ལིའུ་ཅང་གིས་ལྷ་ས་གྲོང་ཁྱེར་དུ་སློབ་གསོ་སློབ་ཁྲིད་ལས་དོན་ལ་བརྟག་ཞིབ་གནང་བ།
དཔྱིད་དུས་སློབ་འགོ་ཚུགས་པ་དང་སྦྲགས། ཚེས་13ཉིན་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་དང་རང་སྐྱོང་ལྗོངས་ཏང་ཨུད་སློབ་གསོ་ལས་དོན་འགོ་ཁྲིད་ཚོགས་ཆུང་གི་ཙུའུ་ཀྲང་ལིའུ་ཅང་ལྷ་ས་གྲོང་ཁྱེར་ཁྲེང་ཀོན་ཆུས་དན་བག་སློབ་ཆུང་དང་། བོད་ལྗོངས་ལས་རིགས་ལག་རྩལ་སློབ་གླིང་། ལྷ་ས་གྲོང་ཁྱེར་སློབ་འབྲིང་དྲུག་པ་བཅས་སུ་ཕེབས་ཏེ་སློབ་གསོ་སློབ་ཁྲིད་དང་སློབ་གྲྭའི་བདེ་འཇགས་སོགས་ཀྱི་ལས་དོན་ལ་བརྟག་ཞིབ་གནང་ཞིང་། ཁོང་གིས་སློབ་གསོའི་ལས་དོན་དང་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ཕྱོགས་ཡོངས་ནས་ལག་བསྟར་བྱས་ཏེ། རང་སྐྱོང་ལྗོངས་ཏང་ཨུད་ཀྱི་ལས་ཀའི་བླང་བྱ་གཞིར་བཟུང་། སྤྱོད་བཟང་མི་སྐྱོང་གི་རྩ་བའི་ལས་འགན་བློ་བརྟན་འགྱུར་མེད་ངང་དོན་འཁྱོལ་ཡག་པོ་བྱས་ཏེ། “དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་བརྒྱབ་ནས་མི་དམངས་བློ་ཡིད་ཚིམ་པའི་སློབ་གསོ་ཏན་ཏིག་ངང་སྒྲུབ་པ་དང་ཀུན་སྤྱོད་དང་། ཤེས་རིག ལུས་རྩལ། མཛེས་དཔྱོད། ངལ་རྩོལ་བཅས་ཕྱོགས་ཡོངས་ནས་འཕེལ་རྒྱས་གཏོང་བའི་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་གསོ་སྐྱོང་བྱེད་དགོས་པའི་ནན་བཤད་གནང་བ་རེད།
ཁྲེང་ཀོན་ཆུས་དན་བག་སློབ་ཆུང་དུ་ལིའུ་ཅང་གིས་ཐག་རྩེད་དང་། བོད་ཡིག་ཡིག་གཟུགས། སློབ་ཚན་གྱི་འཁྲབ་གཞུང་འཁྲབ་སྟོན་བཅས་ལ་གཟིགས་པ་དང་། དགེ་སློབ་དང་བྱམས་བརྩེའི་ངང་སྤེལ་རེས་གནང་བ། སློབ་གྲྭས་བྱང་ཚད་སློབ་གསོར་སྐུལ་འདེད་ཤུགས་ཆེན་བཏང་ནས་ཐོབ་པའི་ཕན་འབྲས་ལ་ཁས་ལེན་གང་ལེགས་གནང་བ་དང་། སློབ་མ་རྣམས་ལ་སློབ་སྦྱོང་ཡག་པོ་དང་། འཇོན་ཐང་ཆེར་གཏོང་། གཟུགས་སྟོབས་འཕེལ་བ། དེ་བས་ལེགས་པའི་སྒོ་ནས་འཚར་ལོངས་ཡོང་བ་དང་ཤེས་ལྡན་པར་འགྱུར་བར་སྐུལ་ལྕག་གནང་སྟེ། དགེ་རྒན་གྱིས་སློབ་གསོ་མཁས་ཅན་གྱི་སྙིང་སྟོབས་དར་སྤེལ་སྒོས་ལག་ལེན་ཤུགས་ཆེན་བསྟར་ནས་སློབ་མར་མི་ཚེའི་གོམ་པ་དང་པོ་ཡག་པོ་སྤོ་རྒྱུར་ཁྲིད་སྟོན་བྱེད་པ་དང་སྤྲོ་སེམས་དང་བྱམས་བརྩེ་ཆེན་པོས་དཔེ་ཁྲིད་མི་སྐྱོང་གི་གྲུབ་འབྲས་གསར་པ་རྒྱུན་ཆད་མེད་པར་གཏོད་རྒྱུའི་རེ་བ་ཡོད་ཅེས་གསུངས་པ་རེད།
