ཉིན་ཤས་གོང་། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་བཅས་ཡིན་པའི་ཡན་ཅིན་ཧའེ་ཡིས་སྲིད་གཞུང་གི་ལས་དོན་སྙན་སྒྲོན་ལ་གྲོས་ཞིབ་གནང་སྐབས། བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ཕྱོགས་ཡོངས་ནས་ལག་བསྟར་དོན་འཁྱོལ་བྱས་ཏེ། “དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་བརྒྱབ་ནས། གདེང་ཚོད་ཆེར་གཏོང་དང་། དམངས་སེམས་གཅིག་སྒྲིལ། མི་སེམས་དྲོ་བ། སེམས་མཐུན་གཏོད་པ་བཅས་བྱས་ཏེ་ལག་གདང་སྦྲེལ་ནས་ཀྲུང་གོའི་ལུགས་ཀྱི་དེང་རབས་ཅན་གྱི་བོད་ཀྱི་ལག་ལེན་གྱི་ལེའུ་གསར་རྐྱང་ཞིག་རྩོམ་དགོས་པའི་ནན་བཤད་གནང་བ་རེད།

ཡན་ཅིན་ཧའེ་ཡིས་སྲིད་གཞུང་གི་ལས་དོན་སྙན་སྒྲོན་ལ་རྦད་དེ་མོས་མཐུན་ཡོད་ཅེས་གསུངས་ཤིང་། ཁོང་གིས་ཙུང་ལི་ལི་ཆང་གིས་གནང་བའི་སྲིད་གཞུང་གི་ལས་དོན་སྙན་སྒྲོན་ཧྲིལ་བོར་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་ཁྱབ་པ་དང་། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པ་དང་། དེ་བཞིན་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་དགོངས་དོན་ཕྱོགས་ཡོངས་ནས་དོན་འཁྱོལ་གནང་བ། གྲུབ་འབྲས་ཕྱོགས་སྡོམ་དངོས་ཐོག་བདེན་འཚོལ་ཡིན་པ། གཏན་འཁེལ་བྱས་པའི་དམིགས་ཚད་ཚན་རིག་དང་མཐུན་ཞིང་ལུཌ་དང་མཐུན་པ། ལས་དོན་བཀོད་སྒྲིག་བརྒྱུད་རིམ་ལྡན་ལ་ཕྱོགས་ཡོངས་ལ་ཁྱབ་པ་ཞིག་ཡོད་པས། “དངོས་སྒྲུབ་ཀྱི་ལེའུ”དང“འབད་འཐབ་ཀྱི་ལེའུ”“གནད་སྨིན་གྱི་ཇུས”“དམངས་འཚོའི་གྲོས་འདོན”བཅས་རེད་ཅེས་གསུངས་པ་རེད།

ཡན་ཅིན་ཧའེ་ཡིས་གསུངས་དོན། འདས་ཟིན་པའི་ལོ་གཅིག་ནི་བོད་ཀྱིས་འགག་སྒྲོལ་དཀའ་སེལ་དང་། འབད་འབུངས་ཡར་བརྩོན། ཞུམ་མེད་མདུན་སྐྱོད། གྲུབ་འབྲས་འབུར་ཐོན། མི་རིགས་མཐུན་སྒྲིལ། མི་སེམས་གཅིག་སྒྲིལ་བཅས་ཀྱི་ལོ་ཞིག་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག