ལིའུ་ཅང་གིས་ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་སུ་གཞི་རིམ་གྱི་སྤྱི་ཚོགས་བཅོས་སྐྱོང་ལས་དོན་ལ་བརྟག་ཞིབ་གནང་བ།
ཉེ་ཆར་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་དང་སྲིད་ཁྲིམས་ཨུ་ལྷན་གྱི་ཧྲུའུ་ཅི་ལིའུ་ཅང་གིས་ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་སུ་གཞི་རིམ་གྱི་སྤྱི་ཚོགས་བཅོས་སྐྱོང་ལས་དོན་ལ་བརྟག་ཞིབ་གནང་ཞིང་། ཁོང་གིས་གཞི་རིམ་བཅོས་སྐྱོང་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་དང་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་སློབ་སྦྱོང་དང་ལག་བསྟར་གཏིང་ཟབ་བྱས་ནས་རང་སྐྱོང་ལྗོངས་ཏང་ཨུད་ཀྱི་ལས་ཀའི་བླང་བྱར་གཞིགས་ཏེ་ཏང་འཛུགས་སྐྱོང་ལ་དམ་འཛིན་ཡག་པོ་བྱས་ནས་གཞི་རིམ་བཅོས་སྐྱོང་དང་གཞི་རིམ་གྱི་སྲིད་དབང་འཛུགས་སྐྱོང་ལ་ཁྲིད་སྟོན་བྱ་རྒྱུ་སྣེ་ཁྲིད་དུ་བྱས་ཏེ་སྤྱི་ཚོགས་བཅོས་སྐྱོང་དེང་རབས་ཅན་གྱི་ཆུ་ཚད་ཕྱོགས་ཡོངས་ནས་མཐོ་རུ་གཏོང་དགོས་པའི་ནན་བཤད་གནང་བ་རེད།
དང་ཐོག་ལིའུ་ཅང་གདོང་དཀར་ཁྲོམ་གཞུང་དགའ་གདོང་སྡེ་ཁུལ་གྱི་ཏང་དམངས་ཞབས་ཞུའི་ལྟེ་གནས་སུ་ཕེབས་ཏེ་ཞབས་ཞུའི་སྐར་ཁུང་ལ་གཟིགས་པ་དང་ཁྲོམ་གཞུང་སྲིད་དོན་ཞབས་ཞུའི་གནས་ཚུལ་གྱི་ངོ་སྤྲོད་གསན་ནས་སྡེ་ཁུལ་གྱི་ལས་བྱེད་པ་དང་། དྲ་མིག་པ། འདུམ་འགྲིག་པ་བཅས་དང་སྤེལ་རེས་གཏིང་ཟབ་གནང་བ་མ་ཟད་ དམངས་ཕན་ཞབས་ཞུའི་ལས་དོན་གྱི་བརྒྱུད་རིམ་དང་། དྲ་མིག་ཅན་གྱི་ཞབས་ཞུའི་དོ་དམ་ལས་ཀའི་ལམ་སྲོལ། འགལ་ཟླ་དང་རྩོད་གཞི་འདུམ་འགྲིག་ཐག་གཅོད་དང་སེལ་བའི་ཕན་འབྲས་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་རེད། ཁོང་གིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། གཞི་རིམ་ལ་དམ་འཛིན་ཆེན་པོ་བྱེད་པའི་སྟོན་ཕྱོགས་གསལ་པོ་བརྟན་པོར་འཛུགས་པ། དྲ་མིག་ཅན་གྱི་དོ་དམ་ལ་དམ་འཛིན་ཏན་ཏིག་བྱེད་པ། ཞིབ་ཚགས་ཅན་གྱི་ཞབས་འདེགས་ནུས་པ་ཆེ་རུ་གཏོང་བ། འགལ་ཟླ་དང་རྩོད་གཞི་གཞི་རིམ་དུ་ཐག་གཅོད་དང་ཐོན་མ་ཐག་ནས་སེལ་གང་ཐུབ་བཅས་བྱས་ཏེ་སྡེ་ཁུལ་ཞི་མཐུན་དང་སྒྲིག་ལམ་ལྡན་པའི་བདེ་སྐྱིད་ཁྱིམ་གཞིས་སུ་ཧུར་ཐག་བསྐྲུན་དགོས་ཞེས་གསུངས་པ་རེད།