བོད་ལྗོངས་ལས་རིགས་ལག་རྩལ་སློབ་གླིང་གི་ལས་ཞུགས་ཞབས་ཞུའི་ཚོམས་ཆེན་དུ་ལིའུ་ཅང་གིས་སློབ་གྲྭའི་སྤྱིའི་གནས་ཚུལ་ངོ་སྤྲོད་གསན་པ་དང་། སློབ་གྲྭའི་ཐབས་ལམ་མང་པོའི་ལས་ཞུགས་དང་རང་བརྟེན་ལས་གཏོད་ལ་ཐོབ་པའི་གྲུབ་འབྲས་ལ་ཁས་ལེན་གང་ལེགས་གནང་བ་མ་ཟད། ཚང་མས་ཁྲོམ་རར་ཁ་ཕྱོགས་པ་དང་། འཕེལ་རྒྱས་ལ་ཞབས་འདེགས་ཞུ་བ། ལས་ཞུགས་ལ་སྐུལ་འདེད་གཏོང་བ་བཅས་ཀྱི་སློབ་གཉེར་ཁ་ཕྱོགས་མཐའ་འཁྱོངས་དང་སློབ་ཁྲིད་བྱེད་སྟངས་སྒྱུར་བཅོས་དང་། རིག་ཚན་བཀོད་སྒྲིག་ལེགས་སུ་གཏོང་བ། ཐོན་སློབ་མཉམ་འདྲེས་གཏིང་ཟབ་ཏུ་གཏོང་བ། སློབ་ཁེ་མཉམ་ལས་ཤུགས་ཆེར་གཏོང་བ། ལས་རིགས་སློབ་གསོའི་འཕྲོད་ནུས་དང་ཡིད་དབང་འགུགས་ཤུགས་རྒྱུན་ཆད་མེད་པར་ཆེ་རུ་གཏོང་བ། བཟོ་རྩལ་མཁས་ཅན་དང་རྩལ་ནུས་ཆེ་བའི་ཤེས་ལྡན་པ་དེ་བས་མང་བ་གསོ་སྐྱོང་བཅས་བྱས་ནས། སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་སྐྲུན་ཆེད་སྲ་ཞིང་བརྟན་པའི་ཤེས་ལྡན་པའི་འདེགས་སྐྱོར་བྱེད་དགོས་པའི་སྐུལ་ལྕག་གནང་བ་རེད།
ལྷ་ས་གྲོང་ཁྱེར་སློབ་འབྲིང་དྲུག་པར་ལིའུ་ཅང་གིས་སློབ་གྲྭའི་ལས་རེས་ཁང་དང་། སློབ་ཁང་། སློབ་མའི་ཉལ་ཁང་། སློབ་གྲྭའི་ཟ་ཁང་བཅས་སུ་ཕེབས་པ་དང་དགེ་སློབ་ཀྱི་ཁ་གྲངས་དང་། སློབ་ཁྲིད་དོ་དམ། སློབ་གྲྭའི་བདེ་འཇགས་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་སློབ་གཉེར་ཚད་ལྡན་གྱི་བླང་བྱ་དོན་འཁྱོལ་ནན་པོ་དང་། སློབ་མའི་ཕྱོགས་བསྡུས་བྱང་ཚད་ཕྱོགས་ཡོངས་ནས་མཐོ་རུ་གཏོང་བ། སློབ་མའི་ལུས་སེམས་བདེ་ཐང་ལ་ཚད་མཐོའི་དོ་ཁུར། བཟའ་བཅའི་བདེ་འཇགས་དང་སློབ་གྲྭའི་བདེ་འཇགས་ལ་དོ་དམ་དང་དམ་འཛིན་ཡག་པོ། བདེ་འཇགས་ཀྱི་དོན་རྐྱེན་མཐའ་གཅིག་ཏུ་སྔོན་འགོག་བཅས་བྱས་ནས། སློབ་གྲྭའི་བདེ་འཇགས་ཀྱི་མཐའ་ཚད་བརྟན་པོ་སྲུང་དགོས་པའི་བླང་བྱ་བཏོན་གནང་བ་རེད།