ཚེས་7ཉིན་གྱི་སྔ་དྲོར། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་རེན་ཝེ་ཡིས་སྲིད་གཞུང་གི་ཆེད་དོན་ཚོགས་འདུ་གཙོ་སྐྱོང་གནང་ནས་རང་ལྗོངས་ཀྱི“ལོ་ལྔ་ཚན་བཅོ་ལྔ་པའི”འཆར་འགོད་རྩོམ་འབྲིའི་ལས་དོན་བཀོད་གཏོང་གནང་ནས“ལོ་ལྔ་ཚན་བཅོ་ལྔ་པའི”འཕེལ་རྒྱས་ཀྱི་དམིགས་ཚད་དང་། འཕེལ་རྒྱས་ཀྱི་བསམ་ཕྱོགས། བྱ་ཐབས་གལ་ཆེན་སོགས་ཀྱི་དོན་གནད་ལ་ཞིབ་འཇུག་གནང་བ་མ་ཟད། གོམ་སྟབས་རྗེས་མའི་ལས་དོན་བཀོད་སྒྲིག་ཀྱང་གནང་བ་རེད།

རེན་ཝེ་ཡིས། རིམ་ཁག་འབྲེལ་ཡོད་སྡེ་ཚན་ཁག་གིས“ལོ་ལྔ་ཚན་བཅོ་ལྔ་པ”ལག་ལེན་བསྟར་སྐབས་ཀྱི་ལོ་རྒྱུས་ཀྱི་ཁ་ཕྱོགས་དང་རྒྱལ་ཡོངས་སྤྱི་ཡོངས་ཁྲོད་ཀྱི་བོད་ཀྱི་ལོ་རྒྱུས་འགན་འཁྲི་ཁོང་དུ་གཏིང་ཟབ་ཆུད་པར་བྱས་ནས་འཕེལ་རྒྱས་ཀྱི་འདུ་ཤེས་གསར་པ་ཆ་ཚང་དང་། གནད་འཁེལ། ཕྱོགས་ཡོངས་བཅས་ཀྱི་སྒོ་ནས་ལག་ལེན་བསྟར་ཏེ་འཕེལ་རྒྱས་ཀྱི་དམིགས་ཚད་དང་གཙོ་གནད་ལས་འགན་གྱི་བྱ་ཐབས་གོ་རིམ་ལྡན་པའི་ངང་ཇུས་འགོད་བྱེད་དགོས་པ་དང་། རྨང་གཞིའི་སྒྲིག་བཀོད་འཛུགས་སྐྲུན་ལ་སྐུལ་འདེད་ཤུགས་ཆེན་བཏང་ནས་ཆུ་ཚད་དེ་བས་མཐོ་པོས་ཕན་ཚུན་སྦྲེལ་མཐུད་ཡོང་བ་བྱེད་དགོས། བོད་ཀྱི་ཁྱད་ཆོས་དང་འཚམ་པའི་དེང་རབས་ཐོན་ལས་ཀྱི་མ་ལག་བཏོད་དེ་ཡུལ་བབ་དང་བསྟུན་ནས་ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་དགོས། རྒྱལ་ཁབ་ཀྱི་ས་ཁོངས་འཐབ་ཇུས་སྣེ་འདྲེན་དུ་བྱ་རྒྱུ་འབྲེལ་མཐུད་ཀྱིས་ས་ཁོངས་འཕེལ་རྒྱས་ཀྱི་སྤྱིའི་བཀོད་པ་སྔར་བས་ལེགས་སུ་གཏོང་དགོས། སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་བདེ་འཇགས་ལ་སྤྱི་འདོམས་བྱས་ཏེ་སྤྱི་ཚོགས་བརྟན་ལྷིང་དང་། སྐྱེ་ཁམས་ཁོར་ཡུག་སྲུང་སྐྱོང་། མཐའ་སྟོབས་མཐའ་བརྟན། བདེ་འཇགས་ཐོན་སྐྱེད་སོགས་ཀྱི་མཐའ་ཚད་བརྟན་པོ་སྲུང་དགོས། དམངས་འཚོ་རྒྱུན་མཐུད་འགན་སྲུང་དང་ལེགས་སུ་བཏང་ནས་ལས་ཞུགས་དང་། འབབ་འཕར། སློབ་གསོ། སྨན་བཅོས། རིག་གནས་སོགས་མང་ཚོགས་དང་ཐད་ཀར་འབྲེལ་བ་ཆེ་ཤོས་ཡོད་པ་དང་། མང་ཚོགས་ཀྱིས་དོ་སྣང་ཆེ་ཤོས་བྱེད་པ། མང་ཚོགས་ལ་འཕྲལ་མཁོ་ཆེ་ཤོས་ཡིན་པ་བཅས་ཀྱི་ཁེ་ཕན་གྱི་གནད་དོན་ཐག་གཅོད་ཡག་པོ་བྱེད་དགོས། ཕྱོགས་ཡོངས་ནས་སྒྱུར་བཅོས་སྔར་བས་ཟབ་ཏུ་བཏང་སྟེ་ཆུ་ཚད་མཐོན་པོས་ཕྱི་ཕྱོགས་ལ་སྒོ་མོ་འབྱེད་པར་སྐུལ་འདེད་གཏོང་དགོས། གཙོ་གནད་རྣམ་གྲངས་ལ་འདེགས་སྐྱོར་བྱེད་ཤུགས་ཆེ་རུ་བཏང་ནས་མ་དངུལ་འགན་སྲུང་ཡག་པོ་བྱེད་དགོས། ཐོག་མཐའ་བར་གསུམ་དུ་ཏང་གི་འགོ་ཁྲིད་མཐའ་འཁྱོངས་དང་དེར་ཤུགས་སྣོན་བརྒྱབ་སྟེ་འཆར་འགོད་ནང་ཀྲུང་དབྱང་གི་དགོངས་དོན་མཚོན་པ་དང་། བོད་ཀྱི་དོན་དངོས་དང་འཚམ་པ་དང་། མི་དམངས་ཀྱི་རེ་སྒུག་དང་མཐུན་པའི་འགན་ལེན་བྱེད་དགོས་པ་བཅས་ཀྱི་ནན་བཤད་གནང་ཡོད།