ཚེས་12ཉིན་གྱི་ཕྱི་དྲོར། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་ཡིས་རུ་སྣེ་ཁྲིད་དེ་ལྷ་ཀླུ་འདམ་རའི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དུ་ཕེབས་ནས། ལྷ་ཀླུ་འདམ་ར་དང་དེའི་མཐའ་འཁོར་གྱི་སྐྱེ་ཁམས་ཁོར་ཡུག་བཅོས་སྐྱོང་བྱེད་ཤུགས་ཆེ་རུ་གཏོང་བའི་རྣམ་གྲངས་ཀྱི་འཕེལ་རིམ་གནས་ཚུལ་ལ་ས་གནས་ས་ཐོག་ཏུ་བརྟག་ཞིབ་གནང་བ་རེད། ལྷ་ས་གྲོང་ཁྱེར་གྱི་འབྲེལ་ཡོད་ཚན་པའི་བློ་མཐུན་གྱིས་བརྟག་ཞིབ་གནང་སྐབས་ཕེབས་རོགས་ཞུས་པ་རེད།

དབང་ཧའེ་ཀྲོའུ་དང་བཅས་པས་སྐོར་སྲུང་བགྲོད་ལམ་བརྒྱུད་གཟིགས་ཞིབ་གནང་བར་ཕེབས་ནས་སྲུང་སྐྱོང་ཁུལ་གྱི་རང་བྱུང་ཁོར་ཡུག་དང་། ཆུ་སྤུས། སྔོ་ཁེབས། སྐྱེ་དངོས་སྣ་མང་རང་བཞིན་སོགས་སྲུང་སྐྱོང་བྱས་ཚུལ་ས་གནས་ས་ཐོག་ཏུ་མཁྱེན་རྟོགས་གནང་བ་དང་། འདམ་ར་སྲུང་སྐྱོང་འཆར་འགོད་དང་འབྲེལ་ཡོད་ལས་དོན་ལ་མཛུབ་ཁྲིད་ཞིབ་ཚགས་གནང་བ་མ་ཟད། བསམ་འཆར་དང་གྲོས་འགོ་ཡང་བཏོན་གནང་ཞིང་། ཁོང་གིས། ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་ལག་བསྟར་གཏིང་ཟབ་བྱས་ཏེ་འདམ་ར་དང་དེ་བཞིན་དེའི་མཐའ་འཁོར་གྱི་སྐྱེ་ཁམས་ཁོར་ཡུག་བཅོས་སྐྱོང་བྱེད་ཤུགས་ཆེ་རུ་གཏོང་བའི་རྣམ་གྲངས་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་གཏོད་རྒྱུར་སྐུལ་འདེད་གཏོང་བའི་དམ་འཛིན་བྱ་གཞི་གལ་ཆེན་ཞིག་ཏུ་བརྩིས་ནས། རྣམ་གྲངས་དེ་རང་བྱུང་ཁོར་ཡུག་སྲུང་སྐྱོང་གི་དཔེ་མཚོན་ལས་གྲྭ་དང་སྐྱེ་ཁམས་ཀྱི་དམངས་ཕན་ལས་གྲྭ་ཞིག་ཏུ་ཏན་ཏིག་བསྐྲུན་དགོས་ཞེས་གསུངས་པ་རེད།

