྱས་ཀྱི་གསོན་ཤུགས་གང་ལེགས་འཕེལ་བར་བྱས་ཏེ། གསར་གཏོད་སྣེ་ཁྲིད་དང་མཐུན་སྦྱོར་མཉམ་འགུལ་གྱི་ཐོན་ལས་སྐྱེ་ཁམས་སྐྱེད་སྲིང་བྱེད་དགོས་ཤིང་། གསར་གཏོད་སྣེ་ཁྲིད་ལ་བརྟེན་ནས་ཚད་བརྒལ་ཡོང་བའི་བྱ་སྤྱོད་དང་། སྒོ་དབྱེ་མཉམ་ལས་ལ་བརྟེན་ནས་ཐུན་མོང་གསར་གཏོད་ཀྱི་བྱ་སྤྱོད། མཐུན་སྦྱོར་མཉམ་སྐུལ་ལ་བརྟེན་ནས་མཐོར་གཏོང་གི་བྱ་སྤྱོད་བཅས་སྤེལ་དགོས་པ།

བཞི་ནས་ཕྱོགས་ཁག་གི་སྟོབས་ཤུགས་ཡག་པོ་སྤྱད་དེ། ཐབས་མང་མཉམ་སྤྱོད་དང་རིགས་དབྱེ་ཇུས་བསྟར་གྱིས་མཐུན་སྒྲིལ་རོགས་ལས་དང་ཆེད་ལས་ཐེག་ཁུར་གྱི་ཐོན་ལས་དཔུང་ཁག་གཏོད་དགོས་ཤིང་། སྤུས་ལེགས་ཁེ་ལས་དཔེ་གསར་ཅན་འཕེལ་རྒྱས་ཀྱི་འཆར་གཞི་དང་། ཁེ་ལས་མཁས་ཅན་དཔེ་གསར་ཅན་གསོ་སྐྱོང་གི་འཆར་གཞི། ཐོན་ལས་བཟོ་པ་དཔེ་གསར་ཅན་གསོ་སྐྱོང་གི་འཆར་གཞི་བཅས་ལག་བསྟར་བྱེད་དགོས།