ལིའུ་ཅང་གནས་ཆུང་སྡེ་ཁུལ་གྱི་ཏང་དམངས་ཞབས་ཞུའི་ལྟེ་གནས་སུ་ཕེབས་ཏེ་སྡེ་ཁུལ་གྱི་ཏང་འཛུགས་སྐྱོང་ལས་དོན་དང་དྲ་མིག་ཅན་དོ་དམ་སོགས་ཀྱི་གནས་ཚུལ་ངོ་སྤྲོད་གསན་ནས་སྡེ་ཁུལ་གྱི་སྡེ་ལས་ཀུང་སིའི་གཉེར་སྐྱོང་གནས་ཚུལ་མཁྱེན་རྟོགས་གནང་བ་མ་ཟད། གཞི་རིམ་གྱི་འཐབ་ཕྱོགས་དང་པོའི་ལས་དོན་པ་དང་བྱམས་བརྩེའི་ངང་བཀའ་མོལ་གནང་བ་རེད།
བརྟག་ཞིབ་གནང་རིང་། ལིའུ་ཅང་གིས་གཞི་རིམ་བཅོས་སྐྱོང་གི་རྣམ་བཤད་གལ་ཆེན་དང་སྤྱི་ཚོགས་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། ཏང་གི་ཕྱོགས་ཡོངས་ཀྱི་འགོ་ཁྲིད་མཐའ་འཁྱོངས་བྱེད་པ། “དོན་ཆེན་བཞིར”དམིགས་ནས“འཛུགས་གཏོད་བཞིར”ཤུགས་སྣོན་རྒྱག་པ། སྤྱི་ཚོགས་བརྟན་ལྷིང་སྲུང་སྐྱོང་དང་དམངས་འཚོ་འགན་སྲུང་ལེགས་གཏོང་གཙོ་གནད་དུ་བཟུང་བ་བཅས་བྱས་ནས་གཞི་རིམ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་གྱི་འཛུགས་སྐྱོང་ལ་རྒྱུན་མཐུད་ཤུགས་སྣོན་རྒྱག་དགོས། སྤྱི་འདོམས་མཐུན་སྦྱོར་ལ་ཤུགས་སྣོན་རྒྱག་པ་དང་། རིགས་དབྱེ་མཛུབ་ཁྲིད་མཐའ་འཁྱོངས་བྱེད་པ། ཏང་གི་རྩ་འཛུགས་དང་ལས་དོན་དཔལ་འབྱོར་གྱི་རྩ་འཛུགས་གསར་པ་དང་། སྤྱི་ཚོགས་ཀྱི་རྩ་འཛུགས་གསར་པ། ལས་ཞུགས་ཀྱི་ཚོགས་སྤྱི་གསར་པ་བཅས་ལ་ནུས་ལྡན་ངང་ཁྱབ་རྒྱུར་རྒྱུན་མཐུད་སྐུལ་འདེད་གཏོང་བ། མང་ཚོགས་ཀྱི་ནུས་སེམས་གཅིག་ཏུ་སྒྲིལ་བ་དང་། མང་ཚོགས་ལ་ཞབས་འདེགས་ཞུ་བ། མང་ཚོགས་ལ་ཕན་བདེ་བསྐྲུན་པ་བཅས་ཀྱི་ལས་དོན་ཏན་ཏིག་སྒྲུབ་པ་བཅས་བྱས་ཏེ། ཏང་རྩ་འཛུགས་ཀྱི་འབོད་སྐུལ་ནུས་པ་དང་། གོང་བུ་སྒྲིལ་ཤུགས། ཤུགས་རྐྱེན་ཐེབས་ཤུགས་བཅས་རྒྱུན་ཆད་མེད་པར་ཆེ་རུ་གཏོང་དགོས། གཞི་རིམ་དུ་དོན་འཁྱོལ་ལ་དམ་འཛིན་ཡག་པོ་དང་། མང་ཚོགས་ལ་ཞབས་འདེགས་ཞུ་བ། འཕེལ་རྒྱས་ལ་སྐུལ་འདེད་གཏོང་བ། བརྟན་ལྷིང་སྲུང་སྐྱོང་བཅས་ལ་ནུས་ཤུགས་ཡོད་རྒུས་དམ་འཛིན་ཡག་པོ་བྱས་ནས། ཚང་མ་ཞུགས་པ་དང་། ཚང་མས་འགན་འཁུར་བ། ཚང་མས་ལེགས་སྐྱེས་འབུལ་བ། ཚང་མས་མཉམ་སྤྱོད་ཐུབ་པ་བྱེད་དགོས་ཞེས་ནན་བཤད་གནང་བ་རེད།