དབང་ཧའེ་ཀྲོའུ་ཡིས་རང་བྱུང་སྲུང་སྐྱོང་ཁུལ་དང་། སྐྱེ་ཁམས་བར་ཆོད་ཁུལ། ཚན་རིག་ཁྱབ་གདལ་སློབ་གསོའི་ཁུལ། རིག་གནས་སྤྲོ་གསེང་རོལ་རྩེད་ཁུལ་སོགས་ནུས་པའི་ས་ཁོངས་འཆར་འགོད་ལུགས་མཐུན་བྱས་ཏེ། མཉམ་འདྲེས་ནུས་ལྡན་དང་ཚན་རིག་དང་མཐུན་པའི་སྒོ་ནས་བཀོད་སྒྲིག་བྱས་ནས་འདམ་ར་འདི་ཉིད་མི་དང་རང་བྱུང་ཁམས་ཞི་མཐུན་མཉམ་གནས་ཀྱི་གྲོང་ཁྱེར་གྱི་ལྗང་མདོག་བར་མཐོངས་སུ་ཧུར་ཐག་བསྐྲུན་དགོས། གནད་དོན་གྱི་ཕྱོགས་སྟོན་དང་། དམིགས་ཚད་ཀྱི་ཕྱོགས་སྟོན། མཇུག་འབྲས་ཀྱི་ཕྱོགས་སྟོན་བཅས་རྒྱུན་འཁྱོངས་བྱས་ཏེ“ཉིན་ལྟར་མཐུན་སྦྱོར་བྱེད་པ་དང་། གཟའ་འཁོར་རེར་སྙན་ཞུ་འབུལ་བ། ཟླ་རེར་ཕྱོགས་སྡོམ་རགས་ཙམ་བྱེད་པ”བཅས་ཀྱི་ལམ་ལུགས་ལག་བསྟར་ནན་པོ་བྱས་ནས། དུས་བཀག་ལྟར་རྣམ་གྲངས་འཛུགས་སྐྲུན་གྱི་འཕེལ་རིམ་གནས་ཚུལ་བཀོད་གཏོང་གིས་རྣམ་གྲངས་འཛུགས་སྐྲུན་བརྟན་ལ་གོ་རིམ་ལྡན་པའི་སྒོ་ནས་ལག་བསྟར་བྱ་རྒྱུར་སྐུལ་འདེད་གཏོང་དགོས། རྣམ་གྲངས་འཛུགས་སྐྲུན་གྱི་བརྒྱུད་རིམ་ཧྲིལ་པོ་དང་ཕྱོགས་ཡོངས་ཀྱི་ལྟ་འདོམས་ལ་མུ་མཐུད་ཤུགས་སྣོན་རྒྱག་པ་དང་ལས་གྲྭའི་མྱུར་ཚད་དང་སྤུས་ཚད་ཀྱི་འགག་སྒོ་ཚོད་འཛིན་ནན་པོ་བྱས་ཏེ་འཛུགས་སྐྲུན་གྱི་ལས་འགན་ཁག་སྤུས་ཚད་མཐོ་ལ་ལས་ཕྱོད་ཆེ་བའི་སྒོ་ནས་ལེགས་འགྲུབ་ཡོང་བའི་འགན་ལེན་གྱིས་འཆར་འགོད་ཀྱི་འཆར་གཞི་སྔ་ཙམ་དོན་དངོས་སུ་འགྱུར་བར་བྱེད་དགོས། འགན་འཁྲི་དང་བྱེད་ཐབས་དོན་འཁྱོལ་ལ་དམ་འཛིན་ནན་པོ་བྱས་ཏེ་རྒྱུན་གཏན་གྱི་སྐོར་སྲུང་སྐོར་ཞིབ་དང་མེ་ཟོན་དྲིལ་བསྒྲགས་ལ་ཤུགས་སྣོན་བརྒྱབ་ནས་མེ་ཟོན་ཉེན་བརྡ་གཏོང་བ་དང་ལྟ་ཞིབ་ཚད་ལེན་དང་། བཀོད་གཏོང་བཀོད་འདོམས། འཕྲལ་སྡོམ་མེ་གསོད་སོགས་ཚན་རྩལ་གྱི་འདེགས་སྐྱོར་བྱེད་ཤུགས་ཆེ་རུ་བཏང་སྟེ། འདམ་རའི་སྐྱེ་ཁམས་ཐོན་ཁུངས་སྲུང་སྐྱོང་ནུས་ལྡན་མཐའ་གཅིག་ཏུ་བྱེད་དགོས་པའི་ནན་བཤད་གནང་བ་རེད།