རང་སྐྱོང་ལྗོངས་ཏང་ཨུད་ཀྱིས་ལྗོངས་ཡོངས་ཀྱི་མི་རིགས་ཁག་གི་མི་དམངས་ལ་མཐུན་སྒྲིལ་སྣེ་ཁྲིད་བྱས་ཏེ“དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་བརྒྱབ་ནས་དཔལ་འབྱོར་དང་སྤྱི་ཚོགས་གནོན་ཐེག་མདུན་སྐྱོད་དང་དུས་ཚིགས་རེ་རེ་བཞིན་ལེགས་སུ་འགྲོ་བར་སྐུལ་འདེད་བཏང་ཡོད། དིང་རིའི་ས་ཡོམ་རིམ་པ་6.8ཀྱི་འཕྲལ་སྡོམ་རོགས་སྐྱོབ་ལས“ཀྲུང་གོའི་མྱུར་ཚད”གསལ་པོར་མངོན་པ་དང་། བར་བརྒལ་བཀོད་སྒྲིག་ལས“ཀྲུང་གོའི་སྟོབས་ཤུགས”མཚོན་པ། སླར་གསོ་བསྐྱར་སྐྲུན་ལས“ཀྲུང་གོའི་ཐེག་པ་ཁུར་ལེན”མཚོན་ཡོད། ཏང་གི་འོད་ཟེར་མཐའ་མཚམས་ཕྱོགས་སུ་འཕྲོས། མཐའ་མཚམས་མི་དམངས་སེམས་པ་ཏང་ལ་ཕྱོགས། དེང་གི་བོད་ལྗོངས་སུ་མི་སེམས“ཏང”ལ་ཕྱོགས་ནས་བོད་ཀྱི་མི་རིགས་ཁག་གི་མང་ཚོགས་ཀྱིས་སྤྱི་ཁྱབ་ཧྲུའུ་ཅི་དང་ཏང་ཀྲུང་དབྱང་ལ་སྙིང་དབུས་ནས་ཐུགས་རྗེ་ཆེ་ཞུ་གི་ཡོད། ཏང་ལ་ཡིད་ཆེས་ཆེན་པོ་བྱེད་པ་དང་། ཏང་ལ་བློ་བརྟན་འགྱུར་མེད་ངང་བརྩི་བཀུར་ཞུ་བ། ཏང་གི་རྗེས་སུ་ལྷག་བསམ་རྣམ་དག་ངང་འབྲང་བ་བཅས་བྱས་ནས། བློ་བརྟན་འགྱུར་མེད་ངང་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲངས་བ་བཅས་བྱེད་ཀྱི་ཡོད། དེང་གི་བོད་ལྗོངས་སུ་མི་སེམས“འཆམ་མཐུན”ལ་ཕྱོགས་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་པ་དང་ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་རྒྱུ་དེ་ལས་ཀའི་གཙོ་རྐང་དུ་འཛིན་རྒྱུ་མཐའ་འཁྱོངས་ཀྱིས་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་ཁུལ་འཛུགས་གཏོད་སྲོལ་ཡིག་ལ་བཟོ་བཅོས་དང་འཐུས་སྒོ་ཚང་དུ་བཏང་སྟེ། མི་རིགས་ཁག་གི་མང་ཚོགས་མཐུན་སྒྲིལ་མཉམ་གནས་དང་། མཐུན་སྒྲིལ་རོགས་རེས། མཐུན་སྒྲིལ་མདུན་སྐྱོད་བཅས་བྱས་ནས་སེ་འབྲུའི་རྡོག་ལྟར་གོང་བུ་གཅིག་ཏུ་སྒྲིལ་བཞིན་ཡོད། དེང་གི་བོད་ལྗོགས་སུ་མི་སེམས“བཟང་པོར”ཕྱོགས་ནས“བརྟན་ལྷིང་དང་། འཕེལ་རྒྱས། སྐྱེ་ཁམས། མཐའ་སྟོབས”བཅས་དོན་ཆེན་བཞི་རྣམ་གྲངས་ཅན་དང་། ཞིབ་ཐོ་ཅན། གཞི་རྟེན་ཅན་བཅས་ལ་གྱུར་པ་དང་། མི་རིགས་ཁག་གི་མང་ཚོགས་ཀྱིས་དེ་བས་མཛེས་སྡུག་ལྡན་པའི་འཚོ་བ་དོན་གཉེར་བྱེད་པའི་འདོད་བློ་ཇེ་ཆེར་ཕྱིན་ནས་མཛེས་སྡུག་ལྡན་པའི་ཁྱིམ་གཞིས་འཛུགས་སྐྲུན་བྱ་ཆེད་འབད་འཐབ་ལྷོད་མེད་བྱེད་བཞིན་ཡོད།