ཀརྨ་ཚེ་བརྟན་སྲིད་གཞུང་གི་ལས་དོན་སྙན་སྒྲོན་ལ་གྲོས་ཞིབ་བྱེད་པའི་ཚོགས་འདུར་ཞུགས་པ།
ཉེ་ཆར། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ། རང་སྐྱོང་ལྗོངས་ཀྱི་ཀྲུའུ་ཞི་བཅས་ཡིན་པའི་ཀརྨ་ཚེ་བརྟན་གྱིས་སྲིད་གཞུང་གི་ལས་དོན་སྙན་སྒྲོན་ལ་གྲོས་ཞིབ་གནང་སྐབས། བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ཕྱོགས་ཡོངས་ནས་ལག་བསྟར་དོན་འཁྱོལ་གྱིས་བློ་བརྟན་འགྱུར་མེད་ངང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁྲིད་སྟོན་གནང་བའི་ཕྱོགས་སུ་མདུན་སྐྱོད་བྱས་ཏེ། དམིགས་ཚད་ལ་གཞིགས་པ་དང་རང་འགུལ་ངང་བྱ་སྤྱོད་སྤེལ་ནས་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་ཕྱོགས་ཡོངས་ནས་འཛུགས་སྐྲུན་བྱེད་རིང་གོམ་སྟབས་བརྟན་པོ་སྤོ་དགོས་པའི་ནན་བཤད་གནང་བ་རེད།
ཀརྨ་ཚེ་བརྟན་གྱིས་སྲིད་གཞུང་གི་ལས་དོན་སྙན་སྒྲོན་ལ་རྦད་དེ་མོས་མཐུན་ཡོད་ཅེས་གསུངས་པ་དང་། ཁོང་གིས། ཙུང་ལི་ལི་ཆང་གིས་གནང་བའི་སྲིད་གཞུང་གི་ལས་དོན་སྙན་སྒྲོན་ནང་གྲུབ་འབྲས་ཕྱོགས་བསྡོམས་གནང་བ་དངོས་ཐོག་བདེན་འཚོལ་དང་གྲངས་གཞི་ཞིབ་ཅིང་བདེན་པ་དང་། གནད་དོན་ལ་དབྱེ་ཞིབ་བྱས་ནས་ངོས་འཛིན་གཏིང་ཟབ་བྱུང་བ་དང་དོན་དངོས་དང་མཐུན་པ། ལས་དོན་བཀོད་སྒྲིག་གནང་བའི་དམིགས་ཚད་དང་གོ་རིམ་ཁ་གསལ་བ་བཅས་ཡོད་པས། དར་ཆ་མཐོན་པོར་སྒྲེང་བ་དང་། ནང་དོན་ཕུན་སུམ་ཚོགས་པ། དམ་པ་དོན་གཉེར། ཐུན་མོང་ངོས་འཛིན་གཅིག་སྒྲིལ་བཅས་ཀྱི་སྙན་སྒྲོན་ཡག་པོ་ཞིག་རེད་ཅེས་གསུངས་པ་རེད། ཀརྨ་ཚེ་བརྟན་གྱིས། སྙན་སྒྲོན་ལས་སེམས་ཤུགས་རབ་ཏུ་འཕེལ་བ་དང་འཕེལ་རྒྱས་ཀྱི་དམིགས་ཚད་ལས་མི་རྣམས་ཡར་རྒྱས་ཡོང་བར་སྐུལ་མ་ཐེབས་ཡོད། འདི་ལོ་ནི“ལོ་ལྔ་ཚན་བཅུ་བཞི་པའི”འཆར་འགོད་ཀྱི་མཇུག་བསྡུའི་ལོ་ཡིན། སྲིད་གཞུང་གི་ལས་དོན་སྙན་སྒྲོན་ནང་གི་དམིགས་ཚད་གཏན་འཁེལ་ལས་གདིང་ཤུགས་མངོན་པ་དང་། སྲིད་ཇུས་དང་བྱེད་ཐབས་ཀྱིས་གནད་སྨིན་ཤུགས་འདོན་བྱས་ལ། ལས་འགན་བཀོད་སྒྲིག་ཐད་དངོས་སྒྲུབ་ལ་དམིགས་ནས“ལོ་ལྔ་ཚན་བཅོ་ལྔ་པའི”འགོ་ཡག་པོ་འཛུགས་པར་རྨང་གཞི་བརྟན་པོ་བཏིངས་ཡོད། བོད་ལྗོངས་ནས་བལྟས་ན། རང་སྐྱོང་ལྗོངས་ཏང་ཨུད་ཀྱིས་ཞི་ཅིན་ཕིང་གི་དཔལ་འབྱོར་དགོངས་པ་དང་། བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་ནན་ཏན་བྱས་ཏེ། “དོན་ཆེན་བཞིར”དམིགས་པ་དང“འཛུཌ་གཏོད་བཞིར”ཤུགས་བརྒྱབ་ནས་བོད་ཀྱི་བྱ་གཞག་ཁག་ལ་རྒྱུན་ཆད་མེད་པར་ཕན་འབྲས་གསར་པ་ཐོབ་རྒྱུར་སྐུལ་འདེད་བཏང་ཡོད་ཅེས་གསུངས་པ་རེད།
ཀརྨ་ཚེ་བརྟན་གྱིས། སྙན་སྒྲོན་ནང་མི་དམངས་གོང་དུ་བཀུར་བའི་བསམ་བློ་འགོ་ནས་མཇུག་བར་ཁྱབ་ཡོད་པས་མི་སེམས་དྲོ་བ་ཞིག་འདུག སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ཀྱི་ལས་དོན་ལ་ཚད་མཐོའི་མཐོང་ཆེན་དང་བོད་ཀྱི་མི་དམངས་ལ་ཐུགས་ཁུར་གཟབ་བཞེས་གནང་གི་ཡོད། ལྷག་པར་དུ་ད་ལོར་དིང་རིར་ས་ཡོམ་བྱུང་རྗེས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འཕྲལ་མར་མཛུབ་སྟོན་གལ་ཆེན་གནང་བ་དང་། ཆེད་མངགས་ཀྲུང་དབྱང་ཆབ་སྲིད་ཅུས་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་གཙོ་སྐྱོང་གནང་སྟེ་ཡོམ་འགོག་གེགས་སེལ་ལས་དོན་ཞིབ་འཇུག་བཀོད་སྒྲིག་གནང་ནས་ང་ཚོར་ཡོམ་འགོག་གེགས་སེལ་དང་གེགས་རྗེས་སླར་གསོ་བསྐྱར་སྐྲུན་ཡག་པོ་བྱེད་པར་རྩ་བའི་གཞི་འཛིན་ས་མཁོ་འདོན་གནང་བ་དང་རྒྱལ་ཁ་ཐོབ་ངེས་ཀྱི་ཡིད་ཆེས་ཆེ་རུ་བཏང་ཡོད། ང་ཚོས་ཐོག་མཐའ་བར་གསུམ་དུ་མི་དམངས་ཀྱི་ཕྱོགས་སུ་བརྟན་པོར་ལངས་པ་དང་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་བརྟན་པོར་བཙུགས་ཚེ། དམངས་འཚོ་ལེགས་གཏོང་དང་། མི་སེམས་གཅིག་སྒྲིལ། འཕེལ་རྒྱས་མཉམ་སྤྱོད་བཅས་མངོན་འགྱུར་ཐུབ་ངེས་ཡིན་པ་དོན་དངོས་ལས་ར་འཕྲོད་ཐུབ་ཡོད་ཅེས་གསུངས་པ་རེད།